༄༅། །སྐྱོབ་པ་འཇིག་རྟེན་མགོན་པོའི་གསུང་སྒྲོལ་མའི་འདོད་གསོལ་སྐྱབས་བདུན་མའི་ཚིག་དོན་ཅུང་ཟད་བཤད་པ་བཞུགས་སོ།།
ན་མོ་ཨརྱ་ཏཱ་ར་ཡེ།
མ་སྐྱེ་བ་མེད་པའི་ཆོས་དབྱིངས་ན།།
ཡུམ་རྗེ་བཙུན་ལྷ་མོ་སྒྲོལ་མ་བཞུགས།།
དེ་སེམས་ཅན་ཀུན་ལ་བདེ་སྟེར་མ།།
བདག་འཇིགས་པ་ཀུན་ལས་བསྐྱབ་ཏུ་གསོལ།།
འཁོར་འདས་ཀྱི་ཆོས་ཀུན་གང་ལས་ཤར་ཞིང་གང་དུ་ནུབ་པའི་གཞིི་མ་དོན་དམ་པར་སྐྱེ་བ་མེད་པའི་ཆོས་དབྱིངས་ཀྱི་ཀློང་དེ་ན་མཁྱེན་བརྩེ་ནུས་གསུམ་གྱི་བདག་ཉིད་ཡུམ་རྗེ་བཙུན་མ་ལྷ་མོ་སྒྲོལ་མ་བཞུགས་པ་དེ་ནི་སེམས་ཅན་ཀུན་ལ་གནས་སྐབས་དང་མཐར་ཐུག་གི་བདེ་བ་ཀུན་སྟེར་བར་མཛད་པའི་མ་ཡིན་པས། ཉམ་ཐག་པའི་བདག་སོགས་སེམས་ཅན་རྣམས་འཁོར་བ་དང་ངན་སོང་གི་འཇིགས་པ་ཀུན་ལས་ལྷ་མོ་སྒྲོལ་མ་ཁྱེད་ཀྱིས་བསྐྱབ་ཏུ་གསོལ།
རང་ཆོས་སྐུ་ཡིན་པར་མ་ཤེས་པར།།
སེམས་ཉོན་མོངས་དབང་དུ་གྱུར་པ་ཡིས།།
མ་འཁོར་བར་འཁྱམས་པའི་སེམས་ཅན་ལ།།
ཡུམ་ལྷ་མོ་ཁྱོད་ཀྱི་བསྐྱབ་ཏུ་གསོལ།།
རང་སེམས་ཆོས་སྐུ་སྟེ་སེམས་ཀྱི་རང་བཞིན་ལ་དྲི་མ་མ་བསླད་པ་ཡིན་པར་མ་ཤེས་པར། སེམས་ཉོན་མོངས་པའི་གཞན་དབང་དུ་གྱུར་པ་ཡིས་མར་གྱུར་པ་མཐའ་མེད་པའི་འཁོར་བར་གཏན་དུ་འཁྱམས་པའི་སེམས་ཅན་རྣམས་ལ་ཡུམ་ལྷ་མོ་ཁྱོད་ཀྱིས་ཐུགས་བརྩེས་མ་དོར་བར་ཁམས་གསུམ་འཁོར་བ་འདི་ནས་བསྐྱབ་ཏུ་གསོལ།
ཆོས་སྙིང་ནས་རྒྱུད་ལ་མ་སྐྱེས་པར།།
ཐ་སྙད་ཚིག་གི་རྗེས་འབྲངས་ནས།།
གྲུབ་མཐའ་ངན་པས་བསླུས་པ་ལ།།
ཡང་དག་གི་ལྷ་མོས་བསྐྱབ་ཏུ་གསོལ།།
