སྡོམ་ (བློ་གླིང་།) ལས།
འབྲས་བུའི་སྒ་ནས་ལྷ་སོགས་བཅུ་པོ་ལ།།
མཐོང་སོགས་བཅུ་བཅུ་སྦྱོར་བས་བརྒྱ་ཕྱེ་ཞིང་།།
ཞེས་པའི་ལྷ་སོགས་བཅུ་དང་མཐོང་སོགས་བཅུ་ནི། མདོ་རྩ་བ་ (སྡེ་བསྟན། འདུལ་བ། ཞུ་པ། འདུལ་བའི་མདོ། སློབ་དཔོན་ཡོན་ཏན་འོད། ༡༨ ན ༤) ལས།
༡ ལྷ་དང་། ༢ ཀླུ་དང་། ༣ གནོད་སྦྱིན་དང་། ༤ དྲི་ཟ་དང་། ༥ མིའམ་ཅི་དང་། ༦ ལྟོ་འཕྱེ་ཆེན་པོ་དང་། ༧ ཡི་དགས་དང་། ༨ ཤ་ཟ་དང་། ༩ གྲུལ་བུམ་དང་། ༡༠ ལུས་སྲུལ་པོའི་ཟླ་ཉིད་ལའོ།།
ཞེས་དང་། དེ་ཉིད་ (༡༨ ན ༣) ལས།
༡ མཐོང་ངོ་།། ༢ བདག་མཐོང་ངོ་།། ༣ སྒྲ་ཐོས་སོ།། ༤ བདག་གིས་སྒྲ་ཐོས་སོ།། ༥ འགྲོའོ།། ༦ བདག་གི་དྲུང་དུ་འོང་ངོ་།། ༧ ལྷན་ཅིག་གཏམ་འདྲེའོ།། ༨ ཕེབས་པར་སྨྲའོ།། ༩ སོ་སོར་ཀུན་དགའོ།། ༡༠ བདག་དང་རྟག་ཏུ་ཡང་ལྷན་ཅིག་གནས་པར་བྱེད་དོ་ཞེས་སྨྲ་བ་དེ་ཉིད་དོ།།
ཞེས་གསུངས་སོ།།
ཡང་སྡོམ་ལས།
ངོ་བོའི་སྒོ་ནས་མི་རྟག་ལ་སོགས་དང་།།
མི་སྡུག་ལ་སོགས་འདུ་ཤེས་བཅུ་བཅུ་གསུངས།།
ཞེས་པའི་འདུ་ཤེས་བཅུ་ཚན་གཉིས་ནི། ཊཱིཀྐ་རྒྱ་ཆེར་འགྲེལ་ (སྡེ་བསྟན། འདུལ་བ། འུ་པ། འདུལ་བའི་མདོའི་རྒྱ་ཆེར་འགྲེལ་པ། སློབ་དཔོན་ཆོས་ཀྱི་བཤེས་གཉེན། ༡༤༨ ན ༥) ལས།
མི་རྟག་པ་ལ་སོགས་པའི་འདུ་ཤེས་ཞེས་བྱ་བ་ནི། མི་རྟག་པའི་འདུ་ཤེས་ལ་སོགས་པའི་འདུ་ཤེས་བཅུ་དང་། མི་སྡུག་པའི་འདུ་ཤེས་ལ་སོགས་པའི་འདུ་ཤེས་བཅུ་སྟེ། ༡ མི་རྟག་པའི་འདུ་ཤེས་དང་། ༢ མི་རྟག་པ་ལ་སྡུག་བསྔལ་བའི་འདུ་ཤེས་དང་། ༣ སྡུག་བསྔལ་བ་ལ་བདག་མེད་པའི་འདུ་ཤེས་དང་། ༤ ཟས་ལ་མི་མཐུན་པའི་འདུ་ཤེས་དང་། ༥ འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་དང་། ༦ ཉེས་དམིགས་ཀྱི་འདུ་ཤེས་དང་། ༧ སྤོང་བའི་འདུ་ཤེས་དང་། ༨ འདོད་ཆགས་དང་བྲལ་བའི་འདུ་ཤེས་དང་། ༩ འགོག་པའི་འདུ་ཤེས་དང་། ༡༠ འཆི་བའི་འདུ་ཤེས་དང་།
ཞེས་པས་མི་རྟག་པའི་འདུ་ཤེས་སོགས་བཅུ་དང་། དེ་བཞིན་མི་སྡུག་པའི་འདུ་ཤེས་སོགས་བཅུ་ཡང་དེའི་འཕྲོར།
༡ མི་སྡུག་པའི་འདུ་ཤེས་དང་། ༢ རྣམ་པར་བསྔོས་པའི་འདུ་ཤེས་དང་། ༣ རྣམ་པར་རྣགས་པའི་འདུ་ཤེས་དང་། ༤ རྣམ་པར་བམ་པའི་འདུ་ཤེས་དང་། ༥ རྣམ་པར་འབུས་གཞིགས་པའི་འདུ་ཤེས་དང་། ༦ རྣམ་པར་ཟོས་པའི་འདུ་ཤེས་དང་། ༧ རྣམ་པར་དམར་བའི་འདུ་ཤེས་དང་། ༨ རྣམ་པར་འཐོར་བའི་འདུ་ཤེས་དང་། ༩ རུས་གོང་གི་འདུ་ཤེས་དང་། ༡༠ སྟོང་པ་ཉིད་དུ་སོ་སོར་རྟོགས་པའི་འདུ་ཤེས་སོ།།
ཞེས་གསུངས་སོ༎
No comments:
Post a Comment