༄༅། །ནམོསརྦབུདྡྷབོདྷིསཏྭཡ།
རྣམ་འདྲེན་ཀུན་གྱི་རྣམ་སྤྲུལ་ཆོས་ཀྱི་རྗེ།།
སྐལ་བཟང་གདུལ་བྱའི་སྐལ་བ་མཆོག་མཛད་པའི།།
སྐྱབས་གནས་ཀུན་འདུས་སྐྱབས་མགོན་ཡིད་བཞིན་ནོར།།
མི་འབྲལ་སྙིང་དབུས་མི་ཕྱེད་དད་པས་བསྟེན།།
ཞེས་མཆོད་པར་བརྗོད་པ་སྔོན་དུ་བཏང་ནས། སྐབས་དོན་བརྒལ་ལན་མེས་པོའ་ིཞལ་ཆབ་ཅེས་བྱ་བའི་དཔྱད་རྩོམ་དེའི་སྔ་མའི་འཕྲོ་འཐུད་ནས་འཆད་པ་ལ་འཇུག་པར་བྱའོ།། གསུམ་པ་ལེན་པའི་ཆོ་གའི་སྐོར་ལ་མཁས་གྲུབ་རྗེས་ཕྱོགས་སྔ་བླངས་པ་ནི། བོད་སྔ་མ་དག་ན་རེ། ལུགས་གཉིས་སྡོམ་པ་ལེན་པའི་ཆོ་ག་མི་འདྲ་སྟེ། སྦྱོར་དངོས་མཇུག་གསུམ་ཐམས་ཅད་མི་འདྲ་བའི་ཕྱིར། སྦྱོར་བ་མི་འདྲ་སྟེ། སློབ་དཔོན་ཐོགས་མེད་ཀྱི་བྱང་སའི་འབོགས་ཆོག་ལྟར་ན། སྦྱོར་བ་ལ་ཕྱག་དང་མཆོད་པ་ཙམ་ལས་ཡན་ལག་བདུན་པ་རྫོགས་པ་མི་མཛདཅིང་། དེ་ཡང་རྟེན་སོ་ཐར་སྡོམ་ལྡན་དུ་ངེས་པས། སོ་སོ་ཐར་པ་རིགས་བདུན་གྱིས་རྒྱུད་དག་ཟིན་པའི་དབང་དུ་བྱས་པའི་ཕྱིར་དང་། སློབ་དཔོན་ཀླུ་སྒྲུབ་ནི། སྡིག་ཅན་སོ་སོ་ཐར་པ་རིགས་བདུན་དང་ཡེ་མ་འབྲེལ་བ་ལ་ཡང་སེམས་བསྐྱེད་སྐྱེ་བ་ལ་དགོངས་ནས། སྡིག་པ་བཤགས་པ་སོགས་ཡན་ལག་བདུན་པ་ཚང་བ་མཛད་པའི་ཕྱིར། དང་པོ་གྲུབ་སྟེ།
བྱང་ས་(སྡེ་བསྟན། སེམས་ཙམ། ཝི་པ། རྣལ་འབྱོར་སྤྱོད་པའི་ས་ལས་བྱང་ཆུབ་སེམས་དཔའི་ས། འཕགས་པ་ཐོགས་མེད། ༨༥ བ ༥) ལས།
འདས་པ་དང༌། མ་བྱོན་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་དང༌། བྱང་ཆུབ་སེམས་དཔའ་ས་ཆེན་པོ་ལ་བཞུགས་པ་ཡེ་ཤེས་དང༌། མཐུ་ཆེན་པོ་ཐོབ་པ་ཕྱོགས་བཅུ་ན་བཞུགས་པ་རྣམས་ལ་མཆོད་པ་བྱས་ནས། དེ་དག་གི་ཡོན་ཏན་རྣམས་ཀྱང་མངོན་སུམ་དུ་བྱས་པ་ལ་བསམ་པ་ཐག་པ་ནས་དང་བའི་སེམས་སམ། ཡང་ན་དེས་ཅི་ནུས་པ་དང༌། རྒྱུའི་སྟོབས་ཅི་ཡོད་པས་ཆུང་ངུ་ཡང་བསྐྱེད་ལ། དེ་བཞིན་གཤེགས་པའི་སྐུ་གཟུགས་མདུན་དུ་བཞག་སྟེ། ལེགས་པར་མཆོད་པར་བྱས་ནས། ཞེས་གསུངས་པའི་ཕྱིར། གཉིས་པ་གྲུབ་སྟེ། སྤྱོད་འཇུག་ (སྡེ་བསྟན། དབུ་མ། ལ་པ། བྱང་ཆུབ་སེམས་དཔའི་སྤྱོད་པ་ལ་འཇུག་པ། རྒྱལ་སྲས་ཞི་བ་ལྷ། ༣ བ ༣) ལས།
གང་ལ་སེམས་ཀྱི་དམ་པ་རིན་ཆེན་དེ།། སྐྱེས་པ་དེ་ཡི་སྐུ་ལ་ཕྱག་འཚལ་ཞིང༌།། གང་ལ་གནོད་པ་བྱས་ཀྱང་བདེ་འབྲེལ་བ།། བདེ་བའི་འབྱུང་གནས་དེ་ལ་སྐྱབས་སུ་མཆི།།
ཞེས་དང་། འོག་ནས། (༤ བ ༧)
དུས་གསུམ་གཤེགས་པའི་སངས་རྒྱས་ཀུན།། ཆོས་དང་ཚོགས་ཀྱི་མཆོག་བཅས་ལ།། ཞིང་རྡུལ་ཀུན་གྱི་གྲངས་སྙེད་ཀྱི།། ལུས་བཏུད་པ་ཡིས་བདག་ཕྱག་འཚལ།།
ཞེས་སོགས་ཤོལོ་ཀ་གསུམ་བཅས་ཀྱིས་ཕྱག་འཚལ་བའི་ཡན་ལག་དང་། (༣ བ ༤)
རིན་ཆེན་སེམས་དེ་གཟུང་བར་བྱ་བའི་ཕྱིར།། དེ་བཞིན་གཤེགས་པ་རྣམས་དང་དམ་པའི་ཆོས།། དཀོན་མཆོག་དྲི་མ་མེད་དང་སངས་རྒྱས་སྲས།། ཡོན་ཏན་རྒྱ་མཚོ་རྣམས་ལ་ལེགས་པར་མཆོད།།
ཞེས་པ་ནས། (སྡེ་བསྟན། དབུ་མ། ལ་པ། བྱང་ཆུབ་སེམས་དཔའི་སྤྱོད་པ་ལ་འཇུག་པ། རྒྱལ་སྲས་ཞི་བ་ལྷ། ༧ བ ༡)
དེ་བཞིན་ནམ་མཁའི་མཐས་གཏུགས་པའི།། སེམས་ཅན་ཁམས་ལ་རྣམ་ཀུན་དུ།། ཐམས་ཅད་མྱ་ངན་འདས་བར་དུ།། བདག་ནི་ཉེར་འཚོའི་རྒྱུར་ཡང་ཤོག།
ཅེས་པའི་བར་གྱིས་མཆོད་པ་ནས་བསྔོ་བའི་ཡན་ལག་ག་བར་་བསྟན་པ་ལྟར་ལུགས་འདི་ལ་སེམས་བསྐྱེད་ཀྱི་སྦྱོར་བ་ལ་དེ་རྣམས་ངེས་པར་བྱ་དགོས་པའི་ཕྱིར།
གཞན་ཡང་སྦྱོར་བ་མི་འདྲ་བར་ཐལ། སེམས་ཙམ་ལུགས་ལ་ནི། ཉན་ཐོས་ཀྱི་འདུལ་བའི་སྡོམ་པ་འབོགས་པའི་ཆོ་ག་ལྟར་བསླབ་པ་བརྗོད་པ་དང་། བར་ཆད་དྲི་བ་ལ་སོགས་པ་མཛད་ཀྱང་། དབུ་མ་ལུགས་ལ་དེ་དག་མི་མཛད་པའི་ཕྱིར། དང་པོ་གྲུབ་སྟེ། བྱང་ས་ (སྡེ་བསྟན། སེམས་ཙམ། ཝི་པ། རྣལ་འབྱོར་སྤྱོད་པའི་ས་ལས་བྱང་ཆུབ་སེམས་དཔའི་ས། འཕགས་པ་ཐོགས་མེད། ༨༢ བ ༢) ལས།
བྱང་ཆུབ་སེམས་དཔའ་འདོད་པ་དེ་ལ་བྱང་ཆུབ་སེམས་དཔའི་སྡོམ་པའི་ཕན་ཡོན་རྒྱ་ཆེར་བརྗོད་ནས། སྡོམ་པ་འདོད་པ་དེ་ལ་བསླབ་པའི་གཞི་ལྕི་ཡང་དག་ཀྱང་བརྗོད་ཅིང་སྤྲོ་བ་བསྐྱེད་པར་ཡང་བྱ་སྟེ།
ཞེས་བྱང་སྡོམ་གྱི་ཕན་ཡོན་དང་བསླབ་པའི་གཞི་ལྕི་ཡང་བསྟན་པའི་སྒོ་ནས་སྤྲོ་བ་སྐྱེད་པར་གསུངས་ཤིང་། (སྡེ་བསྟན། སེམས་ཙམ། ཝི་པ། རྣལ་འབྱོར་སྤྱོད་པའི་ས་ལས་བྱང་ཆུབ་སེམས་དཔའི་ས། འཕགས་པ་ཐོགས་མེད། ༨༥ ན ༤)
བྱང་ཆུབ་སེམས་དཔའ་ཚུལ་ཁྲིམས་ཀྱི་སྡོམ་པ་ཡང་དག་པར་བླང་བར་འདོད་པ་ལ་སྔ་ནས་བྱང་ཆུབ་སེམས་དཔའི་མདོ་སྡེའི་སྡེ་སྣོད་ཀྱི་མ་མོ་འདི་ལས་བྱང་ཆུབ་སེམས་དཔའི་བསླབ་པའི་གཞི་དང༌། ཉེས་པའི་གནས་གང་དག་བསྟན་པ་དེ་དག་བསྒྲག་པར་བྱ་སྟེ།
ཞེས་སྡོམ་པ་འབོགས་ོའི་སྔ་རོལ་ནས་བསླབ་གཞི་བསྒྲག་པར་གསུངས་པའི་ཕྱིར་དང་། ཡང་དེ་ཉིད་(སྡེ་བསྟན། སེམས་ཙམ། ཝི་པ། རྣལ་འབྱོར་སྤྱོད་པའི་ས་ལས་བྱང་ཆུབ་སེམས་དཔའི་ས། འཕགས་པ་ཐོགས་མེད། ༨༣ ན ༣) ལས།
རིགས་ཀྱི་བུའམ་ཆོས་ཀྱི་སྤུན་མིང་འདི་ཞེས་བྱ་བ་ཁྱོད་བྱང་ཆུབ་སེམས་དཔའ་ཡིན་ནམ། བྱང་ཆུབ་ཏུ་སྨོན་ལམ་བཏབ་བམ་ཞེས་སྨྲོས་ཤིག །དེས་ཀྱང་། ལགས་སོ།། ཞེས་ཁས་ལོང་ཤིག།
ཅེས་དང་།
ཕ་རོལ་གྱིས་ཡང་དག་པར་འཛིན་དུ་བཅུག་པའི་ཕྱིར་ཡང་མ་ཡིན། ཕ་རོལ་དང་འགྲན་པའི་ཕྱིར་ཡང་མ་ཡིན་ན། བྱང་ཆུབ་སེམས་དཔའ་བརྟན་པོ་ཡིན་པར་རིག་པར་བྱ་སྟེ། ཚུལ་ཁྲིམས་ཀྱི་སྡོམ་པ་ཡང་དག་པར་བླང་བ་འདི་ཆོ་ག་འདི་བཞིན་དུ་དེས་ཀྱང་མནོད་པར་བྱ་ཞིང་དེ་ལ་དབོག་པར་ཡང་བྱའོ།།
ཞེས་སོགས་གསུངས་པའིཕྱིར། དེ་ལྟར་མི་འདྲ་བ་བྱུང་བ་ཡང་ལྟ་བ་མཐོ་དམན་གྱི་དབང་ལས་ཡིན་ཏེ། སེམས་ཙམ་པ་ལྟ་བ་ཅུང་ཟད་དམན་པས་སྤྱོད་པའང༌ཅུང་ཟད་དོག་ལ། དབུ་མ་པ་ལྟ་བ་མཐོ་བས་སྤྱོད་པའང་གུ་ཡངས་པའི་ཕྱིར། དེ་ལྟར་ཡང་བྱི་དོར་ (མཁས་གྲུབ་རྗེའི་གསུང་འབུམ་དཔེ་བསྡུར་མ། པོད་ཁ་པ། རྗེ་ཡབ་སྲས་གསུམ་གྱི་གསུང་འབུམ་བསྡུ་སྒྲིག་ཁང་།༢༠༡༩ སྡོམ་གསུམ་རྣམ་གཞག་ཐུབ་བསྟན་རིན་པོ་ཆེའི་བྱི་དོར། ༤༩༡་་༡༡) ལས།
གསུམ་པ་ལེན་པའི་ཆོ་ག་མི་འདྲ་སྟེ། སྦྱོར་བའི་སྐབས་སུ་སློབ་དཔོན་ཐོགས་མེད་སོ་སོ་ཐར་པ་རིགས་བདུན་གྱིས་རྒྱུད་དག་ཟིན་པ་སེམས་དགེ་བ་ལ་སྐྱེ་བའི་དབང་དུ་བྱས་ནས་ཕྱག་དང་མཆོད་པ་ཙམ་ལས་ཡན་ལག་བདུན་པ་རྫོགས་པ་མི་མཛད། སེམས་ཙམ་པ་ལྟ་བ་ཅུང་ཟད་དམན་པས་སྤྱོད་པའང༌ཅུང་ཟད་དོག་སྟེ། ཉན་ཐོས་ཀྱི་སྡོམ་པ་འབོགས་པ་ལྟར་བསླབ་པ་བརྗོད་པ་དང་། བར་ཆད་དྲི་བ་ལ་སོགས་པ་མཛད་ལ། སློབ་དཔོན་ཀླུ་སྒྲུབ་ནི། ལྟ་བ་དབུ་མ་པ་མཐོ་བས་སྤྱོད་པའང་ཡངས། གང་ཟག་སྡིག་ཅན་སུ་རུང་རུང་སོ་སོ་ཐར་པ་རིགས་བདུན་དང་’ཡང་དམ་’འབྲེལ་བ་ལ་ཡང་སེམས་བསྐྱེད་སྐྱེ་བ་ལ་དགོངས་ནས། སྡིག་པ་བཤགས་པ་ལ་སོགས་པ་ཡན་ལག་བདུན་པ་མཛད་ལ། བསླབ་པ་བརྗོད་པ་དང་བར་ཆད་དྲི་བ་ལ་སོགས་པ་མི་མཛད་དོ༎
ཞེས་སོ།། གོང་གི་དཔེ་བསྡུར་མའི་ནང་། ‘ཡང་དམ།’ཞེས་གསལ་བ་ནི། དེའི་མ་ཕྱི་སྐུ་འབུམ་པར་མ་ལ་བྱས་པས་དེ་ཡང་གོང་དང་་འདྲ་ལ། ཡང་ཞོལ་པར་ (༧༠ ན ༦) དུ། ‘ཡང་དག’ ཅེས་གསལ་ཡང་གཉིས་ཀ་ལ་གོ་བ་མེད་ཅིང་ཚིག་སྦྱོར་ཡང་མ་བདེ་བས། ངེད་ཀྱི་ལྟར་ན། སོ་སོ་ཐར་པ་རིགས་བདུན་དང་‘ཡེ་མ་’འབྲེལ་བ་ལ་ཡང་། ཞེས་སམ། སོ་སོ་ཐར་པ་རིགས་བདུན་’གང་དང་ཡང་མ་’འབྲེལ་བ་ལ་ཡང་། ཞེས་པ་ལྟ་བུ་གང་རུང་ཞིག་ཡིན་འདྲ་སྙམ་ཡང་མ་ཕྱི་གཞན་མ་རྙེད་པས་ཁ་ཚོན་གཅོད་དཀའོ༎ ཞར་བྱུང་ཙམ་མོ།།
