༄༅། །སྤྱན་རས་གཟིགས་བཅུ་གཅིག་ཞལ་གྱི་བསྒོམ་བཟླས་བྱ་ཚུལ་མདོར་བསྡུས་འདོད་དོན་ལྷུན་འགྲུབ་བཞུགས་སོ།།
(རྒྱལ་ཀུན་ཐུགས་རྗེའི་སྒྱུ་འཕྲུལ་འཇིག་རྟེན་གསུམ་མགོན་བཅུ་གཅིག་ཞལ་གྱི་བསྒོམ་བཟླས་བྱ་ཚུལ་ནི། སྐྱབས་སེམས་ཚད་མེད་བཞི་བསྒོམ་པ་སྔོན་དུ་བཏང་ནས།)
སྭ་བྷཱ་ཝ(ས་སྟོང་པར་སྦྱངས།) སྟོང་པའི་ངང་ལས་རང་ཉིད་སྤྱན་རས་གཟིགས།། སྟོན་ཀའི་ཟླ་བའི་མདངས་ལྡན་རྩ་ཞལ་དཀར།། གཡས་ལྗང་གཡོན་དམར་དེའི་སྟེང་ལྗང་དམར་དཀར།། དེའི་སྟེང་དམར་དཀར་ལྗང་བའི་ཞལ་གསུམ་སྟེང་།། ཁྲོ་ཞལ་ནག་པོ་སྐྲ་སེར་གྱེན་བརྫེས་པ།། དེའི་སྟེང་རིགས་བདག་འོད་དཔག་མེད་པའི་ཞལ།། གཙུག་ཏོར་དང་ལྡན་རྩ་ཕྱག་དང་པོ་གཉིས།། ཐུགས་ཀར་ཐལ་སྦྱར་གཉིས་པས་ཕྲེང་བ་དང་།། གསུམ་པས་མཆོག་སྦྱིན་བཞི་པས་འཁོར་ལོ་བསྣམས།། གཡོན་གཉིས་པད་དཀར་འདབ་བརྒྱད་གསུམ་པ་ཡིས།། རིལ་བ་སྤྱི་བླུགས་བཞི་པས་མདའ་གཞུ་བསྣམས།། ཞབས་གཉིས་མཉམ་པའི་སྟབས་བཞེངས་རི་དྭགས་ཀྱི།། ལྤགས་པས་ནུ་མ་གཡོན་བཀབ་རིན་ཆེན་དང༌།། མཚན་དཔེའི་རྒྱན་ལྡན་འོད་ཟེར་མཐའ་ཡས་འཕྲོས།། གནས་གསུམ་འབྲུས་མཚན་ཐུགས་ཀའི་ཧཱུཾ་ཡིག་ལས།། འོད་འཕྲོས་སངས་རྒྱས་སྲས་བཅས་བསྐོར་བ་ཡི།། རང་བཞིན་གནས་ནས་སྤྱན་དྲངས་གཤེགས་སུ་གསོལ།། ཛཿ ཧཱུཾ་བཾ་ཧོཿ (ས་དབྱེར་མེད་དུ་བསྟིམ། མཆོད་པ་བྱིན་རླབས།) ཨོཾ་ཨཱརྱ་ལོ་ཀེ་ཤྭ་ར་ས་པ་རི་ཝཱ་ར་ཨརྒྷཾ། (ནས།) ཤཔྟ(འི་བར་གྱིས་མཆོད།) དུས་གསུམ་བདེ་བར་གཤེགས་པ་ཆོས་ཀྱི་སྐུ།། འགྲོ་དྲུག་སེམས་ཅན་ཡོངས་ལ་སྤྱན་རས་གཟིགས།། ནམ་མཁའ་ལྟ་བུར་ཁྱབ་པའི་བཅུ་གཅིག་ཞལ།། གཟི་བརྗིད་འོད་དཔག་མེད་ལ་ཕྱག་འཚལ་བསྟོད།།
(བཟླས་དམིགས་ནི།) རང་གི་སྙིང་གར་ཟླ་དཀྱིལ་སྟེང་ཧྲཱིཿ དཀར།། དེ་ལས་འོད་འཕྲོས་རྒྱལ་བ་སྲས་བཅས་མཆོད།། བྱིན་རླབས་རྣམ་པ་བུ་ག་སོ་སོ་ནས།། ཞུགས་པས་ལུས་ངག་ཡིད་ཀྱི་སྒྲིབ་པ་སྦྱངས།། སླར་ཡང་འོད་འཕྲོས་རིགས་དྲུག་སེམས་ཅན་ལ།། ཕོག་པས་སྒྲིབ་སྦྱངས་འཕགས་པའི་ས་ལ་འགོད།། (ཡིག་དྲུག་གང་མང་བཟླ། ཡིག་བརྒྱས་ཁ་བཀང་། སྔར་བཞིན་མཆོད་བསྟོད་བྱ།) དགེ་བ་འདི་ཡིས་མྱུར་དུ་བདག། སྤྱན་རས་གཟིགས་དབང་འགྲུབ་གྱུར་ནས།། འགྲོ་བ་གཅིག་ཀྱང་མ་ལུས་པ།། ཁྱེད་ཀྱི་ས་ལ་འགོད་པར་ཤོག། (ཡིག་བརྒྱ་སོགས་བཟོད་གསོལ།) ཡེ་ཤེས་པ་དགྱེས་བཞིན་དུ་རང་ལ་ཐིམ་པར་གྱུར། ཉིན་མོ་བདེ་ལེགས། (སོགས་ཤིས་པ་བརྗོད་པས་མཐའ་བརྒྱན་པར་བྱའོ།།)
(ཞེས་པ་འདི་ཡང་གམ་བཅར་བ་མཆོད་དཔོན་ཡེ་ཤེས་དམ་ཆོས་ཀྱི་འདོད་མོས་ལྟར་༧ཤཱཀྱའི་དགེ་སྦྱོང་ཐུབ་བསྟན་རྒྱ་མཚོས་སྨྲས་པའོ།། །།)
No comments:
Post a Comment