༄༅། །མེ་ལྷ་དྲང་སྲོང་གང་དུ་ཡོད་བརྟགས་པ་ནོར་བུའི་འོད་སྣང་ཞེས་བྱ་བ་བཞུགས་སོ།།
༄༅། །ན་མོ་གུ་རུ་བྷྱ། མེ་ལྷ་ཡོད་མེད་ཀྱི་སྒོ་ནས་སྦྱིན་སྲེག་འབུལ་རུང་མི་རུང་བརྟག་ཚུལ་ནི། དེ་ཡང་ཇི་སྐད་དུ།
བསྲེགས་བླུག་བྱེད་པར་འདོད་པ་ན།།
མེ་ལྷ་དྲང་སྲོང་ས་གསུམ་དུ།།
གང་བཞུགས་བརྩད་པར་བྱ་དགོས་པས།།
གང་བརྩིས་ཉིན་གྱི་ཉིན་གྲངས་ལ།།
དེ་ཡི་རེས་གཟའི་གྲངས་ཀྱང་བསྲེས།།
དེ་སྟིང་གཅིག་སྣོན་བཞིར་བགོས་པས།།
གསུམ་དང་ཐིག་ཤར་ས་སྟེང་གནས།།
བསྲེགས་བླུག་བྱེད་ན་ཕན་ཡོན་ཐོབ།།
གཉིས་ཤར་ས་འོག་ལ་གནས་པས།།
སྦྱིན་བསྲེགས་བསྲེག་བླུག་བྱ་མི་རུང་།།
གཅིག་ཤར་སུམ་ཅུ་རྩ་གསུམ་གནས།།
དེ་ཡང་བསྲེག་བླུག་མི་རུང་ངོ་།།
ཞེས་པ་ལྟར། ཚེས་ཆད་ལྷག་ཡོད་མེད་ལ་མ་ལྟོས་པར་ཚེས་ཤར་ནས་བརྩིས་ཏེ་སྦྱིན་སྲེག་བྱ་འདོད་པའི་ཚེས་ཀྱི་བར་ཉིན་གྲངས་ཇི་ཡོད་ཀྱི་སྟེང་དུ། རེས་གཟའ་ཉི་མ་ལ་གཅིག་བརྩི་བ་ནས་སྤེན་པ་ལ་བདུན་བརྩི་བའི་བར་རེས་གཟའ་སོ་སོའི་གྲངས་བཞིན། དེ་ཉིན་རེས་གཟའ་གང་འཁེལ་བའི་རེས་གཟའི་གྲངས་ཀྱང་བསྣན་ཞིང་། དེའི་སྟེང་ཐོལ་པ་གཅིག་ཀྱང་བསྣན་ནས་ཁྱོན་བསྡོམས་གྲངས་ཇི་ཡོད་དུམ་བུ་བཞིར་བགོས་པས། ལྷག་མ་མ་ལུས་པས་ཐིག་གམ། གཅིག་གམ་གཉིས་སམ་གསུམ་ལྷག་པ་གང་རུང་དུ་འགྱུར་ལ། ཐིག་གམ་གསུམ་ལྷག་ན་དེའི་ཉིན་སྦྱིན་སྲེག་རུང་ཞིང་ཕན་ཡོན་འཐོབ། གཅིག་ལྷག་ན་མེ་ལྷ་དྲང་སྲོང་ས་བླ་སུམ་ཅུ་རྩ་གསུམ་དུ་བཞུགས་པས་སྦྱིན་སྲེག་མི་རུང་བ་དང་། གཉིས་ལྷག་ནའང་མེ་ལྷ་དྲང་སྲོང་ས་འོག་ན་བཞུགས་པས་སྦྱིན་སྲེག་མི་རུང་ངོ་།། བགོས་པ་ན། གྲངས་ལ་ཕྱེད་བགོས་མི་བྱ་བའི་ཚུལ་ཡང་ངེས་དགོས་སོ།།
