༄༅། །རྟམགྲིན་གསང་སྒྲུབ་ཀྱི་ཆོས་སྐོར་ལས། གླུད་ཆོག་མཆོད་སྦྱིན་རྒྱ་མཚོ་བཞུགས་སོ།།
༄༅། །གང་གི་ཐུགས་བརྩེས་ཉེར་དགོངས་ནས།། འགྲོ་ཕན་རྟེན་འབྲེལ་སྣ་ ཚོགས་ཐབས།། སྟོན་མཛད་བླ་མ་རྟ་མགྲིན་ལ།། བཏུད་ནས་གླུད་ཆོག་འབྲི་བར་བྱ།། (འདི་ལ་གཉིས། བཅའ་བཤོམ་དང་། ངག་འདོན་ནོ།། དང་པོ་ནི། བསྒྲུབ་བྱའི་ཁ་བཤལ་ཞིང་ཡན་ལག་ལྔ་བཀྲུས་པའི་ཁྲུས་ཆུ་ལ། དྲི་ཆེན། དྲི་ཆུ། སྣབས། རྣ་སྤགས། མིག་འདག །སྙིང་གའི་དྲེགས་པ་སོགས་བསྲེས་པས་ཁུ་བ་བགྱིས་བའི་ཟན། མི་ཕྱུགས་མང་པོའི་ཁ་སྣའི་རླངས་དབུགས་ཀྱིས་འདུག་པར། བསྒྲུབ་བྱ་ཕོ་མོ་གང་ཡིན་ཀྱི་གཟུགས་སྐྱེ་མཆེད་དོད་པ་ཁྲུ་གང་ངམ་མཐོ་གང་ལས་མེ་ཆུང་བ། ཞྭ་གོས་རྒྱན་གྱིས་བརྒྱན་པ། ལག་པ་གཉིས་ང་འོང་གི་ཕྱག་རྒྱར་གྲགས་པ་སྙིང་གར་སྐྱབས་སྦྱིན་གྱི་ཚུལ་དུ་ཡོད་པ་བྱ། འབྱུང་ན་ལྕགས་སམ་ཀུ་བའི་མགོ །མུ་ཏིག་གི་ཀླད་པ་སོགས་གླུད་རབས་ནས་འབྱུང་བ་ལྟང་གནས་སོ་སོར་མཚོན་ཙས་རེ་བཅུག །རྒྱས་པར་སྤྲོ་ན། སྙིང་གར་འབྱུང་བ་ལྔའི་འཁོར་ལོ་བྲིས་སྒྲུབ་བྱས་པ་བཞུག་ཅིང་། ནམ་རྒྱང་མདའ་འཕང་ཕོ་མོའི་གདོང་ཁྲམ་རིས རྣམས་དང་། ་ལྟས་ངན་གྱི་བྱ་སྤུ་སྣ་ཚོགས་ཀྱིས་བརྒྱན། མི་སྤྲོ་ན་མེད་ཀྱང་ཆོག །ནད་པའི་གོས་དྲི་མ་ཅན་ཚངསའམ་དུམ་བུ་བསྐོན། གསེར་དངུལ་སོགས་རིནཔོ་ཆེ་དང༌། གོས་དར། སྣམ་རས། འབྲུ་སྣ། ནད་པས་ལོངས་སྤྱོད་འཕྲོའི་བཟའ་བཏུང་སྣ་ཚོགས། གླུད་ཆུང་། གཏོར་ཆུང༌། ཆང་བུ་རྣམས་ལོ་གྲངས་སམ་ཅི་ལྕོགས་ཀྱིས་མཐའ་བསྐོར། དེའི་ཕྱོགས་བཞིར་གདོན་རིགས་རྣམས་བཞིར་བསྡུས་ཏེ། ཤར་དུ་རྒྱལ་གདོན་བནྡེ་ཞྭ་ཐེབ་དམར་པོ་ཅན། ལྷོར་གཤིན་རྗེའི་གདོན་ཁྲོ་བོའི་རྣམ་པ། ནུབ་ཏུ་བཙན་གྱི་གདོན མི་དམར་པོ། བྱང་དུ་མ་མོའི་གདོན་བུད་མེད་ནག་མོ། བཞི་གའང་ལག་པ་སྦར་མོ་གདང་ནས གླུད་ལ་རྔམས་པའི་རྣམ་པ་ཅན་བྱས་ལ་བཞག། གངོན་གཟུགས་བཞི་པོ་འདི་མ་གྲུབ་ན་མེད་ཀྱང་ཆོག་གོ། གཉིས་པ་ངག་འདོན་གྱི་རིམ་པ་ལ། སྔོན་འགྲོ། དངོས་གཞི། རྗེས་ཀྱི་བྱ་བ་གསུམ་ལས། དང་པོ་ནི། སྐྱབས་སེམས་སྔོན་དུ་འགྲོ་བས། བདག་མདུན་གྱི་ལྷའི་རྣལ་འབྱོར་རྫོགས་པར་བསྒོམ་སྟེ། ཡི་དམ་ཆོས་སྐྱོང་ལ་གཏོར་འབུལ་འཕྲིན་བཅོལ་སོགས་རྒྱས་པང་བྱ་བའམ། མདོར་བསྡུ་ན།)
༈ ༀ་སྭ་བྷཱ་ཝ་ཤུདྡྷཿ སརྦ་དྷརྨཱཿ སྭ་བྷཱ་ཝ་ཤུདྡྷོ྅ཧཾ། ཆོས་ཀུན་རང་བཞིན་སྟོང་པའི་ངང་།། པད་མ་ཉི་མའི་གདན་གྱི་སྟེང་།། རང་ཉིད་རྟ་མགྲིན་སྐུ་མདོག་དམར།། དམར་ལྗང་དཀར་བའི་ཞལ་གསུམ་སྟེང་།། སྐུ་མདོག་ལྗང་ཞུར་རྟ་སྐད་འཚེར།། ཕྱག་དྲུག་རྡོ་རྗེ་ཁ་ཊཱཾ་གྲི།། སྡིགས་འཛུབ་མདུང་ཐུང་རྒྱུ་ཞགས་འཛིན།། གར་དགུའི་ཉམས་རྫོགས་དུར་ཁྲོད་ཀྱི།། ཆས་ཅན་ཞབས་བརྒྱད་གཡས་བཞི་བསྐུམས།། གཡོན་བཞི་བརྐྱངས་པས་ཀླུ་བརྒྱད་བརྫིས།། མེ་དཔུང་འབར་བའི་དབུས་ན་བཞུགས།། ཆེ་བཙན་འགྲན་ཟླ་བྲལ་བར་གྱུར།། ༈ ༀ་ཧྲཱིཿ པདྨཱནྟ་ཀྲྀཏ་བཛྲ་ཀྲོ་དྷ་ཧ་ཡ་གྲཱི་ཝ་ཧུ་ལུ་ཧུ་ལུ་ཧཱུཾ་ཕཊ། (གང་མང་། སྤྲོ་ན་དབང་སྡུད་དང་ལས་སྔགས་ཀྱང་བཟླས་ལ། ཡིག་བརྒྱ། དགེ་བ་བསྔོའོ།།)