ཡང་ལྟ་བ་ཡངས་དོག་ལ་བརྟེན་ནས་ཆོ་ག་ལ་ཁྱད་པར་བྱུང་བའི་ཚུལ་ཞིབ་པར་རོལ་མཚོར་རང་ལུགས་བཞག་པའི་སྐབས་སུ་གསུངས་པས་དེ་འདིར་བླངས་ཏེ་འགོད་པར་བྱའོ།། དེ་ཡང་རོལ་མཚོ་ (གྲགས་ཆེན་་བཅོ་བརྒྱད་ལས། ཕར་ཕྱིན་སྐོར། པོད།༤༣ སྨོན་བཟང་དཔེ་རྙིང་འཚོལ་བསྡུ་ཁང་།༢༠༡༥ རྣམ་བཤད་ལུང་རིགས་རོལ་མཚོ། སྟོད་ཆ། པཎ་ཆེན་ཤཱཀྱ་མཆོག་ལྡན། ༢༡༩་༨) ལས།
འོ་ན་ཅི་ལུགས་དེ་ལ་སྨོན་པའི་སྡོམ་པ་མ་བཤད་ལ། ཅིག་ཤོས་ལ་འཆད་པ་ཅི་ཞེ་ན། དེའི་ཤེས་བྱེད་ནི་ཇི་སྐད་དུ། (ས་སྐྱ་བཀའ་འབུམ་དཔེ་བསྡུར་མ། དཔལ་བརྩེགས་བོད་ཡིག་དཔེ་རྙིང་ཞིབ་འཇུག་ཁང་།༢༠༠༧ ཆོས་རྗེ་ས་པཎ་ཀུན་དགའ་རྒྱལ་མཚན་གྱི་གསུང་འབུམ། པོད་ཁ་པ། སྡོམ་པ་གསུམ་གྱི་རབ་ཏུ་དབྱེ་བའི་བསྟན་བཅོས། ༢༤་༡༧) དེ་གཉིས་ལྟ་བ་ཐ་དད་པས།། ཆོ་ག་ཡང་ནི་ཐ་དད་ཡིན།། ཞེས་གསུངས་ལ། ལྟ་བ་ཡངས་དོག་གི་གོ་དོན་ཡང་། ཁྱབ་པའི་སྟོང་ཉིད་དང་། ཉི་ཚེ་བའི་སྟོང་ཉིད་ཀྱི་དབང་དུ་བྱས་ནས་འཆད་དགོས་པ་ཡིན་གྱི། སྤྱོད་པ་ཡངས་དོག་ལ་འཆད་པའི་གོ་བ་བླངས་ནས་ཉེས་པ་བརྗོད་པར་བྱེད་པ་དེ་དག་ནི་སུན་འབྱིན་གྱིས་འཕོངས་པ་ཡིན་ཏེ། ལུགས་འདི་ནི་ལྟ་བ་ཇི་ཙམ་མཐོ་བ་བཞིན་སྡོམ་པ་འཛིན་དགོས་མང་བར་ཞལ་གྱིས་བཞེས་པའི་ཕྱིར་ཏེ། དབུ་སེམས་ཀྱི་ཁྱད་པར་སྨོན་པ་ལ་སྡོམ་པའི་རྣམ་བཞག་མཛད་མི་མཛད་དེ་ལས་ཕྱེ་བས་སོ།།
ཞེས་སེམས་ཙམ་ལུགས་ལ་སྨོན་སྡོམ་མ་བཤད་ལ། དབུ་མ་ལུགས་ལུགས་ལ་བཤད་པ་དེ་ལྟ་བ་ཡངས་དོག་གི་ཁྱད་པར་ལས་ཡིན་པར་གསུངས་ཤིང་། ལྟ་བ་ཡངས་དོག་གི་དོན་ཡང་ ཁྱབ་པ་དང་ཉི་ཚེ་བ་ལ་བྱ་དགོས་པའི་ཕྱིར། དེས་ན་ཁ་ཅིག །ལྟ་བ་ཡངས་དོག་གི་དོན་སྤྱོད་པ་ཡངས་དོག་ལ་བྱས་ནས་ངེས་ལ་དགག་པ་བྱས་པ་ནི་དོན་མ་ཡིན་ཏེ། དབུ་མ་པ་ལྟ་བ་མཐོ་བས་བསྲུང་བྱའི་སྡོམ་པ་མང་བ་ལ། སེམས་ཙམ་ལྟ་བ་དམན་པས་བསྲུང་བྱ་ཉུང་བར་ཋེད་ཅག་གིས་ཁས་བླངས་པའི་ཕྱིར། དབུ་སེམས་ལུགས་གཉིས་ཀྱི་ཁྱད་པར་ནི། སྨོན་པའི་སྡོམ་པ་ཡོད་མེད་ཀྱི་སྒོ་ནས་འབྱེད་པར་གསུངས་སོ།། དེ་ལ་ཁྱབ་པ་དང་ཉི་ཚེ་བའི་སྟོང་ཉིད་ཀྱི་དོན་གང་ཞེ་ན། དེའི་གོ་དོན་ཡང་། དབུ་མ་པའི་ལུགས་ཀྱི་སྟོང་ཉིད་བདེན་སྟོང་སྤྲོས་བྲལ་དེ་ཉིད་འདུས་བྱས་མ་བྱས་ཆོས་ཐམས་ཅད་ཀྱི་གཤིས་ལུགས་སུ་འཇོག་རིགས་་པས་ན་ཁྱབ་པའི་སྟོང་ཉིད་ཞེས་དང་། སེམས་ཙམ་པའི་ལུགས་ཀྱི་གཟུང་འཛིན་གཉིས་སྟོང་གི་སྟོང་ཉིད་དེ་ནི་སྔ་མ་མི་འདྲ་བར་་འདུས་བྱས་ཁོ་ནའི་གཤིས་ལུགས་སུ་འཇོག་རིགས་་ཀྱི། ཆོས་ཐམས་ཅད་ཀྱི་གཤིས་ལུགས་སུ་འཇོག་མི་རིགས་པས་ཉི་ཚེ་བའི་སྟོང་པ་ཉིད་ཞེས་བརྗོད་པར་སེམས་སོ།། ཡང་དེའི་(གྲགས་ཆེན་་བཅོ་བརྒྱད་ལས། ཕར་ཕྱིན་སྐོར། པོད།༤༣ སྨོན་བཟང་དཔེ་རྙིང་འཚོལ་བསྡུ་ཁང་།༢༠༡༥ རྣམ་བཤད་ལུང་རིགས་རོལ་མཚོ། སྟོད་ཆ། པཎ་ཆེན་ཤཱཀྱ་མཆོག་ལྡན། ༢༡༩་༡༩) འཕྲོར།
བྱེ་བྲག་ཏུ་སྟོང་ཉིད་རྟོགས་པའི་ལྟ་བས་ཟིན་ན། སྨོན་སེམས་དང་། སོ་ཐར་རིས་བདུན་སོགས་སྔོན་དུ་མ་སོང་ཡང་། འཇུག་པའི་སྡོམ་པ་བསྲུང་བ་ལ་དཀའ་བའི་གནས་མི་འབྱུང་བའི་ཕྱིར་དང༌། སྟོང་པ་ཉིད་ཀྱི་ལྟ་བ་དེ་སྔོན་དུ་སོང་ན། སྨོན་པ་བྱང་ཆུབ་ཀྱི་མཆོག་ཏུ་སེམས་བསྐྱེད་པ་ཡང་རང་གི་ངང་གིས་འབྱུང་བའི་ཕྱིར། དོན་དེ་ལ་དགོངས་ནས་དབུ་མའི་གཞུང་ལས་ཆོ་གའི་ཚུལ་དེ་ལྟར་མཛད་པ་ཡིན་ཏེ། དཔེར་ན་དབུ་མ་རྒྱན་ལས། ཡང་དག་ཤེས་ཚུལ་སྔོན་བཏང་སྟེ། །ཞེས་སྟོང་པ་ཉིད་ཀྱི་ལྟ་བ་སྔོན་དུ་བཏང་ནས་བྱང་ཆུབ་ཏུ་སེམས་བསྐྱེད་པར་གསུངས་སོ།།
ཞེས་གསུངས་ཏེ། དེ་ཡང་སྟོང་ཉིད་རྟོགས་ན་སོ་ཐར་གྱི་སྡོམ་པ་དང་སྨོན་སེམས་མེད་ཀྱང་དེའི་མཐུས་སྨོན་སེམས་ངང་གིས་བྱུང་སྟེ། འཇུག་སྡོམ་བཟུང་བ་ལ་དཀའ་ངལ་མེད་པས། དབུ་མའི་སྐབས་སུ་སྨོན་འཇུག་ཅིག་ཅར་ལེན་པའི་ཆོ་ག་གསུངས་སོ་ཞེའོ།། དེའི་སྒྲུབ་བྱེད་ཀྱང་དེ་ཉིད་ (གྲགས་ཆེན་་བཅོ་བརྒྱད་ལས། ཕར་ཕྱིན་སྐོར། པོད།༤༣ སྨོན་བཟང་དཔེ་རྙིང་འཚོལ་བསྡུ་ཁང་།༢༠༡༥ རྣམ་བཤད་ལུང་རིགས་རོལ་མཚོ། སྟོད་ཆ། པཎ་ཆེན་ཤཱཀྱ་མཆོག་ལྡན། ༢༢༠་༦) ལས།
དབུ་མའི་ལྟ་བ་དང་སྨོན་སེམས་རྐྱང་པ་ཐབས་ཤེས་ཟུང་དུ་འཇུག་པར་འགྱུར་ལ། སེམས་ཙམ་གྱི་ལྟ་བ་དང་ཐབས་ཤེས་ཟུང་དུ་འཇུག་པ་ལ་འཇུག་སེམས་དགོས་པའི་དོན་ཏེ། དབུ་མའི་ལུགས་ཀྱི་ཤེར་ཕྱིན་གྱི་ནང་དུ་ཕར་ཕྱིན་དྲུག་ཀ་འདུས་ལ། སེམས་ཙམ་ལུགས་ཀྱི་དེའི་ནང་དུ་དེ་མི་འདུག་པས་སོ་སྙམ་དུ་དགོངས་པའོ།།
ཞེས་དབུ་སེམས་ལུགས་གཉིས་ཀྱི་ལྟ་བ་དང་འཇུག་གི་སེམས་དང་ཐབས་ཤེས་ཟུང་དུ་འཇུག་ཀྱང་། སེམས་ཙམ་པའི་ལྟ་བ་དེ་སྨོན་སེམས་དང་ཟུང་དུ་མི་འཇུག་པར་གསུངས་ཤིང་། དེའི་རྒྱུ་མཚན་ཡང་སེམས་ཙམ་པའི་ཤེར་ཕྱིན་གྱི་ནང་དུ་ཕར་ཕྱིན་དྲུག་ག་མ་བསྡུས་པ་ལ་ཐུག་པར་གསུངས་ཏེ། འོག་ཏུ་བརྟག་པར་བྱའོ།།
དེ་བཞིན་དུ་དངོས་གཞིའི་ཆོ་ག་ལ་ཡང་་མི་འདྲ་སྟེ། སློབ་དཔོན་ཐོགས་མེད་སྨོན་འཇུག་རིམ་ཅན་དང་། འཕགས་པ་ཀླུ་སྒྲུབ་སྨོན་འཇུག་སྟབས་གཅིག་ཏུ་མཛད་པའི་ཕྱིར་དང་། ཆོ་གའི་བརྗོད་ཚུལ་ཡང་མི་འདྲ་བའི་ཕྱིར། དང་པོ་གྲུབ་སྟེ། ལུགས་འདིར་དང་པོར་སྨོན་སེམས་བཟུང་ཞིང་། དེ་ནས་འཇུག་སྡོམ་ལེན་པར་གསུངས་པའི་ཕྱིར་ཏེ། བྱང་སའི་རྗེས་སུ་འབྲངས་པའི་སེམས་བསྐྱེད་ཆོ་ག་ཇོ་བོས་མཛད་པ་ (སྡེ་བསྟན། དབུ་མ། གི་པ། སེམས་བསྐྱེད་པ་དང་སྡོམ་པའི་ཆོ་གའི་རིམ་པ། དཔལ་མར་མེ་མཛད་ཡེ་ཤེས། ༢༤༥ བ ༢) ལས།
བཅོམ་ལྡན་འདས་ཤཱཀྱ་ཐུབ་པ་དང་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཡིད་ཀྱིས་དམིགས་ཏེ། ཕྱག་བཙལ་བ་དང༌། ཅི་འབྱོར་བའི་མཆོད་པ་ལ་སོགས་པ་བྱས་ལ། སློབ་དཔོན་མདུན་དུ་བྱས་ཏེ་པུས་མོ་གཡས་པའི་ལྷ་ང་ས་ལ་བཙུགས་པའམ་ཙོག་པུར་ཡང་རུང་བས་འདུག་སྟེ། ཐལ་མོ་སྦྱར་བས་སེམས་བསྐྱེད་པར་བྱ་སྟེ། ཕྱོགས་བཅུ་རྣམས་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། །སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བས་སྐྱེ་བ་འདི་དང་སྐྱེ་བ་གཞན་དང་གཞན་དག་ཏུ་སྦྱིན་པའི་རང་བཞིན་དང༌། ཚུལ་ཁྲིམས་ཀྱི་རང་བཞིན་དང༌། བསྒོམ་པའི་རང་བཞིན་གྱི་དགེ་བའི་རྩ་བ་བདག་གིས་བགྱིས་པ་དང༌། བགྱིད་དུ་སྩལ་བ་དང༌། བགྱིད་པ་ལ་རྗེས་སུ་ཡི་རང་བའི་དགེ་བའི་རྩ་བ་དེས། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང༌། ས་ཆེན་པོ་ལ་རབ་ཏུ་བཞུགས་པའི་བྱང་ཆུབ་སེམས་དཔའ་ཆེན་པོ་རྣམས་ཀྱིས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཐུགས་བསྐྱེད་པར་མཛད་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་ནས་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཆེན་པོ་ལ་སེམས་བསྐྱེད་པར་བྱའོ། །སེམས་ཅན་མ་བརྒལ་བ་རྣམས་བསྒྲལ་བར་བགྱིའོ། །མ་གྲོལ་བ་རྣམས་དགྲོལ་བར་བགྱིའོ། །དབུགས་མ་ཕྱིན་པ་རྣམས་དབུགས་དབྱུང་བར་བགྱིའོ། །ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་བཟླ་བར་བགྱིའོ་ཞེས་ལན་གསུམ་དུ་བརྗོད་པར་བྱའོ།།
ཞེས་སྨོན་སེམས་ཀྱི་ཆོ་ག་དང་། དེའི་རྗེས་སུ་བྱང་སྡོམ་བླང་བར་གསུངས་ཤིང་། དེའི་ཆོ་ག་ཡང་འདི་ཉིད་ (སྡེ་བསྟན། དབུ་མ། གི་པ། སེམས་བསྐྱེད་པ་དང་སྡོམ་པའི་ཆོ་གའི་རིམ་པ། དཔལ་མར་མེ་མཛད་ཡེ་ཤེས། ༢༤༧ ན ༦) ལས།
