༤༽ སྨོན་འཇུག་གི་ཆོ་གའི་ཁྱད་པར་ལ་དཔྱད་པ།
༈ དེ་ཡང་བོད་སྔ་མ་མང་པོས། བྱང་སྡོམ་གྱི་བརྒྱུད་པ་ལ་དབུ་མ་ལུགས་དང་སེམས་ཙམ་ལུགས་ཞེས་ལུགས་མི་འདྲ་བ་གཉིས་སུ་བྱས་ནས་སྡོམ་པ་བླང་ཡུལ་བཤེས་གཉེན་གྱི་ཁྱད་པར་དང་། ལེན་པ་པོ་སློབ་མའི་ཁྱད་པར། བླང་བའི་ཆོ་ག །བསྲུང་བྱའི་ཚུལ་ཁྲིམས་ཀྱེ་གྲངས། ཉམས་ན་ཕྱིར་བཅོས་ཚུལ་བཅས་ཐམས་ཅད་མི་མཐུན་པར་བཞེད། རྗེ་ཙོང་ཁ་པ་ཡབ་སྲས་ནི་སྡོམ་པ་འབོགས་པའི་ཆོ་ག་ཅུང་ཟད་མི་འདྲ་བ་ཙམ་ཁྱད་པར་ཆེར་ཡོད་པར་མི་བཞེད་ཅིང་། བཞེད་ཚུལ་སྔ་མ་ལ་དགག་པ་ཡང་མཛད་པ་འོག་ནས་འབྱུང་བ་ལྟར་རོ༎ དེ་ལ་བརྟེན་ནས་པཎ་ཆེན་ཤཱཀ་མཆོག་པས་གོང་མའི་བཞེད་པ་སྐྱོང་བའི་ཕྱིར་དུ་སྨོན་འཇུག་གི་ཆོ་གའི་ཁྱད་པར་ལ་དཔྱད་པ་མཛད་པ་ན། ལུང་རིགས་རོལ་མཚོར། (གྲགས་ཆེན་་བཅོ་བརྒྱད་ལས། ཤེར་ཕྱིན་སྐོར། རྣམ་བཤད་ལུང་རིགས་རོལ་མཚོ། པཎ་ཆེན་ཤཱཀྱ་མཆོག་ལྡན། ༢༢༡་༡༧)
གཉིས་པ་དེ་ལ་གཞན་གྱིས་བཏགས་པའི་མཐའ་སེལ་བ་ནི། བོད་ཕྱི་མ་ཁ་ཅིག་ན་རེ།ཞེས་སོགས་ཀྱིས་སྤྱིར་རྗེ་ཙོང་ཁ་པ་ཆེན་པོའི་གསུང་བྱང་སའི་ཚུལ་ཁྲིམས་ལེའུའི་རྣམ་བཤད་བྱང་ཆུབ་གཞུང་ལམ་དང་། ལྷག་པར་མཁས་གྲུབ་ཆོས་རྗེའི་གསུང་སྡོམ་གསུམ་རྣམ་བཞག་ཐུབ་བསྟན་བྱི་དོར་ནས་གསུངས་པ་རྣམས་གཞུང་ཚིག་ཕལ་ཆེར་བཀོད་པས་དེ་ཉིད་ཕྱོགས་སྔ་བླངས་ནས། དེའི་རྗེས་སུ་དེ་དག་ལ་དགག་པ་རྒྱས་པར་མཛད་དོ༎
དེ་ལ་ཐོག་མར་རྗེ་བླ་མའི་བཞེད་པ་འགོད་པ་ནི། གཞུང་ལམ་ (རྗེ་ཙོང་ཁ་པའི་བཀའ་འབུམ་དཔེ་བསྡུར་མ།༢༠༢༠ པོད་ཀ་པ། བྱང་སའི་ཚུལ་ཁྲིམས་ལེའུའི་རྣམ་བཤད་བྱང་ཆུབ་གཞུང་ལམ། ༤༡༡་༡༠) ལས།
འཕགས་པ་ཀླུ་སྒྲུབ་དང་འཕགས་པ་ཐོགས་མེད་གཉིས་ཆོ་གའི་ཁྱད་པར་འགའ་ཞིག་མི་འདྲ་བ་མ་གཏོགས་པ་སྡོམ་པ་འཐོབ་པའི་ཆོ་ག་ལ་དོན་ལ་ཁྱད་པར་མེད་དོ༎ དེས་ན་ལུགས་དེ་གཉིས་ལ་དབུ་མའི་ལུགས་དང་སེམས་ཙམ་ལུགས་ཀྱི་ཐ་སྙད་བྱས་ནས། བླང་བའི་ཡུལ་དང་། ལེན་པའི་ཆོ་ག་དང་། རྩ་ལྟུང་མི་མཐུན་པར་སྨྲ་བ་ནི་མ་བརྟགས་པ་ཆེན་པོའོ༎
