༄༅། །ཞི་གནས་བསྒོམ་ཚུལ་གྱི་མན་ངག་ཏིང་འཛིན་སྒོ་བརྒྱ་འབྱེདཔའི་ལྡེ་མིགཅེས་བྱ་བ་བཞུགས་སོ།།
མཛད་པ་པོ། གུ་གེ་ཡོངས་འཛིན་བློ་བཟང་བསྟན་འཛིན།
ཨོཾ་སྭསྟི། རྣམརྟོག་རླུང་གིས་ནམ་ཡང་མི་གཡོ་ཞིང་།།
མཐའ་བྲལ་ཏིང་འཛིན་བདེ་བ་ཆེན་པོའི་ངང་།།
ཀུན་རྫོབ་ཆོས་ཀུན་གསལ་བར་གཟིགས་པ་ཡི།།
ཐུབ་དབང་ལྷག་པའི་ལྷ་ལ་སྙིང་ནས་འདུད།།
འདིར་ཞི་གནས་སྒེམཚུལ་གྱི་མན་ངག་མདོར་བསྡུས་བརྗོད་པར་བྱ་སྟེ། དེ་ཡང་མདོ་སྡེ་རྒྱན་ལས།
བློ་ལྡན་གང་དུ་སྒྲུབ་པའི་ཡུལ།།
ལེགས་པར་རྙེད་དང་གནས་བཟང་དང་།།
ས་བཟང་བ་དང་གྲོགས་བཟང་དང༌།།
རྣལ་འབྱོར་བདེ་བའི་ཡོ་བྱད་ལྡན།།
ཞེས་པ་ལྟར་གྱི་མཚན་ཉིད་ལྔ་དང་ལྡན་པའི་གནས་སུ། འདོད་ཆུང་ཆོག་ཤེས་ལ་གནས་ཏེ། སྐར་རྩིས་སོགས་བྱ་བ་མང་པོ་ལ་མི་འཇུག་ཅིང༌། ཁས་བླངས་པའི་ཚུལ་ཁྲིམས་༼༢ན༽རྣམ་པར་དག་པ་དང་། འདོད་ཡོན་ལ་ཉེས་དམིགས་སུ་བལྟ་བ་སོགས། ཞི་གནས་སྒྲུབ་པའི་ཚོ གས་དྲུག་དང་ལྡན་པ་ཞིག་ངེས་པར་དགོས་ཏེ། ཇོ་བོ་ཆེན་པོས།
ཞི་གནས་ཡན་ལག་རྣམ་བྲལ་བས།།
རབ་ཏུ་འབད་དེ་གོམས་བྱས་ཀྱང༌།།
ལོ་ནི་སྟོང་ཕྲག་དག་གིས་ཀྱང་།།
ཏིང་འཛིན་འགྲུབ་པར་མི་འགྱུར་རོ།།
ཞེས་གསུངས་པས་སོ།།
གང་གིས་སྒོམ་པའི་རྟེན་གྱི་གང་ཟག་ནི། དུག་གསུམ་ཤས་ཆེ་བ་དག་གིས། འདོད་ཆགས་ཀྱི་གཉེན་པོར་མི་སྡུག་པ་བསྒོམ་པ་སོགས། དཔྱད་པརྣམ་སྦྱོང་གི་དམིགས་པ་ལ་ངེས་པར་བསྟེན་དགོས་ཏེ། གང་ཟག་དེས་དཔྱད་པ་རྣམ་སྦྱོང་གི་དམིགས་པ་བསྟེན་ཀྱང་། དུས་ཡུན་རིང་པེ་དང་ཚེགས་ཆེན་པོས་མ་གཏོགས་ཏིང་ངེ་འཛིན་མི་འགྲུབ་པར་གསུངས་པས་ན། དཔྱད་པ་རྣམ་སྦྱོང་གི་དམིགས་པ་དོར་ན་ཏིང་ངེ་འཛིན་མི་འགྲུབ་པ་ལྟ་སྨོས་ཀྱང་ཅི་དགོས། དུག་གསུམ་ཆ་མཉམ་པ་དང་ཤས་ཆུང་བའི་གང་ཟག་གིས་༼༢བ༽ལྷ་སྐུ་ལ་དམིགས་ཏེ་བསྒོམ་ན། ཏིང་ངེ་འཛིན་སྒྲུབ་པའི་ཞར་ལ་སྔགས་ཀྱི་ལྷའི་རྣལ་འབྱོར་བསྒོམ་པའི་བག་ཆགས་འཇོག་པ་སོགས་དགོསཔ་ཁྱད་པར་ཅན་དུ་མ་ཡོད་པས།
དེའི་ཚུལནི། བཤེས་གཉེན་བསྟེན་ཚུལ་ནས་སྤྱོད་པ་སྤྱི་བསླབས་ཀྱི་བར་རྣམས་མ་མཐའ་ཤར་བསྒོམ་གྱིས་ཉམས་སུ་བླངས་ཏེ། དངོས་གཞིའི་དམིགས་པནི། ལུས་རྣམ་སྣང་གི་ཆོས་བདུན་ལྡན་དུ་འཁོད་དེ། དབུགས་ཕྱིནང་དུ་རྒྱུ་བ་ཉེར་གཅིག་ཙམ་བགྲང་བ་སེམས་ཕྱི་རོལ་དུ་གཡེང་བ་བཟློག་པའི་ཐབས་ཡིན། དེ་ནས་རང་གི་ལྟེ་བའི་ཐད་ཙམ་གྱི་མདུནགྱི་ནམ་མཁར་ངོ་བོ་རང་གི་དྲིན་ཅན་རྩ་བའི་བླ་མ་ཡིན་པ་ལ། རྣམ་པ་ཐུབ་དབང་རྡོ་རྗེའཆང་སྐུ་མདོག་གསེར་བཙོམ་ལྟ་བུ་ཞལགཅིག་ཕྱག་གཉིས་གཡས་ས་གནོན་དང་། གཡོན་མཉམ་བཞག་གི་སྟེང་ན་བདུད་རྩིས་གང་བའི་ལྷུང་བཟེད་བསྣམས་པ། དབུ་གཙུག་ཏོར་དང་ལྡན་པ། མཚན་དང་དཔེ་བྱད་ཀྱིས་སྤྲས་པ།སྣང་ལ་རང་བཞིན་མེད་པ་ནམ་མཁའི་འཇའ་ཚོན་ལྟ་བུ་མཚོན་གང་ཚད་ཙམ་མམ་རྒྱ་སྲན་གྱི་འབྲུ་ཚད་ཙམ་ཞིག་གསལ་བཏབ་ལ། ཐོག་མར་དབུ། ཕྱག་གཉིས། སྐུའི་ཁ་དོག །ཞབས་གཉིས། པད་ཟླའི་གདན་རྣམས་ལ་ལན་འགའ་རེ་སེམས་བཟུང་། མཐར་སྐུའི་སྤྱི་ཙམ་ཡིད་ཡུལ་དུ་བྱས་ཏེ། དེའི་༼༣ན༽ཚེ་ཡིད་ངོར་ཡན་ལག་རགས་པ་ཆ་ཕྱེད་ཙམ་ཤར་བྱུང་ན། དེ་ཙམ་གྱིས་ཆོག་ཤེས་བྱས་ནས་སེམས་འཛིན་དགོས་ཏེ། དེ་ལྟར་བྱས་ན་སེམས་གནས་ཀྱི་ཏིང་ངེ་འཛིན་མྱུར་དུ་རྙེད་ཅིང་། གནས་ཆ་རྙེད་ནས་གསལ་བའི་བོགས་བཏོན་པས། གསལ་ཆ་བདེ་བླག་ཏུ་འགྲུབ་པར་འགྱུར་གྱི། དང་པོ་ནས་སངས་རྒྱས་དངོས་ཀྱི་རྣམ་པ་དང་། སྤྱན་གྱིདཀར་ནག་ཚུན་ཆདམ་འདྲེས་པར་འོང་དུ་རེ་ནས་ཤ་ཐང་ཐང་དུ་བྱས་ཚེ། དམིགས་རྟེན་ཅུང་ཟད་གསལ་དུ་འགྲོ་ན་ཡང་། སེམས་གནས་ཀྱི་ཏིང་ངེའཛིནརྙེད་དཀའ་བས། མཚམས་ཟིན་པར་བྱསཏེ། འདི་ལྟརསེམས་དམིགས་པ་ལ་གཏད་དོ་སྙམ་པ་ཞིག་བྱས་ལ། གསར་དུ་གཞན་གང་ལའང་མི་དཔྱོད་པར། དམིགས་རྟེན་དེ་ཉིད་ལ་རྩེ་གཅིག་ཏུ་དམིགས་ནས་བསྒོམ། དེའི་ཚེ་སྐུའི་ཆ་ཤས་འགའ་ཞིག་གསལ་བར་སྣང་ན་་དེ་ལ་དམིགསནས་བསྒོམ། དེ་ཡལ་སོང་ན་སྐུའི་སྤྱི་ལ་དམིགསནས་བསྒོམ། དེ་ཡང་སེར་པོ་སྒོམ་འདོད་པ་ལ་དམཾར་པོར་འཆར་བ་དང་། གཅིག་སྒོམ་འདོདཔ་ལ་དུ་མ་འཆར་བ་སོགས་ལྡོག་ཕྱོགས་སྣ་ཚོགས་གང་སྣང་ཡང་། དེ་དག་གི་རྗེས་སུ་མི་འབྲང་བར་རྩ་བའི་དམིགས་རྟེན་གྱི་སྟེང་དུ་རྩེ་གཅིག་ཏུ་དམིགས་ནས་བསྒོམ། དེ་ཡང་ཧ་ཅང་སྒྲིམ་དྲགས་ན་བྱིང་བའི་སྐྱོན་མེད་ཀྱང་།༼༣བ༽རྒོད་ཤས་ཆེ་བས་སེམས་གནས་ཆའི་ཏིང་ངེ་འཛིན་རྙེད་དཀའ། ཧ་ཅང་གློད་དྲགས་ན་རྒོད་ཤས་ཆུང་ཡང་བྱིང་བའི་དབང་དུ་འགྲོ་ཉེན་ཆེ་ཞིང་། སྒྲིམ་ལྷོད་རན་པའི་ཚད་ཀྱང་ཤིན་ཏུ་ཟིན་དཀའ་བས་ན། བཤགས་བསྟོད་ལས།
འབད་པས་འཇུག་ན་རྒོད་པ་འཕེལ་འགྱུར་ཞིང་།།
དེ་སྤང་ན་ནིཞུམ་པ་སྐྱེ་བར་འགྱུར།།
འདི་ཡིས་དབུ་མར་འཇུག་པ་རྙེད་དཀའ་ན།།
བདག་གི་སེམས་དཀྲུགས་པ་ནི་ཞིག་བྱ།།
ཞེས་གསུངས་པས་ན། རང་གི་ཉམས་ལ་དཔགས་ཏེ་འདི་ཙམ་དུ་སྒྲིམན་རྒོད་པ་སྐྱེ་བ་འདུག་སྙམ་པ་ལས་ཅུང་ཟད་གློད། འདི་ཙམ་དུ་གློདན་བྱིང་བ་སྐྱེ་བ་འདུག་སྙམ་པ་ལས་ཅུང་ཟད་རིག་པ་འཕངས་བསྟོད་དེ། འདི་ཙམ་འཚམ་པ་འདུག་སྙམ་པའི་ངང་ནས་གནས་ཆ་བཙལ། གནས་ཆ་ནམ་བྱུང་རེས་ཀྱི་བྱིང་ཟོན་ཆེན་པོ་བྱས་ཏེ། དེ་ཉིདརེ་མོས་སུ་སྐྱོང་བཞིན་པའི་ངང་ནས། རྩ་བའི་དམིགས་རྟེན་ཡུན་ཧ་ཅང་མི་རིང་བ་ནས་དྲན་ཙམ་དྲན་ཙམ་བྱེདཔ་ནི། ལས་དང་པོ་པའི་ཏིང་ངེ་འཛིན་སྐྱོང་ལུགསརྣམ་དག་ཡིན་ལ། དེ་ཡང་ཉེས་པ་ལྔ་སྤོང་བ་དང་། འདུ་བྱེད་བརྒྱད་བསྟེན་ཚུལ་མི་ཤེས་ན། ཏིང་ངེ་འཛིན་རྣམ་དག་འགྲུབ་པ་མི་སྲིད་པས།