རང་ཉིད་ཐར་པ་དང་ཐམས་ཅད་མཁྱེན་པར་བགྲོད་པའི་ཆོས་མཚན་ཉིད་པ་ས་ལམ་ཉམས་རྟོགས་རྣལ་མ་ཞིག་སྙིང་ནས་རྒྱུད་ལ་མ་སྐྱེས་པར་གཞན་ངོར་འགྲིག་འགྲིག་མོ་དང་ངོ་མཚར་མཚར་གྱི་ཐ་སྙད་ཚིག་གི་འཁྲི་བ་སྐམ་པོ་རྐྱང་པའི་རྗེས་སུ་འབྲངས་ཆེས་ནས་གཞན་དང་གཤགས་འགྱེས་པ་ཁོ་ནས་ཆོག་པར་འཛིན་པའི་གྲུབ་མཐའ་འམ་ལྟ་བ་ངན་པས་བསླུས་པ་རྣམས་ལ་ཡང་དག་གི་ལམ་སྟོན་མཛད་པའི་ལྷ་མོ་ཁྱེད་ཀྱིས་ཅི་ནས་བསྐྱབ་ཏུ་གསོལ།
རྟོགས་པར་དཀའ་བ་རང་གི་སེམས།།
མཐོང་ནས་གོམས་པར་མི་བྱེད་པར།།
བྱ་བ་ངན་པས་གཡེངས་པ་ལ།།
ཡུམ་དྲན་པའི་ལྷ་མོས་བསྐྱབས་ཏུ་གསོལ།།
རྟོགས་པར་དཀའ་བ་དང་རྟོགས་ན་གཏན་དུ་གྲོལ་བའི་རང་གི་སེམས་ཀྱི་གནས་ལུགས་ཐོག་མར་ཐོས་བསམ་གྱིས་མཐོང་པར་བྱས་ནས་སྤང་བྱ་སྒྲིབ་གཉིསཀྱི་་གཉེན་པོ་གོམས་པར་མི་བྱེད་པར། རང་ཉིད་སྐྱེ་བ་ནས་ཚེ་རབས་སུ་སྡུག་ལ་སྦྱོར་བའི་ཚེ་འདི་སྣང་གི་བྱ་བ་ངན་པས་གཡེངས་པ་བདག་ཅག་ལ་ཡུམ་གཅིག་དྲན་པ་ཙམ་གྱིས་གདུང་བ་ཀུན་སེལ་བའི་ལྷ་མོ་ཁྱེད་ཀྱིས་བསྐྱབ་ཏུ་གསོལ།
སེམས་རང་བྱུང་གཉིས་མེད་ཡེ་ཤེས་ལ།།
གཉིས་སུ་འཛིན་པའི་བག་ཆགས་ཀྱིས།།
ཇི་ལྟར་བྱས་ཀྱང་བཅིངས་པ་རྣམས།།
ཐུགས་གཉིས་མེད་ཀྱི་ལྷ་མོས་བསྐྱབ་ཏུ་གསོལ།།
རང་གི་སེམས་དེ་ཉིད་རང་བྱུང་བཅོས་མིན་རིག་པ་སྣང་ཞེན་གྱི་སྤྲོས་པ་གཉིས་ཀ་མེད་པའི་མཉམ་བཞག་ཟག་མེད་ཡེ་ཤེས་གཉིས་དེ་བཞིན་ཉིད་ཀྱི་་ངོ་བོར་དབྱེར་མ་མཆིས་པ་ཡིན་པ་ལ། དེ་ལྟར་མ་རྟོགས་པར་རང་བཞིན་གྱིས་ཐ་དད་པ་གཉིས་སུ་འཛིན་པའི་ཐོག་མ་མེད་པ་ནས་གོམས་པའི་བག་ཆགས་ཀྱི་དབང་གིས་ལས་དགེ་བའམ་མི་དགེ་བ་ཇི་ལྟར་བྱས་ཀྱང་འཁོར་བར་བཅིངས་ནས་ཐར་བའི་སྐབས་མ་རྙེད་པ་བདག་ཅག་རྣམས་ཐུགས་གཉིས་མེད་ཀྱི་ངང་དུ་སླར་མི་ལྡང་བར་མཉམ་པརབཞག་པའི་ལྷ་མོ་ཁྱེད་ཀྱིས་བསྐྱབ་ཏུ་གསོལ།