ཞེས་དགག་་པ་རྒྱས་པར་མ་མཛད་པར་མི་འཐད་པར་ཕྱོགས་ཙམ་གསུངས་ལ། དེ་ལ་བརྟེན་ནས་མཁས་གྲུབ་རྗེས་འགོག་པར་མཛད་པ་ན་དོན་ཚན་དྲུག་ཏུ་ཕྱེ་སྟེ་ཕྱོགས་སྔ་མ་རྒྱས་པར་བཀོད་ནས་རེ་རེ་ཞིང་འགོག་པར་མཛད་དེ། བྱི་དོར་ (མཁས་གྲུབ་རྗེའི་གསུང་འབུམ་དཔེ་བསྡུར་མ།༢༠༢༠ ཁ་པ། སྡོམ་གསུམ་རྣམ་བཞག་ཐུབ་བསྟན་བྱི་དོར། ༤༩༠་༨) ལས།
གངས་རིའི་ཁྲོད་འདིར་བླ་མ་སྔ་མ་མང་པོ་ཞིག་གི་ལུགས་ཀྱིས་སྲོལ་ཆེན་པོ་གཉིས་སུ་སྨྲ་སྟེ། ཐེག་པ་ཆེན་པོ་སེམས་ཙམ་པའི་ལུགས་དང༌། དབུ་མ་པའི་ལུགས་སོ༎ དང་པོ་ནི། བྱང་ཆུབ་སེམས་དཔའི་སྡེ་སྣོད་འགའ་ཞིག་གི་རྗེས་སུ་འབྲངས་ནས།འཕགས་པ་བྱམས་པའི་གསུང༌། སློབ་དཔོན་ཐོགས་མེད་ལས་བརྒྱུད་པ། སློབ་དཔོན་ཙནྡྲ་གོ་མིའི་རྗེས་སུ་འབྲངས་ནས་ཇོ་བོ་རྗེ་ལ་སོགས་པའི་ཕྱག་ལེན། དགེ་བའི་བཤེས་གཉེན་བཀའ་གདམས་པས་མཛད་པ་དེ་ཡིན་ལ། ཐེག་པ་ཆེན་པོ་དབུ་མ་པའི་སེམས་བསྐྱེད་ནི། མདོ་སྡེ་སྡོང་པོ་བཀོད་པ་དང་ནམ་མཁའི་སྙིང་པོའ་རྗེས་སུ་འབྲངས་ནས། འཕགས་པ་འཇམ་དཔལ་གཞོན་ནུར་གྱུར་པའི་ ིགསུང་སློབ་དཔོན་འཕགས་པ་ཀླུ་སྒྲུབ་ལ་སོགས་པ་ལས་བྱུང་བ། སློབ་དཔོན་ཞི་བ་ལྷའི་རྗེས་སུ་འབྲངས་ནས། སློབ་དཔོན་ཛེ་ཏ་རི་དང་ཇོ་བོ་བུ་ཎྱ་ཤྲཱི་ལ་སོགས་པ་ལས་བརྒྱུད་པ་ཕྱག་ལེན་དུ་མཛད་པ་འདི་ཡིན་ནོ༎ འདི་གཉིས་ལ་ལྟ་བའི་ཁྱད་པར་བཞིན་དུ་སྤྱོད་པ་ལ་ཡང་ཁྱད་པར་ཡོད་དེ། དེ་ཡང་བླང་བར་བྱ་བའི་ཡུལ་མི་འདྲ། ལེན་པའི་གང་ཟག་མི་འདྲ། བླང་བའི་ཆོ་ག་མི་འདྲ། བླངས་ནས་བསྲུང་ཚུལ་མི་འདྲ། ཉམས་ན་ཕྱིར་བཅོས་ཚུལ་མི་འདྲའོ༎
