ཆོ་འཕྲུལ་བསྟོད་པ། ཐམས་ཅད་མཁྱེན་པ་དགེ་འདུན་གྲུབ་པས་མཛད།
ཚེས་གཅིག་གསལ་རྒྱལ་གྱིས་ནི་མཆོད་པའི་ཚེ།།
ཚེམས་ཤིང་ས་ལ་བཙུགས་པས་ལྗོན་ཤིང་སྐྱེས།།
དཔག་ཚད་ལྔ་བརྒྱར་ཁྱབ་པའི་ལོ་འབྲས་སྨིན།།
དྲི་རོས་སྐྱེ་བོ་ཚིམས་མཛད་ཕྱག་འཚལ་ལོ།།
ཚེས་གཉིས་ཨུ་ཏྲ་ཡ་ནས་མཆོད་པའི་ཚེ།།
གཡས་གཡོན་གཉིས་སུ་རིན་ཆེན་རི་གཉིས་སྤྲུལ།།
རི་རྩེ་ལ་སྐྱེས་འབྲས་དང་ཤིང་རྣམས་ཀྱིས།།
མི་དང་དུད་འགྲོ་ཚིམས་མཛད་ཕྱག་འཚལ་ལོ།།
ཚེས་གསུམ་རྒྱལ་པོ་ཤུན་ཙིས་མཆོད་པའི་ཚེ།།
ཞལ་བསིལ་ཆུ་ལས་རིན་ཆེན་རྫིང་བུ་སྤྲུལ།།
ཁ་དོག་སྣ་ཚོགས་པདྨོའི་འོད་ཟེར་གྱིས།།
ཆོས་སྟོན་བདེ་ལ་འགོད་མཛད་ཕྱག་འཚལ་ལོ།།
ཚེས་བཞི་ཨིནྡྲ་ཝརྨས་མཆོད་པའི་ཚེ།།
ཕྱོགས་བཞིར་ཡུར་བ་བརྒྱད་ལྡན་རྫིང་བུ་སྤྲུལ།།
ཆུ་ཡི་སྒྲ་ལས་ཚད་མེད་བཞི་ལ་སོགས།།
ཆོས་ཀྱི་གསུང་སྙན་སྒྲོག་ལ་ཕྱག་འཚལ་ལོ།།
ཚེས་ལྔ་ཚངས་སྦྱིན་གྱིས་ནི་མཆོད་པའི་ཚེ།།
ཞལ་གྱི་སྒོ་ནས་གསེར་མདོག་འོད་ཟེར་འཕྲོས།།
འོད་དེས་རེག་པས་སྒྲིབ་པ་རྣམས་དང་བྲལ།།
ལུས་སེམས་བདེ་ལ་འགོད་མཛད་ཕྱག་འཚལ་ལོ།།
ཚེས་དྲུག་ལི་ཙཱ་རྣམས་ཀྱིས་མཆོད་པའི་ཚེ།།
སངས་རྒྱས་ཀྱི་མཐུས་ཕན་ཚུན་བསམ་པ་ཤེས།།
རབ་ཏུ་དགའ་ནས་སྟོན་པའི་ཡོན་ཏན་བརྗོད།།
སོ་སོར་སྨོན་ལམ་འདེབས་མཛད་ཕྱག་འཚལ་ལོ།།
ཚེས་བདུན་ཤཱཀྱ་རྣམས་ཀྱིས་མཆོད་པའི་ཚེ།།
སྟོན་པའི་མཐུ་ཡིས་འཁོར་གྱི་སེམས་ཅན་རྣམས།།
རྒྱལ་པོར་གྱུར་ནས་རིན་ཆེན་བདུན་སོགས་ལྡན།།
ཀུན་ཀྱང་སྤྲོ་ཞིང་ཚིམས་མཛད་ཕྱག་འཚལ་ལོ།།
ཚེས་བརྒྱད་བརྒྱ་བྱིན་གྱིས་ནི་མཆོད་པའི་ཚེ།།
སེང་གེའི་ཁྲི་ལས་གླང་ཆེན་སྒྲ་སྐད་དང༌།།
སྲིན་པོ་བཞི་དང་ཕྱག་ན་རྡོ་རྗེར་སྤྲུལ།།
མུ་སྟེགས་སྟོན་པ་འཇོམས་མཛད་ཕྱག་འཚལ་ལོ།།