ཉེས་པ་ལྔནི། ཏིང་ངེ་འཛིན་སྒོམ་པ་ལ་མི་སྤྲོ་ཞིང་། དེའི་མི་མཐུན་ཕྱོགས་རྣམ་གཡེང་སོགས་ལ་དགའ་བའི་ལེ་ལོ། དམིགས་རྟེན་མི་གསལ་ཞིང་གཏོར་བ་ནི་གདམས་ངག་བརྗེད་པ། བྱིང་རྒོད་གཉིས་གཅིག་ཏུ་བྱས་པ་ནི་ཉེས་པ་གསུམ་པ། བྱིང་༼༤ན༽རྒོད་བྱུང་བའི་ཚེ་དེ་སྤོང་བའི་གཉེན་པོ་འདུ་མི་བྱེད་པ་ནི་ཉེས་པ་བཞི་པ། ཕྱིང་རྒོད་དང་བྲལ་བའི་ཚེ་དེ་སྤོང་བའི་གཉེན་པོ་ཧ་ཅང་འདུ་ཆེས་པ་ནི་ཉེས་པ་ལྔ་པ་ཡིན་པས། ཐོག་མར་ཉེས་པ་ལྔ་པོ་འདི་རང་སེམས་སྟེང་ནས་ངོས་ཟིན་པར་བྱསཏེ།
དེ་སྤོང་བའི་གཉེན་པོ་འདུ་བྱེད་བརྒྱད་ནི། ཏིང་ངེ་འཛིན་གྱི་ཡོན་ཏནམཐོང་བའི དད་པ། ཏིང་ངེ་འཛིན་ལ་དོན་གཉེར་གྱི་འདུནཔ། ཏིང་ངེ་འཛིན་ལ་སྩོལ་བའི་བརྩོན་འགྲུས། ཏིང་ངེ་འཛིན་སྒོམ་པའི་འབྲས་བུ་ལུས་སེམས་ཤིན་སྦྱང་གི་བདེ་བ་སྟེ། དེ་བཞིས་ལེ་ལོ་སེལ་པར་བྱེད་དོ།། དེ་དག་གི་གོ་རིམ་ཡང་། དང་པོར་ཏིང་ངེ་འཛིན་གྱི་ཡོན་ཏནནི། ཞི་གནས་ཀྱི་ཏིང་ངེ་འཛིན་རྣམ་དག་ཞིག་འགྲུབ་ཚེ། ཉིན་མཚན་ཀུན་ཏུ་ལུས་སེམས་དགེ་བ་ལ་སྦྱོར་བ་ལ་སྐྱོ་དུབ་མི་འབྱུང་བ་དང༌། བཟླས་བརྗོད་དང་། བྱམས་སྙིང་རྗེ་བྱང་ཆུབ་ཀྱི་སེམས་ལ་སོགས་པ་དགེ་བའི་དམིགས་པ་གང་ལ་སེམས་གཏད་ཀྱང་། ཡུར་བ་བདེ་མོ་ལ་ཆུ་དྲངས་པ་བཞིན་དུ། བྱིང་རྒོད་ཀྱི་དབང་དུ་མི་འགྲོ་བར། གང་དམིགས་པགཏད་པའི་ཡུལ་དེ་ཉིད་ཤིན་ཏུ་གསལ་བ་ཞིག་འོང་བས། དགེ་བ་གང་བྱས་སྟོབས་ཆེ་བ་དང་། ཁྱད་པར་དུ་ཞི་གནས་འགྲུབ་པའི་སྟེང་ནས་གནས་ལུགས་ཀྱི་དོན་གོམས་པས་འཁོར་བ་ལས་མྱུར་དུ་གྲོལ་བ་དང་། སྔགས་བླ་མེད་ཀྱི་ལྷའི་རྣལ་འབྱོར་དང་།རྩ་རླུང་ཐིག་ལེ་སྒོམ་པའི་ཚེ་ན་ཡང༌། ༼༤བ༽དམིགས་རྟེན་སྤོ་བ་ཙམ་ལས་རྩོལ་བ་ཆེན་པོ་མི་དགོས་པར་རླུང་སེམས་འཇུག་པ་གཅིག་པའི་དབང་གིས་གནས་དེར་རླུང་མྱུར་དུ་འདུས་ནས། ཡེ་ཤེས་འཆར་བ་སོགས་ཕན་ཡོན་རྣམས་ཡང་ཡང་བསམ་པ་གལ་ཆེ་སྟེ། འདི་བསམ་ན་ནང་ནས་ཏིང་དེ་འཛིན་སྒོམ་པ་ལ་བསྐུལ་བས་ཏིང་ངེ་འཛིན་ལ་དོན་གཉེར་གྱི་འདུན་པ་སྐྱེ། དེ་ལ་བརྟེན་ནས་ཏིང་ངེ་འཛིན་ལ་རྩོལ་བའི་བརྩོན་འགྲུས་སྐྱེ། དེ་ལ་རྟེན་ནས་ལུས་སེམས་ཤིན་སྦྱང་གི་བདེ་བ་སྐྱེ། དེའི་མཐུས་ལེ་ལོ་གསུམ་ལྷག་མ་མ་ལུས་པར་ལྡོག་ནུས་པ་ཡིན།
གདམས་ངག་བརྗེད་པའི་གཉེན་པོ་དྲན་པསྟེ། དེ་ཡང་ཁྱད་པར་གསུམ་དང་ལྡན་པ་ཞིག་དགོས་པས། དམིགས་པ་ཡུལ་གྱི་ཁྱད་པརནི། སྔརམ་འདྲིས་བའི་དངོས་པོ་ལ་དྲན པམི་འཇུག་པས། དང་པོར་དེ་བཞིན་གཤེགས་པའི་སྐུ་གཟུགས་བཟོ་བཀོད་ཕུན་སུམ་ཚོགས་པ་ཞིག་བཙལ་ལ། དེ་ལ་མིག་གིས་ཡང་དང་ཡང་དུབལྟ་ཞིང་། དེའི་དོན་སྤྱི་བློ་ཡུལ་དུ་གོམས་སུ་བཅུག། རྣམ་པའམ་འཛིན་སྟངས་ཀྱི་ཁྱད་པར་ནི། དམིགས་རྟེན་དེ་ཉིད་མ་བརྗེད་པར་ཐུ་རེ་དྲན་པ་སྟེ་གསལ་ཆའི་ངར་དང་ལྡན་པ། བྱེད་ལས་ཀྱི་ཁྱད་པར། སེམས་དམིགས་པ་ལས་གཡེང་བ་འགོག་པ་སྟེ། ཁྱད་པར་གསུམ་དང་ལྡན་པ་ཞིག་དགོས་སོ།།
