དཔེ་དགུ་དོན་དགུ་སྦྱོར་ཚུལ། ༦ ༧ ༨ ༩

 ༄༅།   །ནམོགུརུ།  (དཔེ་དགུ་དོན་དགུའི་བདུན་པ་༼མཐོང་སྤང་གློ་བུར་བར་དཔེས་བསྒྲུབ་པ་༽ལ་བསྟན་བཤད་གཉིས་ཀྱི། དང་པོ་བསྟན་པ་ལ་དཔེ་ནི། རྩ་བ་ལས།) 

ཇི་ལྟར་ཨ་མྲ་ལ་སོགས་ཤིང་འབྲས་ལ།།

ཡོད་པའི་ས་བོན་མྱུ་གུ་འཇིག་མེད་ཆོས།།

ས་རྨོས་ཆུ་སོགས་ལྡན་ལས་ལྗོན་ཤིང་གི།

རྒྱལ་པོའི་དངོས་པོར་རིམ་གྱིས་འགྲུབ་པ་ལྟར།།

(ཞེས་གསུངས། དོན་ནི།) ཇི་ལྟར་(ཏེ་དཔེར་ན་)ཨ་མྲ་(དང་)ལ་སོགས་(པས་བསྡུས་པ་མ་དུ་ཀ་ལ་སོགས་པའི་)ཤིང་འབྲས་ལ་ཡོད་པའི་ས་བོན་མྱུ་གུ་(སྐྱེ་བའི་ནུས་པ་)འཇིག་(པ་)མེད་(པའི་)ཆོས་(དེ་ཉིད། ལྷན་ཅིག་བྱེད་རྐྱེན་)ས་རྨོས་(པ་དང་།) ཆུ་(དང་)སོགས་(ཀྱིས་བསྡུས་པ་ལུད་དང་དྲེད་གཤེར་སོགས་དང་)ལྡན་པའི་(སྒོ་ནས་བཏབ་པ་ལས།) ལྗོན་ཤིང་གི་རྒྱལ་པོའི་དངོས་པོ་རིམ་གྱིས་འགྲུབ་པ་ལྟར། (ཞེས་པའོ།།)

(དོན་ནི། རྩ་བ་ལས། 

སེམས་ཅན་རྣམས་ཀྱི་མ་རིག་སོགས་འབྲས་ཀྱི།། 

པགས་སྦུབས་ནང་ཆུད་ཆོས་ཁམས་དགེ་བ་ཡང་།།

དེ་བཞིན་དགེ་བ་དེ་དེ་ལ་བརྟེན་ནས།། 

རིམ་གྱིས་ཐུབ་པའི་རྒྱལ་པོའི་དངོས་པོར་འགྱུར།། 

ཞེས་གསུངས། དོན་ནི།) སེམས་ཅན་རྣམས་ཀྱི་(རྒྱུད་ཀྱི་)མ་རིག་(པ་ལ་)སོགས་(པའི་ཉོན་མོངས་པའི་དྲི་མ་ཤིང་)འབྲས་ཀྱི་པགས་(པའི་)སྦུབས་(དང་འདྲ་བའི་)ནང་(དུ་)ཆུད་(པའི་རང་བཞིན་གྱིས་རྣམ་པར་དག་པའི་)ཆོས་ཁམས་དགེ་བ་(དེ་)ཡང་དེ་བཞིན་(དུ། རིགས་སད་པའི་རྐྱེན་དད་པ་དང་སྙིང་རྗེ་ནས་བཟུང་སྟེ། ཐེག་པ་ཆེན་པོའི་ལམ་གྱི་)དགེ་བ་དེ་(དང་)དེ་ལ་བརྟེན་ནས་རིམ་གྱིས་ཐུབ་པའི་རྒྱལ་པོའི་དངོས་པོར་འགྱུར(བ་ཡིན་ནོ།། ཞེས་པའོ།།)

(གཉིས་པ་དེ་ཉིད་འཆད་པ་ནི། རྩ་བ་ལས།)

ཆུ་དང་ཉི་མའི་འོད་དང་རླུང་དང་ས་དུས་ནམ་མཁའི་རྐྱེན་རྣམས་ཀྱིས།།

ཏཱ་ལ་དང་ནི་ཨ་མྲའི་འབྲས་སྦུབས་གསེབ་ནས་ཤིང་རྐྱེན་ཇི་ལྟ་བར།།

སེམས་ཅན་ཉོན་མོངས་འབྲས་ལྤགས་ནང་ཆུད་རྫོགས་སངས་ས་བོན་མྱུ་གུ་ཡང་།།

དེ་བཞིན་དགེ་རྐྱེན་དེ་དང་དེ་ཡིས་ཆོས་མཐོན་འཕེལ་བར་འགྱུར་བ་ཡིན།།

(ཞེས་གསུངས། དོན་ནི། དཔེར་ན།)ཆུ་དང་། ཉི་མའི་འོད་དང་། རླུང་དང་། ས་(དང་། ནམ་)དུས་(དང་། གོ་འབྱེད་པར་བྱེད་པ་)ནམ་མཁའི་(ཁམས་སྟེ་ལྷན་ཅིག་བྱེད་)རྐྱེན་རྣམས་ཀྱིས་(གྲོགས་བྱེད་པ་ལ་བརྟེན་ནས། ཉེར་ལེན་ཤིང་)ཏཱ་ལ་དང་ནི་ཨ་མྲའི་འབྲས་(བུའམ་ས་བོན་གྱི་)སྦུབས་གསེབ་ནས་(ལྗོན་)ཤིང་(དེ་དང་དེ་)སྐྱེ་(བ་)ཇི་ལྟ་བར། སེམས་ཅན་(རྣམས་ཀྱི་)ཉོན་མོངས་པ་(ཤིང་)འབྲས་ཀྱི་ཤུན་)ལྤགས་(དང་འདྲ་བ་དེའི་)ནང་(དུ་)ཆུད་(པའི་)རྫོགས་(པའི་)སངས་(རྒྱས་ཀྱི་)ས་བོན་(ཁམས་བདེ་གཤེགས་སྙིང་པོ་དེ་ལ་བརྟེན་ནས་སངས་རྒྱས་ཀྱི་)མྱུ་གུ་(འགྲུབ་པ་)ཡང་། (དཔེའི་སྐབས་སུ་བཤད་པ་)དེ་བཞིན་(དུ་ཐོས་བསམ་སྒོམ་གསུམ་གྱི་)དགེ་(བའི་)རྐྱེན་དེ་དང་དེ་ལས་ཆོས་(རྣམས་ཀྱི་གནས་ལུགས་མཐར་ཐུག་པ་དེ་ཉིད་དང་པོར་མངོན་སུམ་དུ་)མཐོང་(བ་དང་། རིམ་གྱིས་གོང་ནས་གོང་དུ་)འཕེལ་བར་(འགྱུར་ཞིང་། མཐར་སངས་རྒྱས་ཐོབ་པར་)འགྱུར་བ་ཡིན་(ནོ།། ཞེས་པའོ།། 

འདིར་སྒྲིབ་བྱེད་མཐོང་སླང་ནི་ཤུན་པའི་སྦུབས་དང་འདྲ་ལ། བསྒྲིབ་བྱ་དེ་བཞིན་གཤེགས་པའི་ཁམས་ནི་ས་བོན་འདྲ་བར་སྦྱར་བའོ།། དེས་ན་འདི་དག་གིས་ནི་མཐོང་སྤང་ཀུན་བརྟགས་ཀྱིས་ནོན་པའི་སེམས་ཀྱི་སྙིང་པོ་དེ་ཤུན་པགས་ཀྱིས་བཏུམས་པའི་ས་བོན་གྱི་དཔེས་མཚོན་ནས་མཐོང་སྤང་གི་དྲི་མ་གློ་བུར་བར་བསྟན་པར་སེམས་སོ།།)

(དཔེ་དགུ་དོན་དགུའི་དྲུག་པ་༼སྒོམ་སྤང་གློ་བུར་བར་དཔེས་བསྒྲུབ་པ་༽ལ་བསྟན་བཤད་གཉིས་ཀྱི། དང་པོ་བསྟན་པ་ལ་དཔེ་ནི། རྩ་བ་ལས།)

ཇི་ལྟར་རིན་ཆེན་ལས་བྱས་རྒྱལ་བའི་གཟུགས།།

གོས་ཧྲུལ་དྲི་ངན་གྱིས་ནི་བཏུམས་གྱུར་པ།།

ལམ་གནས་ལྷ་ཡིས་མཐོང་ནས་གྲོལ་བྱའི་ཕྱིར།།

ལམ་གནས་དོན་དེ་དེ་ལ་སྨྲ་བ་ལྟར།།

(ཞེས་གསུངས། དོན་ནི།) ཇི་ལྟར་(ཏེ་དཔེར་ན་གསེར་དངུལ་སོགས་)རིན་ཆེན་ལས་བྱས་(པའི་)རྒྱལ་བའི་གཟུགས་(ཞིག་)གོས་རུལ་དྲི་ངན་གྱིས་ནི་བ ཏུམས་(པར་)གྱུར་པ་(འབྲོག་དགོན་པའི་)ལམ་(ན་)གནས་(པ་མི་རྣམས་ཀྱིས་འགོམ་ཞིང་འགྲོ་བ་ལམ་དེ་ན་ཡོད་པའི་)ལྷ་ཡིས་མཐོང་ནས་(སྒྲིབ་བྱེད་དང་འགོམ་པ་དེ་ལས་)གྲོལ་(བར་)བྱ(་བ)འི་ཕྱིར་ལམ་(ན་རྒྱལ་བའི་སྐུ་གཟུགས་)གནས་(པའམ་བཞུགས་)པའི་དོན་དེ་(མི་དེ་(རྣམས་)ལ་སྨྲས་པ་ལྟར། (ཞེས་པའོ།།)

(དོན་ནི། རྩ་བ་ལས།)

ཐོགས་མེད་སྤྱན་མངའ་རྣམ་པ་སྣ་ཚོགས་ཀྱི།། ཉོན་མོངས་ཀྱིས་གཏུམས་བདེ་གཤེགས་དངོས་པོ་ཉིད།།

དུད་འགྲོ་ལ་ཡང་གཟིགས་ནས་དེ་བཞིན་དེ།།

ཐར་པར་བྱ་བའི་དོན་དུ་ཐབས་སྟོན་མཛོད།།

(ཅེས་གསུངས། དོན་ནི། དཔེ་)དེ་བཞིན་དུ་ཐོགས་(པ་)མེད་(པའི་སངས་རྒྱས་ཀྱི་)སྤྱན་མངའ་(བའི་དེ་བཞིན་གཤེགས་པས་(རྣམ་པ་སྣ་ཚོགས་ཀྱི་ཉོན་མོངས་ཀྱིས་བཏུམས་(པའི་ཁམས་)བདེ་གཤེགས་སྙིང་པོའམ་)དངོས་པོ་(དེ་)ཉིད་དུད་འགྲོ་ལ་ཡང་གཟིགས་ནས། (དཔེའི་སྐབས་སུ་བཤད་པ་)དེ་བཞིན་དུ་(སངས་རྒྱས་སྙིང་པོ་ཅན་གྱི་ལུས་ཅན་དེ་(རྣམས་ཉོན་མོངས་པའི་གོས་ཧྲུལ་ལས་)ཐར་བར་བྱ་བའི་དོན་དུ་(སངས་རྒྱས་རྣམས་ཀྱིས་རིགས་ཅན་གསུམ་གྱི་ལམ་གྱིས་བསྡུས་པའི་)ཐབས་སྟོན་(པར་)མཛད་(དོ།།) ཞེས་པའོ།། 

(གཉིས་པ་དེ་ཉིད་འཆད་པ་ནི། རྩ་བ་ལས།) 

ཇི་ལྟར་རིན་ཆེན་རང་བཞིན་དེ་བཞིན་གཤེགས་སྐུ་དྲི་ངན་གོས་གཏུམས་པ།།

ལམ་གནས་ལྷ་ཡི་མིག་གིས་མཐོང་ནས་ཐར་ཕྱིར་མི་ལ་སྟོན་པ་ལྟར།།

དེ་བཞིན་ཉོན་མོངས་གོས་ཧྲུལ་གྱིས་གཏུམས་འཁོར་བའི་ལམ་ན་གནས་པའི་ཁམས།།

དུད་འགྲོ་ལ་ཡང་གཟིགས་ནས་ཐར་པར་བྱ་ཕྱིར་རྒྱལ་བ་ཆོས་སྟོན་ཏོ།། 

(ཞེས་གསུངས། དོན་ནི།) ཇི་ལྟར་(ཏེ་དཔེར་ན་)རིན་ཆེན་རང་བཞིན་གྱི་དེ་བཞིན་གཤེགས་པའི་སྐུ་(གཟུགས་)དྲི་(མ་)ངན་པ་ཅན་གྱི་གོས་ཀྱིས་བཏུམས་པ་(ཞིག་མི་རྣམས་འགྲོ་བའི་)ལམ་(ན་)གནས་(པའམ་ཡོད་པ་དེ་དེར་ཡོད་པའི་)ལྷ་ཡི་ལྷའི་མིག་གིས་མཐོང་ནས་(སྒྲིབ་བྱེད་ལས་)ཐར་(བའི་)ཕྱིར་མི་ལ་སྟོན་པ་ལྟར། (དཔེ་)དེ་བཞིན་དུ་ཉོན་མོངས་(པའི་)གོས་ཧྲུལ་གྱིས་བཏུམས་(ནས་)འཁོར་བའི་ལམ་ན་གནས་་པའི་ཁམས་(བདེ་གཤེགས་སྙིང་པོ་རང་བཞིན་གྱིས་རྣམ་པར་དག་པ་དེ་མི་ལྟ་ཅི་སྨོས།) དུད་འགྲོ་ལ་ཡང་(ཡོད་པར་སངས་རྒྱས་ཀྱིས་)གཟིགས་ནས་(ལུས་ཅན་རྣམས་འཁོར་བ་ལས་)ཐར་པར་བྱ་(བའི་)ཕྱིར་རྒྱལ་བ་(དེ་བཞིན་གཤེགས་པས་གདུལ་བྱ་རྣམས་ལ་སྐལ་བ་དང་འཚམས་པའི་)ཆོས་སྟོན་ཏོ།། (ཞེས་པའོ།། 

འདིར་སྒྲིབ་བྱེད་སྒོམ་སྤང་ནི་གོས་ཧྲུལ་པ་དང་འདྲ་ལ། བསྒྲིབ་བྱ་དེ་བཞིན་གཤེགས་པའི་ཁམས་ནི་རིན་པོ་ཆེའི་སྐུ་གཟུགས་དང་འདྲ་བར་སྦྱར་བའོ།། དེས་ན་འདི་དག་གིས་ནི་སྒོམ་སྤང་ལྷན་སྐྱེས་ཀྱིས་བཅིངས་པའི་སེམས་ཀྱི་སྙིང་པོ་དེ་དག་དཀའ་བའི་དྲི་ངན་ཅན་གོས་ཧྲུལ་གྱིས་བསྒྲིལ་བའི་སྐུ་གཟུགས་ཀྱི་དཔེས་མཚོན་ནས་སྒོམ་སྤང་གི་དྲི་མ་གློ་བུར་བར་བསྟན་པར་སེམས་སོ།།)

(དཔེ་དགུ་དོན་དགུའི་བརྒྱད་པ་༼ མ་དག་པའི་ས་ལ་བརྟེན་པའི་དྲི་མ་གློ་བུར་བར་དཔེས་བསྒྲུབ་པ་༽ལ་བསྟན་བཤད་གཉིས་ཀྱི། དང་པོ་བསྟན་པ་ལ་དཔེ་ནི། རྩ་བ་ལས།)

ཇི་ལྟར་མི་མོ་གཟུགས་ངན་མགོན་མེད་འགའ།།

མགོན་མེད་འདུག་གནས་སུ་ནི་འདུག་གྱུར་ལ།།

མངལ་གྱིས་རྒྱལ་པོའི་དཔལ་ནི་འཛིན་བྱེད་པས།།

རང་ལྟོ་ན་ཡོད་མི་བདག་མི་ཤེས་ལྟར།།  

 (ཞེས་གསུངས། དོན་ནི།) ཇི་ལྟར་(ཏེ་དཔེར་ན་)མི་མོ་(བུད་མེད་བྱད་)གཟུགས་ངན་(ཞིང་དབུལ་ལ།) མགོན་མེད་(པ་)འགའ་(ཞིག་ལ།) རྡུག་འཕོངས་ལས་སྐྱོབ་པའི་)མགོན་(བྱེད་པ་སུ་ཡང་)མེད་(པའི་ཁྱིམ་གྱི་)འདུག་གནས་སུ་ནི་འདུག་(པར་)གྱུར་ལ། (རང་གི་)མངལ་གྱིས་(འཁོར་ལོས་བསྒྱུར་བའི་)རྒྱལ་བོའི་དཔལ་ནི་(མེར་མེར་པོ་ལ་སོགས་པའི་ངོ་བོར་)འཛིན་པར་བྱེད་པས་རང་གི་ལྟོ་(བ་)ན་(གླིང་བཞིའི་)མི་བདག་(ཏུ་འགྱུར་བའི་ཆོས་ཡོད་པ་)་མི་ཤེས་པ(ས་སྡུག་བསྔལ་བ་)ལྟར། ཞེས་པའོ།། 

(དོན་ནི། རྩ་བ་ལས།)

སྲིད་པར་སྐྱེ་བ་མགོན་མེད་ཁྱིམ་བཞིན་ཏེ།།

མ་དག་སེམས་ཅན་མངལ་ལྡན་བུད་མེད་བཞིན།།

དེ་ལ་གང་ཞིག་ཡོད་པས་མགོན་བཅས་པ།།

དྲི་མེད་ཁམས་ནི་དེ་ཡི་མངལ་གནས་བཞིན།།

(ཞེསགསུངས། དོན་ནི། ཁམས་གསུམ་གྱི་)སྲིད་པར་སྐྱེས་པ་(ནི།) མགོན་མེད་(པའི་ཁྱིམ་(ན་)གནས་(པ་)བཞིན་(ཏེ་འདྲ་ལ། གློ་བུར་གྱི་དྲི་མས་)མ་དག་(པའི་)སེམས་ཅན་་(ནི།) མངལ་(ན་འཁོར་བསྒྱུར་དང་)ལྡན་(པའི་)བུད་མེད་བཞིན་(ནོ།། དེ་ལ་གང་ཞིག་ཡོད་པས་(མཐར་རིམ་གྱིས་)མགོན་(དང་)བཅས་པ(ར་འགྱུར་བ་རང་བཞིན་གྱིས་)དྲི་(མ་)མེད་(པའི་)ཁམས་(བདེ་གཤེགས་སྙིང་པོ་)ནི། (བུད་མེད་)དེ་ཡི་མངལ་(ན་མི་བདག་གི་ས་བོན་མེར་མེར་པོ་ལ་སོགས་པའི་ངོ་བོར་)གནས་(པ་)བཞིན་(ནོ།། ཞེས་པའོ།།)

(གཉིས་པ་དེ་ཉིད་འཆད་པ་ནི། རྩ་བ་ལས།)

ཇི་ལྟར་བུད་མེད་ལུས་ལ་དྲི་བཅས་གོས་གྱོན་མི་སྡུག་གཟུགས་ལྡན་པ།།

ས་བདག་མངལ་ན་གནས་ཀྱང་མགོན་མེད་ཁང་པར་སྡུག་བསྔལ་མཆོག་མྱོང་ལྟར།།

དེ་བཞིན་བདག་རང་ནང་གནས་མགོན་ཡོད་གྱུར་ཀྱང་མགོན་མེད་བློ་ལྡན་པ།།

འགྲོ་བ་ཉོན་མོངས་དབང་གིས་ཡིད་མ་ཞི་བས་སྡུག་བསྔལ་གཞི་ལ་གནས།།

(ཞེས་གསུངས། དོན་ནི།) ཇི་ལྟར་(ཏེ་དཔེར་ན་)བུད་མེད་(ཀྱི་)ལུས་ལ་དྲི་(མ་དང་)བཅས་(པའི་)གོས་གྱོན་(ཅིང་།) མི་སྡུག་(པའི་)གཟུགས་(དང་)ལྡན་པ། ས་(ཡི)བདག་(པོ་)མངལ་(གྱི་ནང་)ན་གནས་ཀྱང་། (དེར་)མི་ཤེས་(པར་སྐྱོབ་པའི་)མགོན་མེད་(པའི་)ཁང་པར་སྡུག་བསྔལ་མཆོག་(ཡིད་མི་བདེ་བ་)མྱོང་བ་ལྟར།

(དཔེ་)དེ་བཞིན་(དུ་སེམས་ཅན་)བདག་རང་(གི་ནང་)ན་(བདེ་གཤེགས་སྙིང་པོ་)གནས་(པས་)མགོན་ཡོད་པར་གྱུར་ཀྱང་། (བདག་ལ་)མགོན་མེད་(དོ་སྙམ་པའི་)པའི་བློ་དང་ལྡན་པ། འགྲོ་བ་ཉོན་མོངས་(པའི་)དབང་གིས་ཡིད་(ཀྱི་རྒུད་པ་མཐའ་དག་)མ་ཞི་བས། (འཁོར་བའི་སྡུག་བསྔལ་(གྱི་)གཞི་ལ་གནས་(པ་རྣམས་ཀྱི་ཉོན་མོངས་པ་ཞི་བའི་ཆེད་དུ་སངས་རྒྱས་རྣམས་ཀྱིས་ཆོས་སྟོན་པར་མཛད་དོ།། ཞེས་པའོ།། རྩ་བར། སྒྲིབ་པ་སེལ་བྱེད་དངོས་སུ་མ་སྨོས་ཀྱང་གོང་འོག་ལྟར་ཤེས་པར་བྱ་བར་རྒྱུད་བླ་ཐོགས་འགྲེལ་ལས་སོ།། 

འདིར་སྒྲིབ་བྱེད་མ་དག་པའི་སའི་དྲི་མ་ནི་སེམས་ཅན་ཞུགས་པའི་བུད་མེད་དང་འདྲ་ལ། བསྒྲིབ་བྱ་དེ་བཞིན་གཤེགས་པའི་ཁམས་ནི་མེར་མེར་པོ་སོགས་ལ་གནས་པའི་འཁོར་ལོས་བསྒྱུར་བའི་རྒྱལ་པོ་དང་འདྲ་བར་སྦྱར་བའོ།། དེས་ན་འདི་དག་གིས་ནི་བདེན་འཛིན་གྱི་དྲི་མ་དང་བཅས་པའི་མ་དག་པའི་ས་པའི་སེམས་ཀྱི་སྙིང་པོ་དེ་བུད་མེད་ངན་མའི་ལྟོ་ན་གནས་པའི་འཁོར་སྒྱུར་གྱི་དཔེས་མཚོན་ནས་མ་དག་པའི་ས་་ལ་བརྟེན་པའི་དྲི་མ་གློ་བུར་བར་བསྟན་པར་སེམས་སོ།།) 

(དཔེ་དགུ་དོན་དགུའི་དགུ་པ་༼དག་པའི་ས་ལ་བརྟེན་པའི་དྲི་མ་གློ་བུར་བར་དཔེས་བསྒྲུབ་པ་༽ལ་བསྟན་བཤད་གཉིས་ཀྱི། དང་པོ་བསྟན་པ་ལ་དཔེ་ནི། རྩ་བ་ལས།) 

ཇི་ལྟར་ནང་གི་གསེར་ཞུན་གཟུགས་རྒྱས་པ།།

ཞི་བ་ཕྱི་རོལ་ས་ཡི་རང་བཞིན་ཅན།།

མཐོང་ནས་དེ་ཤེས་པ་དག་ནང་གི་གསེར།།

སྦྱང་ཕྱིར་ཕྱི་རོལ་སྒྲིབ་པ་སེལ་བྱེད་ལྟར།།

(ཞེས་གསུངས། དོན་ནི།) ཇི་ལྟར་(ཏེ་དཔེར་ན་འཇིམ་པའི་)ནང་གི་གསེར་ཞུན་(མ་ལས་བྱས་པའི་དེ་བཞིན་གཤེགས་པའི་སྐུ་)གཟུགས་(ཡན་ལག་ཐམས་ཅད་རྫོགས་པས་)རྒྱས་པ། (གསེར་གྱི་སྐྱོན་)ཞི་བ་ཕྱི་རོལ་ས་ཡི་རང་བཞིན་ཅན་(འཇིམ་པས་གཡོགས་པ་)མཐོང་ནས་དེ་ཤེས་པ་དག་(གིས་ནི་)ནང་གི་གསེར་སྦྱང་(བའི་)ཕྱིར་ཕྱི་རོལ་(གྱི་)སྒྲིབ་པ་སེལ་བ(ར་བྱེད་པ་)ལྟར། (ཞེས་པའོ།།)

(དོན་ནི། རྩ་བ་ལས།)

རང་བཞིན་འོད་གསལ་དྲི་མེད་རྣམས་ཀྱང་ནི།།

གློ་བུར་བར་ནི་རྣམ་པར་གཟིགས་གྱུར་ནས།།

རིན་ཆེན་འབྱུང་གནས་ལྟ་བུའི་འགྲོ་བ་རྣམས།།

སྒྲིབ་པ་དག་ལས་སྦྱོང་མཛད་བྱང་ཆུབ་མཆོག།

(ཞེས་གསུངས། དོན་ནི།) སེམས་ཀྱི་རང་བཞིན་འོད་གསལ་(སྒྲིབ་བྱེད་ཀྱི་)དྲི་མ་རྣམས་ཀྱང་ནི། (སེམས་དང་འབྲལ་རུང་གི་)གློ་བུར་བར་ནི་རྣམ་པར་གཟིགས་(པར་)གྱུར་ནས། (སངས་རྒྱས་ཆོས་སྐྱེ་རུང་གི་གནས་སུ་གྱུར་པས།) རིན་ཆེན་འབྱུང་གནས་ལྟ་བུའི་འགྲོ་བ་རྣམས་སྒྲིབ་པ་དག་ལས་སྦྱོང་(བར་)མཛད་(ཅིང་།) ༡ བྱང་ཆུབ་མཆོག་(དག་པ་གཉིས་ལྡན་དེ་ཐོབ་པར་མཛད་དོ།། ༢ ཡང་ན་གང་གིས་སྒྲིབ་པ་སྦྱོང་བར་མཛད་ཅེ་ན།) བྱང་ཆུབ་མཆོག་(སངས་རྒྱས་ཀྱིས་སོ།།)

(གཉིས་པ་དེ་ཉིད་འཆད་པ་ནི། རྩ་བ་ལས།) 

ཇི་ལྟར་དྲི་མེད་གསེར་འབར་ལས་བྱས་ས་ཡི་ནང་དུ་ཆུད་གྱུར་གཟུགས།།

ཞི་དེ་རང་བཞིན་མཁས་པས་རིག་ནས་ས་དག་སེལ་བར་བྱེད་པར་ལྟར།།

དེ་བཞིན་ཀུན་མཁྱེན་དག་པའི་གསེར་འདྲ་ཞི་བའི་ཡིད་ནི་མཁྱེན་གྱུར་ནས།།

ཆོས་འཆད་ཚུལ་གྱིས་བརྡེག་སྤྱད་སྒྲུབ་པས་སྒྲིབ་པ་དག་ནི་སེལ་བར་མཛད།།

ཅེས་གསུངས། དོན་ནི།) ཇི་ལྟར་(ཏེ་དཔེར་ན་)དྲི་(མ་)མེད་(པའི་)གསེར་འབར་(བ་)ལས་བྱས་པ། སའི་ནང་དུ་ཆུད་(པར་)གྱུར་(པའི་)གཟུགས་(མཛེས་ཤིང་)ཞི་(བ་(དེ་(རིན་པོ་ཆེ་བརྟག་དཔྱད་ཀྱི་)རང་བཞིན་(ལ་)མཁས་པས་རིག་ནས་ས་དག་སེལ་བར་བྱེད་པ་ལྟར། (དཔེ་)དེ་བཞིན་(དུ་)ཀུན་མཁྱེན་(གྱིས་)དག་པའི་གསེར་(དང་)འདྲ་(བ་)ཞི་བའི་ཡིད་(རང་བཞིན་རྣམ་དག་)ནི་མཁྱེན་(པར་)གྱུར་ནས་(རིན་པོ་ཆེ་ལ་ཡོད་པའི་)ས་དག་(ལག་ཆས་)སེལ་བར་བྱེད་པ་ལྟར། (དཔེ་)དེ་བཞིན་(དུ་)ཀུན་མཁྱེན་(སངས་རྒྱས་ཀྱིས་)དག་པའི་གསེར་(དང་)འདྲ་(བ་)ཞི་བའི་ཡིད་(རང་བཞིན་རྣམ་དག་)ནི་མཁྱེན་(པར་)གྱུར་ནས། (གློ་བུར་གྱི་དྲི་མ་སྦྱོང་བྱེད་ཐེག་གསུམ་གྱི་ལམ་འབྲས་བུ་དང་བཅས་པའི་)ཆོས་འཆད་(པའི་)ཚུལ་གྱིས་རྡེག་སྤྱད་བསྒྲུབས་པས་སྒྲིབ་པ་དག་ནི་སེལ་བར་མཛད་(པར་ཤེས་པར་་་་བྱའོ།། ཞེས་པའོ།། 

འདིར་སྒྲིབ་བྱེད་དག་སའི་དྲི་མ་ནི་སའི་འདམ་གོས་པ་དང་འདྲ་ལ། བསྒྲིབ་བྱ་དེ་བཞིན་གཤེགས་པའི་ཁམས་ནི་དག་པའི་གསེར་གྱི་སྐུ་གཟུགས་འདྲ་བར་སྦྱར་བའོ།། དེས་ན་འདི་དག་གིས་ནི་བདེན་འཛིན་མེད་ཀྱང་བག་ཆགས་དབང་གིས་བདེན་སྣང་གིས་བསླད་པའི་དག་སའི་སེམས་ཀྱི་སྙིང་པོ་དེ་རག་གན་སོགས་ལྷད་ཀྱི་དྲི་མ་མེད་ཀྱང་ས་རྡུལ་གྱིས་གོས་པའི་གསེར་གྱི་སྐུ་གཟུགས་ཀྱི་དཔེས་མཚོན་ནས་དག་སའི་དྲི་མ་གློ་བུར་བར་བསྟན་པར་སེམས་སོ།།)

འཇིགས་བྱེད་ཀྱི་བླ་མའི་རྣལ་འབྱོར་རྫོགས་རིམ་དང་འབྲེལ་བ།

 ༄༅།   །ནམོགུརུབཛྲབྷཻརཝཡ། (འདིར་བཅོམ་ལྡན་འདས་དཔལ་རྡོ་རྗེ་འཇིགས་བྱེད་ཀྱི་བླ་མའི་རྣལ་འབྱོར་བསྒོམ་ཚུལ་ ྋགུ་ཤྲཱི་ཆོས་རྗེ་བློ་བཟང་ལྷུན་གྲུབ་ཀྱི་རྫོགས་རིམ་གྱི་ཁྲིད་ལས་འབྱུང་བ་རྣམས་ངག་འདོན་གྱི་རིམ་པར་ཁོལ་དུ་ཕྱུང་སྟེ་འགོད་པ་ལ། སྤྱིར་ཐར་འདོད་རྣམས་ཀྱིས་ལམ་གང་དང་གང་བསྒོམས་ཀྱང་། སྒྲིབ་སྦྱང་ཚོགས་གསོག་གི་ཆོ་ག་ལ་ནན་ཏན་དུ་བྱ་བར་གསུངས་པས། སྒྲིབ་སྦྱང་གི་ཆོ་ག་ནི་རྡོར་སེམས་བསྒོམ་བཟླས་ཡིན་ལ། ཚོགས་བསགས་པ་ལ་ནི་བླ་མའི་རྣལ་འབྱོར་ལ་བརྟེན་པ་གཙོ་བོ་ཡིན་ནོ།། དེས་ན་ཐར་འདོད་རྣམས་ཀྱིས་ལྷ་གང་དང་གང་བསྒོམ་པ་དང་། སངས་རྒྱས་བྱང་སེམས་གང་དང་གང་ལ་ཕྱག་མཆོད་སོགས་གང་བྱས་ཀྱང་། ཡུལ་དེ་ཉིད་རང་གི་བླ་མ་དང་དབྱེར་མེད་དུ་བལྟས་ནས་བྱ་བ་གནད་ཆེ་བས། འདིར་ཡང་བླ་མའི་རྣལ་འབྱོར་བསྒོམ་པ་གལ་ཆེའོ།། དེའི་ཚུལ་ནི། མདུན་དུ་བླ་མ་གཤིན་རྗེ་གཤེད་བསྒོམ་སྟེ་ཕྱག་མཆོད་སོགས་བྱ་བ། ཚོགས་ཞིང་སྤྱི་བོར་སྤྱན་དྲངས་ཏེ་འདོད་དོན་གསོལ་བ། མཐར་སྙིང་གར་བསྟིམ་ནས་བསྔོ་སྨོན་གྱིས་རྒྱས་འདེབས་པ་དང་གསུམ་ལས། དང་པོ་ནི། ཐོག་མར། ཕྱོགས་བཅུའི་ཞིང་ཁམས་ཐམས་ཅད་དུ་བླ་མ་རྒྱལ་བ་སྲས་བཅས་སོགས་སྐྱབས་ཡུལ་དུ་འོས་པ་ཐམས་ཅད་བཞུགས་པར་ཡིད་ཀྱིས་གསལ་བཏབ་ལ། དེ་ལ་རང་དང་སེམས་ཅན་ཐམས་ཅད་ཀྱིས་སྐྱབས་སུ་འགྲོ་བར་བསམ་ལ།)