དེ་ཚེ་མུ་སྟེགས་འཁོར་གྱི་སྟོང་ཕྲག་དག།
དགུ་བཅུ་སངས་རྒྱས་སྐྱབས་སོང་རབ་ཏུ་བྱུང་།།
ཆོས་ཀྱི་བདུད་རྩི་མྱངས་ནས་ཟག་པ་ཟད།།
ཀུན་གྱིས་དགྲ་བཅོམ་ཐོབ་མཛད་ཕྱག་འཚལ་ལོ།།
ཚེས་དགུ་ཚངས་པའི་རྒྱལ་པོས་མཆོད་པའི་ཚེ།།
ཚངས་པའི་བར་དུ་ཁྱབ་པའི་སྐུ་སྤྲུལ་ནས།།
སྐུ་ལས་འོད་ཟེར་ཆེན་པོ་རབ་འཕོ་བ།།
ཀུན་གྱིས་མཐོང་བར་མཛད་ལ་ཕྱག་འཚལ་ལོ།།
ཚེས་བཅུ་རྒྱལ་ཆེན་བཞི་ཡིས་མཆོད་པའི་ཚེ།།
སྲིད་རྩེའི་བར་དུ་ཁྱབ་པའི་སྐུ་སྤྲུལ་ནས།།
འོད་ཟེར་ཆེན་པོ་སྣང་ཞིང་གསལ་བར་མཛད།།
ཀུན་གྱིས་མཐོང་ཞིང་གསུང་ཐོས་ཕྱག་འཚལ་ལོ།།
བཅུ་གཅིག་མགོན་མེད་ཟས་སྦྱིན་མཆོད་པའི་ཚེ།།
སྟོན་པ་སེང་གེའི་ཁྲི་ལ་བཞུགས་བཞིན་དུ།།
སྐུ་ནི་མི་མངོན་འོད་ཀྱི་གོང་བུར་གྱུར།།
གསུང་གིས་ཆོས་སྟོན་མཛད་ལ་ཕྱག་འཚལ་ལོ།།
བཅུ་གཉིས་ཁྱིམ་བདག་ཙེ་དས་མཆོད་པའི་ཚེ།།
གསེར་མདོག་འོད་ཀྱིས་སྟོང་གསུམ་བར་དུ་ཁྱབ།།
འོད་དེས་རེག་པས་སྒྲིབ་པ་རྣམས་དང་བྲལ།།
བརྩེ་དང་བྱམས་པས་ཁྱབ་མཛད་ཕྱག་འཚལ་ལོ།།
བཅུ་གསུམ་རྒྱལ་པོ་ཤུན་ཙེས་མཆོད་པའི་ཚེ།།
འདོམ་བདུན་ཁྱབ་པའི་འོད་ནི་ལྟེ་བ་ནས།།
སྐྱེས་ཏེ་བདེ་དང་རང་རྒྱལ་སངས་རྒྱས་སྤྲུལ།།
དེ་འདྲས་སྟོང་གསུམ་ཁྱབ་མཛད་ཕྱག་འཚལ་ལོ།།
བཅུ་བཞི་ཨུ་ཏྲ་ཡ་ནས་མཆོད་པའི་ཚེ།།
མེ་ཏོག་གཏོར་བ་རིན་ཆེན་ཤིང་རྟ་ནི།།
ཆིག་སྟོང་ཉིས་བརྒྱ་ལྔ་བཅུས་སྟོང་གསུམ་གང་།།
སྤྲུལ་ཅིང་ཁྱབ་པར་མཛད་ལ་ཕྱག་འཚལ་ལོ།།
བཅོ་ལྔ་གཟུགས་ཅན་སྙིང་པོས་མཆོད་པའི་ཚེ།།
ཕྱག་ནི་ས་ལ་བསྟན་པས་དམྱལ་བ་ཡིས།།
སྣོད་ཀུན་རོ་བརྒྱའི་ཟས་གང་ཐམས་ཅད་ཚིམས།།
སེམས་ཅན་དཔག་མེད་སྒྲོལ་མཛད་ཕྱག་འཚལ་ལོ།།
ཞེས་པ་འདི་ཡང་ཐམས་ཅད་མཁྱེན་པ་དགེ་འདུན་གྲུབ་པ་དཔལ་བཟང་པོས་མཛད་པའོ།། ཤུབྷཾམསྟུ།། །།
No comments:
Post a Comment