༄༅། །མཁྱེན་གསུམ་གྱི་རྣམ་པ་བརྒྱ་བདུན་ཅུ་རྩ་གསུམ་གྱི་སྡོམ་ཚིག་གི་བསྡུས་འགྲེལ་བློ་གསར་མགུལ་རྒྱན་མཛེས་པའི་ཕྲ་ཚོམ་ཞེས་བྱ་བ་བཞུགས་སོ༎
༄༅། །ནམོགུརུམུཎེནྡྲ་ཡ།
འདྲེན་མཆོག་མཉམ་མེད་ཐུབ་པའི་དབང་པོ་དང་༎
དབྱེར་མེད་རྩ་བའི་བླ་མར་གུས་བཏུད་ནས༎
ཐམས་ཅད་མཁྱེན་པ་གསུམ་གྱི་འཛིན་སྟངས་ཡུལ༎
དོན་རྣམ་སྡོམ་དུ་བསྡུས་པ་འགྲེལ་བར་བྱ༎
མཁྱེན་གསུམ་རྣམ་པ་བརྒྱ་དང་བདུན་ཅུ་གསུམ༎
གཞི་ཤེས་ཉེར་བདུན་ལམ་ཤེས་སུམ་ཅུ་དྲུག།
རྣམ་མཁྱེན་རྣམ་པ་བརྒྱ་དང་བཅུ་རྣམས་སོ༎
དེ་ལ་མཁྱེན་གསུམ་རྣམ་པ་ལ་བརྒྱ་དང་བདུན་ཅུ་རྩ་གསུམ་ཡོད་དེ། གཞི་ཤེས་ཀྱི་རྣམ་པ་ཉེར་བདུན། ལམ་ཤེས་ཀྱི་རྣམ་པ་སུམ་ཅུ་དྲུག། རྣམ་མཁྱེན་གྱི་རྣམ་པ་བརྒྱ་དང་བཅུ་རྣམས་སུ་ཡོད་པའི་ཕྱིར།
དང་པོ་གཞི་ཤེས་རྣམ་པ་ཉེར་བདུན་ནི༎
བདེན་པ་གསུམ་ལ་བཞི་བཞི་ལམ་བཅོ་ལྔ༎
དང་པོ་གཞི་ཤེས་ཀྱི་རྣམ་པ་ཉི་ཤུ་རྩ་བདུན་ཡོད་དེ། གཞི་ཤེས་ཀྱི་སྡུག་བསྔལ་བདེན་པའི་རྣམ་པ་བཞི་དང་། ཀུན་འབྱུང་བདེན་པའི་བཞི། འགོག་བདེན་གྱི་བཞི། གཞི་ཤེས་ཀྱི་ལམ་བདེན་གྱི་རྣམ་པ་བཅོ་ལྔ་ཡོད་པའི་ཕྱིར།
མེད་དང་མི་སྐྱེ་དབེན་དང་མི་བརྫི་བཞི༎
གནས་མེད་ནམ་མཁའ་བརྗོད་མེད་མིང་མེད་བཞི༎
འགྲོ་མེད་མི་འཕྲོགས་ཟད་མེད་སྐྱེ་མེད་བཞི༎
རིམ་བཞིན་སྡུག་ཀུན་འགོག་པའི་རྣམཔ་འོ༎
གཞི་ཤེས་ཀྱི་སྡུག་བསྔལ་བདེན་པའི་རྣམ་པ་བཞི་ཡོད་དེ། མེད་པའི་རྣམ་པ་དང་མི་སྐྱེ་བ་དང་། དབེན་པ་དང་། མི་བརྫི་བའི་རྣམ་པ་སྟེ་བཞི་ཡོད་པའི་ཕྱིར། གཞི་ཤེས་ཀྱི་ཀུན་འབྱུང་བདེན་པའི་རྣམ་པ་བཞི་ཡོད་དེ།གནས་མེད་པ་དང་། ནམ་མཁའ་དང་། བརྗོད་དུ་མེད་པ་དང་། མིང་མེད་པའི་རྣམ་པ་སྟེ་བཞི་ཡོད་པའི་ཕྱིར། གཞི་ཤེས་ཀྱི་འགོག་བདེན་གྱི་རྣམ་པ་བཞི་ཡོད་དེ། འགྲོ་བ་མེད་པ་དང་། མི་འཕྲོགས་པ་དང་། ཟད་པ་མེད་པ་དང་། སྐྱེ་བ་མེད་པའི་རྣམ་པ་སྟེ་བཞི་ཡོད་པའི་ཕྱིར། བཞི་ཚན་གསུམ་སོ་སོའི་ངོས་འཛིན་ཡང་ཡོད་དེ། རིམ་པ་བཞིན་སྡུག་བསྔལ་བདེན་པའི་ཁྱད་ཆོས་སུ་གྱུར་པའི་མི་རྟག་སྡུག་བསྔལ་སྟོང་བདག་མེད་བཞི་དང་།ཀུན་འབྱུང་བདེ་པའི་ཁྱད་ཆོས་རྒྱུ་ཀུན་འབྱུང་རབ་སྐྱེ་རྐྱེན་བཞི། འགོག་བདེན་གྱི་རྣམ་པ་འགོག་པ་ཞི་བ་གྱ་ནོམ་ངེས་འབྱུང་བཞི་པོ་རྣམས་ཡིན་པའི་ཕྱིར།
བྱེད་པོ་ཤེས་པོ་འཕོ་པོ་འདུལ་བ་པོ༎
བདག་མེད་རྟོགས་པའི་མཐོང་ལམ་ཟག་མེད་བཞི༎
རྨི་ལམ་སྒྲ་བརྙན་མིག་ཡོར་སྨིག་རྒྱུ་སྒྱུ༎
ལྔ་པོ་ལྟ་བུར་རིམ་བཞིན་ཕྱི་དོན་གྱི༎
ངོ་བོ་ཉིད་མེད་མ་སྐྱེས་མ་འགགས་པ༎
གཟོད་མ་ནས་ཞི་རང་བཞིན་མྱ་ངན་འདས༎
དེ་ལྟར་རྟོགས་པའི་སྒོམ་ལམ་ཟག་བཅས་ལྔ༎
ཕྱི་རོལ་ཀུན་ཉོན་མེད་དང་རྣམ་བྱང་མེད༎
བག་ཆགས་གོས་མེད་དབྱེ་བའི་སྤྲོས་པ་མེད༎
རློམ་མེད་མི་གཡོའི་མཐོང་ལམ་ཟག་མེད་དྲུག།
དང་པོ་བཞི་ནི་ཉོན་སྒྲིབ་གཉེན་པོ་དང་༎
ལྷག་མ་ཤེས་སྒྲིབ་རགས་པའི་གཉེན་པོ་སྟེ༎
ལམ་གྱི་བདེན་པའི་རྣམ་པ་བཅོ་ལྔ་འོ༎