ཞེས་སོགས་རྒྱ་ཆེར་གསུངས་སོ༎ གཞུང་གཉིས་སུ་དོན་ཚན་གཉིས་པ་མན་ཆད་གྱི་ཚན་དགག་པ་དང་དགག་ལན་ཚང་མ་འདྲེས་ནས་ཚན་པ་སོ་སོར་མཚམས་བཅད་མེད་པས། འདིར་དགག་བཞག་སྤོང་གསུམ་ལ་འཇུག་པ་བདེ་བའི་ཕྱིར་བྱི་དོར་ལས་གསུངས་པའི་དོན་ཚན་དྲུག་སོ་སོར་ཕྱོགས་སྔའི་འདོད་པ་དང་། དེའི་དགག་པ། དེ་ལ་པཎ་ཆེན་གསེར་མདོག་ཅན་པས་དགག་པ། ཡང་དེ་ལ་ཁོ་བོས་རྩོད་སྤོང་རྣམས་དཀྱུས་གཅིག་འགོད་པར་བྱའོ༎
དེ་ལ་དང་པོ་སྡོམ་པ་བླང་བའི་ཡུལ་གྱི་ཁྱད་པར་ལ། ཕྱོགས་སྔའི་འདོད་པ་བརྗོད་པ་ནི། བྱི་དོར་ (༤༩༠་༡༩) ལས།
དང་པོ་ནི། མགོན་པོ་བྱམས་པས། བཤེས་གཉེན་དུལ་བ་ཞི་བ་ཉེར་ཞི་བ༎ ཞེས་སོགས་གསུངས་པའི་མཚན་ཉིད་དང་ལྡན་པ་དང༌། སློབ་དཔོན་ཀླུ་སྒྲུབ་ཀྱིས། ཆོག་ཤ ེས་སྙིང་རྗེ་ཚུལ་ཁྲིམས་ལྡན༎ ཉོན་མོངས་སེལ་བའི་ཤ ེས་རབ་ཅན༎ ཞེས་གསུངས་པ་དང་ལྡན་པའོ༎
ཞེས་རྒྱན་དང་རིན་ཆེན་ཕྲེང་བ་གཉིས་ལས་གསུངས་པའི་བཤེས་གཉེན་གྱི་མཚན་ཉིད་བསྟན་པའི་གཞུང་ཚིག་རྣམས་སྔ་མ་སེམས་ཙམ་ལུགས་དང་། ཕྱི་མ་དབུ་མ་ལུགས་ཀྱི་བྱང་སྡོམ་བླང་ཡུལ་གྱི་བླ་མའི་མཚན་ཉིད་བསྟན་པར་ཕྱོགས་སྔར་བཀོད་དོ༎ འོན་ཀྱང་ལུང་རིགས་རོལ་མཚོར་རང་ལུགས་བཞག་པ་ན་ནི། གོང་གི་གཞུང་ཚིག་དེ་དག་མ་དྲངས་པར་སྡོམ་པ་ཉི་ཤུ་པ་དང་། སྤྱོད་འཇུག་གི་གཞུང་ཚིག་བཀོད་ནས་ལུགས་ཀྱི་བླ་མའི་མི་འདྲ་བར་སྒྲུབ་སྟེ། དེ་ཉིད་ (༢༡༧་༨) ལས།
དང་པོ་ཇི་སྐད་དུ། (སྡེ་བསྟན། སེམས་ཙམ། ཧི་པ། བྱང་ཆུབ་སེམས་དཔའི་སྡོམ་པ་ཉི་ཤུ་པ། སློབ་དཔོན་ཙན་དྲ་གོ་མི། ༡༦༦ བ ༢) བླ་མ་སྡོམ་ལ་གནས་ཤིང་མཁས། །ནུས་དང་ལྡན་ལས་བླང་བར་བྱ། །ཞེས་དང་། (སྡེ་བསྟན། དབུ་མ། ལ་པ། བྱང་ཆུབ་སེམས་དཔའི་སྤྱོད་པ་ལ་འཇུག་པ། སློབ་དཔོན་ཞི་བ་ལྷ། ༡༤ ན ༥) རྟག་པར་དགེ་བའི་བཤེས་གཉེན་ནི། །ཞེས་སོགས་ཀྱི་ཁྱད་པར་ལས་དང་།
