Saturday, May 16, 2020

སྨོན་ལམ་ཉི་ཤུ་པ།


༄༅།   །དབུ་མ་རིན་ཆེན་ཕྲེང་བའི་སྨོན་ལམ་ཚིགས་སུ་བཅད་པ་ཉི་ཤུ་པ་བཞུགས་སོ།།
མཛད་པ་པོ། སློབ་དཔོན་ཀླུ་སྒྲུབ།

སངས་རྒྱས་ཆོས་དང་དགེ་འདུན་དང༌།། བྱང་ཆུབ་སེམས་དཔའ་རྣམས་ལ་ཡང༌།།
རྣམ་ཀུན་བཏུད་དེ་སྐྱབས་མཆིས་ནས།། མཆོད་འོས་རྣམས་ལ་ཕྱག་འཚལ་ལོ།། ༡

སྡིག་པ་ལས་ནི་ལྡོག་བགྱིད་ཅིང༌།། བསོད་ནམས་ཐམས་ཅད་ཡོངས་སུ་བཟུང༌།།
ལུས་ཅན་ཀུན་གྱི་བསོད་ནམས་དག། ཀུན་ལ་རྗེས་སུ་ཡི་རང་ངོ༌།། ༢

བདག་ནི་སྤྱི་བཏུད་ཐལ་སྦྱར་ཏེ།། ཆོས་ཀྱི་འཁོར་ལོ་བསྐོར་སླད་དང༌།།
འགྲོ་གནས་བར་དུ་བཞུགས་སླད་དུ།། རྫོགས་པའི་སངས་རྒྱས་རྣམས་ལ་གསོལ།། ༣

དེ་ལྟར་བགྱིས་པའི་བསོད་ནམས་དང༌།། བདག་གིས་བགྱིས་དང་མ་བགྱིས་གང༌།།
དེས་ནི་སེམས་ཅན་ཐམས་ཅད་ཀྱང༌།། བླ་མེད་བྱང་ཆུབ་སེམས་ལྡན་ཤོག། ༤

སེམས་ཅན་ཐམས་ཅད་དྲི་མེད་དབང༌།། ཡོངས་རྫོགས་མི་ཁོམ་ཀུན་འདས་ཤིང༌།།
སྤྱོད་པ་རང་དབང་ཡོད་པ་དང༌།། འཚོ་བ་བཟང་དང་ལྡན་པར་ཤོག། ༥

ལུས་ཅན་དག་ནི་ཐམས་ཅད་ཀྱང༌།། ལག་ན་རིན་ཆེན་ཉིད་ལྡན་ཞིང༌།།
ཡོ་བྱད་ཐམས་ཅད་མཐའ་ཡས་པ།། འཁོར་བ་སྲིད་དུ་མི་ཟད་ཤོག། ༦

བུད་མེད་ཐམས་ཅད་དུས་ཀུན་དུ།། སྐྱེས་མཆོག་ཉིད་དུ་འགྱུར་བར་ཤོག།
ལུས་ཅན་ཐམས་ཅད་རིག་པ་དང༌།། རྐང་པར་ལྡན་པ་ཉིད་དུ་ཤོག། ༧

ལུས་ཅན་ཁ་དོག་ལྡན་པ་དང༌།། གཟུགས་བཟང་གཟི་བརྗིད་ཆེ་བ་དང༌།།
བལྟ་ན་སྡུག་ཅིང་ནད་མེད་དང༌།། སྟོབས་ཅན་ཚེ་དང་ལྡན་པར་ཤོག། ༨

ཐམས་ཅད་ཐབས་ལ་མཁས་གྱུར་ཏེ།། སྡུག་བསྔལ་ཀུན་ལས་ཐར་པ་དང༌།།
དཀོན་མཆོག་གསུམ་ལ་གཞོལ་བ་དང༌།། སངས་རྒྱས་ཆོས་ནོར་ཆེ་ལྡན་ཤོག། ༩

བྱམས་དང་སྙིང་རྗེ་དགའ་བ་དང༌།། ཉོན་མོངས་བཏང་སྙོམས་གནས་པ་དང༌།།
སྦྱིན་དང་ཚུལ་ཁྲིམས་བཟོད་བརྩོན་འགྲུས།། བསམ་གཏན་ཤེས་རབ་ཀྱིས་བརྒྱན་ཅིང༌།། ༡༠