      ཕྱོགས་བཅུའི་ཞིང་ན་བཞུགས་པའི་བླ་མ་དང་།། ཡི་དམ་སངས་རྒྱས་ལུང་རྟོགས་དམ་པའི་ཆོས།། འཕགས་པའི་དགེ་འདུན་མཁའ་འགྲོ་ཆོས་སྲུང་ལ།། བདག་སོགས་སེམས་ཅན་ཐམས་ཅད་སྐྱབས་སུ་མཆིའོ།། (ཞེས་སྐྱབས་འགྲོ་ལན་གསུམ།)   སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག། སེམས་ཅན་ཐམས་ཅད་སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག། སེམས་ཅན་ཐམས་ཅད་སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག། སེམས་ཅན་ཐམས་ཅད་ཉེ་རིང་ཆགས་སྡང་གཉིས་དང་བྲལ་བའི་བཏང་སྙོམས་ལ་གནས་པར་གྱུར་ཅིག། (ཞེས་ཚད་མེད་བཞི་ལན་གསུམ།   བདག་གིས་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་ལམ་ཟབ་མོ་བླ་མ་ལྷའི་རྣལ་འབྱོར་ཉམས་སུ་བླང་བར་བྱའོ།། (ཞེས་སེམས་བསྐྱེད་ལན་གསུམ་སོགས་བྱའོ།། 

       དེ་ནས་ཚོགས་ཞིང་གསལ་འདེབས་པ་ནི།)   ཨོཾ་སྭ་བྷཱ་ཝ་ཤུདྡྷ་སརྦ་དྷརྨཱ་སྭ་བྷཱ་ཝ་ཤུད་དྷོ྅ཧཾ། ཆོས་ཐམས་ཅད་རང་བཞིན་གྱིས་གྲུབ་པས་སྟོང་པའི་སྟོང་པ་ཉིད་དུ་གྱུར་(པར་བསམས་ལ།) འཁོར་འདས་ཆོས་ཀུན་སྟོང་པའི་ངང་ཉིད་ལས།། མདུན་གྱི་ལྷ་ལམ་མཆོད་སྤྲིན་འཁྲིགས་པའི་དབུས།། བཞི་ཟུང་གདོང་ལྔས་བཏེགས་པའི་རཏྣའི་ཁྲིར།། སྣ་ཚོགས་པདྨ་ཟླ་བ་ཉི་མའི་སྟེང་།། ཧཱུཾ་ལས་རྡོ་རྗེ་ཧཱུཾ་གིས་མཚན་པ་ལས།། རྩ་བའི་བླ་མ་ཡི་དམ་གཤིན་རྗེའི་གཤེད།། སྐུ་མདོག་མཐིང་ནག་ཞལ་དགུ་ཕྱག་སོ་བཞི།། གྲི་ཐོད་ལ་སོགས་ཕྱག་མཚན་སྣ་ཚོགས་འཛིན།། ཞབས་ནི་བཅུ་དྲུག་སྲོག་ཆགས་སྣ་ཚོགས་སྟེང་།། མེ་ཕུང་འབར་དབུས་གཡས་བསྐུམས་གཡོན་བརྐྱངས་བཞུགས།། དེ་ཡི་ཐུགས་ཀར་འཇམ་དཔལ་གཞོན་ནུ་སེར།། ཞལ་གཅིག་ཕྱག་གཉིས་རལ་གྲི་གླེགས་བམ་འཛིན།། འཇམ་དཔལ་ཐུགས་ཀར་ཧཱུཾ་ཡིག་མཐིང་ག་སྟེ།། སེམས་དཔའ་སུམ་བརྩེགས་རྡོ་རྗེ་འཇིགས་བྱེད་ཀྱི།། པང་ན་ཡུམ་ཆེན་རྡོ་རྗེ་རོ་ལངས་མ།། གྲི་ཐོད་འཛིན་པས་ཡབ་ལ་འཁྱུད་པར་གྱུར།། སྤྱི་མགྲིན་ཐུགས་ཀ་ལྟེ་བ་གསང་གནས་ལྔའི།། རྩ་འདབ་འཁོར་ལོར་དབུས་སུ་རིམ་པ་བཞིན།། ཨོཾ་དཀར་ཨཱཿདམར་ཧཱུཾ་སྔོན་སྭཱ་སེར་དང་།།  ཧཱ་ཡིག་ལྗང་གུ་རྣམས་ཀྱིས་མཚན་པར་གྱུར།། ཐུགས་ཀའི་ཧཱུཾ་ལས་འོད་ཟེར་ཕྱོགས་བཅུར་འཕྲོས།། རྒྱལ་བ་སྲས་བཅས་སྐྱབས་ཡུལ་སྤྱན་དྲངས་ཏེ།། མདུན་གྱི་བླ་མ་རྡོ་རྗེ་འཇིགས་བྱེད་ལ།། ཐིམ་པས་སྐྱབས་ཡུལ་ཀུན་འདུས་ངོ་བོར་གྱུར།། (དེ་ནས།)   སྐྱབས་གནས་ཀུན་འདུས་བླ་མ་འཇིགས་བྱེད་ཀྱི།། མཚན་དང་དཔེ་བྱད་བཟང་པོས་སྤྲས་སྐུ་ནི།། བལྟ་བས་མི་ངོམས་མཐོང་བ་ཙམ་གྱིས་ཀྱང་།། དད་པའི་སྤུ་ལོང་གཡོ་བའི་གཟི་བརྗིད་ལྡན།། ཕུང་པོ་རིགས་ལྔ་ཁམས་བཞི་ལྷ་མོ་བཞི།། སྐྱེ་མཆེད་སེམས་དཔའ་ཡན་ལག་ཁྲོ་བོའི་དབང་།། བ་སྤུ་དགྲ་བཅོམ་ཉི་ཁྲི་ཆིག་སྟོང་ཉིད།། བ་སྤུའི་ཁུང་རེར་སངས་རྒྱས་གྲངས་མེད་བཞུགས།། ཐོས་པས་མི་ངོམས་གསུང་དབྱངས་དྲུག་ཅུ་ནི།། ཐོས་པ་ཙམ་གྱིས་སྲིད་ཞིའི་འཇིགས་པ་འཕྲོག། གྲངས་མེད་གདུལ་བྱའི་སྒྲིབ་གཉིས་བག་ཆགས་བཅས།། དྲི་མ་སེལ་བྱེད་ངེས་དོན་བདུད་རྩི་ཡིན།། མཁྱེན་བརྩེའི་དཔལ་ལྡན་ཟབ་ཡངས་ཐུགས་མཆོག་ནི།། ཇི་ལྟ་བ་ལ་རྟག་ཏུ་མཉམ་བཞག་ཀྱང་།། ཇི་སྙེད་ཆོས་ཀུན་ལག་མཐིལ་སྐྱུ་རུ་བཞིན།། མངོན་སུམ་མཁྱེན་པའི་ཡོན་ཏན་མ་ལུས་རྫོགས།། (ཞེས་སོགས་སངས་རྒྱས་ཀྱི་སྐུ་གསུང་ཐུགས་གསང་བ་བསམ་གྱིས་མི་ཁྱབ་པའི་ཡོན་ཏན་ཐམས་ཅད་དང་ལྡན་པར་བསམ། སླར་ཡང་བསྒྱུར་ཏེ་གསལ་འདེབས་པ་ནི།)  ཡོན་ཏན་ཕུང་པོ་བླ་མ་འཇིགས་བྱེད་དེ།། སྣང་ལ་རང་བཞིན་མེད་པ་གཟུགས་བརྙན་འདྲ།། དྭངས་ཤིང་གསལ་བ་གཡའ་དག་དགུང་སྔོན་བཞིན།། མདུན་གྱི་གདན་ལ་མངོན་སུམ་བཞུགས་པར་གྱུར།། (ཅེས་གསལ་སྣང་དང་དད་པ་ཤུགས་དྲག་བྱུང་བྱུང་གི་བར་དུ་དལ་བུས་གསལ་བཏབ་ལ། 

       དེ་ནས་ཡན་ལག་བདུན་པ་བྱ་བ་ལ། ཐོག་མར་ཕྱག་འཚལ་བའི་ཡན་ལག་ནི།) སངས་རྒྱས་ཐམས་ཅད་འདུས་པའི་སྐུ།། རྡོ་རྗེ་འཛིན་པའི་ངོ་བོ་ཉིད།། དཀོན་མཆོག་གསུམ་རྩ་བ་སྟེ།། བླ་མ་རྣམས་ལ་ཕྱག་འཚལ་ལོ།། གང་གི་དྲིན་གྱིས་བདེ་ཆེན་ནི།། སྐད་ཅིག་གིས་ནི་འཐོབ་འགྱུར་བ།། བླ་མ་རིན་ཆེན་ལྟ་བུ་ཡི།། རྡོ་རྗེ་ཅན་ཞབས་པད་ལ་འདུད།། གཟུགས་མཆོག་མཆོག་ཏུ་དྲག་པོ་ཆེ།། དཔའ་བོ་མཆོག་གི་སྤྱོད་ཡུལ་ཅན།། གདུལ་དཀའ་འདུལ་བའི་དོན་མཛད་པ།། རྡོ་རྗེ་འཇིགས་བྱེད་ལ་ཕྱག་འཚལ།། སྟོན་པ་བླ་མེད་སངས་རྒྱས་རིན་པོ་ཆེ།། སྐྱོབ་པ་བླ་མེད་དམ་ཆོས་རིན་པོ་ཆེ།། འདྲེན་པ་བླ་མེད་དགེ་འདུན་རིན་པོ་ཆེ།། སྐྱབས་གནས་དཀོན་མཆོག་གསུམ་ལ་ཕྱག་འཆལ་ལོ།། 

(མཆོད་པའི་ཡན་ལག་ལ་བཞི་ལས། ཕྱིའི་མཆོད་པ་ནི། རང་གི་སྙིང་ག་ནས་མཆོད་ལྷ་མཆོད་རྫས་ཐོགས་པ་དཔག་ཏུ་མེད་པ་སྤྲོས་ཏེ་མཆོད་པར་བསམས་ལ།) ཆུ་བཞི་ཉེར་སྤྱོད་འདོད་ཡོན་སྣ་ལྔ་དང་།། རིན་ཆེན་བདུན་སོགས་ལྷ་མིའི་མཁོ་དགུའི་རྫས།། ཁྱད་པར་གསུམ་ལྡན་མཆོད་པར་བྱིན་བརླབས་ཏེ།། བླ་མ་འཇིགས་བྱེད་ལྷ་ཚོགས་རྣམས་ལ་འབུལ།། (ཞེས་དང་།     ནང་གི་མཆོད་པ་ནི། ཡང་ཡེ་ཤེས་ལྔའི་རང་བཞིན་གྱི་བདུད་རྩིས་གང་བའི་ཐོད་པ་ཐོགས་པའི་ལྷ་མོ་རྣམས་སྔར་ལྟར་སྤྲོས་ཏེ་མཆོད་པར་བསམས་ལ།)  རིགས་ལྔ་ཡབ་ཡུམ་ས་བོན་ལས་བྱུང་བའི།། དངོས་གྲུབ་དགུག་གསལ་ཤ་ལྔ་བདུད་རྩི་ལྔ།། རྡོ་རྗེ་གསུམ་གྱིས་སྦྱངས་རྟོགས་སྦར་བྱས་ཏེ།། བླ་མ་འཇིགས་བྱེད་ལྷ་ཚོགས་རྣམས་ལ་འབུལ།། (མཆོད་ལྷ་རྣམས་སྙིང་གར་བསྡུའོ།།     གསང་བའི་མཆོད་པ་ནི། རང་གི་སྙིང་ག་ནས་ཡེ་ཤེས་ཀྱི་ཕྱག་རྒྱ་གཞོན་ནུ་མ་མཛེས་ཤིང་ཡིད་དུ་འོང་བ་མཚན་ཉིད་དང་ལྡན་པ་དཔག་ཏུ་མེད་པ་སྤྲོས་ཏེ། བླ་མ་འཇིགས་བྱེད་ཀྱི་ཡུམ་ལ་ཐིམ་པས། བླ་མ་ཡབ་ཡུམ་སྙོམས་པར་ཞུགས་པའི་ལྷན་སྐྱེས་ཀྱི་བདེ་བ་ཆེན་པོ་དེ་སྔར་ལས་ཀྱང་ཆེར་སྐྱེས་པ་དེས་བླ་མའི་སྐུ་ལ་གནས་པའི་ལྷ་ཐམས་ཅད་མཉེས་ཤིང་ཚིམ་པར་བསམས་ལ།) ཡིད་འོང་ལང་ཚོའི་དཔལ་འཛིན་དྲུག་ཅུ་བཞིའི།། འདོད་པའི་སྒྱུ་རྩལ་ཡོན་ཏན་ཚང་བ་ཡི།། བཅུ་དྲུག་ལོ་ལོན་མཛེས་སྡུག་ཕྱག་རྒྱ་རྣམས།། བླ་མ་འཇིགས་བྱེད་ལྷ་ཚོགས་རྣམས་ལ་འབུལ།། (ཞེས་དང་།     དེ་ཁོ་ན་ཉིད་ཀྱི་མཆོད་པ་ནི། བླ་མ་ཡབ་ཡུམ་དང་བླ་མའི་སྐུ་ལ་གནས་པའི་ལྷ་ཐམས་ཅད་ཀྱིས། སྔར་གསང་བའི་མཆོད་པའི་སྐབས་སུ་མྱོང་བའི་ལྷན་སྐྱེས་ཀྱི་བདེ་བ་དེས་སྟོང་ཉིད་ལ་མཉམ་པར་བཞག་པས། བདེ་སྟོང་དབྱེར་མེད་ཀྱི་ཡེ་ཤེས་སྔར་ལས་ཀྱང་ཆེས་ལྷག་ཏུ་གྱུར་པར་བསམ་ལ།) སྒྲིབ་བྲལ་ལྷན་སྐྱེས་བདེ་བའི་ཡེ་ཤེས་ཆེ།། ཆོས་ཀུན་རང་བཞིན་སྤྲོས་དང་བྲལ་བའི་དབྱིངས།། དབྱེར་མེད་ལྷུན་གྲུབ་དོན་དམ་བྱང་ཆུབ་སེམས།། བླ་མ་འཇིགས་བྱེད་ལྷ་ཚོགས་རྣམས་ལ་འབུལ།། (ཞེས་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་བཞི་འབུལ།

སྡིག་པ་བཤགས་པའི་ཡན་ལག་ནི།) དུག་གསུམ་དབང་གིས་སྒོ་གསུམ་སྡིག་པའི་ལས།། མི་དགེ་བཅུ་དང་མཚམས་མེད་ཉེ་བ་ལྔ།། སོ་སོར་ཐར་དང་བྱང་སེམས་རིག་འཛིན་གྱི།། བསླབ་གསུམ་ཉམས་པ་ཐམས་ཅད་མཐོལ་ལོ་བཤགས།། ཁྱད་པར་བླ་མ་མཆོག་གསུམ་དཀོར་ལ་སྤྱད།། སྐུ་ལ་བསྡོས་ཤིང་གསུང་བཅག་ཐུགས་དཀྲུག་སོགས།། མི་བཟད་དམྱལ་བའི་མེ་ནང་བསྲེག་རྒྱུ་ལས།། གང་བྱས་སྙིང་ནས་འགྱོད་པ་དྲག་པོས་བཤགས།། (ཞེས་དུག་ཁོང་དུ་སོང་བ་ལྟར་འགྱོད་སེམས་དྲག་པོས་བརྗོད།། རྗེས་སུ་ཡི་རང་བའི་ཡན་ལག་ནི། རང་གཞན་སྐྱེ་འཕགས་མཐའ་དག་གི་དགེ་རྩ་ལ་སྙིང་ཐག་པ་ནས་དགའ་བའི་བསམ་པས།) ཆོས་རྣམས་རང་བཞིན་མཚན་མ་ཀུན་བྲལ་ཡང་།། རྨི་ལམ་ཇི་བཞིན་སྐྱེ་འཕགས་ཐམས་ཅད་ཀྱི།། བདེ་དགའ་ཅིར་ཡང་འཆར་བའི་རྣམ་དཀར་ལ།། བདག་ཅག་བསམ་པ་ཐག་པས་ཡི་རང་ངོ་།། (ཞེས་དང་། ཆོས་འཁོར་བསྐོར་བར་བསྐུལ་བའི་ཡན་ལག་ནི། མདུན་གྱི་བླ་མས་མཚོན་པའི་ཕྱོགས་བཅུའི་སངས་རྒྱས་ཐམས་ཅད་ལ་སེམས་ཅན་གྱི་དོན་དུ་ཆོས་འཁོར་བསྐོར་བར་བསྐུལ་བའི་བསམ་པས།) ཕུལ་བྱུང་མཁྱེན་བརྩེའི་ཆུ་འཛིན་འབུམ་དཀྲིགས་ཏེ།། མཐའ་ཡས་འགྲོ་བདེའི་ཕན་བདེ་ཀུན་དའི་ཚལ།། བསྐྱེད་དང་ཡུན་དུ་གནས་དང་སྤེལ་བའི་ཕྱིར།། ཟབ་རྒྱས་ཆོས་ཀྱི་ཆར་པ་དབབ་ཏུ་གསོལ།། (ཞེས་དང་། མྱ་ངན་ལས་མི་འདའ་བར་གསོལ་བ་འདེབས་པའི་ཡན་ལག་ནི། མདུན་གྱི་བླ་མ་དང་ཕྱོགས་བཅུའི་སངས་རྒྱས་ཐམས་ཅད་ལ་འཁོར་བ་མ་སྟོང་གི་བར་དུ་སེམས་ཅན་གྱི་དོན་དུ་མྱ་ངན་ལས་མི་འདའ་བར་བཞུགས་པར་གསོལ་བ་འདེབས་པའི་བསམ་པས།)  རྡོ་རྗེའི་སྐུ་ལ་སྐྱེ་འཆི་མི་མངའ་ཡང་།། ཟུང་འཇུག་དབང་གི་རྒྱལ་པོའི་ཟ་མ་ཏོག། བདག་ཅག་སྨོན་པ་ཇི་བཞིན་སྲིད་མཐའི་བར།། མྱ་ངན་མི་འདའ་རྟག་པར་བཞུགས་སུ་གསོལ།། (ཞེས་དང་། བསྔོ་བའི་ཡན་ལག་ནི། ཡན་ལག་སྔ་མ་དྲུག་གི་དགེ་རྩ་སོགས་རང་གཞན་གྱི་དགེ་བ་ཐམས་ཅད་བྱང་ཆུབ་ཆེན་པོའི་རྒྱུར་གྱུར་པ་དང་། ཚེ་རབས་ཀུན་ཏུ་རྗེ་བཙུན་བླ་མས་མི་འབྲལ་བར་རྗེས་སུ་འཛིན་པར་སྨོན་ལམ་འདེབས་པའི་ཚུལ་དུ།)  དེ་ལྟར་བསྐྲུན་པའི་རྣམ་དཀར་དགེ་བའི་ཚོགས།། བཀའ་དྲིན་གསུམ་ལྡན་རྗེ་བཙུན་བླ་མ་ཡིས།། ཚེ་རབས་ཀུན་ཏུ་འབྲལ་མེད་རྗེས་འཛིན་ཅིང་།། ཟུང་འཇུག་རྡོ་རྗེ་འཆང་དབང་ཐོབ་ཕྱིར་བསྔོ།། (ཞེས་ཡན་ལག་བདུན་པ་བྱའོ།།

དེ་ནས་མཎྜལ་ལ་བཞི་ལས་ཕྱིའི་མཎྜལ་འབུལ་བ་ནི།)  ཞིང་ཁམས་འབུལ་བར་ཞུ། ཨོཾ་བཛྲ་བྷུ་མི་ཨཱཿཧཱུཾ། དབང་ཆེན་གསེར་གྱི་ས་གཞི། ཨོཾ་བཛྲ་རེ་ཁེ་ཨཱཿཧཱུཾ། ཕྱི་ལྕགས་རི་ཁོར་ཡུག་གིས་བསྐོར་བའི་དབུས་སུ་རིའི་རྒྱལ་པོ་རི་རབ། ཤར་ལུས་འཕགས་པོ། ལྷོ་འཛམ་བུ་གླིང༌། ནུབ་བ་ལང་སྤྱོད། བྱང་སྒྲ་མི་སྙན། ལུས་དང་ལུས་འཕགས། རྔ་ཡབ་དང་རྔ་ཡབ་གཞན། གཡོ་ལྡན་དང་ལམ་མཆོག་འགྲོ། སྒྲ་མི་སྙན་དང་སྒྲ་མི་སྙན་གྱི་ཟླ། རིན་པོ་ཆེའི་རི་བོ། དཔག་བསམ་གྱི་ཤིང༌། འདོད་འཇོའི་བ། མ་རྨོས་པའི་ལོ་ཏོག །འཁོར་ལོ་རིན་པོ་ཆེ། ིནོར་བུ་རིན་པོ་ཆེ། བཙུན་མོ་རིན་པོ་ཆེ། བློན་པོ་རིན་པོ་ཆེ། གླང་པོ་རིན་པོ་ཆེ། རྟ་མཆོག་རིན་པོ་ཆེ། དམག་དཔོན་རིན་པོ་ཆེ། གཏེར་ཆེན་པོའ་བུམ་པ། སྒེག་མོ་མ། ཕྲེང་བ་མ། གླུ་མ། གར་མ། མེ་ཏོག་མ། བདུག་སྤོས་མ། སྣང་གསལ་མ། དྲི་ཆབ་མ། ཉི་མ། ཟླ་བ། རིན་པོ་ཆེའི་གདུགས། ཕྱོགས་ལས་རྣམ་པར་རྒྱལ་བའི་རྒྱལ་མཚན། དབུས་སུ་ལྷ་དང་མིའི་དཔལ་འབྱོར་ཕུན་སུམ་ཚོགས་པ་མ་ཚང་བ་མེད་པ་འདི་དག་དྲིན་ཅན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང། ཁྱད་པར་དུ་ཡང་བླ་མ་གཤིན་རྗེ་གཤེད་ཀྱི་ལྷ་ཚོགས་འཁོར་དང་བཅས་པ་རྣམས་ལ་ཞིང་ཁམས་དབུལ་བར་བགྱིའོ།། ཐུགས་རྗེས་འགྲོ་བའི་དོན་དུ་བཞེས་སུ་གསོལ། བཞེས་ནས་བདག་སོགས་སེམས་ཅན་ཐམས་ཅད་ལ་ཐུགས་བརྩེ་བ་ཆེན་པོའི་སྒོ་ནས་བྱིན་གྱིས་བརླབ་ཏུ་གསོལ།  (ཞེས་མཎྜལ་སོ་ཚོམ་བུ་བདུན་མའམ། བསྡུ་ན།)   ས་གཞི་སྤོས་ཀྱིས་བྱུགས་ཤིང་མེ་ཏོག་བཀྲམ།། རི་རབ་གླིང་བཞི་ཉི་ཟླས་བརྒྱན་པ་འདི།། སངས་རྒྱས་ཞིང་དུ་དམིགས་ཏེ་འབུལ་བ་ཡིས།། འགྲོ་ཀུན་རྣམ་དག་ཞིང་ལ་སྤྱོད་པར་ཤོག། (ཞེས་དང་།     ནང་གི་མཎྜལ་ནི།) རང་གི་རྣམ་ཤེས་སྤྱི་བོར་ཐོན་ཏེ་མཁའ་འགྲོ་མ།། གྲི་ཐོད་འཛིན་པར་གྱུར་ནས་ཤ་ལྤགས་ལྷུ་ཚིགས་ཕྲལ།། པགས་པ་ས་གཞི་བྱང་ཁོག་རི་རྒྱལ་ཁྲག་ཆེན་མཚོ།། མགོ་བོ་རྣམ་རྒྱལ་ཁང་བཟང་མིག་གཉིས་ཉི་ཟླ་ཟུང་།། སོག་དཔྱི་གླིང་བཞི་རྐང་བརྒྱད་གླིང་ཕྲན་སྙིང་ནོར་བུ།། གཟུགས་སོགས་འདོད་ཡོན་ཤ་ཚིལ་སྣ་ཚོགས་མཆོད་སྤྲིན་གྱུར།། བླ་མ་ལྷ་ལ་འདོད་དགུའི་མཎྜལ་འདི་འབུལ་བས།། བཞེས་ནས་བདག་རྒྱུད་བྱིན་གྱིས་རློབས་ལ་དངོས་གྲུབ་སྩོལ།། (ཞེས་དང་།      གསང་བའི་མཎྜལ་ནི།) རང་ཉིད་འཇིགས་བྱེད་ཡབ་ཡུམ་རོ་ལངས་མ།། འཁྱུད་པའི་བདེ་ཆེན་ངོ་བོ་བྱང་ཆུབ་སེམས།། རི་རབ་ཉི་ཟླ་གླིང་སོགས་གྱུར་པ་འདི།། བླ་མ་འཇིགས་བྱེད་ལྷ་ཚོགས་རྣམས་ལ་འབུལ།། (ཞེས་དང་།      དེ་ཁོ་ན་ཉིད་ཀྱི་མཎྜལ་ནི།) མཆོད་ཡུལ་མཆོད་མཁན་མཆོད་པའི་མཎྜལ་སོགས།། ཆོས་ཀུན་བདེན་སྟོང་སྒྱུ་མ་རྨི་ལམ་བཞིན།། བསྒོམས་པས་བདེ་སྟོང་དབྱེར་མེད་མཎྜལ་འདི།། བླ་མ་འཇིགས་བྱེད་ལྷ་ཚོགས་རྣམས་ལ་འབུལ།། (ཞེས་མཎྜལ་བཞི་འབུལ། དེ་ནས་བསྟོད་པ་བྱ་བ་ནི།) སྐུ་བཞིའི་མངའ་བདག་སྐྱབས་གསུམ་ངོ་བོ་རིགས་བརྒྱའི་དཔལ།། ལུང་རྟོགས་མཛོད་འཛིན་ཕུང་ཁམས་སྐྱེ་མཆེད་ལྷའི་རང་བཞིན།། བདེ་སྟོང་ཡེ་ཤེས་དཔལ་མངའ་བླ་མ་ཡི་དམ་ལྷ།། སངས་རྒྱས་བྱང་སེམས་དཔའ་བོ་མཁའ་འགྲོ་སྲུང་མའི་ཚོགས་ལ་འདུད།། (ཅེས་ཕྱི་ནང་གསང་བ་དེ་ཁོ་ན་ཉིད་ཀྱི་ཡོན་ཏན་དང་ལྡན་པར་བསྟོད། 

       སྤྲོ་ན་མཚམས་འདིར།)   དཀོན་མཆོག་གསུམ་ལ་བདག་སྐྱབས་མཆི།། སྡིག་པ་ཐམས་ཅད་སོ་སོར་བཤགས།། འགྲོ་བའི་དགེ་ལ་རྗེས་ཡི་རང༌།། སངས་རྒྱས་བྱང་ཆུབ་ཡིད་ཀྱིས་གཟུང༌།། སངས་རྒྱས་ཆོས་དང་ཚོགས་མཆོག་ལ།། བྱང་ཆུབ་བར་དུ་བདག་སྐྱབས་མཆི།། རང་གཞན་དོན་ནི་རབ་བསྒྲུབ་ཕྱིར།། བྱང་ཆུབ་སེམས་ནི་བསྐྱེད་པར་བགྱི།། བྱང་ཆུབ་མཆོག་གི་སེམས་ནི་བསྐྱེད་བགྱིས་ནས།། སེམས་ཅན་ཐམས་ཅད་བདག་གིས་མགྲོན་དུ་གཉེར།། བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི།། འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག། (ཞེས་པས་བྱང་སྡོམ་དང་།) སངས་རྒྱས་བྱང་ཆུབ་སེམས་དཔའ་ཀུན།། (ཞེས་སོགས་ཀྱིས་སྔགས་སྡོམ་བཟུང་།

       གཉིས་པ་ཚོགས་ཞིང་སྤྱི་བོར་སྤྱན་དྲངས་ཏེ་འདོད་དོན་གསོལ་བ་ལ།)  དཔལ་ལྡན་རྩ་བའི་བླ་མ་རིན་པོ་ཆེ།། བདག་གི་སྤྱི་བོར་པདྨའི་སྟེང་བཞུགས་ལ།། བཀའ་དྲིན་ཆེན་པོའི་སྒོ་ནས་རྗེས་བཟུང་སྟེ།། སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ།། (ཞེས་གསོལ་བ་བཏབ་པས་མདུན་གྱི་བླ་མ་འཇིགས་བྱེད་ཡབ་ཡུམ་གདན་དང་བཅས་པ་རང་གི་སྤྱི་བོར་བཞུགས་པར་མོས་ལ། འདོད་དོན་གསོལ་བ་ནི།) བླ་མ་ཀུན་འདུས་བླ་མ་གཤིན་རྗེའི་གཤེད།། བླ་མ་རིན་པོ་ཆེ་ལ་གསོལ་བ་འདེབས།། གསོལ་བ་འདེབས་སོ་བར་ཆད་བཟློག་ཏུ་གསོལ།། གསོལ་བ་འདེབས་སོ་དངོས་གྲུབ་སྩལ་དུ་གསོལ།། ཡི་དམ་ཀུན་འདུས་བླ་མ་གཤིན་རྗེའི་གཤེད།། བླ་མ་རིན་པོ་ཆེ་ལ་གསོལ་བ་འདེབས།། གསོལ་བ་འདེབས་སོ་བར་ཆད་བཟློག་ཏུ་གསོལ།། གསོལ་བ་འདེབས་སོ་དངོས་གྲུབ་སྩལ་དུ་གསོལ།། སངས་རྒྱས་ཀུན་འདུས་བླ་མ་གཤིན་རྗེའི་གཤེད།། བླ་མ་རིན་པོ་ཆེ་ལ་གསོལ་བ་འདེབས།། གསོལ་བ་འདེབས་སོ་བར་ཆད་བཟློག་ཏུ་གསོལ།། གསོལ་བ་འདེབས་སོ་དངོས་གྲུབ་སྩལ་དུ་གསོལ།། དམ་ཆོས་ཀུན་འདུས་བླ་མ་གཤིན་རྗེའི་གཤེད།། བླ་མ་རིན་པོ་ཆེ་ལ་གསོལ་བ་འདེབས།། གསོལ་བ་འདེབས་སོ་བར་ཆད་བཟློག་ཏུ་གསོལ།། གསོལ་བ་འདེབས་སོ་དངོས་གྲུབ་སྩལ་དུ་གསོལ།། དགེ་འདུན་ཀུན་འདུས་བླ་མ་གཤིན་རྗེའི་གཤེད།། བླ་མ་རིན་པོ་ཆེ་ལ་གསོལ་བ་འདེབས།། གསོལ་བ་འདེབས་སོ་བར་ཆད་བཟློག་ཏུ་གསོལ།། གསོལ་བ་འདེབས་སོ་དངོས་གྲུབ་སྩལ་དུ་གསོལ།། ཆོས་སྐྱོང་ཀུན་འདུས་བླ་མ་གཤིན་རྗེའི་གཤེད།། བླ་མ་རིན་པོ་ཆེ་ལ་གསོལ་བ་འདེབས།། གསོལ་བ་འདེབས་སོ་བར་ཆད་བཟློག་ཏུ་གསོལ།། གསོལ་བ་འདེབས་སོ་དངོས་གྲུབ་སྩལ་དུ་གསོལ།། སྐྱབས་གནས་ཀུན་འདུས་བླ་མ་གཤིན་རྗེའི་གཤེད།། བླ་མ་རིན་པོ་ཆེ་ལ་གསོལ་བ་འདེབས།། གསོལ་བ་འདེབས་སོ་བར་ཆད་བཟློག་ཏུ་གསོལ།། གསོལ་བ་འདེབས་སོ་དངོས་གྲུབ་སྩལ་དུ་གསོལ།། (ཞེས་གདུང་ཤུགས་དྲག་པོས་བ་སྤུ་གཡོ་ཞིང་མཆི་མ་འཁྲུགས་ཀྱི་བར་དུ་ལན་མང་གསོལ་བ་བཏབ་ལ།)  སྐྱབས་གནས་ཀུན་འདུས་བླ་མ་གཤིན་རྗེའི་གཤེད།། བླ་མ་རིན་པོ་ཆེ་ལ་གསོལ་བ་འདེབས།། གསོལ་བ་འདེབས་སོ་བར་ཆད་བཟློག་ཏུ་གསོལ།། གསོལ་བ་འདེབས་སོ་དངོས་གྲུབ་སྩལ་དུ་གསོལ།། ཁྱད་པར་ལམ་གྱི་སྔོན་འགྲོ་བསགས་སྦྱང་གི། མན་ངག་བསྟེན་ནས་དངོས་གཞི་རྣལ་འབྱོར་བཞིའི།། ལམ་གྱི་རྟོགས་པ་རྒྱུད་ལ་སྐྱེ་བ་རུ།། བྱིན་གྱིས་རློབས་ཤིག་བླ་མ་གཤིན་རྗེའི་གཤེད།། སྐྱབས་གནས་ཀུན་འདུས་བླ་མ་གཤིན་རྗེའི་གཤེད།། བླ་མ་རིན་པོ་ཆེ་ལ་གསོལ་བ་འདེབས།། གསོལ་བ་འདེབས་སོ་བར་ཆད་བཟློག་ཏུ་གསོལ།། གསོལ་བ་འདེབས་སོ་དངོས་གྲུབ་སྩལ་དུ་གསོལ།། ཁྱད་པར་རྩ་བདེ་རླུང་འཇམ་དམིགས་གསལ་བ།། བདེ་དྲོད་འབར་སོགས་ཉམས་རྟོགས་ཁྱད་པར་ཅན།། ད་ལྟ་ཉིད་དུ་རྒྱུད་ལ་སྐྱེ་བ་རུ།། བྱིན་གྱིས་རློབས་ཤིག་བླ་མ་གཤིན་རྗེའི་གཤེད།། སྐྱབས་གནས་ཀུན་འདུས་བླ་མ་གཤིན་རྗེའི་གཤེད།། བླ་མ་རིན་པོ་ཆེ་ལ་གསོལ་བ་འདེབས།། གསོལ་བ་འདེབས་སོ་བར་ཆད་བཟློག་ཏུ་གསོལ།། གསོལ་བ་འདེབས་སོ་དངོས་གྲུབ་སྩལ་དུ་གསོལ།། མདོར་ན་བཤེས་གཉེན་བསྟེན་ཚུལ་ནས་བཟུང་སྟེ།། མི་སློབ་ཟུང་འཇུག་བར་གྱི་ལམ་གྱི་རིམ།། མ་ནོར་ཆ་ཚང་རྒྱུད་ལ་སྐྱེ་བ་རུ།། བྱིན་གྱིས་རློབས་ཤིག་བླ་མ་གཤིན་རྗེའི་གཤེད།། (ཅེས་མཇུག་གི་ཤླཽ་ཀ་དྲུག་འདིས་ལན་མང་དུ་གསོལ་བ་བཏབ་པའི་མཐར།)  བླ་མ་རྡོ་རྗེ་འཇིགས་བྱེད་ཡབ་ཡུམ་གྱི།། སྦྱོར་མཚམས་ནས་བྱུང་བདུད་རྩིས་ལུས་གང་བས།། འགལ་རྐྱེན་ནད་གདོན་སྡིག་སྒྲིབ་ཀུན་བྱང་སྟེ།། ལམ་གྱི་རྟོགས་པ་རྒྱུད་ལ་སྐྱེས་པར་གྱུར།། (ཅེས་བདུད་རྩི་འབེབས་སྦྱང་གི་དམིགས་པ་ཡུན་རིང་དུ་བསྒོམ།

