ཨོཾམཎིཔདྨེཧཱུཾ།
མི་བསླུ་སྐྱབས་གནས་དམ་པ།།
དཀོན་མཆོག་རིན་ཆེན་རྣམ་གསུམ།།
རང་བཞིན་དག་པའི་དབྱིངས་ནས།།
ཡུད་ཙམ་བདག་ལ་དགོངས་གསོལ།།
དུས་ཀྱི་ཆོས་ཉིད་བཙན་པོ།།
ནམ་ཞིག་བདག་ལ་བབས་ངེས།།
དེ་འདྲ་བསམས་ཤིང་བསམ་ན།།
སྣ་ལ་གཟེར་ཀ་ལངས་ཀྱང་།།
སྒོ་གསུམ་སྤྱོད་པ་ཡན་པོ།།
སྐད་ཅིག་སྔ་ཕྱི་འགྱུར་ལས།།
བཟང་པོའི་འགྱུར་བ་མེད་པ།།
དམུ་རྒོད་བདག་འདྲ་སུ་ཞིག།
རྣམ་ཤེས་སྟོང་པའི་མཁའ་ལ།།
སྲེད་པའི་འདབ་གཤོག་བརྐྱངས་ཏེ།།
ཚོར་བའི་བཙན་ས་བཙལ་ཀྱང་།།
རྒ་ཤིའི་གྲོང་དུ་ལྷུང་འདུག།
འཁོར་བ་རྒྱ་མཚོའི་ཀློང་དུ།།
དུག་གསུམ་རྡོ་བ་བཅངས་ཏེ།།
གཏིང་ནས་གཏིང་དུ་བྱིངས་པས།།
ཐར་བའི་སྐབས་ཤིག་ཨེ་ཡོད།།
རྣམ་དག་ཆོས་ལ་ཞུགས་ཀྱང༌།།
ཆོས་ཀྱི་མེ་ལོང་ངོས་སུ།།
རང་ལ་བྱི་དོར་མེད་པས།།
ཉེས་པའི་ཕུང་པོར་ལྷག་འདུག།
ཚེ་དེ་ཨལ་སྟོང་ཙམ་པོ།།
སྟོང་བསམ་ཆུ་ཡི་གཉེར་མས།།
རྫོགས་མེད་འདི་སྣང་བྱ་བར།།
དེད་ནས་རྫོགས་ཉེན་འདུག་གོ།
༢༠༡༥/༤/༩ ཉིན་རྟོག་འགྱུ་གློ་བུར་བ་ཞིག་གིས་
དྲངས་ཏེ་ཤ་ཟིན་སྤུ་ཟིན་གྱིས་བྲིས།
ཤྲཱིས།
No comments:
Post a Comment