ཉེས་པགསུམ་པ་བྱིང་རྒོད་གཉིས་ཀྱི་གཉེན་པོ་ནི་ཤེས་བཞིན་ཏེ། དེ་ཡང་སེམས་དམིགས་པ་ལ་གཏད་ནས་རིང་པོར་མ་ལེན་པའི་ཚེ། ཇི་ལྟར་༼༥ན༽སེམས་དམིགས་པ་ལ་བཞག་པ་བཞིན་གནས་མི་གནས་བྱ་ར་བྱེད་པ་སྟེ། སྤྱོད་འཇུག་ལས།
ལུས་དང་སེམས་ཀྱི་གནས་སྐབས་ལ།།
ཡང་དང་ཡང་དུ་བརྟག་བྱ་སྟེ།།
དེ་འདི་ཁོ་ན་མདོར་ནནི།།
ཤེས་བཞིན་བསྲུང་བའི་མཚན་ཉིད་དོ།།
ཞེས་གསུངས་པ་ལྟར། དྲན་པས་སེམས་དམིགས་པ་ལ་གཏད་པ་དེ་ཉིད། བྱིང་རྒོད་ཀྱི་དབང་དུ་སོང་མ་སོང་བལྟ་ཐོག་བྱེད་པ་སྟེ། དེ་ཡངདམིགས་རྟེནབཏང་ནས་དེ་ལྟར་བྱེད་པ་མ་ཡིན་གྱི། སེམས་བྱིང་པོ་དམིགས་རྟེན་ལ་གནས་བཞིན་པའི་ངང་ནས། བློའི་ཟུར་གཅིག་གིས་བལྟ་རྟོག་བྱེད་པསྟེ། སྤྱོད་འཇུག་ལས།
དྲན་པ་བརྗེད་མེད་གྱུར་པ་ན།།
དེ་ཚེ་ཤེས་བཞིནའོང་འགྱུར་ཏེ།།
ཞེས་གསུངས་པ་ལྟར། རྩ་བའི་སྐྱོང་ཚུལ་དྲན་པ་མ་བརྗེད་པ་གལ་ཆེ་སྟེ། དེ་བྱུང་ན་ཤེས་བཞིན་རང་ཤུགས་ཀྱིས་འོང་བར་གསུངས་སོ།།
འོན། བྱིང་རྒོད་ཀྱི་ཁྱད་པར་ཛིལྟ་བུ་ཡིན་སྙམ་ན། དམིགས་རྟེན་མ་བརྗེད་ཅིང་སེམས་དྭང་བའི་རྣམ་པ་ཙམ་ཡོད་ཀྱང༌། སེམས་ཀྱི་དམིགས་རྟེན་དམ་སྒྲིང་ངེ་འཛིན་པ་དེ་ཅུང་ཟད་ལྷོད་དུ་སོང་བ་ནི་བྱིང་བ་དང༌། སེམས་དམིགས་རྟེན་ལ་ཇི་ལྟར་གཏད་པ་བཞིན་མི་གནས་པར་ཡུལ་ཡིད་དུ་འོང་བ་ལ་འཕྲོ་བ་ནི་རྒོད་པ་དངོས་དང་། ཞེ་སྡང་གི་དབང་གིས་དགྲ་ལ་རྣམ་རྟོག་འཕྲོ་བ་སོགས་རྣམ་གཡེང་གི་རིགས་ཐམས་ཅད་རྒོད་པ་དངོས་མ་ཡིན་ཀྱང་། ཏིང་ངེ་འཛིན་ལ་བར་དུ་གཅོད་བྱེད་འབའ་ཞིག་ཡིན་པས། བསྒོམ་པའི་ཚེ་༼༥བ༽དགག་དགོས་པ་ལ་ཁྱད་པར་མེད་དོ།།
བྱིང་བ་དང་རྨུགས་པའི་ཁྱད་པར་ནི། ལུས་སེམས་ལྕི་ཞིང་ལས་སུ་མི་རུང་བར་བྱེད་པའི་སེམས་བྱུང་མི་དགེ་བ་ཞིག་ལ་རྨུགས་པར་ངོས་འཛིན་དགོས་པས། དེ་ལ་བརྟེན་ནས་སྔར་བཤད་པའི་བྱིང་བ་སྐྱེ་བར་གསུངས་ལ། དེ་གཉིས་རྒྱུ་འབྲས་སུ་འགྲོ་ཚུལ་ཤེས་དགོས་པ་ཡིན་གྱི། བྱིང་རྨུགསཀྱི་དབྱེ་བ་མ་ཕྱེད་པར་གཅིག་ཏུ་བྱས་ཏེ་བྱིང་བ་ཕྲ་མོ་མཆོད་པའི་སེམས་ཀྱི་དྭངས་བྱ་ཙམ་ལ་ཏིང་ངེ་འཛིན་རྣམ་དག་ཏུ་འཁྲུལ་ན། ཡུན་རིང་པོ་ཇི་ཙམ་སྒོམ་ཀྱང་ཞི་གནས་འགྲུབ་པ་མི་སྲིདཔར་གསུངས་སོ།།
ཉེས་པ་ལྔ་པ་འདུ་བྱེད་པའི་གཉེན་པོ་ནི། སེམས་གནས་དགུ་པ་ཐོབ་པའི་ཚེ། བྱིང་རྒོད་ཀྱི་དབལ་ཕྱོགས་པའི་དུས་ཡིན་པས་སེམས་དམིགས་པ་ལ་རང་གི་ངང་གིས་གནས་པ་འབྱུང་བས། དེའི་ཚེ་སེམས་ནང་དུ་འགུག་པ་དང་། འཕངས་བསྟོད་པ་སོགས་སྩོལ་བ་ཆེས་ན། ཏིང་ངེ་འཛིན་གྱི་གེགས་བྱེད་པས་དེའི་ཚེ་གློད་ཤེས་པའི་འདུ་བྱེད་བཏང་སྙོམ་སྒོམ་པ་ནི། ཕྱིང་རྒོད་ཀྱི་གཉེན་པོ་ཧ་ཅང་བསྟེན་དྲགས་པ་དེའི་གཉེན་པོ་ཡིན་ནོ།།
དེ་ལྟར་ཉེས་པ་ལྔ་སྤོང་བ་དང་འདུ་བྱེད་བརྒྱད་བསྟེནཔ་ཉམས་ལེན་སྙིང་པོར་དྲིལ་བ་དེ་ཉིད། གཞན་གྱིས་བཤད་པའི་གོ་བ་དང་ཚིག་བཤད་ཙམ་དུ་མ་སོང་བར་རང་གི་སེམས་སྟེང་ནས་ངོ་འཕྲོད་པ་ཞིག་བྱས་ཏེ། དངོས་གཞི་སྒོམ་པའི་ཚེ་སེམས་དམིགས་རྟེན་ལ་གཏད་ནས་ཡུན་ཧ་ཅང་རིང་པོ་མ་སོང་བར་བློའི་ཟུར་ཞིག་གིས་དམིགས་༼༦ན༽རྟེན་ལ་ཇི་ལྟར་བཞག་པ་ལྟར་གནས་མི་གནས་དང་། མི་གནསཚེ་བྱིང་རྒོད་གང་གི་དབང་དུ་སོང་བརྟག་པ་ན། སེམས་ཀྱི་དམིགས་རྟེན་དམ་སྦྲིང་ངེ་འཛིན་པ་དེ་ཉིད་ཅུང་ཟད་ལྷོད་དུ་སོང༌བ་ན་བྱིང་བ་ཕྲ་མོ་བྱུང་སྙམ་ཤེས་པར་བྱས་ཏེ། སེམས་འཕངས་བསྟོད་ལ་འཛིན་སྟངས་དམ་དུ་གཏོང་། འཛིན་སྟངས་ཀྱི་གསལ་ཆ་ཧད་ཀྱི་ཤོརནས་དམིགས་རྟེན་གསལ་བའི་དྭངས་པ་ཙམ་ལས་མི་འདུག་ན་བྱིང་བ་རགས་པར་ངོ་ཤེས་པར་བྱས་ཏེ་སྔར་བཞིན་དགག །དེ་ཡང་བློ་ཙབ་ཙུབ་ལྟ་བུ་མ་ཡིནཔར། ཁོངས་སྒྲིམས་ལ་ཕྲལ་ལྷོད་ཆགས་པ་ཞིག་དགོས།
དེ་ལྟར་བྱིང་བའི་་གཉེན་པོ་བསྟེན་ཀྱང་ཡང་དང་ཡང་དུ་འོང་བ་དང་་ཡུན་རིང་དུ་འོང་བར་སྣང་་ན་རེ་ཤིག་དམིགས་པ་གློད་ལ། དལ་འབྱོར་ཐོབ་པའི་ཕན་ཡོན་རྗེས་དྲན་དྲུག་ལ་སོགས་པ་ཕན་ཡོན་གྱི་ཕྱོགས་རྣམས་ལ་སེམས་སྤྲོས་ཏེ། སེམས་གཟེངས་བསྟོད་པ་དང་།གདོང་ལ་ཆུ་གྲང་འདེབས་པ་དང་། རྒྱང་རིང་པོ་ལ་བལྟ་བ་དང༌། ཉི་ཟླའི་འོད་ལ་སོགས་པ་སྣང་བའི་མཚན་མ་ཡིད་ལ་བྱས་ན་བྱིང་བ་སེལ་བར་གསུངས། དེས་ཀྱངམ་སེལ་ན་བྱིང་བ་བཙན་ཐབས་སུ་གཅོད་པའི་གདམས་ངག་ནི། རང་གི་ལྟེ་བའི་ཐད་ཙམ་གྱི་ལུས་ཀྱི་ནང་དུ་སེམས་ཀྱི་ངོ་བོ་འོད་ལྕོག་སྒོང་ཙམ་ཞིག་གསལབཏབ་ལ། དེ་ལ་རང་གི་སེམས་ཞུགས་པ་བཞིན་དུ་བྱས་ལ་ཅུང་ཟད་མཉམ་པར་བཞག །ངག་ནས་ ཕཊ་༼༦བ༽འདོན་པ་དང་དུས་མཉམ་དུ་སེམས་ཀྱི་ངོ་བོ་འོད་དཀར་པོ་དེ་ཉིད་སྤྱི་བོ་ནས་རྒྱངས་ཏེ་ཐོན། ནམམཁའི་དབྱིངས་མཐོན་པོར་སླེབས་པན། ནམ་མཁའ་མཐའ་དབུས་ཐམས་ཅད་དང་བྲལ་བ་དང་རང་སེམས་དབྱེར་མི་ཕྱེད་པ་ནམ་མཁས་གར་ཁྱབ་དུ་སེམསཀྱིས་ཁྱབ་པར་བསམ་ལ་ཡུན་རིང་དུ་མཉམ་པར་བཞག །སླར་ཡང་སྔར་བཞིན་རླུང་སེམས་ནམ་མཁའདང་བསྲེ་བའི་གདམས་ངག་དེ་ཉིད་ཡང་ཡང་བསྒོམ་པས་བྱིང་བ་སེལ་བར་གསུངས།
སེམས་དམིགས་རྟེན་ལ་རྩེ་གཅིག་ཏུ་མི་གནས་པར་གཞན་དུ་འཕྲོ་ཚད་པ་བྱུང་ན་རྒོད་པ་ཕྲ་མོ་དང་། ཡུལ་གཞན་གྱི་རྣམ་པ་ཧད་ཀྱི་ཤར་ན། རྒོད་པ་རགས་པར་ངོ་ཤེས་པར་བྱས་ཏེ་སེམས་དམིགས་རྟེན་ལ་གླན། དེ་ལྟར་བྱས་ཀྱང་མ་སེལ་ན། འཆི་བ་མི་རྟག་པ། ངན་འགྲོའི་སྡུག་བསྔལ་བསམ་པ་སོགས་སྐྱོ་ཤས་དྲག་པོ་བསྒོམ། དེས་ཀྱངམ་སེལ་ན། རྒོད་པ་བཙན་ཐབསསུ་གཅོད་པའི་གདམས་པ་བྱ་སྟེ། དབུགས་ཕྱིནང་དུ་རྒྱུ་བ་ལྔ་ཙམ་ཞིག་བགྲང་། དེ་རྗེས་སྣ་བུག་གཉིས་ནས་རླུང་ཁ་དོག་དཀར་པོ་ཞིག་ནང་དུ་རྔུབ་སྟེ་ལྟེ་འོག་སོར་བཞི་ཙམ་དུ་མནན། འོག་སྒོ་གཉིས་ཚུམས་བྱེད་པདང་མཉམ་དུ་འོག་རླུང་སེར་པོ་གྱེན་དུ་དྲངས་ཏེ། ལྟེ་བར་རླུང་ཁ་སྦྱར་བཟུང་སྟེ། དབུགས་ཕྱིར་མ་བཏང་པ་ཅིནུས་སུ་འཛིན། ཡང་དབུགས་འབྱུང་རྔུབ་ལན་བདུན་ཙམ་བགྲངས། དེ་ནས་སྔར་བཞིན་རླུང་ཁ་སྦྱར་དུ་འཛིན། དེ་བཞིན་དུ་༼༧ན༽དབུགས་བཅུ་གཅིག།། བཅུ་གསུམ་དང་། བཅོ་ལྔ་ཙམ་རེ་བགྲང་བ་དང་རླུང་ཁ་སྦྱར་དུ་འཛིན་པ་རེ་མོས་སུ་བྱས་ཏེ་བསྐྱང་ན། རྒོད་པ་བཙན་ཐབས་སུ་གཅོད་ནུས་པར་གསུངས།