ཞེས་གསལ་ལོ༎ དེ་ནི་ཕྱོགས་སྔ་མས་ཁུངས་སུ་མ་དྲངས་པ་ཞིག་མཁས་གྲུབ་རྗེས་བཀོད་པ་མ་ཡིན་གྱི། མཁས་གྲུབ་རྗེས་དེ་ལྟར་བཀོད་པའི་རྗེས་སུ་ཤཱཀ་མཆོག་པས་བཀོད་པ་ཡིན་ལ། དེ་ཡང་མཁས་པ་སྔ་མས་ཁུངས་སུ་དྲངས་པ་རྣམས་ཀྱིས་ཅུང་ཟད་མ་འདངས་པར་གཟིགས་ནས་ཁུངས་གཉིས་པ་ཞིག་གསར་དུ་བཀོད་དམ་སྙམ་པ་བློ་དམན་གྱི་རྣམ་རྟོག་ལ་འཆར་རོ༎
དེ་དག་ལ་མཁས་གྲུབ་ཆོས་རྗེས་འགོག་ཚུལ་ནི། བྱི་དོར་ (༤༩༣་༡༡) ལས།
ལུགས་འདི་ནི་ཤ ིན་ཏུ་ལེགས་པ་མ་ཡིན་ཏེ། རྣམ་པར་དཔྱད་ན་ལྷག་མ་མ་ལུས་པར་འཇིག་པར་འགྱུར་བས། བརྟག་ཅིང་དཔྱད་པའི་དཔུང་ཅུང་ཟད་ཀྱང་མི་བཟོད་པའི་ཕྱིར་རོ༎ དེ་ཡང་འདི་ལྟར། དང་པོ་ཁོ་ནར་བླང་བའི་ཡུལ་མི་འདྲ་བའི་ཚུལ་སྨྲས་པ་དེ་མི་འཐད་དེ། ལུང་(རྒྱན་དང་རིན་ཕྲེང་།)དེ་གཉིས་ཚིག་ཐ་དད་པ་ཙམ་དུ་ཟད་ཀྱི། ཚིག་གཉིས་ཀྱིས་བསྟན་པའི་དགེ་བའི་བཤེས་གཉེན་གྱི་མཚན་ཉིད་ཅུང་ཟད་རྒྱས་བསྡུས་མ་གཏོགས་དོན་གཅིག་ཏུ་སྣང་བའི་ཕྱིར་རོ༎
ཞེས་སོ༎
དེ་ལ་ལུང་གཉིས་པོའི་ཚིག་དོན་ཤེས་པ་གལ་ཆེ་ལ། དེ་ཡང་ལུང་དང་པོ་ནི། མདོ་སྡེ་རྒྱན་གྱི་གཞུང་ཚིག་ཡིན་ཏེ། ཇི་སྐད་དུའང་དེ་ཉིད་ (སྡེ་བསྟན། སེམས་ཙམ། ཕི་པ། ཐེག་པ་ཆེན་པོ་མདོ་སྡེའི་རྒྱན། འཕགས་པ་བྱམས་པ། ༢༥ བ ༢) ལས།
བཤེས་གཉེན་དུལ་བ་ཞི་ཞིང་ཉེར་ཞི་བ། །ཡོན་ཏན་ལྷག་པ་བརྩོན་བཅས་ལུང་གིས་ཕྱུག །དེ་ཉིད་རབ་ཏུ་རྟོགས་པ་སྨྲ་མཁས་ལྡན། །བརྩེ་བའི་བདག་ཉིད་སྐྱོ་བ་སྤངས་ལ་སྟེན། །
ཞེས་སོ༎ དེའི་དོན་ནི། དབྱིག་འགྲེལ་ (སྡེ་བསྟན། སེམས་ཙམ། ཕི་པ། མདོ་སྡེའི་རྒྱན་གྱི་བཤད་པ། སློབ་དཔོན་དབྱིག་གཉེན། ༢༡༢ ན ༤) ལས།
