༄༅། །རྗེ་བཙུན་སྒྲོལ་མ་དང་དཔལ་ལྡན་ལྷ་མོ་སྦྲགས་སྒྲུབ་ཀྱི་གཡང་འགུགས་ནོར་བུ་དགའ་འཁྱིལ་ཞེས་བྱ་བ་བཞུགས་སོ༎
༄༅། །ན་མོ་གུ་རུ་ཨཱརྱ་ཏཱ་རེ་ཤྲཱི་མཱན་དེ་ཝཱི་ཡེ། འདིར་རྗེ་བཙུན་སྒྲོལ་མ་དང་དཔལ་ལྡན་ལྷ་མོ་སྦྲགས་ནས་མཆོད་པའི་སྐབས་སུ་གཡང་འགུགས་བྱ་བའི་ཚུལ་ནི། མཎྜལ་བཞི་དང་འབྲེལ་བའི་མཆོད་ཆོག་དེ་གཞི་བདག་གཏོར་བསྔོའི་བར་སྔོན་དུ་བཏང་། ཆོ་ག་དངོས་ནི། ཀྱཻ༑ རྒྱལ་བ་ཀུན་གྱི་འཕྲིན་ལས་རྣམས༎ གཅིག་བསྡུས་བླ་མ་རྗེ་བཙུན་མར༎ གུས་པ་ཆེན་པོས་གསོལ་འདེབས་ན༎ བྱིན་བརླབས་དངོས་གྲུབ་སྩལ་དུ་གསོལ༎ དབུ་རྒྱན་འོད་ཀྱི་ཕཻརང་བ་ཡིས༎ སྟེང་ཕྱོགས་ལྷ་ཡི་གཡང་ཁུག་ཅིག། གློག་དང་འདྲ་བའི་སྤྱན་གཉིས་ཀྱི༎ བར་གྱི་མི་ཡི་གཡང་ཁུག་ཅིག། གཡས་བསྐུམ་གཡོན་བརྐྱང་ཞབས་གཉིས་ཀྱིས༎ འོག་ཕྱོགས་ཀླུ་ཡི་གཡང་ཁུག་ཅིག། མཆོག་སྦྱིན་སྐྱབས་སྦྱིན་ཕྱག་རྒྱ་ཡིས༎ མཆོག་ཐུན་དངོས་གྲུབ་གཡང་ཁུག་ཅིག། རིན་པོ་ཆེ་ཡི་རྒྱན་མང་གིས༎ འདོད་དགུའི་ལོངས་སྤྱོད་གཡང་ཁུག་ཅིག། ལྷ་རྫས་དར་གྱི་ན་བཟའ་ཡིས༎ ཚུལ་ཁྲིམས་དག་པའི་གཡང་ཁུག་ཅིག། རིགས་བདག་ཚེ་དཔག་མེད་མགོན་གྱིས༎ འཆི་མེད་ཚེ་ཡི་གཡང་ཁུག་ཅིག། གསེར་མདོག་འོད་ཟེར་ཅན་མ་ཡིས༎ བསྲུང་སྐྱོབ་སྦ་བའི་གཡང་ཁུག་ཅིག། ནམ་མཁའི་མདོག་ཅན་རལ་གཅིག་མས༎ མཐུ་བྱད་བཟློག་པའི་གཡང་ཁུག་ཅིག། ཉེར་གཅིག་ལྷ་མོའི་ཚོགས་རྣམས་ཀྱིས༎ འཕྲིན་ལས་སྣ་ཚོགས་གཡང་ཁུག་ཅིག།
བྷྱོཿ འཕགས་མའི་ཐུགས་རྗེའི་རྣམ་པར་འཕྲུལ༎ བཀའ་སྲུང་དཔལ་ལྡན་ལྷ་མོ་༏༎ གུས་པས་མཆོད་ཅིང་གསོལ་འདེབས་ན༎ ལས་བཞིའི་དངོས་གྲུབ་སྩལ་དུ་གསོལ༎ དབུ་གདུགས་རྨ་བྱའི་སྒྲོ་མདོངས་ཀྱིས༎ ལྷ་ཡུལ་ཚེ་ཡི་གཡང་ཁུག་ཅིག། གུར་ཁྱིམ་མེ་རླུང་རབ་འཁྲུགས་པས༎ མི་ཡུལ་ཆོས་ཀྱི་གཡང་ཁུག་ཅིག། བཞུགས་གནས་ཁྲག་མཚོའི་ཀློང་འཁོར་གྱིས༎ ཀླུ་ཡུལ་ནོར་གྱི་གཡང་ཁུག་ཅིག། རྫུ་འཕྲུལ་ཤུགས་ལྡན་དྲེའུ་རྟ་ཡིས༎ རྐང་བཞི་ཕྱུགས་ཀྱི་གཡང་ཁུག་ཅིག། མགོ་པགས་སྦྲུལ་གྱི་རྟ་ཆས་ཀྱིས༎ འདོད་དགུའི་ལོངས་སྤྱོད་གཡང་ཁུག་ཅིག། ཞབས་གཉིས་མཛེས་བྱེད་ལྕགས་སྒྲོག་གིས༎ དགོན་སྡེར་བསྡད་པའི་གཡང་ཁུག་ཅིག། རིན་ཆེན་ཐོད་སྐམ་དབུ་རྒྱན་གྱིས༎ མཚན་ལྡན་བཤེས་གཉེན་གཡང་ཁུག་ཅིག། སྤྱན་གསུམ་གློག་ལྟར་འཁྱུག་པ་ཡིས༎ ཐོས་བསམ་སྒོམ་པའི་གཡང་ཁུག་ཅིག། སྦྲལ་དང་སེང་གེའི་སྙན་རྒྱན་གྱིས༎ རིགས་ལུང་གཏོང་བའི་གཡང་ཁུག་ཅིག། ཞལ་གདངས་མི་རོ་ཟ་བ་ཡིས༎ གནས་ལྔ་རིག་པའི་གཡང་ཁུག་ཅིག། ཨ་ལ་ལ་ཡི་གད་མོ་ཡིས༎ མཁས་རྣམས་མགུ་བའི་གཡང་ཁུག་ཅིག། ཕྱག་གཡས་རྡོ་རྗེ་བེ་ཅོན་གྱིས༎ ལོག་སྨྲ་ཚར་གཅོད་གཡང་ཁུག་ཅིག། ཕྱག་གཡོན་ཁྲག་བཀང་ཐོད་པ་ཡིས༎ སྐལ་ལྡན་རྗེས་འཛིན་གཡང་ཁུག་ཅིག། དབུ་སྐྲ་སྨ་ར་རབ་འབར་བས༎ སྙན་གྲགས་རྒྱས་པའི་གཡང་ཁུག་ཅིག། རིན་ཆེན་རུས་པའི་རྒྱན་བཟང་གིས༎ ཚུལ་ཁྲིམས་བསྲུང་བའི་གཡང་ཁུག་ཅིག། རེ་ལྡེ་དར་གོས་གཡང་གཞི་ཡིས༎ ལམ་གཙོ་གསུམ་གྱི་གཡང་ཁུག་ཅིག། མི་མགོ་ལྔ་བཅུའི་དོ་ཤལ་གྱིས༎ ཕྱིན་དྲུག་བསྡུ་བཞིའི་གཡང་ཁུག་ཅིག། ཁྲག་ཞག་ཐིག་ལེའི་སྐུ་རྒྱན་གྱིས༎ རྣམ་དག་དབང་བཞིའི་གཡང་ཁུག་ཅིག། སྟག་ཤམ་སྦྲུལ་གྱི་སྐ་རགས་ཀྱིས༎ ཟབ་ལམ་རིམ་གཉིས་གཡང་ཁུག་ཅིག། ལྟེ་གཙུག་ཉི་ཟླའི་དཀྱིལ་འཁོར་གྱིས༎ བདེ་སྟོང་ཟུང་འཇུག་གཡང་ཁུག་ཅིག། ཐུགས་དམ་ཤོ་རྡེ་དཀར་ནག་གིས༎ མངོན་ཤེས་ལྔ་ཡི་གཡང་ཁུག་ཅིག། ཁྲམ་སོགས་སྐུ་ཆས་སྣ་ཚོགས་ཀྱིས། མཆོག་ཐུན་དངོས་གྲུབ་གཡང་ཁུག་ཅིག། མ་སྲིང་གདོང་ཅན་རྣམ་གཉིས་ཀྱིས༎ འཁོར་སློབ་འདུ་བའི་གཡང་ཁུག་ཅིག། ཨུ་མ་དུང་སྐྱོང་ལྷ་མོ་ཡིས༎ བུ་ཚ་དར་བའི་གཡང་ཁུག་ཅིག། རབ་དྭངས་ཞི་བའི་ལྷ་མོ་ཡིས༎ ནད་གདོན་ཞི་བའི་གཡང་ཁུག་ཅིག། རབ་བརྗིད་རྒྱས་པའི་ལྷ་མོ་ཡིས༎ ཚེ་བསོད་རྒྱས་པའི་གཡང་ཁུག་ཅིག། རབ་ཆགས་དབང་གི་ལྷ་མོ་ཡིས༎ ཁམས་གསུམ་དབང་སྡུད་གཡང་ཁུག་ཅིག། རབ་རྔམ་དྲག་པོའི་ལྷ་མོ་ཡིས༎ དགྲ་བགེགས་བསྒྲལ་བའི་གཡང་ཁུག་ཅིག། རེས་འཁོར་དུས་བཞིའི་རྒྱལ་མོ་ཡིས༎ སྡེ་བཞིའི་དགའ་སྟོན་གཡང་ཁུག་ཅིག། ཇོ་མོ་ཚེ་རིང་མཆེད་ལྔ་ཡིས༎ རང་རང་དངོས་གྲུབ་གཡང་ཁུག་ཅིག། བོད་སྐྱོང་བསྟན་མ་བཅུ་གཉིས་ཀྱིས༎ བསྟན་འགྲོར་སྨན་པའི་གཡང་ཁུག་ཅིག། བཀའ་ཉན་འཁོར་ཚོགས་རྒྱ་མཚོ་ཡིས༎ གང་བསམ་འགྲུབ་པའི་གཡང་ཁུག་ཅིག།