གཞི་ཤེས་ཀྱི་ལམ་བདེན་གྱི་རྣམ་པ་ལ་བཅོ་ལྔ་ཡོད་དེ། ཉོན་སྒྲིབ་ཀྱི་གཉེན་པོའི་རིགས་སུ་གནས་པའི་མཐོང་ལམ་ཟག་མེད་བཞི། གཟུང་བ་ཆོས་ཀྱི་བདག་འཛིན་གྱི་གཉེན་པོའི་རིགས་སུ་གནས་པའི་སྒོམ་ལམ་ཟག་བཅས་ལྔ། གཟུང་བ་ཆོས་ཀྱི་བདག་འཛིན་གྱི་གཉེན་པོའི་རིགས་སུ་གནས་པའི་མཐོང་ལམ་ཟག་མེད་དྲུག་རྣམས་སུ་ཡོད་པའི་ཕྱིར། ཉོན་སྒྲིབ་ཀྱི་གཉེན་པོའི་རིགས་སུ་གནས་པའི་མཐོང་ལམ་ཟག་མེད་བཞི་ཡོད་དེ། བྱེད་པ་པོ་བདག་མེད་པར་མངོན་སུམ་དུ་རྟོགས་པའི་མཐོང་ལམ་ཟག་མེད་དང་། དེ་བཞིན་དུ་ཤེས་པ་པོ་དང་། འཕོ་བ་པོ་དང་།འདུལ་བ་པོ་བདག་མེད་པར་མངོན་སུམ་དུ་རྟོགས་པའི་མཐོང་ལམ་ཟག་མེད་རྣམས་ཡིན་པའི་ཕྱིར། གཟུང་བ་ཆོས་ཀྱི་བདག་འཛིན་གྱི་གཉེན་པོའི་རིགས་སུ་གནས་པའི་སྒོམ་ལམ་ཟག་བཅས་ལྔ་ཡོད་དེ། རྨི་ལམ་ལྟར་ཕྱི་རོལ་དོན་གྱི་ངོ་བོ་ཉིད་མེད་པར་དོན་སྤྱིའི་ཚུལ་གྱིས་རྟོགས་པའི་སྒོམ་ལམ་ཟག་བཅས་དང་།སྒྲ་བརྙན་ལྟར་ཕྱི་རོལ་དོན་གྱི་མ་སྐྱེས་པ་དང་། མིག་ཡོར་ལྟར་ཕྱི་རོལ་དོན་གྱི་མ་འགགས་པ་དང་། སྨིག་རྒྱུ་ལྟར་ཕྱི་རོལ་དོན་གྱི་གཟོད་མ་ནས་ཞི་བ་དང་། སྒྱུ་མ་ལྟར་ཕྱི་རོལ་དོན་གྱི་རང་བཞིན་མྱ་ངན་འདས་པར་དོན་སྤྱིའི་ཚུལ་གྱིས་རྟོགས་པའི་སྒོམ་ལམ་ཟག་བཅས་རྣམས་ཡིན་པའི་ཕྱིར། གཟུང་བ་ཆོས་ཀྱི་བདག་འཛིན་གྱི་གཉེན་པོའི་རིགས་སུ་གནས་པའི་མཐོང་ལམ་ཟག་མེད་དྲུག་ཡོད་དེ།ཕྱི་རོལ་དོན་གྱི་ཀུན་ནས་ཉོན་མོངས་པ་མེད་པར་མངོན་སུམ་དུ་རྟོགས་པའི་མཐོང་ལམ་ཟག་མེད་དང་། ཕྱི་རོལ་དོན་གྱི་རྣམ་པར་བྱང་བ་མེད་པ་དང་། ཕྱི་རོལ་དོན་གྱི་བག་ཆགས་གོས་པ་མེད་པ་དང་། ཕྱི་རོལ་དོན་གྱི་དབྱེ་བའི་སྤྲོས་པ་མེད་པ་དང་། ཕྱི་རོལ་དོན་གྱི་རློམ་པ་མེད་པ་དང་། ཕྱི་རོལ་དོན་གྱི་མི་གཡོ་བར་མངོན་སུམ་དུ་རྟོགས་པའི་མཐོང་ལམ་ཟག་མེད་རྣམས་ཡིན་པའི་ཕྱིར་རོ།།
གཉིས་པ་ལམ་ཤེས་རྣམ་པ་སོ་དྲུག་ནི༎
ཀུན་འབྱུང་རྣམ་པ་བརྒྱད་དང་ལམ་གྱི་བདུན༎
སྡུག་བདེན་རྣམ་པ་ལྔ་དང་འགོག་བཅུ་དྲུག།
གཉིས་པ་ལམ་ཤེས་ཀྱི་རྣམ་པ་ལ་སོ་དྲུག་ཡོད་དེ། ལམ་ཤེས་ཀྱི་ཀུན་འབྱུང་བདེན་པའི་རྣམ་པ་བརྒྱད་དང་། ལམ་བདེན་གྱི་རྣམ་པ་བདུན། སྡུག་བསྔལ་བདེན་པའི་རྣམ་པ་ལྔ།འགོག་བདེན་གྱི་རྣམ་པ་བཅུ་དྲུག་རྣམ་པ་རྣམས་སུ་ཡོད་པའི་ཕྱིར།
ཀུན་འབྱུང་སྤང་གཉེན་སྒོ་ནས་བསྟན་པ་ནི༎
འདུན་དངའདོད་ཆགས་ཡང་སྲིད་ལ་དགའི་སྲེད༎
ཆགས་སྡང་གཏི་མུག་ཀུན་རྟོག་སེམས་ཅན་ཞེན༎
རྒྱུ་དང་ཀུན་འབྱུང་རབ་སྐྱེ་རྐྱེན་དང་བཞིར།།
རིམ་བཞིན་གསུམ་དང་གསུམ་དང་གཅིག་དང་གཅིག།
དེ་དག་རྩ་བའི་བདག་འཛིན་ཞེན་མེད་ཆས༎
ཀུན་བདེན་ལ་བརྟེན་དོན་རྣམ་བརྒྱད་གསུངས་བརྟག།