བཙུན་པའམ། ཚེ་དང་ལྡན་པའམ། རིགས་ཀྱི་བུ་མིང་འདི་ཞེས་བྱ་བ་ཁྱོད་བདག་བྱང་ཆུབ་སེམས་དཔའ་མིང་འདི་ཞེས་བྱ་བ་ལས། འདས་པའི་བྱང་ཆུབ་སེམས་དཔའ་ཐམས་ཅད་ཀྱི་བསླབ་པའི་གཞིར་གྱུར་པ་གང་ཡིན་པ་དང༌། ཚུལ་ཁྲིམས་སུ་གྱུར་པ་གང་ཡིན་པ་དང༌། མ་བྱོན་པའི་བྱང་ཆུབ་སེམས་དཔའ་ཐམས་ཅད་ཀྱི་བསླབ་པའི་གཞིར་གྱུར་པ་གང་ཡིན་པ་དང༌། ཚུལ་ཁྲིམས་སུ་གྱུར་པ་གང་ཡིན་པ་དང༌། ད་ལྟར་ཕྱོགས་བཅུའི་འཇིག་རྟེན་ན་ད་ལྟར་བྱུང་བའི་བྱང་ཆུབ་སེམས་དཔའ་ཐམས་ཅད་ཀྱི་བསླབ་པའི་གཞིར་གྱུར་པ་གང་ཡིན་པ་དང༌། ཚུལ་ཁྲིམས་སུ་གྱུར་པ་གང་ཡིན་པའི་བསླབ་པའི་གཞི་གང་དག་དང་ཚུལ་ཁྲིམས་གང་དག་ལ། འདས་པའི་བྱང་ཆུབ་སེམས་དཔའ་ཐམས་ཅད་ཀྱིས་བསླབ་པར་གྱུར་པ་དང༌། མ་བྱོན་པའི་བྱང་ཆུབ་སེམས་དཔའ་ཐམས་ཅད་ཀྱིས་སློབ་པར་འགྱུར་བ་དང༌། ཕྱོགས་བཅུ་བདག་ན་ད་ལྟར་བྱུང་བའི་བྱང་ཆུབ་སེམས་དཔའ་ཐམས་ཅད་ད་ལྟར་སློབ་པའི་བྱང་ཆུབ་སེམས་དཔའི་བསླབ་པའི་གཞི་ཐམས་ཅད་དང་བྱང་ཆུབ་སེམས་དཔའི་ཚུལ་ཁྲིམས་ཐམས་ཅད་དེ། སྡོམ་པའི་ཚུལ་ཁྲིམས་དང་དགེ་བ་ཆོས་སྡུད་པའི་ཚུལ་ཁྲིམས་དང༌། སེམས་ཅན་གྱི་དོན་བྱ་བའི་ཚུལ་ཁྲིམས་ནོད་དམ་ཞེས་སྨྲོས་ཤིག །དེས་ཀྱང་། ནོད་ལགས་སོ།། ཞེས་སྨྲོས་ཤིག །དེ་ལྟར་སློབ་དཔོན་གྱིས་ལན་གསུམ་གྱི་བར་དུ་ལེན་ནམ། ཞེས་བརྗོད་ཅིང་། སློབ་མས། རབ་ཏུ་ལེན་ལགས་སོ།། ཞེས་ལན་གསུམ་བརྗོད་པས་སྡོམ་པ་བླངས་པར་འགྱུར་རོ།།
ཞེས་དྲིས་ལན་གྱི་སྒོ་ནས་བྱང་སྡོམ་ནོད་པར་གསུངས་པའི་ཕྱིར། གཉིས་པ་གྲུབ་སྟེ། སྤྱོད་འཇུག་ (སྡེ་བསྟན། དབུ་མ། ལ་པ། བྱང་ཆུབ་སེམས་དཔའི་སྤྱོད་པ་ལ་འཇུག་པ། རྒྱལ་སྲས་ཞི་བ་ལྷ། ༧ བ ༢) ལས།
ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་། །བྱང་ཆུབ་སེམས་དཔའི་བསླབ་པ་ལ། །དེ་དག་རིམ་བཞིན་གནས་པ་ལྟར། །དེ་བཞིན་འགྲོ་ལ་ཕན་དོན་དུ། ། བྱང་ཆུབ་སེམས་ནི་བསྐྱེད་བགྱི་ཞིང་། །དེ་བཞིན་དུ་ནི་བསླབ་པ་ལའང་། །རིམ་པ་བཞིན་དུ་བསླབ་པར་བགྱི། །
ཞེས་སྨོན་འཇུག་ཅིག་ཅར་དུ་ལེན་པའི་ཆོ་ག་གསུངས་པའི་ཕྱིར།
དེ་ལྟར་ཡང་བྱི་དོར་ (མཁས་གྲུབ་རྗེའི་གསུང་འབུམ་དཔེ་བསྡུར་མ། པོད་ཁ་པ། རྗེ་ཡབ་སྲས་གསུམ་གྱི་གསུང་འབུམ་བསྡུ་སྒྲིག་ཁང་།༢༠༡༩ སྡོམ་གསུམ་རྣམ་གཞག་ཐུབ་བསྟན་རིན་པོ་ཆེའི་བྱི་དོར། ༤༩༡ ་ ༡༨) ལས།
དངོས་གཞིའི་ཆོ་ག་ལ་ཡང་། སློབ་དཔོན་ཐོགས་མེད་སྨོན་པ་སྔར་བླངས་ནས་ཕྱིས་འཇུག་པ་མཛད་ལ། འཕགས་པ་ཀླུ་སྒྲུབ་སྨོན་འཇུག་སྟབས་གཅིག་ཏུ་མཛད་ཅིང༌། ཆོ་གའི་བརྗོད་ཚུལ་ཡང་མི་འདྲའོ༎
ཞེས་སོ།།
མཇུག་ཀྱང་མི་འདྲ་སྟེ། སློབ་དཔོན་ཐོགས་མེད་མཁྱེན་གསོལ་ལ་སོགས་པ་མཛད་ལ། འཕགས་པ་ཀླུ་སྒྲུབ་དེ་མི་མཛད་པར་མཇུག་ཏུ་རང་གཞན་དགའ་བ་བསྐྱེད་པ་སོགས་མཛད་པའི་ཕྱིར། དང་པོ་གྲུབ་སྟེ། ཇོ་བོའི་སེམས་བསྐྱེད་ཆོ་ག་ (སྡེ་བསྟན། དབུ་མ། གི་པ། སེམས་བསྐྱེད་པ་དང་སྡོམ་པའི་ཆོ་གའི་རིམ་པ། དཔལ་མར་མེ་མཛད་ཡེ་ཤེས། ༢༤༧ བ ༤) ལས།
ཕྱོགས་བཅུའི་སང་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཡན་ལག་ལྔས་ཕྱག་འཚལ་བ་སྔོན་དུ་འགྲོ་བས་ཐལ་མོ་སྦྱར་ཏེ། འདི་སྐད་ཅེས་ལན་གསུམ་བརྗོད་པར་བྱ་སྟེ། བྱང་ཆུབ་སེམས་དཔའ་མིང་འདི་ཞེས་བྱ་བས། བདག་བྱང་ཆུབ་སེམས་དཔའ་མིང་འདི་ཞེས་བྱ་བ་ལས། བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ཡང་དག་པར་བླང་བར་བྱ་བ་ལན་གསུམ་གྱི་བར་དུ་མནོས་ལགས་ཏེ། བྱང་ཆུབ་སེམས་དཔའ་མིང་འདི་ཞེས་བྱ་བ་འདིས། བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ཡང་དག་པར་བླངས་པ་ལ། བདག་མིང་འདི་ཞེས་བགྱི་བ་དཔང་དུ་གྱུར་པར་འཕགས་པའི་མཆོག་ལྐོག་ཏུ་གྱུར་ཀྱང༌། ཕྱོགས་བཅུའི་འཇིག་རྟེན་གྱི་ཁམས་མཐས་གཏུགས་པའི་ཆོས་ཐམས་ཅད་ལྐོག་ཏུ་མ་གྱུར་པའི་ཐུགས་མངའ་བ་ཐམས་ཅད་ལ་མཁྱེན་པར་གསོལ་ལོ་ཞེས་ལན་གསུམ་གྱི་བར་དུ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་ལ་བརྗོད་དེ།
ཞེས་མཁྱེན་གསོལ་དང་། གཞན་ཡང་སློབ་མ་ལ་སྤྲོ་བ་བསྐྱེད་པ། གསང་བ་བསྡམས་པ། བསླབ་བྱ་སྟོན་པ་རྣམས་གསུངས་པའི་ཕྱིར། གཉིས་པ་གྲུབ་སྟེ། སྤྱོད་འཇུག་(སྡེ་བསྟན། དབུ་མ། ལ་པ། བྱང་ཆུབ་སེམས་དཔའི་སྤྱོད་པ་ལ་འཇུག་པ། རྒྱལ་སྲས་ཞི་བ་ལྷ། ༧ བ ༣) ལས།
དེ་ལྟར་བློ་དང་ལྡན་པ་ཡིས། །རབ་དང་བྱང་ཆུབ་སེམས་བཟུང་ནས། །མཇུག་ཀྱང་རྒྱས་པར་བྱ་བའི་ཕྱིར། །སེམས་ནི་འདི་ལྟར་གཟེངས་བསྟོད་དོ། །དེང་དུ་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་པར་ཐོབ། །དི་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་བདག་དེང་གྱུར། །
ཞེས་སོགས་ཤོལོ་ཀ་བརྒྱད་ཀྱིས་རང་དགའ་བ་བསྒོམ་པ་དང་། (སྡེ་བསྟན། དབུ་མ། ལ་པ། བྱང་ཆུབ་སེམས་དཔའི་སྤྱོད་པ་ལ་འཇུག་པ། རྒྱལ་སྲས་ཞི་བ་ལྷ། ༨ ན ༡)
བདག་གིས་དི་རིང་སྐྱོབ་པ་ཐམས་ཅད་ཀྱི།། སྤྱན་སྔར་འགྲོ་བ་བདེ་གཤེགས་ཉིད་དང་ནི།། བར་དུ་བདེ་ལ་མགྲོན་དུ་བོས་ཟིན་གྱིས།། ལྷ་དང་ལྷ་མིན་ལ་སོགས་དགའ་བར་གྱིས།།
ཞེས་གཞན་དགའ་བ་བསྐྱེད་དུ་གཞུགཔར་བསྟན་པའི་ཕྱིར། དེ་ལྟར་ཡང་བྱི་དོར་ (མཁས་གྲུབ་རྗེའི་གསུང་འབུམ་དཔེ་བསྡུར་མ། པོད་ཁ་པ། རྗེ་ཡབ་སྲས་གསུམ་གྱི་གསུང་འབུམ་བསྡུ་སྒྲིག་ཁང་།༢༠༡༩ སྡོམ་གསུམ་རྣམ་གཞག་ཐུབ་བསྟན་རིན་པོ་ཆེའི་བྱི་དོར། ༤༩༡་༢༠)ལས།
མཇུག་ཀྱང་། སློབ་དཔོན་ཐོགས་མེད་མཁྱེན་པར་གསོལ་བ་ལ་སོགས་པ་མཛད་ལ། འཕགས་པ་ཀླུ་སྒྲུབ་རང་གཞན་དགའ་བ་བསྐྱེད་པ་ལ་སོགས་པ་མཛད་པས་མི་འདྲའོ༎
ཞེས་སོ༎ གོང་དུ་ཤཱཀ་མཆོག་པའི་བཞེད་ཚུལ་རྒྱས་པར་ལུང་ཁུངས་དང་སྦྱར་ནས་བཀོད་དེ། དེས་མཛད་པའི་ ‘བྱང་ཆུབ་སེམས་དཔའི་འདུལ་བ་རྣམ་ངེས་’ (ཤཱཀ་མཆོག་གསུང་འབུམ། ཀྲུང་གོ་བོད་རིག་པ་དཔེ་སྐྲུན་ཁང་།༢༠༡༣ པོད་ཆ་པ། ཐེག་པ་གསུམ་གྱི་འདུལ་བ་རྣམ་པར་གཞག་པ་ལས། བྱང་ཆུབ་སེམས་དཔའི་འདུལ་བ་རྣམ་པར་ངེས་པ། ༢༧༨ ་ ༡) ལ་གཞིར་བཞག་ནས་བཀོད་པ་ཡིན་ལ། ལུང་རིགས་རོལ་མཚོར་ (གྲགས་ཆེན་་བཅོ་བརྒྱད་ལས། ཕར་ཕྱིན་སྐོར། པོད།༤༣ སྨོན་བཟང་དཔེ་རྙིང་འཚོལ་བསྡུ་ཁང་།༢༠༡༥ རྣམ་བཤད་ལུང་རིགས་རོལ་མཚོ། སྟོད་ཆ། པཎ་ཆེན་ཤཱཀྱ་མཆོག་ལྡན། ༢༡༧ ་ ༢༠) ཡང་རང་ལུགས་བཞག་པ་ན། འདི་ལྟར།
གསུམ་པ་ནི། འཕགས་པ་ཐོགས་མེད་ཐོག་མར་སྨོན་པ་བླངས་ནས། ཕྱིས་འཇུག་པ་ལེན་པ་དང་། བར་ཆད་དྲི་བ་སོགས་མཛད་ལ། འཕགས་པ་ཀླུ་སྒྲུབ་ནི་སྨོན་འཇུག་སྟབས་ཅིག་ཏུ་ལེན་པར་མཛད་པའི་ཁྱད་པར་ལས་དང་།
ཞེས་གསུངས།
དེ་ལ་མཁས་གྲུབ་རྗེས་དགག་པ་མཛད་ཚུལ་ནི། དབུ་མ་ལུགས་དང་སེམས་ཙམ་ལུགས་གཉིས་ཀྱི་སྤྱོད་པ་ལ་ཡངས་དོག་གི་ཁྱད་པར་བྱུང་བ་དེ་ལྟ་བ་ལ་ཡངས་དོག་ཀྱི་ཁྱད་པར་ལས་བྱུང་བར་འདོད་པ་ནི་ཤིན་ཏུ་མི་འཐད་དེ། ལྟ་བའི་ངེས་པ་ཇི་ཙམ་ཟབ་ཏུ་སོང་བ་དེའི་ཚོད་ཀྱིས་རྟེན་འབྱུང་ལ་ངེས་པ་ཟབ་ཏུ་འགྲོ་བ་ཞིག་ངེས་པར་དགོས་ལ། དེའི་ཚེ་ཀུན་བྱང་གི་བླང་དོར་ལ་འཇུག་པ་སྔར་ལས་ཆེས་ཞིབ་ཚགས་པར་འགྱུར་བའི་ཕྱིར་དང་། དེ་ལྟ་མ་ཡིན་པར་ལྟ་བའི་ངེས་པ་ཇི་ཙམ་རྙེད་ལོ་བྱས་པ་དེའི་ཚོད་ཀྱིས། སྤྱོད་པ་ལ་བརྩི་མཐོང་ཇེ་ཆུང་དུ་འགྱུར་ན། དེ་ནི་རང་གི་སྒོམ་པའི་ལྟ་བ་ཡང་དག་མ་ཡིན་པའི་རྒྱུ་མཚན་ཡང་དག་ཡིན་པའི་ཕྱིར། དེ་ལྟར་ཡང་བྱི་དོར་ (མཁས་གྲུབ་རྗེའི་གསུང་འབུམ་དཔེ་བསྡུར་མ། པོད་ཁ་པ། རྗེ་ཡབ་སྲས་གསུམ་གྱི་གསུང་འབུམ་བསྡུ་སྒྲིག་ཁང་།༢༠༡༩ སྡོམ་གསུམ་རྣམ་གཞག་ཐུབ་བསྟན་རིན་པོ་ཆེའི་བྱི་དོར། ༤༩༧་༨) ལས།
