༄༅། །རྟ་མགྲིན་གསང་སྒྲུབ་ཆོས་སྐོར་ལས།། བཀའ་སྲུང་རྡོ་རྗེ་ལེགས་པ་ཡི།།གཏོརཆོག་ཤིན་ཏུ་འཁྱེར་བདེ་བ།། དམ་ཅན་རོལ་མཚོ་ཞེས་བྱ་དང་།། བསུར་མཆོད་དཔའ་བོ་དགྱེས་བསྐྱེད་བཞུགས།།
༄༅། །དངོས་གྲུབ་མཆོག་སྩོལ་དྲིན་ཅན་བླ་མ་དང་། །གཏུམ་ཆེན་ཁྲོ་རྒྱལ་པདྨ་དབང་ཆེན་ལ། །སྒོ་གསུམ་གུས་པ་ཆེན་པོས་ཕྱག་བགྱིས་ཏེ། །བཀའ་སྲུང་རྡོ་རྗེ་ལེགས་པའི་གཏོར་ཆོག་འགོད།། དམ་ཅན་སྐྱེས་བུ་ཆེན་པོ་ལ་མཆོད་གཏོར་འབུལ་བར་འདོད་པསཡི་དམ་གྱི་ང་རྒྱལ་དང་ལྡན་པས། མཆོད་གཏོར་བསྐང་རྫས་རྣམས་བསངས་སྦྱངས།) སྟོང་པའི་ངང་ལས་རང་རང་གི་མིང་ཡིག་དང་པོ་ཐིག་ལེས་བརྒྱན་པ་ཞུ་བ་ལས་བྱུང་བའི་དམ་ཅན་རྡོ་རྗེ་ལེགས་པ་འཁོར་དང་བཅས་པ་མཉེས་པར་བྱེད་པའི་མཆོད་གཏོར་དམ་རྫས་སྤྱན་གཟིགས་བསམ་གྱིས་མི་ཁྱབ་པ་ས་དང་བར་སྣང་ནམ་མཁའི་ཁྱོན་ཐམས་ཅད་ཡོངས་སུ་གང་བར་གྱུར། །ཨོཾ་ཨཱཿཧཱུྃ། (ལན་གསུམ།) ཨོཾ་ཨརྒྷཾ་ཨཱཿཧཱུཾ། (ནས།) ཤཔྟ་ཨཱཿཧཱུཾ། (གི་བར་དང་།) ཨོཾ་སརྦ་བིད་པཱུ་ར་པཱུ་ར་སུ་ར་སུ་ར་ཨ་ཝརྟ་ཡ་ཨ་ཝརྟ་ཡ་ཧོཿ བཛྲ་ཧྥ་ར་ཎ་ཁཾ། (ལན་གསུམ་དང་། སྤྲོ་ན་སྔགས་དྲུག་ཕྱག་རྒྱ་དྲུག་གིས་ཀྱང་བྱིན་གྱིས་བརླབས་ལ།)
༈ མདུན་དུ་རཀྟའི་རྒྱ་མཚོ་འཁྲུགས་པའི་དབུས། །སྟང་ཟིལ་ཕ་ཝང་ལོང་བུའི་སྐུ་མཁར་ནང་། །པད་ཉི་སེངྒེ་དཀར་པོ་བརྗིད་པའི་སྟེང་། །ཏྲི་ལས་སྐྱེས་མཆོག་རྡོ་རྗེ་ལེགས་པ་ནི། །དམར་ནག་བཟོད་པར་དཀའ་བའི་གཟི་བརྗིད་ཅན། །ཞལ་གདངས་མཆེ་གཙིགས་སྤྱན་གསུམ་དམར་ལ་ཟླུམ། །དབུ་སྐྲ་སྨིན་མ་སྨ་ར་དམར་སེར་འབར། །ཕྱག་གཡས་རྡོ་རྗེ་དགྲ་བོའི་ཀླད་ལ་འཕྱར། །གཡོན་པ་འདར་ཞིང་འཕྲིག་པའི་དགྲ་སྙིང་འཛིན། །དར་དམར་འཇོལ་བེར་གསེར་རྐད་སག་ལྷམ་ཅན། །རབ་བརྗིད་ཁྲོ་གཏུམ་རྔམས་པའི་ཚུལ་གྱིས་འགྱིང་། །དེ་ཡི་མདུན་དུ་པད་ཉི་ར་སྐྱེས་སྟེང་། །ཏྲི་ལས་ཐེ་རང་སྟོང་འཁྲུགས་མགར་བ་ནག །ཁྲོ་ཆུའི་ཐོ་བ་མགར་གྱི་སྦུད་པ་འཛིན། །མཐིང་ནག་འོབ་ཞུ་དར་བེར་དགུ་བརྩེགས་གསོལ། །སྟག་རལ་གཟིག་ཤུབས་དཔའ་བོའི་ཆས་ཀྱིས་བརྒྱན། །གསང་ཡུམ་གཡུ་སྒྲོན་ཀོང་བཙུན་དེ་མོ་སོགས། །ཐུགས་ཀྱི་དགྱེས་སྡེ་བསྟན་མའི་ཚོགས་དང་བཅས། །གིང་ཆེན་སྡེ་བཞི་ལྷ་དང་བཙན་བདུད་ཀྱི། །དགེ་བསྙེན་སུམ་བརྒྱ་དྲུག་ཅུའི་འཁོར་གྱིས་བསྐོར། །བྱ་ཁྲ་འཕར་བ་དོམ་དྲེད་ལྕེ་སྤྱང་སོགས། །ཟ་བྱེད་མཆེ་བ་ཅན་སོགས་ཕོ་ཉ་དང་། །ལས་མཁན་སྣང་སྲིད་དྲེགས་པའི་དམག་ཚོགས་ཀྱིས། །ས་གཞི་བར་སྣང་ནམ་མཁའི་ཁྱོན་ཀུན་འགེས། །དེ་དག་གནས་གསུམ་རྡོ་རྗེ་གསུམ་གྱིས་མཚན། །རང་གི་ཐུགས་ཀའི་ས་བོན་འོད་ཟེར་གྱིས། །གར་བཞུགས་གནས་ནས་སྐྱེས་མཆོག་རྡོ་རྗེ་ལེགས།།འཁོར་དང་བཅས་པ་གནས་འདིར་སྤྱན་དྲངས་གྱུར།།
ཀྱཻ༑ འོག་མིན་ཞིང་ཁམས་རི་རབ་མ་ལ་ཡ། །ནུབ་ཕྱོགས་ཕ་ཝང་ལོང་བུའི་སྐུ་མཁར་སོགས། །གར་བཞུགས་གནས་ནས་སྲུང་མ་དམ་ཚིག་ཅན། །སྐྱེས་མཆོག་རྡོ་རྗེ་ལེགས་པ་གཤེགས་སུ་གསོལ། །དགྱེས་སྡེ་བསྟན་མ་བཅུ་གཉིས་གིང་ཆེན་བཞི། །དགེ་བསྙེན་སུམ་བརྒྱ་དྲུག་ཅུ་ཕོ་ཉའི་ཚོགས། །སྡེ་བརྒྱད་དྲེགས་པའི་འཁོར་ཚོགས་དང་བཅས་པ། །ཐོགས་པ་མེད་པར་གནས་འདིར་གཤེགས་སུ་གསོལ། །དགྱེས་པའི་མཆོད་གཏོར་དམ་རྫས་སྤྱན་གཟིགས་བཤམས། །གདུང་བའི་དབྱངས་དང་རོལ་མོའི་སྒྲས་བསྐུལ་ན། །སྔོན་གྱི་ཐུགས་དམ་གཉན་པོ་རྗེས་དགོངས་ལ། །འཁོར་བཅས་ཐོགས་པ་མེད་པར་ད་ཚུར་སྤྱོན།།
ཏྲི་བཛྲ་སཱ་དྷུ་ས་མ་ཡ་ཛ་ཿཛཿཛཿཧཱུཾ་བཾ་ཧོཿཀ་མ་ལ་ཡེ་སྟྭཾ། ཨོཾ་བཛྲ་སཱ་དྷུ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་ཧཱུཾ་སྭཱཧཱ། (ནས།) ཤཔྟ(འི་བར་དང༌། འབྲུ་གསུམ་བཏགས་པས་ནང་མཆོད་ཕུལ་ལ།) ཧཱུཾ༑ གསང་བདག་ཐུགས་སྤྲུལ་མཐུ་སྟོབས་དབང་ཕྱུག་ཆེ། །རྡོ་རྗེ་ལེགས་པ་གསང་ཡུམ་བློན་ཆེན་བཞི། །ལས་བྱེད་མགར་བ་ནག་པོ་འཁོར་བཅས་ལ། །རྩེ་གཅིག་ཡིད་ཀྱིས་གུས་པས་བསྟོད་པར་བགྱི།།