ལམ་ཤེས་ཀྱི་ཀུན་འབྱུང་བདེན་པའི་རྣམ་པ་སྤང་གཉེན་སྒོ་ནས་བསྟན་པ་ལ་བརྒྱད་ཡོད་དེ། ཡུལ་ལ་སྲེད་པའི་འདུན་པ་དང་། མི་འབྲལ་སྲེད་པའི་འདོད་ཆགས། ཡང་སྲིད་ལ་དགའ་བའི་སྲེད་པ། འདོད་ཆགས། ཞེ་སྡང་།གཏི་མུག གཙང་བདེ་རྟག་བདག་ཏུ་ཞེན་པའི་ཀུན་རྟོག །སེམས་ཅན་དུ་མངོན་པར་ཞེན་པ་རྣམས་ཡིན་པའི་ཕྱིར། བརྒྱད་པོ་དེ་དག་ཀུན་འབྱུང་བདེན་པའི་རྣམ་པ་རྒྱུ་ཀུན་འབྱུང་རབ་སྐྱེ་རྐྱེན་བཞི་ལ་སྦྱར་ཚུལ་ཡོད་དེ། དེ་དག་ལས་རིམ་བཞིན་རྒྱུའི་རྣམ་པ་ལ་གསུམ། ཀུན་འབྱུང་ལ་གསུམ། རབ་སྐྱེ་ལ་གཅིག །རྐྱེན་ལ་གཅིག་བཅས་སྦྱར་བའི་ཕྱིར། མཁས་པ་རྒྱལ་རོང་བློ་བཟང་ཚེ་རིང་གི་སྡོམ་ལས། དེ་དག་རྩ་བའི་བདག་འཛིན་ཞེན་མེད་ཆས༎ ཀུན་བདེན་ལ་བརྟེན་དོན་རྣམ་བརྒྱད་ཡིན་ནོ།།ཞེས་གསུངས་ནའང་བརྟག་དགོས་ཏེ། གསེར་ཕྲེང་ལས་སྤང་བྱ་ཉིད་ལ་དོན་རྣམ་དུ་གསུངས་ཤིང་། རྣམ་བཤད་དང་རྩ་ཊཱིཀ་ཏུའང་གཉེན་པོ་འཆད་པ་ན་སྤང་བྱ་བདུན་པོ་དེ་དག་གི་ཞེན་ཡུལ་མེད་པར་རྟོགས་པ་ཉིད་ལ་གསལ་བར་གསུངས་པའི་ཕྱིར།
ལམ་བདེན་དམ་བཅའ་འཐད་པའི་སྒོ་ནས་བསྟན༎
ཚད་མེད་མཐའ་གཉིས་མ་འབྲེལ་ཐ་མི་དད༎
མཆོག་ཏུ་འཛིན་མེད་རྣམ་པར་མི་རྟོག་པ༎
གཞལ་མེད་ཆགས་པ་མེད་པའི་རྣམ་པ་བདུན༎
ལམ་དང་རིགས་པ་སྒྲུབ་པ་ངེས་འབྱིན་བཞིར༎
རིམ་བཞིན་གཉིས་དང་གཉིས་དང་གཉིས་དང་གཅིག།
ངེས་འབྱིན་དམ་བཅའ་ཙམ་ལས་འཐད་མ་གསུངས༎
ལམ་ཤེས་ཀྱི་ལམ་བདེན་གྱི་རྣམ་པ་དམ་བཅའ་འཐད་པའི་སྒོ་ནས་བསྟན་པ་ལ་བདུན་ཡོད་དེ། ཚད་མེད་པའི་རྣམ་པ་དང་། མཐའ་གཉིས་དང་མ་འབྲེལ་བ་དང་། ཐ་མི་དད་པ་དང་། མཆོག་ཏུ་འཛིན་པ་མེད་པ་དང་། རྣམ་པར་མི་རྟོག་པ་དང་། གཞལ་དུ་མེད་པ་དང་།་ཆགས་པ་མེད་པའི་རྣམ་པ་རྣམས་ཡིན་པའི་ཕྱིར། བདུན་པོ་དེ་དག་ལམ་བདེན་གྱི་རྣམ་པ་ལམ་རིགས་པ་སྒྲུབ་པ་ངེས་འབྱིན་བཞི་ལ་སྦྱོར་ཚུལ་ཡོད་དེ། དེ་དག་ལས་རིམ་པ་བཞིན་ལམ་གྱི་རྣམ་པ་ལ་གཉིས་དང་། རིགས་པ་ལ་གཉིས་དང་། སྒྲུབ་པ་ལ་གཉིས་དང་། ངེས་འབྱིན་གྱི་རྣམ་པ་ལ་གཅིག་བཅས་སྦྱར་བའི་ཕྱིར། ངེས་འབྱིན་གྱི་རྣམ་པ་ལ་དམ་བཅའ་ཙམ་ལས་འཐད་པ་མ་གསུངས་པའི་རྒྱུ་མཚན་ཡོད་དེ། གདུལ་བྱ་ཉེ་བའི་བསམ་པ་ལ་ལྟོས་པ་ཙམ་ཡོན་པའི་ཕྱིར།
སྡུག་བདེན་རང་སྤྱིའི་མཚན་ཉིད་སྒོ་ནས་བསྟན༎
མི་རྟག་སྡུག་བསྔལ་སྟོང་པ་བདག་མེད་དང༎
བདེན་པའི་མཚན་ཉིད་མེད་པའི་རྣམ་པ་སྟེ༎
རང་གི་མཚན་ཉིད་བཞི་དང་སྤྱི་མཚན་གཅིག།
ལམ་ཤེས་ཀྱི་སྡུག་བསྔལ་བདེན་པའི་རྣམ་པ་རང་སྤྱིའི་མཚན་ཉིད་སྒོ་ནས་བསྟན་པ་ལ་ལྔ་ཡོད་དེ། མི་རྟག་པ་དང་། སྡུག་བསྔལ་བ། སྟོང་པ། བདག་མེད་པ། བདེན་པའི་མཚན་ཉིད་མེད་པའི་རྣམ་པ་རྣམ་པ་ཡིན་པའི་ཕྱིར། དེ་དག་ལས་རང་གི་མཚན་ཉིད་བཞི་དང་སྤྱི་མཚན་གཅིག་ཡིན་ཏེ། སྔ་མ་བཞི་དང་ཐ་མ་གཅིག་པུ་སྟེ་དེ་ལྟར་ཡིན་པའི་ཕྱིར།
འགོག་པ་ཕན་ཡོན་སྒོ་ནས་བསྟན་པ་ནི༎
ནང་དང༌ཕྱི་དང༌ཕྱི་ནང་སྟོང་པ་ཉིད༎
ཆེན་པོ་དོན་དམ་འདུས་བྱས་འདུས་མ་བྱས༎
མཐའ་ལས་འདས་པ་ཐོག་མ་ཐ་མ་མེད༎
དོར་བ་མེད་པ་རང་བཞིན་ཆོས་ཐམས་ཅད༎
རང་གི་མཚན་ཉིད་དང༌ནི་མི་དམིགས་པ༎
དངོས་མེད་ངོ་བོ་ཉིད་ཀྱི་སྟོང་པ་ཉིད༎
འགོག་པ་ཞི་བ་གྱ་ནོམ་ངེས་འབྱུང་བཞིར༎
རིམ་བཞིན་གསུམ་དང་བརྒྱད་དང་གཅིག་དང་བཞི༎
འགྲེལ་པས་འགོག་བདེན་བཅུ་དྲུག་དོན་ཚན་ལྔ༎
དངོས་བཏགས་བྱེད་པོ་ཡུལ་དུ་འཁྲུལ་བ་དང་༎
ངོ་བོ་ཉིད་འགོག་པ་ལ་རིམ་པ་བཞིན༎ ་