དེ་ལྟ་བུའི་ཚུལགྱིས་བྱིང་རྒོད་གཅོད་ཚུལ་ལ་མཁས་པར་བྱས་ཏེ། བརྩོན་འགྲུས་ཆེན་པོའི་སྒོ་ནས་ཉམས་སུ་བླངས་པས་སེམས་གནས་དགུ་རིམ་གྱིས་འགྲུབ་སྟེ། དགུ་པོ་དེ་སྟོབས་དྲུག་གིས་འགྲུབ་ལུགས་དང་། དེ་ཡིད་བྱེད་བཞིར་ཡོད་ཚུལ་རྣམས་ཤེས་དགོས་པས། སྟོབས་དང་པོ་ཐོས་པའི་སྟོབས་ཀྱིས། སེམས་གནས་དང་པོ་ནང་དུ་འཇོག་པ། སྟོབས་གཉིས་པ་བསམ་པའི་སྟོབས་ཀྱིས། སེམས་གནས་གཉིས་པ་རྒྱུན་དུ་འཇོག་པ། སྟོབས་གསུམ་པ་དྲན་པའི་སྟོབས་ཀྱིས། སེམས་གནས་གསུམ་པ་གླན་ཏེ་འཇོག་པ་དང་བཞི་པ་ཉེ་བར་འཇོག་པ། སྟོབས་བཞི་པ་ཤེས་བཞིན་གྱི་སྟོབས་ཀྱིས། སེམས་གནས་ལྔ་པ་དུལ་བར་བྱེདཔ་དང་དྲུག་པ་ཞི་བར་བྱེད་པ་གཉིས། སྟོབས་ལྔ་པ་བརྩོན་འགྲུས་ཀྱི་སྟོབས་ཀྱིས། སེམས་གནས་བདུན་པ་རྣམ་པར་ཞི་བར་བྱེད་པ་དང༌བརྒྱད་པ་རྩེ་གཅིག་ཏུ་བྱེད་པ་གཉིས། སྟོབས་དྲུག་པ་ཡོངས་སུ་དག་པའི་སྟོབསཀྱིས། སེམས་གནས་དགུ་པ་མཉམ་པར་འཇོག་པའི་སེམས་རྣམས་རིམ་པ་བཞིན་དུ་འགྲུབཅིང་།
དེ་ལ་ཡིད་བྱེད་བཞིར་ཡོདཚུལ་ནི། སེམས་གནསདང་བོ་གཉིས་ཀྱི་ཚེ། བྱིང་རྒོད་ཆེས་མང་ཞིང་༼༧བ༽ཏིང་ངེ་འཛིན་ཉུང་ཤས་ལས་མེད་པས། ཡིད་བྱེད་བཞིའི་ནང་གི་དང་པོ་སྒྲིམ་སྟེ་འཇུག་པའི་ཡིད་བྱེད། བར་པ་ལྔའི་སྐབས་སུ། ཏིང་ངེ་འཛིན་ཆེས་མང་ཞིང་དེའི་བར་བར་དུ་བྱིང་རྒོད་ཀྱིས་ཡང་ཡང་གཅོད་པར་བྱེད་པས་ན། ཡིད་བྱེད་བཞིའི་ནང་གི་གཉིས་པ་སྐབས་སུ་ཆད་ཅིང་འཇུག་པའི་ཡིད་བྱེད། སེམས་གནས་བརྒྱད་པའི་སྐབས་སུ་བྱིང་རྒོད་ཀྱིས་བར་དུ་གཅོད་མི་ནུས་པས་ན། ཡིད་བྱེད་བཞིའི་ནང་གི་གསུམ་པ་སྐབས་སུ་ཆད་བ་མེད་པར་འཇུག་པའི་ཡིད་བྱེད། སེམས་གནས་དགུ་པའི་སྐབས་སུ་རྩོལ་བ་ལ་མ་ལྟོས་པར་སེམས་དམིགས་རྟེན་ལ་རང་གི་ངང་གིས་གནས་པས་ན་ཡིད་བྱེད་བཞིའི་ནང་གི་བཞི་པ་ལྷུན་གྱིས་གྲུབ་པའི་ཡིད་ཁྱེད་རྣམས་རིམ་གྱིས་འགྲུབ་པ་ཡིན།
སེམས་གནས་དགུའི་སྐབས་སུ་ཉམས་ལྔ་འཆར་ཚུལ་ནི། ༡ སེམས་གནས་དང་པོའི་སྐབས་སུ་རྣམ་རྟོག་རི་གཟར་གྱི་འབབ་ཆུ་ལྟར་འབྱུང་བའི་ཉམས་འཆར། ༢ སེམས་གཞས་གཉིས་པའི་སྐོབས་སུ། རེས་རྣམ་རྟོག་རྒྱུན་ཆད་ཅིང་རེས་ཐོལ་ལེར་སྐྱེ་བའི་རྣམརྟོག་ངལ་གསོ་བའི་ཉམས་འཆར། ༣ སེམས་གནས་གསུམ་པའི་སྐབས་སུ། ལུང་པ་ཕུ་གསུམ་གྱི་རྫིང་བུ་ལྟར་འགལ་རྐྱེན་གྱིས་མ་དཀྲུགས་པའི་ཚེ་སེམས་གོམས་པའི་ཉམས་བྱེད་ལ། རྐྱེན་ཅུང་ཟད་བྱུང་ཚེ་མི་གནས་པའི་རྣམ་རྟོག་ཐང་ཆད་པའི་ཉམས་འཆར། ༤ སེམས་གནས་བརྒྱད་༼༨ན༽པའི་ཚེ་རྒྱ་མཚོ་རླབས་དང་བཅས་པ་ལྟར། རྐྱེན་བྱུང་ཡང་གཉེན་པོ་དྲན་འཛིན་ཉུང་ཟད་བརྟན་པ་ཙམ་གྱིས་རང་ཡལ་དུ་ཞི་འགྲོ་བའི་ཉམས་འཆར། ༥ སེམས་གནས་དགུ་པའི་ཚེ་རྩོལ་ལ་མ་ལྟོས་པར་སེམས་དམིགས་རྟེན་ལ་རང་གི་ངང་གིས་གནས་པས་རྒྱ་མཚོ་རླབས་དང་བྲལ་བ་ལྟ་བུའི་ཉམས་འཆར།