ལྟ་བ་ཡངས་དོག་གིས་སྤྱོད་པ་ཡངས་དོག་བྱུང་བར་སྨྲ་བ་ནི། སྟོང་པ་ཉིད་དང་རྟེན་འབྲེལ་གཉིས་ཕན་ཚུན་ངེས་པ་འདྲེན་པའི་གྲོགས་སུ་སོང་ནས། ཇི་ཙམ་སྟོང་པ་ཉིད་ལ་ཕྱིན་ཅི་མ་ལོག་པའི་ངེས་པ་རྙེད་པ་དེ་ཙམ་གྱིས་ཤིན་ཏུ་ཕྲ་བའི་བླང་དོར་གྱི་གནས་རྣམས་ལ་ངེས་པ་ཇེ་ཆེར་སོང་སྟེ། བླང་དོར་གྱི་གནས་ལ་ཀུན་ཏུ་སྤྱོད་པ་དག་ཆེས་ཞིབ་ཏུ་འགྲོ་དགོས་པས། ཟབ་མོ་དབུ་མའི་ལྟ་བ་རྟོགས་པའི་ཁྱད་ཆོས་ཀྱི་གཙོ་བོ་དེ་ཉིད་ཁོང་དུ་མ་ཆུད་པར། བླང་དོར་ཞིབ་ཏུ་བྱེད་པ་ཐམས་ཅད་ལྟ་བ་མ་གོ་བའི་འཁྲུལ་ངོ་འབའ་ཞིག་ཏུ་བཟུངས་ཤིང༌། སྟོང་ཉིད་ལ་ངེས་པ་ལྟར་སྣང་རེ་རྙེད་ན་རྒྱུ་འབྲས་ཁྱད་དུ་གསོད་པའི་ལོག་རྟོག་གི་ཐ་ཆད་དེ་ཉིད་འོངས་པ་ཡིན་ཏེ། གཞན་དུ་ན་ལྟ་བ་ཡངས་སུ་སོང་གིན་སྤྱོད་པ་མི་ཞིབ་ཏུ་འགྲོ་བའི་དོན་གང་ཡིན་སྨྲོས་ཤིག།
ཞེས་སོ༎ འདི་ནི་དྲང་ངེས་རྣམ་འབྱེད་(རྗེ་ཙོང་ཁ་པ་ཆེན་པོའ་ིགསུང་འབུམ་དཔེ་བསྡུར་མ། པོད་ཕ་པ། རྗེ་ཡབ་སྲས་གསུམ་གྱི་གསུང་འབུམ་བསྡུ་སྒྲིག་ཁང་།༢༠༡༩ དྲང་བ་དང་ངེས་པའི་དོན་རྣམ་པར་ཕྱེ་བའི་བསྟན་བཅོས་ལེགས་བཤད་སྙིང་པོ། ༤༣༡ ་༡༠) ལས།
་བ་རྒྱུད་ལ་མ་སྐྱེས་གོང་གི་བྱང་ཆུབ་སེམས་སྦྱོང་ལ་སོགས་པ་ཐམས་ཅད་བདེན་འཛིན་ནམ་མཚན་འཛིན་དུ་འདུག་སྙམ་ནས། ལྟ་བ་རྒྱུད་ལ་སྐྱེས་པར་རློམ་པའི་འ ོག་ཏུ་སྤྱོད་ཕྱོགས་ཐམས་ཅད་ལ་ཞེ་རྩིས་མེད་པའི་ལོག་ལྟ་རྣམས་ལེགས་པར་ཁེགས་པར་འགྱུར་རོ།།
ཞེས་གསུངས་པ་དང་དགོངས་པ་གཅིག་ཏུ་སྣང་ངོ་།།
གཞན་ཡང་ལྟ་བ་ཡངས་དོག་གིས་སྤྱོད་པ་ཡངས་དོག་བཤད་པ་མི་འཐད་པར་ཐལ། བྱམས་འཇམ་དབྱངས་ཀླུ་སྒྲུབ་ཐོགས་མེད་ཞི་བ་ལྷ་ཇོ་བོ་ཀུན་རང་གི་ལྟ་བ་དབུ་མར་གནས་པ་མཚུངས་པའི་ཕྱིར། བྱམས་པ་དང་ཐོགས་མེད་ཀྱི་སེམས་ཙམ་ཀྱི་གཞུང་མཛད་པས་སྐྱོན་སྤོང་མི་ནུས་ཏེ། བདག་ཅག་གི་སྟོན་པ་ཡང་དེར་ཐལ་བར་འགྱུར་བའི་ཕྱིར་རོ།། ཇོ་བོ་རྗེ་ལྟ་བ་ཡངས་པ་ཀླུ་སྒྲུབ་ལྟར་དང་སྤྱོད་པ་དོག་པ་ཐོགས་མེད་ལྟར་ཡིན་པ་ཁྱོད་ཀྱིས་ཁས་བླངས་པའི་ཕྱིར། དེས་ན་དབུ་མ་པ་ཆོས་ཅན། སྤྱོད་པ་ཡངས་ཏེ། ལྟ་བ་ཡངས་པའི་ཕྱིར། ཞེས་པ་དེ་ནི་དོངས་ཀྱི་མ་ངེས་པའི་གཏན་ཚིགས་སུ་འགྱུར་ཏེ། ཕྱོགས་ཆོས་གང་ཞིག །རྟགས་མཐུན་ཕྱོགས་གཉིས་ཀ་ལ་མཐོང་བའི་ཕྱིར། ཇོ་བོ་ལྟ་བ་ཡངས་ཀྱང་སྤྱོད་པ་དོག །ཞི་བ་ལྷ་ལྟ་བ་ཡངས་ལ་སྤྱོད་པའང་ཡངས་པའི་ཕྱིར། རྟགས་ལས། དེ་ལྟར་ཡང་བྱི་དོར་ (མཁས་གྲུབ་རྗེའི་གསུང་འབུམ་དཔེ་བསྡུར་མ། པོད་ཁ་པ། རྗེ་ཡབ་སྲས་གསུམ་གྱི་གསུང་འབུམ་བསྡུ་སྒྲིག་ཁང་།༢༠༡༩ སྡོམ་གསུམ་རྣམ་གཞག་ཐུབ་བསྟན་རིན་པོ་ཆེའི་བྱི་དོར། ༤༩༨་༡༨) ལས།
གཞན་ཡང་རྗེ་བཙུན་འཇམ་དབྱངས་དང༌། རྗེ་བཙུན་བྱམས་པ་དང༌། འཕགས་པ་ཀླུ་སྒྲུབ་དང༌། འཕགས་པ་ཐོགས་མེད་དང༌། ཞི་བ་ལྷ་དང༌། ཇོ་བོ་རྗེ་རྣམས་རང་ལུགས་ཀྱི་ལྟ་བ་དབུ་མའི་ལྟ་བ་མཐར་ཐུག་པར་ཁྱད་པར་མེད་པ་ལ། དབུ་སེམས་ཀྱི་ལྟ་བ་ཐ་དད་པའི་དབང་གིས་དེ་དག་སྤྱོད་པ་ཡང་ཐ་དད་པར་ཇི་ལྟར་སྨྲ། བྱམས་པ་དང་ཐོགས་མེད་ཀྱིས་གདུལ་བྱའི་ངོར་སེམས་ཙམ་གྱི་ལྟ་བ་སྟོན་པའི་གཞུང་མང་དུ་གསུངས་པའི་ཕྱིར་རོ་སྙམ་ན། སྟོན་པ་ཤཱཀྱ་ཐུབ་པ་ཡང་ལྟ་བ་དོག་ཅིང༌། དེའི་དབང་གིས་སྤྱོད་པ་ཡང་དོག་པ་བྱམས་པ་ཐོགས་མེད་སོགས་དང་མཚུངས་པར་ཁས་ལེན་རིགས་པར་འགྱུར་ཏེ། གདུལ་བྱའི་ངོར་སེམས་ཙམ་གྱི་ལྟ་བ་ཞལ་གྱིས་བཞེས་པའི་མདོ་མང་དུ་གསུངས་པའི་ཕྱིར་རོ།། ཇོ་བོ་རྗེ་ལྟ་བ་དབུ་མ་འཛིན་པ་དང་སྤྱོད་པ་དོག་པ་ཐོགས་མེད་སོགས་དང་མཚུངས་པར་ཁྱེད་རང་གིས་ཁས་བླངས་པའི་ཕྱིར། ལྟ་བ་ཡངས་ན་སྤྱོད་པ་ཡངས་པ་དང༌། ལྟ་བ་དོག་ན་སྤྱོད་པ་དོག་པས་ཁྱབ་པ་ལ་དངོས་ཀྱི་མ་ངེས་པ་རང་ཉིད་ཀྱིས་འཕངས་པ་ཡིན་ནོ།།
ཞེས་ས།།
ཡང་ཇི་ལྟར་སྔོན་གྱི། ཞེས་སོགས་སྨོན་འཇུག་ཅིག་ཅར་དུ་ལེན་པའི་ཆོ་གར་གསུངས་པ་འགོ་མཚུངས་ཀྱི་རིགས་པས་དགག་པ་ནི། འོ་ན་སྔགས་སྡོམ་ལེན་པའི་ཆོ་ག་དེ་ཆོས་ཅན། ཁྱོད་ལ་བརྟེན་ནས་སྔགས་སྡོམ་དང་བྱང་སྡོམ་གཉིས་ཅིག་ཅར་དུ་འཐོབ་པར་ཐལ། དེའི་ཆོ་གར། (སྡེ་བཀའ། རྒྱུད། ཉ་པ། གསང་བ་རྣལ་འབྱོར་ཆེན་པོའི་རྒྱུད་རྡོ་རྗེ་རྩེ་མོ། ༡༨༤ ན ༡)
ཇི་ལྟར་དུས་གསུམ་མགོན་པོ་རྣམས༎ བྱང་ཆུབ་ཏུ་ནི་ངེས་མཛད་པའི༎ བྱང་ཆུབ་སེམས་ནི་བླ་ན་མེད༎ དམ་པ་བདག་གིས་བསྐྱེད་པར་བགྱི༎ སངས་རྒྱས་རྣལ་འབྱོར་སྡོམ་པ་ལ༎ ཚུལ་ཁྲིམས་ཀྱི་ནི་བསླབ་པ་དང་༎ དགེ་བའི་ཆོས་ནི་སྡུད་པ་དང་༎ སེམས་ཅན་དོན་བྱེད་ཚུལ་ཁྲིམས་གས་གསུམ༎ བདག་གིས་བརྟན་པོར་གཟུང་བར་བགྱི༎
ཞེས་ཤོ་ལོ་ཀ་སྔ་མས་སྨོན་སེམས་དང་། ཕྱི་མས་བྱང་ཆུབ་སེམས་དཔའི་ཚུལ་ཁྲིམས་གསུམ་བསྲུང་བར་དམ་བཅས་པ་དེ་ཆོ་ག་གཅིག་གི་ནང་དུ་ཚང་བའི་ཕྱིར། ཁྱབ་སྟེ། སྤྱོད་འཇུག་(སྡེ་བསྟན། དབུ་མ། ལ་པ། བྱང་ཆུབ་སེམས་དཔའི་སྤྱོད་པ་ལ་འཇུག་པ། རྒྱལ་སྲས་ཞི་བ་ལྷ། ༧ བ ༢) གི་སྡོམ་པ་ལེན་པའི་ཆོ་གར།
ཇི་ལྟར་སྔོན་གྱི་བདེ་གཤེགས་ཀྱིས༎
ཞེས་སོགས་ཀྱི་སྐབས་སུ། དེ་བཞིན་འགྲོ་ལ་ཕན་དོན་དུ༎ བྱང་ཆུབ་སེམས་ནི་བསྐྱེད་བགྱི་ཞིང་༎ ཞེས་པས་སྨོན་སེམས་གཟུང་བ་དང་། དེ་བཞིན་དུ་ནི་བསླབ་པ་ལའང་༎ རིམ་པ་བཞིན་དུ་བསླབ་པར་བགྱི༎ ཞེས་པས་འཇུག་སེམས་གཟུང་བ་སྟེ། གཉིས་པོ་ཆོ་ག་གཅིག་གིས་ལེན་པར་ཁྱེད་འདོད་པ་གང་ཞིག །མཚུངས་པའི་ཕྱིར། འདོད་མི་ནུས་ཏེ། ཨ་བྷྱའི་དཀྱིལ་ཆོག་རྡོ་རྗེ་ཕྲེང་བ་ (སྡེ་བསྟན། རྒྱུད། ཕུ་པ། དཀྱིལ་འཁོར་གྱི་ཆོ་ག་རྡོ་རྗེ་ཕྲེང་བ་ཞེས་བྱ་བ། ༦༧ ན ༧) སོགས་དཀྱིལ་ཆོག་ཚད་ལྡན་མང་པོར། གུར་ (སྡེ་བཀའ། རྒྱུད། ང་པ། འཕགས་པ་མཁའ་འགྲོ་མ་རྡོ་རྗེ་གུར་ཞེས་བྱ་བའི་རྒྱུད་ཀྱི་རྒྱལ་པོ་ཆེན་པོའི་བརྟགས་པ། ༥༣ བ ༤) ནས་བྱུང་བའི། དཀོན་མཆོག་གསུམ་ལ་བདག་སྐྱབས་མཆི༎ ཞེས་སོགས་ཀྱིས་བྱང་སྡོམ་བཟུང་ཞིང་། དེ་ནས་རྩེ་མོ་ (༡༨༤ ན ༡) དང་། རྡོ་རྗེ་མཁའ་འགྲོ། (སྡེ་བཀའ། རྒྱུད། ཁ་པ། རྒྱུད་ཀྱི་རྒྱལ་པོ་ཆེན་པོ་དཔལ་རྡོ་རྗེ་མཁའ་འགྲོ་ཞེས་བྱ་བ། ༣༤ བ ༡) དེའི་རྒྱུད་ཕྱི་མ། (སྡེ་བཀའ། རྒྱུད། ཁ་པ། རྡོ་རྗེ་མཁའ་འགྲོ་ཞེས་བྱ་བའི་རྒྱུད་ཕྱི་མ། ༡༣༤ ན ༧) ཡང་དག་སྦྱོར་བ་(སྡེ་བཀའ། རྒྱུད། ག་པ། ཡང་དག་པར་སྦྱོར་བ་ཞེས་བྱ་བའི་རྒྱུད་ཆེན་པོ། ༩༦ ན ༦) སོགས་རྒྱུད་དུ་མར་བྱུང་བའི། སངས་རྒྱས་བྱང་ཆུབ་སེམས་དཔའ་རྣམས༎ ཞེས་སོགས་ཀྱིས་སྔགས་སྡོམ་འཛིན་པར་གསུངས་པ་དང་འགལ་བའི་ཕྱིར། དེ་ལྟར་ཡང་བྱི་དོར་ (མཁས་གྲུབ་རྗེའི་གསུང་འབུམ་དཔེ་བསྡུར་མ། པོད་ཁ་པ། རྗེ་ཡབ་སྲས་གསུམ་གྱི་གསུང་འབུམ་བསྡུ་སྒྲིག་ཁང་།༢༠༡༩ སྡོམ་གསུམ་རྣམ་གཞག་ཐུབ་བསྟན་རིན་པོ་ཆེའི་བྱི་དོར། ༤༩༩་༥) ལས།