གསུམ་དང་བརྒྱད་དང་གཅིག་དང་གསུམ་དང་གཅིག།
ཕྱེ་བའང་ཐ་མ་གཉིས་བསྡོམས་གོང་དང་འདྲ༎
ལམ་ཤེས་ཀྱི་འགོག་བདེན་གྱི་རྣམ་པ་ཕན་ཡོན་སྒོ་ནས་བསྟན་པ་ལ་བཅུ་དྲུག་ཡོད་དེ། ནང་སྟོང་པ་ཉིད་དང་། ཕྱི་སྟོང་པ་ཉིད་དང་། ཕྱི་ནང་སྟོང་པ་ཉིད་དང་། སྟོང་པ་ཉིད་སྟོང་པ་ཉིད་དང་། ཆེན་པོ་སྟོང་པ་ཉིད་དང་།དོན་དམ་པ་སྟོང་པ་ཉིད་དང་། འདུས་བྱས་སྟོང་པ་ཉིད་དང་། འདུས་མ་བྱས་སྟོང་པ་ཉིད་དང་། མཐའ་ལས་འདས་པ་སྟོང་པ་ཉིད་དང་།ཐོག་མ་དང་ཐ་མ་མེད་པ་སྟོང་པ་ཉིད་དང་། དོར་བ་མེད་པ་སྟོང་པ་ཉིད་ད་དང་། རང་བཞིན་སྟོང་པ་ཉིད་དང། ཆོས་ཐམས་ཅད་སྟོང་པ་ཉིད་དང་། རང་གི་མཚན་ཉིད་སྟོང་པ་ཉིད་དང་། མི་དམིགས་པ་སྟོང་པ་ཉིད་དང་།དངོས་པོ་མེད་པའི་ངོ་བོ་ཉིད་སྟོང་པ་ཉིད་རྣམས་ཡིན་པའི་ཕྱིར། དེ་རྣམས་འགོག་བདེན་གྱི་རྣམ་པ་འགོག་པ་ཞི་བ་གྱ་ནོམ་ངེས་འབྱུང་བཞི་ལ་སྦྱར་ཚུལ་ཡོད་དེ། རིམ་བཞིན་འགོག་པའི་རྣམ་པ་ལ་གསུམ་དང་། ཞི་བ་ལ་བརྒྱད་དང་། གྱ་ནོམ་ལ་གཅིག་དང་། ངེས་འབྱུང་གི་རྣམ་པ་ལ་བཞི་བཅས་སྦྱོར་བའི་ཕྱིར། འགྲེལ་པ་ལས་འགོག་བདེན་གྱི་རྣམ་པ་བཅུ་དྲུག་པོ་དོན་ཚན་ལྔའི་སྒོ་ནས་བཤད་དེ།དངོས་པོ་འགོག་པ་དང་། བཏགས་པ་འགོག་པ། བྱེད་པ་པོ་འགོག་པ། ཡུལ་དུ་འཁྲུལ་བ་འགོག་པ། ངོ་བོ་ཉིད་འགོག་པ་ལ་རིམ་པ་བཞིན་རྣམ་པ་གསུམ་དང་། བརྒྱད་དང་།གཅིག་དང་། གསུམ་དང་། གཅིག་རྣམས་སུ་དབྱེ་ཞིང་། དེ་ལྟར་ལྔར་ཕྱེ་བའང་དོན་ཚན་ཐ་མ་གཉིས་བསྡོམས་ན། གྲངས་འདྲེན་ཚུལ་གོང་གི་འགོག་བདེན་གྱི་རྣམ་པ་བཞི་ལ་སྦྱོར་ཚུལ་དང་འདྲ་བའི་ཕྱིར་རོ།།
གསུམ་པ་རྣམ་མཁྱེན་རྣམ་པ་བརྒྱ་དང་བཅུ༎
ཉན་ཐོས་ལ་ཡོད་རྗེས་མཐུན་སུམ་ཅུ་བདུན༎
བྱང་སེམས་ལ་ཡོད་རྗེས་མཐུན་སུམ་ཅུ་བཞི༎
ཐུན་མིན་རྣམ་མཁྱེན་རྣམ་པ་སུམ་ཅུ་དགུ༎
གསུམ་པ་རྣམ་མཁྱེན་གྱི་རྣམ་པ་ལ་བརྒྱ་དང་བཅུ་ཡོད་དེ། ཉན་ཐོས་ལ་ཡོད་པ་དང་རྗེས་སུ་མཐུན་པའི་རྣམ་མཁྱེན་གྱི་རྣམ་པ་སུམ་ཅུ་རྩ་བདུན། བྱང་ཆུབ་སེམས་དཔའ་ལ་ཡོད་པ་དང་རྗེས་སུ་མཐུན་པའི་རྣམ་མཁྱེན་གྱི་རྣམ་པ་སུམ་ཅུ་རྩ་བཞི། ཐུན་མོང་མ་ཡིན་པའི་རྣམ་མཁྱེན་གྱི་རྣམ་པ་སུམ་ཅུ་རྩ་དགུ་རྣམས་སུ་ཡོད་པའི་ཕྱིར།
དང་པོ་བྱང་ཕྱོགས་སོ་བདུན་འདི་ལྟ་སྟེ༎
ལུས་ཚོར་སེམས་ཆོས་དྲན་པ་ཉེར་བཞག་བཞི༎
དགེ་བ་མ་སྐྱེས་སྐྱེད་ཅིང་སྐྱེས་པ་སྤེལ༎
མི་དགེ་མ་སྐྱེས་མི་སྐྱེད་སྐྱེས་པ་སྤོང་༎
ཡང་དག་སྤོང་བའི་དབྱེ་བ་རྣམ་པ་བཞི༎
འདུན་བརྩོན་སེམས་དཔྱོད་རྫུ་འཕྲུལ་རྐང་པ་བཞི༎
དད་བརྩོན་དྲན་ཏིང་ཤེས་རབ་དབང་སྟོབས་ལྔ༎
དྲན་དང་ཆོས་རབ་རྣམ་འབྱེད་བརྩོན་འགྲུས་དགའ༎
ཤིན་སྦྱངས་ཏིང་ངེ་འཛིན་དང་བཏང་སྙོམས་སྟེ༎
ཡང་དག་བྱང་ཆུབ་ཡན་ལག་རྣམ་པ་བདུན༎
ཡང་དག་ལྟ་བ་རྟོག་པ་ངག་དང་ལས།།
འཚོ་བ་རྩོལ་བ་དྲན་པ་ཏིང་ངེ་འཛིན།།
འཕགས་ལམ་ཡན་ལག་བརྒྱད་པོ་འདི་དག་གོ།