(གཉིས་པ་ཆོ་ག་དངོས་ལ་རྒྱས་བསྡུས་གཉིས་ལས། དང་པོ་ལ་དྲུག་ལས། དང་པོ་ལ། སྦྱིན་ཡུལ་འགུགས་པ། གླུད་གཏོར་བྱིན་གྱིས་རློབ་པ། བསྔོ་བའི་ཆོ་ག། ཆོས་སྦྱིན་བྱ་བ། མགྲོན་ རང་གནས་སུ་བཏང་བ། མཚམས་བཅད་པ་དང་དྲུག་ལས། དང་པོ་ནི།)
༈ རང་ཡི་དམ་དུ་གསལ་བའི་ཐུགས་ཀ་ནས་ཁྲོ་བོ་འདོད་རྒྱལ་དམར་པོ་དྲག་ཤུལ་ཅན། ལྕགས་ཀྱུ་དང་ཞགས་པ་ཐོགས་པ་དཔག་ཏུ་མེད་པ་བྱུང་། འཇིག་རྟེན་གྱི་ཁམས་ཐམས་ཅད་ཁྱབ་པར་སོང་སྟེ། འཆི་བདག་གཤིན་རྗེ་འཁོར་དང་བཅས་པའི་གཙོ་བྱས། གནོད་བྱེད་གདོན་བགེགས་ལན་ཆགས་ཤ་འཁོན་གཉེར་བ་ཐམས་ཅད་རང་དབང་མེད་པར་མདུན་དུ་བཀུག་པར་གྱུར་(པར་བསམས་ལ། འདོད་རྒྱལ་གྱི་ཕྱག་རྒྱ་བཅས།)
༈ ན་མོ༑ རྩ་བརྒྱུད་བླ་མ་ཡི་དམ་དཀོན་མཆོག་གསུམ།། ཁྱད་པར་རྟ་མཆོག་རོལ་པའི་ལྷ་ཚོགས་དང་།། དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས།། སྔགས་དང་ཏིང་འཛིན་བསླུ་མེད་རྟེན་འབྱུང་གི། བདེན་པའི་མཐུ་ཡིས་དམིགས་ཡུལ་འདི་ཉིད་ལ།། སྔོན་ལས་འཕྲལ་རྐྱེན་དབང་གིས་གནོད་བྱེད་པའི།། གདོན་བགེགས་ལན་ཆགས་ཤ་འཁོན་གཉེར་བ་ཀུན།། སྐད་ཅིག་ཉིད་ལ་གནས་འདིར་མཆིས་པར་གྱུར།། (ཅེས་པ་ལན་གསུམ་མམ་བདུན་སོགས་བརྗོད་པས་དངོས་སུ་ཁུག་པའི་མོས་པ་བརྟན་པོ་བྱ། དེ་དག་ལ་བཀའ་བསྒོ་བའི་བསམ་པས།)
༈ ཧཱུཾ༑ ཞེ་སྡང་གདུག་པའི་སེམས་རྣམས་ཞི་བར་གྱིས།། སྙིང་རྗེ་བྱམས་པའི་སེམས་སུ་ད་བྱོས་ལ།། དགའ་མགུ་རངས་པའི་སེམསམཀྱིས་གཏོར་མ་ལོངས།། ཞི་བ་བྱང་ཆུབ་སེམས་དང་ལྡན་པར་མཛོད།། (ཅེས་བརྗོད་པས་རྣམས་གདུག་སེམས་ཞི་ནས་དགའ་ཞིང་གུས་པས་གཏོར་གླུད་ལེན་པར་བསམ། གཉིས་པ་གླུད་གཏོར་བྱོན་གྱིས་བརླབ་པ་ནི།)
༈ རང་གི་ཐུགས་ཀའི་ས་བོན་ལས་འོད་ཟེར་འཕྲོས་པས། བསྒྲུབ་བྱའི་སྡིག་སྒྲིབ་ནད་གདོན་བར་ཆད་ཆག་ཆེ་ཉམ་ང་ཐམས་ཅད་འུབ་ཀྱིས་བསྡུས་ཏེ་གླུད་གཏོར་རྣམས་ལ་ཐིམ་པར་གྱུར་(པར་བསམ་ལ། ཆབ་བྲན། ༈ བསངས་སྦྱངས།) སྟོང་པ་ཉིད་དུ་གྱུར། སྟོང་པའི་ངང་ལས་ༀ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ༀ་ཨཱཿ ཧཱུཾ་ཞུ་བ་ལས་བྱུང་བའི་གཏོར་མ་བདུད་རྩིའི་རྒྱ་མཚོ་ཆེན་པོ་དང་གླུད་དང་དཀོར་ཆ་རྣམས་རང་རང་གི་མིང་ཡིག་དང་པོ་ཐིག་ལེས་བརྒྱན་པ་ཡོངས་སུ་གྱུར་པ་ལས། ཕུང་ཁམས་སྐྱེ་མཆེད་ཐམས་ཅད་ཚང་ཞིང་འདོད་པའི་ཡོན་ཏན་ལྔ་དང་ལྡན་པའི་གླུད་བཟང་མཁོ་རྒུའི་ལོངས་སྤྱོད་ཟད་མི་ཤེས་པའི་གཏེར་དང་ལྡན་པ་ནམ་མཁའ་མཛོད་ཀྱི་རང་བཞིན་དུ་གྱུར་(པར་བསམས་ལ།) ༀ་ཨཱཿ ཧཱུཾ། (འབྲུ་གསུམ་དང་། ནམ་མཁའ་མཛོད་ཀྱི་སྔགས་རྒྱ།) ༈ ཨོཾ་སརྦ་བིད་པཱུ་ར་པཱུ་ར་སཱུ་ར་སཱུ་ར་ཨཱ་ཝརྟ་ཡ་ཨཱ་ཝརྟ་ཡ་ཧོ་བཛྲ་སྤ་ར་ཎ་ཁཾ། (དང༌། སྤྲོ་ན།)