(བསྐང་བཤགས་བྱ་བ་ནི།) ཧཱུཾ༑ ཏིང་འཛིན་སྔགས་རྒྱའི་འཁྲུལ་འཁོར་གྱིས་བསྐྲུན་པའི། །ཕྱི་ནང་གསང་རྟེན་བླ་མེད་དམ་ཚིག་རྫས། །ཉེར་སྤྱོད་འདོད་ཡོན་མཆོད་པ་བསམ་མི་ཁྱབ། །སྤྱན་གཟིགས་གོ་མཚོན་བཟའ་བཏུང་མཐུན་པའི་རྫས། །བགོ་བའི་གོས་དང་བཞོན་པའི་བྱེ་བྲག་རྣམས། །ངོ་མཚར་ཡོན་ཏན་ཆེན་པོར་སྨིན་པ་དང༌། །ཁམས་གསུམ་སྐྱེ་དགུ་ཀུན་གྱི་དཔལ་འབྱོར་སོགས། །དགེ་ལེགས་ཕུང་པོ་གཅིག་ཏུ་བསྡུས་པ་ཡིས། །དམ་ཅན་ཆེན་པོ་འཁོར་བཅས་ཐུགས་དམ་བསྐང་། །དགྱེས་པ་དགོངས་ནས་ཅི་འདོད་སྩོལ་བ་དང་། །ཐུགས་དང་འགལ་བར་གྱུར་རྣམས་བཟོད་བཞེས་ཏེ། །ལུས་དང་གྲིབ་མ་བ་མ་བཞིན་དུ་རབ་འགྲོགས་ནས། །རབ་འབྱམས་ལས་བཞིའི་འཕྲིན་ལས་སྒྲུབ་པ་ལ། །ཐོགས་པ་མེད་པའི་མཐུ་དང་ལྡན་པར་མཛོད།།
(བཟླས་པ་བྱ་བར་འདོད་ན།) དམ་ཅན་འཁོར་དང་བཅས་པ་ཡི། །ཐུགས་ཀར་ཉི་མའི་དཀྱིལ་འཁོར་སྟེང་། །སྲོག་གི་ངོ་བོ་ཏྲི་ཡིག་གི།མཐའ་མར་སྔགས་ཀྱི་ཕྲེང་བས་བསྐོར། །རང་ཉིད་ཡི་དམ་ལྷར་གསལ་བའི། །ཐུགས་ཀའི་འོད་ཀྱིས་བསྐུལ་བ་ཡིས། །ཅི་ལྟར་འདོད་པའི་འཕྲིན་ལས་ཀུན། །ཐོགས་པ་མེད་པར་བསྒྲུབ་པར་གྱུར།།
ཨོཾ་བཛྲ་སཱ་དྷུ་ས་མ་ཡ་བྷ་ག་ཏྲཾ་ཤེ་ནི་ཀྲ་མ་ནི་ས་མ་ཡ་སཱ་དྷུ་ཏྲི་ཛཿཛཿཧཱུཾ་བཾ་ཧོཿ (ཞེས་བཟླ་ཞིང་། མཇུག་ཏུ་ཡིག་བརྒྱས་ལྷག་ཆད་བསྐང་།)
(དེ་ནས་གཏོར་མ་འབུལ་བ་ནི།) དམ་ཅན་སྐྱེས་བུ་ཆེན་པོ་འཁོར་དང་བཅས་པའི་ལྗགས་འོད་ཟེར་གྱི་བུ་གུས་གཏོར་མའི་བཅུད་ཐམས་ཅད་དྲངས་ཏེ་གསོལ་བར་གྱུར། ༀ་བཛྲ་སཱ་དྷུ་ས་མ་ཡ་བྷ་ག་ཏྲ་ཾཤེ་ནི་ཀྲ་མ་ནི་ས་མ་ཡ་སཱ་དྷུ་ཏྲི་ཛཿཛཿཧཱུཾ་ཾཧོཿཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། (ཞེས་ལན་གསུམ་མམ་བདུན་གྱིས་གཙོ་བོ་དང་།) ཨ་ཀཱ་རོ(ས་གཙོ་འཁོར་སྤྱིར་གཏོར་མ་དབུལ། ཕྱི་ནང་གི་མཆོད་པ་གོང་བཞིན་ཕུལ་ལ།)
ཧཱུཾ༑ གང་ཐུགས་ཞི་བའི་ངང་ལས་མ་གཡོས་ཀྱང་། །མི་བཟད་གཏུམ་རྔམས་སྣ་ཚོགས་སྒྱུ་འཕྲུལ་གྱིས། །དྲེགས་པའི་དེད་དཔོན་ཆེན་པོའི་སྐུར་སྟོན་པ། །སྐྱེས་མཆོག་རྡོ་རྗེ་ལེགས་པ་ཁྱོད་ལ་བསྟོད། །སྐབས་འགར་མཐིང་ནག་མདོག་འཆང་ར་སྐྱེས་ཞོན།།ཐེ་རང་སྟོང་འཁྲུག་མགར་བ་ནག་པོར་གྲགས། །རྣལ་འབྱོར་སྐྱོང་ཞིང་ཉམས་པའི་སྲོག་གི