༄༅། །དཔལ་ལྷ་མོའི་མེ་ལྕེ་འབར་བའི་གླེང་གཞིའི་རྒྱུད་ཀྱི་བསྡུས་དོན་བཞུགས་སོ།།
ཀརྨ་པ་རང་བྱུང་རྡོ་རྗེ།
༄༅། །དཔལ་ལྡན་རྣལ་འབྱོར་མ་དཔལ་རྒྱུད། །ཌཱ་ཀི་མེ་ལྕེ་ཕྲེང་འདྲ་བའི། །འབར་བ་གསལ་བྱེད་རྒྱུད་འདི་ཡི། །བསྡུས་དོན་འདི་ནི་གསལ་བར་དགོད། །དཔལ་མཁའ་འགྲོ་མ་མེ་ལྕེ་འབར་བའི་རྒྱུད་འདི་ལ་གསུམ་སྟེ། དེ་ལ་ཀླད་དོན་མཚན་ཕུན་སུམ་འཚོགས་པ་དང་། གཞུང་དོན་དགོས་འབྲེལ་གྱི་དོན་བསྟན་པ་དང་། འཇུག་ཡོངས་སུ་རྫོགས་པའི་བྱ་བའོ། །ཀླད་དོན་ལ་གཉིས་མཚན་དངོས་དང་། མཆོད་པར་བརྗོད་པའོ། །གཞུང་དོན་ལ་སྤྱིར་ལེའུ་ཉི་ཤུ་རྩ་ཉིས་གནས་པ་ལ། ལེའུ་དང་པོ་བརྗོད་བྱ་རྗོད་བྱེད་རྣམས་ཀྱི་དོན་བསྡུས་པ། གླེང་བཞི་རྒྱས་པར་བཤད་པ། ལེའུ་བཅོ་བརྒྱད་དུ་རྒྱུད་ཀྱི་དོན་ལས་ཕྲན་དང་བཅས་པ་རྒྱས་པར་བཤད་པ་དང་། འོག་མ་གསུམ་གྱི་རྗེས་སུ་ཡིད་རང་པ་དང་བཅས་པས་བསྟོད་པ་དང༌། ཡོངས་སུ་གཏད་ཅིང་། རྗེས་སུ་ལུང་བསྟན་པའོ། །དང་པོ་ལ་གསུམ་ལས། ཕུན་སུམ་ཚོགས་པ་ལྔར་བསྡུས་སྟེ་བསྟན་པ། དེས་མཚམས་སྦྱར་བ་དང་། དངོས་དང་། མཇུག་ལེའུ་ཡི་མཚན་ནོ། །དང་པོ་ལ་ལྔ་ལས།དུས་དང་གནས་བསྟན་པ་དང་། སྟོན་པའི་མཚན་ཉིད་ཆེ་བའི་ཡོན་ཏན་དང་བཅས་པ་དང་། འཁོར་གྱི་ནི་མཚན་ཉིད་ཀྱི་ཁྱད་པར་དང་། ཆོས་སོ། །འདི་ལ་དང་པོར་གླེང་སླང་བ་བྱེད་པ་ལ་གཉིས་། ཞུས་པ་དང་ལན་གྱིས་ལེའུ་ཐམས་ཅད་ཀྱི་མདོར་བསྟན་དང་། གླེང་གཞིའི་དོན་བསྟན་པའོ། །གོང་མ་ལ་གསུམ། ནུབ་པོའི་ཁྱད་པར། སྟོན་པའི་ཁྱད་པར། སོ་སོའི་མདོར་བསྟན་ནོ། །ཞུབ་པོའི་ཁྱད་པར་ལ་གསུམ། ཉིད་ཀྱི་ཡོན་ཏན་དང་། སྟོན་པ་ལ་མཆོད་པ་དང་། ཚིགས་སུ་བཅད་དེ་ཞུས་པའོ། །སྟོན་པའི་ཁྱད་པར་ལ་གསུམ། ཏིང་ངེ་འཛིན་ལ་ཞུགས་པ་དང་། རྫུ་འཕྲུལ་གྱི་ཆོ་འཕྲུལ་བསྟན་པ་དང༌། ཚིགས་སུ་བཅད་དེ་བཀའ་སྩལ་པའོ། །སོ་སོའི་མདོར་བསྟན་པ་ལ་གཉིས། མདོར་བསྟན་ནུབའི་ཚེ་མཆོད་པ་དང་། ནུབ་དངོས་སོ། །གླེང་བཞིའི་དོན་བསྟན་པ་ལ་དགུ་སྟེ། ལྷ་མོ་འདི་དང་པོ་འབྱུང་པའི་རྒྱུ་བསྟན་པ་དང་། ཕྱག་ན་རྡོ་རྗེས་ཇི་ལྟར་སྤྲུལ་པ་དང་། སྲིན་གྱི་ཆུང་མར་ཇི་ལྟར་སོང་བའི་རྒྱུ་དང་། མའི་དམོད་པ་བོར་བ་དང་། །སྲིན་གྱི་བྱ་བ་ཇི་ལྟར་བྱས་ཤིང་རྫོགས་པ་དང་། ལས་ཀྱི་དབང་གི་ཇི