       དེ་ནས་དབང་བཞི་བྱིན་རླབས་གྱི་ཚུལ་དུ་ཞུ་བ་ནི།)  སྐྱབས་གསུམ་ཀུན་འདུས་བླ་མ་རིན་པོ་ཆེ།། བདག་དང་མར་གྱུར་སེམས་ཅན་ཐམས་ཅད་ཀྱི།། ལུས་ངག་ཡིད་གསུམ་སྡིག་སྒྲིབ་ཀུན་སྦྱངས་ཏེ།། སྐུ་གསུང་ཐུགས་ཀྱི་བྱིན་རླབས་སྩལ་དུ་གསོལ།། (ཞེས་ལན་གསུམ་གསོལ་བ་བཏབ་པས།)  བླ་མའི་སྤྱི་བོའི་ཨོཾ་ཡིག་དཀར་པོ་ལས།། འོད་དང་བདུད་རྩི་དཀར་པོ་སྤྱི་བོར་ཐིམ།། ལུས་ཀྱི་ནང་གང་ལུས་ཀྱི་དྲི་མ་དག། བུམ་དབང་ཐོབ་ཅིང་སྤྲུལ་སྐུའི་ནུས་པ་འཇོག། བླ་མའི་མགྲིན་པའི་ཨཱཿཡིག་དམར་པོ་ལས།། འོད་དང་བདུད་རྩི་དམར་པོ་མགྲིན་པར་ཐིམ།། ལུས་ཀྱི་ནང་གང་ངག་གི་དྲི་མ་དག། གསང་དབང་ཐོབ་ཅིང་ལོངས་སྐུའི་ནུས་པ་འཇོག། བླ་མའི་ཐུགས་ཀའི་ཧཱུཾཿཡིག་སྔོན་པོ་ལས།། འོད་དང་བདུད་རྩི་སྔོན་པོ་སྙིང་གར་ཐིམ།། ལུས་ཀྱི་ནང་གང་ཡིད་ཀྱི་དྲི་མ་དག། ཤེར་དབང་ཐོབ་ཅིང་ཆོས་སྐུའི་ནུས་པ་འཇོག། བླ་མའི་གནས་ལྔའི་ཡི་གེ་སྣ་ལྔ་ལས།། འོད་དང་བདུད་རྩི་སྣ་ལྔ་གནས་ལྔར་ཐིམ།། ལུས་ཀྱི་ནང་གང་སྒོ་གསུམ་དྲི་མ་དག། ཚིག་དབང་ཐོབ་ཅིང་ཟུང་འཇུག་ནུས་པ་འཇོག། (ཅེས་དལ་བུས་བརྗོད་ཅིང་དབང་བཞི་བྱིན་རླབས་ཀྱི་ཚུལ་དུ་ནོད། 

       གསུམ་པ་མཐར་སྙིང་གར་བསྟིམ་ནས་བསྔོ་སྨོན་གྱིས་རྒྱས་འདེབས་པ་ནི།)  དཔལ་ལྡན་རྩ་བའི་བླ་མ་རིན་པོ་ཆེ།། བདག་གི་སྙིང་གར་པདྨའི་སྟེང་བཞུགས་ནས།། བཀའ་དྲིན་ཆེན་པོའི་སྒོ་ནས་རྗེས་བཟུང་སྟེ།། སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ།། དེ་ལྟར་གསོལ་བ་བཏབ་པས་བླ་མ་མཆོག། འོད་དུ་ཞུ་ནས་ཚངས་བུག་ནས་ཞུགས་ནས།། སྙིང་གར་བླ་མ་རང་སེམས་ཧཱུཾ་ཡིག་གསུམ།། དབྱེར་མེད་ཧཱུཾ་གི་རྣམ་པར་གནས་པར་གྱུར།། (དེ་ཡང་པདྨ་སེང་ཁྲི་དང་བཅས་པ་འོད་དུ་ཞུ་ནས་སྙིང་གའི་རྩ་འདབ་བརྒྱད་ལ་ཐིམ་པ་དང་། ཟླ་གདན་འོད་དུ་ཞུ་ནས་སྙིང་གའི་ཐིག་ལེ་དཀར་པོ་ལ་ཐིམ་པ་དང་། ཉི་གདན་འོད་དུ་ཞུ་ནས་སྙིང་གའི་ཐིག་ལེ་དམར་པོ་ལ་ཐིམ་པ་དང་། བླ་མ་འཇིགས་བྱེད་ཡབ་ཡུམ་འོད་དུ་ཞུ་ནས་ཤིན་ཏུ་ཕྲ་བའི་རླུང་སེམས་ལ་ཐིམ་ཞིང་། རླུང་སེམས་དེ་ཉིད་ངོ་བོ་བླ་མ་འཇིགས་བྱེད་ཡིན་པ་ལ་རྣམ་པ་ཧཱུཾ་ཡིག་གི་རྣམ་པར་གནས་པར་བསམ་མོ།། ཡང་འཁྲིད་ཡིག་ལྟར་ན། སེང་ཁྲི་པདྨ་ཟླ་ཉི་རྣམས་ཐིམ་ཚུལ་སྔར་དང་འདྲ་ལ། ཁྱད་པར་ནི་སྙིང་གའི་རྩ་འདབ་བརྒྱད་སྣ་ཚོགས་པདྨར་གྱུར་པ་དང་། ཐིག་ལེ་དཀར་དམར་ཟླ་ཉིའི་གདན་དུ་གྱུར་ཏེ་བླ་མ་འཇིགས་བྱེད་ཡབ་ཡུམ་རླུང་སེམས་ཤིན་ཏུ་ཕྲ་བ་ལ་ཐིམ་པས། རླུང་སེམས་དེ་ཉིད་སྔར་གྱི་པད་ཟླ་ཉི་མའི་གདན་ལ་བླ་མ་འཇིགས་བྱེད་ཡབ་ཡུམ་དུ་སྔར་བཞིན་བཞེངས་པར་བསམ་མོ། །ལུགས་འདི་གཉིས་གང་ལྟར་བྱས་ཀྱང་རུང་ངོ་།། 

       སྨོན་ལམ་གདབ་པ་ནི།)  བདག་ཀྱང་དེང་ནས་ཚེ་རབས་ཐམས་ཅད་དུ།། འཇམ་དཔལ་དཔའ་བོས་དགྱེས་བཞིན་རྗེས་བཟུང་སྟེ།། རིམ་གཉིས་ལམ་གྱི་རྟོགས་པ་མཐར་ཕྱིན་ནས།། སྐུ་གསུམ་གོ་འཕང་བདེ་བླག་ཐོབ་གྱུར་ཅིག། ནམ་མཁའ་ཇི་སྲིད་སྐུ་ལྔའི་བདག་ཉིད་ཅན།། ཁ་སྦྱོར་བདུན་ལྡན་གོ་འཕང་མངོན་གྱུར་ནས།། མཐའ་དག་འགྲོ་འདི་གོ་འཕང་དེ་ཉིད་ལ།། སྐད་ཅིག་ཉིད་ལ་བདེ་བླག་འགོད་པར་ཤོག། (ཅེས་སོགས་བབསྔོ་སྨོན་གྱིས་མཐའ་བརྒྱན་པར་བྱའོ།། དེ་ལྟར་ཐུན་བཞིར་བཅད་དེ་ཡང་ཡང་བསྒོམས་པས་རྨི་ལམ་དུ་སེང་ཁྲིར་བསྡད་པ་དང་། འབྲུའི་ཆར་འབབ་པ་དང་། ཆུ་མིག་གསར་དུ་བརྡོལ་བ་དང་། བླ་མ་དགྱེས་ནས་ཆོས་དང་ཟང་ཟིང་གནང་བ་སོགས་རྟགས་འབྱུང་བར་བཤད་པས། རྟགས་དེ་དག་བྱུང་བྱུང་གི་བར་དུ་འདི་ལ་ཆིག་བསྒྲིལ་བྱ། བླ་མའི་རྣལ་འབྱོར་བསྒོམ་ཚུལ་འདི་ནི་བགེགས་སེལ་བོགས་འདོན་གང་གི་སྐབས་སུ་ཡང་གཞན་ལས་མཆོག་ཏུ་གྱུར་པའི་གདམས་ངག་འཁོར་ལོས་བསྒྱུར་བའི་རྒྱལ་པོ་ལྟ་བུ་དང་། ནོར་བུ་རིན་པོ་ཆེ་ལག་ཏུ་ཚུད་པ་ཡིན་པར་བཤད་པས། སྐལ་བ་དང་ལྡན་པ་རྣམས་ཀྱིས་སྙིང་ལ་གཅེས་པར་ཟུངས་ཤིག། བླ་མའི་རྣལ་འབྱོར་གཉིས་བསྒོམ་ཚུལ་བཤད་ཟིན་ཏོ།།      །།

ཞེས་པ་འདི་ནི་ཕྱི་ལོ་ ༢༠༢༠ ཟླ་བ་ ༡༢ ཚེས་ ༡༣ ཉིན་ལྷུན་གྲུབ་པཎྜིཏའི་གསུང་འཇིགས་བྱེད་རྫོགས་རིམ་གྱི་ཁྲིད་ཡིག་ནང་བླ་མའི་རྣལ་འབྱོར་ཟབ་ཁྱད་ཅན་བཞུགས་པ་ངག་འདོན་གྱི་རིམ་པར་བསྒྲིགས་ཤིང་དམིགས་རིམ་རྣམས་ཀྱང་ཡིག་ཆུང་དུ་འཁོད་པར་བྱེད་པ་པོ་ནི་བཙུན་པ་ཤྲཱི་མིང་ཅན་ནོ།།    །།

བྱང་སེམས་ཀྱི་རྩ་ལྟུང་བཅོ་བརྒྱད།

 ༄༅།  །ནམོ་གུརུ།  བྱང་སེམས་ཀྱི་རྩ་ལྟུང་བཅོ་བརྒྱད་ནི། 

༡ རྙེད་པ་དང་བཀུར་སྟི་ལ་ཆགས་ཤིང་ཞེན་པའི་སྒོ་ནས་བདག་བསྟོད་གཞན་སྨོད་བྱེད་པ། 

༢ མགོན་མེད་པའི་སེམས་ཅན་གཞན་སློང་བའི་ཕྱིར་འོངས་པ་ན་ཆགས་པ་དང་སེར་སྣས་ཆོས་ནོར་གང་རུང་མི་སྟེར་བ། 

༣ གཞན་གྱིས་རང་ལ་གནོད་པ་བྱས་པ་སླར་སྙིང་ནས་བཟོད་པ་གསོལ་བ་ལ་བཤད་སྦྱང་མི་ལེན་པར་ཁོན་དུ་འཛིན་ཅིང་གནོད་པར་བྱེད་པ། 

༤ བྱང་སེམས་ཀྱི་སྡེ་སྣོད་ལ་སྨོད་ཅིང་དམ་པའི་ཆོས་ལྟར་བཅོས་ནས་གཞན་ལ་སྟོན་པ། 

༥ དཀོན་མཆོག་གསུམ་དང་སོ་སྐྱེའི་དགེ་སློང་བཞི་ཡན་གྱི་དཀོར་མ་བྱིན་པར་ལེན་པ། 

༦ ཤེས་བཞིན་དུ་ཐེག་པ་གསུམ་པོ་གང་རུང་གི་སངས་རྒྱས་ཀྱི་བཀའ་སྤོང་བ། 

༧ རབ་ཏུ་བྱུང་བའི་གོས་ངུར་སྨྲིག་སོགས་འཕྲོག་གམ་འཕྲོག་ཏུ་འཇུག་པ་དང་རྡེག་འཚོག་སོགས་བྱེད་པ། 

༨ མཚམས་མེད་ཀྱི་ལས་ལྔ་བོ་གང་རུང་བྱེད་པ། 

༩ དཀོན་མཆོག་དང་ལས་འབྲས་དང་སྐྱེ་བ་སྔ་ཕྱི་ལ་ཡིད་མི་ཆེས་ཤིང་ལོག་ལྟ་བྱེད་པ། 

༡༠ གནོད་སེམས་ཀྱིས་གྲོང་དང་གྲོང་ཁྱེར་སོགས་འཇིག་པར་བྱེད་པ། 

༡༡ སྟོང་ཉིད་ཟབ་མོ་ལ་མི་དད་པའི་གང་ཟག་ལ་དེ་བསྟན་ནས་སྐྲག་པར་བྱས་ཏེ་རྫོགས་བྱང་ལས་ཕྱིར་ལྡོག་པ། 

༡༢ ཐེག་ཆེན་གྱི་ཆོས་ལ་མོས་པ་བཟློག་ནས་ཐེག་དམན་དུ་བསྒྱུར་བའོ།། 

༡༣  སོ་ཐར་གྱི་སྡོམ་པ་བསྲུང་བ་གཏོང་དུ་བཅུག་ནས་ཉམས་པར་བྱེད་པ། 

༡༤ ཐེག་དམན་ལམ་གྱིས་ཉོན་མོངས་ཐམས་ཅད་སྤོང་ནུས་པ་མི་སྲིད་ཅེས་སྐུར་བ་འདེབས་པ། 

༡༥ རང་གིས་སྟོང་ཉིད་མངོན་སུམ་དུ་མ་རྟོགས་བཞིན་དུ་རྟོགས་སོ་ཞེས་གཞན་ལ་སྨྲས་པ། 

༡༦ དགེ་སྦྱོང་ལ་ཆད་པ་གཅོད་ཅིང་དཀོན་མཆོག་གི་དཀོར་རྐུར་བཅུག་པ་རང་གིས་ལེན་པ། 

༡༧ ཞི་ལྷག་གི་བསམ་གཏན་ལ་བརྩོན་པའི་དགེ་སྦྱོང་ལ་གནོད་པའི་ཁྲིམས་འཆའ་ཞིང་དེའི་རྫས་འཕྲོག་ནས་ཁ་ཏོན་ཙམ་བྱེད་པ་ལ་སྦྱིན་པར་བྱེད་པ། 

༡༨ སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་འདོད་གྱི་སྨོན་སེམས་འདོར་བ་རྣམས་སོ༎ 

       དེ་དག་ལས་ལོག་ལྟ་དང་སེམས་འདོར་ལ་ནི་ཉེས་པ་བྱུང་བ་ཙམ་གྱིས་རྩ་ལྟུང་དུ་གྱུར་ལ། གཞན་རྣམས་རྩ་ལྟུང་དུ་འགྱུར་བ་ལ་ཀུན་དཀྲིས་ཆེན་པོ་ཚང་དགོས་སོ༎ 

བརྒལ་ལན་མེས་པོའི་ཞལ་ཆབ་ལས། རྩོམ་ཤོག་གཉིས་པ།

 

༄༅།   །ནམོགུརུམཧཱཀརུཎིཀཡ། 

རིན་ཆེན་སེམས་མཆོག་ཕྱིན་དྲུག་བསྡུ་བ་བཞིས༎ 

ཐུགས་རྒྱུད་གཏམས་པས་ཕྱི་ནང་མཛད་པ་ཀུན༎ 

བསྟན་དང་འགྲོ་བའི་གསོས་སུ་རྟག་འཆར་བ༎ 

རྣམ་འདྲེན་བླ་མ་བསྟན་འཛིན་རྒྱ་མཚོར་འདུད༎ 

       ཡང་འདིར་བརྒལ་ལན་མེས་པོའི་ཞལ་ཆབ་ཅེས་བྱ་བའི་དཔྱད་རྩོམ་དེའི་སྔ་མའི་འཕྲོ་འཐུད་ནས་འཆད་པ་ལ་འཇུག་པ་ལ། དེ་ཡང་མཁས་གྲུབ་ཆོས་རྗེ་དགེ་ལེགས་དཔལ་བཟང་བའི་གསུང་། སྡོམ་གསུམ་རྣམ་བཞག་ཐུབ་བསྟན་བྱི་དོར་ (མཁས་གྲུབ་རྗེའི་གསུང་འབུམ་དཔེ་བསྡུར་མ།༢༠༢༠ ཁ་པ། ༣༩༣-༥༨༥) ལས་བོད་སྔ་མའི་སེམས་བསྐྱེད་ཀྱི་ཆོ་གའི་ཁྱད་པར་ལ་དགག་བཞག་རྒྱས་པར་མཛད་པ་ལ། མཚམས་འདིར་དེ་ལ་པཎ་ཆེན་ཤཱཀ་མཆོག་པས་དགག་ལན་རྒྱས་པར་མཛད་དོ༎ 

༡༽ བོད་སྔ་ཕྱིའི་བཞེད་པ་བཀོད་ནས་གླེང་བསླང་བ། 

       དེ་ཡང་བོད་སྔ་མ་མང་པོས། བྱང་སྡོམ་གྱི་བརྒྱུད་པ་ལ་དབུ་མ་ལུགས་དང་སེམས་ཙམ་ལུགས་ཞེས་ལུགས་མི་འདྲ་བ་གཉིས་སུ་བྱས་ནས་སྡོམ་པ་བླང་ཡུལ་བཤེས་གཉེན་གྱི་ཁྱད་པར་དང་། ལེན་པ་པོ་སློབ་མའི་ཁྱད་པར། བླང་བའི་ཆོ་ག །བསྲུང་བྱའི་ཚུལ་ཁྲིམས་ཀྱེ་གྲངས། ཉམས་ན་ཕྱིར་བཅོས་ཚུལ་བཅས་ཐམས་ཅད་མི་མཐུན་པར་བཞེད། རྗེ་ཙོང་ཁ་པ་ཡབ་སྲས་ནི་སྡོམ་པ་འབོགས་པའི་ཆོ་ག་ཅུང་ཟད་མི་འདྲ་བ་ཙམ་མ་གཏོགས་ཁྱད་པར་ཆེར་ཡོད་པར་མི་བཞེད་ཅིང་། བཞེད་ཚུལ་སྔ་མ་ལ་དགག་པ་ཡང་མཛད་དོ༎ དེ་ལ་བརྟེན་ནས་པཎ་ཆེན་ཤཱཀ་མཆོག་པས་གོང་མའི་བཞེད་པ་སྐྱོང་བའི་ཕྱིར་དུ་སྨོན་འཇུག་གི་ཆོ་གའི་ཁྱད་པར་ལ་དཔྱད་པ་མཛད་པ་ན། ལུང་རིགས་རོལ་མཚོར། (གྲགས་ཆེན་་བཅོ་བརྒྱད་ལས། ཤེར་ཕྱིན་སྐོར། རྣམ་བཤད་ལུང་རིགས་རོལ་མཚོ། སྟོད་ཆ། པཎ་ཆེན་ཤཱཀྱ་མཆོག་ལྡན། ༢༢༡་༡༧)

གཉིས་པ་དེ་ལ་གཞན་གྱིས་བཏགས་པའི་མཐའ་སེལ་བ་ནི། བོད་ཕྱི་མ་ཁ་ཅིག་ན་རེ།ཞེས་སོགས་ཀྱིས་སྤྱིར་རྗེ་ཙོང་ཁ་པ་ཆེན་པོའི་གསུང་བྱང་སའི་ཚུལ་ཁྲིམས་ལེའུའི་རྣམ་བཤད་བྱང་ཆུབ་གཞུང་ལམ་དང་། ལྷག་པར་མཁས་གྲུབ་ཆོས་རྗེའི་གསུང་སྡོམ་གསུམ་རྣམ་བཞག་ཐུབ་བསྟན་བྱི་དོར་ནས་གསུངས་པ་རྣམས་གཞུང་ཚིག་ཕལ་ཆེར་བཀོད་པས། གཙོ་བོར་དེ་ཉིད་ཕྱོགས་སྔ་བླངས་ནས། དེའི་རྗེས་སུ་དེ་དག་ལ་དགག་པ་རྒྱས་པར་མཛད་དོ༎ 

       དེ་ལ་ཐོག་མར་རྗེ་བླ་མའི་བཞེད་པ་འགོད་པ་ནི། གཞུང་ལམ་ (རྗེ་ཙོང་ཁ་པའི་བཀའ་འབུམ་དཔེ་བསྡུར་མ།༢༠༢༠ པོད་ཀ་པ། བྱང་སའི་ཚུལ་ཁྲིམས་ལེའུའི་རྣམ་བཤད་བྱང་ཆུབ་གཞུང་ལམ། ༤༡༡་༡༠) ལས། 

འཕགས་པ་ཀླུ་སྒྲུབ་དང་འཕགས་པ་ཐོགས་མེད་གཉིས་ཆོ་གའི་ཁྱད་པར་འགའ་ཞིག་མི་འདྲ་བ་མ་གཏོགས་པ་སྡོམ་པ་འཐོབ་པའི་ཆོ་ག་ལ་དོན་ལ་ཁྱད་པར་མེད་དོ༎ དེས་ན་ལུགས་དེ་གཉིས་ལ་དབུ་མའི་ལུགས་དང་སེམས་ཙམ་ལུགས་ཀྱི་ཐ་སྙད་བྱས་ནས། བླང་བའི་ཡུལ་དང་། ལེན་པའི་ཆོ་ག་དང་། རྩ་ལྟུང་མི་མཐུན་པར་སྨྲ་བ་ནི་མ་བརྟགས་པ་ཆེན་པོའོ༎ 

ཞེས་སོགས་གཞུང་འདིའི་སྔ་ཕྱི་མང་པོར་བཞེད་ཚུལ་སྔ་མ་ལ་དགག་་པ་མཛད་པ་འོག་ཏུ་རིམ་པ་བཞིན་དགོད་པར་འདོད་ལ། དེའི་རྗེས་སུ་མཁས་གྲུབ་རྗེས་ཀྱང་ཕྱོགས་སྔ་མའི་འདོད་ཚུལ་དེ་དོན་ཚན་དྲུག་ཏུ་ཕྱེ་སྟེ་ཕྱོགས་སྔ་མ་རྒྱས་པར་བཀོད་ནས་རེ་རེ་ཞིང་འགོག་པར་མཛད་དེ། བྱི་དོར་ (མཁས་གྲུབ་རྗེའི་གསུང་འབུམ་དཔེ་བསྡུར་མ།༢༠༢༠ ཁ་པ། སྡོམ་གསུམ་རྣམ་བཞག་ཐུབ་བསྟན་བྱི་དོར། ༤༩༠་༨) ལས། 

གངས་རིའི་ཁྲོད་འདིར་བླ་མ་སྔ་མ་མང་པོ་ཞིག་གི་ལུགས་ཀྱིས་སྲོལ་ཆེན་པོ་གཉིས་སུ་སྨྲ་སྟེ། ཐེག་པ་ཆེན་པོ་སེམས་ཙམ་པའི་ལུགས་དང༌། དབུ་མ་པའི་ལུགས་སོ༎ དང་པོ་ནི། བྱང་ཆུབ་སེམས་དཔའི་སྡེ་སྣོད་འགའ་ཞིག་གི་རྗེས་སུ་འབྲངས་ནས། འཕགས་པ་བྱམས་པའི་གསུང༌། སློབ་དཔོན་ཐོགས་མེད་ལས་བརྒྱུད་པ། སློབ་དཔོན་ཙནྡྲ་གོ་མིའི་རྗེས་སུ་འབྲངས་ནས་ཇོ་བོ་རྗེ་ལ་སོགས་པའི་ཕྱག་ལེན། དགེ་བའི་བཤེས་གཉེན་བཀའ་གདམས་པས་མཛད་པ་དེ་ཡིན་ལ། ཐེག་པ་ཆེན་པོ་དབུ་མ་པའི་སེམས་བསྐྱེད་ནི། མདོ་སྡེ་སྡོང་པོ་བཀོད་པ་དང་ནམ་མཁའི་སྙིང་པོའ་རྗེས་སུ་འབྲངས་ནས། འཕགས་པ་འཇམ་དཔལ་གཞོན་ནུར་གྱུར་པའི་གསུང་། སློབ་དཔོན་འཕགས་པ་ཀླུ་སྒྲུབ་ལ་སོགས་པ་ལས་བྱུང་བ། སློབ་དཔོན་ཞི་བ་ལྷའི་རྗེས་སུ་འབྲངས་ནས། སློབ་དཔོན་ཛེ་ཏ་རི་དང་ཇོ་བོ་པུཎྱ་ཤྲཱི་ལ་སོགས་པ་ལས་བརྒྱུད་པ་ཕྱག་ལེན་དུ་མཛད་པ་འདི་ཡིན་ནོ༎ འདི་གཉིས་ལ་ལྟ་བའི་ཁྱད་པར་བཞིན་དུ་སྤྱོད་པ་ལ་ཡང་ཁྱད་པར་ཡོད་དེ། དེ་ཡང་བླང་བར་བྱ་བའི་ཡུལ་མི་འདྲ། ལེན་པའི་གང་ཟག་མི་འདྲ། བླང་བའི་ཆོ་ག་མི་འདྲ། བླངས་ནས་བསྲུང་ཚུལ་མི་འདྲ། ཉམས་ན་ཕྱིར་བཅོས་ཚུལ་མི་འདྲའོ༎ 

ཞེས་སོགས་རྒྱ་ཆེར་གསུངས་སོ༎ དེ་ལ་འདིར་ཕྱོགས་སྔའི་བཞེད་པ་བཀོད་པ་རྣམས་ཚིག་རེ་ཙམ་མ་གཏོགས་རྗེ་བཙུན་ས་པཎ་གྱི་གསུང་། དབུ་མ་ལུགས་ཀྱི་སེམས་བསྐྱེད་ཀྱི་ཆོ་ག་ (དཔལ་བརྩེགས་པར་མ། ས་སྐྱ་བཀའ་འབུམ་དཔེ་བསྡུར་མ། ས་པཎ་ཀུན་དགའ་རྒྱལ་མཚན་གྱི་གསུང་འབུམ། པོད་དང་པོ། དབུ་མ་ལུགས་ཀྱི་སེམས་བསྐྱེད་ཀྱི་ཆོ་ག ༣༠༤ -༣༣༧) ཞེས་བྱ་བའི་ཚིག་རིས་ཇི་ལྟ་བ་བཞིན་སྣང་བས། གཞུང་དེ་ཉིད་ཕྱོགས་སྔ་བླངས་པར་ངེས་སོ༎ གཞུང་གཉིས་སུ་དོན་ཚན་གཉིས་པ་མན་ཆད་གྱི་དགག་པ་དང་དགག་ལན་རྣམས་འདྲེས་ནས་ཚན་པ་སོ་སོར་མཚམས་མ་བཅད་པས། འདིར་དགག་བཞག་སྤོང་གསུམ་ལ་འཇུག་པ་བདེ་བའི་ཕྱིར་བྱི་དོར་ལས་གསུངས་པའི་དོན་ཚན་དྲུག་སོ་སོར་ཕྱོགས་སྔའི་འདོད་པ་དང་། དེའི་དགག་པ། དེ་ལ་པཎ་ཆེན་གསེར་མདོག་ཅན་པས་དགག་པ། ཡང་དེ་ལ་ཁོ་བོས་རྩོད་སྤོང་རྣམས་དཀྱུས་གཅིག་འགོད་པར་བྱའོ༎ 

༢༽ བྱང་སྡོམ་གང་ལས་བླང་བའི་ཡུལ་ལ་དཔྱད་པ། 

       དེ་ལ་དང་པོ་སྡོམ་པ་བླང་བའི་ཡུལ་གྱི་ཁྱད་པར་ལ། ཕྱོགས་སྔའི་འདོད་པ་བརྗོད་པ་ནི། བྱི་དོར་ (མཁས་གྲུབ་རྗེའི་གསུང་འབུམ་དཔེ་བསྡུར་མ།༢༠༢༠ ཁ་པ། སྡོམ་གསུམ་རྣམ་བཞག་ཐུབ་བསྟན་བྱི་དོར། ༤༩༠་༡༩) ལས། 

དང་པོ་ནི། མགོན་པོ་བྱམས་པས། (སྡེ་བསྟན། སེམས་ཙམ། ཕི་པ། ཐེག་པ་ཆེན་པོ་མདོ་སྡེའི་རྒྱན། འཕགས་པ་བྱམས་པ། ༢༥ བ ༢) བཤེས་གཉེན་དུལ་བ་ཞི་བ་ཉེར་ཞི་བ༎ ཞེས་སོགས་གསུངས་པའི་མཚན་ཉིད་དང་ལྡན་པ་དང༌། སློབ་དཔོན་ཀླུ་སྒྲུབ་ཀྱིས། (སྡེ་བསྟན། སྐྱེས་རབས། གེ་པ། རྒྱལ་པོ་ལ་གཏམ་བྱ་བ་རིན་པོ་ཆེའི་ཕྲེང་བ། འཕགས་པ་ཀླུ་སྒྲུབ། ༡༢༥ བ ༣) ཆོག་ཤེས་སྙིང་རྗེ་ཚུལ་ཁྲིམས་ལྡན༎ ཉོན་མོངས་སེལ་བའི་ཤེས་རབ་ཅན༎ ཞེས་གསུངས་པ་དང་ལྡན་པའོ༎ 

ཞེས་རྒྱན་དང་རིན་ཆེན་ཕྲེང་བ་གཉིས་ལས་གསུངས་པའི་བཤེས་གཉེན་གྱི་མཚན་ཉིད་བསྟན་པའི་གཞུང་ཚིག་རྣམས་སྔ་མ་སེམས་ཙམ་ལུགས་དང་། ཕྱི་མ་དབུ་མ་ལུགས་ཀྱི་བྱང་སྡོམ་བླང་ཡུལ་གྱི་བླ་མའི་མཚན་ཉིད་བསྟན་པར་ཕྱོགས་སྔར་བཀོད་དོ༎ འོན་ཀྱང་ལུང་རིགས་རོལ་མཚོར་རང་ལུགས་བཞག་པ་ན་ནི། གོང་གི་གཞུང་ཚིག་དེ་དག་མ་དྲངས་པར་སྡོམ་པ་ཉི་ཤུ་པ་དང་། སྤྱོད་འཇུག་གི་གཞུང་ཚིག་བཀོད་ནས་ལུགས་གཉིས་ཀྱི་བླ་མའི་མཚན་ཉིད་མི་འདྲ་བར་སྒྲུབ་སྟེ། དེ་ཉིད་ (གྲགས་ཆེན་་བཅོ་བརྒྱད་ལས། ཤེར་ཕྱིན་སྐོར། རྣམ་བཤད་ལུང་རིགས་རོལ་མཚོ། སྟོད་ཆ། པཎ་ཆེན་ཤཱཀྱ་མཆོག་ལྡན། ༢༡༧་༨) ལས། 

དང་པོ་ཇི་སྐད་དུ། (སྡེ་བསྟན། སེམས་ཙམ། ཧི་པ། བྱང་ཆུབ་སེམས་དཔའི་སྡོམ་པ་ཉི་ཤུ་པ། སློབ་དཔོན་ཙན་དྲ་གོ་མི། ༡༦༦ བ ༢) བླ་མ་སྡོམ་ལ་གནས་ཤིང་མཁས། །ནུས་དང་ལྡན་ལས་བླང་བར་བྱ། །ཞེས་དང་། (སྡེ་བསྟན། དབུ་མ། ལ་པ། བྱང་ཆུབ་སེམས་དཔའི་སྤྱོད་པ་ལ་འཇུག་པ། སློབ་དཔོན་ཞི་བ་ལྷ། ༡༤ ན ༥) རྟག་པར་དགེ་བའི་བཤེས་གཉེན་ནི། །ཞེས་སོགས་ཀྱི་ཁྱད་པར་ལས་དང་།

ཞེས་སོ༎ དེ་ནི་ཆོས་རྗེ་ས་ཎ་གྱིས། (དཔལ་བརྩེགས་པར་མ། ས་སྐྱ་བཀའ་འབུམ་དཔེ་བསྡུར་མ། ས་པཎ་ཀུན་དགའ་རྒྱལ་མཚན་གྱི་གསུང་འབུམ། པོད་དང་པོ། དབུ་མ་ལུགས་ཀྱི་སེམས་བསྐྱེད་ཀྱི་ཆོ་ག ༣༡༤་༡༧) རྒྱན་དང་སྡོམ་པ་ཉི་ཤུ་པ་སེམས་ཙམ་ལུགས་དང་། རིན་ཕྲེང་དང་སྤྱོད་འཇུག་དབུ་མ་ལུགས་སུ་བྱས་ནས་ལུང་དྲངས་པ་ལ། མཁས་གྲུབ་རྗེས་རྒྱན་དང་རིན་ཕྲེང་དྲངས་ནས་ཕྱོགས་སྔ་བཀོད་ཅིང་། ཤཱཀ་མཆོག་པས་སྡོམ་པ་ཉི་ཤུ་པ་དང་སྤྱོད་འཇུག་དྲངས་ནས་རང་ལུགས་བཞག་་པ་ཙམ་་མོ༎ 