བསྟེན་པའི་རྟེན་ནི་ཡོན་ཏན་དེ་ལྟ་བུ་དང་ལྡན་པའི་བཤེས་གཉེན་ཡིན་ཏེ། དུལ་བ་ནི། ཚུལ་ཁྲིམས་དང་ལྡན་པའི་ཕྱིར་དབང་པོ་དུལ་བས་སོ༎ ཞི་བ་ནི། ཏིང་ངེ་འཛིན་དང་ལྡན་པའི་ཕྱིར་སེམས་ནང་དུ་ཞི་བར་གནས་པས་སོ། །ཉེ་བར་ཞི་བ་ནི། ཤེས་རབ་དང་ལྡན་པའི་ཕྱིར་ཉོན་མོངས་པ་ཉེ་བར་གནས་པ་ཉེ་བར་ཞི་བས་སོ༎ ཡོན་ཏན་ལྷག་པ་ནི། མཉམ་པའམ་ཆུང་བ་མ་ཡིན་པའོ༎ བརྩོན་པ་དང་བཅས་པ་ནི། གཞན་གྱི་དོན་ལ་གཡེང་བ་མ་ཡིན་པའོ༎ ལུང་གིས་ཕྱུག་པ་ནི། ཐོས་པ་ཉུང་ངུ་མ་ཡིན་པའོ༎ དེ་ཁོ་ན་ཉིད་རབ་ཏུ་རྟོགས་པ་ནི། དེ་ཁོ་ན་ཉིད་ཁོང་དུ་ཆུད་པའི་ཕྱིར་རོ༎ སྨྲ་མཁས་པ་དང་ལྡན་པ་ནི། སྨྲ་མཁས་པ་དང་ལྡན་པའོ༎ བརྩེ་བའི་བདག་ཉིད་ནི། ཟང་ཟིང་གི་སེམས་མེད་པའི་ཕྱིར་རོ༎ སྐྱོ་བ་སྤངས་པ་ནི། རྟག་ཏུ་ཆོས་སྟོན་པའི་ཕྱིར་རོ༎
ཞེས་གསུངས་སོ༎
ལུང་གཉིས་པ་ནི་རིན་ཆེན་ཕྲེང་བའི་གཞུང་ཚིག་ཡིན་ལ། དེ་ཡང་དེ་ཉིད་ (སྡེ་བསྟན། སྐྱེས་རབས། གེ་པ། རྒྱལ་པོ་ལ་གཏམ་བྱ་བ་རིན་པོ་ཆེའི་ཕྲེང་བ། འཕགས་པ་ཀླུ་སྒྲུབ། ༡༢༥ བ ༣) ལས།
དགེ་བའི་བཤེས་གཉེན་དེ་དག་གི། མཚན་ཉིད་མདོར་བསྡུས་མཁྱེན་པར་མཛོད༎ ཆོག་ཤེས་སྙིང་རྗེ་ཚུལ་ཁྲིམས་ལྡན༎ ཉོན་མོངས་སེལ་བའི་ཤེས་རབ་ཅན༎ དེ་དག་གིས་ནི་ཁྱོད་བསྟེན་ན༎ ཁྱོད་ཀྱིས་མཁྱེན་གྱི་གུས་པར་མཛོད༎
ཞེས་སོ༎ དོན་ནི། དེའི་དར་ཊཱིཀ་ (རྒྱལ་ཚབ་རྗེའི་གསུང་འབུམ་དཔེ་བསྡུར་མ།༢༠༢༠ ཀ་པ། དབུ་མ་རིན་ཆེན་ཕྲེང་བའི་རྣམ་བཤད། ༣༠༤་༡༢) ལས།
གཉིས་པ་ (བཤེས་གཉེན་གྱི་མཚན་ཉིད།) ནི། འོ་ན་དགེ་བའི་བཤེས་གཉེན་ཇི་ལྟ་བུ་བསྟེན་པར་བྱ་ཞེ་ན། དགེ་བའི་བཤེས་གཉེན་དག་གི་མཚན་ཉིད་མདོར་བསྡུས་པ་ཆོས་བཞི་དང་ལྡན་པ་མཁྱེན་པར་མཛོད་ཅིག །ཇི་ལྟ་བུ་ཞེ་ན། ཆོག་ཤེས་ཆེ་བ་རྙེད་བཀུར་མི་འདོད་པ་དང་། སྙིང་རྗེ་ཆེ་བ་དང་། ཚུལ་ཁྲིམས་དང་ལྡན་པ་དང་། སློབ་མའི་ཉོན་མོངས་སེལ་བའི་ཤེས་རབ་ཅན་དེ་དག་གིས་ནི་ཁྱོད་ལ་གདམས་པ་དང་རྗེས་སུ་བསྟན་ན། ཁྱོད་ཀྱིས་མཁྱེན་པར་གྱིས་ལ་གུས་པར་མཛོད་ཅིག་པའོ།།
ཞེས་བཤེས་གཉེན་ཆོས་བཞི་ལྡན་དུ་གསུངས་སོ།།