༈ ཨོཾ་སྭ་བྷཱ་ཝ་བི་ཤུདྡྷེ་དྷརྨཿཏེ་བཛྲ་སིདྡྷིི་ཧཱུཾ། ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་མུ་ཁེ་བྷྱཿ སརྦ་ཏད་ཁཾ་ཨུད་ག་ཏེ་སྥ་ཎ་ཧི་མཾ་ག་ག་ན་ཁཾ་སྭཱ་ཧཱ། ཨོཾ་ཨ་མྲྀ་ཏེ་ཧཱུཾ་ཕཊ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཾ། ཨདྱཱ་ནུཏྤནྣ་ཏ་དྷ། ན་མཿསརྦ་ཏ་ཐཱ་ག་ཏ་ཨཱ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུཾ། ཨོཾ་རུ་རུ་སྥུ་རུ་ཛྭ་ལ་ཏིཥྛ་སིདྡྷིི་ལོ་ཙ་ནི་སརྦ་ཨརྠ་སཱ་དྷ་ནི་སྭཱཧཱ། (སྔགས་དྲུག་ཕྱག་རྒྱ་དྲུག་གིས་བྱིན་གྱས་བརླབས་ལ།) ༈ བདག་གི་བསམ་པའི་སྟོབས་དང་ནི།། དེ་བཞིན་གཤེགས་པའི་བྱིན་སྟོབས་དང།། ཆོས་ཀྱི་དབྱིངས་ཀྱི་སྟོབས་རྣམས་ཀྱིས།། དོན་རྣམས་གང་དག་བསམ་པ་ཀུན།། དེ་དག་ཐམས་ཅད་ཅི་རིགས་པར།། ཐོགས་པ་མེད་པར་འབྱུང་གྱུར་ཅིག། (བདེན་སྟོབས་བརྗོད། གསུམ་པ་བསྔོ་བའི་ཆོ་ག་ལ་གསུམ། སྔགས་དང་ཕྱག་རྒྱ་ཏིང་ངེ་འཛིན་གྱིས་བསྔོ་བ། གླུད་ཀྱི་རབས་གྱེར་ཏེ་བསྔོ་བ། མགྲོན་རིགས་སྡེ་ཚན་དུ་བྱས་ཏེ་བསྔོ་བའོ།། དང་པོ་ནི། དེ་ནས་ལག་པ་གཡས་རྡོ་རྗེ་ཁུ་ཚུར་ལས་མཛུབ་མོ་བསྒྲེང་། གཡོན་མཆོད་སྦྱིན་གྱིས་ཕྱག་རྒྱས་སེ་གོལ་གཏོག་ཅིང་།) ༈ ན་མཿ སརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སཾ་བྷ་ར་སཾ་བྷ་ར་ཧཱུཾ། (ཞེས་པ་ཅི་མང་དང༌།) ༈ བཅོམ་ལྡན་འདས་དེ་བཞིན་གཤེགས་པ་རྒྱལ་བ་རིན་ཆེན་མང་ལ་ཕྱག་འཚལ་ལོ།། དེ་བཞིན་གཤེགས་པ་གཟུགས་མཛེས་དམ་པ་ལ་ཕྱག་འཚལ་ལོ།། དེ་བཞིན་གཤེགས་པ་སྐུ་འབྱམས་ཀླས་ལ་ཕྱག་འཚལ་ལོ།། དེ་བཞིན་གཤེགས་པ་འཇིགས་པ་ཐམས་ཅད་དང་བྲལ་བ་ལ་ཕྱག་འཚལ་ལོ།། (དེ་བཞིན་གཤེགས་པ་བཞིའི་མཚན་བརྗོད།)
༈ གླུད་རྣམས་རེ་རེ་ལས་ཀྱང༌། དེ་འདྲ་བའི་རིན་པོ་ཆེའི་མི་རྒྱན་ཆ་ལུགས་དང་ལྡན་པ་སྟོང་གསུམ་གང་བ་བྱུངབ་དང་། གཏོར་མ་བདུད་རྩིའི་རྒྱ་མཚོ་དང་། དེ་ལས་བྱུང་བའི་འདོད་ཡོན་ལྔ་གནམ་ས་བར་སྣང་གི་ཁྱོན་འགེངས་པ་བྱུང་སྟེ། གདོན་འགེགས་ལན་ཆགས་ཤ་འཁོན་གཉེར་བ་ ཐམས་ཅད་ལ་བྱིན་པས། མགྲོན་རྣམས་ཀྱང་འཐབ་རྩོད་དང་རྒྱལ་ཕམ་སོགས་མེད་པར་སོ་སོའི་མིག་གི་ཡུལ་དུ་གཟུགས་མཛེས་པ། རྣ་བའི་ཡུལ་དུ་སྒྲ་སྙན་པ། སྣའི་ཡུལ་དུ་དྲི་ཞིམ་པ། ལྕེའི་ཡུལ་དུ་རོ་ཞིམ་པ། ལུས་ཀྱི་ཡུལ་དུ་རེག་བྱ་འཇམ་པ། སེམས་ཀྱི་ཡུལ་དུ་བདེ་སྐྱིད་ཕུན་སུམ་ཚོགས་པ། ཇི་ལྟར་འདོད་པའི་རྒྱན་དང༌། མལ་ཆ་དང༌། ན་བའི་གསོས་སྨན་དང་། བཟའ་བ་