ད་ནི་གོང་དུ་བཤད་པ་རྣམས་ངེས་པར་བྱས་ནས་ཚེས་གྲངས་དང་གཟའ་གྲངས་འགའ་ཞིག་ལ་སྦྱར་ནས་སྦྱོང་བརྡར་གྱི་ཚུལ་དུ་དངོས་སུ་བརྩི་བར་བྱ་སྟེ། བོད་ཟླ་ལྔ་པའི་ཚེས་གཅིག་ཉིན་བསྲེགས་བླུག་བྱ་འདོད་ན། ཚེས་གཅིག་ཡིན་པས་གཅིག་གཏང་། དེའི་ཉིན་རེས་གཟའ་ཉི་མ་ཡིན་ན། ཉི་མ་ནི་གཟའི་ཐོག་མ་ཡིན་པས་གཅིག་གཏང་། དེའི་སྟེང་ཐོལ་པ་གཅིག་བསྣན་པས། གྲངས་གསུམ་དུ་གྱུར་ལ། དེ་དག་བཞིར་བགོས་་ན་གཅིག་ཀྱང་མ་ལུས་པས་ཐིག་ཡིན། ཐིག་ནི་ཐིག་ལེ་སྟེ་ཀླད་ཀོར་གྱི་དོན་ཡིན་པས་དེ་ཤར་ན། མེ་ལྷ་དྲང་སྲོང་ས་སྟེང་དུ་བཞུགས་ཡོད་པས། སྦྱིན་སྲེག་འབུལ་རུང་ཞིང་། ཕན་ཡོན་བསམ་གྱིས་མི་ཁྱབ་པ་ཐོབ་བོ།། ༈ ཡང་ཚེས་གཅིག་ཉིན་རེས་གཟའ་ཟླ་བ་ཡིན་ན། ཚེས་གཅིག་ལ་གཅིག་དང་རེས་གཟའ་ཟླ་བར་གཉིས་གཏང་། ཐོལ་པ་གཅིག་བསྣན་པས་གྲངས་བཞིར་འགྱུར་ལ། དེ་དག་བཞིར་བགོས་ནའང་ཐིག་ཤར་བས་སྦྱིན་སྲེག་འབུལ་རུང་ཞིང་ཕན་ཡོན་འཐོབ། ༈ ཡང་ཚེས་གཅིག་དང་གཟའ་མིག་དམར་ཡིན་ན། ཚེས་གཅིག་ལ་གཅིག་དང་རེས་གཟའ་མིག་དམར་་གསུམ་གཏང་། ཐོལ་པ་གཅིག་བསྣན་པས་ལྔར་འགྱུར་ལ། དེ་དག་བཞིར་བགོས་ན་གཅིག་ལྷག །གཅིག་་ཤར་ན་མེ་ལྷ་དྲང་སྲོང་སུམ་ཅུ་རྩ་གསུམ་ན་བཞུགས་ཡོད་པས། སྦྱིན་སྲེག་འབུལ་མི་རུང། ༈ ཡང་ཚེས་གཅིག་དང་གཟའ་ལྷག་པ་ཡིན་ན། ཚེས་གཅིག་ལ་གཅིག་དང་རེས་གཟའ་ལྷག་པར་་བཞི་གཏང་། ཐོལ་པ་གཅིག་བསྣན་པས་དྲུག་ཏུ་འགྱུར་ལ། དེ་དག་བཞིར་བགོས་པས་གཉིས་ལྷག །གཉིས་་ཤར་ན་མེ་ལྷ་དྲང་སྲོང་ས་འོག་ཏུ་བཞུགས་ཡོད་པས། སྦྱིན་སྲེག་འབུལ་མི་རུང། ༈ ཡང་ཚེས་དགུ་དང་གཟའ་ཕུར་བུ་ཡིན་ན། ཚེས་དགུ་ལ་དགུ་དང་རེས་གཟའ་ཕུར་བུར་ལྔ་གཏང་། ཐོལ་པ་གཅིག་བསྣན་པས་བཅོ་ལྔར་འགྱུར་ལ། དེ་དག་བཞིར་བགོས་པས་གསུམ་ལྷག །གསུམ་་ཤར་ན་མེ་ལྷ་དྲང་སྲོང་ས་སྟེངདུ་བཞུགས་ཡོད་པས། སྦྱིན་སྲེག་འབུལ་རུང་། ༈ ཡང་ཚེས་བཅུ་གཅིག་དང་གཟའ་པ་སངས་ཡིན་ན། ཚེས་བཅུ་གཅིག་ལ་བཅུ་གཅིག་དང་རེས་གཟའ་པ་སངས་ལ་དྲུག་གཏང་། ཐོལ་པ་གཅིག་བསྣན་པས་བཅོ་བརྒྱད་དུ་འགྱུར་ལ། དེ་དག་བཞིར་བགོས་ན་གཉིས་ཤར་པས་སྦྱིན་སྲེག་མི་རུང་། ༈ ཡང་ཚེས་གཅིག་དང་གཟའ་སྤེན་པ་ཡིན་ན། ཚེས་གཅིག་ལ་གཅིག་དང་རེས་གཟའ་སྤེན་པར་་བདུན་གཏང་། ཐོལ་པ་གཅིག་བསྣན་པས་དགུར་འགྱུར་ལ། དེ་དག་བཞིར་བགོས་ན་གཅིག་་ཤར་བས་སྦྱིན་སྲེག་མི་རུང་། ༈ ཡང་ཚེས་བཅོ་ལྔ་དང་གཟའ་ལྷག་པ་ཡིན་ན། ཚེས་བཅོ་ལྔ་ལ་བཅོ་ལྔ་དང་རེས་གཟའ་ལྷག་པར་བཞི་གཏང་། ཐོལ་པ་གཅིག་བསྣན་པས་ཉི་ཤུརའགྱུར་ལ། དེ་དག་བཞིར་བགོས་ན་ཐིག་ཤར་བས་རུང་། ༈ ཡང་ཚེས་ཉེར་བརྒྱད་དང་གཟའ་སྤེན་པ་ཡིན་ན། ཚེས་ཉེར་བརྒྱད་་ལ་ཉེར་བརྒྱད་དང་རེས་གཟའ་སྤེན་པར་བདུན་གཏང་། ཐོལ་པ་གཅིག་བསྣན་པས་སོ་དྲུག་ཏུ་འགྱུར་ལ། དེ་དག་བཞིར་བགོས་ན་ཐིག་ཤར་བས་རུང་ངོ་།།
༈ ཡང་ཚེས་གཅིག་ཆད་པས་ཚེས་བརྒྱད་དང་གཟའ་ལྷག་པ་ཡིན་ན། ཚེས་གཅིག་ཆད་པས་བརྒྱད་ལ་གྲངས་ཕན་བདུན་དང་རེས་གཟའ་ལྷག་པ་ལ་བཞི་གཏང་། ཐོལ་པ་གཅིག་བསྣན་པས་བཅུ་གཉིས་སུ་འགྱུར་ལ། དེ་དག་བཞིར་བགོས་ཐིག་ཤར་བས་རུང་། ༈ ཡང་ཚེས་དྲུག་ལྷག་པའི་བཅོ་ལྔ་དང་གཟའ་ལྷག་པ་ཡིན་ན། ཚེས་དྲུག་ལྷག་པའི་ ཚེས་བཅོ་ལྔ་ལ་གྲངས་ཕན་བཅུ་དྲུག་དང་རེས་གཟའ་ལྷག་པར་བཞི་གཏང་། ཐོལ་པ་གཅིག་བསྣན་པས་ཉེར་གཅིག་འགྱུར་ལ། དེ་དག་བཞིར་བགོས་ན་གཅིག་ཤར་བས་མི་རུང་། ༈ ཡང་ཚེས་དྲུག་ཆད་ཅིང་ཚེས་ཉི་ཤུ་ལྷག་པས་གནམ་གང་དང་གཟའ་ལྷག་པ་ཡིན་ན། ཚེས་དྲུག་ཆད་ཅིང་ཚེས་ཉི་ཤུ་ལྷག་པས་གནམ་གང་་ལ་གྲངས་ཕན་སུམ་ཅུ་དང་རེས་གཟའ་ལྷག་པ་ལ་བཞི་གཏང་། ཐོལ་པ་གཅིག་བསྣན་པས་སོ་ལྔར་འགྱུར་ལ། དེ་དག་བཞིར་བགོས་ན་གསུམ་ཤར་བས་རུང་ངོ་།། གོང་དུ་ཆད་ལྷག་གསལ་ཁ་མེད་པ་རྣམས་ཆད་ལྷག་མེད་པའི་དབང་དུ་བྱས་སོ།། དགེའོ།། དགེའོ།། །།
No comments:
Post a Comment