་ལྟར་སྐྱེ་བ་བླངས་པ་དང་། རྫུ་འཕྲུལ་ཅན་དུ་ཇི་ལྟར་གྱུར་པ་དང་། སངས་རྒྱས་རྣམས་དང་ཇི་ལྟར་མཇལ་ཞིང་བཏུལ་ཏེ་མཐུ་རྩལ་ཅན་དུ་གྱུར་པ་དང་། ཇི་ལྟར་གྱུར་བའི་གཏན་ཚིགས་སོ། །དང་པོ་ལ་བརྒྱད་དེ། ལན་མདོར་བསྟན་ཏེ་གསུངས་པ་དང༌། རྒྱས་པར་བཤད་དེ་དཔག་བསམ་གྱི་ཤིང་གི་མཚན་ཉིད། ལྷ་དང་ལྷ་མིན་གྱི་ཚོགས་དང༌། ལྷ་མིན་རྣམས་ཀྱི་ཇི་ལྟར་སྨྲས་པ་དང༌། ལྷས་ལན་སྨྲས་པ་དང་། ལྷ་མིན་གྱིས་སྐྱར་ཏེ་སྨྲས་ནས་ཇི་ལྟར་དམག་དྲང་པ་དང་། ལྷ་རྣམས་ཀྱིས་ཇི་ལྟར་འཐབ་པར་བརྩམས་པ་དང༌། ཇི་ལྟར་གཡུལ་བཀྱེ་བའོ། །གཉིས་པ་ལ་བཅུ་སྟེ། ཕྱག་ན་རྡོ་རྗེས་དབུ་མ་ཇི་ལྟར་སྤྲུལ་པ། དབང་ཕྱུག་ལ་བྱིན་པ་དང་། དེའི་དབང་གིས་མ་ཧཱ་ཀ་ལ་དང་ལྷ་མོ་བྱུང་བ། མིང་སྲིང་གཉིས་ལ་དབང་བསྐུར་ཏེ་མངའ་གསོལ་པ། གལ་བཀྱེ་པས་ལྷ་དམག་ཇི་ལྟར་རྒྱལ་བར་བྱས་པ། ལྷ་མོ་དེ་རི་ཁྲོད་མི་ཅན་དུ་ཇི་ལྟར་གྱུར་པ། དུང་སྐྱོང་མར་ཇི་ལྟར་གྱུར་པ། དེའི་རྣམ་པར་ལས་ཀྱིས་དབང་གི་ལྷ་སྲིན་མོ་མེད་པར་བྱས་པ། དྷ་ཤ་ཤྲི་བས་མ་ཧཱ་དེ་བ་ལ་རྣ་ལ་རྩེར་ཕུལ་བས། རེ་མ་ཏིས་ཇི་ལྟར་བྱུང་པའོ། །གསུམ་པ་ལ་བདུན་ཏེ། སྲིན་པོ་དང་སྲིན་མོ་དང་ལྷ་མོ་གསུམ་གྱིས་དུང་སྐྱོང་མ་བསླུ་བར་བྱས་པ་དང་། བསླུ་བའི་ཕྱིར་རེ་མ་ཏི་གཡོག་དུ་ཕུལ་བ་དང་། བསྟོད་དེ་ཇི་ལྟར་དགྱེས་པ་དང༌། ཁུལ་ལང་ཀ་པུ་རངས་སུ་ལྷ་རྣམས་འགྲོ་བས་མས་མ་བལྟ་བར་བསྒོ་བ་དང༌། ཁོལ་མོས་སྲིན་མོ་སྦྲུན་ཅིང་སླུ་བའི་ཐབས་བྱས་པ་དང་ཁོལ་མོས་ཞུས་པ་དང་། ལན་ཞལ་གྱིས་བཞེས་པས་ཆུང་མར་སོང་བའོ། །བཞི་པ་ལ་གཉིས་ཏེ། བུ་མོ་ལ་དམོད་པ་བོར་བ་དང་། རེ་མ་ཏི་ལ་དམོད་པ་བོར་བའོ། །ལྔ་པ་ལྔ་དྲུག་སྟེ། དམོད་པའི་དབང་གི་སྲིན་དུ་གྱུར་པ། སེང་གེ་ཟླ་བ་ལ་སོགས་བྱུང་བ། གཡོག་མོ་ལ་དམོད་པ་བསྡིགས་པ། དཔོན་གཡོག་གཉིས་ཇི་ལྟར་བྲོསཔ། རྫས་ཀྱི་གཏན་ཚིགས། རྒྱ་མཚོའི་འགྲམ་དུ་གཤིན་རྗེ་བསྒྲུབས་ཏེ་དམོད་བོར་ཏེ་ཇི་ལྟར་ཤི་བའོ། །དྲུག་པ་ལ་གཉིས་ཏེ། རྗེ་མོ་ཇི་ལྟར་སྐྱེ་བ་བླངས་པ་དང་། ཁོལ་མོས་སྐྱེ་བ་བླངས་ཤིང་ལས་ཇི་ལྟར་བྱ་བའོ། །དེ་ལ་བརྒྱད། སྐྱེས་མ་ཆུ་སྲིན་གྱི་མགོ་ཅན་དུ་གྱུར་པ་དང༌། རེ་ལྡེ་མགོ་ཉག་གི་བུ་མོར་གྱུར་པ་དང་། སྔོན་གྱི་ལས་ཀྱིས་རྗེ་མོ་དྲན་ཅིང་ཇི་ལྟར་བྲོས་པ་དང་། དམངས་རིགས་མོ་བསད་དེ་གོས་སྣོད་དུས་བྱས་པ་དང་། ནད་ཀྱི་རྐྱལ་པ་ཇི་ལྟར་བྱུང་བ་དང་། ཤོ་དྷེའུ་བྱུང་པ་དང་། རིམས་ནད་གཅད་པ་དང་། དེ་ནས་དཔོན་གཡོག་ཕྲད་དེ་མཐུ་རྩལ་ཅན་དུ་གྱུར་པའོ། །བདུན་པ་ལ་གཉིས། མཁའ་འགྲོ་འདུས་པ་དང་། ཁྱོ་དང་སྦྱོར་བའོ། །བརྒྱད་པ་ལ་བརྒྱད། ཐུབ་པའི་དྲུང་དུ་སྲོག་སྙིང་ཕུལ་བ་དང། ཨེ་ཀ་ཙ་ཏི་དང་། སའི་ལྷ་མོས་མཆོད་པ་ཕུལ་ཏེ་སྲིན་བཏུལ་བ་དང་། དཔལ་རྟ་མགྲིན་གྱི་དྲུང་དུ་དམ་བཅས་པ་དང་། སྔོན་གྱི་ལསདམ་ལ་བཏགས་པ་དང་། འཁོར་ལོས་བསྒྱུར་བའི་རྒྱལ་པོས་མཆོད་པ་དང༌། དཔལ་ཕྱག་ན་རྡོ་རྗེས་དབང་བསྐུར་ཞིང་མངའ་གསོལ་བ་དང༌། ལྷ་སྲིན་རྣམས་ཀྱིས་བརྒྱན་ཕུལ་བའོ། །དགུ་པ་ལ་གསུམ། ཇི་ལྟར་འགྱུར་བའི་རྒྱུ་མཚན་ཞུས་པ། དེ་བཤད་པ་དངོས། གཏན་ཚིགས་བསྟན་པའོ། །དེ་བཤད་པ་ལ་གསུམ། དགེ་བ་སྤྱད་པ། ཞེ་སྡང་ནས་སྤྱད་པ། དམོད་བོར་བའོ།ལེའུ་གཉིས་པ་ལ་གསུམ་ལས། མཚམས་སྦྱར་བའི་ཚུལ་གྱིས་ཞུས་པ་དང་། ལན་དང༌། དོན་དངོས་དང་། མཇུག་ལེའུ་ཡི་དཔལ་མཚན་ནོ། །དོན་དངོས་ལ་གཉིས། སློབ་དཔོན་གྱི་མཚན་ཉིད་དང་། སློབ་མའི་འོ། །ལེའུ་གསུམ་པ་ལ་ཡང་གསུམ་སྟེ། མཚམས་སྦྱར་བའི་ཚུལ་གྱི་ཞུས་པ་དང་། ལན་དང་དོན་དངོས་དང་། འཇུག་ལེའུ་ཡི་མཚན་ནོ། དོན་དངོས་ལ་གཉིས། དོན་དམ་པར་རང་བཞིན་མེད་པར་བསྟན་པ་དང་། སྤྲུལ་པའི་སྐུ་སྒྱུ་མ་ལྟ་བུར་བལྟ་བའོ། ལེའུ་བཞི་པ་འདི་ལ་ཡང་གསུམ་སྟེ། དྲིས་པའི་ཚུལ་གྱིས་མཚམས་སྦྱར་བ། གཞུང་དངོས། འཇུག་ལེའུ་ཡི་མཚན་ནོ། གཞུང་དངོས་ལ་དྲུག་ལས། དཀྱིལ་འཁོར་རྣམ་གསུམ་པ་བཤད་ཞལ་གྱིས་བཞེས་པ། རང་བཞིན་གྱི་དཀྱིལ་འཁོར། ཏིང་ངེ་འཛིན་གྱི་དཀྱིལ་འཁོར། གཟུགས་སྙན་གྱི་དཀྱིལ་འཁོར། ཚོན་རྩི། ལྷ་བཀོད་ཅིང་བྲི་བའི་ཐབས་སོ། །ལེའུལྔ་པ་འདི་ལ་ཡང་གསུམ་སྟེ། ཞུས་པའི་ཚིག་གིས་མཚམས་སྦྱར་བ། གཞུང་དོན་དངོས་བསྟན་པ། མཇུག་ལེའུ་ཡི་མཚན་ནོ། །རྫས་དངོས་བསྟན་པ་ལ་གསུམ། རྫས་མེད་ན་མི་འགྲུབ་པ་དང་། རྫས་མདོར་བསྟན་དང་༑ རྒྱས་པར་བཤད་པའོ། །དང་པོ་ལ་གསུམ། ཕྱག་ན་རྡོ་རྗེ་དང༌། རྗེ་མོ་དང་། རེ་མ་ཏིའི་མོ། གོང་མ་ལ་བདུན། བོད་པ་དངོས་དང་། བརྟེན་པ་དང༌། མཆོད་པ་དང་། དམ་ཚིག་བསྲེ་བ་དང་། བསྐུལ་བ་དང་། མཚན་མ་དབབ་པ་དང་། གནད་ལ་འབེབས་ཤིང་བཟློག་པའི་རྫས་སོ། །གཞན་གཉིས་ཀྱང་གོ་བདུན་པོ་ཡིས་འདྲེ། རྫས་ཚང་བའི་ཡོན་ཏན་ནོ། །ལེའུ་དྲུག་པ་འདི་ལ་ཡང་གསུམ་ལས། ཞུས་པའི་ཚུལ་གྱིས་མཚམས་སྦྱར་བ། བྲི་ཐབས་དངོས། མཇུག་ལེའུ་མཚན་ནོ། །བྲིས་ཐབས་དངོས་ལ། བཀའ་སྩལ་པའི་ཚུལ་གྱིས་དང་པོའི་བྱ་བ་དང་། རས་ཚོན་བྱིན་གྱི་རླབས་པ་བྲི་ཐབས་དངོས། སྤྱན་ཕྱེ་སྟེ་སྙིང་པོ་བཀོད་པ། ལུགས་མ་ལ་ཡང་དེ་བཞིན་དུ་བསྟན་པའོ། །ལེའུ་བདུན་པ་ལ་ཡང་གསུམ། ཞུས་པའི་ཚུལ་གྱིས་མཚམས་སྦྱར་བ། ཏིང་ངེ་འཛིན་གྱི་རིམ་པ། མཇུག་ལེའུ་ཡི་མཚན་ནོ། །ཏིང་ངེ་འཛིན་གྱི་རིམ་པ་ལ་བཞི་སྟེ། གཙོ་བོ་བསྐྱེད་པ་དང་། རྗེ་མོ་བསྐྱེད་པ་དང་། རེ་མ་ཏི་བསྐྱེད་པ་དང་། འཁོར་ནག་མོ་འབུམ་བསྐྱེད་པའོ། ། རྗེ་མོ་བསྐྱེད་པ་ལ་བདུན་ཏེ། རླུང་ནག་དང་། མེ་དང་། ཐོད་པའི་གཞལ་ཡས་ཁང་དང་། དྲིའུ་དང་ཞིང་དང༌། ཉི་ཟླ་ཡི་གདན་དང་། སྐུ་དངོས་སོ། །རི་མ་ཏི་བསྐྱེད་པ་ལ་བདུན་ཏེ། རླུང་ནག་འཚུབ་མ་དང་། གཞལ་ཡས་ཁང་དང་། ཐོད་པ་དང༌། ལྡིང་ཁང་དང་། ཁང་པ་བདུན་དང་། དྲིའུ་བསེའི་གདན་དང་བཅསཔ་དང་། དངོསབསྐྱེད་པའོ། །ལེའུ་བརྒྱད་པ་ལ་གསུམ་སྟེ། ཞུས་པའི་ཚུལ་གྱི་མཚམས་སྦྱར་བ་དང་། སྔགས་ཀྱི་དོན་དངོས་དང་། ལེའུ་ཡི་མཚན་ནོ། །སྔགས་ཀྱི་དོན་དངོས་ལ་གསུམ་དེའི་ནང་སྟེ། སྔགས་ཀྱི་ཡོན་ཏན། གཙོ་བོའི་སྔགས། དཔོན་གཡོག་གི་སྔགསབཤད་པའོ། །གཙོ་བོ་གཉིས་སྟེ། ཏིང་ངེ་འཛིན་ལ་བཞུགས་ཏེ་གསང་སྔགས་གསུངས་པ། ཇི་ལྟར་བྱ་བའི་ཐབས་སོ། །དཔོན་གྱི་སྔགས་བཤད་པ་ལ་གཉིས་ཏེ། སྔགས་མདོར་བསྡུས་ཏེ་བཤད་པར་ཞལ་གྱི་བཞེས་པ། རྡོ་རྗེའི་གསང་སྔགས་དངོས། འདི་ལ་གཉིསཏེ། གསང་སྔགས་བཅུགཅིག་གི་དོན་བསྟན་པ་དང་། རྔའི་སྒྲའོ། །དང་པོ་ལ་བཅུ་གཅིག་སྟེ། སྲོག་སྙིང་དང་། མ་མོ་འབུམ་གྱི་སྙིང་པོ་དང་། སྤྱན་དྲངས་པ་དང་། གདན་བཏིང་པ་དང་། གཏོར་མ་དང་། དམ་ཚིག་བསྟན་པ་དང་། ལས་ལ་བསྐུལ་བ་དང་། གནད་ནས་བསྐུལ་བ་དང་། དངོས་གྲུབ་བླང་པ་དང་། དབང་བསྐུར་བ་དང་། མཚན་མ་ངན་པ་བཟློག་པའོ། །དང་པོ་ལ་གཉིསཏེ། རྗེ་མོ་དང༌། ཁོལ་མོའོ། །རྔའི་སྒྲ་ལ་དྲུག་སྟེ། གཅིག་བརྡུངས་རིང་པོ་དང་ཐུང་ངུ་དང་། གཉིས་བརྡུངས་ཐུང་བ་དང་། རིང་དང་དེ་ནས