དང་པོ་ཉན་ཐོས་ལ་ཡོད་པ་དང་རྗེས་སུ་མཐུན་པའི་རྣམ་མཁྱེན་གྱི་རྣམ་པ་སུམ་ཅུ་རྩ་བདུན་ནི་བྱང་ཕྱོགས་སོ་བདུན་ཡིན་ལ། དེ་རྣམས་ཀྱང་བཞག་ཏུ་ཡོད་དེ། དྲན་པ་ཉེར་གཞག་པ་བཞི་དང་། ཡང་དག་སྤོང་བ་བཞི།རྫུ་འཕྲུལ་གྱི་རྐང་པ་བཞི། དབང་པོ་ལྔ།སྟོབས་ལྔ། བྱང་ཆུབ་ཀྱི་ཡན་ལག་བདུན།འཕགས་ལམ་ཡན་ལག་བརྒྱད་རྣམས་ཡིན་པའི་ཕྱིར། དྲན་པ་ཉེར་བཞག་བཞི་ཡོད་དེ།ལུས་དྲན་པ་ཉེར་བཞག །ཚོར་བ་དྲན་པ་ཉེར་བཞག །སེམས་དྲན་པ་ཉེར་བཞག །ཆོས་དྲན་པ་ཉེར་བཞག་རྣམས་ཡིན་པའི་ཕྱིར། ཡང་དག་སྤོང་བ་བཞི་ཡོད་དེ། དགེ་བ་མ་སྐྱེས་སྐྱེད་ ཡང་དག་སྤོང་བ། དགེ་བ་་སྐྱེས་པ་སྤེལ་བའི་ཡང་དག་སྤོང་བ། མི་དགེ་བ་མ་སྐྱེས་པ་མི་སྐྱེད་པའི་ཡང་དག་སྤོང་བ། མི་དགེ་བ་སྐྱེས་པ་སྤོང་བའི་ཡང་དག་སྤོང་བ་རྣམས་ཡིན་པའི་ཕྱིར། རྫུ་འཕྲུལ་རྐང་པ་བཞི་ཡོད་དེ། འདུན་པའི་རྫུ་འཕྲུལ་གྱི་རྐང་པ་དང་།བརྩོན་འགྲུས་ཀྱི་རྫུ་འཕྲུལ་གྱི་རྐང་པ། སེམས་པའི་རྫུ་འཕྲུལ་གྱི་རྐང་པ། དཔྱོད་པའི་རྫུ་འཕྲུལ་གྱི་རྐང་པ་རྣམས་ཡིན་པའི་ཕྱིར།དབང་པོ་ལྔ་ཡོད་དེ། དད་པའི་དབང་པོ་དང་། བརྩོན་འགྲུས་ཀྱི་དབང་པོ། དྲན་པའི་དབང་པོ། ཏིང་ངེ་འཛིན་གྱི་དབང་པོ། ཤེས་རབ་ཀྱི་དབང་པོ་རྣམས་ཡིན་པའི་ཕྱིར།སྟོབས་ལྔ་ཡོད་དེ། དད་པའི་སྟོབས་དང་།བརྩོན་འགྲུས་ཀྱི་སྟོབས། དྲན་པའི་སྟོབས།ཏིང་ངེ་འཛིན་གྱི་སྟོབས། ཤེས་རབ་ཀྱི་སྟོབས་རྣམས་ཡིན་པའི་ཕྱིར། བྱང་ཆུབ་ཀྱི་ཡན་ལག་བདུན་ཡོད་དེ། དྲན་པ་ཡང་དག་བྱང་ཆུབ་ཀྱི་ཡན་ལག་དང་། ཆོས་རབ་ཏུ་རྣམ་འབྱེད་ཡང་དག་བྱང་ཆུབ་ཀྱི་ཡན་ལག །བརྩོན་འགྲུས་ཡང་དག་བྱང་ཆུབ་ཀྱི་ཡན་ལག །དགའ་བ་ཡང་དག་བྱང་ཆུབ་ཀྱི་ཡན་ལག །ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག །ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག།བཏང་སྙོམས་ཡང་དག་བྱང་ཆུབ་ཀྱི་ཡན་ལག་རྣམས་ཡིན་པའི་ཕྱིར། འཕགས་ལམ་ཡན་ལག་བརྒྱད་ཡོད་དེ། ཡང་དག་པའི་ལྟ་བ་འཕགས་པའི་ལམ་ཡན་ལག་དང་། ཡང་དག་པའི་རྟོག་པ། ཡང་དག་པའི་ངག །ཡང་དག་པའི་ལས་ཀྱི་མཐའ། ཡང་དག་པའི་འཚོ་བ།ཡང་དག་པའི་རྩོལ་བ། ཡང་དག་པའི་དྲན་པ།ཡང་དག་པའི་ཏིང་ངེ་འཛིན་འཕགས་པའི་ལམ་ཡན་ལག་རྣམས་ཡིན་པའི་ཕྱིར།
བྱང་ཕྱོགས་སྡེ་ཚན་བདུན་ལ་རིམ་པ་བཞིན༎
དངོས་པོར་ཡོངས་རྟོག་རྩོལ་བ་ལས་བྱུང་ལམ༎
ཏིང་འཛིན་ཡོངས་སྦྱོང་མངོན་རྟོགས་སྦྱོར་བའི་ལམ༎
མངོན་རྟོགས་དང་འབྲེལ་མངོན་པར་རྟོགས་པའི་ལམ༎
རྣམ་དག་ངེས་འབྱིན་ལམ་ཞེས་འགྲེལ་པར་གསུངས།།
འགྲེལ་ཆུང་ལས་བྱང་ཕྱོགས་སྡེ་ཚན་བདུན་ལ་མིང་འདོགས་མཛད་ཚུལ་ཡོད་དེ།རིམ་པ་བཞིན་དངོས་པོ་ལ་ཡོངས་སུ་རྟོག་པའི་ལམ་དང་། རྩོལ་བ་ལས་བྱུང་བའི་ལམ།ཏིང་ངེ་འཛིན་ཡོངས་སུ་སྦྱོང་བའི་ལམ།མངོན་པར་རྟོགས་པར་སྦྱོར་བའི་ལམ། མངོན་པར་རྟོགས་པ་དང་འབྲེལ་བའི་ལམ། མངོན་པར་རྟོགས་པའི་ལམ། རྣམ་པར་དག་པ་ངེས་པར་འབྱིན་པའི་ལམ་ཞེས་གསུངས་པའི་ཕྱིར་རོ།།
བྱང་སེམས་ལ་ཡོད་རྗེས་མཐུན་སོ་བཞི་ནི༎
གཉེན་པོའི་ལམ་གསུམ་སྤྲུལ་པའི་ལམ་གསུམ་དང་།།
མཐོང་ཆོས་བདེར་གནས་ལམ་ལྔ་འདས་ལམ་དགུ།།
སྤོང་བའི་ལམ་བཞི་སངས་རྒྱས་ལམ་བཅུ་འོ།།
