༄༅། །བཀའ་པོད་ཆེན་པོ་ལྔའི་འཆད་ཉན་གྱི་གཡང་འབོད་བཞུགས་སོ།།
མཛད་པ་པོ། དཔའ་རིས་བློ་བཟང་རབ་གསལ།
ཧཱུྃ༑ བླ་མ་ཡི་དམ་དབྱེར་མེད་དཀོན་མཆོག་གསུམ༎ དཔའ་བོ་མཁའ་འགྲོ་བསྟན་སྲུང་ཚོགས་རྣམས་ཀྱིས༎ལྷུན་གྲུབ་འཕྲིན་ལས་སྤྲིན་ཆེན་འཁྲིགས་པ་ལས༎ བཤད་དང་སྒྲུབ་པའི་དགེ་ལེགས་བྱིན་ཕོབས་ཤིག། འཇམ་དཔལ་དབྱངས་དངོས་རྒྱལ་བ་ཙོང་ཁ་བས༎ དགོན་གནས་བཤད་སྒྲུབ་ཐུགས་ཀྱིས་དགོངས་པ་བཞིན༎ དགེ་འདུན་འདུས་ཚོགས་འཆད་ཉན་ཕུན་ཚོགས་ཀུན༎ དབྱར་གྱི་ཆུ་གཏེར་ཇི་བཞིན་འཕེལ་བར་མཛོད༎ རྣམ་སྨིན་ཡོན་ཏན་བརྒྱད་ཀྱི་ལུས་རྩལ་རྫོགས༎ ཐོས་བསམ་པདྨའི་ཚལ་ལ་དགའ་བས་རྩེན༎ ལུང་རིགས་འདབ་མ་དབྱངས་སྙན་སྒྲོགས་པ་ཡི༎ རྐང་དྲུག་བགྲང་ཡས་འདུ་བའི་ཕྱྭ་གཡང་སྩོལ༎ མཁས་བཙུན་ལྷག་བསམ་ཅན་གྱི་སློབ་དཔོན་དང་༎ དད་བརྩོན་ཤེས་རབ་ལྡན་པའི་སློབ་མ་གཉིས༎ རྟེན་འབྲེལ་ལྷན་ཅིག་འཛོམས་པའི་འཆད་ཉན་གྱི༎ རྒྱལ་མཚན་སྲིད་རྩེར་བསྒྲེང་བའི་ཕྱྭ་གཡང་སྩོལ༎ གཞུང་དོན་གདམས་པར་ཤར་ བའི་གོ་བ་དང་༎ ཚིག་དོན་ཕྲ་ཞིབ་འབྱེད་པ་རིག་པའི་འཕྲུལ༎ ངེས་པ་སྐྱེད་བྱེད་རྒྱབ་རྟེན་ལུང་དང་བཅས༎ རྩོད་ངག་དགའ་སྟོན་འཕེལ་བའི་ཕྱྭ་གཡང་སྩོལ༎ དམ་ཆོས་དགོངས་དོན་ཚུལ་བཞིན་བསྡུས་པའི་ཁྲིམས༎ ལས་འབྲས་དྲང་ཐིག་འདེབས་པའི་ལས་བྱེད་པ༎ ཚར་གཅོད་རྗེས་འཛིན་རྟིང་གནོན་མི་ཡོལ་བའི༎ བཅའ་ཁྲིམས་རྨང་གཞི་བརྟན་པའི་ཕྱྭ་གཡང་སྩོལ༎ ངན་ཤེད་བྲག་ལ་འཆའ་བའི་འུག་པ་དང་༎ བླང་དོར་ལམ་དུ་བརྒྱུ་བའི་ཤན་འབྱེད་པ༎ ལས་འབྲས་བདེན་པའི་ཉི་མ་འོད་པོ་ཆེས༎ སྣང་བ་མངོན་དུ་འགྱུར་བའི་ཕྱྭ་གཡང་སྩོལ༎ སྡིག་སྤྱོད་རྒྱན་དུ་ངོམས་པ་ལོག་པའི་གཏམ༎ ཕྱོགས་ལྷུང་ཙམ་གྱིས་བསྔགས་པའི་མུ་ཅོར་སོགས༎ མ་ཡིན་ཆོས་ཀྱི་གྲགས་པ་ཆོས་བཞིན་དུ༎ བསྒྲགས་བྱས་སྙན་པའི་ཀུན་ཁྱབ་ཕྱྭ་གཡང་སྩོལ༎ བསོད་ནམས་ཞིང་གི་མཆོག་གྱུར་དགེ་འདུན་དང་༎ བསོད་ནམས་དད་གཏོང་འཛོམས་པ་སྦྱིན་པའི་བདག། བསོད་ནམས་སྡིག་དང་མ་འདྲེས་རྒྱུ་སྦྱོར་གྱིས༎ བསོད་ནམས་དུས་སྟོན་དར་བའི་ཕྱྭ་གཡང་སྩོལ༎ མངོན་འདོད་ཚངས་པའི་བློ་ཡི་གཡོ་བ་ལས༎ བྱུང་མིན་བཤད་སྒྲུབ་བསྟན་པ་གནས་གྱུར་ན༎ ངང་གིས་འདུ་བ་སྲུང་མའི་ཕྲིན་ལས་ཀྱིས༎ ཕུན་ཚོགས་དཔལ་འབྱོར་རྒྱས་པའི་ཕྱྭ་གཡང་སྩོལ༎ ཁྱད་པར་བློ་གསལ་དོན་གཉེར་ཚུལ་མཐུན་རྣམས༎ ནད་རིམས་གདོན་བགེགས་རྐྱེན་གྱིས་མི་བརྫི་བར༎ ཐོས་བསམ་བྱ་བ་བདེ་ལེགས་མཐར་ཕྱིན་ཏེ༎ དོན་གཉིས་སྨོན་པ་བཞིན་དུ་འགྲུབ་པར་མཛོད༎ མདོར་ན་མི་འདོད་ཉེར་འཚེ་ཀུན་དང་བྲལ༎ ཕུན་ཚོགས་ལེགས་བྱས་མ་ལུས་ལྷུན་གྱིས་འགྲུབ༎ རྒྱལ་བསྟན་ནོར་བུ་རྒྱལ་མཚན་རྩེར་མཆོད་པས༎ སྲིད་གསུམ་དགེ་ལེགས་སྣང་བས་ཁྱབ་གྱུར་ཅིག། བསོད་ནམས་དར་རྒྱས་རི་རྒྱལ་ལྷུན་པོ་བཞིན༎ སྙན་གྲགས་ཆེན་པོས་ནམ་མཁའ་བཞིན་དུ་ཁྱབ༎ ཚེ་རིང་ནད་མེད་གཞན་དོན་ལྷུན་གྱིས་གྲུབ༎ ཡོན་ཏན་རྒྱ་མཚོའི་མཆོག་གིས་བཀྲ་ཤིས་ཤོག།
ཅེས་པ་འདི་ནི་ ྋརྗེ་གུང་ཐང་བ་བསྟན་པའི་སྒྲོན་མེས་གནས་ཆུང་གཡང་འབོད་དུ་བསྩལ་བ་ཅུང་ཟད་ཁ་བསྒྱུར་ཏེ། རྒྱན་དྲུག་ཕྱག་མཆོད་དུ་སྦྱོར་བར་ ྋབླ་མ་(དཔའ་རིས་བློ་བཟང་རབ་གསལ།) ཉིད་ནས་གནང་བ་ལྟར།
No comments:
Post a Comment