། གཉིསབརྡུངས་བཞི་བརྡུངས་སུ་འགྱུར་བའི་སྒྲ་དང་། གསུམ་བརྡུངས་ཀྱིས་དྲུག་བརྡུངས་སུའགྱུར་བའོ། །ལེའུ་དགུ་པ་ལ་གསུམ་སྟེ། མཚམས་སྦྱར་བ་དང་། ཕྱག་རྒྱ་དངོསལེའུ་ཡི་མཚན་ནོ། །དང་པོ་ལ་གཉིས་སྟེ། ཞུས་པ་དང་། ལན་ནོ། །དངོས་ལ་གཉིས། སྤྱིར་དང་པོ་བསྟན་པ་དང༌། བྱེ་བྲག་ཏུའོ། །འདི་ལ་གསུམ། གཙོ་མོ་དང༌། རྗེ་མོ་དང༌། རེ་མ་ཏིའོ། །རྗེ་མོ་ལ་གསུམ། རླུང་ནག་ནི་ཕྱག་རྒྱ་དང་པོ་ལ་རླུང་། མེ་རིའི་ཕྱག་རྒྱ་དང་། ཕྱག་མཚན་ནོ། །རེ་མ་ཏི་ལ་ཁོལ་མོ་བདུན། ཁྲམ་བམ་དང་། མ་མོ་ལྕག་ཀྲུ་དང༌། ཁྱུང་གཤོག་དང་། ཐོད་འཕྲེང་དང༌། ཐོད་རློན་དང༌། བདུད་རྩི་བུམ་པའི་ཕྱག་རྒྱ་དང་ཏྲི་ཤུ་ལའོ། ལེའུ་བཅུ་པ་ལ་གསུམ། མཚམས་སྦྱར་བ་དང་། ལེའུ་ཡི་གཞུང་དང་། ལེའུ་ཡི་མཚན་ནོ། །དང་པོ་ལ་གཉིས། ཞུས་པ་དང་། ལན་ནོ། །གཉིསཔ་ལ་གཉིས་ཏེ། མཆོད་པ་གསུམ་པ་སྤྱིར་བསྟན་པ་དང༌། རྒྱས་པར་བཤད་པའོ། །དེ་ལ་གསུམ། གཏོར་མའི་མཆོད་པ་དང་། སྦྱིན་སྲེག་གི་མཆོད་པ་དང་། གསང་བའི་མཆོད་པའོ། །དང་པོ་ལ་གཉིས་ཏེ། བཅའ་ཐབས་དང་། སྔགས་བསྟན་པའོ། །གཉིས་པ་ལ་ལྔ། མེ་ཐབ་བཅའ་ཞིང་། སྲེག་རྫས་བསག་པ་དང་། བསྐྱེད་ཐབས་དང་། དབུལ་བའི་རིམ་པ་དང་། སྔགས་དང་རྗེས་ཀྱི་བྱ་བའོ། །གསུམ་པ་ལ་གཉིས་ཏེ། མཆོད་པ་དངོས་དང་། དངོས་གྲུབ་དམ་པ་ཡིན་པར་སྟོན་པའོ། །ལེའུབཅུགཅིག་པ་དམ་ཚིག་གི་ལེའུ་ལ་གསུམ། ཞུས་པའི་ཚུལ་གྱིས་མཚམས་སྦྱར་བ་དང༌། དངོས་དང་ལེའུ་ཡི་མཚན་ནོ། །དངོས་བཞི་དང་། ལན་བཀའ་སྩལ་པའི་ཚུལ་གྱིས་བཤད་པར་ཞལ་བཞེས་པ་དང་། དམ་ཚིག་དངོས་དང༌། དམ་ཚིག་མ་བསྲུངས་པའི་སྐྱོན། བསྲུངས་པའི་ཡོན་ཏན་ནོ། །གཉིས་པ་ལ་གསུམ། གཙོ་བོ་དང་། རྗེ་མོ་དང་ཁོལ་མོའོ། །གཙོ་བོ་ལ་གསུམ། སྐུ་དང་གཙོ་བོ། གསུང་གཙོ་བོ་དང་། ཐུགས་སོ། །གཉིས་པ་ལ་གསུམ། སྐུ་དང་། གསུང་དང་། ཐུགས་སོ། །ཁོལ་མོ་ལ་གསུམ། སྐུ་དང་། གསུང་དང་། ཐུགས་སོ། །དམ་ཚིག་མ་བསྲུངས་པའི་སྐྱོན་ལ་གསུམ། གཙོ་བོའི་དང་། རྗེ་མོའི་དང༌། གཡོག་མོའི་འོ། དང་པོ་གསུམ། ཞུས་པའི་དང་། བཤད་པར་ཞལ་གྱིས་བཞེས་པ་དང་། བཤད་པ་དངོས། དངོས་གསུམ་ཀ་ལ་སྐུ་གསུངས་ཐུགས་གསུམ་གསུམ་དུ་ཤེས་པར་བྱའོ། །ཡོན་ཏན་ལ་གསུམ། གཙོ་མོ་དང་། རྗེ་མོ་དང༌། གཡོག་མོའོ། །དེ་དག་ལའང་སྐུ་གསུང་ཐུགས་གསུམ་གསུམ་དུ་ཤེས་པར་བྱའོ། །བཅུ་གཉིས་པ་དྲོད་ཚད་ཀྱི་ལེའུལ་གསུམ། ཞུས་པའི་ཚུལ་གྱི་མཚམས་སྦྱར་བ་དང་། གཞུང་དངོས་དང་། ལེའུ་ཡི་མཚན་ནོ། །གཞུང་ལ་གཉིས། བཤད་པར་ཞལ་གྱིས་བཞེས་པ་དང༌། བཤད་པ་དངོས་སོ། །དེ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །འདི་ལའང་བཞི་སྟེ། ནང་དང་། གསང་བ་དང་། ཕྱི་དང་གཞན་དག་གི་བལྟས་བསྟན་པའོ། །ནང་ལ་དྲུག་སྟེ། མིག །རྣ་བ། སྣ། ལྕེ། ལུས། སྙིང་གི་རྟགས་སོ། །ཕྱི་ལ་གསུམ་སྟེ། རབ། འབྲིང་། ཐ་མའོ། །རབ་ལ་ལྔ་སྟེ། སྤྱིར་བཤད་པ་ཞི་བའི་རྟགས། དྲག་པོའི་རྟགས། དབང་གི་རྟགས། རྒྱས་པའི་རྟགས་སོ། །གཞན་དག་གི་བལྟས་བསྟན་པ་ལ་དྲུག་ཏེ། མ་མོ་གྲུབ་ནས་དབང་དུའདུས་པ། མ་འདུས་པ། མ་མོ་འཁྲུགས་པའི་རྟགས། བར་ཆོད་ཀྱི་རྟགས། ལྟས་སྣ་ཚོགས་པ། གང་ལ་ཆགས་ཀྱི་མཚན་ཉིད་དང་བཅས་པའོ། །འདི་ལ་ལྔ་སྟེ། གང་ལ་འཁོར་བར་བསྟན་པ་དངོས་དང་། འཕྲལ་གྱི་ལྟས་དངོས་གྲུབ་བླང་བ་དང༌། ལྟས་ངན་པ་བཟློག་པ་དང་། དོན་གྲུབ་མི་གྲུབ་ཀྱི་བལྟས་སོ། །ལེའུ་བཅུགསུམ་པ་ལ་གསུམ་སྟེ། ཞུས་པའི་ཚུལ་གྱིས་མཚམས་སྦྱར་བ་དང་། གཞུང་དངོས་དང་། ལེའུ་ཡི་མཚན་ནོ། །གཞུང་དངོས་ལ་གསུམ་སྟེ། ལན་བཀའ་སྩལ་བའི་ཚུལ་གྱིས་ཅིས་ཀྱང་འགྲུབ་པར་བསྟན་པ་དང་། འོན་ཀྱང་མི་འགྲུབ་པར་བསྟན་པ་དང་། དེ་བཅོས་པའི་ཐབས་སོ། །འོན་ཀྱང་མི་འགྲུབ་པར་བསྟན་པ་ལའང་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །འདི་ལ་བཞི་སྟེ། ལས་འཕྲོས་མ་འབྲེལ་བ་དང་། བཟླས་བརྗོད་ཉུང་བ་དང༌། བགེགས་ཀྱི་བར་ཆོད་དང་། དམ་ཚིག་ཉམས་པའོ། །བཅོས་པའི་ཐབས་ལའང་ལྔ་སྟེ། ལས་འཕྲོ་ལ་འབྲེལ་པ་བཅོས་པ། དེས་ཐེ་ཚོམ་མེད་པར་འགྲུབ་པར་བསྟན། བསྙེན་པ་གྲངས་ཉུང་པ་བཅོས་པའི་ཐབས། བགེགས་ཀྱི་བར་དུ་གཅོད་པ་བཅོས་པའོ། །དམ་ཚིག་ཉམས་པ་བཅས་པའོ། །དང་པོ་ལ་གསུམ་སྟེ། བཅའ་བཞི། དམིགས་པ། སླར་བཟོད་གསོལ་ལོ། ལྔ་པ་ལ་བཞི་སྟེ། དམ་ཚིག་ཉམས་པའི་སྐྱོན། ཉམས་པ་ཆེན་པོའི་བསྐང་བ། འབྲིང་པོའི་བསྐང་བ། ཐ་མ་བསྐང་བའོ། ལེའུབཅུ་བཞི་པ་ལ་གསུམ་སྟེ། ཞུས་པའི་ཚུལ་གྱིས་མཚམས་སྦྱར་བ་དང་། གཞུང་དངོས་དང་། ལེའུ་ཡི་མཚན་ནོ། །གཞུང་དངོས་ལ་ལྔ་སྟེ། བཀའ་སྩལ་བའི་ཚུལ་གྱི་དཔོན་མོའི་རྟེན་རྫས། ཁོལ་མོའི་རྟེན་རྫས། ནང་རྟེན་གྱི་མཚན་ཉིད། གསང་བའི་རྟེན། གྲུབ་ནས་ཇི་ལྟར་བྱ་བའི་ཐབས་སོ། །ལེའུ་བཅོ་ལྔ་པ་ལ་གསུམ། ཞུས་པའི་ཚུལ་གྱི་མཚམས་སྦྱར་བ་དང་། གཞུང་དངོས་དང༌། ལེའུ་ཡི་མཚན་ནོ། །གཞུང་དངོས་ལ་གཉིས་ཏེ། བདག་སྒྲུབ་པ་དང༌། དབང་བསྐུར་བའོ། །དེ་ལ་གཉིས་ཏེ། སྔོན་འགྲོ་དང་། དངོས་བཞིའོ། །དེ་ལ་ལྔ་སྟེ། དང་པོར་ཕྱག་ན་རྡོ་རྗེའི་དབང་བཞི། རྗེ་མོའི་དབང་བཞི། རེ་མ་ཏིའི་དབང་བཞི་བཅུགཉིས་ཀྱིས་དམ་ཚིག་དབོག་པ། མམོ་དབབ་ཅིང་ནང་གི་དབང་སྦྱིན་པའོ། །འདི་ལ་ལྔ་སྟེ། རིགས་བརྟག་ཅིང་ལས་ཀྱི་བྱ་བ། དཀྱིལ་འཁོར་དང་ཏིང་ངེ་འཛིན་གྱི་ཁྱད་པར་གྱིས་དབབ་པ། མཆོད་ཅིང་དམ་ཚིག་བསྲེ་བ། སློབ་མ་ལ་ཡོངས་སུ་རྫོགས་པར་སྦྱིན་པ། དབང་མ་ཐོབ་པ་ཡོངས་སུ་གསང་བར་བསྟན་པའོ། །བཅུ་དྲུག་པ་ལ་གསུམ་སྟེ། ཞུས་པའི་ཚུལ་གྱི་མཚམས་སྦྱར་བ། །གཞུང་དངོས་དང་། ལེའུ་ཡི་མཚན་ནོ། །གཞུང་ལ་གཉིས་ཏེ། དཔོན་མོའི་ལས་དང་། གཡོག་མོའི་ལས་སོ། །དང་པོ་ལ་གཉིས་ཏེ། སྦྱིན་བསྲེག་དང་། ལས་གཞན་དག་གོ །སྦྱིན་སྲེག་ལ་ལྔ་སྟེ། ལྷ་མོ་གྲུབ་པས་གཞན་གྲུབ་པར་བསྟན་པ། ཞི་བ་དང་རྒྱས་པ་དང་། དབང་དང་། དྲག་པོས་བསྲེག་པའི་ལསསོ། །ལས་གཞན་དག་ལ་དྲུག་སྟེ། དབྱེ་བའི་ལས་དང་། དགུག་པ། ལྐུགས་པར་བྱེད་པ། སྨྱོ་བར་བྱེད་པ། རེངས་པར་བྱེད་པ་དང་། མི་སྣང་བར་བྱ་བའོ། །གཡོག་མོའི་ལསལ་གཉིས་ཏེ། མདོར་བསྟན་པ་དང༌། རྒྱས་པར་བཤད་པའོ། །འདི་ལ་ལྔ་སྟེ། ཁྲག་ནད་ཀྱིས་བསད་པ་དང་། རིམས་ནད་དབབ་པ། ཚད་ནད་དབབ་པ། སྙིང་རླུང་གིས་བསད་པ། ཐུན་དྲུག་གིས་བསད་པའོ། །འདི་ལ་ཡང་གཉིས་ཏེ། མདོར་བསྟན་པ་དང་། །རྒྱས་བཤད་དོ། རྒྱས་བཤད་ལ་བརྒྱད་དོ། །ཐོད་པའི་ཐུན། མདའ་ཡི་ཐུན། རཀྟའི་ཐུན། སྒོང་ངའི་ཐུན། དུག་གི་ཐུན། ཙི་ཏའི་ཐུན། ཐུན་དྲུག་གི་ཕན་ནོ། ལྟས་ངན་པ་དབབ་པའོ། །དང་པོ་ལ་གཉིས་ཏེ། བཅུ་བཞི་འཁོར་ལོ་འགོད་པ་དང་། ལས་སྦྱོར་རོ། །མདའ་ཐུན་ལ་གཉིས་ཏེ། བཅའ་བཞི་དང་། ཐུན་སྔགས་ཀྱི་ལས་སྦྱོར་རོ། །ལྟས་ངན་དབབ་པ་ལ་གཉིས་ཏེ། མཁའ་འགྲོ་དབབ་པ་དང་། གསང་སྔགས་ཀྱིས་བཏང་པའོ། །ལེའུ་བཅུ་བདུན་པ་ལ་གསུམ་ཏེ། ཞུས་པའི་ཚུལ་གྱིས་མཚམས་སྦྱར་བ་དང་