ཚེས་གྲངས་སྟེང་ནས་རེས་གཟའ་འཚོལ་བ།

༄༅།   །ལོ་ཟླ་ཚེས་གང་ལ་རེས་གཟའ་གང་ཁེལ་འཚོལ་ཚུལ་གྱི་མན་ངག་བཞུགས། 

༄༅།  །ནམོགུརུམཉྫུགྷོཥཡ། 

ཚེས་གྲངས་གང་ལ་རེས་གཟའ་འཚོལ་ཚུལ་ནི།།

ཚེས་གྲངས་སྟེང་དུ་ཟླ་བའི་གསང་ཚིག་བསྡོམ།།

ལོ་དེའི་ཨང་ཀི་ཐ་གཉིས་སྟེང་དེ་ཉིད།།

བཞིར་བགོས་་གང་ཐོབ་སྣོན་ཞིང་གྲངས་ཆུང་དོར།།

དུས་རབས་གསང་ཚིག་བསྡོམས་ནས་བདུན་ལ་བགོས།། 

ཐོབ་ཆའི་གྲངས་ཆེན་དོར་ནས་སིལ་མའི་གྲངས།།

གཅིག་ལུས་ཟླ་བ་་གཉིས་ལུས་མིག་དམར་ནས།།

དྲུག་ལུས་སྤེན་པ་གང་ཡང་མ་ལུས་ཉི།། 

༈ ཟླ་བའི་གསང་ཚིག་ཟླ་བའི་གོ་རིམ་བཞིན།།

ཀླད་ཀོར་གསུམ་གསུམ་དྲུག་དང་གཅིག་དང་བཞི།། 

དྲུག་གཉིས་ལྔ་དང་ཀླད་ཀོར་གསུམ་ལྔ་འོ།། 

ཟླ་བ་གཉིས་པར་རྩ་དགུ་ཡོད་པ་ལ།། 

ཟླ་བ་དང་པོར་དྲུག་དང་གཉིས་པར་གཉིས།། 

༈ གཉིས་པར་རྩ་དགུ་ཡོད་མེད་དཔྱོད་ཚུལ་ནི།། 

ལོ་དེ་དུམ་བུ་བཞི་རུ་བགོས་པ་ན།།

ཐོབ་ཆར་གྲངས་ཆུང་ཡོད་ན་རྩ་དགུ་མེད།། 

དེ་ལས་ལྡོག་ན་གཉིས་པར་རྩ་དགུ་ཡོད།།

༈ དུས་རབས་སོ་སོའི་གསང་ཚིག་འདི་ལྟ་སྟེ།།

དུས་རབས་བཅུ་བདུན་པ་ནས་ཉི་ཤུ་བར།།

དྲུག་དང་བཞི་དང་གཉིས་དང་ཀླད་ཀོར་སྟེ།།

བཅོ་དྲུག་ཀླད་ཀོར་ཉེར་གཅིག་དྲུག་ལ་སོགས།། 

གོང་འོག་ཀུན་ལ་དེ་ཡི་རིགས་པ་སྦྱར།། 

དགེ་བ་དེ་ཡིས་འགྲོ་་བློའི་མུན་སེལ་ཤོག། 

 

དཔེ་མཚོན་འགའ་ཞིག

ཕྱི་ལོ་ ༡༩༤༧ ཟླ་བ་ ༨ ཚེས་ ༡༥ རྒྱ་གར་རང་བཙན་དུས་ཆེན་ལྟ་བུ་ལ་མཚོན་ན། ཚེས་ 15 སྟེང་ཟླ་བ་ ༨ པའི་གསང་ཚིག་ 2 སྡོམ། ༡༩༤༧ གྱི་ཐ་མའི་ཨང་ཀི་ 47 སྟེང་། དེ་ཉིད་ ༤ ལ་བགོས་པས་ཐོབ་ཆ་ 11 བསྣན། དེའི་སྟེང་དུས་རབས་ ༢༠ པའི་གསང་ཚིག་ 0 བཅས་བསྡམས་པས་ 75 གནས། དེ་ཉིད་ 7 ལ་བགོས་པས་ 10 རེ་ཐོབ་ཅིང་། སིལ་མ་ 5 ལུས་སོ།། དེས་ན་ 5 ནི་པ་སངས་ཀྱི་དོན་ཡིན་པས། དེ་ཉིན་རེས་གཟའ་པ་སངས་ཡིན་པ་ལྟ་བུའོ།། 