སྤྱོད་འཇུག་ལས། ཇི་ལྟར་སྔོན་གྱི་བདེ་གཤེགས་ཀྱིས༎ ཞེས་སོགས་གསུངས་པ་འདི་སྨོན་འཇུག་གཉིས་ཀ་ཕྱོགས་གཅིག་ཏུ་ལེན་པའི་ཆོ་ག་ཡིན་ན། ཚུལ་ཁྲིམས་ཀྱི་ནི་བསླབ་པ་དང༌།། ཞེས་སོགས་ཀྱི་སྒོ་ནས་རིགས་ལྔའི་སྡོམ་གཟུང་གི་ཆོ་ག་གསུངས་པ་འདི་ཡང་སྔགས་དང་བྱང་སེམས་ཀྱི་སྡོམ་པ་གཉིས་ཀ་དུས་གཅིག་ཏུ་ལེན་པའི་ཆོ་ག་ཡིན་པར་འགྱུར་རོ༎ དེ་འདོད་ན། པཎ་གྲུབ་ཚད་ལྡན་གྱིས་མཛད་པའི་དཀྱིལ་ཆོག་དུ་མ་ཞིག་ལས། རིགས་ལྔའི་སྡོམ་གཟུང་དེ་ཉིད་ཀྱི་བར་མ་ཆད་ཀྱི་སྔ་རོལ་ཏུ། དཀོན་མཆོག་གསུམ་ལ་བདག་སྐྱབས་མཆི༎ ཞེས་སོགས་ཀྱིས་བྱང་སེམས་ཀྱི་སྡོམ་པ་གཟུང་བར་གསུངས་པ་ཐམས་ཅད་མི་འཐད་པར་འགྱུར་རོ༎
ཞེས་སོ༎
དེ་དག་ལ་པཎ་ཆེན་གསེར་མདོག་ཅན་པ་འགག་པ་མཛད་ཚུལ་ནི། འགོ་མཚུངས་ཀྱི་གནོད་བྱེད་དེ་མི་འཇུག་སྟེ། དཀྱིལ་ཆོག་ཚད་ལྡན་མང་པོར་སྔགས་སྡོམ་འཛིན་པའི་སྔོན་དུ་བྱང་སྡོམ་འཛིན་པར་བཤད་པའི་ཕྱིར། ཞེས་ཟེར་བ་ནི་ལྟག་ཆོད་འབའ་ཞིག་ཡིན་པའི་ཕྱིར་ཏེ། སྔགས་སྡོམ་གྱི་སྔོན་དུ་བྱང་སྡོམ་གཟུང་བ་རྒྱུད་རྡོ་རྗེ་རྩེ་མོར་མ་བྱུང་ཞིང་། དཀྱིལ་ཆོག་མཛད་པ་པོ་དག་གིས་ཚིག་གསར་དུ་བཅུག་པས། དཀྱིལ་ཆོག་དེ་རྣམས་ཁྱེད་ཀྱི་ཤེས་བྱེད་ཀྱི་ཁུངས་སུ་དྲངས་མི་རིགས་ཤིང་། ངེད་ཅག་ལ་ཡང་གནོད་བྱེད་དུ་མི་རུང་བའི་ཕྱིར། ཁྱེད་ལྟར་ན་ཡང་། ཚུལ་ཁྲིམས་ཀྱི་ནི་བསླབ་པ་དང་༎ ཞེས་སོགས་ཀྱི་ལུང་དེས་སེམས་བསྐྱེད་ཀྱི་སྡོམ་པ་འཛིན་པའི་ཆོ་ག་ཅིག་མ་བསྟན་པར་ཐལ། དཀྱིལ་ཆོག་ཚད་ལྡན་མང་པོར་དེའི་སྔོན་དུ་བྱང་སྡོམ་འཛིན་པའི་ཆོ་ག་བཤད་པའི་ཕྱིར། རྟགས་ཁས། དེ་ལྟར་ཡང་རོལ་མཚོ་ (གྲགས་ཆེན་་བཅོ་བརྒྱད་ལས། ཕར་ཕྱིན་སྐོར། པོད།༤༣ སྨོན་བཟང་དཔེ་རྙིང་འཚོལ་བསྡུ་ཁང་།༢༠༡༥ རྣམ་བཤད་ལུང་རིགས་རོལ་མཚོ། སྟོད་ཆ། པཎ་ཆེན་ཤཱཀྱ་མཆོག་ལྡན། ༢༢༨་༡) ལས།
ཡང་རིགས་ལྔའི་སྡོམ་བཟུང་གི་ཆོ་ག་འདི་སྔགས་དང་བྱང་སེམས་ཀྱི་སྡོམ་པ་ཅིག་ཅར་དུ་འཛིན་པའི་ཆོ་ག་ཡིན་པར་ཐལ་བ་ལ་བསལ་བ་གཉིས་པོ་གང་ཡང་མི་འཇུག་པ་ཁོ་ནར་མ་ཟད། ལུང་དང་རིགས་པ་དང་ཁས་བླངས་པ་ཐམས་ཅད་ཀྱིས་དེ་དེར་འགྲུབ་པ་ཡིན་ལ། ཁྱོད་ཀྱིས། དེ་ལ་བསལ་བ་སྟོན་པ་ན། དཀྱིལ་ཆོག་ཚད་ལྡན་མང་པོར། དེའི་སྔ་རོལ་དུ་དཀོན་མཆོག་གསུམ་ལ་བདག་སྐྱབས་མཆི།། ཞེས་སོགས་ཀྱིས་སེམས་བསྐྱེད་ཀྱི་སྡོམ་པ་འཛིན་པར་བཤད་པའི་ཕྱིར། ཞེས་ཟེར་བ་ནི་ལྟག་ཆོད་འབའ་ཞིག་ཡིན་ཏེ། སྤྱིར་ལུང་དེ་རྡོ་རྗེ་རྩེ་མོའི་རྒྱུད་(སྡེ་བཀའ། རྒྱུད། ཉ་པ། གསང་བ་རྣལ་འབྱོར་ཆེན་པོའི་རྒྱུད་རྡོ་རྗེ་རྩེ་མོ། ༡༨༤ ན ༢) ཚིག་ཡིན་པ་ལ། དཀྱིལ་ཆོག་མཁན་པོའི་སློབ་དཔོན་དག་གིས་དེའི་གོང་དུ་ཚིག་གཞན་བཅུག་པ། ཁྱེད་ཀྱི་ཤེས་བྱེད་དང་། ཅིག་ཤོས་ལ་གནོད་བྱེད་དུ་མི་རུང་བ་དང་། དེར་མ་ཟད་ཁྱེད་རང་གི་ལྟར་ན་ཡང་། ལུང་དེས་སེམས་བསྐྱེད་ཀྱི་སྡོམ་པ་འཛིན་པའི་ཆོ་ག་ཅིག་མ་བསྟན་པར་འགྱུར་ཏེ། དཀྱིལ་ཆོག་ཚད་ལྡན་མང་པོར། དེའི་སྔོན་དུ་སེམས་བསྐྱེད་ཀྱི་སྡོམ་པ་འཛིན་པའི་ཆོ་ག་བཤད་པའི་ཕྱིར་ཞེས་འཕངས་ན་བཟློག་པར་ནུས་པ་མ་ཡིན་ནོ༎
ཞེས་སོ༎
འདི་དག་ལ་ཁོ་བོས་དཔྱད་པ་ནི། ལྟ་བ་ཡངས་དོག་ལ་བརྟེན་ནས་སྤྱོད་པ་ཡངས་དོག་བྱུང་བ་ལ་དགག་པ་མཛད་པ་ནི། སྤྱོད་པ་ཡངས་དོག་ལྟ་བ་ཡངས་དོག་གི་དོན་དུ་བྱས་ནས་དགག་པ་མིན་གྱི། ལྟ་བ་ཡངས་དོག་རྒྱུ་མཚན་དུ་བཀོད་ནས་སྤྱོད་པ་ཡངས་དོག་ཡོད་པར་སྒྲུབ་པ་མི་འཐད་ཅེས་པ་ཡིན་ལ། ཁྱེད་ཀྱིས། དབུ་མ་པ་ལྟ་བ་ཡངས་པས་སྟོང་ཉིད་རྟོགས་པའི་ལྟ་བ་དང་ལྡན་ན་བྱང་ཆུབ་ཀྱི་སེམས་རང་གི་ངང་གིས་འབྱུང་བར་གསུངས་པ་ལ་བརྟག་པ་ནི། དེ་ཡང་ལྟ་བ་དེ་སྐྱེས་པ་ཙམ་གྱིས་བྱང་ཆུབ་ཀྱི་སེམས་སྐྱེ་ཞེ་འམ། དེ་རྒྱུད་ལ་ཡོད་ན་སེམས་སྐྱེ་སླ་བ་དོན་གང་ཡིན་གྲང་། དང་པོ་ལྟར་ན། དབུ་མ་པ་ལུགས་ལ་ཉན་རང་ལ་ཆོས་ཀྱི་བདག་མེད་རྟོགས་པ་ཡོད་པར་བཞེད་པས། ཉན་རང་ལའང་བྱང་ཆུབ་ཀྱི་སེམས་སྐྱེས་པ་ཡོད་པར་ཐལ་ལོ།། གཉིས་པ་ལྟར་ན། ལྟ་བ་ལ་བརྟེན་ནས་སེམས་བསྐྱེད་པ་སླ་བ་ཙམ་ཡོད་དུ་ཆུག་ཀྱང་། དེས་འཇུག་སྡོམ་ཐོབ་པ་ལ་སྨོན་སེམས་སྐྱེས་པ་སྔོན་དུ་འགྲོ་མི་དགོས་པ་འི་སྒྲུབ་བྱེད་དུ་ཅི་ཡང་མི་ཕན་པའི་ཕྱིར་ཏེ། སྐྱེ་སླ་བ་གང་ཡིན་སྔོན་དུ་འགྲོ་མི་དགོས་པར་འགྱུར་ན། མྱུ་གུ་སྐྱེས་པ་ལ་ས་བོན་སྔོན་དུ་འགྲོ་མི་དགོས་པར་ཐལ། ཆུ་ལུད་དྲོད་གཤེར་སོགས་འཛོམས་ན་སྐྱེ་སླ་བའི་ཕྱིར། ས་མྱུག་རྒྱུ་འབྲས་ཡིན་ལ། སྨོན་སེམས་དང་འཇུག་སྡོམ་རྒྱུ་འབྲས་མིན་པས་མི་འདྲའོ་ཞེ་ན། འོ་ན་སྨོན་འཇུག་གི་སེམས་གཉིས་རྒྱུ་འབྲས་མ་ཡིན་པར་ཐལ། དམ་བཅའ་དེའི་ཕྱིར། འདོད་མི་ནུས་ཏེ། སྤྱོད་འཇུག་ (སྡེ་བསྟན། དབུ་མ། ལ་པ། བྱང་ཆུབ་སེམས་དཔའི་སྤྱོད་པ་ལ་འཇུག་པ། རྒྱལ་སྲས་ཞི་བ་ལྷ། ༢ བ ༥) ལས།
འགྲོ་བར་འདོད་དང་འགྲོ་བ་ཡི།། བྱེ་བྲག་ཇི་ལྟར་ཤེས་པ་ལྟར།། དེ་བཞིན་མཁས་པས་འདི་གཉིས་ཀྱི།། བྱེ་བྲག་རིམ་བཞིན་ཤེས་པར་བྱ།།
ཞེས་འགྲོ་བར་འདོད་པ་དང་དངོས་སུ་འགྲོ་བའི་དཔེས་སྨོན་འཇུག་གཉིས་ཀྱི་ཁྱད་པར་གསུངས་ཤིང་། འཇིག་རྟེན་ན་རྟོག་པ་དང་དག་འབྲས་བུ་བཟང་པོ་ཞིག་ཐོབ་པར་འདོད་པ་སྔོན་དུ་བཏང་ནས། དེ་ལ་ཕན་པའི་་བྱ་བ་གང་ལ་འཇུག་པ་བཞིན་དུ། ཐེག་པ་ཆེན་པོ་ལ་མོས་པའི་སྐྱེ་བོ་དག་ཀྱང་རྣམ་མཁྱེན་གྱི་གོ་འཕང་ཐོབ་པར་འདོད་པ་སྐྱེས། དེ་ནས་དེ་ཐོབ་པའི་ཕྱིར་དུ་རྒྱལ་སྲས་ཀྱི་སྤྱོད་པ་ལ་སློབ་པར་དམ་བཅས་པ་་ཡིན་ལ། དེའི་སྔ་མ་ནི་སྨོན་སེམས་དང་། ཕྱི་མ་འཇུག་སེམས་སུ་བྱ་དགོས་ཏེ། སྒོམ་རིམ་ (སྡེ་བསྟན། དབུ་མ། ཀི་པ། བསྒོམ་པའི་རིམ་པ། སློབ་དཔོན་ཀ་མ་ལ་ཤཱི་ལ། ༢༥ ན ༣) ལས།
དེ་ལ་འགྲོ་བ་མཐའ ་དག་ལ་ཕན་པའི་ཕྱིར་སངས་རྒྱས་སུ ་གྱུར་ཅིག་ཅེས་གང་ཐོག་མར་དོན་དུ་གཉེར་བ་དེ་ནི་སྨོན་པའི་སེམས་སོ།། གང་ཕན་ཆད་སྡོམ་པ་བཟུང་སྟེ་ཚོགས་རྣམས་ལ་ཞུགས་པ་དེ་ནི་ཞུགས་པའི་སེམས་སོ།།
ཞེས་དང་། འགྲེལ་བཤད་ཚིག་གསལ་ (སྡེ་བསྟན། ཤེར་ཕྱིན། ཉ་པ། མངོན་རྟོགས་རྒྱན་གྱི་འགྲེལ་བཤད་ཚིག་རབ་ཏུ་གསལ་བ། སློབ་དཔོན་ཆོས་ཀྱི་བཤེས་གཉེན། ༣༨ བ ༥) ལས་ཀྱང་།
སྨོན་པ་ཞེས་པ་ནི་སྨོན་པ་ཙམ་ཏེ། ཚོགས་བསགས་པས་སེམས་བསྐྱེད་པའི་ཚོགས་བླང་བ་ཡང་མ་བྱས་པའོ།། འཇུག་པ་ཞེས་པ་ནི། དགེ་བའི་བཤེས ་གཉེན་མཉེས་པར་བྱས་ཏེ། ཡང་དག་པར་བླངས་པ་ལས་བྱུང་བའི་སེམས་བསྐྱེད་པ་ནས་བརྩམས་ཏེ། བར་ཆད་མེད་པའི་ལམ་གྱི་བར་དུ་གཏོགས་པའི་སྒྲུབ་པའི་སྤྱོད་པའོ།། དོན་འདི་ནི་སློབ་དཔོན་ཞི་བ་ལྷའི་ཞལ་སྔ་ནས་ཀྱང༌། བྱང་ཆུབ་སེམས་དེ་མདོར་བསྡུ་ན།། རྣམ་པ་གཉིས་སུ་ཤེས་བྱ་སྟེ།། བྱང་ཆུབ་སྨོན་པའི་སེམས་དང་ནི།། འཇུག་པ་བྱང་ཆུབ་ཉིད་ཡིན་ནོ།། འགྲོ་བར་འདོད་དང་འགྲོ་བ་ཡིན།། བྱེ་བྲག་ཇི་ལྟར་བསྟན་པ་ལྟར།། དེ་བཞིན་མཁས་པས་འདི་གཉིས་ཀྱི།། བྱེ་བྲག་རིམ་བཞིན་ཤེས་པར་བྱ།། ཞེས་བཤད་དོ།།
ཞེས་ལུང་གཉིས་ཀས་ཀྱང་། དང་པོར་སྨོན་སེམས་དང་། དེ་ནས་འཇུག་སྡོམ་བླངས་ཕྱིན་ཆད་འཇུག་སེམས་སུ་གསལ་བར་གསུངས་པའི་ཕྱོར།
ཡང་སྟོང་ཉིད་རྟོགས་པའི་ལྟ་བ་ཡོད་ན་བྱང་ཆུབ་ཀྱི་སེམས་ངང་གིས་འབྱུང་བའི་ཤེས་བྱེད་དུ། དབུ་མ་རྒྱན་གྱི་ཚིག་དྲངས་པ་ནི་དབུ་མ་རྒྱན་གྱི་རངའགྲེལ་དུ་འབྱུང་སྟེ། དེ་ཉིད་ (སྡེ་བསྟན། དབུ་མ། ས་པ། དབུ་མའི་རྒྱན་གྱི་འགྲེལ་པ། སློབ་དཔོན་ཞི་བ་འཚོ། ༨༣ ན ༤) ལས།