དེ་ལྟར་སེམས་གནས་དགུ་པ་ཐོབ་ན་འདོད་སེམས་རྩེ་གཅིག་པའམ། ཞི་གནས་རྗེས་མཐུན་པ་ཐོབ་པ་ཡིན་པས། འདིའི་ཚེ་བྱིང་རྒོད་ཀྱི་བཟོན་བྱེད་པའི་རྩོལ་བ་མི་དགོས་ཤིང་། བྱས་ན་ཏིང་ངེ་འཛིན་གྱི་གེགས་སུ་འགྱུར་བས་གློད་རབ་ལ་སྒོམ་རབ་ཅེས་གསུངས་པ་ཡིན་ནོ།། དེ་ལྟར་སེམས་གནས་དགུ་པ་ཐོབ་པའི་གང་ཟག་དེས་དམིགས་པའི་རྟེན་ལྷ་སྐུ་ལྟ་བུ་ཡིན་ན། དེ་ཉིད་ཀྱི་སྤྱན་གྱི་དཀརནག་ཚུན་ཆད་མ་འདྲེས་པར་ཡིད་ངོར་ཤར་ཏེ།དམིགས་རྟེན་དེའི་རྡུལ་ཕྲ་རབ་ཚུན་ཆད་བགྲང་ནུས་སམ་སྙམ་པའི་གསལ་ཆ་དང་། ཤེལ་གྱི་སྣོད་དྭངས་པའི་ནང་དུ་ཆུ་དྭངས་པ་བླུག་པ་ལ། ཉི་མའི་འོད་ཟེར་ཕོག་པ་ལྟ་བུའི་དྭངས་མ་ཡིད་ངོར་ཤར་ནས། དེ་ཉིད་ཀྱི་ངང་ཅི་ཙམ་འདོད་ཀྱི་བརདུ་སེམས་གནས་པ་འབྱུང་བ་ཡིནནོ།།
དེ་ལྟར་སྒོམ་པས་ཞི་གནས་དངོས་འགྲུབ་པའི་མཆན་མ་ན། ཏིང་ངེ་འཛིན་སྒོམ་པའི་གང་ཟག་དེ་ཀླད་པ་ལྕི་བེམ་བྱེད་པའི་རྣམ་པ་འཆར་ཞིང༌། དེ་ཡང་མི་བདེ་བའི་རྣམ་པ་མ་ཡིན་པར་༼༨བ༽བདེ་ཉམས་དང་བཅསཏེ་འཆར་ཞིང་། དེ་ནས་རིང་པོར་མི་ཐོགས་པར་སེམས་དགེ་བའི་དམིགས་པ་ལ་ཇི་ལྟར་འདོད་འདོད་དུ་བཀོལ་དུ་མིརུང་བའི་གནས་ངན་ལེན་ཞི་ནས་སེམས་ཤིན་སྦྱངས་རྗེས་མཐུན་པ་སྐྱེ། དེ་རྗེས་ལས་རུང་གི་རླུང་ལུས་ལ་རྒྱུ་བའི་མཐུས། ཤིང་བལ་ལྟར་ཡང་བའི་ལུས་ཤིན་སྦྱངས་སྐྱེ། དེ་ལ་བརྟེན་ནས་ཡིད་བདེ་ཉམསཀྱི་སེམས་ཤིན་སྦྱངས་སྐྱེ། དེ་ཡང་ལུས་ཤིན་སྦྱངས་སྐྱེས་པའི་དེ་མ་ཐག་དགའ་གཡེང་གཡེང་བ་བྱུང་བ་དེའི་ཚེ་ཞི་གནས་དངོས་འགྲུབ་པ་མིན་ཅིང་། དགའ་གཡེང་བ་དེ་ཞི་ནས་ཏིང་ངེ་འཛིན་དང་རྗེས་སུ་མཐུན་པའི་ཤིན་སྦྱངས་ཐོབ་པ་དང་དུས་མཉམ་དུ་ཞི་གནས་དངོས་དང་བསམ་གཏན་དང་པོའི་ཉེར་བསྡོགས་ཐོབ་པ་དུས་མཉམ་ཞིང༌། མཉམ་པརབཞག་པའི་ས་དང་པོར་ཐོབ་པ་ཡིན།
དེ་ལྟརཞི་བགཞས་ཀྱི ཏིང་ངེ་འཛིན་དེ་ནི་ཕྱི་རོལ་པ་རྣམས་དང་ཡང་ཐུན་མོང་བའི་ཏིང་ངེ་འཛིནཡིན་པས། བསམ་གཏནདང་པོའི་ཉེར་བསྡོགས་དེ་ཐོབ་པའི་སྟེང་ནས་དངོས་གཞི་སྒྲུབ་པ་སོགས་འཇིག་རྟེན་པའི་ལམ་གྱི་བགྲོད་པའི་རྩོལ་བ་བཞག་སྟེ། བདག་མེད་གཉིས་ཀྱི་དོན་ལ་སོ་སོར་དཔྱད་དེ་འཇིག་རྟེན་ལས་འདས་པའི་ལམ་གྱི་སྒོ་ནས་རྣམ་པ་ཐམས་ཅདམཁྱེན་པའི་སར་བགྲོད་པར་བྱའོ།།
སྔར་བཤད་པའི་ཡོན་ཏན་ཐམས་ཅད་ཀྱི་གཞི་རྟེན་དུ་གྱུར་པའི་ཞི་གནས་ཀྱི་ཏིང་ངེ་འཛིན་དེ་ལྟ་བུ་འགྲུབ་༼༩ན༽པ་ལ་དུས་ཡུན་ཇི་ཙམ་གྱི་བར་དུ་སྒོམ་དགོས་སྙམན། པཎཆེན་ཐམསཅད་མཁྱེན་པ་རྗེ་བཙུན་བློ་བཟང་དཔལ་ལྡན་ཡེ་ཤེས་དཔལ་བཟང་པོས། དུག་གསུམ་ཤས་ཆུང་བའམ་མཉམ་པའི་གང་ཟག་གིས་ཞི་གནས་ཀྱི་ཚོགས་དྲུག་སོགས་ལ་གནས་ཏེ། སྙིང་རུས་ཆེན་པོའི་སྒོ་ནས་ཞི་གནས་འགྲུབ་པའི་དུས་ལ་ཟླ་བ་བཞི་ལས་ཡུན་རིང་བ་མ་བཤད། ཅེས་གསུངས་པ་ལྟརཡིན། དེ་ཡང་སློབ་དཔོན་ཙནྡྲ་གོ་མིས།