       དེ་དག་ལ་མཁས་གྲུབ་ཆོས་རྗེས་དགག་པ་མཛད་ཚུལ་ནི། བྱི་དོར་ (མཁས་གྲུབ་རྗེའི་གསུང་འབུམ་དཔེ་བསྡུར་མ།༢༠༢༠ ཁ་པ། ༤༩༣་༡༡) ལས། 

ལུགས་འདི་ནི་ཤིན་ཏུ་ལེགས་པ་མ་ཡིན་ཏེ། རྣམ་པར་དཔྱད་ན་ལྷག་མ་མ་ལུས་པར་འཇིག་པར་འགྱུར་བས། བརྟག་ཅིང་དཔྱད་པའི་དཔུང་ཅུང་ཟད་ཀྱང་མི་བཟོད་པའི་ཕྱིར་རོ༎ དེ་ཡང་འདི་ལྟར། དང་པོ་ཁོ་ནར་བླང་བའི་ཡུལ་མི་འདྲ་བའི་ཚུལ་སྨྲས་པ་དེ་མི་འཐད་དེ། ལུང་(རྒྱན་དང་རིན་ཕྲེང་།)དེ་གཉིས་ཚིག་ཐ་དད་པ་ཙམ་དུ་ཟད་ཀྱི། ཚིག་གཉིས་ཀྱིས་བསྟན་པའི་དགེ་བའི་བཤེས་གཉེན་གྱི་མཚན་ཉིད་ཅུང་ཟད་རྒྱས་བསྡུས་མ་གཏོགས་དོན་གཅིག་ཏུ་སྣང་བའི་ཕྱིར་རོ༎ 

ཞེས་སོ༎ དེ་ལ་ལུང་གཉིས་པོའི་ཚིག་དོན་ཤེས་པ་གལ་ཆེ་ལ། དེ་ཡང་ལུང་དང་པོ་ནི་མདོ་སྡེ་རྒྱན་གྱི་གཞུང་ཚིག་ཡིན་ཏེ། ཇི་སྐད་དུའང་དེ་ཉིད་ (སྡེ་བསྟན། སེམས་ཙམ། ཕི་པ། ཐེག་པ་ཆེན་པོ་མདོ་སྡེའི་རྒྱན། འཕགས་པ་བྱམས་པ། ༢༥ བ ༢) ལས། 

བཤེས་གཉེན་དུལ་བ་ཞི་ཞིང་ཉེར་ཞི་བ༎ ཡོན་ཏན་ལྷག་པ་བརྩོན་བཅས་ལུང་གིས་ཕྱུག། དེ་ཉིད་རབ་ཏུ་རྟོགས་པ་སྨྲ་མཁས་ལྡན༎ བརྩེ་བའི་བདག་ཉིད་སྐྱོ་བ་སྤངས་ལ་སྟེན༎ 

ཞེས་སོ༎ དེའི་དོན་ནི། དབྱིག་འགྲེལ་ (སྡེ་བསྟན། སེམས་ཙམ། ཕི་པ། མདོ་སྡེའི་རྒྱན་གྱི་བཤད་པ། སློབ་དཔོན་དབྱིག་གཉེན། ༢༡༢ ན ༤) ལས། 

བསྟེན་པའི་རྟེན་ནི་ཡོན་ཏན་དེ་ལྟ་བུ་དང་ལྡན་པའི་བཤེས་གཉེན་ཡིན་ཏེ། དུལ་བ་ནི། ཚུལ་ཁྲིམས་དང་ལྡན་པའི་ཕྱིར་དབང་པོ་དུལ་བས་སོ༎ ཞི་བ་ནི། ཏིང་ངེ་འཛིན་དང་ལྡན་པའི་ཕྱིར་སེམས་ནང་དུ་ཞི་བར་གནས་པས་སོ༎ ཉེ་བར་ཞི་བ་ནི། ཤེས་རབ་དང་ལྡན་པའི་ཕྱིར་ཉོན་མོངས་པ་ཉེ་བར་གནས་པ་ཉེ་བར་ཞི་བས་སོ༎ ཡོན་ཏན་ལྷག་པ་ནི། མཉམ་པའམ་ཆུང་བ་མ་ཡིན་པའོ༎ བརྩོན་པ་དང་བཅས་པ་ནི། གཞན་གྱི་དོན་ལ་གཡེང་བ་མ་ཡིན་པའོ༎ ལུང་གིས་ཕྱུག་པ་ནི། ཐོས་པ་ཉུང་ངུ་མ་ཡིན་པའོ༎ དེ་ཁོ་ན་ཉིད་རབ་ཏུ་རྟོགས་པ་ནི། དེ་ཁོ་ན་ཉིད་ཁོང་དུ་ཆུད་པའི་ཕྱིར་རོ༎ སྨྲ་མཁས་པ་དང་ལྡན་པ་ནི། སྨྲ་མཁས་པ་དང་ལྡན་པའོ༎ བརྩེ་བའི་བདག་ཉིད་ནི། ཟང་ཟིང་གི་སེམས་མེད་པའི་ཕྱིར་རོ༎ སྐྱོ་བ་སྤངས་པ་ནི། རྟག་ཏུ་ཆོས་སྟོན་པའི་ཕྱིར་རོ༎ 

ཞེས་གསུངས་སོ༎ ལུང་གཉིས་པ་ནི་རིན་ཆེན་ཕྲེང་བ་ (སྡེ་བསྟན། སྐྱེས་རབས། གེ་པ། རྒྱལ་པོ་ལ་གཏམ་བྱ་བ་རིན་པོ་ཆེའི་ཕྲེང་བ། འཕགས་པ་ཀླུ་སྒྲུབ། ༡༢༥ བ ༣) ལས། 

དགེ་བའི་བཤེས་གཉེན་དེ་དག་གི། མཚན་ཉིད་མདོར་བསྡུས་མཁྱེན་པར་མཛོད༎ ཆོག་ཤེས་སྙིང་རྗེ་ཚུལ་ཁྲིམས་ལྡན༎ ཉོན་མོངས་སེལ་བའི་ཤེས་རབ་ཅན༎ དེ་དག་གིས་ནི་ཁྱོད་བསྟེན་ན༎ ཁྱོད་ཀྱིས་མཁྱེན་གྱི་གུས་པར་མཛོད༎ 

ཞེས་སོ༎ དོན་ནི། དེའི་དར་ཊཱིཀ་ (རྒྱལ་ཚབ་རྗེའི་གསུང་འབུམ་དཔེ་བསྡུར་མ།༢༠༢༠ ཀ་པ། དབུ་མ་རིན་ཆེན་ཕྲེང་བའི་རྣམ་བཤད། ༣༠༤་༡༢) ལས། 

གཉིས་པ་ (བཤེས་གཉེན་གྱི་མཚན་ཉིད།) ནི། འོ་ན་དགེ་བའི་བཤེས་གཉེན་ཇི་ལྟ་བུ་བསྟེན་པར་བྱ་ཞེ་ན། དགེ་བའི་བཤེས་གཉེན་དག་གི་མཚན་ཉིད་མདོར་བསྡུས་པ་ཆོས་བཞི་དང་ལྡན་པ་མཁྱེན་པར་མཛོད་ཅིག །ཇི་ལྟ་བུ་ཞེ་ན། ཆོག་ཤེས་ཆེ་བ་རྙེད་བཀུར་མི་འདོད་པ་དང་། སྙིང་རྗེ་ཆེ་བ་དང་། ཚུལ་ཁྲིམས་དང་ལྡན་པ་དང་། སློབ་མའི་ཉོན་མོངས་སེལ་བའི་ཤེས་རབ་ཅན་དེ་དག་གིས་ནི་ཁྱོད་ལ་གདམས་པ་དང་རྗེས་སུ་བསྟན་ན། ཁྱོད་ཀྱིས་མཁྱེན་པར་གྱིས་ལ་གུས་པར་མཛོད་ཅིག་པའོ།།

ཞེས་བཤེས་གཉེན་ཆོས་བཞི་ལྡན་དུ་གསུངས་སོ།། 

       འོ་ན་ལུང་གཉིས་ཀྱིས་བསྟན་པའི་དགེ་བའི་བཤེས་གཉེན་གྱི་མཚན་ཉིད་ཅུང་ཟད་རྒྱས་བསྡུས་མ་གཏོགས་དོན་གཅིག་པ་ཡིན་ན། རྒྱན་ནས་གསུངས་པའི་ཆོས་བཅུ་པོ་རིན་ཕྲེང་ནས་གསུངས་པའི་ཆོས་བཞིར་བསྡུ་ཚུལ་ཇི་ལྟར་ཡིན་ཞེ་ན། དེའི་ཚུལ་ཡོད་དེ། ཆོག་ཤེས་ཆེ་བས། ལྷག་པ་ཏིང་ངེ་འཛིན་གྱི་བསླབ་པ་དང་། སྙིང་རྗེ་ཆེ་བས། བརྩོན་པ་དང་བཅས་པ། བརྩེ་བའི་བདག་ཉིད། སྐྱོ་བ་སྤངས་པ་སྟེ་གསུམ་དང་། ཚུལ་ཁྲིམས་དང་ལྡན་པས། ལྷག་པ་ཚུལ་ཁྲིམས་གྱི་བསླབ་པ་དང་། ཤེས་རབ་ཅན་གྱིས། ལྷག་པ་ཤེས་རབ་ཀྱིབསླབ་པ། ཡོན་ཏན་ལྷག་པ། ལུང་གིས་ཕྱུག་པ། དེ་ཁོ་ན་ཉིད་རྟོགས་པ། སྨྲ་མཁས་པ་དང་ལྔ་བསྡུས་པའི་ཕྱིར་རོ༎ 

       དེ་ལ་པཎ་ཆེན་ཤཱཀ་མཆོག་པས་དགག་པ་མཛད་པ་ནི། ལུང་རིགས་རོལ་མཚོ་ (གྲགས་ཆེན་་བཅོ་བརྒྱད་ལས། ཤེར་ཕྱིན་སྐོར། རྣམ་བཤད་ལུང་རིགས་རོལ་མཚོ། སྟོད་ཆ། ༢༢༣་༡༣) ལས། 

དང་པོ་ཡུལ་དགེ་བའི་གཤེས་གཉེན་གྱི་མཚན་ཉིད་གཅིག་པ་ལུང་དེ་གཉིས་ཀྱི་དགོངས་པ་མ་ཡིན་ཏེ། སྡོམ་པ་ཉི་ཤུ་པ་ལས། ནུས་དང་ལྡན་ལས་བླང་བར་བྱ༎ ཞེས་ཚིག་འབུར་དུ་དོད་པ་འབྱུང་ལ། དེའི་དོན་ཡང་། བྱང་སའི་ལུགས་ལ་སློབ་དཔོན་གྱི་ལུས་ཀྱི་བྱ་བ་ཕྱོགས་བཞིར་ཕྱག་འཚལ་བ་དང་། མེ་ཏོག་འཐོར་དགོས་པ་ལ་སོགས་པ་ལུས་ཀྱི་བྱ་བ་མང་པོ་དགོས་པས། དེ་ལྟར་ནུས་པ་ལས་ལེན་ཞེས་པའི་དོན་ཡིན་ལ། ཅིག་ཤོས་ལ་དེ་མི་དགོས་པའི་ཕྱིར་རོ༎ 

ཞེས་སོ༎ 

       ད་ནི་འདི་དག་ལ་ཅུང་ཟད་དཔྱད་ན། དེ་ཡང་མཁས་གྲུབ་རྗེས། རྒྱན་དང་རིན་ཕྲེང་ལས་གསུངས་པའི་བླ་མའི་མཚན་ཉིད་གསུངས་པ་རྒྱས་བསྡུས་ཙམ་མ་གཏོགས་དོན་གཅིག་པར་གསུངས་པ་ལ།  དེའིགནོད་བྱེད་དུ། ཡུལ་དགེ་བའི་གཤེས་གཉེན་གྱི་མཚན་ཉིད་གཅིག་པ་ལུང་དེ་གཉིས་ཀྱི་དགོངས་པ་མ་ཡིན་པ་དང་། དེའི་ཤེས་བྱེད་དུ་སྡོམ་པ་ཉི་ཤུ་པ་དྲངས་པ་ནི་འབྲེལ་བ་མེད་དེ། དེ་ལ་བརྟེན་ནས་རྒྱན་དང་རིན་ཕྲེང་གི་ལུང་གཉིས་ཀྱིས་བསྟན་པའི་དགེ་བའི་བཤེས་གཉེན་དོན་གཅིག་པར་གསུངས་པ་ལ་ཅི་ཡང་མི་གནོད་པའི་ཕྱིར། 

       གཞན་ཡང་ཁྱེད་ཀྱིས། ནུས་པ་དང་ལྡན་ཞེས་པ་ཕྱོགས་བཞིར་ཕྱག་འཚལ་བ་དང་། མེ་ཏོག་འཐོར་བ་ལ་སྦྱར་བ་འདི་ལ་ཡང་བརྟག་དགོས་ཏེ། སློབ་དཔོན་བྱང་ཆུབ་བཟང་པོའི་དཀའ་འགྲེལ་ (སྡེ་བསྟན། སེམས་ཙམ། ཧི་པ། བྱང་ཆུབ་སེམས་དཔའི་སྡོམ་པ་ཉི་ཤུ་པའི་དཀའ་འགྲེལ། སློབ་དཔོན་བྱང་ཆུབ་བཟང་པོ། ༡༩༦ ན ༥) ལས། 

དེ་སུ་ཞིག་ལས་བླང་བར་བྱ་ཞེ་ན། བླ་མ་སྡོམ་པ་ལ་གནས། ཞེས་བྱ་བ་ལ་སོགས་པ་སྨོས་ཏེ། བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་དང་ལྡན་པ་ཆོས་མཐུན་པ་ལས་ཏེ། སྡོམ་པ་དེ་གཏོང་བའམ། ཚུལ་ཁྲིམས་འཆལ་པའམ། དབང་དུ་གྱུར་པ་མ་ཡིན་པའི་ཕྱིར། ཆོས་མཐུན་པ་མ་ཡིན་པ་གཞན་ལས་ནི་མ་ཡིན་ནོ༎ སྡོམ་པ་ལ་གནས་ནས་ཀྱང་ཐམས་ཅད་ལས་མ་ཡིན་པས། མཁས། ཞེས་བྱ་བ་སྨོས་ཏེ། གང་ཞིག་བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་དེ་ཡང་དག་པར་བླང་བའི་ཆོ་ག་ལ་མཁས་པ་ཉིད་ལས་འདི་མནོད་པར་བྱ་ཞེས་བྱའོ༎ དེ་ཉིད་ཀྱི་ཕྱིར་མཁས་པ་མ་ཡིན་པ་ལས་ནི་ཆོ་ག་ཉམས་པས། སྡོམ་པ་འཐོབ་པར་མི་འགྱུར་རོ། །དེ་ལྟར་ན་ཡང་ཐམས་ཅད་ལས་མ་ཡིན་པས། ནུས་དང་ལྡན་ལ། ཞེས་བྱ་བ་སྨོས་ཏེ། ནུས་པ་ནི་སྟོབས་ཏེ། འབོགས་པར་འོས་ཤིང་འཚམ་པ་ཞེས་བྱ་བའི་དོན་ཏོ༎ དེ་ཉིད་ཀྱིས་ནི་ཡོན་ཏན་དང་ལྡན་པ་མ་ཡིན་པ་དང༌། བླང་བར་འོས་པ་མ་ཡིན་པའི་ཕྱིར། གཞན་ལས་ནི་མ་ཡིན་ནོ༎ དེ་ལ་བསམ་པ་དང༌སྦྱོར་བ་ཕུན་སུམ་ཚོགས་པ་ནི་འོས་པ་ཡིན་པར་རིག་པར་བྱའོ༎ དེ་ལ་བསམ་པ་ཕུན་སུམ་ཚོགས་པ་ནི། དད་པ་ཉིད་དང༌། བསམ་པ་ཐག་པས་བྱེད་པ་ཉིད་དང༌། མ་ཆགས་པ་དང༌། སྙིང་རྗེ་དང་ལྡན་པ་ཉིད་དེ། གང་གིས་རེ་ཞིག་བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ཡང་དག་པར་མནོད་པ་ལྷག་པར་མོས་པ་བྱང་ཆུབ་སེམས་དཔའི་སྡེ་སྣོད་ཀྱི་མ་མོ་ལ་སོགས་པ་ལ་སྐུར་པ་མི་འདེབས་ཤིང་དད་པ་དང་ལྡན་པ་དང༌། བསླབ་པ་རྣམས་ལ་གུས་ཤིང་འཇུག་པ་ལ་རྟོག་པ་དང་། རང་བཞིན་གྱིས་འདོད་པ་ཆུང་བ་དང༌། ཆོག་ཤེས་པ་དང༌། ཟང་ཟིང་ལྟར་ལེན་པ་མ་ཡིན་པ་དང༌། སྙིང་རྗེ་དང་ལྡན་པར་གྱུར་པ་དང༌། སྐྱོ་བ་མེད་པ་དང༌། ཕ་རོལ་གྱི་ཉེས་པ་བཟོད་པ་དང༌། ཁྲོ་བ་མེད་པ་དང༌། ཁོན་དུ་འཛིན་པ་མེད་པ་ཞེས་བྱའོ༎ སྦྱོར་བ་ཕུན་སུམ་ཚོགས་པ་ནི། དགེ་བའི་ཆོས་རྣམས་ཀྱི་ཕྱིར་རབ་ཏུ་སྤེལ་བ་དང༌། གུས་ཤིང་རབ་དུ་འཇུག་པ་དང༌། ཅི་ནས་ཀྱང་འདི་ལ་བསླབ་པའི་གཞི་གང་ཡང་རུང་བ་རྣམས་རྟོགས་པར་བྱ་བ་ལ་ཡང་རྨོངས་པར་མི་འགྱུར་བ་དང༌། སྤྲོ་བ་དང་བཅས་པ་ཡིན་ཞིང་། སྙོམ་ལས་མི་བྱེད་པ་དང༌། འདོད་པའི་བདེ་བ་དང༌འདུ་འཛི་ལ་མངོན་པར་མི་དགའ་བ་དང༌། སེམས་རྣམ་པར་མ་གཡེངས་པའོ༎ ནུས་པ་དང་ལྡན་པ་ཡིན་ཡང༌ཐམས་ཅད་ལ་མནོད་པར་བྱ་བ་མ་ཡིན་པས། བླ་མ། ཞེས་བྱ་བ་སྨོས་ཏེ། བླ་མར་བྱ་བའི་གནས་སུ་གྱུར་པ་ཉིད་ལས་མནོད་པར་བྱའི། གཞན་ལས་ནི་མ་ཡིན་ཏེ། མཉམ་པ་ཉིད་ཀྱིས་བླ་མར་མི་འཛིན་པས། འདི་དེའི་རྗེས་སུ་སློབ་པའི་ཚུལ་ཅན་དུ་མི་འགྱུར་ཏེ། དེས་བྱས་པ་རྣམས་ལ་གུས་པ་ཆེན་པོར་མི་བྱེད་པའི་ཕྱིར་རོ༎ 

ཞེས་རང་ལས་ཡོན་ཏན་ལྷག་ཅིང་དད་གུས་འོས་པའི་བླ་མ་ཚུལ་ཁྲིམས་ཕུན་སུམ་ཚོགས་པ་དང་ལྡན་པ་སྡོམ་པ་འབོགས་པའི་ཆོ་ག་ལ་མཁས་པ། བསམ་པ་དང་སྦྱོར་བའི་ནུས་སྟོབས་ཕུན་སུམ་ཚོགས་པ་ཞིག་ལས་བྱང་སྡོམ་བླང་བར་བྱ་བར་གསུངས་ཤིང་། དེའི་འཕྲོར་ (སྡེ་བསྟན། སེམས་ཙམ། ཧི་པ། བྱང་ཆུབ་སེམས་དཔའི་སྡོམ་པ་ཉི་ཤུ་པའི་དཀའ་འགྲེལ། སློབ་དཔོན་བྱང་ཆུབ་བཟང་པོ། ༡༩༦ བ ༦) ཡང་། 

དེ་ལ། སྡོམ་ལ་གནས། ཞེས་བྱ་བ་འདིས་ནི། འདིའི་ཚུལ་ཁྲིམས་ཕུན་སུམ་ཚོགས་པ་བསྟན་ཏེ། མཁས། ཞེས་བྱ་བས་ནི། མཁས་ཤིང་བྱང་བའོ༎ ནུས་དང་ལྡན། ཞེས་བྱ་བས་ནི། ཡོན་ཏན་ཕུན་སུམ་ཚོགས་པ་སྟེ། གསུམ་པོ་དེ་དག་གི་ཁྱད་པར་རྟོགས་པར་བྱེད་པ་ཉིད་དོ༎ བླ་མ། ཞེས་བྱ་བ་ནི། རྟེན་འཛིན་པ་ཉིད་དོ༎

ཞེས་དོན་བསྡུ་བར་མཛད་དེ། འདིར་ནུས་པ་དང་ལྡན་པའི་དོན་བསྨ་པ་ཕུན་ཚོགས་དད་པ་དང་སྙིང་རྗེ་སོགས་དང་སྦྱོར་བ་ཕུན་ཚོགས་གུས་ཤིང་འཇུག་པ་དང་བསླབ་པའི་གཞི་མ་རྨོངས་པ་སོགས་ལ་གསུངས་པ་མ་གཏོགས་ཕྱག་ལེན་ཕྲན་ཚེགས་ལ་སྦྱར་བ་མི་སྣང་ཞིང་།  ཤཱནྟ་རཀྵི་ཏས་སྡོམ་པ་ཉི་ཤུ་པའི་འགྲེལ་པར་ཡང་། ངག་གི་རིག་བྱེད་ཀྱི་དོན་འཛིན་པ་དང་གོ་བར་ནུས་པ་ལ་སྦྱར་བའི་ཕྱིར་ཏེ། དེ་ཉིད་ (སྡེ་བསྟན། སེམས་ཙམ། ཧི་པ། སྡོམ་པ་ཉི་ཤུ་པའི་འགྲེལ་པ། སློབ་དཔོན་ཤཱནྟ་རཀྵི་ཏ། ༡༦༧ བ ༡) ལས། 

དེ་ལ་བྱང་ཆུབ་སེམས་དཔའ་ཁྱིམ་པའམ་རབ་ཏུ་བྱུང་བ་བྱང་ཆུབ་སེམས་དཔའི་བསླབ་པའི་ཚུལ་ཁྲིམས་ཀྱི་ཕུང་པོ་རྣམ་པ་གསུམ་པོ་འདི་དག་ལ་སློབ་པར་འདོད་ཅིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་པས་བྱང་ཆུབ་སེམས་དཔའི་སྨོན་ལམ་བཏབ་པའི་ཕྱིར་ཆོས་མཐུན་པ་སྡོམ་པ་བླངས་པ་མཁས་པ། ངག་གི་རྣམ་པར་རིག་བྱེད་ཀྱི་དོན་འཛིན་པ་དང་གོ་བར་ནུས་པ་དེ་ལྟ་བུའི་བྱང་ཆུབ་སེམས་དཔའི་རྐང་པ་གཉིས་ལ་ཐོག་མར་ཕྱག་བྱས་ནས་གསོལ་བ་གདབ་པར་བྱ་སྟེ། 

ཞེས་གསུངས་པའི་ཕྱིར་དང་། དོན་ལ་བསམ་ན་ཡང་གདུལ་བྱའི་རྒྱུད་ལ་བྱང་སྡོམ་སྐྱེད་ནུས་པ་ཞིག་ལ་གོ་དགོས་ཀྱི། ཕྱག་འཚལ་ནུས་པ་དང་མེ་ཏོག་འཐོར་ནུས་པ་ལ་ཟེར་བ་མ་ཡིན་སྙམ་མོ༎ དེས་ན་རྗེ་བཙུན་གྲགས་པ་རྒྱལ་མཚན་གྱི་གསུང་ (དཔལ་བརྩེགས་པར་མ། ས་སྐྱ་བཀའ་འབུམ་དཔེ་བསྡུར་མ། རྗེ་བཙུན་གྲགས་པ་རྒྱལ་མཚན་གྱི་གསུང་འབུམ། པོད་ལྔ་པ། སྡོམ་པ་ཉི་ཤུ་པའི་རྣམ་བཤད། ༢༤༨་༡༣) ལས། 

ནུས་པ་དང་ལྡན་པ་སྟེ། སྡོམ་པ་འབོགས་ནུས་པ་དང་། 

ཞེས་གསུངས་པ་ལྟར། རང་ལ་བྱང་སྡོམ་མ་ཉམས་པར་ཡོད་པ་གཞིར་བྱས། སྡོམ་པ་འབོགས་པའི་ཆོ་ག་རང་གི་ངག་གིས་ཐོན་པ་ཞིག་དང་། དེའི་དོན་སློབ་མ་ལ་གོ་བར་བྱེད་ནུས་པ་ཞིག་ནི་ངེས་པར་དགོས་ཀྱི། ཕྱག་ལེན་ཕྲན་ཚེགས་རྣམས་སྒྲུབ་མི་ནུས་ན་རྒྱས་བསྡུས་བྱ་ཆོག་པའི་གནང་བ་ཡོད་པར་སེམས་སོ༎ 

༣༽ བྱང་སྡོམ་ལེན་པའི་གང་ཟག་ལ་དཔྱད་པ། 

       གཉིས་པ་ལེན་པའི་གང་ཟག་གི་སྐོར་ལ་མཁས་གྲུབ་རྗེས་ཕྱོགས་སྔ་བླངས་པ་ནི། བྱི་དོར་ (མཁས་གྲུབ་རྗེའི་གསུང་འབུམ་དཔེ་བསྡུར་མ།༢༠༢༠ ཁ་པ། སྡོམ་གསུམ་རྣམ་བཞག་ཐུབ་བསྟན་བྱི་དོར། ༤༩༡་༢) ལས། 

གཉིས་པ་ལེན་པའི་གང་ཟག་མི་འདྲ་སྟེ། སེམས་ཙམ་པའི་སྐབས་སུ་འཕགས་པ་ཐོགས་མེད་ཀྱི་རྗེས་སུ་འབྲངས་ནས། (སྡེ་བསྟན་། དབུ་མ། ཁི་པ། བྱང་ཆུབ་ལམ་གྱི་སྒྲོན་མ། དཔལ་མར་མེ་མཛད་ཡེ་ཤེས། ༢༣༩ ན ༤) སོ་སོ་ཐར་པ་རིགས་བདུན་གྱི༎ རྟག་ཏུ་སྡོམ་གཞན་ལྡན་པ་ལ༎ བྱང་ཆུབ་སེམས་དཔའི་སྡོམ་པ་ཡི༎ སྐལ་བ་ཡོད་ཀྱི་གཞན་དུ་མིན༎ ཞེས་གསུངས་པས། བྱང་སེམས་ཀྱི་སྡོམ་པ་ལེན་པ་ལ་སོ་ཐར་རིགས་བདུན་གང་རུང་གཅིག་རྟེན་དུ་དགོས་པར་བཞེད་ལ། དབུ་མ་པ་ནི། ལྷ་དང་ལྷ་མ་ཡིན་ལ་སོགས་པ་རིགས་དྲུག་མཐའ་དག་དང༌། སོ་སོ་ཐར་པ་བསྲུང་མི་ནུས་པ་རྒྱལ་པོ་ནས་ཤན་པའི་བར་ཐམས་ཅད་ལ་སྐྱེ་བར་བཞེད་དེ། མདོ་སྡེ་བསྐལ་བཟང་ལས། རྒྱལ་བ་ཕན་བཞེད་གྲོང་དཔོན་གྱུར་པའི་ཚེ༎ དེ་བཞིན་གཤེགས་པ་རིན་ཆེན་དཔལ་དེ་ལ༎ ཉིན་གཅིག་སྲོག་གཅོད་སྡོམ་པ་བླངས་ནས་སུ༎ དང་པོར་བྱང་ཆུབ་ཏུ་ནི་སེམས་བསྐྱེད་དོ༎ ཞེས་གསུངས་པ་ལྟར་རོ།།

ཞེས་སོ༎ དོན་བསྡུ་ན། སེམས་ཙམ་ལུགས་ཀྱི་བྱང་སྡོམ་སྐྱེ་བ་ལ་སོ་ཐར་རིགས་བདུན་གང་རུང་གི་སྡོམ་པ་དང་ལྡན་དགོས་པ་དང་། དབུ་མ་ལུགས་ཀྱི་དེ་སྐྱེ་བའི་རྟེན་ལ་ནི། སོར་སྡོམ་བསྲུང་ནུས་མི་ནུས་ཀུན་དང་། འགྲོ་བ་རིགས་དྲུག་ཐམས་ཅད་རུང་ཞེས་པའོ༎ 

       ཡང་ཤཱཀ་མཆོག་པས་ལེན་པའི་གང་ཟག་མི་འདྲ་བའི་ཁྱད་པར་བཤད་པ་ནི། རོལ་མཚོར། (གྲགས་ཆེན་་བཅོ་བརྒྱད་ལས། ཤེར་ཕྱིན་སྐོར། རྣམ་བཤད་ལུང་རིགས་རོལ་མཚོ། སྟོད་ཆ། ༢༡༧་༡༨) 

གཉིས་པ་ནི། ཇི་སྐད་དུ། སོ་སོར་ཐར་པ་རིས་བདུན་གྱི། །རྟག་ཏུ་སྡོམ་གཞན་ལྡན་པ་ལ། །ཞེས་སོགས་དང་། མདོ་ལས་ལྷ་དང་ལྷ་མིན་ལ་སོགས་པ་འགྲོ་བ་མཐའ་དག་ལ་སྐྱེ་བར་བཤད་པའི་ཁྱད་པར་ལས་དང་། 

ཞེས་པ་སྟེ། ཚིག་རྒྱས་བསྡུས་ཙམ་ལས་དོན་གོང་དུ་ཕྱོགས་སྔ་བཀོད་པ་དང་ཁྱད་པར་ཆེར་མེད་ཅིང་། དབུ་མ་ལུགས་ལ་འགྲོ་བ་ཐམས་ཅད། ཅེས་རྗེ་བཙུན་གྲགས་རྒྱན་པས་སྡོམ་པ་ཉི་ཤུ་པའི་རྣམ་བཤད་ཀྱི་ཚིག་ཟིན་བཀོད་པ་འོག་ཏུ་བརྟག་པར་འགྱུར་རོ༎ 

       འདིར་མཁས་གྲུབ་རྗེས་ཕྱོགས་སྔ་འགོད་པ་ན། (དཔལ་བརྩེགས་པར་མ། ས་སྐྱ་བཀའ་འབུམ་དཔེ་བསྡུར་མ། ས་པཎ་ཀུན་དགའ་རྒྱལ་མཚན་གྱི་གསུང་འབུམ། པོད་དང་པོ། དབུ་མ་ལུགས་ཀྱི་སེམས་བསྐྱེད་ཀྱི་ཆོ་ག ༣༡༥་༡༠) 

རྒྱལ་བ་ཕན་བཞེད་གྲོང་དཔོན་གྱུར་པའི་ཚེ༎ 

དེ་བཞིན་གཤེགས་པ་རིན་ཆེན་དཔལ་དེ་ལ༎ 

ཉིན་གཅིག་སྲོག་གཅོད་སྡོམ་པ་བླངས་ནས་སུ༎ 

དང་པོར་བྱང་ཆུབ་ཏུ་ནི་སེམས་བསྐྱེད་དོ༎ 

ཞེས་དྲངས་ཀྱང་ཚིག་དོན་གང་གི་ཆ་ནས་འདི་དང་ཆ་མཐུན་པ་ཞིག་མདོར་བཙལ་ཀྱང་མ་རྙེད་དོ༎ འོན་ཀྱང་ལུང་སྦྱོར་ (དཔལ་བརྩེགས་པར་མ། ས་སྐྱ་བཀའ་འབུམ་དཔེ་བསྡུར་མ། ས་པཎ་ཀུན་དགའ་རྒྱལ་མཚན་གྱི་གསུང་འབུམ། པོད་དང་པོ། བྱང་ཆུབ་ཀྱི་མཆོག་ཏུ་སེམས་བསྐྱེད་པའི་ཆོ་གའི་ལུང་སྦྱོར། ༣༤༣་༡༨) དུ། 

རྒྱལ་བ་ཕན་བཞེད་གྲོང་དཔོན་གྱུར་པའི་ཚེ༎ 

དེ་བཞིན་གཤེགས་པ་བསོད་ནམས་འོད་དེ་ལ༎ 

ཉིན་གཅིག་སྲོག་གཅོད་སྡོམ་པ་བླངས་ནས་ཀྱང༌༎ 

དང་པོར་བྱང་ཆུབ་ཏུ་ནི་སེམས་བསྐྱེད་དོ༎ 

ཞེས་དྲངས་ནས་དབུ་མ་པའི་སེམས་བསྐྱེད་གང་ཟག་སོ་སོར་ཐར་པའི་སྡོམ་པ་དང་མི་ལྡན་པ་རྣམས་ལ་ཡང་སྐྱེ་བར་སྒྲུབ་པ་དེ་ནི་ད་ལྟའི་བསྐལ་བཟང་ (སྡེ་བཀའ། མདོ་སྡེ། ཀ་པ། འཕགས་པ་བསྐལ་པ་བཟང་པོ་པ་ཞེས་བྱ་བ་ཐེག་པ་ཆེན་པོའི་མདོ། ༢༩༣ བ ༡) ལས། 