ཡང་དག་གི་དོན་ལ་གནས་བྱས་ཀྱང་།།
རྒྱུ་འབྲས་ཀྱི་རྟེན་འབྲེལ་མི་ཤེས་པས།།
ཤེས་བྱའི་དོན་ལ་རྨོངས་པ་ལ།།
ཡུམ་ཀུན་མཁྱེན་གྱི་ལྷ་མོས་བསྐྱབ་ཏུ་གསོལ།།
རང་གིས་ཡང་དག་གི་དོན་ཡིན་ལུགས་ལ་གནས་པ་རློམ་པར་བྱས་ཀྱང་། རང་བཞིན་མེད་པའི་སྒྲུབ་བྱེད་ཀྱི་གཙོ་བོ་རྒྱུ་འབྲས་ཀྱི་རྟེན་འབྲེལ་མི་ཤེས་པས་ནི་ཐར་འདོད་རྣམས་ཀྱི་ཤེས་པར་བྱ་བའི་དོན་གྱི་སྙིང་པོ་དེ་བཞིན་ཉིད་ལ་རྨོངས་པ་བདག་ཅག་ལ་ཡུམ་མཆོག་ཇི་ལྟ་ཇི་སྙེད་ཀྱི་ཆོས་ཀུན་མཁྱེན་གྱི་ལྷ་མོ་ཁྱེད་ཀྱིས་བསྐྱབ་ཏུ་གསོལ།
སྤྲོས་བྲལ་ནམ་མཁའི་མཚན་ཉིད་ཅན།།
ཐམས་ཅད་དེ་དང་དབྱེར་མེད་ཀྱིས།།
ད་དུང་སློབ་མའི་གང་ཟག་ལ།།
ཡུམ་རྫོགས་སངས་རྒྱས་ཀྱིས་བསྐྱབ་ཏུ་གསོལ།།
ཡེ་གདོད་མ་ནས་མཐའ་བཞིའི་སྤྲོས་པ་དང་བྲལ་བ་གནས་ལུགས་སྟོང་པ་ཉིད་དེ་ནི་དགག་བྱ་རྣམ་པར་བཅད་པ་ཙམ་གྱི་ནམ་མཁའི་མཚན་ཉིད་ཅན་ཡིན་པ་དང་། སྣང་ཞིང་སྲིད་པའི་ཀུན་རྫོབ་པའི་ཆོས་འདི་ཐམས་ཅད་གནས་ལུགས་སྟོང་པ་ཉིད་དེ་དང་དབྱེར་མེད་པ་ཡིན་མོད་ཀྱིས། ཚུལ་དེ་ལྟར་ད་དུང་ཡང་མི་ཤེས་པའི་སློབ་མའི་གང་ཟག་བདག་ཅག་ལ་རྒྱལ་བ་ཀུན་གྱི་ཡུམ་གཅིག་རྗེ་བཙུན་མ་འཕགས་མ་སྒྲོལ་མ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་བསྐལ་པ་དཔག་ཏུ་མེད་པའི་སྔོན་རོལ་ནས་མངོན་དུ་མཛད་པ་ཁྱེད་ཀྱིས་བསྐྱབ་ཏུ་གསོལ།།
ཞེས་པའང་ཤྲཱིས་ ༢༠༡༨.༤.༡༠ མཚན་མོར་གང་དྲན་བྲེལ་སྟབས་སུ་སྤེལ་བས་ནོངས་པ་ཅི་མཆིས་བླ་མ་ལྷ་དང་བཅས་པར་བཟོད་པར་གསོལ་ལོ།། །།
No comments:
Post a Comment