དང༌། བཅའ་བ་དང་། མྱང་བ་དང་། འདག་པ་དང་། བཏུང་བ་དང་། གཞན་ཡང་དར་ཟབ། རས་ཆེན། སྟག་གཟིག་གི་པགས་པ། གོ་ཁྲབ། གོས་སྣམ། རིན་པོ་ཆེ་སྣ་ཚོགས། འབྲུ་སྣ་ཚོགས། འབྲི་གཡག་དང་། རྟ་ཕྱུགས་ལ་སོགས་པའི་གཟུགས་སུ་སྣང་བ་ཐམས་ཅད་དང་། བྲན་ཕོ་དང་། བྲན་མོ་དང༌། ཁང་བཟང་དང༌། སྐྱེད་མོས་ཚལ་ལ་སོགས་པ། མདོར་ན་སོ་སོ་རང་གི་ཡིད་ལ་གང་འདོད་པ་ཐམས་ཅད་བྱུང་སྟེ། དུས་འདི་ནས་ཇི་སྲིད་འཁོར་བ་མ་སྟོང་གི་བར་དུ་ཟད་པར་མི་འགྱུར་བའི་གཏེར་ལ་ལོངས་སྤྱོད་པར་གྱུར་(པར་བསམ་པ་གལ་ཆེ་ཞིང༌། སྤྲོ་ན་ངག་ཏུའང་བརྗོད། གཉིས་པ་གླུད་ཀྱི་རབས་གྱེར་ཏེ་བསྔོ་བ་ནི།)
༈ ཀྱཻ༑ ཕ་ནི་གནམ་ལ་ཡ་ང་རྩེ།། མ་ནི་ས་ལ་དོགས་མ་ཡུམ།། དེ་གཉིས་ཚོགས་ལས་བྱུང་བ་ཡི།། འབྲུ་མཆོག་ངར་གྱི་མི་པོ་ཆེ།། ཞོ་ཤའི་སྙིང་ལ་དུང་གི་རུས།། བསེ་ཡི་ཤ་ལ་མཚལ་གྱི་ཁྲག། ཀུ་བའི་མགོ་ལ་ཟེར་མོའི་སྐྲ།། དབང་པོའི་ལག་ལ་ཆུ་སྲིན་སྡེར།། ལུང་ཐང་མིག་ལ་མོ་ཁབ་སྣ།། འགྲོན་བུའི་སོ་ལ་ལེ་བརྒན་ལྕེ།། ལག་གཡས་གསེར་ལ་གཡོན་པ་གཡུ།། རྐང་གཡས་ལྕགས་ལ་གཡོན་པ་ཟངས།། ཟ་འོག་གོས་ལ་རིན་ཆེན་རྒྱན།། ཡིད་ནི་དྲན་པ་ཝ་ལ་ལ།། རུས་ནི་དཀར་མདངས་ཡེ་རེ་རེ།། ཤ་ནི་སྨུག་དང་ཁམ་སེ་ཁམ།། ཁྲག་ནི་དམར་མདངས་བྲེང་སེ་བྲེང་།། དྲོད་ནི་ཚ་མདངས་ལམ་སེ་ལམ།། དབུགས་ནི་འགྱུ་དྭངས་བྲེང་སེ་བྲེང་།། གདོང་ནི་བཀྲག་མདངས་ཡ་ལ་ལ།། སྐྲ་ནི་མཛེས་རྒྱན་བུ་རུ་རུ།། ལག་པ་གཡབ་སྟངས་སི་ལི་ལི།། མིག་ནི་མཐོང་སྟངས་རྒྱངས་ས་རྒྱང༌།། སྣ་ནི་དྲི་ཞིམ་ཆིངས་སེ་ཆིང་།། ཁ་ནི་བཞད་གད་ཡ་ལ་ལ།། ལྕེ་ནི་སྨྲ་སྐད་ཤ་ར་ར།། རྐང་ནི་འགྲོས་སྟབས་ལམ་སེ་ལམ།། གོས་ནི་བཟང་གོས་ལྷབ་མ་ལྷུབ།། བཟའ་བས་ཁ་དྲོ་ཐིབས་སེ་ཐིབ།། ངག་ནི་ཚངས་པ་ལྷ་ཡི་གསུང་།། རང་མིང་ཆོ་འབྲང་ཤ་ར་ར།། ཡར་གྱི་སྒང་བུ་མཐོ་མཐོ་ནས།། གསུང་སྙན་དེ་ནི་ཀྱུ་རུ་རུ།། མར་གྱི་གཤོང་བུ་དམའ་དམའ་ནས།། འགྲོས་བཟང་དེ་ནི་ལྡེམས་སེ་ལྡེས།། ཅོ་ཅོ་དེ་ནི་ལྡིར་ལྡིར་ནས།། སྐྱེས་པ་དམག་ལ་ཆས་པ་འདྲ།། རྒྱུན་རྒྱན་དེ་ནི་བུང་པུང་ནས། །ན་ཆུང་བག་མར་ཆས་པ་འདྲ།། བྲི་བྲི་དེ་ནི་བཀོད་བཀོད་ནས།། སྟག་གཟིག་ཚང་ནས་ཐོན་པ་འདྲ།། སྒོ་གསུམ་ཕུང་ཁམས་སྐྱེ་མཆེད་ཚང་།། མཁོ་རྒུའི་ལོངས་སྤྱོད་བསམ་མི་ཁྱབ།། འདོད་ཡོན་རྣམ་ལྔ་ལྷུན་གྱིས་གྲུབ།། སྲིད་པའི་ལྷ་འདྲེ་ཐམས་ཅད་ཀྱི།། མིག་གིས་ཡས་དང་གླུད་ལ་ལྟོས། །རྣ་བ་བརྗོད་པའི་སྒྲ་ལ་ཉོན།། དྲན་པ་བདེན་པའི་དོན་ལ་སོམས།། མི་བས་ལྷག་པའི་གླང་འདི་ལོང༌།། (འདི་ནི་སྣང་སྲིད་སིལ་བུའི་ཀླུང་གི་འཕྱོང་ལས་བཏུས་པའོ།། གསུམ་པ་མགྲོན་རིགས་སྡེ་ཚན་དུ་བྱས་ཏེ་བསྔོ་བ་ལ། འབྱུང བ་དང་སྦྱར་ཏེ་གདོན་སྤྱིར་བསྔོ་བ། སྤར་ཁའི་གདོན་ལ་བྱེ་བྲག་ཏུ་བསྔོ་བ། ཕྱོགས་བཅུའི་གདོན་ལ་སྒོས་སུ་བསྔོ་བ། དྲེགས་པའི་ཚོགས་ལ་ཁྱད་པང་དུ་བསྔོ་བ་དང་བཞི་ལས། དང་པོ་ནི།)