དེ་བཞིན་གཤེགས་པ་ཕན་བཞེད་གྲོང་དཔོན་བུར་གྱུར་ཚེ༎ 

དེ་བཞིན་གཤེགས་པ་བསོད་ནམས་འོད་ཅེས་བྱ་བ་ལས༎ 

ཉིན་གཅིག་སྲོག་གཅོད་སྤོང་བའི་བསླབ་གཞི་མནོས་ནས་ཀྱང་༎ 

དང་པོར་བྱང་ཆུབ་ཏུ་ནི་སེམས་བསྐྱེད་དོ༎ 

ཞེས་འབྱུང་བ་དང་ཕལ་ཆེར་ཚིག་སྣ་རྒྱས་བསྡུས་ཙམ་མ་གཏོགས་དོན་གཅིག་ཏུ་སྣང་ངོ་༎ དེ་ལྟར་ན་ལུང་ཚིག་སྔ་མ་ནི། མདོ་སྡེབསྐལ་པ་བཟང་པོར། (སྡེ་བཀའ། མདོ་སྡེ། ཀ་པ། འཕགས་པ་བསྐལ་པ་བཟང་པོ་པ་ཞེས་བྱ་བ་ཐེག་པ་ཆེན་པོའི་མདོ། ༣༠༥ ན ༣)

དེ་བཞིན་གཤེགས་པ་འགྲོས་མཆོད་གདོལ་བུའི་ཚེ༎ 

ཉི་མ་འགའ་ཞིག་བསླབ་པ་ལྔ་མནོས་ནས༎ 

དེ་བཞིན་གཤེགས་པ་མེ་ཏོག་དཔལ་དེ་ལ༎

དང་པོར་བྱང་ཆུབ་ཏུ་ནི་སེམས་བསྐྱེད་དོ༎ 

ཞེས་འབྱུང་བ་འདི་དང་འདྲ་ཆོས་ཧ་ཅང་མང་བས་འདྲེས་པ་ཡིན་ནམ་སྙམ་སྟེ། སེམས་བསྐྱེད་ཀྱི་རྐྱེན་ཚུལ་ཁྲིམས་སུ་འདྲ་བ་དང་། དེ་ཡང་ཉིན་མོའི་ཁྱད་པར་དང་འབྲེལ་བ་འདྲ་བ་དང་། རིན་ཆེན་དཔལ་དེ་ལ༎ ཞེས་པ་དང་། མེ་ཏོག་དཔལ་དེ་ལ༎ ཚིག་རྐང་གི་མཇུག་འདྲ་བ་དང་། འགྲོས་མཆོད་གདོལ་བུའི། ཞེས་པ་དང་། ཕན་བཞེད་གྲོང་དཔོན་གཉིས་སྐད་གདངས་འདྲ་ཚད་ཚད་པ་དང་བཅས་འདི་དང་སྔ་མ་གཉིས་བསྲེས་ནས་འདོན་པ་འདྲ་སྙམ་མོ༎ དེ་ཡངསྔོན་དུས་ཡི་གེ་ཕབ་བཤུའི་བྱ་བ་དེང་སང་ལྟར་སྟབས་བདེ་པོའང་མེད་ལ། ལུང་ཚིག་རྣམས་ངག་རྒྱུན་དུ་གྲགས་པའམ། ཡང་ན་གཞུང་གཞན་དུ་དྲངས་པ་ཞིག་བསྐྱར་དུ་ལུང་འདྲེན་བྱས་ན་འཐུད་པ་ལས། བཀའ་དང་དགོངས་འགྲེལ་གྱི་རྩ་བའི་མ་ཕྱི་སྒྲ་ཇི་བཞིན་དུ་འགོད་དགོས་པའི་ཁྲིམས་སྲོལ་མ་ཆགས་པས་ཡིན་ནོ་ཞེས་པ་ནི་ཞར་བྱུང་དུ་ཐལ་ལོ༎ 

       ཕྱོགས་སྔ་མའི་འདོད་པ་དེ་ལ་མཁས་གྲུབ་ཆོས་རྗེས་དགག་པ་མཛད་ཚུལ་ནི། བྱང་ས་ནས་གསུངས་པའི་བྱང་སྡོམ་གྱི་ཆོ་ག་ལས་བྱང་སྡོམ་སྐྱེ་བའི་རྟེན་གྱི་གང་ཟག་ལ་སོ་ཐར་སྡོམ་ལྡན་དགོས་པར། སོ་སོ་ཐར་པ་རིགས་བདུན་གྱི༎ ཞེས་སོགས་ལམ་སྒྲོན་གྱི་ལུང་དྲངས་ནས་སྒྲུབ་པ་མི་འཐད་པར་ཐལ། ལུང་དེའི་དོན་ནི་བྱང་སྡོམ་གྱི་རྟེན་ཁྱད་པར་ཅན་ལ་སོ་ཐར་རིས་བདུན་གང་རུང་དགོས་པར་བསྟན་གྱི། བྱང་སྡོམ་གྱི་རྟེན་ཙམ་ལ་དེ་ལྟར་དགོས་པ་མ་གསུངས་པའི་ཕྱིར། དང་པོ་གྲུབ་སྟེ། དེ་ལྟར་ལམ་སྒྲོན་འགྲེལ་པ་ལས་ཤིན་ཏུ་གསལ་བའི་ཕྱིར་དང་། ལམ་སྒྲོན་འགྲེལ་པར་བྱང་བཟང་དྲངས་པ་ལས་ཀྱང་། སོ་ཐར་རིགས་བདུན་གང་རུང་དང་་ལྡན་པ་ལ་སྲོག་གཅོད་སྤོང་བའི་ཆོ་ག་ལོགས་སུ་མི་དགོས་ལ། སྡོམ་པ་དང་མི་ལྡན་པས་སྔོན་དུ་སྲོག་གཅོད་སྤོང་བར་ཁས་བླངས་ནས་སྡོམ་པ་སྦྱིན་གྱི། དེ་ཁས་མི་ལེན་པ་ལ་སྡོམ་པ་མི་སྦྱིན་པར་གསུངས་པས་ཀྱང་བྱང་སའི་ལུགས་ཀྱི་སྡོམ་པ་སྐྱེ་བ་ལ་སོ་ཐར་སྡོམ་པ་ངེས་པར་མི་དགོས་པ་བདེ་བླག་ཏུ་གྲུབ་པའི་ཕྱིར། དེ་དག་ནི་བྱི་དོར་(མཁས་གྲུབ་རྗེའི་གསུང་འབུམ་དཔེ་བསྡུར་མ།༢༠༢༠ ཁ་པ། ༤༩༣་༡༧) ལས། 

གཉིས་པ་ལེན་པའི་གང་ཟག་གི་ཁྱད་པར་སྨྲས་པ་མི་འཐད་དེ། ལམ་སྒྲོན་ (སྡེ་བསྟན་། དབུ་མ། ཁི་པ། བྱང་ཆུབ་ལམ་གྱི་སྒྲོན་མ། དཔལ་མར་མེ་མཛད་ཡེ་ཤེས། ༢༣༩ ན ༤) ལས། སོ་སོ་ཐར་པ་རིགས་བདུན་གྱི༎ རྟག་ཏུ་སྡོམ་གཞན་ལྡན་པ་ལ༎ བྱང་ཆུབ་སེམས་དཔའི་སྡོམ་པ་ཡི༎ སྐལ་པ་ཡོད་ཀྱི་གཞན་དུ་མིན༎ ཞེས་གསུངས་པ་ནི། ལས་དང་པོ་པ་ལ་སོ་ཐར་རིགས་བདུན་གང་རུང་གཅིག་མེད་ན་བྱང་སེམས་ཀྱི་སྡོམ་པ་ཙམ་དང་ཁྱད་པར་བ་གཉིས་སུ་ཕྱེ་བའི་ནང་ནས་ཁྱད་པར་ཅན་སྐྱེ་བའི་སྐལ་བ་མེད་ཅེས་བསྟན་ནས། བྱང་སེམས་ཀྱི་སྡོམ་པ་སྐྱེ་བའི་རྟེན་ཁྱད་པར་ཅན་ངོས་འཛིན་པ་ཡིན་གྱི། རྟེན་ཙམ་ངོས་འཛིན་པ་མ་ཡིན་ཏེ། འགྲེལ་པའི་ (སྡེ་བསྟན། དབུ་མ། ཁི་པ། ལམ་སྒྲོན་རང་འགྲེལ། དཔལ་མར་མེ་མཛད་ཡེ་ཤེས།  ༢༥༨ ན ༥) མཚམས་སྦྱོར་དུ། ད་ནི་ཚུལ་ཁྲིམས་ཀྱི་སྡོམ་པའི་རྟེན་ཁྱད་པར་ཅན་བསྟན་པར་འདོད་ནས། ཞེས་གསུངས་པ་ལྟར་རོ༎ བྱང་ས་ལས། དེའི་ཕྱིར་སོ་སོ་ཐར་པའི་སྡོམ་པ་གཞན་དང་ལྡན་པ་འདིས་བྱང་ཆུབ་སེམས་དཔའི་སྡོམ་པ་ཡང་དག་པར་ལེན་པའི་སྣོད་དུ་གྱུར་པ་ལ། བསླབ་པའི་ཚིག་འདི་ཡང་སྦྱིན་པར་བྱ་ཞེས་བྱ་བའི་དོན་ནོ༎ འདི་ལ་སྲོག་གཅོད་པ་ལས་ལྡོག་པའི་ཆོ་ག་གཞན་པ་ཉིད་ནི་མ་ཡིན་ཞིང༌། དེ་ལས་ཀྱང་ལྡོག་པ་མ་ཡིན་པ་ལ་ནི། བྱང་ཆུབ་སེམས་དཔའི་སྡོམ་པ་ཡང་དག་པར་ལེན་པའི་སྣོད་དུ་གྱུར་པ་ཡང་ཡོད་པ་མ་ཡིན་ནོ༎ ཞེས་གསུངས་པ་འདིས་སོ་ཐར་གྱི་སྡོམ་པའི་རིགས་བདུན་གང་རུང་དང་ལྡན་པའི་ལེན་པ་པོ་ནི་མཆོག་ཡིན་ཞིང་། དེ་ལ་སོ་ཐར་གྱི་སྡོམ་པའི་ནང་དུ་འདུས་པས། སྲོག་གཅོད་པ་སྤོང་བ་ཁས་ལེན་པ་ཟུར་དུ་མི་དགོས་ལ། སོ་ཐར་གྱི་སྡོམ་པ་དང་མི་ལྡན་ན་སྔོན་དུ་སྲོག་གཅོད་སྤོང་བར་ཁས་བླངས་ནས། དེ་ནས་བྱང་སེམས་ཀྱི་སྡོམ་པ་སྦྱིན་དགོས་ཀྱི། སྲོག་གཅོད་པ་ལས་ཀྱང་ལྡོག་འདོད་མེད་པ་ལ་བྱང་སེམས་ཀྱི་སྡོམ་པ་མི་སྐྱེ་བས། སྡོམ་པ་དེའི་སྣོད་དུ་གྱུར་པ་ཡོད་པ་མ་ཡིན་ནོ་ཞེས་གསལ་བར་བཤད་པས། སོ་ཐར་རིགས་བདུན་གང་རུང་ངེས་པར་རྟེན་དུ་དགོས་པ་དེའི་ལུགས་མིན་པར་བདེ་བླག་ཏུ་འགྲུབ་པའི་ཕྱིར་དང༌། 

ཞེས་སོ༎

        འདིར་པར་མ་རྣམས་ལྟར་ན། བྱང་ས་ལས། དེའི་ཕྱིར་སོ་སོ་ཐར་པའི་སྡོམ་པ། ཞེས་སོགས་ལུང་ཚིག་དེ་རྣམས་བྱང་ས་ལས་དྲངས་པ་ལྟར་སྣང་ཡང་བརྟག་དགོས་ཏེ། ལུང་ཚིག་དེ་རྣམས་བྱང་སར་མི་སྣང་ཞིང་། སློབ་དཔོན་བྱང་ཆུབ་བཟང་པོའི་སྡོམ་པ་ཉི་ཤུ་པའི་དཀའ་འགྲེལ་ (སྡེ་བསྟན། སེམས་ཙམ། ཧི་པ། སྡོམ་པ་ཉི་ཤུ་པའི་དཀའ་འགྲེལ། སློབ་དཔོན་བྱང་ཆུབ་བཟང་པོ། ༡༨༦ བ ༤) དུ། 

སོ་སོར་ཐར་པའི་སྡོམ་པ་ནི་བྱང་ཆུབ་སེམས་དཔའི་སྡོམ་པའི་ཡན་ལག་ཏུ་གྱུར་པ་ཡིན་ཏེ། ཕྱོགས་གཅིག་ཉིད་དུ་རིག་པར་བྱའོ༎ དེའི་ཕྱིར་སོ་སོར་ཐར་པའི་སྡོམ་པ་གཞན་དང་ལྡན་པ་འདིས། 

ཞེས་སོགས་ལྷག་མ་གོང་དུ་དཀྱུས་ན་གསལ་བ་ལྟར་གསལ་བར་འབྱུང་ཞིང་། དེར་བྱང་ཆུབ་སེམས་དཔའི་ཚུལ་ཁྲིམས་ལ་དགུར་ཕྱེ་བའི་གཉིས་པ་ཚུལ་ཁྲིམས་ཐམས་ཅད། ཅེས་པའི་འགྲེལ་བཤད་དུ་གསུངས་པ་དང་། ལམ་སྒྲོན་འགྲེལ་པར་ (སྡེ་བསྟན། དབུ་མ། ཁི་པ། ལམ་སྒྲོན་དཀའ་འགྲེལ། དཔལ་མར་མེ་མཛད་ཡེ་ཤེས། ༢༥༨ བ ༧) ཡང་། 

འདིའི་དོན་བླ་མ་རྗེ་བཙུན་དཔལ་བྱང་ཆུབ་བཟང་པོས་སྡོམ་པ་ཉི་ཤུ་པའི་འགྲེལ་པར་གསུངས་ཏེ། འདི་སྐད་དུ། སོ་སོར་ཐར་པའི་སྡོམ་པ་ནི་བྱང་ཆུབ་སེམས་དཔའ་སྡོམ་པའི་ཡན་ལག་ཏུ་གྱུར་པ་སྟེ། ཕྱོགས་གཅིག་ཉིད་དུ་ཤེས་པར་བྱའོ། །དེའི་ཕྱིར་སོ་སོར་ཐར་པའི་སྡོམ་པ་གཞན་དང་ལྡན་པ་འདིས། 

ཞེས་རང་གི་བླ་མ་བྱང་ཆུབ་བཟང་པོའི་གསུང་ལུང་འདྲེན་མཛད་པའི་ཕྱིར། དེས་ན་ ‘བྱང་ས། ‘ ཞེས་པ་ཡི་གེ་ནོར་བའམ་པར་མ་དག་པ་གང་རུང་དུ་ངེས་ཤིང་། ངེད་ཀྱི་ལྟར་ན་མཛད་པ་པོའི་མཚན་བསྟན་བཅོས་ལབཏགས་པ། དབུ་མ་རྩ་བའི་འགྲེལ་པ་བུདྡྷཔལིཏ དང་། ཤེས་རབ་སྒྲོན་མའི་འགྲེལ་བཤད་སྤྱན་རས་གཟིགས་བརྟུལ་ཞུགས་དང་། མཛོད་ཀྱི་འགྲེལ་བཤད་རྒྱས་པོའི་སྲས་དང་གང་སྤེལ་ཞེས་བརྫོད་པ་བཞིན་དུ། སློབ་དཔོན་བྱང་ཆུབ་བཟང་པོས་མཛད་པས་འགྲེལ་པ་ཡིན་པས་ ‘བྱང་བཟང་།’ ཞེས་བཏགས་པ་ཡིན་ནམ་སྙམ་མོ༎ 

       དཀྱུས་ལ་འཇུག་ན། གཞན་ཡང་བྱང་སའི་ལུགས་ཀྱི་བྱང་སྡོམ་གྱི་རྟེན་ལ་སོ་ཐར་སྡོམ་ལྡན་དགོས་པར་བཤད་པ་མི་འཐད་པར་ཐལ། སོ་ཐར་སྡོམ་ལྡན་ལ་བྱང་སྡོམ་སྐྱེ་བ་མ་གཏོགས་གཞན་ལ་བྱང་སྡོམ་མི་སྐྱེ་ན། བྱང་ཆུབ་སེམས་དཔའི་སྡེ་སྣོད་དང་རྗེས་འབྲང་གི་གཞུང་དུ། བྱང་སྡོམ་གྱི་རྟེན་ལ་སྐྱབས་འགྲོ་དགོས་པ་གསུངས་པ་བཞིན་དུ་སོར་སྡོམ་ཡང་གསུངས་དགོས་པ་ལས་མ་གསུངས་པས། བྱང་སྡོམ་གྱི་རྟེན་ལ་སོ་ཐར་སྡོམ་ལྡན་དགོས་པ་མི་འཐད་པར་ཐུབ་པ་དགོངས་རྒྱན་ལས་གསུངས་པའི་ཕྱིར་དང་། དེས་བྱང་སའི་རྗེས་སུ་འབྲངས་ནས་བྱང་སེམས་ཀྱི་སྡོམ་པའི་རྣམ་གཞག་འཆད་པའི་ཕྱིར་རོ༎ གཞན་ཡང་དེ་མི་འཐད་པར་ཐལ། ལྷའི་རྟེན་ལ་བྱང་སྡོམ་སྐྱེ་བ་ཡོད་པར་ཤིང་རྟ་ཆེན་པོ་མཐའ་དག་བཞེད་པའི་ཕྱིར་རོ༎ དེ་ལྟར་ཡང་བྱི་དོར་ (མཁས་གྲུབ་རྗེའི་གསུང་འབུམ་དཔེ་བསྡུར་མ།༢༠༢༠ ཁ་པ། ༤༩༤་༡༢) ལས། 

བྱང་སའི་རྗེས་སུ་འབྲངས་ནས་བྱང་སེམས་ཀྱི་སྡོམ་པའི་རྣམ་གཞག་འཆད་པའི་ཐུབ་པ་དགོངས་རྒྱན་ (སྡེ་བསྟན། དབུ་མ། ཨ་པ། ཐུབ་པའི་དགོངས་པའི་རྒྱན། འཇིགས་མེད་འབྱུང་གནས་སྦས་པ། ༨༢ ན ༣) ལས། གང་ཞིག་དགེ་བསྙེན་དང་དགེ་བསྙེན་མ་དང༌། དགེ་ཚུལ་དང་དགེ་ཚུལ་མ་དང༌། དགེ་སློབ་མ་དང༌། དགེ་སློང་དང་དགེ་སློང་མའི་དབྱེ་བས་ཇི་སྲིད་འཚོ་བ་པའི་སོ་སོ་ཐར་པ་བདུན་པོ་རྣམས་ལས་གང་ཡང་རུང་བའི་སོ་སོ་ཐར་པའི་སྡོམ་པ་ལ་གནས་པ་ཉིད་ཀྱིས་བྱང་ཆུབ་སེམས་དཔའི་སྡོམ་པ་བླང་བ་བྱའི། གཞན་གྱིས་མ་ཡིན་ཏེ། གཞན་ལ་བྱང་ཆུབ་སེམས་དཔའི་སྡོམ་པ་མི་སྐྱེ་བའི་ཕྱིར་རོ༎ ཞེས་ཟེར་བ་དེ་ནི། ཐེག་པ་ཆེན་པོ་ལ་ཡོངས་སུ་ངལ་བ་མང་པོ་མ་བྱས་པ་སྟེ། གལ་ཏེ་སོ་སོ་ཐར་པའི་སྡོམ་པ་མེད་པར་བྱང་ཆུབ་སེམས་དཔའི་སྡོམ་པ་མི་སྐྱེ་ན་ནི། དེའི་ཚེ་བྱང་ཆུབ་སེམས་དཔའི་སྡེ་སྣོད་ལ་སོགས་པ་དང༌། དེའི་རྗེས་སུ་འབྲང་བའི་གཞུང་དུ། འདི་དེའི་རྩ་བར་བཤད་པར་འགྱུར་རོ།། དགོས་པ་ནི་གདོན་མི་ཟ་བར་བརྗོད་པར་བྱ་བ་ཡིན་ཏེ། དཔེར་ན། ཐེག་པ་ཆེན་པོའ་ིབྱང་ཆུབ་ཀྱི་བར་དུ་གསུམ་ལ་སྐྱབས་སུ་འགྲོ་བ་ལྟ་བུའོ༎ ཞེས་གསལ་བར་གསུངས་སོ༎ སོ་ཐར་རིགས་བདུན་གང་རུང་བྱང་སེམས་ཀྱི་སྡོམ་པ་སྐྱེ་བའི་རྟེན་དུ་ངེས་པར་དགོས་ན། ལྷ་ལ་བྱང་སེམས་ཀྱི་སྡོམ་པ་སྐྱེ་བ་མི་སྲིད་པར་བཞེད་དགོས་ཀྱང༌། ལྷ་ལ་བྱང་སེམས་ཀྱི་སྡོམ་པ་སྐྱེ་བ་ནི་ཡོད་པར་ཐེག་པ་ཆེན་པོའི་་ཤིང་རྟ་མཐའ་དག་བཞེད་པའི་ཕྱིར། ལུགས་དེ་ནི་བྱང་ས་རྗེས་འབྲང་དང་བཅས་པའི་དགོངས་པ་གཏན་མ་ཡིན་ནོ༎ 

ཞེས་སོ༎ 

       ཡང་གོང་དུ་ཕྱོགས་སྔས། དབུ་མ་ལུགས་་ཀྱི་སྡོམ་པ་རིགས་དྲུག་མཐའ་དག་ལ་སྐྱེ་བར་འདོད་པ་ལ་གནོད་པ་བརྗོད་པ་ནི། གཟུགས་མེད་གྱི་ལྷ་ལ་བྱང་སྡོམ་སྐྱེ་བ་ཡོད་པར་ཐལ། རིགས་དྲུག་མཐའ་དག་ལ་དེ་ཡོད་པའི་ཕྱིར། རྟགས་ཁས། དེ་ལ་ཁོ་ན་རེ། མཐའ་དག་ཅེས་པ་རིགས་དྲུག་གང་རུང་ལ་དེ་ཡིན་པས་ཁྱབ་ཟེར་བ་མིན་གྱི། ལྷ་ལྷ་མིན་མི་ངན་སོང་གསུམ་བཅས་སུ་བྱང་སྡོམ་སྐྱེ་བ་ཡོད་པས་དེའི་ཆ་ནས་མཐའ་དག་ཅེས་བརྗོད་དོ་ཟེར་ན། འོ་ན་རིགས་དྲུག་གི་སེམས་ཅན་ཐམས་ཅད་གནས་སྐབས་་ཐེག་ཆེན་རིགས་ཅན་ཡིན་པར་ཐལ། རྟགས་དེའི་ཕྱིར། ཁྱབ་པ་ཁས། གལ་ཏེ་རང་ཉིད་ཀྱིས་སྡོམ་པ་ལེན་པ་ན་སེམས་ཅན་ཐམས་ཅད་ཀྱིས་ལེན་པར་མོས་པ་བྱེད་པས་དེ་དག་གིས་ཐོབ་པར་འདོད་ན་ནི། སོ་ཐར་དང་སྔགས་ཀྱི་སྡོམ་པ་ལའང་མཚུངས་ཤིང་། བྱང་སའི་ལུགས་ཀྱི་སེམས་བསྐྱེད་ལའང་དེ་ཡོད་པར་མཚུངས་སོ༎ དེ་ལྟར་ཡང་བྱི་དོར་ (མཁས་གྲུབ་རྗེའི་གསུང་འབུམ་དཔེ་བསྡུར་མ།༢༠༢༠ ཁ་པ། ༤༩༥་༦) ལས། 

འགྲོ་བ་རིགས་དྲུག་པོ་ཐམས་ཅད་ད་ལྟ་དབུ་མ་ལུགས་ཀྱི་བྱང་སེམས་ཀྱི་སྡོམ་པ་སྐྱེ་བའི་རྟེན་དུ་སྨྲ་བ་ནི། ཆེས་ངོ་མཚར་ཏེ། གཟུགས་མེད་ཁམས་ཀྱི་ལྷ་ལ་སྡོམ་པ་འབོགས་པའི་ཆོ་ག་སུ་ཞིག་གིས་ཚུལ་ཇི་ལྟར་བསྒྲུབ་པར་བྱ། ཆོ་ག་ལ་ལུས་ངག་གི་རྣམ་པར་རིག་བྱེད་ཅུང་ཟད་ཙམ་ཞིག་མི་དགོས་སམ། ལེགས་པར་སོམས་ཤིག། 

ཞེས་སོགས་དང་། དེའི་སྐྱོན་སྤོང་གི་ལན་དགག་པ་ནི་དེ་ཉིད་ (མཁས་གྲུབ་རྗེའི་གསུང་འབུམ་དཔེ་བསྡུར་མ།༢༠༢༠ ཁ་པ། ༤༩༥་༡༢) ལས། 

གལ་ཏེ་བྱང་སེམས་ཀྱི་སྡོམ་པ་ད་ལྟ་སྐྱེ་བའི་ལྷ་ཡང་ཡོད། དེ་བཞིན་དུ་མི་དང་ངན་སོང་གི་འགྲོ་བ་ལ་སོགས་པ་ཡང་ཡོད་པས་དེ་ལྟར་སྨྲས་ཀྱི། སེམས་ཅན་ཡིན་ན་ད་ལྟ་བྱང་སེམས་ཀྱི་སྡོམ་པ་སྐྱེ་བའི་རྟེན་ཡིན་པས་ཁྱབ་པར་ཁས་མི་ལེན་ནོ་ཞེ་ན། འོ་ན་འགྲོ་བ་རིགས་དྲུག་གི་སེམས་ཅན་ཐམས་ཅད་གནས་སྐབས་ཐེག་ཆེན་དུ་རིགས་ངེས་པར་ཐལ། གནས་སྐབས་ཐེག་ཆེན་དུ་རིགས་ངེས་པའི་མི་ཡང་ཡོད། ལྷ་མ་ཡིན་ཀྱང་ཡོད། དམྱལ་བ་དང་ཡི་དྭགས་དང་དུད་འགྲོ་ཡང་ཡོད་པའི་ཕྱིར། ཞེས་སོགས་དུ་མ་ཞིག་བརྗོད་པར་བྱས་ན་ལན་ཅི་ཞིག་ཡོད། 

ཞེས་སོགས་གསུངས་སོ༎

       ཡང་མདོ་སྡེ་བསྐལ་བཟང་ལུང་དྲངས་ནས་དབུ་མ་ལུགས་ཀྱི་བྱང་སྡོམ་ལ་སོ་ཐར་སྡོམ་ལྡན་མི་དགོས་པར་སྒྲུབ་པ་འབྲེལ་མེད་དུ་བསྟན་པ་ནི། སོ་ཐར་སྡོམ་པ་བསྲུང་མི་ནུས་པའི་རྒྱལ་པོ་སོགས་ཀྱིས་དབུ་མ་ལུགས་ཀྱི་བྱང་སྡོམ་སྐྱེ་བའི་རྟེན་རུང་བའི་ཤེས་བྱེད་དུ། རྒྱལ་བ་ཕན་བཞེད་གྲོང་དཔོན། ཞེས་སོགས་མདོ་བསྐལ་བཟང་དྲངས་པ་ནི་འབྲེལ་བ་མེད་པ་ཡིན་ཏེ། དེ་ནི་སྨོན་སེམས་བསྐྱེད་པ་ཙམ་ཡིན་གྱི། དེ་ལ་བྱང་སྡོམ་གྱི་དོན་དང་ཐ་སྙད་གང་ཡང་མི་སྣང་བའི་ཕྱིར། གཞན་ཡང་། སེམས་ཅན་ཐམས་ཅད་བྱང་ཆུབ་ཏུ༎ ཞེས་སོགས་རིན་ཆེན་ཕྲེང་བའི་གཞུང་ཚིག་དེ་ལ་བརྟེན་ནས་སེམས་ཅན་ཐམས་ཅད་བྱང་སྡོམ་སྐྱེ་བའི་རྟེན་དུ་སྒྲུབ་མི་ནུས་ཏེ། དེ་གཞུང་ཚིག་མ་དག་པ་ཡིན་པའི་ཕྱིར་དང་། དག་ཏུ་ཆུག་ཀྱང་སེམས་ཅན་ཐམས་ཙད་བྱང་ཆུབ་ཏུ་སེམས་བསྐྱེད་དུ་བཅུག་ན། ཞེས་གསུངས་པ་དེ་ཙམ་གྱིས་ད་ལྟ་སེམས་ཅན་ཐམས་ཅད་བྱང་སྡོམ་སྐྱེ་བའི་རྟེན་དུ་སྒྲུབ་མི་ནུས་པའི་ཕྱིར། མ་གྲུབ་ན། སྐྱེ་བོ་ཐམས་ཅད་ཚངས་སྤྱོད་ཀྱི་རྟེན་དུ་རུང་བར་ཐལ། འགྲེལ་ཆུང་ (སྡེ་བསྟན། ཤེར་ཕྱིན། ཇ་པ། འགྲེལ་པ་དོན་གསལ། སློབ་དཔོན་སེང་གེ་བཟང་པོ། ༡༣༥ ན ༤) ལས། 

སྐྱེ་བོ་ཐམས་ཅད་ཚངས་པར་སྤྱོད་པ་ཡང་དག་པར་ལེན་དུ་འཇུག་པ་དང༌། 

ཞེས་གསུངས་པའི་ཕྱིར། ཁྱབ་པ་ཁས། དེ་དག་ནི་བྱི་དོར་ (མཁས་གྲུབ་རྗེའི་གསུང་འབུམ་དཔེ་བསྡུར་མ།༢༠༢༠ ཁ་པ། ༤༩༦་༢) ལས། 

སྔོན་སྟོན་པ་འདིས་དམྱལ་བའི་མེའི་ཤིང་རྟ་འདྲེན་པའི་གྱད་དུ་འཁྲུངས་པ་ན་ཐུགས་བསྐྱེད་པར་བཤད་པ་དང༌། བསྐལ་བཟང་ལས། རྒྱལ་བ་ཕན་བཞེད་གྲོང་དཔོན་གྱུར་པའི་ཚེ༎ དེ་བཞིན་གཤེགས་པ་བསོད་ནམས་འོད་དེ་ལ༎ ཉིན་གཅིག་སྲོག་གཅོད་སྡོམ་པ་བླངས་ནས་ཀྱང༌༎ དང་པོར་བྱང་ཆུབ་ཏུ་ནི་སེམས་བསྐྱེད་དོ༎ ཞེས་བྱ་བ་ལ་སོགས་པ་ནི། སྨོན་པའི་སེམས་བསྐྱེད་པ་ཙམ་དང༌། དམྱལ་བའི་གྱད་གྲོགས་ལ་དམིགས་ནས་བདག་པས་གཞན་གཅེས་པའི་ཐུགས་འཁྲུངས་པ་ལ་སེམས་བསྐྱེད་ཀྱི་ཐ་སྙད་བཏགས་པ་ཙམ་དུ་སྣང་གི །དེ་དག་ལ་བྱང་སེམས་ཀྱི་སྡོམ་པའི་མིང་དང་དོན་གང་ཡང་མི་སྣང་ལ། འཕགས་པ་ཀླུ་སྒྲུབ་ཀྱིས། སེམས་ཅན་ཐམས་ཅད་བྱང་ཆུབ་ཏུ༎ སེམས་བསྐྱེད་བཅུག་ནས་བསྙེན་བྱས་ན༎ རི་དབང་རྒྱལ་པོ་ལྟར་བརྟན་པའི༎ བྱང་ཆུབ་སེམས་དང་རྟག་ལྡན་འགྱུར༎ ཞེས་འདྲེན་པ་ནི། གཞུང་བག་མེད་པར་ཀློག་པ་སྟེ། རིན་ཆེན་ཕྲེང་བའི་གཞུང་དག་པ་ཕལ་ཆེ་བ་ལས། སེམས་ཅན་རྣམས་ནི་བྱང་ཆུབ་ཏུ༎ སེམས་བསྐྱེད་བཅུག་ཅིང་བརྟན་བྱས་ན༎ རི་དབང་རྒྱལ་པོ་ལྟར་བརྟན་པའི༎ བྱང་ཆུབ་སེམས་ནི་རྟག་ཏུ་འཐོབ༎ ཅེས་མཐུན་པར་འབྱུང་བའི་ཕྱིར་རོ༎ སེམས་ཅན་རྣམས་བྱང་ཆུབ་ཏུ་སེམས་བསྐྱེད་དུ་བཅུག་ན། ཞེས་གསུངས་པ་ཙམ་གྱིས་ད་ལྟ་སེམས་ཅན་ཐམས་ཅད་བྱང་སེམས་ཀྱི་སྡོམ་པ་སྐྱེ་བའི་རྟེན་དུ་གསུངས་པར་འགྲོ་དགོས་ན། སྐྱེ་བོ་ཐམས་ཅད་ཚངས་པར་སྤྱོད་པ་ཡང་དག་པར་ལེན་དུ་འཇུག་པ་དང༌། ཞེས་གསུངས་པས་སྐྱེ་བོ་ཐམས་ཅད་ད་ལྟ་ཚངས་སྤྱོད་ཀྱི་སྡོམ་པའི་རྟེན་དུ་རུང་བར་ཡང་གསུངས་པ་ཉིད་དུ་ཅིའི་ཕྱིར་མི་འགྱུར། 

ཞེས་སོགས་གསུངས་སོ༎ གོང་དུ་རིན་ཆེན་ཕྲེང་བའི་གཞུང་ཚིག་མ་དག་པར་གསུངས་པའི་གཞུང་ཚིག་དེ་ས་པཎ་གྱི་སེམས་བསྐྱེད་ཆོ་གའི་ལུང་སྦྱོར་ (དཔལ་བརྩེགས་པར་མ། ས་སྐྱ་བཀའ་འབུམ་དཔེ་བསྡུར་མ། ས་པཎ་ཀུན་དགའ་རྒྱལ་མཚན་གྱི་གསུང་འབུམ། པོད་དང་པོ། བྱང་ཆུབ་ཏུ་སེམས་བསྐྱེད་པའི་ཆོ་གའི་ལུང་སྦྱོར། ༣༤༤་༣) དུ་དྲངས་སོ༎