ཡང་དག་ཤེས་ཚོལ་སྔོན་བཏང་སྟེ །། དོན་དེ་རྣམ་པར་ངེས་བྱས་ནས།། ལྟ་ངན་འཐིབས་གནས་འཇིག་རྟེན་ལ།། སྙིང་རྗེ་ཀུན་ཏུ་བསྐྱེད་ནས་སུ།། འགྲོ་དོན་བྱེད་པ་པར་གྱུར་པ།། བྱང་ཆུབ་བློ་རྒྱས་མཁས་པ་ནི།། བློ་དང་སྙིང་རྗེས་བརྒྱན་པ་ཡི།། ཐུབ་པའི་བརྟུལ་ཞུགས་ཡང་དག་སྤྱོད།།
ཞེས་གསུངས། དེ་ཡང་དབུ་མའི་ལྟ་བ་ལ་བརྟེན་ནས་སྙིང་རྗེ་ཆེན་པོ་དང་བྱང་ཆུབ་ཀྱི་སེམས་སྐྱེ་སླ་བ་ལ་དགོངས་པ་ཡིན་ན་ནི་བདེན་མོད། དབུ་མ་པའི་ལུགས་ལ་བྱང་ཆུབ་སེམས་སྐྱེས་པ་ལ་ལྟ་བ་ངེས་པར་དུ་དགོས་པ་ནི་འདིས་སྒྲུབ་མི་ནུས་ཏེ། ལུང་དེའི་ (སྡེ་བསྟན། དབུ་མ། ས་པ། དབུ་མའི་རྒྱན་གྱི་འགྲེལ་པ། སློབ་དཔོན་ཞི་བ་འཚོ། ༨༣ ན ༥) འཕྲོར།
ཡང་དག་དད་པས་རྗེས་འབྲངས་པ།། རྫོགས་པའི་བྱང་ཆུབ་སེམས་བསྐྱེད་ནས།། ཐུབ་པའི་བརྟུལ་ཞུགས་བླང་བྱས་ཏེ།། དེ་ནི་ཡང་དག་ཤེས་ཚོལ་བརྩོན།།
ཞེས་དབང་རྟུལ་འགའ་ཞིག་སྔོན་དུ་སེམས་བསྐྱེད་ནས་ཕྱིས་ལྟ་བ་འཚོལ་བར་གསུངས་པའི་ཕྱིར་རོ།།
གཞན་ཡང་ལུང་དེ་སྟོང་ཉིད་རྟོགས་པའི་ལྟ་བ་དང་ལྡན་པ་ལ་སྨོན་འཇུག་གི་སྡོམ་པ་ཅིག་ཅར་དུ་བླང་བའི་ཤེས་བྱེད་དུ་འགྲོ་བར་དཀའ་སྟེ། དེ་ནི་ཐབས་ཤེས་རྒྱུད་ལ་བསྐྱེད་པའི་རིམ་པ་ཙམ་བསྟན་པ་ཡིན་གྱི། ལྟ་བ་དང་ལྡན་ན་སྨོན་འཇུག་ཅིག་ཅར་བླང་བའི་ཁུངས་སུ་མི་ཆེ་བའི་ཕྱིར། དང་པོ་གྲུབ་སྟེ། ཉིད་ཀྱིས་མཛད་པའི་དབུ་མ་རྣམ་ངེས་ (ཤཱཀ་མཆོག་གསུང་འབུམ། ཕ་པ། ཀྲུང་གོ་བོད་རིག་པ་དཔེ་སྐྲུན་ཁང་།༢༠༡༣ དབུ་མ་རྣམ་ངེས་ལུང་རིགས་རྒྱ་མཚོ། ལེའུ་གསུམ་པ། པཎ་ཆེན་ཤཱཀྱ་མཆོག་ལྡན། ༤༥༡་༡༠) ལས།
འོ་ན་ཇི་སྐད་དུ། དབུ་མའི་རྒྱན་ལས། ཡང་དག་ཤེས་ཚོལ་སྔོན་བཏང་སྟེ ། །དོན་དམ་རྣམ་པར་ངེས་གྱུར་ནས། །ལྟ་ངན་འཐིབས་གནས་འཇིག་རྟེན་ལ། །སྙིང་རྗེ་ཀུན་ཏུ་བསྐྱེད་ནས་སུ། །ཞེས་གང་ཟག་དབང་པོ་རྣོན་པོས་དོན་དམ་པའི་བདེན་པ་སྔར་རྟོགས་ནས་ཕྱིས་ཀུན་རྫོབ་ལ་འཇུག་པར་བཤད་པ་མ་ཡིན་ནམ་ཞེ་ན། དེ་ནི་ཐབས་དང་ཤེས་རབ་རྒྱུད་ལ་བསྐྱེད་པའི་རིམ་པའི་རྣམ་གྲངས་གཅིག་བསྟན་པ་ཡིན་གྱི། བདེན་པ་གཉིས་ལ་འཇུག་པའི་ཚུལ་མ་ཡིན་ཏེ། ཀུན་རྫོབ་རྟོགས་པ་སྔོན་དུ་མ་སོང་བའི་སྟོང་ཉིད་ནི་མུ་སྟེགས་ཀྱི་སྟོང་ཉིད་དང་ཁྱད་པར་མེད་པའི་ཕྱིར་དང་། དེ་སྔོན་དུ་མ་སོང་བའི་དེས་ནི་ཉན་ཐོས་ཀྱི་ཆད་པའི་མྱ་འདས་སུ་ཡང་བགྲོད་པར་མི་ནུས་པའི་ཕྱིར་རོ།།
ཞེས་གསུངས་པའི་ཕྱིར།
ཡང་པཎ་ཆེན་གསེར་མདོག་ཅན་པས་ལུགས་གཉིས་ཀྱི་ལྟ་བ་དང་སྨོན་འཇུག་གི་སེམས་གཉིས་ཐབས་ཤེས་ཟུང་དུ་འཇུག་མི་འཇུག་གསུངས་པ་ལ་དཔྱད་པ་ནི། ཐབས་ཤེས་ཟུང་འཇུག་གི་དོན་ཐབས་ཤེས་དབྱེར་མེད་དུ་སྦྱོར་བ་ལ་བྱས་པ་ནི་སྐབས་དོན་མ་ཡིན་པས་རེ་ཞིག་བཞག་ནས། དེས་ན་ཐབས་ཤེས་གཉིས་གཅིག་གྲོགས་སུ་གཅིག་འགྲོ་བ་ཉིད་ཡིན་པར་ངེས་སོ།། དེ་ལ་དབུ་མའི་ལྟ་བ་དང་སྨོན་འཇུག་གཉིས་ཀ་ཟུང་དུ་འཇུག་པར་བཞེད་པས་འགལ་བ་མ་མཆིས་མོད། འོན་ཏེ་སེམས་ཙམ་པའི་ལྟ་བ་དང་སྨོན་སེསེམས་ཟུང་དུ་འཇུག་ལ་འཇུག་སེམས་འཇུག་པར་གསུངས་པ་ནི་བརྟག་དགོས་ཏེ། ཟུང་དུ་འཇུག་རྒྱུའི་ཐབས་ཀྱི་ཆ་ནས་བཤད་ན། སེམས་ཙམ་ལུགས་ཀྱི་སྨོན་འཇུག་གཉིས་ཀ་མཚན་ཉིད་ཚང་བ་ཡིན་པས། དེའི་སྒོ་ནས་ཟུང་དུ་འཇུག་མི་ནུས་པ་མ་ཡིན་ལ། དེས་ན་དེའི་ལྟ་བ་དེ་མཐར་ཐུག་གི་ལྟ་བ་མ་ཡིན་པས་དེའི་ཆ་ནས་ཟུང་དུ་འཇུག་མི་ནུས་པར་ངེས་སོ།། དེའི་ཚེ་དེ་འདྲའི་ལྟ་བ་དེ་སྨོན་སེམས་དང་ཟུང་དུ་འཇུག་མི་ནུས་ལ། འཇུག་སེམས་ཟུང་དུ་འཇུག་ནུས་པའི་ཁྱད་པར་ཕྱེ་བ་རིགས་པ་མ་ཡིན་ཏེ། ནུས་ན་ནུས་མཉམ་དང་མི་ནུས་ན་མི་ནུས་མཉམ་ཡིན་དགོས་པའི་ཕྱིར།
དེའི་སྒྲུབ་བྱེད་དུ་བཀོད་པའི་དབུ་སེམས་སོ་སོའི་ལུགས་ཀྱི་ཤེར་ཕྱིན་གྱི་ནང་དུ་ཕར་ཕྱིན་དྲུག་ག་བསྡུས་མ་བསྡུས་ཀྱི་ཁྱད་པར་ཡོད་པ་བཀོད་པ་ལ་བརྟག་དགོས་ཏེ། སེམས་ཅམ་པ་རང་གི་ལུགས་ལ། ཤེར་ཕྱིན་གྱི་ནང་དུ་ཕར་ཕྱིན་དྲུག་ག་མ་བསྡུས་ཟེར་རམ། དབུ་མ་པ་ལྟར་ན། སེམས་ཙམ་པས་འདོད་པའི་ཤེར་ཕྱིན་གྱི་ནང་དུ་ཕར་ཕྱིན་དྲུག་ག་མ་བསྡུས་ཟེར། དང་པོ་མི་རིགས་ཏེ། མངོན་རྟོགས་རྒྱན་ལས། (སྡེ་བསྟན། ཤེར་ཕྱིན། ཀ་པ། བསྟན་བཅོས་མངོན་པར་རྟོགས་པའི་རྒྱན་ཞེས་བྱ་བའི་ཚིག་ལེའུར་བྱས་པ། རྗེ་བཙུན་བྱམས་པ་མགོན་པོ། ༣ བ ༤) ལས།
དེ་དག ་སོ་སོར་སྦྱིན་ལ་སོགས།། རྣམ་པ་དྲུག་ཏུ་བསྡུས་པ་ཡིས།། གོ་ཆའི་སྒྲུབ་པ་གང་ཡིན་དེ།། དྲུག་ཚན་དྲུག་གིས་ཇི་བཞིན་བཤད།།
ཅེས་དངམ། ཡང་དེའི་ (སྡེ་བསྟན། ཤེར་ཕྱིན། ཀ་པ། བསྟན་བཅོས་མངོན་པར་རྟོགས་པའི་རྒྱན་ཞེས་བྱ་བའི་ཚིག་ལེའུར་བྱས་པ། རྗེ་བཙུན་བྱམས་པ་མགོན་པོ། ༧ ན ༤) སྐབས་ལྔ་པར།
སྦྱིན་པ་ལ་སོགས་རེ་རེར་ནི།། དེ་དག་ཕན་ཚུན་བསྡུས་པ་གང༌།། སྐད་ཅིག་གཅིག་པའི་བཟོད་པ་ཡིས།། བསྡུས་པ་དེ་འདིར་མཐོང་བའི་ལམ།།
ཞེས་སྔ་ཕྱི་གཉིས་སུ་ཕར་ཕྱིན་རེ་རེའི་ནང་དུ་དྲུག་དྲུག་ཚང་བར་བསྡུས་ནས་ཉམས་སུ་བླང་བར་གསུངས་པ་དེ། སེམས་ཙམ་པས་རང་ལུགས་ལ་འཐད་ལྡན་དུ་ཁས་བཁངས་པའི་ཕྱིར། གཉིས་པ་ལྟར་ན་དཡང་པྱད་མི་བཟོད་དེ། དབུ་མ་པ་ལྟར་ན་སེམས་ཙམ་པས་འདོད་པའི་སྟོང་པ་ཉིད་ཀྱི་ལྟ་བ་དང་འཇུག་སེམས་ཟུང་དུ་འཇུག་པའང་མི་འོང་བར་ཐལ་བའི་ཕྱིར་ཏེ། ཤེར་ཕྱོན་གྱི་ནང་དུ་ཕར་ཕྱིན་དྲུག་ག་མ་བསྡུས་པ་འདིར་ཡང་མཚུངས་པའི་ཕྱིར། གལ་ཏེ་དབུ་མའི་ལྟ་བ་མ་རྙེད་པར་འཇུག་སེམས་ཐོབ་པ་མེད་པས་སྐྱོན་མེད་དོ་ཞེ་ན་ནི། འོ་ན་གང་ཟག་དེ་ལ་བློ་གཉིས་པོ་རིམ་ཅན་དུ་སྐྱེས་སམ། ཆིག་ཅར་དུ་སྐྱེས། དང་པོ་ལྟར་འདོད་མི་ནུས་ཏེ། སྟོང་པ་ཉིད་ཀྱི་ལྟ་བ་སྔོན་དུ་མ་སོང་བར་འཇུག་སེམས་སྐྱེས་པ་ཡོད་པར་ཁྱེད་ཀྱིས་ལན་མང་པོར་སྨྲས་པ་དང་འགལ་བའི་ཕྱིར། གཉིས་པ་ལྟར་ན་ནི། རྣམ་འགྲེལ་ལས་རྟོག་གཉིས་ཅིག་ཅར་མཐོང་བ་མེད་པར་གསུངས་པའི་རིགས་པ་རྣམས་ཀྱིས་གནོད་པའི་ཕྱིར། རྟགས་འདིའི་སྐོར་ཞིབ་པར་འོག་ཏུ་བརྟག་པར་འགྱུར་བས་འདིར་རྒྱས་པར་མ་སྤྲོས་སོ།།
གཞན་ཡང་ལན་དེས་སྐྱོན་སྔ་མ་སྤོང་མི་ནུས་ཏེ། དབུ་མའི་ལྟ་བ་རྙེད་པ་ན་འཇུག་སེམས་དེ་དབུ་མ་པའི་ལྟ་བ་དང་ཟུང་དུ་འཇུག་པར་འགྱུར་གྱི། སེམས་ཙམ་པའི་ལྟ་བ་དང་ཟུང་དུ་འཇུག་པར་མ་སོང་བའི་ཕྱིར། སོམས་ཤིག།
སངས་རྒྱས་བྱང་ཆུབ་སེམས་དཔའ་རྣམས།། ཞེས་སོགས་ཀྱིས་སྔགས་སྡོམ་བཟུང་བའི་སྔ་རོལ་དུ། གུར་ནས་གསུངས་པའི། དཀོན་མཆོག་གསུམ་ལ་བདག་སྐྱབས་མཆི།། ཞེས་སོགས་ཀྱིས་བྱང་སྡོམ་བཟུང་བར་དཀྱིལ་ཆོག་ཏུ་བྱུང་ཡང་། རྒྱུད་རྩེ་མོར་མ་གསུངས་པས་ཤེས་བྱེད་དྲངས་མི་རུང་གསུངས་པ་ནི་ཤིན་ཏུ་ཡང་བརྟག་དགོས་པ་ཞིག་སྟེ། རྒྱུད་ནས་གསལ་པོར་མ་གསུངས་པ་མན་ངག་གི་ཁ་བསྐང་དགོས་པ་དུ་མ་ཡོད་པའི་ཕྱིར། དེར་ཐལ། དཔེར་ན་སློབ་དཔོན་བསོད་ནམས་རྩེ་མོས་ཀྱེ་རྡོར་དཀྱིལ་ཆོག་ (ས་སྐྱ་བཀའ་འབུམ་དཔེ་བསྡུར་མ། དཔལ་བརྩེགས་བོད་ཡིག་དཔེ་རྙིང་ཞིབ་འཇུག་ཁང་།༢༠༠༧ སློབ་དཔོན་བསོད་ནམས་རྩེ་མོའི་གསུང་འབུམ། པོད་ཀ་པ། ཌོམྦི་ཧེ་རུ་ཀའི་ལུགས་ཀྱི་ཀྱེ་རྡོ་རྗེའི་དཀྱིལ་ཆོག སློབ་དཔོན་བསོད་ནམས་རྩེ་མོ། ༨༦་༥) ཏུ་རྒྱུད་དང་ཌོབྷི་པས་གཞུང་དུ་མ་གསལ་ཡང་མན་ངག་དང་སྦྱར་ནས་ཡན་ལག་བདུན་པ་སྔོན་དུ་འགྲོ་བས་སྐྱབས་སེམས་དང་བྱང་སྡོམ་གྱི་ཆོ་ག་རྒྱས་པར་མཛད་ནས་དེའི་རྗེས་སུ་སྔགས་སྡོམ་བཟུང་བ་དང་། ངོར་ཆེན་རྡོ་རྗེ་འཆང་གིས་གསང་འདུས་དཀྱིལ་ཆོག་(སྡེ་དགེ་པརམ། ཨེ་ཝཾ་བཀའ་འབུམ། པོད་ག་པ། ཆོས་ཚན་ག་པ། གསང་འདུས་དཀྱིལ་ཆོག་ཡེ་ཤེས་རྒྱ་མཚོ། ངོར་ཆེན་ཀུན་དགའ་བཟང་པོ། ༢༤༣ ན ༥) ཏུའང་བྱང་སྡོམ་དང་སྔགས་སྡོམ་གཉིས་ཚིགས་བཅད་སོ་སོ་ནས་རིམ་ཅན་དུ་འཛིན་པར་གསུངས་པ་པ་ལྟ་བུ་ཡིན་པའི་ཕྱིར།
