Wednesday, March 31, 2021

ཞལ་བཞིའི་བསྐང་བཤགས། (བསྡུས་པ།)



(བཤགས་པ་ནི།)     ཧཱུཾ༑ ཁྱབ་བདག་རྡོ་རྗེ་འཆང་དབང་ཀླུ་སྒྲུབ་དང་། །བཱ་ལཾ་ཏ་པ་སངས་རྒྱས་ཡེ་ཤེས་ཞབས། །མརམེ་མཛད་སོགས་རྒྱལ་བ་མ་ལུས་པའི། །དངོས་གྱུར་རྩ་བརྒྱུད་བླ་མ་བདག་ལ་དགོངས། །དྲིན་ཅན་བླ་མ་ཆོས་སྐུའི་བདག་ཉིད་དུ། །མཐོང་བ་ཁོ་ན་དངོས་གྲུབ་རྩ་བར་ནི། །མ་ཤེས་རང་སྣང་མ་དག་སྐྱོན་རྟོག་སོགས། །འཁྲུལ་ཞིང་ནོངས་པའི་ཚོགས་རྣམས་མཐོལ་ལོ་བཤགས། །ལྷན་ཅིག་སྐྱེས་དངོས་ཉམས་རྒྱུའི་གར་གྱི་ནི། །རྣམ་རོལ་ཡིད་དམ་ལྷ་ཚོགས་དགོངས་སུ་གསོལ། །དངོས་གྲུབ་འབྱུང་གནས་རྡོ་རྗེའི་དམ་ཚིགས་ལས། །བག་མེད་དབང་གིས་འགལ་བགྱིས་མཐོལ་ལོ་བཤགས། །བདེ་ཆེན་ཡེ་ཤེས་ཆོས་སྐུའི་ངང་ཉིད་ལས། །གཡོ་བ་མེད་ཀྱང་སྣ་ཚོགས་རྣམ་རོལ་གྱིས། །མ་ལུས་རྒྱལ་བའི་བསྟན་བསྲུང་མཐུ་རྩལ་ཅན། །སྟོབས་འཕྲོག་ནག་པོ་ཡབ་ཡུམ་བདག་ལ་དགོངས། །སྐུ་གསུང་ཐུགས་དང་ཡོན་ཏན་འཕྲིན་ལས་ཀྱི། །དམ་ཚིག་ལས་འགལ་བསྙེན་སྒྲུབ་གཡེལ་བ་དང་། །སྒྲུབ་རྫས་དམན་དང་མཆོད་གཏོར་ཆགས་པ་དང་། །གཏང་རག་དུས་སུ་མ་བགྱིས་མཐོལ་ལོ་བཤགས། །མདོར་ན་རང་བཞིན་དག་པའི་སེམས་ཀྱི་དབྱིངས། །གློ་བུར་ཉེས་པའི་ཚོགས་ཀྱིས་སྒྲིབ་པ་ལས། །རྨི་ལམ་བཞིན་དུ་ནོངས་གྱུར་སྒྱུ་མ་དང་། །གདོད་ནས་སྤྲོས་བྲལ་ངང་དུ་བཤགས་པར་བགྱི།།

(བསྐང་བསྡུས་ནི།)  ཧཱུཾ༑ ལྷ་མཆོག་མ་ཧཱ་ཀཱ་ལ་མཐུ་བོ་ཆེ། །ཁྱེད་ལ་མཐུན་པའི་དམ་རྫས་འབུལ་བ་ནི། །ཁྲག་གི་ཨརྒྷཾ་དབང་པོའི་མེ་ཏོག་དང་། །ཤ་ཆེན་བདུག་སྤོས་ཚིལ་ཆེན་མར་མེ་དང༌། །ཁྲག་ཞག་དྲི་ཆབ་ཤ་རུས་ཞལ་ཟས་དང་། །རྔམས་བརྗིད་རོལ་མོའི་ཚོགས་ཀྱིས་ཐུགས་དམ་བསྐང་། །གཡག་རོག་ཞོལ་ཆེན་འཇིགས་པའི་ངར་སྒྲ་སྒྲོག །མྱུར་མགྱོགས་རྟ་ནག་རྒྱན་ལྡན་མཛེས་པའི་ལུག །དགྲ་བོའི་སྲོག་ལ་རྒོལ་བའི་ཁྱི་ནག་དང༌། །བྱ་ནག་ཁྱུང་ལྟར་ལྡིང་བས་ཐུགས་དམ་བསྐང་། །གྲི་གུག་རལ་གྲི་རྩེ་གསུམ་མདུང་རྣོན་སོགས། །དགྲ་བགེགས་སྲོག་གཅོད་མཚོན་ཆའི་ཚོགས་རྣམས་དང་། །མྱོས་བྱེད་སྣོད་དང་མཚན་ལྡན་ཀ་པཱ་ལ། །རུས་ཕྲེང་མི་རྐང་གླིང་བུས་ཐུགས་དམ་བསྐང་། །དབུ་རྒྱན་དོ་ཤལ་རྒྱན་དྲུག་མཆོད་ཕྱིར་ཐོགས། །ཚངས་སྐུད་སྟག་ཤམ་ལ་སོགས་ཆས་རྣམས་དང་། །གཡང་གཞི་བླ་བྲེ་རྒྱུ་རློན་ལྡ་ལྡི་དང་། །པད་ཉིའི་གདན་སོགས་བཞེས་དགུས་ཐུགས་དམ་བསྐང་། །དམར་ཆེན་ཤ་ཁྲག་གཏོར་མ་རི་ལྟར་སྤུངས། །སྦྱངས་རྟོགས་སྦར་བའི་བདུད་རྩི་མཚོ་ལྟར་འཁྱིལ། །བཟའ་བཅའ་བཏུང་བའི་བྱེ་བྲག་ཀུན་ཚང་བའི། །རྨད་བྱུང་ཚོགས་ཀྱི་འཁོར་ལོས་ཐུགས་དམ་བསྐང་། །སྐུ་གསུང་ཐུགས་དང་ཕྱི་ནང་གསང་བ་དང་། །བླ་མེད་རྟེན་མཆོག་ལྷུན་པོ་གླིང་བཞི་དང་། །འདོད་ཡོན་རིན་ཆེན་བདུན་སོགས་ལྷ་མི་ཡི། །ལོངས་སྤྱོད་འདོད་དགུའི་གཏེར་གྱིས་ཐུགས་དམ་བསྐང་། །ཐུགས་དམ་སྐོང་ཤིང་ཉམས་ཆགས་སོས་གྱུར་ནས། །བར་ཆད་སེལ་ཞིང་དངོས་གྲུབ་སྩལ་དུ་གསོལ།།