འོ་ན་ལུང་གཉིས་ཀྱིས་བསྟན་པའི་དགེ་བའི་བཤེས་གཉེན་གྱི་མཚན་ཉིད་ཅུང་ཟད་རྒྱས་བསྡུས་མ་གཏོགས་དོན་གཅིག་པ་ཡིན་ན། རྒྱན་ནས་གསུངས་པའི་ཆོས་བཅུ་པོ་རིན་ཕྲེང་ནས་གསུངས་པའི་ཆོས་བཞིར་བསྡུ་ཚུལ་ཇི་ལྟར་ཡིན་ཞེ་ན། དེའི་ཚུལ་ཡོད་དེ། ཆོག་ཤེས་ཆེ་བས། ལྷག་པ་ཏིང་ངེ་འཛིན་གྱི་བསླབ་པ་དང་། སྙིང་རྗེ་ཆེ་བས། བརྩོན་པ་དང་བཅས་པ། བརྩེ་བའི་བདག་ཉིད། སྐྱོ་བ་སྤངས་པ་སྟེ་གསུམ་དང་། ཚུལ་ཁྲིམས་དང་ལྡན་པས། ལྷག་པ་ཚུལ་ཁྲིམས་གྱི་བསླབ་པ་དང་། ཤེས་རབ་ཅན་གྱིས། ལྷག་པ་ཤེས་རབ་ཀྱིབསླབ་པ། ཡོན་ཏན་ལྷག་པ། ལུང་གིས་ཕྱུག་པ། དེ་ཁོ་ན་ཉིད་རྟོགས་པ། སྨྲ་མཁས་པ་དང་ལྔ་བསྡུས་པའི་ཕྱིར་རོ༎
དེ་ལ་པཎ་ཆེན་ཤཱཀ་མཆོག་པས་དགག་པ་མཛད་པ་ནི། ལུང་རིགས་རོལ་མཚོ་ (༢༢༣་༡༣) ལས།
དང་པོ་ཡུལ་དགེ་བའི་གཤེས་གཉེན་གྱི་མཚན་ཉིད་གཅིག་པ་ལུང་དེ་གཉིས་ཀྱི་དགོངས་པ་མ་ཡིན་ཏེ། སྡོམ་པ་ཉི་ཤུ་པ་ལས། ནུས་དང་ལྡན་ལས་བླང་བར་བྱ༎ ཞེས་ཚིག་འབུར་དུ་དོད་པ་འབྱུང་ལ། དེའི་དོན་ཡང་། བྱང་སའི་ལུགས་ལ་སློབ་དཔོན་གྱི་ལུས་ཀྱི་བྱ་བ་ཕྱོགས་བཞིར་ཕྱག་འཚལ་བ་དང་། མེ་ཏོག་འཐོར་དགོས་པ་ལ་སོགས་པ་ལུས་ཀྱི་བྱ་བ་མང་པོ་དགོས་པས། དེ་ལྟར་ནུས་པ་ལས་ལེན་ཞེས་པའི་དོན་ཡིན་ལ། ཅིག་ཤོས་ལ་དེ་མི་དགོས་པའི་ཕྱིར་རོ༎
ཞེས་པའོ༎
ད་ནི་འདི་དག་ལ་ཅུང་ཟད་དཔྱད་ན། དེ་ཡང་མཁས་གྲུབ་རྗེས། རྒྱན་དང་རིན་ཕྲེང་ལས་གསུངས་པའི་བླ་མའི་མཚན་ཉིད་གསུངས་པ་རྒྱས་བསྡུས་ཙམ་མ་གཏོགས་དོན་གཅིག་པར་གསུངས་པ་ལ། དེའིགནོད་བྱེད་དུ། ཡུལ་དགེ་བའི་གཤེས་གཉེན་གྱི་མཚན་ཉིད་གཅིག་པ་ལུང་དེ་གཉིས་ཀྱི་དགོངས་པ་མ་ཡིན་པ་དང་། དེའི་ཤེས་བྱེད་དུ་སྡོམ་པ་ཉི་ཤུ་པ་དྲངས་པ་ནི་འབྲེལ་བ་མེད་དེ། དེ་ལ་བརྟེན་ནས་རྒྱན་དང་རིན་ཕྲེང་གི་ལུང་གཉིས་ཀྱིས་བསྟན་པའི་དགེ་བའི་བཤེས་གཉེན་དོན་གཅིག་པར་གསུངས་པ་ལ་ཅི་ཡང་མི་གནོད་པའི་ཕྱིར།
