བྷྱོཿ རྒྱལ་བ་ཀུན་ཡུམ་དོན་དམ་ཆོས་ཀྱི་དབྱིངས༎ དག་པ་རབ་འབྱམས་སྤྲོ་བསྡུའི་བྱེད་པོ་མཆོག། ངག་གི་དབང་ཕྱུག་རྡོ་རྗེ་དབྱངས་ཅན་མ༎ གདུག་པ་འདུལ་ཕྱིར་མི་སྡུག་སྲིན་མོའི་ཚུལ༎ ཉི་མའི་གཉེན་གྱི་བསྟན་པ་སྲུང་བའི་གཙོ༎ རྗེས་འཇུག་རྣལ་འབྱོར་བུ་བཞིན་སྐྱོང་བའི་མ༎ དམ་ཉམས་སྲོག་དབུགས་སྡུད་པའི་བཤན་པ་མོ༎ མི་བཟད་ཆོ་འཕྲུལ་དཔག་པར་དཀའ་བའི་བདག། དག་དང་མ་དག་སེམས་ཀྱི་སྣང་ངོ་རུ༎ འཁོར་འདས་སྣ་ཚོགས་མ་ངེས་གཟུགས་སྟོན་ཀྱང་༎ རྩེ་གཅིག་བྱང་ཆུབ་བསྒྲུབ་པའི་རྣལ་འབྱོར་ལ༎ བདེ་ཆེན་དགའ་བཞིའི་དཔལ་སྟེར་ཕོ་ཉ་མོ༎ གནས་གསུམ་མཁའ་འགྲོ་ཡོངས་ཀྱི་བདག་མོ་སྟེ༎ སྲིད་གསུམ་དབང་བསྒྱུར་དངོས་གྲུབ་ཆར་དུ་འབེབས༎ ཐོགས་མེད་མྱུར་མགྱོགས་འཕྲིན་ལས་འོད་ཞགས་ཀྱིས༎ བརྟན་གཡོའི་ཕྱྭ་གཡང་འགུགས་པའི་དབང་གི་ལྷ༎ དེ་ཕྱིར་དེང་འདིར་རྣལ་འབྱོར་བདག་ཅག་གིས༎ སྲིད་དང་ཞི་བའི་དངོས་གྲུབ་སྒྲུབ་པའི་ཕྱིར༎ སྲིད་གསུམ་བདག་མོ་གསོལ་མཆོད་བསྐུལ་བགྱིད་ན༎ ལྷུན་གྲུབ་དབང་གི་འཕྲིན་ལས་དུས་ལ་བབས༎ རང་ཉིད་ལྷར་གསལ་གཟི་བྱིན་གྱིས་བསྐུལ་བས༎ འཁོར་བཅས་ཐུགས་སྲོག་འོད་དམར་ལྕགས་ཀྱུ་ཡིས༎ སྲིད་ཞིའི་ཕུན་ཚོགས་ཕྱྭ་གཡང་དངོས་གྲུབ་ཀུན༎ བཀྲ་ཤིས་རྟགས་རྫས་རྒྱལ་སྲིད་འདོད་ཡོན་ཚོགས༎ བདུད་རྩི་འོད་ཟེར་སྣ་ལྔ་འཁྲིགས་བཞིན་དུ༎ ཆར་ལྟར་བབ་སྟེ་རྟེན་ལ་ཐིམ་པ་ཡིས༎ ཕུན་ཚོགས་འདོད་དགུའི་ལོངས་སྤྱོད་རྒྱས་པར་གྱུར༎
ཨོ༑ འགྱུར་མེད་མོས་གུས་རྟེན་འབྱུང་མཁའ་དབྱིངས་སུ༎ བླ་མ་མཆོག་གསུམ་བྱིན་རླབས་དབྱར་གྱི་སྤྲིན༎ མཆོག་ཐུན་དངོས་གྲུབ་གྲུ་ཆར་འདོད་འཇོ་བའི༎ ཕུན་ཚོགས་དངོས་གྲུབ་ཕྱྭ་དང་གཡང་དུ་སྩོལ༎ མ་སྨད་ལེགས་བྱས་རིན་ཆེན་བུམ་བཟང་དུ༎ འཆི་མེད་རྡོ་རྗེའི་སྲོག་གི་ཨ་མྲྀ་ཏ༎ རབ་འཁྱིལ་བསོད་ནམས་ཡོངས་འདུའི་ཁ་རྒྱན་ཅན༎ ཚེ་དཔལ་དངོས་གྲུབ་ཕྱྭ་དང་གཡང་དུ་སྩོལ༎ གཟུངས་སྤོབས་རྣམ་འབྱེད་རྟ་བདུན་འོད་སྣང་གིས༎ རབ་འབྱམས་གཙུག་ལག་པདྨོ་རབ་ཕྱེ་སྟེ༎ ལེགས་བཤད་སྦྲང་རྩིའི་དགའ་སྟོན་ཆད་མེད་པའི༎ ལུང་ཆོས་དངོས་གྲུབ་ཕྱྭ་དང་གཡང་དུ་སྩོལ༎ རྣམ་དག་སྡོམ་གསུམ་སྐྱེད་ཚལ་ཡངས་པ་རུ༎ ཐབས་ཤེས་ཏིང་འཛིན་རྐང་འཐུང་འབུམ་རྒྱས་པས༎ འགྲོ་ལ་ཕན་བདེའི་གྲིབ་བསིལ་སྲིད་མཐའི་བར༎ སྦྱིན་པའི་ཉམས་རྟོགས་ཕྱྭ་དང་གཡང་དུ་སྩོལ།། གང་འཚམས་འཁོར་ལོ་གསུམ་གྱི་བྱ་བ་ཡིས༎ སྐྱེ་དགུའི་ཕན་བདེའི་གཞི་གཅིག་ཐུབ་པའི་བསྟན༎ འཛིན་ཅིང་སྤེལ་བའི་ཁུར་གྱིས་མི་ངལ་བའི༎ ཀུན་བཟང་སྤྱོད་པའི་ཕྱྭ་གཡང་དེང་འདིར་སྩོལ༎ སྔོན་བསགས་རྣམ་པར་དཀར་བའི་ནོར་འཛིན་གཞིར༎ ལོངས་སྤྱོད་འདོད་དགུའི་རྒྱ་མཚོ་རབ་འཁྱིལ་བར༎ མཆོད་སྦྱིན་རླབས་ཀྱི་ཕྲེང་བ་འབུམ་འགྱེད་པའི༎ འཛད་མེད་ནམ་མཁའ་མཛོད་ཀྱི་ཕྱྭ་གཡང་སྩོལ༎ རིན་ཆེན་འབྲུ་དར་བང་མཛོད་ཕྱུར་བུར་གཏམས༎ རྟ་ལུག་གནག་ཕྱུགས་རི་ཀླུང་མ་ལུས་ཁྱབ༎ མཁོ་དགུའི་བཟའ་བཏུང་གོས་རྒྱན་འཁོར་གཡོག་སོགས༎ ཡིད་བཞིན་ལྷུན་གྱིས་འགྲུབ་པའི་ཕྱྭ་གཡང་སྩོལ༎ ལུས་ངག་ཡིད་ཀྱི་བྱ་བའི་ཆུ་ཀླུང་ཀུན༎ རྣམ་དཀར་ལེགས་པའི་ལམ་གྱི་ཡུར་བ་རུ༎ ལེགས་ཞུགས་བསྟན་འགྲོའི་དོན་གྱི་རྒྱ་མཚོ་ཆེར༎ ཐོགས་མེད་འཇུག་པའི་ཕྱྭ་གཡང་དངོས་གྲུབ་སྩོལ༎ ནག་ཕྱོགས་བདུད་ཀྱི་གཡུལ་ལས་རབ་རྒྱལ་ཞིང་༎ ཆོས་སྲིད་ལེགས་ཚོགས་དབྱར་གྱི་ཆུ་བོ་བཞིན༎ སྲིད་གསུམ་དབང་སྡུད་གནོད་བྱེད་ཚར་གཅོད་པའི༎ འཕྲིན་ལས་རྣམ་བཞིའི་ཕྱྭ་གཡང་དངོས་གྲུབ་སྩོལ༎ སྣང་ཞིང་སྲིད་པའི་དཀྱིལ་འཁོར་མ་ལུས་པ༎ རྣམ་དག་བརྟན་གཡོའི་རོལ་པར་འབྱམས་ཀླས་ཤིང་༎ ཡུལ་དྲུག་ལོངས་སྤྱོད་སྒྱུ་མའི་རོལ་པ་ཡིས༎ བདེ་སྟོང་ལང་ཚོ་རྒྱས་པའི་དངོས་གྲུབ་སྩོལ༎ མཁའ་འགྲོའི་དབང་ཕྱུག་གཏུམ་ཆེན་དཔལ་འབར་མ༎ ཐབས་མཆོག་བདེ་ཆེན་བདུད་རྩིའི་མཆོད་ཡོན་གྱིས༎ རབ་མྱོས་བརྒྱད་ཟུང་མི་ཤིགས་རྡོ་རྗེའི་གར༎ ཨེ་ཝཾ་ཟུང་མཇུག་དབྱིངས་སུ་བསྒྱུར་བར་མཛོད༎ མདོར་ན་བྱང་ཆེན་དེ་སྲིད་འབྲལ་མེད་དུ༎ མ་སྲིང་བཞིན་དུ་བརྩེ་བས་གྲོགས་མཛད་ནས༎ ཅི་བསམ་འདོད་དགུའི་རེ་འབྲས་ཐོགས་མེད་དུ༎ ཡིད་བཞིན་དབང་གི་རྒྱལ་པོ་ལྟར་འགྲུབ་མཛོད༎
(ཅེས་མ་གཅིག་སྲིད་གསུམ་བདག་མོ་ལ་བརྟེན་ནས་ཕྱྭ་གཡང་འགུགས་པའི་འཕྲིན་བཅོལ་འདི་ནི། དབལ་ཤུལ་དགེ་སློང་ཚུལ་ཁྲིམས་བསྟན་འཛིན་ནས་བསྐུལ་ངོར། ྋ རོང་པོ་ཆོས་རྗེའི་སྤྲུལ་མིང་བ་བློ་བཟང་འཕྲིན་ལས་ཀྱིས་སྦྱར་བ་ཛ་ཡནྟུ༎ ༎)
No comments:
Post a Comment