       དེ་དག་པཎ་ཆེན་ཤཱཀ་མཆོག་པས་འགོག་ཚུལ་ནི། དགག་པ་དེ་ངེད་ལ་མི་འཇུག་སྟེ། ངེད་ཀྱི་ལུགས་ལ། སོ་སོ་ཐར་པ་རིགས་བདུན་གྱི།། ཞེས་པའི་སོ་ཐར་དེ་ཐེག་པ་ཐུན་མོང་བ་འདུལ་བའི་སོ་ཐར་མིན་གྱི། ཐེག་པ་ཆེན་པོའི་སོ་ཐར་ལ་བཞེད་པའི་ཕྱིར་ཏེ། རྗེ་བཙུན་གྲགས་པ་རྒྱལ་མཚན་གྱི་སྡོམ་པ་ཉི་ཤུ་པའི་རྣམ་བཤད་ལས་གསུངས་པའི་ཕྱིར་ཏེ། དེ་ཉིད་ (དཔལ་བརྩེགས་པར་མ། ས་སྐྱ་བཀའ་འབུམ་དཔེ་བསྡུར་མ། རྗེ་བཙུན་གྲགས་པ་རྒྱལ་མཚན་གྱི་གསུང་འབུམ། པོད་ལྔ་པ། སྡོམ་པ་ཉི་ཤུ་པའི་རྣམ་བཤད། ༢༤༦་༦) ལས།

དེ་ལ་སོ་སོར་ཐར་པ་ནི་གཉིས་ཏེ། ཉན་ཐོས་ཀྱི་སོ་སོར་ཐར་པ་དང་། བྱང་ཆུབ་སེམས་དཔའི་སོ་སོར་ཐར་པ་ལས། འདིར་བྱང་ཆུབ་སེམས་དཔའི་སོ་སོར་ཐར་པ་ནི་སྡོམ་པ་ཐོབ་པ་དང་། གནས་པ་གཉིས་གའི་རྟེན་དུ་རུང་གི་སྔ་མ་ནི་དེ་ལྟ་མ་ཡིན་པས། 

ཞེས་གསུངས་པ་ལྟར་འདོད་པའི་ཕྱིར། དེ་ལྟར་ཡང་ལུང་རིགས་རོལ་མཚོ་ (གྲགས་ཆེན་་བཅོ་བརྒྱད་ལས། ཤེར་ཕྱིན་སྐོར། རྣམ་བཤད་ལུང་རིགས་རོལ་མཚོ། སྟོད་ཆ། ༢༢༣་༡༨) ལས། 

གཉིས་པ་གང་གིས་ལེན་པའི་རྟེན་གྱི་ཁྱད་པར་ལ། རྒོལ་བའི་ཀླན་ཀ་དེ་ཡང་འཇུག་པ་མ་ཡིན་ཏེ། དེའི་རྟེན་དུ་དགོས་པའི་སོ་སོར་ཐར་པ་དེ་ཐེག་པ་ཐུན་མོང་གི་འདུལ་བ་ལས་འབྱུང་བའི་སོ་སོར་ཐར་པ་ལ་མི་འཆད་པར། ཐེག་པ་ཆེན་པོའི་སོ་སོར་ཐར་པ་ལ་དགོས་པར། རྗེ་བཙུན་ས་སྐྱ་པའི་སྡོམ་པ་ཉི་ཤུ་པའི་རྣམ་བཤད་ལས་འབྱུང་བའི་ཕྱིར། 

ཞེས་སོ།། 

       གཞན་ཡང་བྱང་སྡོམ་སྐྱེ་བའི་རྟེན་ཁྱད་པར་ཅན་ལ་སོ་ཐར་སྡོམ་ལྡན་དགོས་ཟེར་བ་ལ། འོ་ན་ལྷའི་ངོ་བོར་གྱུར་པའི་བྱང་སྡོམ་སྐྱེ་བའི་རྟེན་ཁྱད་པར་ཅན་མེད་པར་ཐལ། དམ་བཅའ་དེའི་ཕྱིར། སྐལ་བ་ཡོད་ཀྱི་གཞན་དུ་མིན༎ ཞེས་ངེས་བཟུང་གི་ཚིག་སྦྱར་བ་མི་འཐད་པར་ཐལ། བྱང་སྡོམ་སྐྱེ་བ་ལ་སོར་སྡོམ་ལྡན་མི་དགོས་པའི་ཕྱིར། དེ་ཡང་རོལ་མཚོ་ (གྲགས་ཆེན་་བཅོ་བརྒྱད་ལས། ཤེར་ཕྱིན་སྐོར། རྣམ་བཤད་ལུང་རིགས་རོལ་མཚོ། སྟོད་ཆ། ༢༢༤་༡) ལས། 

ཁྱེད་ཀྱིས་འཆད་པའི་རྟེན་ཁྱད་པར་ཅན་ཞེས་པ་དེ་ཡང་འཐད་པ་མིན་ཏེ། ལྷ་ལ་བྱང་སེམས་ཀྱི་སྡོམ་པའི་རྟེན་ཁྱད་པར་ཅན་མེད་པར་ཐལ་བའི་ཕྱིར་དང་། སྐལ་བ་ཡོད་ཀྱི་གཞན་དུ་མིན། །ཞེས་པའི་ངེས་བཟུང་གི་ཚིག་དང་འགལ་བའི་ཕྱིར། 

ཞེས་སོ༎ 

       གཞན་ཡང་ཁྱེད་ཀྱིས་འཕངས་པའི་གཟུགས་མེད་ཁམས་པ་ཞེས་སོགས་ཀྱི་ཐལ་བ་དེ་ནི་སྙིང་པོ་ཅི་ཡང་མེད་དེ། ལྟག་ཆོད་འབའ་ཞིག་ཡིན་པའི་ཕྱིར་ཏེ། ཚིག་གི་སྤུ་རིས་མ་ཕྱེད་པས་འཁྲུལ་བ་དང་། གཟུགས་མེད་ཀྱི་རྟེན་ལ་བྱང་ཆུབ་སེམས་དཔའ་མེད་པར་འདོད་དགོས་པས་འཁྲུལ་པ་དང་། བྱང་སྡོམ་སྐྱེ་བ་གཞན་གྱི་ལུས་ངག་གི་རིག་བྱེད་ལ་ལྟོས་པར་འདོད་པའི་འཁྲུལ་བ་སྟེ་འཁྲུལ་བ་གསུམ་དང་ལྡན་པའི་ཕྱིར། དང་པོ་དེར་ཐལ། འགྲོ་བ་རིགས་དྲུག་པོ་ཐམས་ཅད་སྡོམ་པ་དེའི་རྟེན་ཡིན་ན། གཟུགས་མེད་ཁམས་པ་དེའི་རྟེན་ཡིན་མི་དགོས་པའི་ཕྱིར་ཏེ། དེའི་དོན་ནི་ལྷ་མི་ངན་སོང་རྣམས་སུ་བྱང་སྡོམ་སྐྱེ་རུང་བའི་དོན་ཡིན་པའི་ཕྱིར། གཉིས་པ་དེར་ཐལ། གཟུགས་མེད་ཁམས་པ་བྱང་སེམས་ཀྱི་སྡོམ་པའི་རྟེན་དུ་མི་རུང་ན། དེ་ན་བྱང་སེམས་ཡང་བཞག་མི་ནུས་པའི་ཕྱིར། གསུམ་པ་དེར་ཐལ། རྟེན་དེ་ལ་བྱང་སེམས་ཀྱི་སྡོམ་པ་གསར་དུ་སྐྱེ་བ་གཞན་གྱི་ཆོ་ག་ལ་མ་ལྟོས་པར་རང་ཉིད་ཀྱིས་དེར་བསྐྱེད་པས་ཆོག་པའི་ཕྱིར། གཞན་ཡང་གཟུགས་མེད་ཁམས་པ་བྱང་སེམས་ཀྱི་སྡོམ་པའི་རྟེན་དུ་རུང་བར་ཐལ། གཟུགས་མེད་རྟེན་ཅན་གྱི་དགྲ་བཅོམ་པས་ལྷག་མེད་དུ་མྱ་ངན་ལས་འདས་པ་དེ། འདོད་གཟུགས་གང་རུང་དུ་སྐྱེ་བ་བླང་བར་འདོད་མི་ནུས་པས། ཟག་མེད་ཀྱི་ལས་ཀྱི་དབང་གིས་བྱུང་བའི་ཡིད་ཀྱི་རང་བཞིན་གྱི་ལུས་བླངས་ནས་ཐེག་ཆེན་ལམ་དུ་འཇུག་པར་འདོད་དགོས་ལ། རྟེན་དེ་བྱང་སེམས་ཀྱི་སྡོམ་པ་གསར་དུ་སྐྱེ་བའི་རྟེན་དུ་རུང་ན། གཟུགས་མེད་ཁམས་པ་དེར་མི་རུང་བ་ལ་རྒྱུ་མཚན་ཅི་ཡང་མེད་པའི་ཕྱིར། གཞན་ཡང་རིན་ཆེན་ཕྲེང་བར། སེམས་ཅན་ཐམས་ཅད་བྱང་ཆུབ་ཏུ་སེམས་བསྐྱེད་བཅུག་པར་གསུངས་པ་དང་། ཡུམ་གྱི་མདོ་ལས། ལྷའི་བུ་གང་གིས་བྱང་ཆུབ་ཏུ་སེམསམ་བསྐྱེད་པས་ཀྱང་དེ་བསྐྱེད་པར་གསུངས་པ་ཡང་མི་འཐད་པར་ཐལ། ཐམས་ཅད་ཅེས་སྦྱར་བ་ཙམ་གྱིས་སྐྱོན་འཇུག་ན། ཡུམ་མདོ་དང་རིན་ཕྲེང་་ལ་ཡང་ཁྱེད་ཀྱིས་སྨྲས་པའི་སྐྱོན་དེ་ཉིད་འཇུག་པར་མཚུངས་པའི་ཕྱིར་རོ།། དེ་ལྟར་ཡང་རོལ་མཚོ་ (གྲགས་ཆེན་་བཅོ་བརྒྱད་ལས། ཤེར་ཕྱིན་སྐོར། རྣམ་བཤད་ལུང་རིགས་རོལ་མཚོ། སྟོད་ཆ། ༢༢༤་༤) ལས། 

གཟུགས་མེད་ཁམས་པ་ཞེས་སོགས་ཀྱི་ལྟག་ཆོད་ལ་ནི་སྙིང་པོ་ཅི་ཡང་མི་སྣང་བས། དཔྱོད་ལྡན་གྱིས་དཔྱད་པར་བྱ་བའི་གནས་མ་ཡིན་མོད། འོན་ཀྱང་ལྟག་ཆོད་ཇི་ལྟར་ཡིན་པའི་ཚུལ་བཤད་ན། འགྲོ་བ་རིགས་དྲུག་པོ་ཐམས་ཅད་སྡོམ་པ་དེའི་རྟེན་ཡིན་ན། གཟུགས་མེད་ཁམས་པ་དེའི་རྟེན་ཡིན་པས་ཁྱབ་པར་འདོད་པ་ནི། ཚིག་གི་སྤུ་རིས་མ་ཕྱེད་པས་འཁྲུལ་བ་དང་། གཟུགས་མེད་ཁམས་པ་བྱང་སེམས་ཀྱི་སྡོམ་པའི་རྟེན་དུ་མི་རུང་ན། རྟེན་དེ་ལ་བྱང་ཆུབ་སེམས་དཔའ་མེད་པར་འདོད་དགོས་པས་འཁྲུལ་པ་དང་། རྟེན་དེ་ལ་བྱང་སེམས་ཀྱི་སྡོམ་པ་གསར་དུ་སྐྱེ་བ་ཡོད་ན། གཞན་གྱི་ལུས་ངག་གི་རིག་བྱེད་ལ་ལྟོས་པས་ཁྱབ་པར་འདོད་པ་ཡང་འཁྲུལ་བ་ཡིན་ཏེ། གཞན་གྱི་ཆོ་ག་ལ་མ་ལྟོས་པར་རང་ཉིད་ཀྱིས་དེར་བསྐྱེད་པས་ཆོག་པའི་ཕྱིར་དང་། གཟུགས་མེད་ཁམས་ཀྱི་ཉན་ཐོས་རྟེན་དེ་ལ་ཐེག་པ་ཆེན་པོའི་ལམ་དུ་འཇུག་པ་མི་སྲིད་པར་འདོད་དགོས་ལ། དེ་ལྟ་ན་དེའི་རྟེན་ཅན་གྱི་དགྲ་བཅོམ་པས་ལྷག་མེད་དུ་མྱ་ངན་ལས་འདས་པ་དེ། འདོད་གཟུགས་གང་རུང་དུ་སྐྱེ་བ་བླངས་ནས། ཐེག་པ་ཆེན་པོའི་ལམ་དུ་འཇུག་དགོས་པར་ཐལ་བའམ། ཡང་ན་ཟག་མེད་ཀྱི་ལས་ཀྱི་དབང་གིས་བྱུང་བའི་ཡིད་ཀྱི་རང་བཞིན་གྱི་ལུས་ཅན་དེ་བྱང་སེམས་ཀྱི་སྡོམ་པ་གསར་དུ་སྐྱེ་བའི་རྟེན་དུ་རུང་ན། གཟུགས་མེད་ཁམས་པ་དེར་མི་རུང་བ་ལ་རྒྱུ་མཚན་ཅི་ཡང་མེད་པས་མཚུངས་པ་ཡིན་ནོ༎ གཞན་ཡང་ལྟག་ཆོད་དེ་ལྟར་སྨྲ་བ་ཁྱེད་ཀྱི་ལྟར་ན། རིན་ཆེན་ཕྲེང་བ་ (དཔལ་བརྩེགས་པར་མ། ས་སྐྱ་བཀའ་འབུམ་དཔེ་བསྡུར་མ། ས་པཎ་ཀུན་དགའ་རྒྱལ་མཚན་གྱི་གསུང་འབུམ། པོད་དང་པོ། བྱང་ཆུབ་ཏུ་སེམས་བསྐྱེད་པའི་ཆོ་གའི་ལུང་སྦྱོར། ༣༤༤་༣) ལས། སེམས་ཅན་ཐམས་ཅད་བྱང་ཆུབ་ཏུ༎ སེམས་བསྐྱེད་བཅུག་ནས་བསྙེན་བྱས་ན༎ རི་དབང་རྒྱལ་པོ་ལྟར་བརྟན་པའི༎ བྱང་ཆུབ་སེམས་དང་རྟག་ལྡན་འགྱུར༎ ཞེས་དང་། ཡུམ་གྱི་མདོ་ སྡེ་བཀའ། ཤེར་ཕྱིན། འཕགས་པ་ཤེས་རབ་ཀྱི་ཕ་རོལ་དུ་ཕྱིན་པ་བརྒྱད་སྟོང་པ། ༡༩ ན ༡  “ལྷའི་བུ་གང་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མ་བསྐྱེད་པ་དེ་དག་གིས་སེམས་བསྐྱེད་པར་བྱའོ༎” ཞེས་སྣང་།) ལས། ལྷའི་བུ་གང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམསམ་བསྐྱེད་པ་དག་གིས་ཀྱང་དེ་བསྐྱེད་པར་བྱའོ༎ ཞེས་གསུངས་པ་དེ་ལ་ཡང་ཁྱེད་ཀྱིས་སྨྲས་པའི་ཀླན་ཀ་དེ་ཉིད་ཀྱི་གླགས་ཡོད་པར་བྱོས་ཤིག །

ཞེས་སོ༎ 

     ད་ནི་བརྒལ་ལན་དེ་རྣམས་ལ་ཅུང་ཟད་དཔྱད་ན། སོ་སོ་ཐར་པ་རིགས་བདུན་གྱི༎ ཞེས་སོགས་བྱང་སྡོམ་གྱི་རྟེན་དུ་དགོས་པར་གསུངས་པའི་སོ་ཐར་དེ་ཐེག་ཆེན་གྱི་སོ་ཐར་ལ་བྱེད་དགོས་པར་རྗེ་བཙུན་ས་སྐྱ་པའི་སྡོམ་པ་ཉི་ཤུ་པའི་རྣམ་བཤད་ལས་འབྱུང་བ་འདོད་པར་གསུངས་པ་ལའང་བརྟག་དགོས་ཏེ། འགྲེལ་པ་དེར་གསུངས་པ་ནི་རྒྱུད་རྡོ་རྗེ་རྩེ་མོའི་ཚིག །སྡོམ་པ་གསུམ་ལ་གནས་པ་ནི༎ དང་པོ་ཁྲུས་སུ་བཤད་པ་ཡིན༎ ཞེས་པའི་དགོངས་པ་གསུངས་པ་ཡིན་གྱི། ལམ་སྒྲོན་གྱི་སོ་སོར་ཐར་པ་རིགས་བདུན་གྱི༎ ཞེས་སོགས་ཀྱི་ལུང་དོན་འཆད་པ་མ་ཡིན་པའི་ཕྱིར་ཏེ། རྗེ་བཙུན་ཆེན་པོའི་སྡོམ་པ་ཉི་ཤུ་པའི་རྣམ་བཤད་ (དཔལ་བརྩེགས་པར་མ། ས་སྐྱ་བཀའ་འབུམ་དཔེ་བསྡུར་མ། རྗེ་བཙུན་གྲགས་པ་རྒྱལ་མཚན་གྱི་གསུང་འབུམ། པོད་ལྔ་པ། སྡོམ་པ་ཉི་ཤུ་པའི་རྣམ་བཤད། ༢༤༥་༢༠) ལས། 

དེ་ལྟར་ན་རྡོ་རྗེ་རྩེ་མོ་ (སྡེ་བཀའ། རྒྱུད་འབུམ། ཉ་པ། གསང་བ་རྣལ་འབྱོར་ཆེན་པོའི་རྒྱུད་རྡོ་རྗེ་རྩེ་མོ། ༢༠༠ ན ༧ རྒྱུད་རང་དུ། སྡོམ་པ་གསུམ་ལ་རབ་ཏུ་གནས༎ དང་པོ་ཁྲུས་སུ་བརྗོད་པ་ཡིན༎ ཞེས་སྣང་།) ལས། སྡོམ་པ་གསུམ་ལ་གནས་པ་ནི༎ དང་པོ་ཁྲུས་སུ་བཤད་པ་ཡིན༎ ཞེས་གང་ཟག་གཅིག་གི་རྒྱུད་ལ་སོ་སོར་ཐར་པ་དང་། བྱང་ཆུབ་སེམས་དཔའ་དང་། རིག་པ་འཛིན་པའི་སྡོམ་པ་གསུམ་དང་ལྡན་པར་གསུངས་པ་དང་འགལ་ལོ་ཞེ་ན། དེའི་དོན་ནི་འདི་ཡིན་ཏེ། སྤྱིར་སོ་སོར་ཐར་པ་ཞེས་བྱ་བའི་རང་གི་ངོ་བོ་ནི། གཞན་ལ་གནོད་པ་བྱེད་པ་གཞི་དང་བཅས་པ་ལས་ལོག་པ་ཡིན་ལ། དེའི་སྟེང་དུ་ཕན་འདོགས་པར་འདོད་ཅིང་ཞུགས་པ་ནི་བྱང་ཆུབ་སེམས་དཔའི་སྡོམ་པ་ཡིན་ཞིང་། རིག་པ་འཛིན་པ་ནི་རིག་པ་འཛིན་པ་ཡིན་ནོ༎ དེ་ལ་སོ་སོར་ཐར་པ་ནི་གཉིས་ཏེ། ཉན་ཐོས་ཀྱི་སོ་སོར་ཐར་པ་དང་། བྱང་ཆུབ་སེམས་དཔའི་སོ་སོར་ཐར་པ་ལས། འདིར་བྱང་ཆུབ་སེམས་དཔའི་སོ་སོར་ཐར་པ་ནི་སྡོམ་པ་ཐོབ་པ་དང་། གནས་པ་གཉིས་གའི་རྟེན་དུ་རུང་གི །སྔ་མ་ནི་དེ་ལྟ་མ་ཡིན་པས། རྡོ་རྗེ་རྩེ་མོའི་དགོངས་པ་ནི། བྱང་ཆུབ་སེམས་དཔའི་སོ་ཐར་རོ༎ 

ཞེས་སོ་ཐར་སྡོམ་པ་དེ་བྱང་སྡོམ་སྐྱེ་བའི་རྟེན་དང་གནས་པའི་རྟེན་གཉི་ག་མིན་པར་གསུངས་པ་ལ། གཞན་དག་གིས། རྡོ་རྗེ་རྩེ་མོར་སྡོམ་པ་གསུམ་ལྡན་གྱི་གང་ཟག་གསུངས་པ་དང་འགལ་བ་བསྟན་པའི་ལན་དུ། སོ་ཐར་ལ་གཉིས་ལས་རྩེ་མོར་གསུངས་པ་ནི་བྱང་སེམས་ཀྱི་སོ་ཐར་ལ་དགོངས་པར་གསལ་བར་གསུངས་པའི་ཕྱིར་རོ༎ གལ་ཏེ་དངོས་སུ་རྡོ་རྗེ་རྩེ་མོའི་དགོངས་པ་གསུངས་ཤིང་། དེའི་ཤུགས་ཀྱིས་ལམ་སྒྲོན་གྱི་གཞུང་ཚིག་དེའི་དོན་ཡང་དེར་བཀྲལ་ལོ་ཞེ་ན་ནི། བྱང་སའི་ལུགས་ཀྱི་བྱང་སྡོམ་གསར་དུ་སྐྱེ་བའི་རྟེན་ཡིན་ན། སོ་ཐར་སྡོམ་ལྡན་ཡིན་པས་ཁྱབ་པར་ཐལ། དེའི་བྱང་སྡོམ་སྐྱེ་བ་ལ་སྨོན་སེམས་སྔོན་དུ་འགྲོ་དགོས་པ་གང་ཞིག །སྔར་ཐེག་པ་ཐུན་མོང་བའི་སོ་ཐར་ཐོབ་པ་ཡིན་ན་བྱང་སྡོམ་ཐོབ་པ་ན། དེ་བྱང་སེམས་ཀྱི་སོ་ཐར་དུ་གནས་འགྱུར་བ་དང་། སྔར་ནས་དེ་མ་ཐོབ་ན་སྨོན་སེམས་སྐྱེས་པ་དང་བྱང་སེམས་ཀྱི་སོ་ཐར་གསར་དུ་ཐོབ་པ་དུས་མཉམ་པར་བཞེད་པའི་ཕྱིར། ཕྱི་མ་གྲུབ་སྟེ། རྗེ་བཙུན་ཆེན་པོའི་རྣམ་བཤད་ (དཔལ་བརྩེགས་པར་མ། ས་སྐྱ་བཀའ་འབུམ་དཔེ་བསྡུར་མ། རྗེ་བཙུན་གྲགས་པ་རྒྱལ་མཚན་གྱི་གསུང་འབུམ། པོད་ལྔ་པ། སྡོམ་པ་ཉི་ཤུ་པའི་རྣམ་བཤད། ༢༤༦་༡༠) ལས། 

བྱང་ཆུབ་སེམས་དཔའི་སོ་སོར་ཐར་པ་དེ་བླང་བའི་ཆོ་ག་གཞན་ཞིག་ཡོད་དམ། སོ་སོར་ཐར་པའི་སྡོམ་པ་བླང་བའི་ཆོ་ག་ཉིད་ཅེ་ན། སྔར་སོ་སོར་ཐར་པ་ཐོབ་ན་ཕྱིས་བྱང་ཆུབ་སེམས་དཔའི་སྡོམ་པ་ཐོབ་པའི་དུས་སུ་སྔར་གྱི་དེ་བྱང་ཆུབ་སེམས་དཔའི་སྡོམ་པར་གནས་འགྱུར་ལ། སྔར་མ་ཐོབ་ན་ནི་བྱང་ཆུབ་སེམས་དཔའི་སྨོན་པའི་སེམས་བསྐྱེད་ཀྱི་དུས་ཉིད་དུ་བྱང་ཆུབ་སེམས་དཔའི་སོ་སོར་ཐར་པ་ཐོབ་པ་ཡིན་ནོ༎

ཞེས་གསུངས་པ་ལྟར་ཁྱེད་འདོད་དགོས་པའི་ཕྱིར། གཞན་ཡང་སོ་སོར་ཐར་པ་རིགས་བདུན་གྱི༎ ཞེས་སོགས་ཐེག་པ་ཐུན་མོང་བ་འདུལ་བའི་སོ་ཐར་ལ་མི་འཆད་པར་གཞན་དུ་འགྲེལ་མི་རིགས་པར་ཐལ། ཁྱེད་ལྟར་ན་སྨོན་སེམས་ཐོབ་ན་སྡོམ་པ་ཐོབ་པས་ཁྱབ། དེ་ཐོབ་ན་སྲོག་གཅོད་སྤོང་བ་ཁས་བླངས་པས་ཁྱབ་པས། སྡོམ་པ་ཉི་ཤུ་པའི་དཀའ་འགྲེལ་དུ་སོ་ཐར་མ་ཐོབ་པས་སྲོག་གཅོད་སྤོང་བ་ཁས་མ་བླངས་ན་བྱང་སྡོམ་གྱི་སྣོད་རུང་མ་ཡིན་པར་གསུངས་པ་གཞི་མེད་པར་འགྱུར་བའི་ཕྱིར་རོ༎ ད་དུང་དོགས་པ་འདི་ལྟར་ཡང་མཆིས་ཏེ། རྗེ་བཙུན་གྲགས་རྒྱན་པས་སྔར་ནས་སོར་སྡོམ་ལྡན་ན་བྱང་སྡོམ་ཐོབ་པ་ན། སྔར་གྱི་སོ་ཐར་དེ་བྱང་སེམས་ཀྱི་སོ་ཐར་དུ་གནས་གྱུར་པ་མི་འཐད་པར་ཐལ། དེས་སྨོན་སེམས་ཐོབ་པ་ན་གནས་གྱུར་པའི་ཕྱིར་ཏེ། སྔར་སོ་ཐར་མ་ཐོབ་པས་སྨོན་སེམས་ཐོབ་པ་ན་བྱང་སེམས་ཀྱི་སོ་ཐར་གསར་དུ་ཐོབ་པ་གང་ཞིག །མཚུངས་པའི་ཕྱིར་སྙམ་པ་ནི་བློ་དམན་ལ་སྐྱེ་བའི་དོགས་པའོ༎ 

       རྟེན་ཁྱད་པར་ཅན་གྱི་སྐོར་ཐལ་བ་འཕངས་པ་རྣམས་ལ། ཁོ་བོ་ཅག་ལྷ་ཡིན་ན་བྱང་སྡོམ་གྱི་རྟེན་ཁྱད་པར་ཅན་མ་ཡིན་པས་ཁྱབ་པ་ནི་འདོད་པ་ཡིན་ལ། སྐལ་བ་ཡོད་ཀྱི་གཞན་དུ་མིན༎ ཞེས་པའི་ངེས་བཟུང་གི་ཚིག་དང་འགལ་བའི་སྐྱོན་ཡང་མེད་དེ། འགྲེལ་པའི་མཚམས་སྦྱོར་དང་ཕྱི་འགྲེལ་གཉིས་ལ་བརྟགས་ནས། སྐལ་བ་ཡོད་མེད་མི་འདྲ་བ་གཉིས་སུ་སྦྱར་དགོས་པ་མཁས་པ་གོང་མའི་གསུང་རྒྱུན་ལས་འབྱུང་བ་བཞིན། སོ་ཐར་རིགས་བདུན་གང་རུང་དང་ལྡན་ན་བྱང་སྡོམ་གྱི་རྟེན་ཁྱད་པར་ཅན་དུ་གྱུར་པའི་སྐལ་བ་ཡོད་ཀྱི། དེ་གང་རུང་མི་ལྡན་ན་རྟེན་ཁྱད་པར་ཅན་དུ་མི་རུང་། དེ་དག་གང་ཡང་མི་ལྡན་ཀྱང་རྩ་བ་བཞི་སྤོང་བ་ཡིན་ན་བྱང་སྡོམ་གྱི་རྟེན་ཙམ་དུ་གྱུར་པའི་སྐལ་བ་ཡོད་ཀྱི། གཞན་དུ་ན་དེ་ཙམ་གྱི་སྐལ་བའང་མེད་ཅེས་དགོངས་པ་འགྲེལ་བའི་ཕྱིར། དེ་དག་ཀྱང་རྗེ་བཙུམ་ཙོང་ཁ་པ་ཆེན་པོའི་བཞེད་པ་ཡིན་ཏེ། གཞུང་ལམ་ (རྗེ་ཙོང་ཁ་པའི་བཀའ་འབུམ་དཔེ་བསྡུར་མ།༢༠༢༠ པོད་ཀ་པ། བྱང་སའི་ཚུལ་ཁྲིམས་ལེའུའི་རྣམ་བཤད་བྱང་ཆུབ་གཞུང་ལམ། ༣༨༡་༥) ལས།

དེས་ན་ལམ་སྒྲོན་དུ། སོ་སོར་ཐར་པ་རིས་བདུན་གྱི༎ རྟག་ཏུ་སྡོམ་གཞན་ལྡན་པ་ལ༎ བྱང་ཆུབ་སེམས་དཔའི་སྡོམ་པ་ཡི༎ སྐལ་བ་ཡོད་ཀྱི་གཞན་དུ་མིན༎ ཞེས་གསུངས་པ་ཡང་ལས་དང་པོ་པ་ལ་སོ་ཐར་རིས་བདུན་གང་རུང་མེད་ན་ཚུལ་ཁྲིམས་ཀྱི་སྡོམ་པ་ཁྱད་པར་ཅན་སྐྱེ་བའི་སྐལ་བ་མེད་ལ། སོ་ཐར་རིས་བདུན་དང་ཐུན་མོང་བ་རང་བཞིན་སྤོང་བ་མེད་ན་བྱང་སེམས་ཀྱི་སྡོམ་པ་ཙམ་སྐྱེ་བའི་སྐལ་བ་མེད་ཅེས་སྟོན་པ་ཡིན་གྱི། སོ་ཐར་རིས་བདུན་མཚན་ཉིད་པ་གཅིག་མེད་ན་བྱང་སེམས་ཀྱི་སྡོམ་པ་མི་སྐྱེ་བར་བཞེད་པ་མིན་ཏེ།

ཞེས་སོགས་གསུངས་པ་ལ་བརྟེན་པའོ༎ 

       ཡང་འཁྲུལ་པ་གསུམ་བསྟན་པ་ལ་བརྟག་པ་ནི། ཚིག་གི་སྤུ་རིས་མི་འབྱེད་གསུངས་ནའང་། བྱི་དོར་དུ། འགྲོ་བ་རིགས་དྲུག་པོ་ཐམས་ཅད། ཅེས་ཕྱོགས་སྔ་བླངས་འདུག་ཀྱང་། རྗེ་བཙུན་ཆེན་པོའི་སྡོམ་པ་ཉི་ཤུ་པའི་རྣམ་བཤད་ (དཔལ་བརྩེགས་པར་མ། ས་སྐྱ་བཀའ་འབུམ་དཔེ་བསྡུར་མ། རྗེ་བཙུན་གྲགས་པ་རྒྱལ་མཚན་གྱི་གསུང་འབུམ། པོད་ལྔ་པ། སྡོམ་པ་ཉི་ཤུ་པའི་རྣམ་བཤད། ༢༤༤་༡༨) དུ།

སྡོམ་པའི་རྟེན་མ་ཡིན་ཏེ། སོ་སོར་ཐར་པ་ནི་གླིང་གསུམ་དུ་སྐྱེས་པའི་སྐྱེས་པ་དང་བུད་མེད་མ་ཡིན་པ་ལ་མི་སྐྱེ་ལ། བྱང་ཆུབ་ཀྱི་སེམས་ནི་འགྲོ་བ་ཐམས་ཅད་ལའང་སྐྱེ་སྟེ། 

ཞེས་སོ་ཐར་སྡོམ་པ་སྐྱེ་བའི་རྟེན་མ་ཡིན་པར་སྒྲུབ་པ་ན། སོར་སྡོམ་གླིང་གསུམ་གྱི་མི་ཁོ་ན་དང་། བྱང་ཆུབ་ཀྱི་སེམས་འགྲོ་བ་ཐམས་ཅད་ལ་སྐྱེ་བར་གསུངས་པས། དོན་འགྲོ་བ་རིགས་དྲུག་ཀ་ལ་་བྱང་ཆུབ་ཀྱི་སེམས་སྐྱེ་བ་ཡོད་པ་པ་དགོངས་པ་ཡིན་ངེས་ཀྱང་། དེ་ལ་ཚིག་སྐྱོན་ཅུང་ཟད་ཅིག་ནི་འཇུག་པར་སྣང་ངོ་༎ 

       གཟུགས་མེད་ཀྱི་རྟེན་ལ་བྱང་ཆུབ་ཀྱི་སེམས་དང་བྱང་སྡོམ་གསར་དུ་སྐྱེ་བ་མེད་ན། དེར་བྱང་སེམས་མེད་པར་འདོད་དགོས་པས་འཁྲུལ་པ་ཞེས་གཟུགས་མེད་ན་བྱང་སེམས་ཡོད་པ་གཞི་བཞག་གིས་ཐལ་བ་འཕངས་པའང་བརྟགས་ན་ཅུང་ཟད་དཀའ་སྟེ། དེར་བྱང་ཆུབ་ཀྱི་སེམས་གསར་དུ་སྐྱེ་བ་དང་བྱང་སྡོམ་གསར་དུ་སྐྱེ་བ་མེད་པ་གང་ཞིག །བྱང་སེམས་གཟུགས་མེད་དུ་སྐྱེ་བ་ཡང་མེད་པའི་ཕྱིར། དང་པོ་གྲུབ་སྟེ། ལས་ཉོན་དབང་གིས་གཟུགས་མེད་དུ་སྐྱེ་བའི་ལམ་མ་ཞུགས་ཀྱི་གང་ཟག་དེ་ལུང་ལ་བརྟེན་པ་མེད་པའི་ཕྱིར། ཁྱབ་སྟེ། སྦྱོར་ལམ་པ་ཞིག་མཐོང་ལམ་གསར་དུ་ཐོབ་པ་ལུང་ལ་བརྟེན་དགོས་ན། ལམ་མ་ཞུགས་ཚོགས་ལམ་ཐོབ་པ་ལུང་ལ་བརྟེན་མི་དགོས་པ་མི་སྲིད་པའི་ཕྱིར་དང་། དེ་ན་སྡོམ་པའི་ཆོ་ག་མེད་པས་བྱང་སྡོམ་གསར་དུ་སྐྱེ་བ་འོང་ས་མེད་པའི་ཕྱིར། གཉིས་པ་གྲུབ་སྟེ། སྡུད་པ་ (སྡེ་བཀའ། ཤེར་ཕྱིན་སྣ་ཚོགས། ཀ་པ། འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་སྡུད་པ་ཚིགས་སུ་བཅད་པ། ༡༧ ན ༡) ལས། 