༈ ཀྱཻ༑ སྲིད་གསུམ་འདི་ན་གང་ཡང་རུང་།། འདི་ན་གནས་པའི་གདོན་བགེགས་རྣམས།། ཚུར་ཤོག་རྒྱལ་བའི་བཀའ་ལ་ཉོན།། འབྲུ་མཆོག་ངར་གླུད་ཡ་མཚན་ཅན།། སྔོན་ཚེ་ལྷ་དབང་བརྒྱ་བྱིན་གླུད།། བཅོམ་ལྡན་ཤཱཀྱ་ཐུབ་པས་མཛད།། ད་ལྟར་རྒྱུ་སྦྱོར་ཡོན་བདག་གླུད།། རིག་འཛིན་སྔགས་འཆང་བདག་གིས་གཏོང༌།། གླུད་བདག་ཐམས་ཅད་ཀླུང་ལོང་ཞིག། ཡས་ཀྱི་བདག་པོ་ཡས་བཞེས་ཤིག། བདག་དང་རྒྱུ་སྦྱོར་སྦྱིན་བདག་གི། རྣམ་ཤེས་གླུད་འདི་མཁའ་ལ་གཏོང་།། མཁའ་ལ་གནས་པའི་ལྷ་འདྲེ་རྣམས།། གླུད་དང་གཏོར་མ་འདི་ལོང་ལ།། སེམས་ལ་གནོད་པ་མ་བྱེད་ཅིག། བདག་དང་རྒྱུ་སྦྱོར་སྦྱིན་བདག་གི། དབུགས་ཀྱི་གླུད་འདི་རླུང་ལ་གཏོང་།། རླུང་ལ་གནས་པའི་ལྷ་འདྲེ་རྣམས།། གླུད་དང་གཏོར་མ་འདི་ལོང་ལ།། དབུགས་ལ་གནོད་པ་མ་བྱེད་ཅིག། བདག་དང་རྒྱུ་སྦྱོར་སྦྱིན་བདག་གི། དྲོད་ཀྱི་གླུད་འདི་མེ་ལ་གཏོང་།། མེ་ལ་གནས་པའི་ལྷ་འདྲེ་རྣམས།། གླུད་དང་གཏོར་མ་འདི་ལོང་ལ།། དྲོད་ལ་གནོད་པ་མ་བྱེད་ཅིག། བདག་དང་རྒྱུ་སྦྱོར་སྦྱིན་བདག་གི། ཁྲག་གི་གླུད་འདི་ཆུ་ལ་གཏོང་།། ཆུ་ལ་གནས་པའི་ལྷ་འདྲེ་རྣམས།། གླུད་དང་གཏོར་མ་འདི་ལོང་ལ།། ཁྲག་ལ་གནོད་པ་མ་བྱེད་ཅིག། བདག་དང་རྒྱུ་སྦྱོར་སྦྱིན་བདག་གི། ཤ་ཡི་གླུད་འདི་ས་ལ་གཏོང་།། ས་ལ་གནས་པའི་ལྷ་འདྲེ་རྣམས།། གླུད་དང་གཏོར་མ་འདི་ལོང་ལ།། ཤ་ལ་གནོད་པ་མ་བྱེད་ཅིག། བདག་དང་རྒྱུ་སྦྱོར་སྦྱིན་བདག་གི། རུས་ཀྱི་གླུད་འདི་བྲག་ལ་གཏོང་།། བྲག་ལ་གནས་པའི་ལྷ་འདྲེ་རྣམས།། གླུད་དང་གཏོར་མ་འདི་ལོང་ལ།། རུས་ལ་གནོད་པ་མ་བྱེད་ཅིག། བདག་དང་རྒྱུ་སྦྱོར་སྦྱིན་བདག་གི། པགས་པའི་གླུད་འདི་ཐང་ལ་གཏོང་།། ཐང་ལ་གནས་པའི་ལྷ་འདྲེ་རྣམས།། གླུད་དང་གཏོར་མ་འདི་ལོང་ལ།། པགས་ལ་གནོད་པ་མ་བྱེད་ཅིག། སྔོན་ཚེ་བདེན་པའི་བྱིན་རླབས་དང༌།། ད་ལྟ་རྒྱུ་སྦྱོར་སྦྱིན་བདག་གི། བསམ་པ་རྣམ་པར་དག་པ་དང༌།། རྣལ་འབྱོར་དམ་ཚིག་ལྡན་པ་ཡི།། ལྷག་བསམ་དག་པས་ལེགས་བཤམས་པའི།། མཆོད་གཏོང་ངར་གླུད་འདི་བཞེས་ལ།། རྣལ་འབྱོར་བདག་ཅག་ཡོན་མཆོད་རྣམས།། ཁྲས་ལ་བབས་ན་ཁྲམ་ཁ་ཕྱིས།། ཤོ་ལ་བབས་ན་ཤོ་དེ་སྤོར།། རྩིས་ལ་བབས་ན་རྩི་ཁ་ཕྱུང་།། རྒྱན་ལ་བབས་ན་རྒྱན་དེ་སྦོས།། བཟུང་བ་ཐོང་ལ་བཅིངས་པ་ཁྲོལ།། བདུད་ཀྱི་དལ་ཁ་ཕྱིར་སྒྱུར་ཅིག། (ཆོ་གའི་ཚིག་འདི་རྣམས་ཕ་དམ་པའི་ལུགས་ཀྱི་གླུད་ཆོག་ལས་འབྱུང་བའོ།། གཉིས་པ་སྤར་ཁའི་གདོན་ལ་བྱེ་བྲག་ཏུ་བསྔོ་བ་ནི།)