གཞན་ཡང་ཁྱེད་ཀྱིས། ནུས་པ་དང་ལྡན་ཞེས་པ་ཕྱོགས་བཞིར་ཕྱག་འཚལ་བ་དང་། མེ་ཏོག་འཐོར་བ་ལ་སྦྱར་བ་འདི་ལ་ཡང་བརྟག་དགོས་ཏེ། ཤཱནྟ་རཀྵི་ཏས་སྡོམ་པ་ཉི་ཤུ་པའི་འགྲེལ་པར། ངག་གི་རིག་བྱེད་ཀྱི་དོན་འཛིན་པ་དང་གོ་བར་ནུས་པ་ལ་སྦྱར་བའི་ཕྱིར་ཏེ། དེ་ཉིད་ (སྡེ་བསྟན། སེམས་ཙམ། ཧི་པ། སྡོམ་པ་ཉི་ཤུ་པའི་འགྲེལ་པ། སློབ་དཔོན་ཤཱནྟ་རཀྵི་ཏ། ༡༦༧ བ ༡) ལས།
དེ་ལ་བྱང་ཆུབ་སེམས་དཔའ་ཁྱིམ་པའམ་རབ་ཏུ་བྱུང་བ་བྱང་ཆུབ་སེམས་དཔའི་བསླབ་པའི་ཚུལ་ཁྲིམས་ཀྱི་ཕུང་པོ་རྣམ་པ་གསུམ་པོ་འདི་དག་ལ་སློབ་པར་འདོད་ཅིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་པས་བྱང་ཆུབ་སེམས་དཔའི་སྨོན་ལམ་བཏབ་པའི་ཕྱིར་ཆོས་མཐུན་པ་སྡོམ་པ་བླངས་པ་མཁས་པ། ངག་གི་རྣམ་པར་རིག་བྱེད་ཀྱི་དོན་འཛིན་པ་དང་གོ་བར་ནུས་པ་དེ་ལྟ་བུའི་བྱང་ཆུབ་སེམས་དཔའི་རྐང་པ་གཉིས་ལ་ཐོག་མར་ཕྱག་བྱས་ནས་གསོལ་བ་གདབ་པར་བྱ་སྟེ།
ཞེས་གསུངས་པའི་ཕྱིར་དང་། དོན་ལ་བསམ་ན་ཡང་གདུལ་བྱའི་རྒྱུད་ལ་བྱང་སྡོམ་སྐྱེད་ནུས་པ་ཞིག་ལ་གོ་དགོས་ཀྱི། ཕྱག་འཚལ་ནུས་པ་དང་མེ་ཏོག་འཐོར་ནུས་པ་ལ་ཟེར་བ་མ་ཡིན་སྙམ་མོ༎ དེས་ན་རྗེ་བཙུན་གྲགས་པ་རྒྱལ་མཚན་གྱི་གསུང་ (དཔལ་བརྩེགས་པར་མ། ས་སྐྱ་བཀའ་འབུམ་དཔེ་བསྡུར་མ། རྗེ་བཙུན་གྲགས་པ་རྒྱལ་མཚན་གྱི་གསུང་འབུམ། པོད་ལྔ་པ། སྡོམ་པ་ཉི་ཤུ་པའི་རྣམ་བཤད། ༢༤༨་༡༣) ལས།
ནུས་པ་དང་ལྡན་པ་སྟེ། སྡོམ་པ་འབོགས་ནུས་པ་དང་།
ཞེས་གསུངས་པ་ལྟར། སྡོམ་པ་འབོགས་པའི་ཆོ་ག་རང་གི་ངག་གིས་ཐོན་པ་ཞིག་དང་། དེའི་དོན་སློབ་མ་ལ་གོ་བར་བྱེད་ནུས་པ་ཞིག་ནི་ངེས་པར་དགོས་ཀྱི། ཕྱག་ལེན་ཕྲན་ཚེགས་རྣམས་སྒྲུབ་མི་ནུས་ན་རྒྱས་བསྡུས་བྱ་ཆོག་པའི་གནང་བ་ཡོད་པར་སེམས་སོ༎
No comments:
Post a Comment