བྱང་ཆུབ་ཡོན་ཏན་ཕ་རོལ་ཕྱིན་ཉམས་འགྱུར་འོང་ཞེས༎ 

གཟུགས་མེད་ཁམས་སུ་སྐྱེ་བ་དོན་དུ་གཉེར་མི་བྱེད༎ 

ཞེས་བྱང་སེམས་རྣམས་གཟུགས་མེད་དུ་སྐྱེ་བ་དོན་དུ་མི་གཉེར་བར་གསུངས་ཤིང་། ཀུན་བཏུས་ (སྡེ་བསྟན། སེམས་ཙམ། རི་པ། མངོན་པ་ཀུན་བཏུས། སློབ་དཔོན་ཐོགས་མེད། ༡༠༦ ན ༥) ལས་ཁམས་ཀྱི་དབྱེ་བས་གང་ཟག་འཆད་པ་ན་འདི་ལྟར། 

ཁམས་ཀྱིས་རབ་ཏུ་དབྱེ་བས་ཇི་ལྟ་བུ་ཞེ་ན། འདོད་པ་ན་སྤྱོད་པའི་སོ་སོའི་སྐྱེ་བོ་དང༌། སློབ་པ་དང༌། མི་སློབ་པའོ། །འདོད་པ་ན་སྤྱོད་པ་ཇི་ལྟ་བར་གཟུགས་དང་གཟུགས་མེད་པ་ན་སྤྱོད་པ་ཡང་དེ་བཞིན་ནོ༎ འདོད་པ་དང༌། གཟུགས་ན་སྤྱོད་པའི་བྱང་ཆུབ་སེམས་དཔའ་དང༌། འདོད་པ་ན་སྤྱོད་པའི་རང་སངས་རྒྱས་དང༌། དེ་བཞིན་གཤེགས་པ་བསམ་གྱིས་མི་ཁྱབ་པའི་གང་ཟག་གོ །

ཞེས་འདོད་གཟུགས་གཉིས་ལ་མ་གཏོགས་གཟུགས་མེད་ལ་དེ་ཡོད་པ་མ་བཤད་ཅིང་། ཀུན་བཏུས་འགྲེལ་པ་ (སྡེ་བསྟན། སེམས་ཙམ། ལི་པ། མངོན་པ་ཀུན་བཏུས་ཀྱི་རྣམ་བཤད། སློབ་དཔོན་རྒྱས་པོ་སྲས་གྲགས་པའི་བཤེས་གཉེན། ༢༥༨ བ ༤) ལས།

ཅིའི་ཕྱིར་གཟུགས་མེད་པ་སྤྱོད་པ་ན་བྱང་ཆུབ་སེམས་དཔའ་མེད་ཅེ་ན། སེམས་ཅན་ཡོངས་སུ་སྨིན་པར་བྱ་བའི་མཐུའི་ཁྱད་པར་ཐོབ་པ་རྣམས་དེར་མི་སྐྱེའོ༎ 

ཞེས་དང་། སྟོབས་བཅུ་དཔལ་ (སྡེ་བསྟན། དབུ་མ། ཧ་པ། འདུས་བྱས་དང་འདུས་མ་བྱས་རྣམ་ངེས། སྟོབས་བཅུ་དཔལ་བཤེས་གཉེན། ༢༦༡ བ ༤) གྱིས་ཀྱང་། 

གཟུགས་མེད་པ་ན་སྤྱོད་པའི་བྱང་ཆུབ་སེམས་དཔའ་མེད་པ་རྒྱུ་ཅི་ཞེ་ན། བརྗོད་དེ། ནུས་པ་ཁྱད་པར་ཅན་ཐོབ་པའི་བྱང་ཆུབ་སེམས་དཔའ་རྣམས་ནི་སྐྱེ་མཆེད་ཉེ་བར་བཟུང་སྟེ། སེམས་ཅན་ཡོངས་སུ་སྨིན་པར་བྱེད་པ་ནི་གཟུགས་མེད་པའི་ཁམས་སུ་མི་སྐྱེ་བའི་ཕྱིར་རོ༎ 

ཞེས་གསུངས་པའི་ཕྱིར། 

       འཁྲུལ་པ་གསུམ་པའི་རྟགས་དང་པོ་གོང་དུ་བསལ་ཟིན་ཅིང་། གཟུགས་མེད་ཀྱི་ཉན་ཐོས་རྟེན་དེ་ལ་ཐེག་ཆེན་ལམ་དུ་འཇུག་པ་མི་སྲིད་པ་ནི་ཤིན་ཏུ་འདོད་ལ། གཟུགས་མེད་རྟེན་ཅན་གྱི་དགྲ་བཅོམ་པ་སྔ་མའི་ལས་ཉོན་གྱིས་འཕངས་པའི་སྡུག་བསྔལ་གྱི་ཕུང་པོ་ལ་གནས་པས། དེའི་རྟེན་ཅན་གྱི་དགྲ་བཅོམ་པ་ལྷག་མེད་དུ་མྱ་ངན་ལས་འདས་པ་ཞེས་བྱ་བ་ཆོས་ཅན་གཞི་མ་གྲུབ་པའོ༎ དེའི་རྟེན་ཅན་གྱི་དགྲ་བཅོམ་པ་འདོད་གཟུགས་གང་རུང་དུ་སྐྱེ་བ་བླངས་ནས་ཐེག་པ་ཆེན་པོའི་ལམ་དུ་འཇུག་དགོས་པར་ཐལ། གཟུགས་མེད་ཀྱི་ཉན་ཐོས་རྟེན་དེ་ལ་ཐེག་ཆེན་ལམ་དུ་འཇུག་པ་མི་སྲིད་པའི་ཕྱིར་ན། ཁྱབ་པ་མེད་དེ། དེའི་ཚེ་ཟག་མེད་ཀྱི་ལས་ལ་བརྟེན་པའི་ཡིད་ཀྱི་རང་བཞིན་གྱི་ལུས་ཅན་དེ་བྱང་སེམས་ཀྱི་སྡོམ་པ་གསར་སྐྱེའི་རྟེན་དུ་རུང་ཞིང་། འོན་ཀྱང་འདི་དང་གཟུགས་མེད་གཉིས་མི་འདྲ་སྟེ། གཟུགས་མེད་ན་ལུང་མཉན་པ་མེད་ལ། འདི་ལ་ཡོད་པའི་ཕྱིར་རོ༎ 

        སེམས་ཅན་ཐམས་ཅད་བྱང་ཆུབ་ཏུ༎ ཞེས་སོགས་ནི་གཞུང་མ་དག་པ་གོང་དུ་གསུངས་ཟིན་པས་བསྐྱར་ཟློས་མི་དགོས་ལ། རིན་ཕྲེང་མ་ཕྱི་དག་པ་ལྟར་ན། ཞེས་གསུངས་པ་ནི། ད་ལྟའི་བསྟན་འགྱུར་པར་མའི་རིན་ཕྲེང་ཀུན་མཐུན་པ་དཔེར་ན་སྡེ་དཔར་ (སྡེ་བསྟན། སྐྱེས་རབས། གེ་པ། རྒྱལ་པོ་ལ་གཏམ་བྱ་བ་རིན་པོ་ཆེའི་ཕྲེང་བ། སློབ་དཔོན་ཀླུ་སྒྲུབ། ༡༡༧ བ ༥) དུ། 

སེམས་ཅན་རྣམས་ནི་བྱང་ཆུབ་ཏུ༎ 

སེམས་བསྐྱེད་བཅུག་ཅིང་བརྟན་བྱས་ན༎ 

རི་དབང་རྒྱལ་པོ་ལྟར་བརྟན་ཞིང༌༎ 

བྱང་ཆུབ་སེམས་ནི་རྟག་ཏུ་འཐོབ༎ 

ཞེས་འབྱུང་བ་ལྟར་སྣར་ཐང་། པེ་ཀིང་། ཅོ་ནེ། ཞོལ་པར། ལེགས་སྦྱར་མ་དཔེ་ད་ཡོད་རྣམས་ཀྱང་ཚིག་རྐང་དང་པོ་ལ་མི་མཐུན་པ་མེད་ལ། ལམ་ཤེས་ཀྱི་ཡན་ལག་སྐབས་ཡུམ་གྱི་མདོར། ལྷའི་བུ་གང་གིས་ཞེས་སོགས་འབྱུང་བ་ལ་ནི། སྔར་གྱི་ཚིག་སྐྱོན་མི་འཇུག་སྟེ། འགྲོ་བ་ཐམས་ཅད་ཅེས་པ་མ་ལུས་པར་འདུ་བའི་ཚིག་ཡིན་ཀྱང་། སེམས་ཅན་རྣམས། ཞེས་པ་ནི་མང་ཚིག་ཙམ་དང་། ལྷའི་བུ་གང་གིས། ཞེས་པ་སྤྱི་སྒྲ་ཙམ་ཡིན་ཞིང་། དེ་ཡང་ལམ་ཤེས་གསུང་བའི་འཁོར་དུ་འདུས་པའི་ལྷའི་བུ་སེམས་མ་བསྐྱེད་པ་དེ་དག་ཙམ་ལ་གསུངས་པའི་ཕྱིར་རོ༎    ༎  (མུ་འགོད།) ཤུབྷཾ།

རྣམ་པ་བརྒྱ་བདུན་ཅུ་རྩ་གསུམ་གྱི་སྡོམ་ཚིག

 ༄༅། །མཁྱེན་གསུམ་གྱི་རྣམ་པ་བརྒྱ་བདུན་ཅུ་རྩ་གསུམ་གྱི་སྡོམ་ཚིག་བློ་གསར་མགུལ་རྒྱན་ཞེས་བྱ་བ་བཞུགས་སོ༎ 

༄༅།   །འདྲེན་མཆོག་མཉམ་མེད་ཐུབ་པའི་དབང་པོ་དང་༎ དབྱེར་མེད་རྩ་བའི་བླ་མར་གུས་བཏུད་ནས༎ ཐམས་ཅད་མཁྱེན་པ་གསུམ་གྱི་འཛིན་སྟངས་ཡུལ༎དོན་གྱི་རྣམ་པ་སྡོམ་དུ་བསྡུ་བར་བྱ༎ ༈ མཁྱེན་གསུམ་རྣམ་པ་བརྒྱ་དང་བདུན་ཅུ་གསུམ༎ གཞི་ཤེས་ཉེར་བདུན་ལམ་ཤེས་སུམ་ཅུ་དྲུག། རྣམ་མཁྱེན་རྣམ་པ་བརྒྱ་དང་བཅུ་རྣམས་སོ༎ 

       ༈ དང་པོ་གཞི་ཤེས་རྣམ་པ་ཉེར་བདུན་ནི༎ བདེན་པ་གསུམ་ལ་བཞི་བཞི་ལམ་བཅོ་ལྔ༎ ༈ མེད་དང་མི་སྐྱེ་དབེན་དང་མི་བརྫི་བཞི༎ ༈ གནས་མེད་ནམ་མཁའ་བརྗོད་མེད་མིང་མེད་བཞི༎ ༈ འགྲོ་མེད་མི་འཕྲོགས་ཟད་མེད་སྐྱེ་མེད་བཞི༎ རིམ་བཞིན་སྡུག་ཀུན་འགོག་པའི་རྣམཔ་འོ༎ ༈ བྱེད་པོ་ཤེས་པོ་འཕོ་པོ་འདུལ་བ་པོ༎ བདག་མེད་རྟོགས་པའི་མཐོང་ལམ་ཟག་མེད་བཞི༎ ༈ རྨི་ལམ་སྒྲ་བརྙན་མིག་ཡོར་སྨིག་རྒྱུ་སྒྱུ༎ ལྔ་པོ་ལྟ་བུར་རིམ་བཞིན་ཕྱི་དོན་གྱི༎ ངོ་བོ་ཉིད་མེད་མ་སྐྱེས་མ་འགགས་པ༎ གཟོད་མ་ནས་ཞི་རང་བཞིན་མྱ་ངན་འདས༎ དེ་ལྟར་རྟོགས་པའི་སྒོམ་ལམ་ཟག་བཅས་ལྔ༎ ༈ ཕྱི་རོལ་ཀུན་ཉོན་མེད་དང་རྣམ་བྱང་མེད༎ བག་ཆགས་གོས་མེད་དབྱེ་བའི་སྤྲོས་པ་མེད༎ རློམ་མེད་མི་གཡོའི་མཐོང་ལམ་ཟག་མེད་དྲུག། དང་པོ་བཞི་ནི་ཉོན་སྒྲིབ་གཉེན་པོ་དང་༎ ལྷག་མ་ཤེས་སྒྲིབ་རགས་པའི་གཉེན་པོ་སྟེ༎ ལམ་གྱི་བདེན་པའི་རྣམ་པ་བཅོ་ལྔ་འོ༎ 

       ༈ གཉིས་པ་ལམ་ཤེས་རྣམ་པ་སོ་དྲུག་ནི༎ ཀུན་འབྱུང་རྣམ་པ་བརྒྱད་དང་ལམ་གྱི་བདུན༎ སྡུག་བདེན་རྣམ་པ་ལྔ་དང་འགོག་བཅུ་དྲུག། ༈ ཀུན་འབྱུང་སྤང་གཉེན་སྒོ་ནས་བསྟན་པ་ནི༎ འདུན་དངའདོད་ཆགས་ཡང་སྲིད་ལ་དགའི་སྲེད༎ ཆགས་སྡང་གཏི་མུག་ཀུན་རྟོག་སེམས་ཅན་ཞེན༎ རྒྱུ་དང་ཀུན་འབྱུང་རབ་སྐྱེ་རྐྱེན་དང་བཞིར།། རིམ་བཞིན་གསུམ་དང་གསུམ་དང་གཅིག་དང་གཅིག། དེ་དག་རྩ་བའི་བདག་འཛིན་ཞེན་མེད་ཆས༎ ཀུན་བདེན་ལ་བརྟེན་དོན་རྣམ་བརྒྱད་གསུངས་བརྟག། ༈ ལམ་བདེན་དམ་བཅའ་འཐད་པའི་སྒོ་ནས་བསྟན༎ ཚད་མེད་མཐའ་གཉིས་མ་འབྲེལ་ཐ་མི་དད༎ མཆོག་ཏུ་འཛིན་མེད་རྣམ་པར་མི་རྟོག་པ༎ གཞལ་མེད་ཆགས་པ་མེད་པའི་རྣམ་པ་བདུན༎ ལམ་དང་རིགས་པ་སྒྲུབ་པ་ངེས་འབྱིན་བཞིར༎ རིམ་བཞིན་གཉིས་དང་གཉིས་དང་གཉིས་དང་གཅིག། ངེས་འབྱིན་དམ་བཅའ་ཙམ་ལས་འཐད་མ་གསུངས༎ ༈ སྡུག་བདེན་རང་སྤྱིའི་མཚན་ཉིད་སྒོ་ནས་བསྟན༎ མི་རྟག་སྡུག་བསྔལ་སྟོང་པ་བདག་མེད་དང༎ བདེན་པའི་མཚན་ཉིད་མེད་པའི་རྣམ་པ་སྟེ༎ རང་གི་མཚན་ཉིད་བཞི་དང་སྤྱི་མཚན་གཅིག། ༈ འགོག་པ་ཕན་ཡོན་སྒོ་ནས་བསྟན་པ་ནི༎ ནང་དང༌ཕྱི་དང༌ཕྱི་ནང་སྟོང་པ་ཉིད༎ ཆེན་པོ་དོན་དམ་འདུས་བྱས་འདུས་མ་བྱས༎ མཐའ་ལས་འདས་པ་ཐོག་མ་ཐ་མ་མེད༎ དོར་བ་མེད་པ་རང་བཞིན་ཆོས་ཐམས་ཅད༎ རང་གི་མཚན་ཉིད་དང༌ནི་མི་དམིགས་པ༎ དངོས་མེད་ངོ་བོ་ཉིད་ཀྱི་སྟོང་པ་ཉིད༎ འགོག་པ་ཞི་བ་གྱ་ནོམ་ངེས་འབྱུང་བཞིར༎ རིམ་བཞིན་གསུམ་དང་བརྒྱད་དང་གཅིག་དང་བཞི༎ འགྲེལ་པས་འགོག་བདེན་བཅུ་དྲུག་དོན་ཚན་ལྔ༎ དངོས་བཏགས་བྱེད་པོ་ཡུལ་དུ་འཁྲུལ་བ་དང་༎ ངོ་བོ་ཉིད་འགོག་པ་ལ་རིམ་པ་བཞིན༎ ་གསུམ་དང་བརྒྱད་དང་གཅིག་དང་གསུམ་དང་གཅིག། ཕྱེ་བའང་ཐ་མ་གཉིས་བསྡོམས་གོང་དང་འདྲ༎

       ༈ གསུམ་པ་རྣམ་མཁྱེན་རྣམ་པ་བརྒྱ་དང་བཅུ༎ ཉན་ཐོས་ལ་ཡོད་རྗེས་མཐུན་སུམ་ཅུ་བདུན༎ བྱང་སེམས་ལ་ཡོད་རྗེས་མཐུན་སུམ་ཅུ་བཞི༎ ཐུན་མིན་རྣམ་མཁྱེན་རྣམ་པ་སུམ་ཅུ་དགུ༎ ༈ དང་པོ་བྱང་ཕྱོགས་སོ་བདུན་འདི་ལྟ་སྟེ༎ ༈ ལུས་ཚོར་སེམས་ཆོས་དྲན་པ་ཉེར་བཞག་བཞི༎ ༈ དགེ་བ་མ་སྐྱེས་སྐྱེད་ཅིང་སྐྱེས་པ་སྤེལ༎ མི་དགེ་མ་སྐྱེས་མི་སྐྱེད་སྐྱེས་པ་སྤོང་༎ ཡང་དག་སྤོང་བའི་དབྱེ་བ་རྣམ་པ་བཞི༎ ༈ འདུན་བརྩོན་སེམས་དཔྱོད་རྫུ་འཕྲུལ་རྐང་པ་བཞི༎ ༈ དད་བརྩོན་དྲན་ཏིང་ཤེས་རབ་དབང་སྟོབས་ལྔ༎ ༈ དྲན་དང་ཆོས་རབ་རྣམ་འབྱེད་བརྩོན་འགྲུས་དགའ༎ ཤིན་སྦྱངས་ཏིང་ངེ་འཛིན་དང་བཏང་སྙོམས་སྟེ༎ ཡང་དག་བྱང་ཆུབ་ཡན་ལག་རྣམ་པ་བདུན༎ ༈ ཡང་དག་ལྟ་བ་རྟོག་པ་ངག་དང་ལས།། འཚོ་བ་རྩོལ་བ་དྲན་པ་ཏིང་ངེ་འཛིན།། འཕགས་ལམ་ཡན་ལག་བརྒྱད་པོ་འདི་དག་གོ། བྱང་ཕྱོགས་སྡེ་ཚན་བདུན་ལ་རིམ་པ་བཞིན༎ ༈ དངོས་པོར་ཡོངས་རྟོག་རྩོལ་བ་ལས་བྱུང་ལམ༎ ཏིང་འཛིན་ཡོངས་སྦྱོང་མངོན་རྟོགས་སྦྱོར་བའི་ལམ༎ མངོན་རྟོགས་དང་འབྲེལ་མངོན་པར་རྟོགས་པའི་ལམ༎ རྣམ་དག་ངེས་འབྱིན་ལམ་ཞེས་འགྲེལ་པར་གསུངས།། 

       ༈ བྱང་སེམས་ལ་ཡོད་རྗེས་མཐུན་སོ་བཞི་ནི༎ གཉེན་པོའི་ལམ་གསུམ་སྤྲུལ་པའི་ལམ་གསུམ་དང་།། མཐོང་ཆོས་བདེར་གནས་ལམ་ལྔ་འདས་ལམ་དགུ།། སྤོང་བའི་ལམ་བཞི་སངས་རྒྱས་ལམ་བཅུ་འོ།། ༈ གཉེན་པོའི་ལམ་ནི་རྣམ་པར་ཐར་པའི་སྒོ༎ སྟོང་ཉིད་མཚན་མེད་སྨོན་མེད་རྣམ་པ་གསུམ༎ ༈ གཟུགས་ཅན་གཟུགས་དང་གཟུགས་མེད་གཟུགས་ལ་ལྟ༎ སྡུག་པའི་རྣམ་ཐར་གསུམ་ནི་སྤྲུལ་པའི་ལམ༎ ༈ གཟུགས་མེད་བཞི་དང་འགོག་པའི་རྣམ་ཐར་ནི༎ མཐོང་ཆོས་བདེ་བར་གནས་པའི་ལམ་ལྔ་འོ༎ ༈ བསམ་གཟུགས་སྙོམས་འཇུག་བརྒྱད་དང་འགོག་སྙོམས་བཅས༎ འཇིག་རྟེན་འདས་པའི་ལམ་ནི་རྣམ་པ་དགུ༎ ༈ སྤོང་ལམ་ཆོས་བཟོད་བར་ཆད་མེད་ལམ་བཞི༎ ༈ སྦྱིན་སོགས་དྲུག་སྟེང་ཐབས་མཁས་སྨོན་ལམ་སྟོབས།། ཡེ་ཤེས་ཕར་ཕྱིན་བཅུ་ནི་སངས་རྒྱས་ལམ།། 

       ༈ ཐུན་མིན་རྣམ་མཁྱེན་རྣམ་པ་སོ་དགུ་ནི༎ སྟོབས་བཅུ་མི་འཇིགས་བཞི་དང༌སོ་རིག་བཞི༎ སངས་རྒྱས་ཆོས་ནི་མ་འདྲེས་བཅོ་བརྒྱད་དང་༎ དེ་བཞིན་ཉིད་དང་རང་བྱུང་སངས་རྒྱས་ཉིད༎ ༈ གནས་དང་གནས་མིན་ལས་ཀྱི་རྣམ་སྨིན་དང་༎ མོས་པ་སྣ་ཚོགས་ཁམས་ནི་སྣ་ཚོགས་དང་༎ དབང་པོ་མཆོག་དང་མཆོག་མིན་ཐམས་ཅད་འགྲོ༎ ཀུན་བྱང་སྔོན་གནས་རྗེས་དྲན་འཆི་འཕོ་སྐྱེ༎ ཟག་ཟད་མཁྱེན་པ་དང་བཅས་སྟོབས་བཅུ་འོ༎ ༈ སྤངས་རྟོགས་ངེས་འབྱུང་བར་ཆད་དམ་བཅས་པར༎ འཇིགས་པ་མེད་པས་མི་འཇིགས་རྣམ་པ་བཞི༎ ༈ ཆོས་དོན་ངེས་ཚིག་སྤོབས་པ་སོ་རིག་བཞི༎ ༈ སངས་རྒྱས་ཆོས་རྣམས་མ་འདྲེས་བཅོ་བརྒྱད་ནི༎ སྤྱོད་པ་རྟོགས་པ་མ་འདྲེས་དྲུག་ཚན་གཉིས༎ འཕྲིན་ལས་ཡེ་ཤེས་མ་འདྲེས་གསུམ་ཚན་གཉིས༎ ༈ འཁྲུལ་དང་ཅ་ཅོ་དྲན་པ་ཉམས་པ་དང་༎ མཉམ་པར་མ་བཞག་ཐ་དད་འདུ་ཤེས་དང་༎ མ་བརྟགས་བཏང་སྙོམས་མི་མངའ་སྤྱོད་པའི་དྲུག། ༈ འདུན་བརྩོན་དྲན་ཏིང་ཤེས་རབ་རྣམ་གྲོལ་ལས༎ ཉམས་པ་མི་མངའ་རྟོགས་པ་མ་འདྲེས་དྲུག། ༈ སྐུ་གསུང་ཐུགས་ཀྱི་འཕྲིན་ལས་མ་འདྲེས་གསུམ༎ ༈ དུས་གསུམ་ཆགས་ཐོགས་མེད་པའི་ཡེ་ཤེས་གསུམ༎ ༈ དེ་བཞིན་ཉིད་ཀྱི་རྣམ་མཁྱེན་རྣམ་པ་ནི༎ ཆོས་ཉིད་སླར་མི་ལྡང་བར་གཟིགས་པའོ༎ ༈ རང༌བྱུང་ཉིད་ཀྱི་རྣམ་མཁྱེན་རྣམ་པ་ནི༎ ཆོས་རྣམས་ཀུན་ལ་མངའ་དབང་བསྒྱུར་བ་འོ༎ ༈ སངས་རྒྱས་ཉིད་ཀྱི་རྣམ་མཁྱེན་རྣམ་པ་ནི༎ ཆོས་ཀུན་མངོན་པར་རྫོགས་པར་བྱང་ཆུབ་པའོ༎ 

       དེ་ལྟར་རྣམ་པའི་གྲངས་དང་ཐ་སྙད་ཙམ༎ ངེས་ནས་དེ་ཡིས་མ་ཚིམ་ཞིབ་མོའི་གནད༎ མཚན་ལྡན་བཤེས་དང་དྲི་མེད་གཞུང་བཟང་ལ༎ བརྟེན་ནས་ངོམས་མེད་ཐོས་བསམ་སྒོམ་པ་གཅེས༎ དགེ་བ་འདི་ཡིས་མཁའ་མཉམ་ཡིད་ཅན་ཀུན༎ ཐེག་མཆོག་དགེ་བའི་བཤེས་ཀྱིས་རྗེས་བཟུང་ནས༎ ས་བཅུ་ལམ་ལྔའི་བགྲོད་པ་མཐར་ཕྱིན་ཏེ༎ སྐུ་བཞིའི་གོ་འཕང་དམ་པ་མྱུར་ཐོབ་ཤོག། 

       ཅེས་མཁྱེན་གསུམ་གྱི་རྣམ་པ་བརྒྱ་བདུན་ཅུ་རྩ་གསུམ་གྱི་སྡོམ་ཚིག་བློ་གསར་མགུལ་རྒྱན་ཞེས་བྱ་བ་འདི་ནི་རང་གི་བརྗེད་བྱང་དང་སྐལ་མཉམ་གཞན་ལ་ཕན་པའང་སྲིད་སྙམ་སྟེ། གཙོ་ཆེར་རྣམ་བཤད་སྙིང་པོ་རྒྱན་གྱི་དགོངས་པ་དང་མཐུན་པར་བཙུན་པ་ཤྲཱི་མིང་པས་ཕྱི་ལོ་ ༢༠༢༠ ཟླ་བ་ ༡༠ ཚེས་ ༢༨ ལྷག་དཀར་གྱི་ཉིན་ཐོག་ཐག་ཏུ་རྫོགས་པར་སྦྱར་བའོ༎ སརྦམངྒལཾ༎     ༎ 

ལྷ་མོའི་སྦྱིན་སྲེག ༼འཕྲོ་ཅན། ༽

2A པར་སྦྱོར་རུང་བ་ནི། སྤྱིར་པཎ་ཆེན་ཐམས་ཅད་མཁྱེན་པ་བློ་བཟང་དཔལ་ལྡན་ཡེ་ཤེས་ཀྱིས། མགོན་པོ་དང་ལྕམ་སྲིང་གི་སྦྱིན་བསྲེགས་སོགས་ཀྱང་དེ་ལྟར་དུ་མཛད་འདུག་པ་དང་། དེ་མོ་རིན་པོ་ཆེ་དགེ་ལེགས་རྒྱལ་མཚན་གྱིས་མཛད་པའི་ལྷ་མོ་འདི་ཉིད་ཀྱི་སྦྱིན་བསྲེགས་འདོད་པ་ཀུན་འཇོ་ཡང་དེ་དག་དང་ཧ་ལམ་མཐུན་ཞིང་ལག་ལེན་བསྟར་ཆོག་ལྟ་བུར་འདུག་ཀྱང་སྐབས་འགར་དོགས་པའི་གནས་ཀྱང་འདུག་ཅིང་། ཁྱད་པར་གསང་བདག་རྗེ་དྲུང་བཞེད་པའི་རྡོ་རྗེས་ལྷ་མོ་འདི་ཉིད་ཀྱི་སྦྱིན་བསྲེགས་བྱིན་ཟའི་ཕུང་པོ་ཞེས་པར་ཡང་། གོང་གསལ་ལྟར་མཁའ་འགྲོའི་མེ་མཆོད་དང་མཐུན་པའི་བྱེད་ལུགས་དང་། དངོས་གྲུབ་རྒྱ་མཚོའི་དགོངས་པ་ལྟར་བགྱིས་ཚེ་དེ་ཡི་འགྲོས་འཛུབ་མོ་རི་སྟོན་གྱི་ཚུལ་དུ་གནང་འདུག་པས། དུས་ཕྱིས་ལྷ་མོ་འདིའི་སྐོར་ལ་དམ་པ་འདི་ཉིད་ནས་བླ་མ་མང་པོའི་ཞབས་ལ་གཏུགས་ནས་བསྙེན་སྒྲུབ་ལས་གསུམ་གྱི་རིམ་པ་མཐའ་དག་ལ་མཁས་པར་སྦྱངས་པ་བརྟེན་ནས་ལྷ་མོའི་སྐོར་གྱི་ཡིག་ཆ་མང་དག་མཛད་འདུག་པ་རྣམས་ཀྱང་ྋརྒྱལ་མཆོག་བསྐལ་བཟང་རྒྱ་མཚོ་སོགས་ནས་ཚད་མར་མཛད་འདུག་པས། དེ་ཡིས་མཛད་པའི་སྦྱིན་བསྲེགས་བྱིན་ཟའི་ཕུང་པོ་ནས་བཤད་པ་ལྟར་དམིགས་བསལ་འགའ་ཞིག་གཞན་ནས་བླངས་ནས་ལག་ཏུ་བླང་བའི་རིམ་པ་འགོད་པ་ལ།   དེ་ལ་སྔར་ཆོ་ག་མ་བྱས་པའི་གཞིར་སྔོན་དུ་ས་སྦྱང་དགོས་པས་འགྲུབ་ན་རང་གི་ལྷའི་རྣལ་འབྱོར་རྒྱས་པར་བསྒོམས་ནས་ས་སྦྱང་བ་རྒྱས་པར་བྱ་ཞིང་། དེ་ཙམ་མ་གྲུབ་ན།  རང་ཉིད་སྐད་ཅིག་གིས་དཔལ་རྡོ་རྗེ་འཇིགས་བྱེད་ཞལ་གཅིག་ཕྱག་གཉིས་ཀྱིས་གྲི་གུག་དང་ཐོད་པ་འཛིན་པ་གཡོན་བརྐྱངས་ཀྱིས་བཞུགས་པར་བསམ་སྟེ། ལག་པ་གཡས་རྡོ་རྗེ་དང་བཅས་ས་ལ་བཞག་ནས། ཨོཾ་ཨཱཿཧཱུཾ། ཨོཾ་ཧ་ན་ཧ་ན་བཛྲ་ཀྲཱོ་དྷ་ཧཱུཾ་ཕཊ། ཅེས་བརྗོད་ནས། རྡོ་རྗེ་ཁྲོ་བོས་འགེགས་རྣམས་བཅོམས། རྡོ་རྗེ་གསུམ་གྱིས་སའི་ཉེས་སྐྱོན་ཐམས་ཅད་སྦྱངས་པར་གྱུར་པར་བསམ་པའམ། ཡང་ན་ལས་སྔགས་བརྒྱ་རྩ་བརྗོད་པས་ཀྱང་རུང་ 