༈ ཧཱུཾ༑ ལྷོ་ཕྱོགས་སྤར་ཁ་ལི་ཐོག་ན།། བཙན་དང་གྲེ་བོ་བསྡོངས་པའི་གདོན།། ལྷོ་ནུབ་སྤར་ཁ་ཁོན་ཐོག་ན།། ས་བདག་བུ་བདག་བསྡོངས་པའི་གདོན།། ནུབ་ཕྱོགས་སྤར་ཁ་དྭ་ཐོག་ན།། བདུད་དང་སྐྱེས་བུ་བསྡོངས་པའི་གདོན།། ནུབ་བྱང་སྤར་ཁ་ཁེན་ཐོག་ན།། རྒྱལ་པོ་ཐེ་བྲང་བསྡོངས་པའི་གདོན།། བྱང་ཕྱོགས་སྤར་ཁ་ཁམ་ཐོག་ན།། ཀླུ་དང་མ་མོ་བསྡོངས་པའི་གདོན།། བྱང་ཤར་སྤར་ཁ་གིན་ཐོག་ན།། རྦད་འདྲེ་དཀོར་འདྲེ་བསྡོངས་པའི་གདོན།། ཤར་ཕྱོགས་སྦར་ཁ ཟིན་ཐོག་ན།། ཀླུ་དང་རྒྱལ་པོ་བསྡོངས་པའི་གདོན།། ཤར་ལྷོ་སྤར་ཁ་ཟོན་ཐོག་ན།། རྒྱལ་འགོང་སྨྱོ་འདྲེ་བསྡོངས་པའི་གདོན།། སྤར་ཁ་བརྒྱུད་ཀྱི་གདོན་རྣམས་ཀྱིས།། དམིགས་ཡུལ་འདི་ལ་གནོད་སྲིད་ན།། གླུད་གཏོར་དཀོར་ཆ་འདི་བཞེས་ལ།། ནད་དང་གདོན་ལས་གྲོལ་བར་མཛོད།། (གསུམ་པ་ཕྱོགས་བཅུའི་གདོན་ལ་སྒོས་སུ་བསྔོ་བ་ནི།)
༈ ཧཱུཾ༑ སྟེང་ཕྱོགས་ལྷ་ཡི་གདོན་ཚོགས་དང་།། ཤར་ཕྱོགས་རྒྱལ་པོ་དྲི་ཟའི་གདོན་།། ལྷོ་ཕྱོགས་གྲུལ་བུམ་གཤིན་རྗེའི་གདོན།། ནུབ་ཕྱོགས་ཀླུ་ཡི་གདོན་གྱི་ཚོགས།། བྱང་ཕྱོགས་གནོད་སྦྱིན་གདོན་རྣམས་དང༌།། མཚམས་བཞི་མེ་ལྷ་སྲིན་པོ་རླུང༌།། དབང་ལྡན་འོག་ཕྱོགས་ས་བདག་གདོན།། ཕྱོགས་བཅུའི་གདོན་ཚོགས་ཁྱེད་རྣམས་ཀྱིས།། དམིགས་ཡུལ་འདི་ལ་གནོད་སྲིད་ན།། ནམ་མཁའ་མཛོད་དུ་བྱིན་བརླབས་པའི།། གླུད་གཏོར་དཀོར་ཆ་འདི་བཞེས་ལ།། ནད་དང་གདོན་ལས་གྲོལ་བང་མཛོད།། (སྔ་མ་འདི་གཉིས་སློབ་དཔོན་སྒེག་པའི་རྡོ་རྗེའི་མན་ངག་བླ་བླུའི་ཆོ་ག་ལས་ཚིག་སྣ་བསྡུས་པའོ།། བཞི་པ་དྲེགས་པའི་ཚོགས་ལ་ཁྱད་པར་དུ་བསྔོ་བ་ནི།)
༈ ཧཱུཾ༑ ཡ་མཱནྟ་ཀ་མན་ཆད་ནས།། གཤིན་རྗེ་ཕྲ་མོ་ཡན་ཆོད་ཀྱི།། གཤིན་རྗེའི་རིགས་གྱུར་ཐམས་ཅད་ལ།། གླུད་གཏོར་གཙང་མ་འདི་འབུལ་གྱི།། བསྒྲུབ་བྱ་ནད་ལས་གྲོལ་གྱུར་ཅིག། ཧཱུཾ༑ རྒྱལ་པོ་པེ་ཧར་མན་ཆོད་ནས།། རྒྱལ་ཕྲན་ཕྲ་མོ་ཡན་ཆོད་ཀྱི།། རྒྱལ་པོའི་རིགས་གྱུར་ཐམས་ཅད་ལ།། གླུད་གཏོར་གཙང་མ་འདི་འབུལ་གྱི།། བསྒྲུབ་བྱ་ནད་ལས་གྲོལ་གྱུར་ཅིག། ཧཱུཾ༑ བཙན་རྒོད་ཆེན་པོ་མན་ཆད་ནས།། ལུང་བཙན་པྲ་མོ་ཡན་ཆོད་ཀྱི།། བཙན་གྱི་རིགས་གྱུར་ཐམས་ཅད་ལ།། གླུད་གཏོར་གཙང་མ་འདི་འབུལ་གྱི།། བསྒྲུབ་བྱ་ནད་ལས་གྲོལ་གྱུར་ཅིག། ཧཱུཾ༑ བདུད་ཆེན་ནག་པོ་མན་ཆད་ནས།། བདུད་ཕྲན་ཕྲ་མོ་ཡན་ཆོད་ཀྱི།། བདུད་ཀྱི་རིགས་གྱུར་ཐམས་ཅད་ལ།། གླུད་གཏོར་གཙང་མ་འདི་འབུལ་གྱི།། བསྒྲུབ་བྱ་ནད་ལས་གྲོལ་གྱུར་ཅིག། ཧཱུཾ༑ རྡོ་རྗེ་ལེགས་པ་མན་ཆད་ནས།། འགོང་པོ་ཕྲ་མོ་ཡན་ཆོད་ཀྱི།། འགོང་པོའི་རིགས་གྱུར་ཐམས་ཅད་ལ།། གླུད་གཏོར་གཙང་མ་འདི་འབུལ་གྱི།། བསྒྲུབ་བྱ་ནད་ལས་གྲོལ་གྱུར་ཅིག། ཧཱུཾ༑ གཟའ་ཆེན་རཱ་ཧུ་ཡན་ཆད་ནས།། གཟའ་ཕྲན་ཕྲ་མོ་ཡན་ཆོད་ཀྱི།། གཟའ་ཡི་རིགས་གྱུར་ཐམས་ཅད་ལ།། གླུད་གཏོར་གཙང་མ་འདི་འབུལ་གྱི།། བསྒྲུབ་བྱ་ནད་ལས་གྲོལ་གྱུར་ཅིག། ཧཱུཾ༑ ལྷ་མོ་བསྟན་མ་པན་ཆད་ནས།། བསྟན་མ་བཅུ་གཉིས་ཡན་ཆོད་ཀྱི།། བོད་ཁམས་གཞི་བདག་འཁོར་བཅས་ལ།། གླུད་གཏོར་གཙང་མ་འདི་འབུལ་གྱི།། བསྒྲུབ་བྱ་ནད་ལས་གྲོལ་གྱུར་ཅིག། ཧཱུཾ༑ བགེགས་ཆེན་བརྒྱད་ཅུ་མན་ཆད་ནས།། མཁའ་ལ་རྒྱུ་བ་ཡན་ཆོད་ཀྱི།། བགེགས་ཚོགས་འབྱུང་པོ་ཐམས་ཅད་ལ།། གླུད་གཏོར་གཙང་མ་འདི་འབུལ་གྱི།། བསྒྲུབ་བྱ་ནད་ལས་གྲོལ་གྱུར་ཅིག། ཧཱུཾ༑ གྲེ་བོ་གྲི་མོ་མན་ཆད་ནས།། ཤི་འདྲེ་གསོན་འདྲེ་ཡན་ཆོད་ཀྱི།། དགྲ་འདྲེའི་རིགས་གྱུར་ཐམས་ཅད་ལ།། གླུད་གཏོར་གཙང་མ་འདི་འབུལ་གྱི།། བསྒྲུབ་བྱ་ནད་ལས་གྲོལ་གྱུར་ཅིག། (གླུད་ཁ་བསྒྱུང་ལ།) བསྔོ་འོ་གཏོང་ངོ་གླུད་འདི་གཏོང་།། བསྒྲུབ་བྱའི་ལུས་ངག་ཡིད་གསུམ་གྱི།། ནད་གདོན་མ་ལུས་ཞི་གྱུར་ཅིག། མི་ལས་དགའ་བའི་གླུད་གཏོར་འདི།། བཀའ་སྡོད་དམ་ཅན་མན་ཆོད་ནས།། འདྲེ་ངན་ཕྲ་མོ་ཡན་ཆོད་ཀྱི།། ཆེ་འབྲིང་ཆུང་གསུམ་ཐམས་ཅད་ལ།། ནད་པའི་ཚབ་ཏུ་གླུད་འདི་བསྔོ།། མི་འདི་ནད་ལས་གྲོལ་གྱུར་ཅིག། དུས་གསུམ་སངས་རྒྱས་ཐམས་ཅད་དང༌།། པདྨའི་བཀའ་ལ་མ་འདའ་བར།། མི་འདི་ནད་ལས་གྲོལ་གྱུར་ཅིག། ཁྱེད་རྣམས་གླུད་འདིས་ཚིམ་གྱུར་ཅིག། (འདི་ནི་སྤྲུལ་སྐུ་བསྟན་གཉིས་གླིང་པར་སློབ་དཔོན་ཆེན་པོས་ཞལ་དངོས་སུ་བསྟན་ནས་གནང་བའོ།། བཞི་པ་ཆོས་ཀྱི་སྦྱིན་པ་བྱ་བ་ནི།)
༈ སྡིག་པ་ཅི་ཡང་མི་བྱ་ཞིང་།། དགེ་བ་ཕུན་སུམ་ཚོགས་པར་སྤྱད།། རང་གི་སེམས་ནི་ཡོངས་སུ་འདུལ།། འདི་ནི་སངས་རྒྱས་བསྟན་པ་ཡིན།། སྐར་མ་རབ་རིབ་མར་མེ་དང༌།། སྒྱུ་མ་ཟིལ་པ་ཆུ་བུར་དང༌།། རྨི་ལམ་གློག་དང་སྤྲིན་ལྟ་བུང།། འདུས་བྱས་ཆོས་རྣམས་དེ་ལྟར་ལྟ།། རང་གི་ལུས་ལ་དཔེ་ལོང་ལ།། གཞན་ལ་གནོད་པ་མ་བྱེད་ཅིག། པན་པའི་འབྲས་བུ་བདེ་བ་དང་།། གནོད་པའི་འབྲས་བུ་སྡུག་བསྔལ་འབྱུང༌།། ས་བོན་ཚ་བ་རྣམས་ལས་ནི།། འབྲས་བུ་ཚ་བ་སྐྱེ་འགྱུར་ཞིང་།། ས་བོན་མངར་བ་བཏབ་པ་ལས།། འབྲས་བུ་མངར་བ་སྐྱེ་བར་འགྱུར།། དཔེ་དང་བཅས་པའི་ཆོས་བཤད་པ།། ཁྱེད་རྣམས་ཀྱིས་ནི་ཤེས་པར་གྱིས།། ( ཞེས་སོགས་བརྗོད། ལྔ་པ་གནོད་བྱེད་རང་གནས་སུ་བསྐྲད་པ་ནི།)
༈ ན་མོ༑ རྩ་བརྒྱུད་བླ་མ་ཡི་དམ་དཀོན་མཆོག་གསུམ།། ཁྱད་པར་རྟ་མཆོག་ངོ ལ་པའི་ལྷ་ཚོགས་དང༌།། དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས།། སྔགས་དང་ཏིང་འཛིན བསླུ་མེད་རྟེན་ཁབྱུང་གི། བདེན་པའི་མཐུ་ཡིས་དམིགས་ཡུལ་འདི་ཉིད་ལ།། སྔོན་ལས་འཕྲལ་རྐྱེན་དབང་གིས་གནོད་བྱེད་པའི།། གདོན་བགེགས་ལན་ཆགས་ཤ་འཁོན་གཉེར་བ་ཀུན།། གླུད་གཏོར་དཀོར་ཆ་འདི་ཡིས་ཚིམ་བྱོས་ལ།། གནོད་པའི་སེམས་སྦྱོང་ཕན་པའི་སེམས་ལྡན་པས།། རང་རང་སོ་སོའི་གནས་སུ་ད་སོངས་ཤིག། གལ་ཏེ་མི་འགྲོ་གནོད་ཅིང་འཚེ་བྱེད་ན།། ཡེ་ཤེས་རྡོ་རྗེས་འཇོམས་པར་འགྱུར་ཏ་རེ།། ༈ སུམྦྷ་ནི་སུམྦྷ་ཧཱུཾ། གྲིཧྞ་གྲིཧྞ་ཧུཾ། གྲིཧྞ་པ་ཡ་གྲིཧྞ་པ་ཡ་ཧཱུཾ། ཨཱ་ན་ཡ་ཧོ་བྷ་ག་ཝཱ་ན་བིདྱཱ་རཱ་ཛཱ་ཧུཾ་ཕཊ། (སོགས་དྲག་ཏུ་བརྗོད། གུ་གུལ་གྱིས་བདུག། ཡུངས་ཐུན་གྱིས་བྲབས། རོལ་མོའི་སྒྲ་དྲག་པོ་བཅས་གླུད་ཡས་རྣམས་གནོད་ཕྱོགས་སུ་བསྐྱལ། སྐྱེལ་མིས་ཕྱི་མིག་མི་བལྟ་བ་གལ་ཆེའོ།། དྲུག་པ་མཚམས་བཅད་པ་ནི།)
༈ རང་གི་ཐུགས་ཀའི་ཧཱུཾ་ལས་འོད་འཕྲོས་པས།། རྡོ་རྗེའི་ས་གཞི་རྭ་གུར་མེ་དཔུང་གིས།། ཡོངས་སུ་བསྐོར་བའི་བསྲུང་བའི་འཁོར་ལོ་རུ།། བདག་དང་བསྲུང་བྱ་ཐམས་ཅད་ཚུད་པང་གྱུར།། ཨོཾ་བཛྲ་རཀྵ་རཀྵ་ཧཱུཾ། (ཞེས་བསྲུང་འཁོར་བསྒོམ། བཀྲ་ཤིས་ཀྱིས་མཐའ་བརྒྱན་པར་བྱའོ།།)
(གཉིས་པ་མདོར་བསྡུས་པའི་ཆོ་ག་ནི། སྔགས་དང་ཕྱག་རྒྱ་ཏིང་ངེ་འཛིན་གྱིས་བསྔོ་བ་ཡན་ཆད་སྔར་ལྟར་ལ། དེ་ནས་འབྱུང་བ་དང་སྦྱར་ཏེ་གདོན་སྤྱིར་བསྔོ་བ་དང༌། དྲེགས་པའི་ཚོགས་ལ་ཁྱད་པར་དུ་བསྔོ་བ་གཉིས་ཀའམ་གང་མོས་སྦྱར་བའི་མཐར། ཆོས་སྦྱིན་མན་ཆད་གོང་བཞིན་བགྱིས་པས་ཆོག་གོ། གསུམ་པ་ནི། མདུན་བསྐྱེད་དང་འབྲེལ་མིན་དང་སྒོ་བསྟུན་པའི་རྗེས་ཆོག་རྣམས་དཀྱུས་ལྟར་བྱའོ།།
གཏོ་མདོས་གླུད་ལ་སྡེ་སྣོད་སྦྱང་པ་འགས།། བདེ་བར་གནས་དུས་རྙིང་བོན་ཆོ་ག་ཞེས།། སྐྱུག་བྲོ་བྱེད་ཀྱང་རྐྱེན་གྱིས་གཙེས་པའི་ཚེ།། བརྒྱ་སྟོང་ཁྲི་འབུམ་འབད་པས་སྒྲུབ་པ་མཐོང་།། ཀུན་སློང་ངན་ན་སྡེ་སྣོད་སྦྱང་བ་ཡང་།། ཅིར་འགྱུར་ཤེས་དཀའ་སྙིང་རྗེ་བྱང་སེམས་ཀྱིས།། ཟིན་ན་འདི་ཡང་རྒྱལ་ སྲས་སྤྱོད་པ་ཡི།། གྲངས་སུ་མི་འགྲོའི་སྒྲུབ་བྱེད་ཅི་མཆིས་སྟོན།། བྱམས་དང་སྙིང་རྗེས་ཀུན་བསླང་གནོད་བྱེད་ལ།། ཟང་ཟིང་གླུད་དང་ཆོས་ཀྱི་སྦྱིན་པ་བཏང་།། དེའི་མཐུས་ཉམ་ཐག་ནད་གདོན་འཇིགས་པ་ལས།། སྐྱོབ་ཕྱིར་སྦྱིན་པ་རྣམ་གསུམ་འདི་ལ་ཚང་།། སེམས་ཅད་མགུ་བྱ་མ་གཏོགས་སངས་རྒྱས་རྣམས།། དགྱེས་ཐབས་གཞན་མེད་གསུངས་ཕྱིང་གནོད་བྱེད་ལ།། མཁོ་རྒུའི་ལོངས་སྤྱོད་བྱིན་ནས་མགུ་བྱེད་པ།། རྒྱལ་རྣམས་དགྱེས་པའི་མཆོད་པར་ཅིས་མི་འགྱུར།། ཐོག་མཐའ་གཉིས་སུ་སེམས་བསྐྱེད་བསྔོ་བས་ཟིན།། བར་དུ་ རྫས་སྔགས་ཏིང་འཛིན་ནུས་པས་སྤྲུལ།། ཀུན་ཏུ་ཡང་དག་ལྟ་བས་རྒྱས་བཏབ་ན།། ཚོགས་གཉིས་བསོགས་པའི་ཐབས་མཁས་མཆོག་ཏུ་འགྱུར།། གླུད་ཆོག་མཆོད་སྦྱིན་རྒྱ་མཚོ་སྤེལ་བས་བདག། རྒྱལ་སྲས་སྤྱོད་པ་རྒྱ་མཚོའི་མཐར་སོན་ཏེ།། ཀུན་མཁྱེན་ཡེ་ཤེས་རྒྱ་མཚོར་དབང་ཐོབ་ནས།། འཁོར་བ་སྡུག་བསྔལ་རྒྱ་མཚོ་སྐེམ་བྱེད་ཤོག། འདི་ཡང་དྷརྨ་བཛྲ་གྱིས།། རྟ་མགྲིན་ཆོས་སྐོར་ཡན་ལག་ཏུ།། སྦྱར་བའི་ཡི་གེའི་འདུ་བྱེད་མཁན།། དགེ་སློང་བློ་བཟང་ཀུན་དགའ་ཡིན།། །།)