དེ་ཉིད་གྲུབ་པ་ལ། དེ་ཡང་སློབ་དཔོན་བསོད་རྩེས་ཌོམྦི་ལུགས་ཀྱི་ཀྱེརྡོར་དཀྱིལ་ཆོག་མཛད་པ་ (ས་སྐྱ་བཀའ་འབུམ་དཔེ་བསྡུར་མ། དཔལ་བརྩེགས་བོད་ཡིག་དཔེ་རྙིང་ཞིབ་འཇུག་ཁང་།༢༠༠༧ སློབ་དཔོན་བསོད་ནམས་རྩེ་མོའི་གསུང་འབུམ། པོད་ཀ་པ། ཌོམྦི་ཧེ་རུ་ཀའི་ལུགས་ཀྱི་ཀྱེ་རྡོ་རྗེའི་དཀྱིལ་ཆོག སློབ་དཔོན་བསོད་ནམས་རྩེ་མོ། ༨༦་༥) ལས།
བཞི་པ་ (རྒྱུན་བཤགས་བྱ་བ།) ནི། སློབ་མས་སློབ་དཔོན་གྱི་རྗེས་སུ། དཀོན་མཆོག་གསུམ་ལ་སྐྱབས་སུ་མཆི།། སྡིག་པ་མི་དགེ་སོ་སོར་བཤགས།། འགྲོ་བའི་དགེ་ལ་རྗེས་ཡི་རང་།། སངས་རྒྱས་བྱང་ཆུབ་ཡིད་ཀྱིས་གཟུང་།། ཞེས་ལན་གསུམ་གྱི་བར་དུ་བརྗོད་པའམ།
ཞེས་གུར་ནས་འབྱུང་བའི་ཚིགས་བཅད་ཀྱི་སྒོ་ནས་སེམས་བསྐྱེད་པ་མདོར་བསྡུས་པ་དང་། རྒྱས་པར་བྱ་བ་ནི། དེའི་འཕྲོར། (ས་སྐྱ་བཀའ་འབུམ་དཔེ་བསྡུར་མ། དཔལ་བརྩེགས་བོད་ཡིག་དཔེ་རྙིང་ཞིབ་འཇུག་ཁང་།༢༠༠༧ སློབ་དཔོན་བསོད་ནམས་རྩེ་མོའི་གསུང་འབུམ། པོད་ཀ་པ། ཌོམྦི་ཧེ་རུ་ཀའི་ལུགས་ཀྱི་ཀྱེ་རྡོ་རྗེའི་དཀྱིལ་ཆོག སློབ་དཔོན་བསོད་ནམས་རྩེ་མོ། ༨༦་༨)
ཡང་ན། བཤགས་པ་ལ་སོགས་པ་རྒྱས་པར་བྱ་སྟེ། བདག་གིས་ཐོག་མ་མེད་དུས་ནས།། ལོག་རྟོག་དབང་ གིས་ སྡིག་བགྱིས་གང་།།
ཞེས་པ་ནས། (ས་སྐྱ་བཀའ་འབུམ་དཔེ་བསྡུར་མ། དཔལ་བརྩེགས་བོད་ཡིག་དཔེ་རྙིང་ཞིབ་འཇུག་ཁང་།༢༠༠༧ སློབ་དཔོན་བསོད་ནམས་རྩེ་མོའི་གསུང་འབུམ། པོད་ཀ་པ། ཌོམྦི་ཧེ་རུ་ཀའི་ལུགས་ཀྱི་ཀྱེ་རྡོ་རྗེའི་དཀྱིལ་ཆོག སློབ་དཔོན་བསོད་ནམས་རྩེ་མོ། ༨༦་༡༨)
དེས་ནི་འཇིག་རྟེན་ཀུན་མཁྱེན་ཤོག། ཅེས་བྱ་བའི་ཚིགས་སུ་བཅད་པས་སམ། ཚིག་ལྷུག་པས་ཀྱང་རུང་སྟེ། དེ་ལྟར་ཡན་ལག་ལྔ་པོ་བྱེད་པས་ཏེ། ཕྱག་དང་མཆོད་པ་ནི་སྔོན་དུ་སོང་བའི་ཕྱིར་རོ།།
ཞེས་ཤོ་ལོ་ཀ་ལྔས་བཤགས་པ་ལ་སོགས་པ་མཛད་ནས། ཕྱག་མཆོད་སོང་ཟིན་པས་་བཅད་ལྷུག་ཅི་རིགས་པས་ཡན་ལག་ལྷག་མ་ལྔ་བྱ་བར་གསུངས་ཞིང་། དེའི་འཕྲོར། (ས་སྐྱ་བཀའ་འབུམ་དཔེ་བསྡུར་མ། དཔལ་བརྩེགས་བོད་ཡིག་དཔེ་རྙིང་ཞིབ་འཇུག་ཁང་།༢༠༠༧ སློབ་དཔོན་བསོད་ནམས་རྩེ་མོའི་གསུང་འབུམ། པོད་ཀ་པ། ཌོམྦི་ཧེ་རུ་ཀའི་ལུགས་ཀྱི་ཀྱེ་རྡོ་རྗེའི་དཀྱིལ་ཆོག སློབ་དཔོན་བསོད་ནམས་རྩེ་མོ། ༨༦་༢༠)
དེ་ལྟར་ན་ཡན་ལག་བདུན་ཡོངས་སུ་རྫོགས་པ་ལ་སྐྱབས་སུ་འགྲོ་བ་སྐྱེ་བས་ན། གང་དང་གང་གིས་འདུལ་གྱུར་པ།། དེ་དང་དེ་ཡི་སྐུར་སྟོན་པ།།
ཞེས་པ་ནས། (ས་སྐྱ་བཀའ་འབུམ་དཔེ་བསྡུར་མ། དཔལ་བརྩེགས་བོད་ཡིག་དཔེ་རྙིང་ཞིབ་འཇུག་ཁང་།༢༠༠༧ སློབ་དཔོན་བསོད་ནམས་རྩེ་མོའི་གསུང་འབུམ། པོད་ཀ་པ། ཌོམྦི་ཧེ་རུ་ཀའི་ལུགས་ཀྱི་ཀྱེ་རྡོ་རྗེའི་དཀྱིལ་ཆོག སློབ་དཔོན་བསོད་ནམས་རྩེ་མོ། ༨༧་༦)
སྲས་མཆོག་འཁོར་འདུས་ཚོགས་མཆོག་ལ།། རྟག་ཏུ་བདག་ནི་སྐྱབས་སུ་མཆི།། ཞེས་བྱ་བས་ལན་གསུམ་གྱི་བར་དུ་སྐྱབས་སུ་འགྲོ་བར་བྱའོ།།
ཞེས་པའི་བར་ཡན་ལག་བདུན་པ་སྔོན་དུ་འགྲོ་བས་མཆོག་གསུམ་རེ་རེ་ལ་ཚིགས་བཅད་རེའི་སྒོ་ནས་སྐྱབས་འགྲོ་ལན་གསུམ་བྱ་བར་གསུངས་ལ། དེའི་འཕྲོར། (ས་སྐྱ་བཀའ་འབུམ་དཔེ་བསྡུར་མ། དཔལ་བརྩེགས་བོད་ཡིག་དཔེ་རྙིང་ཞིབ་འཇུག་ཁང་།༢༠༠༧ སློབ་དཔོན་བསོད་ནམས་རྩེ་མོའི་གསུང་འབུམ། པོད་ཀ་པ། ཌོམྦི་ཧེ་རུ་ཀའི་ལུགས་ཀྱི་ཀྱེ་རྡོ་རྗེའི་དཀྱིལ་ཆོག སློབ་དཔོན་བསོད་ནམས་རྩེ་མོ། ༨༧་༨)
ཡང་དག་ཡེ་ཤེས་མེ་བོ་ཆེ།། གཏི་མུག་མུན་པ་བསལ་བ་དང༌།། སྒྲིབ་པ་མ་ལུས་སྤང་བའི་ཕྱིར།། བྱང་ཆུབ་མཆོག་ཏུ་སེམས་བསྐྱེད་དོ།། རྒྱལ་སྲས་དཔའ་བོ་རྣམས་ཀྱི་ལམ།། སྤྱོད་པ་དཔག་ཡས་གང་ཡིན་དང་།། མ་བཅོས་ཇི་བཞིན་ལམ་གནས་ལ།། ད་ནི་ཡང་དག་གནས་པར་བགྱི།། ཞེས་བྱ་བས། དེ་ལྟར་སྡིག་པ་བཤགས་པ་ལ་སོགས་པ་སྔོན་དུ་སོང་བས་ཐུན་མོང་གི་སྐྱབས་སུ་འགྲོ་བ་དང་སེམས་བསྐྱེད་པའི་ཆོ་ག་རྒྱས་པར་བྱ་བ་ནི། སློབ་མའི་རྒྱུད་ཡོངས་སུ་དག་པར་བྱ་བའི་ཕྱིར་ཡིན་པས། མན་ངག་གིས་སྦྱར་ཏེ་ཆོ་ག་ཤིན་ཏུ་རྒྱས་པར་གྱུར་ཀྱང་ཉེས་པ་མེད་དོ།།
ཞེས་གསུངས་སོ།། དེ་ཡང་། ཡང་དག་ཡེ་ཤེས་མེ་བོ་ཆེ།། ཞེས་སོགས་ཤོ་ལོ་ཀ་གཅིག་གིས་བྱང་ཆུབ་མཆོག་ཏུ་སེམས་བསྐྱེད་པ་དང་། རྒྱལ་སྲས་དཔའ་བོ་རྣམས་ཀྱི་ལམ།། ཞེས་སོགས་ཤོ་ལོ་ཀ་གཅིག་གིས་སྤྱོད་པ་ལ་སློབ་པར་དམ་བཅས་པའི་སྒོ་ནས་བྱང་སྡོམ་བཟུང་བར་བསྟན་པ་ཤིན་ཏུ་གསལ་ལོ།། དེ་ལྟར་སྡིག་པ་བཤགས་པ་ལ་སོགས་པ་སྔོན་དུ་སོང་བས། ཞེས་སོགས་ཀྱིས། སྟ་གོན་གྱི་སྐབས་འདིར་རྒྱུད་དང་ཌོམྦི་པའི་གཞུང་དུ་མ་བྱུང་ཡང་། སྔགས་ལ་འཇུག་པ་ལ་ལམ་ཐུན་མོང་བ་སྐྱབས་སེམས་དང་བྱང་སྡོམ་གྱིས་སློབ་མའི་རྒྱུད་དག་པ་གལ་ཆེ་བས་མན་ངག་གི་ཁ་བསྐངས་པ་ལ་ཉེས་པར་མེད་པར་གསུངས་སོ།། དེའི་འཕྲོར། (ས་སྐྱ་བཀའ་འབུམ་དཔེ་བསྡུར་མ། དཔལ་བརྩེགས་བོད་ཡིག་དཔེ་རྙིང་ཞིབ་འཇུག་ཁང་།༢༠༠༧ སློབ་དཔོན་བསོད་ནམས་རྩེ་མོའི་གསུང་འབུམ། པོད་ཀ་པ། ཌོམྦི་ཧེ་རུ་ཀའི་ལུགས་ཀྱི་ཀྱེ་རྡོ་རྗེའི་དཀྱིལ་ཆོག སློབ་དཔོན་བསོད་ནམས་རྩེ་མོ། ༨༦་༡༥)
དེའི་རྗེས་སུ་ཐུན་མོང་མ་ཡིན་པའི་སྐྱབས་སུ་འགྲོ་བ་དང་སེམས་བསྐྱེད་པའི་བདག་གི་སྒྲིབ་པ་མེད་པའི་ཡེ་ཤེས་ཀྱི་སྡོམ་པ་གཟུང་བ་ནི། གཞུང་ལས་སྡོམ་པ་བཟུང་བ་ཙམ་ལས་མེད་ཀྱང་། སྡོམ་པ་བསྒྲག་པ་སྔོན་དུ་སོང་ན་ངེས་པའི་ཤེས་པ་སྐྱེ་བའི་ཕྱིར། བསྒྲགས་པའི་ཆོ་ག་རྒྱས་པར་བྱའོ།། དེ་ནི། སངས་རྒྱས་ཆོས་དང་དགེ་འདུན་ཏེ།། དཀོན་མཆོག་གསུམ་ལ་སྐྱབས་ སུ་སོང་།།
ཞེས་པ་ནས། (ས་སྐྱ་བཀའ་འབུམ་དཔེ་བསྡུར་མ། དཔལ་བརྩེགས་བོད་ཡིག་དཔེ་རྙིང་ཞིབ་འཇུག་ཁང་།༢༠༠༧ སློབ་དཔོན་བསོད་ནམས་རྩེ་མོའི་གསུང་འབུམ། པོད་ཀ་པ། ཌོམྦི་ཧེ་རུ་ཀའི་ལུགས་ཀྱི་ཀྱེ་རྡོ་རྗེའི་དཀྱིལ་ཆོག སློབ་དཔོན་བསོད་ནམས་རྩེ་མོ། ༨༩་༤)
རྗེས་མཐུན་སྡོམ་པ་རྒྱ་ཆེར་ནི།། གསང་བའི་རྒྱུད་ལས་རབ་ཏུ་བཤད། །ཅེས་ལན་གཅིག་བསྒྲགས་ལ་དོན་བཤད་པར་བྱའོ།།
ཞེས་པའི་བསྲུང་རྒྱུའི་དམ་སྡོམ་རྣམས་བསྒྲག་པར་གསུངས་པའི་མཐར། (ས་སྐྱ་བཀའ་འབུམ་དཔེ་བསྡུར་མ། དཔལ་བརྩེགས་བོད་ཡིག་དཔེ་རྙིང་ཞིབ་འཇུག་ཁང་།༢༠༠༧ སློབ་དཔོན་བསོད་ནམས་རྩེ་མོའི་གསུང་འབུམ། པོད་ཀ་པ། ཌོམྦི་ཧེ་རུ་ཀའི་ལུགས་ཀྱི་ཀྱེ་རྡོ་རྗེའི་དཀྱིལ་ཆོག སློབ་དཔོན་བསོད་ནམས་རྩེ་མོ། ༨༩་༥)
དེ་ནས་སློབ་མས་འདི་སྐད་ཅེས་བརྗོད་པར་བྱའོ།། གཙོ་བོས་ཇི་ལྟར་བཀའ་སྩལ་པ།། དེ་བཞིན་དུ་ནི་བགྱིད་པར་འཚལ།། ཇི་ལྟར་དུས་གསུམ་མགོན་པོ་རྣམས།། བྱང་ཆུབ་ཏུ་ནི་ངེས་མཛད་པའི།། བྱང་ཆུབ་སེམས་ནི་བླ་ན་མེད།། དམ་པ་བདག་གིས་བསྐྱེད་པར་བགྱི།། ཚུལ་ཁྲིམས་ཀྱི་ནི་བསླབ་པ་དང་།། དགེ་བའི་ཆོས་ནི་སྡུད་པ་དང་།། སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་བརྟན་པོར་གཟུང་བར་བགྱི།།