2B སྟེ་དེ་འདྲ་བའི་ཀུན་རྫོབ་ཀྱི་དག་པ་དང་། སའི་ཉེས་སྐྱོན་ཐམས་ཅད་རང་བཞིན་གྱིས་གྲུབ་པས་སྟོང་པའི་སྟོང་པ་ཉིད་དུ་གྱུར་པར་བསྒོམ་པ་དོན་དམ་པའི་སྦྱང་བ་བྱས་ནས། ས་གཞི་རང་བཞིན་གྱིས་དཀར་བའམ་ས་དཀར་པོ་བྱུགས་པས་དཀར་པོར་བྱས་པ་ལ། ཐོག་མར་དབུས་བཙལ་ནས་ཚངས་ཟུར་གྱི་ཐིག་བཏབ་སྟེ། དེ་ནས་ཐིག་སྐུད་ཁྲུ་ཕྱེད་པ་ཞིག་གིས་དབུས་ནས་ཟླུམ་པོར་བསྐོར། དེ་ནས་ཐིག་སྐུད་ཁྲུ་ཕྱེད་པ་དེ་ལ་སོར་བཞི་བསྣན་ནས་དེའི་དབུས་ནས་ཟླུམ་པོར་བསྐོར། དེ་སྟེང་སླར་ཡང་སོར་བཞི་བསྣན་ནས་ཟླུམ་པོར་བསྐོར་བར་བྱའོ།། དེ་ནས་ཟླུམ་ཐིག་ཕྱི་མ་དང་ཚངས་ཐིག་ཕྲད་མཚམས་ནས་ཕྱོགས་བཞིར་སོར་གཉིས་གཉིས་སོང་བར་ཟུར་ཐིག་བར་ལ་ཐིག་སྐུད་བརྐྱངས་ནས་གྲུ་བཞིར་གདབ་སྟེ། ཁ་ཁྱེར་ལ་འཁོར་ལོའམ་རྡོ་རྗེའི་ཕྲེང་བས་བསྐོར་བར་བྱ་ཞིང་། ཕྱིའི་གྲུ་བཞི་པའི་ཟུར་ནས་ཟླ་བ་ཕྱེད་པའི་སྟེང་རྡོ་རྗེ་རྩེ་གསུམ་པ་ཕྱེད་པས་མཚན་པ་དང་། ཐབ་ཀྱི་དབུས་སུ་པདྨ་དཀར་པོ་འདབ་མ་བརྒྱད་པའི་ལྟེ་བར། རྡོ་རྗེ་རྩེ་ལྔ་པ་སྲིད་དུ་སོར་བརྒྱད་པ་དཔངས་སུ་སོར་གཅིག་པ་བྱ་བའམ། ཡང་ན་དེ་མོ་དགེ་ལེགས་རྒྱལ་མཚན་གྱི་གསུང་ལྟར་རྡོ་རྗེས་མཚན་པའི་བེ་ཅོན་ཚད་གོང་ལྟར་བྱ་སྟེ། འདི་ནི་འོད་སྙེར། རང་གི་འདོད་པའི་ལྷ་ཡི་མཚན་མ་འགོད་པར་གསུངས་པ་དང་ཡང་མཐུན། དེ་ནས་ཟླུམ་ཐིག་ནང་མའི་སྟེང་ནས་བུད་ཤིང་སྐམ་པོ་སྲོག་ཆགས་མེད་ཅིང་དྲི་ཞིམ་པས་ཟླུམ་པོར་བརྩིགས་ཏེ། བུད་ཤིང་བརྩིགས་པ་ལ་ས་དཀར་པོས་བྱུགས་ཤིང་། ཕྱི་རོལ་དུ་བའི་ལྕི་བ་དང་བདུད་རྩི་དཀར་པོ་དང་ལྡན་པའི་དྲི་དཀར་པོས་བྱུགས་ལ། མེ་ཏོག་དཀར་པོ་སིལ་མ་བཀྲམ་པར་བྱའོ།། བརྩིགས་ཐབ་ལ་འཇིམ་པ་བརྩིགས་པ་དང་བརྐོས་ཐབ་ལ་བྲུས་པའི་ཁྱད་པར་ལས། མུ་རེན་དང་ཁ་ཁྱེར་ལ་སོགས་པའི་དབྱེ་བ་ནི་གོང་གི་བྲིས་ཐབ་ཉིད་ཀྱིས་ཤེས་སོ།།  དེ་ནས་ཆུ་བཞི་དང་བཟེད་ཞལ་གསུམ། བསང་གཏོར་གྱི་ཀུ་ཤའི་ཆུན་པོ་དང་བཅས་པ་མཉྫི་ལ་སོགས་པའི་སྟེང་དུ་གཡོན་དུ་དགོད་པར་བྱ་ཞིང་། བསང་ཆུའམ་ལས་བུམ་ཡང་གཡོན་དུ་དགོད། ལས་བུམ་བསྒྲུབས་ཡོད་ན་བསང་ཆུ་བསྒྲུབ་མི་དགོས་ཤིང་། མེད་ན་བསང་ཆུ་བསྒྲུབ་དགོས་པས།   བསང་ཆུ་སྒྲུབ་ཚུལ་ནི། སྣོད་གཙང་མར་ཆུ་གཙང་མ་ལ་དྲི་བཟང་བཏབ་པ་བཞག་སྟེ། དེ་ཉིད་སྤོས་ཀྱིས་བདུག་ཅིང་། ཧྲཱིཿཥྚྲཱིཿ བརྒྱ་རྩ་བརྒྱད་དམ་བདུན་ཙམ་བཟླས་པས་ 

3A བྱིན་གྱིས་བརླབས། གཡས་སུ་བསྲེགས་རྫས་རྣམས་འབུལ་བའི་རིམ་པ་བཞིན་བསྒྲིགས། དེའི་ནང་རོལ་དུ་འཇིག་རྟེན་པའི་མེ་ལྷའི་མཆོད་རྫས་རྣམས་རིམ་པ་བཞིན་དུ་བཀོད་པའི་མཐར་འཇིག་རྟེན་པའི་མེ་ལྷའི་གཏོར་མ་ཡང་བཤམས། དེའི་ནང་རོལ་དུ་དཔལ་ལྡན་ལྷ་མོ་འཁོར་བཅས་ལ་འབུལ་རྒྱུའི་མཆོད་པ་ཉེར་སྤྱོད་དང་བསྲེགས་རྫས་ཀྱི་མཇུག་ཏུ་གཏོར་མ་འབུལ་ཚེ་གཏོར་མ་ཡང་བཤམས། མར་ཁུ་དང་། དགང་བླུགས་དང་། རྡོ་རྗེ་དྲིལ་བུ། ནང་མཆོད་དང་རཀྟ་གཉིས་ཀྱི་སྣོད་ཐོད་པ་ཁེབས་ལྡན་རྣམས་མདུན་དུ་བཞག་ཅིང་། མེ་གསོ་བའི་ཆས་དང་། ཐབ་ཀྱི་ཁ་ཁྱེར་ལ་འགོད་རྒྱུའི་ཀུ་ཤ་ཡང་སྟ་གོན་བྱས་ལ། རྫས་ཐམས་ཅད་ལ་བདུད་རྩི་རིལ་བུ་བཏབ་པའི་ནང་མཆོད་ཀྱིས་བྲན་པར་བྱ་ཞིང་། སློབ་དཔོན་གྱི་སྟན་ལ་འབྲུ་དཀར་གྱིས་པདྨ་དཀར་པོ་འདབ་མ་བརྒྱད་པ་བྲི་བར་བྱའོ།། དེ་ལྟར་ཆོ་གའི་ཡན་ལག་རྣམས་ཚོགས་པར་བྱས་ལ། སྔར་སྒྲུབ་ཐབས་སྒོམ་པའི་རྒྱུན་ཡིན་ན་དེས་ཆོག། མིན་ན་ནང་མཆོད་བྱིན་བརླབས་ནས་བཟུང་སྟེ་ཉེར་བསྡུའི་བར་བདག་བསྐྱེད་རྫོགས་པར་བསྒོམ་སྟེ། འཇམ་ཞིང་བདེ་བའི་སྟན་ཧ་ཅང་འཐོན་པོ་མ་ཡིན་པ་ལ་རྐང་པ་གཉིས་ཅུང་ཟད་བརྐྱང་ལ་རྐང་མཐིལ་གཉིས་སྦྱར་བ་པདྨའི་འདུག་སྟངས་ཀྱིས་ཁ་ཤར་ལ་ཕྱོགས་པར་འདུག་སྟེ། སྨྲ་བ་བཅད། རྡོར་དྲིལ་བྱིན་བརླབས་བྱས་པ་ནས་བཟུང་སྟེ་སྦྱིན་བསྲེགས་མ་ཚར་བར་ལག་པ་རྡོ་དྲིལ་དང་མ་བྲལ་བར་བྱ།     དེ་ནས་ཆོ་ག་དངོས་ལ་འཇུག་པ་ནི།   རྡོ་རྗེ་ནི་ཐབས་དང་། དྲིལ་བུ་ནི་ཤེས་རབ་སྟེ། དེ་གཉིས་ཀའང་དོན་དམ་པའི་བྱང་ཆུབ་ཀྱི་སེམས་ཀྱི་རང་བཞིན་ནོ།། སྙམ་དུ་བསམ་ལ། ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ། ཏིཥྛ་ཨེ་ཥ་སྟཾ། དྷ་ར་ཡ་མི་ཧི་ཧི་ཧི་ཧི་ཧི། ཧཱུཾ་ཧཱུཾ་ཧཱུཾ་ཕཊ་སྭཱཧཱ། ཞེས་བརྗོད་དེ་ལག་པ་གཡས་པའི་མཐེ་བོང་དང་མིང་མེད་ཀྱིས་ཐུགས་ཀར་རྡོ་རྗེ་བཟུང་། ཨོཾ་བཛྲ་གྷནྜ་ཧཱུཾ། ཞེས་བརྗོད་དེ་ལག་པ་གཡོན་པའི་མཐེ་བོང་དང་མིང་མེད་ཀྱིས་དྲིལ་བུ་གཡོན་གྱི་དཀུར་ཁ་གྱེན་ལ་བསྟན་ཏེ་བཟུང་། རྡོ་རྗེ་སེམས་དཔའ་ལ་སོགས་པ་རྣམས་མཉེས་པར་བྱའོ།། སྙམ་དུ་བསམ་ལ། ཧཱུཾ༑ སེམས་ཅན་རྨོངས་དང་བྲལ་བ་ཡི།། རྡོ་རྗེ་གསོར་བ་མཛེས་པ་ཡིས།། རྣམ་ཐར་ཆོས་ཀྱི་བྱ་

3B བ་སྟེ།། སྤྲོ་དང་བཅས་པས་རྡོ་རྗེ་བཟུང་།། ཧཱུཾ་ཧཱུཾ་ཧཱུཾ་ཧོ་ཧོ་ཧོཿ ཞེས་རྡོ་རྗེ་གསོར་བར་བྱའོ།། དེ་ནས་རྡོ་རྗེ་གཡས་པའི་དཀུར་བཟུང་བའམ་གསོར་ལ། ཨོཾ་བཛྲ་དྷརྨཱ་ར་ཎི་ཏ། པྲ་ར་ཎི་ཏ། སཾ་པྲ་ར་ཎི་ཏ། སརྦ་བུདྡྷ་ཀྵེཏྲ་པྲ་ཙ་ལི་ནི། པྲཛྙཱ་པ་ར་མི་ཏཱ། ན་ད་སྭ་བྷཱ་ཝེ། བཛྲ་སཏྭ་ཧྲི་ད་ཡ། སནྟོ་ཥ་ནི། ཧཱུཾ་ཧཱུཾ་ཧཱུཾ། ཧོ་ཧོ་ཧོ་སྭཱཧཱ། ཞེས་བརྗོད་ཅིང་དྲིལ་བུ་ནང་གི་ཕྱོགས་བརྒྱད་དུ་ལྕེ་བསྐྱོད་པས་དཀྲོལ་བར་བྱའོ།། དེ་ནས་ལག་པ་གཡས་པས་ལས་བུམ་གྱི་ཁ་རྒྱན་ནམ་ཀུ་ཤས་ལས་བུམ་གྱི་ཆུའམ་བསང་ཆུ་ནས་བླངས་ཏེ། ཐབ་དང་མཆོད་རྫས་སོགས་དང་རང་ལའང་རང་གི་གཡོན་ནས་བརྩམས་ཏེ་གཡས་སྐོར་དུ་བསང་གཏོར་ལན་གསུམ་བྱ་ཞིང་།   ལས་སྔགས་བརྗོད་པར་བྱའོ།། དེ་རྗེས་ལག་པ་གཡོན་པའི་མཐེབ་སྲིན་གྱིས་ནང་མཆོད་བླངས་ནས་ཀྱང་གཡས་སྐོར་དུ་ལན་གསུམ་བྱ་ཞིང་།   ལས་སྔགས་བརྗོད་པར་བྱའོ།། དེ་ནས་སླར་ཡང་མེ་ལྷའི་མཆོད་རྫས་རྣམས་ལ་ནང་མཆོད་གཏོར་ལ།   ལས་སྔགས་བརྗོད་ཅིང་། ཨོཾ་ཤཱུནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྟོང་པ་ཉིད་དུ་གྱུར། སྟོང་པའི་ངང་ལས་ཨ་ལས་བྱུང་བའི་ཐོད་པ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཧཱུཾ་ཧཱུཾ་ཞུ་བ་ལས་བྱུང་བའི་མཆོད་ཡོན། ཞབས་བསིལ། ཞལ་བསིལ། བསང་གཏོར། མེ་ཏོག། བདུག་སྤོས། མར་མེ། དྲི། ཞལ་ཟས། རོལ་མོ་ལ་སོགས་པ་རྣམས་རང་བཞིན་བདེ་སྟོང་། རྣམ་པ་མཆོད་རྫས། བྱེད་ལས་དབང་པོ་དྲུག་གི་སྤྱོད་ཡུལ་དུ་ཟག་པ་མེད་པའི་བདེ་བ་ཁྱད་པར་ཅན་བསྐྱེད་པར་གྱུར། ཨོཾ་ཨརྒྷཾ་ཨཱཿཧཱུཾ། དེ་བཞིན་དུ་ཨརྒྷཾ་གྱི་གནས་སུ། པཱདྱཾ། ཨཉྩ་མ་ཎཾ། པྲོཀྵ་ཎཾ། པུཥྤེ། དྷུ་པེ། ཨཱ་ལོ་ཀེ། གནྡྷེ། ནེ་ཝིདྱ། ཤཔྟ། རཱུ་པ། ཤཔྟ། གནྡྷེ།  ར་ས། སྤར་ཤ། རྣམས་བཅུག་སྟེ་ཕྱག་རྒྱ་དང་བཅས་པས་བྱིན་གྱིས་བརླབས། དེ་ནས་རྡོ་རྗེ་ཁུ་ཚུར་ལས་གུང་མོ་གཉིས་རྩེ་སྤྲད་དེ། ཡམ་ཤིང་དང་མར་ཁུ་སོགས་བསྲེགས་རྫས་རྣམས་ལ་རེག་པའམ་རེག་པར་མོས་ནས། ཨོཾ་ཨོཾ་སྭཱཧཱ། ཞེས་བརྗོད་དེ་རྫས་རྣམས་དཀྲུས་པར་བསམ། ཨོཾ་ཨཱཿསྭཱཧཱས་ཡམ་ཤིང་། ཨོཾ་ཤྲཱི་སྭཱཧཱས་མར་ཁུ། ཨོཾ་ཛྲིཾ་སྭཱཧཱས་འབྲུ། ཨོཾ་ཀུ་རུ་ཀུ་རུ་སྭཱཧཱ། དེ་དག་ལས་གཞན་པའི་རྫས་རྣམས་ཀྱི་མཚན་ཉིད་དང་མི་ལྡན་ 

4A པའི་ཉེས་སྐྱོན་ཐམས་ཅད་བྱང་ཞིང་དག་ནས་བདུད་རྩི་ལྔའི་ངོ་བོར་གྱུར་པར་བསམ། དེ་ནས་ཤིང་འོ་མ་ཅན་ལས་བྱུང་བའམ། གཙུབ་ཤིང་ལས་བྱུང་བའམ། མེ་ཐ་མལ་པའམ། དགོན་པའི་མེ་གང་ཡང་རུང་། ཨོཾ་ཨཱཿཧཱུཾ། ལན་གསུམ་བརྗོད་དེ་སྣོད་དུ་བཞག་ལ་ཞུན་མར་གྱི་སྒྲོན་མེ་སྤར་ཞིང་།   ལས་སྔགས་བརྗོད་ལ། བསང་ཆུ་དང་ནང་མཆོད་ཀྱིས་མེ་དེ་ལ་གཡས་སྐོར་དུ་ལན་གསུམ་གསུམ་བསང་ངོ་།། དེ་ནས་སྒྲོན་མེ་དེ་གཙང་ཞིང་ཤིན་ཏུ་སྐམ་པའི་རྩྭའི་ཆུན་པོ་དང་བཅས་པས་ཐབ་ཀྱི་ནང་དུ་འཇུག་ལ།   ཨོཾ་བཛྲ་ཛྭ་ལ་ཛྭ་ལ་ཧཱུཾ། ཞེས་བརྗོད་ཅིང་གཟི་བརྗིད་བསྐྱེད།  ཧཱུཾ༑ ཞེས་བརྗོད་ཅིང་རླུང་གཡབ་ཀྱིས་མེ་སྦར།   ལས་སྔགས་བརྗོད་ལ། མར་ཁུ་བླུགས་གཟར་བདུན་གྱིས་ཀྱང་མེ་གསོ། དེ་ནས་ཀུ་ཤ་རྣམས་ལག་པས་བཟུང་ལ།   ཨོཾ་བཛྲ་སཏྭ་ཨཱཿ ཞེས་བདུན་བརྗོད་ལ་ཀུ་ཤ་བྱིན་གྱིས་བརླབས། དེ་ནས།  ཨོཾ༑ ཀུ་ཤ་འདི་ནི་གཙང་ཞིང་དགེ། ཚངས་པ་ལྷ་རྣམས་དག་བྱེད་ཡིན།། དཀོན་མཆོག་གསུམ་པོ་མཉེས་བྱེད་པ།། ས་ལས་སྐྱེས་པའི་འདབ་མའི་སྙིང་།། བདག་གི་བགེགས་རྣམས་ཐམས་ཅད་ནི།། ཞི་དང་བཀྲ་ཤིས་མཛད་དུ་གསོལ།། ཞེས་བརྗོད་ནས་ཀུ་ཤ་སྔོ་ལྗང་དྲི་མ་མེད་པ་མ་གས་ཤིང་འདབ་མ་མ་གྲུག་པ་ཧ་ཅང་ཡང་མི་རིང་བ་གཉིས་གཉིས་རྩེ་མོ་གཤིབས་པ་རང་གི་གཡོན་ངོས་ནས་བརྩམས་ཏེ་ཐབ་ཀྱི་ཁ་ཁྱེར་ལ་རང་ཁ་གང་དུ་བལྟས་པའི་ངོས་ལ་ཤར་དུ་བྱས་པའི་ལུགས་ཀྱིས། རྩེ་མོ་ཤར་དང་ལྷོ་དང་ནུབ་དང་བྱང་དུ་བསྟན་ལ། སྔ་མའི་རྩེ་མོས་ཕྱི་མའི་རྩ་བ་ནོན་པར་འགྲམ་ཞིང་། ཐབ་ཁུང་དུ་རྩེ་མོ་ཤར་དུ་བསྟན་པའི་ཀུ་ཤ་བ་ལང་གི་རྣ་བ་ལྟ་བུ་ཧ་ཅང་ཡང་མི་རིང་བས་གཡོག་གོ། ཀུ་ཤ་བཀོད་ཚར་བ་དང་རྡོར་དྲིལ་འཛིན་པའི་ལག་པ་ཐལ་མོ་སྦྱར་ཏེ།   བཅོམ་ལྡན་འདས་རྡོ་རྗེ་སེམས་དཔའ་བགེགས་ཐམས་ཅད་ཞི་བ་དང་བཀྲ་ཤིས་པར་མཛད་དུ་གསོལ། ཞེས་གསོལ་བ་བཏབ་སྟེ། དེ་དག་ནི་སྦྱོར་བའི་ཆོ་གའོ།།  དངོས་གཞིའི་ཆོ་ག་ལ། བསང་ཆུས་ཐབ་བསངས་ཏེ།   ལས་སྔགས་བརྗོད། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ། ཐབ་སྟོང་པ་ཉིད་དུ་གྱུར། སྟོང་པའི་ངང་ལས་ཧཱུཾ་ལས་བྱུང་བའི་ཡེ་ཤེས་ཀྱི་ཐབ་ཁ་དོག་དཀར་ཞིང་དབྱིབས་ཟླུམ་པ། མུ་རན་ཁ་ཁྱེར་དང་བཅས་པ། ཁ་

4B ཁྱེར་ལ་རྡོ་རྗེའི་ཕྲེང་བ་དང༌། གྲྭ་བཞིར་ཟླ་ཕྱེད་རྡོ་རྗེས་མཚན་པ། དྭངས་ཤིང་ཐོགས་པ་མེད་པར་གྱུར། ཐབ་ཀྱི་ནང་དུ་རཾ་ལས་སྐྱེས་པའི་མེ་གྲུ་གསུམ་པའི་དབུས་སུ། སྣ་ཚོགས་པདྨའི་ལྟེ་བར་རཾ་ལས་མེ་ལྷ་སྐུ་མདོག་དཀར་པོ། ཞལ་གཅིག་ཕྱག་གཉིས་ཀྱིས་བགྲང་ཕྲེང༌དང་སྤྱི་བླུགས་འཛིན་པས་བཞུགས་པར་གྱུར། རང་ལྷར་གསལ་བའི་ཐུགས་ཀའི་ཧཱུཾ་གི་འོད་ཟེར་གྱིས་ཡེ་ཤེས་པ་སྤྱན་དྲངས།   ཨོཾ༑ ཚུར་བྱོན་ཚུར་བྱོན་འབྱུང་པོ་ཆེ།། ལྷ་ཡི་དྲང་སྲོང་བྲམ་ཟེ་མཆོག། སྲེག་བླུགས་ཞལ་ཟས་བཞེས་སླད་དུ།། འདིར་ནི་ཡང་དག་བསྙེན་པར་མཛོད།།   ཨོཾ་ཊཀྐི་ཧཱུཾ་ཛཿ ཐབ་ཀྱི་མེ་མཚམས་ཀྱི་ཁ་ཁྱེར་གྱི་ཀུ་ཤའི་གདན་ལ་བཞུགས་པར་གྱུར། ལས་སྔགས་ཀྱིས་ཕྱི་འབྲང་གི་བགེགས་བསྐྲད། འོག་ནས་འབྱུང་བར་ལྟར་གྱི་ཆུ་བཞི་ཕུལ་ཏེ།  ཛཿཧཱུཾ་བཾ་ཧོཿ དམ་ཚིག་པ་དང་གཉིས་སུ་མེད་པར་གྱུར། དེ་ནས། ཨོཾ་ཨཱཿཧྲཱིཿཔྲ་ཝ་ར་སདྐ་རཾ་པྲོཀྵ་ཎཾ་པྲ་ཏཱིཙྪ་ཧཱུཾ་སྭཱཧཱ། ཞེས་པས་ཀུ་ཤའི་ཆུན་པོས་ཞལ་བསིལ་གྱི་སྣོད་ནས་བཟེད་ཞལ་དང་པོར་ལན་གསུམ་བསང་གཏོར་འབུལ།  སྣོད་དེ་ཉིད་ནས་མཛུབ་མོས་མེ་ཏོག་བླངས་ཏེ། ཁུ་ཚུར་འོག་ཏུ་བསྟན་པ་མཐེའུ་ཆུང་ནས་རིམ་བཞིན་དགྲོལ་བའི་ཕྱག་རྒྱ་དང་། སྔར་གྱི་པྲོཀྵ་ཎཾ་གྱི་གནས་སུ། ཨཉྩ་མ་ཎཾ། ཞེས་པ་བཅུག་ལ་བཟེད་ཞལ་དང་པོར་ཞལ་བསིལ་དང་། རྡོ་རྗེ་སྙིམ་པ་ཁ་ཕྱེ་བའི་ཕྱག་རྒྱ་དང་། ཨརྒྷཾ། ཞེས་སྦྱར་བས་བཟེད་ཞལ་གཉིས་པར་མཆོད་ཡོན་དང་། ཁུ་ཚུར་བཅིངས་ནས་ཆུ་ནང་ནས་མེ་ཏོག་བླངས་ནས་ལན་གསུམ་བསྐོར་ཏེ། ཁུ་ཚུར་ཁ་གྱེན་དུ་བསྟན་པའི་མཛུབ་མོ་ནས་རིམ་གྱིས་དགྲོལ་བའི་ཕྱག་རྒྱ་དང་། པཱདྱཾ། ཞེས་སྦྱར་བས་བཟེད་ཞལ་གསུམ་པར་ཞབས་བསིལ་དབུལ་ཞིང་།   ཨོཾ་ཨགྣ་ཡེ་ཨཱ་དི་བྱཱ་ཨཱ་དི་བྱཱ་ཨཱ་བི་ཤ་ཨཱ་བི་ཤ་མཧཱ་ཤྲཱི་ཡེ་ཧ་བྱ་ཀ་བྱ་བཱ་ཧཱ་ནཱ་ཡ་བཛྲ་པུཥྤེ་ཨཱཿཧཱུཾ། དེ་བཞིན་དུ་སྦྱར་ཏེ། བཱ་ཧཱ་ནཱ་ཡ་བཛྲ་ཤཔྟ་ཨཱཿཧཱུཾ།   ཨོཾ་ཨགྣ་ཡེ་ ཞེས་པ་ནས། བཱ་ཧཱ་ནཱ་ཡ། ཨོཾ་ཨཱཿཧཱུཾ། ཞེས་པས་ཉེར་སྤྱོད་རོལ་མོ་ནང་མཆོད་དབུལ། དྲིལ་སྟབས་དང་བཅས་པས།  འཇིག་རྟེན་དབང་ཕྱུག་ཚངས་དབང་མགོན་གྱི་སྲས།། མ་ལྷའི་རྒྱལ་པི་ཊཀྐིས་དབང་བསྐུར་བ།། ཤེས་རབ་མཆོག་ 

5A གིས་ཉོན་མོངས་ཐམས་ཅད་བསྲེགས།། འཛིན་བྱེད་མེ་ལྷ་ཉིད་ལ་རྣམ་པར་འདུད།། ཚངས་པ་འཇིག་རྟེན་མགོན་གྱི་སྲས།། མེ་ལྷའི་རྒྱལ་པོ་དྲང་སྲོང་མཆོག། འབྱུང་པོ་ཡོངས་སུ་བསྐྱབ་པའི་ཕྱིར།། ཐུགས་རྗེའི་དབང་གིས་སྐུ་སྤྲུལ་བ།། རིག་སྔགས་གྲུབ་པའི་དྲང་སྲོང་ཚུལ།། ཉོན་མོངས་བསྲེགས་པའི་ཤེས་རབ་འོད།། བསྐལ་པའི་མེ་བཞིན་གཟི་བརྗིད་འབར།། མངོན་ཤེས་རྫུ་འཕྲུལ་ཞབས་དང་ལྡན།། ཐབས་ཀྱི་སྤྲུལ་པའི་ཐེག་པ་བཅིབས།། རིག་སྔགས་གསུངས་ཤིང་བགྲང་འཕྲེང་འཛིན།། བདུད་རྩིའི་བཅུད་ལྡན་གྷུཎྜི་བསྣམས།། ཆོས་ཀྱི་བདུད་རྩི་ཡོངས་ལ་བསིལ།། ཉེས་པའི་སྐྱོན་བྲལ་ཚངས་པར་སྤྱོད།། འཇིག་རྟེན་གནས་ཀྱང་མྱ་ངན་འདས།། ཞི་བ་བརྙེས་ཀྱང་ཐུགས་རྗེ་ཅན།། དེ་བས་བསྟོད་དེ་ཕྱག་ཀྱང་འཆལ།། ཞེས་པས་བསྟོད།   ཨོཾ་བཛྲ་ཨ་ན་ལ་མཧཱ་བྷཱུ་ཏ་ཛྭ་ལ་ཛྭ་ལཱ་ཡ། སརྦ་བྷསྨི་ཀུ་རུ། སརྦ་དུཥྚཾ་ཧཱུཾ་ཕཊ། ཏྲི་ཤྱ་ཛཿཧཱུཾ་བཾ་ཧོཿ ས་མ་ཡ་སྟྲཾ། ས་མ་ཡ་ཧཾ། (ཞེས་ལན་གསུམ་གྱིས་དམ་ཚིག་བསྒྲག་གོ། དེ་ནས།)   མེ་ལྷའི་ལྗགས་རྡོ་རྗེའི་རྣམ་པ་ཅན་དཀར་པོ་ལ་རཾ་ཡིག་དང་། དགང་བླུགས་ཀྱི་ཁ་ལ་བྷྱོཿཡིག་འོད་ཟེར་འབར་བ་དང་བཅས་པས་མཚན་པར་གྱུར་(པར་བསམ། ལག་པ་གཡོན་པའི་ཁུ་ཚུར་བཅིངས་པའི་སྟེང་ནས་མཐེ་བོང་བཀབ་པ་དེ་བཞིན་གཤེགས་པའི་ཁུ་ཚུར་བྱས་པའི་མཛུབ་མོ་བརྐྱངས་པ་གན་རྐྱལ་དུ་བྱས་པས་དགང་གཟར་མར་གྱིས་བཀང་བ་བཟུང༌། གཡས་པ་ཡང་དེ་བཞིན་གཤེགས་པའི་ཁུ་ཚུར་བྱས་པ་ཁ་ཐུར་དུ་སྦུབ་ལ་བླུགས་གཟར་གྱི་ཡུ་བ་བཟུང་སྟེ། གཡོན་པའི་མཛུབ་མོའི་ཐད་ཀར་གཡས་པའི་ཁུ་ཚུར་བཞག་སྟེ། དགང་གཟར་གྱི་ཁར་བླུགས་གཟར་གྱི་མགོ་བཞག་ནས་འཛིན་པ་བྱང་ཆུབ་མཆོག་གི་ཕྱག་རྒྱས་ལག་པ་གཉིས་པུས་མོའི་ནང་ནས་ཕྱིར་མི་འདའ་བར་གཡས་སུ་བསྐོར་ཏེ། མེ་ལྷའི་ཞལ་ཅུང་ཟད་གདངས་བར། དགང་བླུགས་གསུམ་མམ་བདུན་མེ་ལྷའི་སྔགས་ལ་སྤེལ་ཚིག་བཏགས་པ་དབུལ་ཏེ།)  ཨོཾ་ཨགྣ་ཡེ་ཨཱ་དི་བྱཱ་ཨཱ་དི་བྱཱ་ཨཱ་བི་ཤ་ཨཱ་བི་ཤ་མཧཱ་ཤྲཱི་ཡེ་ཧ་བྱ་ཀ་

5B བྱ་བཱ་ཧཱ་ནཱ་ཡ། བདག་ཅག་དཔོན་སློབ་འཁོར་དང་བཅས་པས་ཐམས་ཅད་མཁྱེན་པ་སྒྲུབ་པ་ལ་བར་དུ་གཅོད་པ་དང༌། སྡོམ་པ་གསུམ་དང་འགལ་བའི་བཅས་པ་དང༌། རང་བཞིན་གྱི་ཁ་ན་མ་ཐོ་བ་དང༌། ཁྱད་པར་དུ་ཡང་དཔལ་ལྡན་ལྷ་མོའི་སྐུ་གསུང་ཐུགས་དང་འགལ་བའི་དམ་ཚིག་ཉམས་ཆག་དང་འཁོན་གྲིབ་སོགས་བཀྲ་མི་ཤིས་པ་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ། (ཞེས་པ་དང༌། སྐབས་འདིར་མེ་ལ་བགེགས་ཡོད་མེད་བརྟགས་ནས། ཡོད་ན་སེལ་ཐབས་སྦྱིན་བསྲེགས་ཀྱི་ཆོ་ག་ཆེན་མོར་གསུངས་པ་ལྟར་བྱ། དེ་ནས་དྲི་ཞིམ་ཞིང་ཚེར་མ་མེད་པའི་འོ་མ་ཅན་གྱི་ཤིང་གི་རྩེ་མོའི་ཕྱོགས་སྲིད་དུ་སོར་བཅུ་གཉིས་པ། སྦོམས་སུ་མཐེའུ་ཆུང་གི་ཚད། ལོ་མ་མ་རྙིང་པ། རླན་དང་བཅས་པ། མཉམ་པོར་བཅད་ཅིང་མ་གས་པ། རྩེ་མོ་གཉིས་མར་དང་སྦྲང་རྩིས་བྱུགས་པ། གཉིས་གཉིས་སྦྱར་བའམ། ཡང་ན་རྐྱང་པས་ཀྱང་རུང་སྟེ་ལག་པ་གཡས་པའི་མཐེབ་སྲིན་གྱིས་མཆོག་སྦྱིན་གྱི་ཕྱག་རྒྱས་རྩེ་མོ་ལྷ་ལ་བསྟན་ནས་དབུལ་ཞིང༌།)  ཡམ་ཤིང་རྣམས་བྱང་ཆུབ་ཀྱི་ཤིང་གི་རང་བཞིན་དུ་གྱུར།  ཨོཾ་ཨགྣ་ཡེ་ཨཱ་དི་བྱཱ་ཨཱ་དི་བྱཱ་ཨཱ་བི་ཤ་ཨཱ་བི་ཤ་མཧཱ་ཤྲཱི་ཡེ་ཧ་བྱ་ཀ་བྱ་བཱ་ཧཱ་ནཱ་ཡ། ཨོཾ་བོ་དྷི་བྲིཀྵ་ཡ། བདག་ཅག་དཔོན་སློབ་(ཅེས་པ་ནས།) བཀྲ་མི་ཤིས་པ་ཐམས་ཅད་དང་། ཁྱད་པར་དུ་ཡང་གཟི་བརྗིད་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ། (དེ་ནས་མར་ཁུ་ཕུལ།)  ཨོཾ་ཨགྣ་ཡེ་(ཞེས་པ་ནས།) བཱ་ཧཱ་ནཱ་ཡ། ཨོཾ་ཨགྷྣ་ཡེ། བདག་ཅག་དཔོན་སློབ་(ཅེས་པ་ནས།) བཀྲ་མི་ཤིས་པ་དང་། འབྱོར་པ་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ།  (དེ་ནས་ཏིལ་ལ།) ཨོཾ་ཨགྣ་ཡེ་(ཞེས་པ་ནས།) བཱ་ཧཱ་ནཱ་ཡ། ཨོཾ་སརྦ་པཱ་པཾ་ད་ཧ་ན་བཛྲ་ཡ། བདག་ཅག་དཔོན་སློབ་(ཅེས་པ་ནས།) བཀྲ་མི་ཤིས་པ་དང་། སྡིག་པ་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ།  (དེ་ནས་དུར་བ་གཉིས་གཉིས་སྦྱར་ནས་དབུལ་ཞིང་།) ཨོཾ་ཨགྣ་ཡེ་(ཞེས་པ་ནས།) བཱ་ཧཱ་ནཱ་ཡ། ཨོཾ་བཛྲ་ཨ་ཡུ་ཥེ། བདག་ཅག་དཔོན་སློབ་(ཅེས་པ་ནས།) བཀྲ་མི་ཤིས་པ་དང་། ཚེ་མཐར་ཕྱིན་པ་ལ་བར་དུ་གཅོད