ཡང་དེ་རིང་ ༢༠༢༡་༢་༢༡ ལ་མཚོན་ན། ཚེས་ 21 སྟེང་ཟླ་བ་ ༢ པའི་གསང་ཚིག་ 3 སྡོམ། ༢༠༢༡ གྱི་ཐ་མའི་ཨང་ཀི་ 21 དང་། དེ་ཉིད་ ༤ ལ་བགོས་པས་ཐོབ་ཆ་ 5 བསྣན། དེའི་སྟེང་དུས་རབས་ ༢༡ པའི་གསང་ཚིག་ 6 བཅས་བསྡོམས་པས་ 49 གནས། དེ་ཉིད་ 7 ལ་བགོས་པས་ 7 རེ་ཐོབ་ཅིང་། སིལ་མ་ 0 ལུས་སོ།། དེས་ན་ 0 ནི་ཉི་མའི་དོན་ཡིན་པས། དེ་རིང་རེས་གཟའ་ཉི་མ་ཡིན་པ་ལྟ་བུའོ།། 

ཡང་། ༢༠༢༢་༡་༡ སྟེ་ལོ་རྗེས་མའི་ཕྱི་ལོའི་ལོ་གསར་ལ་མཚོན་ན། ཚེས་ 1 སྟེང་ཟླ་བ་ ༡ པའི་གསང་ཚིག་ 0 སྡོམ། ༢༠༢༢ གྱི་ཐ་མའི་ཨང་ཀི་ 22 དང་། དེ་ཉིད་ ༤ ལ་བགོས་པས་ཐོབ་ཆ་ 5 བསྣན། དེའི་སྟེང་དུས་རབས་ ༢༡ པའི་གསང་ཚིག་ 6 བཅས་བསྡམས་པས་ 34 གནས། དེ་ཉིད་ 7 ལ་བགོས་པས་ 4 རེ་ཐོབ་ཅིང་། སིལ་མ་ 6 ལུས་སོ།། དེས་ན་ 6 ནི་སྤེན་པའི་དོན་ཡིན་པས། དེ་ཉིན་རེས་གཟའ་སྤེན་པ་ཡིན་པ་ལྟ་བུའོ།། དེ་ལྟར་རིགས་པས་བསྒྲེས་ཏེ་་ལོ་ཟླ་ཚེས་གང་ལ་སྦྱར་ནས་བརྩི་ནའང་དེ་ཉིན་གྱི་རེས་གཟའ་ཤེས་པར་འགྱུར་རོ།། 

ཕྱི་ཟླ་ ༢ པར་ཚེས་ ༢༩ ཡོད་མེད་དཔྱོད་ཚུལ་གྱི་དཔེ་མཚོན་ནི།  ཕྱི་ལོ་ ༢༠༢༠ ལྟ་བུ་ལ་མཚོན་ན། 2020÷4=505 ཏག་ཏག་ལས་ཐོབ་ཆ་ལ་གྲངས་ཆུང་མེད་པས། ལོ་དེར་ ཕྱི་ཟླ་ ༢ ལ་ཚེས་ ༢༩ ཡོད་པ་ལྟ་བུ་དང་།  ཡང་ཕྱི་ལོ་ ༡༩༧༩ ལྟ་བུ་ལ་མཚོན་ན། 1979÷4=494.75 འདིར་ཐོབ་ཆ་ལ་གྲངས་ཆུང་ཡོད་པས། ལོ་དེར་ ཕྱི་ཟླ་ ༢ ལ་ཚེས་ ༢༩ མེད་པ་ལྟ་བུ་སྟེ། དེས་མཚོན་ནས་ཤེས་པར་བྱའོ།།

ཤུབྷཾ། ཤྲཱིས། ༢༠༢༡་༢་༢༡ ལ་བྲིས་སོ།།