ཀྱཻ༑ ཚངས་པ་བརྒྱ་བྱིན་ལ་སོགས་པ༎ ལྷ་ཡི་བསོད་ནམས་དཔལ་འབྱོར་གཡང་༎ དར་དཀར་གཡབ་ཅིང་སྤྱན་འདྲེན་ན༎ གནས་འདིར་ཕྱྭ་དང་གཡང་ལ་བྱོན༎ དགའ་བོ་འཇོག་པོ་ལ་སོགས་པ༎ ཀླུ་ཡི་མི་ཟད་གཏེར་གྱི་གཡང་༎ དར་དཀར་གཡབ་ཅིང་སྤྱན་འདྲེན་ན༎ གནས་འདིར་ཕྱྭ་དང་གཡང་ལ་བྱོན༎ འཁོར་ལོས་བསྒྱུར་བའི་རྒྱལ་པོ་སོགས༎ བར་གྱི་མི་ཡི་ཕྱུག་གཡང་དེ༎ དར་དཀར་གཡབ་ཅིང་སྤྱན་འདྲེན་ན༎ གནས་འདིར་ཕྱྭ་དང་གཡང་ལ་བྱོན༎ རྟ་ནོར་ར་ལུག་ལ་སོགས་པ༎ སྒོ་ན་རྐང་བཞི་ཕྱུགས་ཀྱི་གཡང་༎ དར་དཀར་གཡབ་ཅིང་སྤྱན་འདྲེན་ན༎ གནས་འདིར་ཕྱྭ་དང་གཡང་ལ་བྱོན༎གསེར་དངུལ་དར་ཟབ་ལ་སོགས་པ༎ ཕུག་ན་ནོམ་རྫས་འབྱོར་པའི་གཡང་༎ དར་དཀར་གཡབ་ཅིང་སྤྱན་འདྲེན་ན༎ གནས་འདིར་ཕྱྭ་དང་གཡང་ལ་བྱོན༎ བུ་དང་ཚ་བོ་ཡང་ཚ་སོགས༎ བར་ན་མགོ་ནག་མི་ཡི་གཡང་༎ དར་དཀར་གཡབ་ཅིང་སྤྱན་འདྲེན་ན༎ གནས་འདིར་ཕྱྭ་དང་གཡང་ལ་བྱོན༎ ཕ་རོལ་མི་མཐུན་དལུང་འཇོམས་པའི༎ སྙིང་སྟོབས་ལྡན་པའི་དཔའ་རྩལ་གཡང་༎ དར་དཀར་གཡབ་ཅིང་སྤྱན་འདྲེན་ན༎ གནས་འདིར་ཕྱྭ་དང་གཡང་ལ་བྱོན༎ མི་མཐུན་ཞི་བའི་བཀྲ་ཤིས་གཡང་༎ མཐིན་རྐྱེན་འཛོམས་པའི་ཕུན་ཚོགས་གཡང་༎ དར་དཀར་གཡབ་ཅིང་སྤྱན་འདྲེན་ན༎ གནས་འདིར་ཕྱྭ་དང་གཡང་ལ་བྱོན༎ མདོར་ན་སྔོན་བསགས་བསོད་ནམས་ཀྱི༎ ས་བོན་བྱིན་བརླབས་གྲུ་ཆར་གྱིས༎ བསྐྱངས་པས་དོན་གཉིས་ལོ་ཏོག་གིས༎ རེ་བའི་བང་བ་གང་བར་ཤོག། ༎
ཅེས་རྗེ་བཙུན་སྒྲོལ་མ་དང་དཔལ་ལྡན་ལྷ་མོ་སྦྲགས་སྒྲུབ་ཀྱི་གཡང་འགུགས་ནོར་བུ་དགའ་འཁྱིལ་ཞེས་བྱ་བ་འདི་ནི། དད་ལྡན་སློབ་མ་འགའ་ཞིག་གི་འདོད་མོས་ལྟར། ྋ ཐུའུ་བཀྭན་ཡོངས་འཛིན་གྱི་སྒྲོལ་མའི་གཡང་འགུགས་ལ་འཁོར་གཉིས་དང་ལྷ་མོའི་གཡང་འབོད་གསར་དུ་བཅུག་སྟེ། ྋ བཀའ་བཅུ་པ་བློ་བཟང་རྟ་དབྱངས་ཀྱིས་སུག་བྲིས་སུ་བགྱིས་པ་དགེ་ལེགས་འཕེལ༎ ༎
No comments:
Post a Comment