ཚོགས་རྣམས་ཐམས་ཅད་ཡོངས་རྫོགས་ཏེ།། མཚན་དང་དཔེ་བྱད་གསལ་བ་དང༌།།
བསམ་གྱིས་ མི་ཁྱབ་ས་བཅུ་དག། རྒྱུན་མི་འཆད་པར་བགྲོད་པར་ཤོག། ༡༡

བདག་ཀྱང་ཡོན་ཏན་དེ་དག་དང༌།། གཞན་ཀུན་གྱིས་ཀྱང་བརྒྱན་ལྡན་ཏེ།།
ཉེས་པ་ཀུན་ལས་གྲོལ་བ་དང༌།། སེམས་ཅན་ཀུན་མཆོག་བྱམས་པ་དང༌།། ༡༢

སེམས་ཅན་ཀུན་ཡིད་རེ་བ་ཡི།། དགེ་བ་ཐམས་ཅད་རྫོགས་བགྱིད་ཅིང༌།།
རྟག་ཏུ་ལུས་ཅན་ཐམས་ཅད་ཀྱི།། སྡུག་བསྔལ་སེལ་བར་བགྱིད་པར་ཤོག། ༡༣

འཇིག་རྟེན་ཀུན་ན་སྐྱེ་བོ་གང༌།། སུ་དག་འཇིགས་པས་སྐྱེ་བོ་ཀུན།།
བདག་གི་མིང་ཙམ་ཐོས་པས་ཀྱང༌།། ཤིན་ཏུ་འཇིགས་པ་མེད་པར་ཤོག། ༡༤

བདག་ནི་མཐོང་དང་དྲན་པ་དང༌།། མིང་ཙམ་ཐོས་པས་སྐྱེ་བོ་རྣམས།།
རབ་དང་འཁྲུག་མེད་རྣལ་མ་དང༌།། རྫོགས་པའི་བྱང་ཆུབ་ངེས་པ་དང༌།། ༡༥

ཚེ་རབས་ཀུན་དུ་རྗེས་འབྲང་བའི།། མངོན་ཤེས་ལྔ་པོ་ཐོབ་པར་ཤོག།
སེམས་ཅན་ཀུན་ལ་རྣམ་ཀུན་དུ།། རྟག་ཏུ་ཕན་བདེ་བགྱིད་པར་ཤོག། ༡༦

འཇིག་རྟེན་ཀུན་ལ་སྐྱེ་བོ་གང༌།། སྡིག་པ་བྱེད་པར་འདོད་གྱུར་པ།།
དེ་དག་ཐམས་ཅད་གནོད་མེད་པར།། རྟག་ཏུ་ཅིག་ཅར་ཟློག་གྱུར་ཅིག། ༡༧

ས་དང་ཆུ་དང་མེ་དང་རླུང༌།། སྨན་དང་དགོན་པའི་ཤིང་བཞིན་དུ།།
རྟག་ཏུ་སེམས་ཅན་ཐམས་ཅད་ཀྱིས།། རང་དགར་དགག་མེད་སྤྱོད་པར་ཤོག། ༡༨

སེམས་ཅན་རྣམས་ལ་སྲོག་བཞིན་ཕངས།། བདག་ལས་དེ་དག་ཆེས་ཕངས་ཤོག།
བདག་ལ་དེ་དག་སྡིག་སྨིན་ཅིང༌།། བདག་དགེ་མ་ལུས་དེར་སྨིན་ཤོག། ༡༩

ཇི་སྲིད་སེམས་ཅན་འགའ་ཞིག་ཀྱང༌།། གང་དུ་མ་གྲོལ་དེ་སྲིད་དུ།།
དེ་ཕྱིར་བླ་ན་མེད་པ་ཡི།། བྱང་ཆུབ་ཐོབ་ཀྱང་གནས་གྱུར་ཅིག།    །།༢༠

(དབུ་མ་རིན་ཆེན་ཕྲེང་བའི་ལེའུ་ལྔ་པ་བྱང་ཆུབ་སེམས་དཔའི་སྤྱོད་པའི་ལེའུ་ལས་བཏུས་པའོ།།)

No comments:

Post a Comment