གཉིས་པ་བྱང་ཆུབ་སེམས་དཔའ་ལ་ཡོད་པ་དང་རྗེས་སུ་མཐུན་པའི་རྣམ་མཁྱེན་གྱི་རྣམ་པ་སུམ་ཅུ་རྩ་བཞི་ཡོད་དེ། གཉེན་པོའི་ལམ་རྣམ་ཐར་སྒོ་གསུམ། སྤྲུལ་པའི་ལམ་གཟུགས་ཅན་གྱི་རྣམ་ཐར་གསུམ། མཐོང་ཆོས་བདེར་གནས་ཀྱི་ལམ་གཟུགས་ཅན་མ་ཡིན་པའི་རྣམ་ཐར་ལྔ། འཇིག་རྟེན་ལས་འདས་པའི་ལམ་མཐར་གནས་སྙོམས་འཇུག་དགུ། སྤོང་བའི་ལམ་ཆོས་བཟོད་བར་ཆད་མེད་ལམ་བཞི། སངས་རྒྱས་ཀྱི་ལམ་ཕར་ཕྱིན་བཅུ་རྣམས་ཡིན་པའི་ཕྱིར།
གཉེན་པོའི་ལམ་ནི་རྣམ་པར་ཐར་པའི་སྒོ༎
སྟོང་ཉིད་མཚན་མེད་སྨོན་མེད་རྣམ་པ་གསུམ༎
གཟུགས་ཅན་གཟུགས་དང་གཟུགས་མེད་གཟུགས་ལ་ལྟ༎
སྡུག་པའི་རྣམ་ཐར་གསུམ་ནི་སྤྲུལ་པའི་ལམ༎
གཟུགས་མེད་བཞི་དང་འགོག་པའི་རྣམ་ཐར་ནི༎
མཐོང་ཆོས་བདེ་བར་གནས་པའི་ལམ་ལྔ་འོ༎
བསམ་གཟུགས་སྙོམས་འཇུག་བརྒྱད་དང་འགོག་སྙོམས་བཅས༎
འཇིག་རྟེན་འདས་པའི་ལམ་ནི་རྣམ་པ་དགུ༎
སྤོང་ལམ་ཆོས་བཟོད་བར་ཆད་མེད་ལམ་བཞི༎
སྦྱིན་སོགས་དྲུག་སྟེང་ཐབས་མཁས་སྨོན་ལམ་སྟོབས།།
ཡེ་ཤེས་ཕར་ཕྱིན་བཅུ་ནི་སངས་རྒྱས་ལམ།།
གཉེན་པོའི་ལམ་རྣམ་ཐར་སྒོ་གསུམ་ཡོད་དེ། རྣམ་པར་ཐར་པའི་སྒོ་སྟོང་པ་ཉིད་དང་། རྣམ་པར་ཐར་པའི་སྒོ་མཚན་མ་མེད་པ། རྣམ་པར་ཐར་པའི་སྒོ་སྨོན་པ་མེད་པའི་རྣམ་པ་གསུམ་ཡིན་པའི་ཕྱིར། སྤྲུལ་པའི་ལམ་གཟུགས་ཅན་གྱི་རྣམ་ཐར་གསུམ་ཡོད་དེ།གཟུགས་ཅན་གཟུགས་ལ་ལྟ་བའི་རྣམ་ཐར་དང་། གཟུགས་མེད་གཟུགས་ལ་ལྟ་བའི་རྣམ་ཐར། སྡུག་པའི་རྣམ་ཐར་གསུམ་ཡིན་པའི་ཕྱིར། མཐོང་ཆོས་ལ་བདེ་བར་གནས་པའི་ལམ་གཟུགས་ཅན་མ་ཡིན་པའི་རྣམ་ཐར་ལྔ་ཡོད་དེ། ནམ་མཁའ་མཐའ་ཡས་ཀྱི་རྣམ་ཐར་དང་། རྣམ་ཤེས་མཐའ་ཡས་ཀྱི་རྣམ་ཐར། ཅི་ཡང་མེད་ཀྱི་རྣམ་ཐར། སྲེད་རྩེའི་རྣམ་ཐར།འགོག་པའི་རྣམ་ཐར་རྣམས་ཡིན་པའི་ཕྱིར།འཇིག་རྟེན་ལས་འདས་པའི་ལམ་མཐར་གནས་སྙོམས་འཇུག་དགུ་ཡོད་དེ། བསམ་གཏན་དང་པོའི་སྙོམས་འཇུག་དང་། བསམ་གཏན་གཉིས་པའི་སྙོམས་འཇུག བསམ་གཏན་གསུམ་པའི་སྙོམས་འཇུག བསམ་གཏན་བཞི་པའི་སྙོམས་འཇུག ནམ་མཁའ་མཐའ་ཡས་ཀྱི་སྙོམས་འཇུག །རྣམ་ཤེས་མཐའ་ཡས་ཀྱི་སྙོམས་འཇུག །ཅི་ཡང་མེད་ཀྱི་ སྙོམས་འཇུག།སྲེད་རྩེའི་སྙོམས་འཇུག །འགོག་པའི་སྙོམས་འཇུག་རྣམས་ཡིན་པའི་ཕྱིར། སྤོང་ལམ་བཞི་ཡོད་དེ། སྡུག་བསྔལ་ཆོས་བཟོད་དང་། ཀུན་འབྱུང་ཆོས་བཟོད། འགོག་པ་ཆོས་བཟོད།ལམ་ཆོས་བཟོད་བར་ཆད་མེད་ལམ་རྣམས་ཡིན་པའི་ཕྱིར། སངས་རྒྱས་ཀྱི་ལམ་ཕར་ཕྱིན་བཅུ་ཡོད་དེ། སྦྱིན་པའི་ཕར་ཕྱིན་དང་། ཚུལ་ཁྲིམས་ཀྱི་ཕར་ཕྱིན། བཟོད་པའི་ཕར་ཕྱིན།བརྩོན་འགྲུས་ཀྱི་ཕར་ཕྱིན། བསམ་གཏན་གྱི་ཕར་ཕྱིན། ཤེས་རབ་ཀྱི་ཕར་ཕྱིན། ཐབས་མཁས་ཀྱི་ཕར་ཕྱིན། སྨོན་ལམ་གྱི་ཕར་ཕྱིན།སྟོབས་ཀྱི་ཕར་ཕྱིན། ཡེ་ཤེས་ཀྱི་ཕར་ཕྱིན་རྣམས་ཡིན་པའི་ཕྱིར་རོ།།
ཐུན་མིན་རྣམ་མཁྱེན་རྣམ་པ་སོ་དགུ་ནི༎
སྟོབས་བཅུ་མི་འཇིགས་བཞི་དང༌སོ་རིག་བཞི༎
སངས་རྒྱས་ཆོས་ནི་མ་འདྲེས་བཅོ་བརྒྱད་དང་༎
དེ་བཞིན་ཉིད་དང་རང་བྱུང་སངས་རྒྱས་ཉིད༎