ཞེས་པ་ནས། (ས་སྐྱ་བཀའ་འབུམ་དཔེ་བསྡུར་མ། དཔལ་བརྩེགས་བོད་ཡིག་དཔེ་རྙིང་ཞིབ་འཇུག་ཁང་།༢༠༠༧ སློབ་དཔོན་བསོད་ནམས་རྩེ་མོའི་གསུང་འབུམ། པོད་ཀ་པ། ཌོམྦི་ཧེ་རུ་ཀའི་ལུགས་ཀྱི་ཀྱེ་རྡོ་རྗེའི་དཀྱིལ་ཆོག སློབ་དཔོན་བསོད་ནམས་རྩེ་མོ། ༩པ་༣)
སེམས་ཅན་མྱ་ངན་འདས་ལ་དགོད།། ཅེས་བྱ་བ་ལན་གསུམ་གྱི་བར་དུ་བརྗོད་པས་སྡོམ་པ་བཟུང་བའོ།།
ཞེས་པའི་བར་གྱིས་རྒྱུད་ནས་གསུངས་པའི་ཚིགས་བཅད་འདི་དག་གིས་སྔགས་སྡོམ་བཟུང་བར་གསུངས་སོ།། གོང་དུ་མན་ངག་གིས་ཁ་བསྐངས་པར་གསུངས་པའི། བདག་གིས་ཐོག་མ་མེད་དུས་ནས།། ཞེས་པ་ནས། ད་ནི་ཡང་དག་གནས་པར་བགྱི།། ཞེས་པའི་བར་གྱི་ཚིགས་བཅད་དེ་དག་ཀྱང་སློབ་དཔོན་པྲཛྙཱ་ཨིནྡྲའི་ཀྱེ་རྡོ་རྗེའི་སྒྲུབ་ཐབས་རིན་ཆེན་འབར་བ་ (སྡེ་བསྟན། རྒྱུད། ཉ་པ། དཔལ་ཀྱེའི་རྡོ་རྗེའི་བྱ་བའི་རིམ་པའི་ལམ་ལས་རིན་ཆེན་འབར་བ་ཞེས་བྱ་བའི་སྒྲུབ་ཐབས། སློབ་དཔོན་མཁས་པ་ཆེན་པོ་པྲཛྙཱ་ཨིནྟྲ་རུ་ཙི། ༢༡༨ ན ༢) ལས་བྱུང་བས་དེ་ཉིད་ལས་བླངས་པའོ།། དེ་ལྟར་ན་སློབ་དཔོན་བསོད་རྩེས་ནི་སྔགས་སྡོམ་བཟུང་བའི་སྔོན་དུ་སྐྱབས་འགྲོ་དང་སེམས་བསྐྱེད་དང་བྱང་སྡོམ་རྣམས་མན་ངག་ནས་བླངས་པའི་ཚིགས་བཅད་གཞན་གྱིས་བྱ་བར་གསུངས་པའི་ཕྱིར།
དེར་མ་ཟད་ཉིད་ཀྱི་བླ་མ་རྡོ་རྗེ་འཆང་ངོར་ཆེན་ཀུན་བཟང་བས་ཀྱང་གསང་འདུས་དཀྱིལ་ཆོག་ (སྡེ་དགེ་པརམ། ཨེ་ཝཾ་བཀའ་འབུམ། པོད་ག་པ། ཆོས་ཚན་ག་པ། གསང་འདུས་དཀྱིལ་ཆོག་ཡེ་ཤེས་རྒྱ་མཚོ། ངོར་ཆེན་ཀུན་དགའ་བཟང་པོ། ༢༤༣ ན ༥) ལས།
དཀོན་མཆོག་གསུམ་ལ་བདག་སྐྱབས་མཆི།། སྡིག་པ་ཐམས་ཅད་སོ་སོར་བཤགས།། འགྲོ་བའི་དགེ་ལ་རྗེས་ཡི་རང་།། སངས་རྒྱས་བྱང་ཆུབ་ཡིད་ཀྱིས་གཟུང་།། ཞེས་ལན་གསུམ་གྱིས་ཐུན་མོང་གི་སྡོམ་པ་དང་། སངས་རྒྱས་བྱང་ཆུབ་སེམས་དཔའ་ཀུན།། བདག་ལ་དགོངས་པར་མཛད་དུ་གསོལ།། བདག་མིང་འདི་ཞེས་བགྱི་བ་ནི།། དུས་འདི་ནས་ནི་བཟུང་ནས་ནི།། བྱང་ཆུབ་སྙིང་པོར་མཆིས་ཀྱི་བར།། ཇི་ལྟར་དུས་གསུམ་མགོན་པོ་རྣམས།། བྱང་ཆུབ་ཏུ་ནི་ངེས་མཛད་པ། །བྱང་ཆུབ་སེམས་ནི་བླ་ན་མེད།། དམ་པ་བདག་གིས་བསྐྱེད་པར་བགྱི།། ཚུལ་ཁྲིམས་ཀྱི་ནི་བསླབ་པ་དང་།། དགེ་བའི་ཆོས་ནི་སྡུད་པ་དང་།། སེམས་ཅན་དོན་བྱེད་ཚུལ་ཁྲིམས་གསུམ།། སོ་སོར་བརྟན་པར་བདག་གིས་གཟུང་།།
ཞེས་པ་ནས།(སྡེ་དགེ་པརམ། ཨེ་ཝཾ་བཀའ་འབུམ། པོད་ག་པ། ཆོས་ཚན་ག་པ། གསང་འདུས་དཀྱིལ་ཆོག་ཡེ་ཤེས་རྒྱ་མཚོ། ངོར་ཆེན་ཀུན་དགའ་བཟང་པོ། ༢༤༤ ན ༡)
སེམས་ཅན་མྱ་ངན་འདས་ལ་འགོད།། ཅེས་པ་ལན་གསུམ་གྱིས་མཐུན་མོང་མ་ཡིན་པའི་སྡོམ་པ་རྣམས་འཛིན་དུ་བཅུག་གོ།
ཞེས་གུར་ནས་གསུངས་པའི་ཚིགས་བཅད་ཀྱིས་བྱང་སྡོམ་དང་། རྩེ་མོ་སོགས་ནས་གསུངས་པའི་ཚིགས་བཅད་རྣམས་ཀྱིས་སྔགས་སྡོམ་བཟུང་བ་གསལ་བར་གསུངས་པའི་ཕྱིར།
དེ་ལྟར་ན་གྲུབ་ཆེན་གྱི་མན་ངག་ཤེས་བྱེད་དུ་དྲངས་རིགས་པར་མ་ཟད། ལག་ལེན་ཀྱི་སྐབས་སུ་གལ་ཆེ་བའང་ཡིན་པར་གྲུབ་སྟེ། བྱི་དོར་ལས་ཤེས་བྱེད་དྲངས་པ་མི་འཐད་ན། གོང་གི་དཀྱིལ་ཆོག་གཉིས་ཀྱང་མི་འཐད་པར་འགྱུར་ལ། འདི་གཉིས་འཐད་ན་ནི་བྱི་དོར་གྱི་དེ་ཡང་ངེས་པར་འཐད་དེ། བྱི་དོར་ནི་རྣམ་གཞག་གཏན་ལ་འབེབས་པ་ཡིན་ལ། དཀྱིལ་ཆོག་འདི་དག་ནི་གཏན་ལ་ཕབ་པའི་གྲུབ་དོན་ལག་ལེན་ལ་སྦྱར་བ་ཡིན་པའི་ཕྱིར་རོ།།
སྔགས་སྡོམ་གྱི་སྔོན་དུ་བྱང་སྡོམ་བཟུང་བའི་ཆོ་ག་ནི་ཨ་བྷྱ་ཀ་རར་མ་ཟད་སློབ་དཔོན་གཞན་མང་པོས་ཀྱང་མཛད་པ་ཡིན་ཏེ། རྗེའི་སྔགས་རིམ་ཆེན་མོ་ (རྗེ་ཙོང་ཁ་པ་ཆེན་པོའ་ིགསུང་འབུམ་དཔེ་བསྡུར་མ། པོད་ཕ་པ། རྗེ་ཡབ་སྲས་གསུམ་གྱི་གསུང་འབུམ་བསྡུ་སྒྲིག་ཁང་།༢༠༡༩ རྡོ་རྗེ་འཆང་ཆེན་པོའི་ལམ་གྱི་རིམ་པ་གསང་བ་ཀུན་གྱི་གནད་རྣམ་པར་ཕྱེ་བ། ༢༩༥་༥) ལས།
འདིར་ལྭ་བ་པ་དང་། ཤཱནྟི་པ་དང་། ཨ་བྷྱ་དང་། རཏྣ་རཀྵི་ཏ་དང་། རྟག་པའི་རྡོ་རྗེ་དང་། བི་བྷཱུ་ཏཱིས་ཐུན་མོང་གི་སྡོམ་པ་དང་སློབ་དཔོན་གྱི་སྡོམ་པ་འཛིན་པ་གཉིས་མཛད་ལ། དེ་གཉིས་ཀྱི་ངོ་བོ་ནི། ཤཱནྟི་པས། དེ་ལ་སྡོམ་པ་གང་སློབ་དཔོན་དུ་མི་བྱེད་ཀྱང་སྦྱིན་པ་དེ་ནི་སྤྱིའི་ཡིན་ཏེ། སྐྱབས་སུ་འགྲོ་བ་དང་བྱང་ཆུབ་ཏུ་སེམས་བསྐྱེད་པ་ཙམ་གྱི་མཚན་ཉིད་དེ། སྔར་བཤད་པ་ཡིན་ནོ།། དེ་ལ་སློབ་དཔོན་དུ་བྱེད་པར་བྱིན་པ་གང་ཡིན་པ་དེ་ནི་སློབ་དཔོན་གྱི་སྡོམ་པ་སྟེ། རིགས་ལྔས་བསྡུས་པའོ།། ཞེས་སྐྱབས་འགྲོ་སྔོན་དུ་འགྲོ་བ་ཅན་གྱི་སེམས་བསྐྱེད་པ་ཐུན་མོང་གི་སྡོམ་པ་དང༌། རིགས་ལྔའི་དབང་དུ་བྱས་པའི་སྡོམ་པ་སློབ་དཔོན་གྱི་སྡོམ་པའམ་ཐུན་མོང་མ་ཡིན་པའི་སྡོམ་པར་གསུངས་ཏེ། ཕྲེང་བ་དང་སྡོམ་འབྱུང་གི་འགྲེལ་པར་ཡང་དེ་བཞིན་དུ་གསུངས་སོ།།
ཞེས་གསུངས་པ་ལྟར་ན་རྒྱ་གར་པཎ་གྲུབ་དྲུག་གིས་དེ་ལྟར་མཛད་པར་གསལ་ཡང་དུས་ཀྱིས་གཏུགས་པས་མཁས་གྲུབ་དེ་དག་གི་གཞུང་དངོས་ལ་བཏུགས་ནས་ཤེས་བྱེད་དང་བཅས་བྲི་བར་མ་ཁོམ་སྟེ་རྗེས་སུ་བརྟག་པར་བྱའོ།། དེ་ལྟར་ན་ཞིབ་ཏུ་བསམ་དགོས་པར་འདུག་གོ།
ཡང་། ཁྱེད་རང་གི་ལྟར་ན་ཡང་། ཞེས་སོགས་ཀྱི་ཐལ་བ་དེ་ནི་ཁས་ལེན་མེད་པ་ལ་ཐལ་བ་འཕངས་པར་སྣང་སྟེ། ཁྱེད་ཅག་གིས། ཇི་ལྟར་སྔོན་གྱི་བདེ་གཤེགས་ཀྱིས།། ཞེས་སོགས་ཤོ་ལོ་ཀ་གཉིས་ཀྱིས་སྨོན་སེམས་ཀྱི་སྡོམ་པ་དང་འཇུག་སེམས་ཀྱི་སྡོམ་པ་གཉིས་ཅིག་ཅར་བཟུང་བར་ཁས་བླངས་པ་ལ། དེ་ལྟར་ན་རིགས་ལྔའི་སྡོམ་གཟུང་གི་ཚིག་དེ་དག་ཀྱང་བྱང་སྡོམ་དང་སྔགས་སྡོམ་ཅིག་ཅར་བཟུང་བའི་ཆོ་གར་ཐལ་བ་འཕངས་པ་ཡིན་གྱི། ངེད་རང་ལུགས་ལ་ རིགས་ལྔའི་སྡོམ་གཟུང་གི་ཚིག་དེ་དག་སྔགས་བྱང་སྡོམ་ཅིག་ཅར་བཟུང་བའི་ཆོ་ག་འདོད་པ་གཏན་མ་ཡིན་ཏེ། གོང་གི་གནོད་བྱེད་བརྗོད་པ་ལས་ནི་དེ་ལྟར་འདོད་པ་དངོས་ཤུགས་གང་གིས་མ་བསྟན་ཅིང་། རྗེ་ཡབ་སྲས་ཀྱི་གསུང་གཞན་དུ་ཡང་དེ་ལྟར་བསྟན་པ་མི་སྣང་བའི་ཕྱིར། དེ་ལས་བཟློག་སྟེ། རྗེའི་རྩ་ལྟུང་རྣམ་བཤད་དུ། སྔགས་སྡོམ་བླང་བའི་འཇུག་སེམས་བསྐྱེད་པ་ནི་དེའི་སྔོན་འགྲོ་ཙམ་ལས། སྡོམ་པ་བླངས་པ་མིན་པའི་དཔེར་སྤྱོད་འཇུག་ཏུ་བྱང་སེམས་བཟུང་བའི་སྐབས་སུ་སྨོན་སེམས་བསྐྱེད་པ་བཞིན་ཡིན་པར་གསུངས་ཏེ། དེ་ཉིད་ (རྗེ་ཙོང་ཁ་པ་ཆེན་པོའ་ིགསུང་འབུམ་དཔེ་བསྡུར་མ། པོད་ཕ་པ། རྗེ་ཡབ་སྲས་གསུམ་གྱི་གསུང་འབུམ་བསྡུ་སྒྲིག་ཁང་།༢༠༡༩ གསང་སྔགས་ཀྱི་ཚུལ་ཁྲིམས་ཀྱི་རྣམ་བཤད་དངོས་གྲུབ་ཀྱི་སྙེ་མ། ༢༧༣་༣) ལས།
སྐབས་འདིའི་འཇུག་སེམས་ལེན་པ་ནི། བྱང་ཆུབ་སེམས་དཔའི་སྡོམ་པ་ལེན་པ་མ་ཡིན་གྱི། སྔགས་ཀྱི་སྡོམ་པ་ལེན་པའི་ཡན་ལག་ཙམ་སྟེ། དཔེར་ན་སྤྱོད་འཇུག་ཏུ་འཇུག་སྡོམ་ལེན་པའི་ཆོ་གར་སྨོན་སེམས་གསུངས་པ་བཞིན་ནོ།།
ཞེས་གསུངས་པའི་ཕྱིར།
རྣམ་པ་གཅིག་ཏུ་ན་ལྟག་ཆོད་དུ་ཐལ་བ་འཕངས་པ་ལ་རང་གི་བསམ་ཚོད་ཀྱི་ལན་ནི། གནོད་བྱེད་དེ་མི་འཇུག་སྟེ། སྔགས་སྡོམ་གྱི་སྔོན་དུ་བླངས་པའི་བྱང་སེམས་ཀྱི་སྡོམ་པས་ནི་མདོ་སྔགས་ཐུན་མོང་བའི་ཕྱིན་དྲུག་ལ་སློབ་པར་དམ་བཅས་པ་ཙམ་ཡིན་ལ། ཇི་ལྟར་དུས་གསུམ་མགོན་པོ་རྣམས།། ཞེས་སོགས་ཀྱི་སྐབས་སུ་འཇུག་སེམས་བསྐྱེད་པ་ནི་ཐབས་ཤེས་དབྱེར་མ་མཆིས་པའི་སྒོ་ནས་ཕྱོན་དྲུག་ལ་སློབ་པར་དམ་བཅས་པ་ཡིན་པས། སྔ་མས་ཕྱི་མ་ལ་མི་དོ་ཞིང་། ཕྱི་མ་ལ་སྔ་མ་སྔོན་དུ་འགྲོ་དགོས་པའི་ཕྱིར། སྙམ་སྟེ་ད་དུང་དཔྱོད་དགོས་པ་ཡོད་དོ།། ༎ (མུ་འགོད།) ཤུབྷཾ།