། །གཞུང་དངོས་དང་། ལེའུ་ཡི་མཚན་ནོ། །གཞུང་ལ་གསུམ་ཏེ། སྔོན་འགྲོ་དང་། དངོས་གཞི། རྗེས་སོ། །དངོས་བཞི་ལ་བཞི་སྟེ། ལིང་གའི་རྒྱུ་བསྟན་པ་དང་། བདུད་རྩི་དྲངས་པ་དང་། མར་མེ་བསད་པ་དང་། སྔགས་བསྟན་པའོ། །ལེའུ་བཅོ་བརྒྱད་པ་ལ་གསུམ་སྟེ། ཞུས་པའི་ཚུལ་གྱི་མཚམས་སྦྱར་བ་དང་། གཞུང་དངོས་དང༌། ལེའུ་ཡི་མཚན་ནོ། །གཞུང་དངོས་ལ་གསུམ་སྟེ། ལན་བཀའ་བསྩལ་པའི་ཚུལ་གྱི་འོད་ཟེར་བཀྱེ་བ། ཐིག་ལེ་ཡེ་ཤེས་དོན་དམ་དང་། ཀུན་རྫོབ་ཏུ་བཤད་པ། ཀུན་རྫོབ་ཀྱི་དོན་རྒྱས་པར་དགྲོལ་བའོ། ལེའུ་བཅུདགུ་པ་ལ་གསུམ་སྟེ། ཞུས་པའི་ཚུལ་གྱིས་མཚམས་སྦྱར་བ་དང་། །གཞུང་དངོས་དང་། ལེའུ་ཡི་མཚན་ནོ། །གཞུང་དངོས་ལ་གཉིས་ཏེ། ལན་བཀའ་བསྩལ་པའི་ཚུལ་གྱིས་སྤྲོས་པ་བསྐྱེད་པ་དང་། རྫུ་འཕྲུལ་བཅུ་དྲུག་བསྟན་པ་དང་། དེ་ལ་གསུམ། རྫས་བསག་པ་དང་། སྤྱིར་སྒྲུབ་པ་དང༌། སོ་སོའི་ཁ་བསྒྱུར་རོ། །འདི་ལ་བཅུ་དྲུག་སྟེ། དུག་གིས་མ་ཚུགས་པར་བྱ་བ་དང་། ཆུ་ལ་མ་འབྱིང་པ་སྒྲུབ་པ། མཁའ་སྤྱོད་སྒྲུབ་པ། མངོན་ཤེས་སྒྲུབ་པ། དགུག་པའི་སྦྱོར་བ། མིག་སྨན་སྒྲུབ་པ། རྐང་མགྱོགས་སྒྲུབ་པ། མི་སྣང་བ་སྒྲུབ་པ། ཚེ་སྒྲུབ་པ། ནོར་གྱི་གཏེར་སྒྲུབ་པ། རོ་ལངས་སྒྲུབ་པ། ནད་གསོ་བ། བཅུད་ཀྱིས་ལེན་པ། ཐོག་སེར་དབབ་པ། འབྱུང་བའི་དགྲས་མི་ཚུགས་པ་བསྟན་པ། བྱད་སྟེམས་བཟློག་པའོ། །ལེའུ་ཉི་ཤུ་པ་ལ་གསུམ་ཏེ། དཔལ་ཕྱག་ན་རྡོ་རྗེ་ལ་བརྒྱ་བྱིན་གྱིས་བསྟོད་པ་དང༌། མ་མོ་དཔོན་གཡོག་ལ་འཁོར་རྣམས་ཀྱིས་བསྟོད་པ་དང་། །ལེའུ་ཡི་མཚན་ནོ། །ལེའུ་ཉི་ཤུ་རྩ་གཅིག་པ་ལ་གསུམ་སྟེ། མཚམས་སྦྱར་བའི་ཚུལ་གྱིས་ཕྱག་ན་རྡོ་རྗེས་བཀའ་བསྩལ་པ་དང་། ཇི་ལྟར་ཡོངས་སུ་གཏད་པ་དང༌། བརྒྱ་བྱིན་གྱིས་ཇི་ལྟར་ཡོངས་སུ་བླངས་པའོ། །བར་མ་ལ་ལྔ་སྟེ། འཁོར་རྣམས་ལ་བསྐུལ་བ་དང་། ཉིད་ཀྱི་ཡོན་ཏན་དང་། བརྒྱ་བྱིན་ལ་གཏད་པ་དང༌། འདི་བཟུང་བའི་ཡོན་ཏན་དང་། གསང་བའི་གནས་བསྟན་པའོ། །ལེའུ་ཉི་ཤུ་རྩ་གཉིས་པ་འདི་ལ་གསུམ་སྟེ། བརྒྱ་བྱིན་གྱིས་ཞུས་པའི་ཚུལ་གྱིས་མཚམས་སྦྱར་བ་དང་། ལུང་བསྟན་པ་དངོས་དང་། ལེའུ་ཡི་མཚན་ནོ། །མཁའ་འགྲོ་མ་མེ་ལྕེ་འབར་བའི་བསྡུས་དོན་གསལ་བའི་མེ་ལོང་རྫོགས་སོ།། །།
No comments:
Post a Comment