གསུམ་པ་ཐུན་མོང་མ་ཡིན་པའི་རྣམ་མཁྱེན་གྱི་རྣམ་པ་སུམ་ཅུ་རྩ་དགུ་ཡོད་དེ། དེ་བཞིན་གཤེགས་པའི་སྟོབས་བཅུ་དང་། མི་འཇིགས་པ་བཞི། སོ་སོ་ཡང་དག་པར་རིག་པ་བཞི། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད། དེ་བཞིན་ཉིད་ཀྱི་རྣམ་མཁྱེན་གྱི་རྣམ་པ། རང་བྱུང་ཉིད་ཀྱི་རྣམ་མཁྱེན་གྱི་རྣམ་པ།སངས་རྒྱས་ཉིད་ཀྱི་རྣམ་མཁྱེན་གྱི་རྣམ་པ་རྣམས་ཡིན་པའི་ཕྱིར།
གནས་དང་གནས་མིན་ལས་ཀྱི་རྣམ་སྨིན་དང་༎
མོས་པ་སྣ་ཚོགས་ཁམས་ནི་སྣ་ཚོགས་དང་༎
དབང་པོ་མཆོག་དང་མཆོག་མིན་ཐམས་ཅད་འགྲོ༎
ཀུན་བྱང་སྔོན་གནས་རྗེས་དྲན་འཆི་འཕོ་སྐྱེ༎
ཟག་ཟད་མཁྱེན་པ་དང་བཅས་སྟོབས་བཅུ་འོ༎
སྤངས་རྟོགས་ངེས་འབྱུང་བར་ཆད་དམ་བཅས་པར༎ འཇིགས་པ་མེད་པས་མི་འཇིགས་རྣམ་པ་བཞི༎
ཆོས་དོན་ངེས་ཚིག་སྤོབས་པ་སོ་རིག་བཞི༎
དེ་བཞིན་གཤེགས་པའི་སྟོབས་བཅུ་ཡོད་དེ། གནས་དང་གནས་མིན་མཁྱེན་པའི་སྟོབས་དང་། ལས་ཀྱི་རྣམ་སྨིན་མཁྱེན་པའི་སྟོབས། མོས་པ་སྣ་ཚོགས་མཁྱེན་པའི་སྟོབས།ཁམས་སྣ་ཚོགས་མཁྱེན་པའི་སྟོབས། དབང་པོ་མཆོག་དང་མཆོག་མ་ཡིན་པ་མཁྱེན་པའི་སྟོབས། ཐམས་ཅད་དུ་འགྲོ་བ་མཁྱེན་པའི་སྟོབས། ཀུན་ནས་ཉོན་མོངས་དང་རྣམ་པརབྱང་བ་སོགས་མཁྱེན་པའི་སྟོབས། སྔོན་གནས་རྗེས་སུ་དྲན་པ་མཁྱེན་པའི་སྟོབས།འཆི་འཕོ་བ་དང་སྐྱེ་བ་མཁྱེན་པའི་སྟོབས།ཟག་པ་ཟད་པ་མཁྱེན་པའི་སྟོབས་རྣམས་ཡིན་པའི་ཕྱིར། མི་འཇིགས་པའི་རྣམ་པ་བཞི་ཡོད་དེ། སྤངས་པ་མཐར་ཐུག་དམ་བཅས་པ་ལ་མི་འཇིགས་པ་དང་། རྟོགས་པ་མཐར་ཐུག་དམ་བཅས་པ་ལ་མི་འཇིགས་པ། ངེས་འབྱུང་དམ་བཅས་པ་ལ་མི་འཇིགས་པ། བར་ཆད་དམ་བཅས་པ་ལ་མི་འཇིགས་པའི་རྣམ་པ་རྣམ་པ་རྣམས་ཡིན་པའི་ཕྱིར། སོ་སོ་ཡང་དག་པར་རིག་པའི་རྣམ་པ་བཞི་ཡོད་དེ། ཆོས་སོ་སོ་ཡང་དག་པར་རིག་པ་དང་། དོན་སོ་སོ་ཡང་དག་པར་རིག་པ། ངེས་ཚིག་སོ་སོ་ཡང་དག་པར་རིག་པ། སྤོབས་པ་སོ་སོ་ཡང་དག་པར་རིག་པ་རྣམས་ཡིན་པའི་ཕྱིར།
སངས་རྒྱས་ཆོས་རྣམས་མ་འདྲེས་བཅོ་བརྒྱད་ནི༎
སྤྱོད་པ་རྟོགས་པ་མ་འདྲེས་དྲུག་ཚན་གཉིས༎
འཕྲིན་ལས་ཡེ་ཤེས་མ་འདྲེས་གསུམ་ཚན་གཉིས༎
འཁྲུལ་དང་ཅ་ཅོ་དྲན་པ་ཉམས་པ་དང་༎
མཉམ་པར་མ་བཞག་ཐ་དད་འདུ་ཤེས་དང་༎
མ་བརྟགས་བཏང་སྙོམས་མི་མངའ་སྤྱོད་པའི་དྲུག།
འདུན་བརྩོན་དྲན་ཏིང་ཤེས་རབ་རྣམ་གྲོལ་ལས༎
ཉམས་པ་མི་མངའ་རྟོགས་པ་མ་འདྲེས་དྲུག།
སྐུ་གསུང་ཐུགས་ཀྱི་འཕྲིན་ལས་མ་འདྲེས་གསུམ༎
དུས་གསུམ་ཆགས་ཐོགས་མེད་པའི་ཡེ་ཤེས་གསུམ༎
སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཡོད་དེ། སྤྱོད་པ་མ་འདྲེས་པ་དྲུག །རྟོགས་པ་མ་འདྲེས་པ་དྲུག །འཕྲིན་ལས་ མ་འདྲེས་པ་གསུམ། ཡེ་ཤེས་མ་འདྲེས་པ་གསུམ་རྣམས་སུ་ཡོད་པའི་ཕྱིར། སྤྱོད་པ་མ་འདྲེས་པ་དྲུག་ཡོད་དེ། འཁྲུལ་པ་མི་མངའ་བ་དང་།དང་ཅ་ཅོ་མི་མངའ་བ། དྲན་པ་ཉམས་པ་མི་མངའ་བ། མཉམ་པར་མ་བཞག་པ་མི་མངའ་བ། ཐ་དད་པའི་འདུ་ཤེས་མི་མངའ་བ། མ་བརྟགས་པའི་བཏང་སྙོམས་མི་མངའ་བ་རྣམས་ཡིན་པའི་ཕྱིར། རྟོགས་པ་མ་འདྲེས་པ་དྲུག་ཡོད་དེ། འདུན་པ་ཉམས་པ་མི་མངའ་བ་དང་། བརྩོན་འགྲུས་ཉམས་པ་མི་མངའ་བ།དྲན་པ་ཉམས་པ་མི་མངའ་བ། ཏིང་ངེ་འཛིན་ཉམས་པ་མི་མངའ་བ། ཤེས་རབ་ཉམས་པ་མི་མངའ་བ། རྣམ་གྲོལ་ལས་ཉམས་པ་མི་མངའ་བ་རྣམས་ཡིན་པའི་ཕྱིར། འཕྲིན་ལས་མ་འདྲེས་པ་གསུམ་ཡོད་དེ། ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བའི་སྐུའི་འཕྲིན་ལས་མ་འདྲེས་་པ་དང་། གསུང་གི་འཕྲིན་ལས་མ་འདྲེས་་པ། ཐུགས་ཀྱི་འཕྲིན་ལས་མ་འདྲེས་པ་གསུམ་ཡིན་པའི་ཕྱིར། ཡེ་ཤེས་མ་འདྲེས་པ་གསུམ་ཡོད་དེ། འདས་པའི་དུས་ལ་མ་ཆགས་མ་ཐོགས་པའི་ཡེ་ཤེས་དང་།མ་འོངས་པའི་དུས་ལ་མ་ཆགས་མ་ཐོགས་པའི་ཡེ་ཤེས། ད་ལྟར་བའི་དུས་ལ་མ་ཆགས་མ་ཐོགས་པའི་ཡེ་ཤེས་དང་གསུམ་ཡིན་པའི་ཕྱིར།
དེ་བཞིན་ཉིད་ཀྱི་རྣམ་མཁྱེན་རྣམ་པ་ནི༎
ཆོས་ཉིད་སླར་མི་ལྡང་བར་གཟིགས་པའོ༎
རང༌བྱུང་ཉིད་ཀྱི་རྣམ་མཁྱེན་རྣམ་པ་ནི༎
ཆོས་རྣམས་ཀུན་ལ་མངའ་དབང་བསྒྱུར་བ་འོ༎
སངས་རྒྱས་ཉིད་ཀྱི་རྣམ་མཁྱེན་རྣམ་པ་ནི༎
ཆོས་ཀུན་མངོན་པར་རྫོགས་པར་བྱང་ཆུབ་པའོ༎
དེ་བཞིན་ཉིད་ཀྱི་རྣམ་མཁྱེན་གྱི་རྣམ་པའི་ངོ་བོ་ཡོད་དེ། ཆོས་ཉིད་སླར་མི་ལྡང་བའི་ཚུལ་གྱིས་གཟིགས་པའི་མཐར་ཐུག་པའི་ཡེ་ཤེས་དེ་དེའི་ངོ་བོ་ཡིན་པའི་ཕྱིར། རང་བྱུང་ཉིད་ཀྱི་རྣམ་མཁྱེན་གྱི་རྣམ་པའི་ངོ་བོ་ཡོད་དེ། ཆོས་ཐམས་ཅད་ལ་མངའ་དབང་བསྒྱུར་བའི་མཐར་ཐུག་པའི་ཡེ་ཤེས་དེ་དེའི་ངོ་བོ་ཡིན་པའི་ཕྱིར། སངས་རྒྱས་ཉིད་ཀྱི་རྣམ་མཁྱེན་གྱི་རྣམ་པའི་ངོ་བོ་ཡོད་དེ། ཆོས་ཐམས་ཅད་ལ་མངོན་པར་རྫོགས་པར་བྱང་ཆུབ་པའི་མཐར་ཐུག་གི་ཡེ་ཤེས་དེ་དེའི་ངོ་བོ་ཡིན་པའི་ཕྱིར་རོ།།
དེ་ལྟར་རྣམ་པའི་གྲངས་དང་ཐ་སྙད་ཙམ༎
ངེས་ནས་དེ་ཡིས་མ་ཚིམ་ཞིབ་མོའི་གནད༎
མཚན་ལྡན་བཤེས་དང་དྲི་མེད་གཞུང་བཟང་ལ༎
བརྟེན་ནས་ངོམས་མེད་ཐོས་བསམ་སྒོམ་པ་གཅེས༎
དེ་ལྟར་མཁྱེན་གསུམ་གྱི་རྣམ་པ་བརྒྱ་བདུན་ཅུ་རྩ་གསུམ་གྱི་གྲངས་འདྲེན་དང་ཐ་སྙད་ཙམ་ཞིག་འདིར་བཀོད་པ་ལས་ངེས་པར་བྱས་ནས། དེ་ཅམ་གྱིས་མ་ཚིམ་པར་ཤིན་ཏུ་ཞིབ་པའི་་གནད་གསང་རྣམས་མཚན་ཉིད་དང་ལྡན་པའི་ཐེག་པ་ཆེན་པོའི་དགེ་བའི་བཤེས་གཉེན་བསྟེན་པ་དང་། རྒྱལ་བའི་བཀའ་དང་འཕགས་བོད་མཁས་པའི་དགོངས་འགྲེལ་གྱི་གཞུང་བཟང་དྲི་མ་མེད་པ་རྣམས་ལ་བརྟེན་ནས་ངོམས་པ་མེད་པའི་ཐོས་བསམ་སྒོམ་པ་ཡ་མ་བྲལ་བར་བྱ་བ་ནི་ཤིན་ཏུ་གཅེས་སོ།།
དགེ་བ་འདི་ཡིས་མཁའ་མཉམ་ཡིད་ཅན་ཀུན༎
ཐེག་མཆོག་དགེ་བའི་བཤེས་ཀྱིས་རྗེས་བཟུང་ནས༎
ས་བཅུ་ལམ་ལྔའི་བགྲོད་པ་མཐར་ཕྱིན་ཏེ༎
སྐུ་བཞིའི་གོ་འཕང་དམ་པ་མྱུར་ཐོབ་ཤོག།
ཅེས་མཁྱེན་གསུམ་གྱི་རྣམ་པ་བརྒྱ་བདུན་ཅུ་རྩ་གསུམ་གྱི་སྡོམ་ཚིག་གི་བསྡུས་འགྲེལ་བློ་གསར་མགུལ་རྒྱན་མཛེས་པའི་ཕྲ་ཚོམ་ཞེས་བྱ་བ་འདི་ཡང་རང་དང་སྐལ་བ་མཉམ་པ་འགའ་ཞིག་ལ་ཕན་རེས་བཙུན་པ་ཤྲཱི་མིང་ཅན་རང་གིས་རང་ལ་དབྱངས་ཅན་འབངས་སུ་བཏགས་པ་དེས་ཕྱི་ལོ་ ༢༠༢༡ ཟླ་བ་ ༡༠ ཚེས་ ༡༦ ཉིན་རྫོགས་པར་སྦྱར་བ་དགེ་ལེགས་འཕེལ།། ༎