(བཟློག་པ་ནི།)    ཧཱུཾ༑ ཆོས་སྐུ་ཡངས་པའི་ཕོ་བྲང་ནས། །ལྷ་ཆེན་མགོན་པོ་འཁོར་བཅས་ཀྱིས། །མཐུན་པའི་དམ་རྫས་འདི་བཞེས་ལ།། (རྣལ་འབྱོར་དཔོན་སློབ་འཁོར་བཅས་ལ།།) གཞན་གྱི་བསམ་སྦྱོར་ངན་པ་དང་། །མཚེ་ཟོར་ཡུངས་ཟོར་འཕེན་པ་བཟློག །འབྱུང་པོའི་ཐོད་ཟོར་འཕེན་པ་བཟློག །གཤིན་རྗེའི་འཁོར་ལོ་བསྐོར་བ་བཟློག །བདུད་ཀྱི་ཁྲམ་ཁ་བསྟན་པ་བཟློག །མ་མོའི་ཁྲག་ཟོར་འཕེན་པ་བཟློག །ཞང་ཞུང་བཙོ་དམར་འཕེན་པ་བཟློག །སུམ་པ་གླང་ཟོར་འཕེན་པ་བཟློག །བནྡེ་སྔགས་ཟོར་འཕེན་པ་བཟློག །བོན་པོ་རྟ་ཟོར་འཕེན་པ་བཟློག །སྔགས་པ་སྒོང་ཟོར་འཕེན་པ་བཟློག །སྐྱེས་པ་མདའ་ཟོར་འཕེན་པ་བཟློག །བུད་མེད་དམོད་ཟེར་འཕེན་པ་བཟློག །མུ་སྟེགས་བར་ཆད་བྱེད་པ་བཟློག །ངན་སྔགས་གདུག་པའི་རྦོད་གཏོང་བཟློག །ཀླུ་ཡི་བྱད་དུ་བཅུག་པ་བཟློག །ཐེའུ་རང་སྲིད་ལ་བརྐུ་བ་བཟློག །རྒྱལ་པོའི་སྨྱོ་འབོག་གཏོང་བ་བཟློག །དྲང་སྲོང་གཟའ་ཡི་ཀི་ཀཾ་བཟློག །ལྟས་ངན་བརྒྱད་ཅུ་རྩ་བཞི་བཟློག །ཡེ་འབྲོག་སུམ་བརྒྱ་དྲུག་ཅུ་བཟློག །རྨི་ལམ་ངན་དང་མཚན་མ་ངན། །ལོ་སྐག་ཟླ་སྐེག་ཞག་སྐེག་དང་། །ནད་རིགས་བཞི་བརྒྱ་རྩ་བཞི་བཟློག །མཁའ་འགྲོ་མ་དང་རོ་ལངས་དང་། །རྒྱལ་བསེན་བར་ཆད་བྱེད་པ་བཟློག །དེ་ལ་སོགས་པའི་གདུག་སེམས་རྣམས། །ཐམས་ཅད་སྡང་བའི་དགྲ་ལ་བྷྱོཿ ཐམས་ཅད་གནོད་པའི་བགེགས་ལ་བྷྱོཿ (ཞེས་པས་བཟློག་པ་བྱ། ཆོས་སྐུ་མ་དེ་གྲུབ་ཆེན་སངས་རྒྱས་ཡེ་ཤེས་ཀྱིས་བསྒྲིགས།)    ཧཱུཾ༑ མཐུན་པའི་དངོས་གྲུབ་མ་ལུས་པ། །དུས་འདིར་བདག་ལ་བསྩལ་དུ་གསོལ། །འཁོར་དང་བསྟན་པ་ལོངས་སྤྱོད་རྣམས། །རྒྱས་པར་མཛོད་ཅིག་སྲུང་མའི་ཚོགས།། (མཐུན་གྲུབ་མ་འདི་སྣེ་གདོང་སྤྱན་སྔ་ཀུན་བཟང་རྩེ་པས་མཛད།) 


No comments:

Post a Comment