་གཤེད། །གཙུག་ལག་དཀོར་གྱི་སྲུང་མ་ཁྱོད་ལ་བསྟོད། །ཕུལ་བྱུང་ཡིད་དབང་འཕྲོག་པའི་ལང་ཚོ་ཡིས། །དགྱེས་པ་བསྐྱེད་པའི་ཡུམ་ཆེན་བཅུ་གཉིས་དང་། །མཆེད་འཁོར་སྤྲུལ་བློན་བཀའ་ཉན་ཕོ་ཉར་བཅས། །རྣམ་འགྱུར་ཕ་མཐའ་ཡས་པ་རྣམས་ལ་བསྟོད།།གྲུབ་པའི་དབང་ཕྱུག་མཚོ་སྐྱེས་རྡོ་རྗེ་ནས། །དྲིན་ཅན་བླ་མའི་བར་གྱིས་བཀའ་བསྒོས་པའི།།དམ་ཚིག་གཉན་པོ་མ་གཡེལ་དྲན་མཛོད་ལ།།དུས་རྣམས་ཀུན་ཏུ་བདག་ཅག་བསྲུང་ཞིང་སྐྱོབ། །བདག་ཅག་ཆོས་མཐུན་རྣམ་དཀར་བསྒྲུབ་པ་ལ། །བར་དུ་གཅོད་པའི་ཕྱི་ནང་ཉེར་འཚེ་སོགས། །མི་དང་མི་མིན་ལས་བྱུང་ཅི་མཆིས་པ། །ད་ལྟ་ཉིད་དུ་ཞི་བའི་འཕྲིན་ལས་མཛོད། །ཚེ་རིང་བསོད་ནམས་དཔལ་འབྱོར་དམ་ཆོས་རྒྱས། །ཁམས་གསུམ་བརྟན་གཡོ་མ་ལུས་དབང་དུ་བསྡུས། །ཡོངས་འཛིན་ཞབས་བརྟན་འཁོར་སློབ་ལྟོས་བཅས་རྣམས།།ཡིད་མཐུན་དགའ་སྤྲོ་རྒྱས་པའི་འཕྲིན་ལས་མཛོད། །བདག་ཅག་རྣམས་ལ་ཐོ་བརྩམས་གླགས་བལྟ་ཞིང༌། །ཁ་མཆུ་བསྙད་འདོགས་བརྐུ་འཕྲོག་མཐུ་བྱད་སོགས། །ལོག་པར་སྒྲུབ་པའི་དགྲ་བགེགས་མ་ལུས་པ། །མངོན་སྤྱོད་ལས་ཀྱིས་མྱུར་དུ་ཚར་གཅོད་མཛོད། །གཞི་ལམ་བྱེས་གསུམ་གར་འགྲོ་གར་འདུག་ཀྱང་། །ཉིན་གསུམ་བྱ་ར་མཚན་གསུམ་མེལ་ཚེ་མཛོད།།ལུས་དང་གྲིབ་མ་བཞིན་དུ་རབ་འགྲོགས་ནས། །གང་བཅོལ་ལས་རྣམས་ཐོགས་མེད་འགྲུབ་པར་མཛོད།། (དེ་ནས་གཏང་རག་གི་མཆོད་བསྟོད་དང་བཟོད་གསོལ། རྟེན་ཡོད་ན་བརྟན་བཞུགས་དང་མེད་ན་གཤེགས་གསོལ་བགྱིས་ལ་བཀྲ་ཤིས་ཀྱིས་མཐའ་བརྒྱན་པར་བྱའོ།། སྐྱེས་མཆོག་རྡོ་རྗེ་ལེགས་པའི་གཏོར་ཆོག་དམ་ཅན་རོལ་མཚོ་ཞེས་བྱ་བ་འདི་ཡང་།དོན་གཉེར་འགའ་ཞིག་གིས་འདི་ལྟ་བུའི་ཆ་ཚང་ལ་འཁྱེར་བདེ་བ་ཚིགས་བཅད་དུ་སྡེབས་པ་ཞིག་དགོས་ཞེས་ནན་གྱིས་བསྐུལ་ངོར། ཀུ་སཱ་ལི་དྷརྨ་བཛྲ་གྱིས་བླ་མ་དམ་པའི་གསུང་ལས་བཏུས་ཏེ་ཤིང་སྦྲུལ་ལྷ་བབས་ཀྱི་དུས་ཉིན། སྦྱོན་པའི་བདག་པོ་མི་དབང་རཏྣ་སིདྡྷིའི་ཕོ་བྲང་དདུ་སྦྱར་བའི་ཡི་གེ་པ་ནི་ཨ་ནནྡའོ།། །།
No comments:
Post a Comment