རྒྱུན་མི་འཆད་པའི་རྣལ་འབྱོར་གྱིས།།
བསམ་གཏན་སྒོམ་ལ་བརྩོན་པར་བྱ།།
ཡང་དང་ཡང་ཞིང་ངལ་གསོ་ན།།
གཙུབ་ཤིང་མེ་བྱིན་མི་འགྱུར་ལྟར།།
རྣལ་འབྱོར་ཚུལ་ཡང་ད་བཞིན་དུ།།
ཁྱད་པར་མ་ཐོབ་བཏང་མི་བྱ།།
ཞེས་གསུངས་པ་ལྟར། ཏིང་ངེ་འཛིན་ཐོག་མ་བསྒོམ་པ་ནས་བཟུང་སྟེ། བྱ་བ་གཞན་གྱིས་བར་མ་ཆོད་པར་ཏིང་ངེ་འཛིན་སྒོམ་ཚུལ་མཁས་པར་བྱས་ཏེ། འདོད་པའི་ཡུལ་ཧ་ཅང་བསྟེན་དྲག་པ་དང་། དུས་མཡིན་པའི་གཉིད་ལ་སོགས་པ་སྤངས་ཏེ། ཉིན་མཚན་ཁོར་ཡུག་ཏུ་བསྒོམ་ན། ཟླ་བ་བཞི་ཙམ་གྱི་ཡུན་ལ་ཏིང་ངེ་འཛིན་རྣམ་དག་འགྲུབ་པ་ལ་དགོངས་པ་ཡིན་གྱི། གཙུབ་ཤིང་དང་གཙུབ་སྟན་ ་ ་
གཉིས་བསྲུབ་པ་ལས་དྲོད་སྐྱེཙམ་ནས་ངལ་གསོ། སླར་ཡངབསྲུབ་པ་ལྟ་བུས་དུས་ཡུན་རིང་པོ་ཇི་ཙམ་དུ་འབད་ཀྱང་མེའབྱུང་བམི་སྲིད་པ་བཞིན་དུ། ཐོག་མར་ཏིང་ངེ་འཛིན་བསྒོམས་ནས་སེམས་ཀྱི་གནས་ཆ་༼༩བ༽དང་གསལ་ཆ་ཅུང་ཟད་སྐྱེས་པ་ན། ཆོས་ལྡན་གྱི་བྱ་བ་གཞནནམ་ཚེ་འདིའི་འདོད་པ་བསྒྲུབ་པའི་བྱ་བ་གཞན་གྱིས་བར་བཅད་དེ། སླར་ཡང་སྒོམ་པ་ལྟ་བུ་དུས་སྔ་ཕྱི་རྣམས་བསྡོམས་པས་ལོ་མང་པོ་སོང་ཡང་ཞི་གནས་ཀྱི་ཏིང་ངེ་འཛིན་འགྲུབ་པ་མིསྲིད་པས། སྙིང་ཐག་པ་ནས་ཏིང་ངེ་འཛིན་བསྒྲུབ་པ་འདོད་པ་ཡིན་ན། ཚེ་འདིའི་འདུན་མ་ཐམས་ཅད་ཕར་རྒྱབ་ཏུ་བསྐྱུར་ཏེ། དབེན་པའི་གནས་སུ་བསྒྲུབ་པ་ལ་རྩེ་་གཅིབ་ཏུ་བརྩོན་པར་བྱའོ།།
སྨྲས་པ། ཤིན་སྦྱངས་བདེ་བས་ལུས་སེམས་ཀུན་ལ་ཁྱབ།།
བྱ་བ་ཅི་བྱེད་དགེ་བའི་ཆོས་སུ་བསྒྱུར།།
ཡོན་ཏན་ཀུན་གྱི་གཞི་རྟེན་ཏིང་ངེ་འཛིན།།
ལུས་སྲོག་འདོར་ཀྱང་བསྒྲུབ་པར་ཅིས་མི་རིགས།།
འདི་ནང་ཆོས་རྣམས་དོན་མེད་མཐོང་བའི་བློས།།
གཏན་བདེའི་རྩ་བ་རྣམ་དག་ཏིང་ངེ་འཛིན།།
བསྒྲུབ་ལ་ཕྱི་བཤོལ་ལེ་ལོ་རབ་སྤངས་ཏེ།།
རང་ལ་བརྩོན་པའི་ལྕགས་ཀྱིས་བྲབ་ཀྱང་རིགས།།
དགེ་འདིས་འགྲོ་ཀུན་རྣམ་གཡེང་རབ་སྤངས་ཏེ།།
རྣམ་ཤེས་ཅང་ཤེས་ཁ་ལོ་གྱེན་དུ་བསྒྱུར།།
འབད་བརྩོན་དྲག་པོའི་ལྕགས་ཀྱིས་རབ་བསྐུལ་ཏེ།།
ཐར་པའི་ལམ་ལ་དཀྱུས་ཐག་སྤྱོད་པར་ཤོག།
ཅེས་པ་འདི་ཡང་བྱང་ཕྱོགས་བསྟན་པའི་གསལ་བྱེད་ཨ་རུ་ཧོར་ཆེན་སྤྲུལ་པའི་སྐུ་བློ བཟང་སྙན་གྲགས་ནས། ལམརིམ་འཇམ་དཔལ་ཞལ་ལུང་གི་བཤད་ལུང་གསན་སྐབས། ཞི་གནས་སྐོར་ལ་བཤད་པ་རྒྱས་པ་ཞིག་དགོས་ཚུལ་དང་། དེ་ཉིད་ཀྱི་སྙིང་པོ་བསྡུས་པ་ཡི་གེར་འཁོད་པ་ཞིག་དགོས་ཞེས་བསྐུལ་བ་ལྟར། ྋཤཱཀྱའི་དགེ་སློང་གདོང་དྲུག་འགྲུབ་པའི་རྡོ་རྗེས་་ལྷ་ལྡན་སྤྲུལ་པའི་གཙུག་ལག་ཁང་དུ་སྦྱར་བའོ།། །།
No comments:
Post a Comment