ཛམྦྷ་ལ་སེར་པོའི་གཏེར་སྒྲུབ།

༄༅།   །ནོར་བདག་འཕགས་པ་ཛམྦྷ་ལ་སེར་པོའི་གཏེར་སྒྲུབ་བྱེད་ཚུལ་འདོད་འཇོའི་བུམ་བཟང་ཞེས་བྱ་བ་བཞུགས་སོ།།

མཛད་པ་པོ།  གཙོས་གསེར་ཁྲི་བློ་བཟང་རྒྱལ་མཚན་སེང་གེ

1A ༄༅༅།      །ན་མོ་གུ་རུ་ཨཱརྱ་ཛམྦྷ་ལ་ཡེ།  (འདིར་བྱིན་རླབས་ཀྱི་གཏེར་ཆེན་པོ་འཕགས་པ་ཛམྦྷ་ལའི་རྣལ་འབྱོར་ལ་བརྟེན་ནས་རང་གཞན་གྱི་དོན་བྱེད་ཚུལ་འགོད་པ་ལ།  ཐོག་མར་གའུ་འམ་སྒྲོམ་ཚད་ལྡན་སོགས་ཡོ་བྱད་གང་དགོས་རྣམས་དངོས་གཙང་ཞིང་ཆ་ཚང་བ་དམ་པའི་གསུང་རྒྱུན་དང་མཐུན་པའི་ཕྱག་ལེན་ལྟར་བྱེད་པ་གལ་ཆེ་བས།  དེའི་ཚུལ་ནི།  བུམ་པའི་རྒྱུ་རབ་གསེར་དངུལ། མ་འབྱོར་ན་ཟངས་ལས་བྱས་པའང་རུང་ཞིང་།  ཡང་ན་རིན་པོ་ཆེའི་ཕྱེ་མ་བསྲེས་པའི་འཇིམ་པ་ལས་བྱས་པའི་བུམ་པའམ།  དུག་རིགས་ཀྱི་ཤིང་མ་ཡིན་པའི་ཙན་དན་དཀར་དམར་ཤུག་པ་སོགས་ལས་བྱས་པའི་སྒྲོམ་དབྱིབས་གྲུ་བཞི་པ་ཚོན་རྩིས་ཁ་བསྒྱུར་བ་བྱ་ཞིང་།  ནང་དུ་དྲི་བཟང་བྱུགས་ཤིང་ཕྱི་རུ་བཀྲ་ཤིས་རྟགས་བརྒྱད་སོགས་ཀྱི་རི་མོ་བྲི།  མཛོད་ཕུག་སོགས་སུ་འཇོག་ན་ཤིང་གི་སྒྲོམ་འདི་ཉིད་ལེགས་པར་སེམས་ཤིང་། ཚད་ནི།  ཡུལ་དེའི་བྲེ་གང་ཤོང་བ་བྱ་བར་གསུངས།  

2A དེར་འཇུག་རྒྱུའི་རིམ་པ་ནི།  གསེར་དང་དངུལ་སོགས་ལས་གྲུབ་པའི་ཛམྦྷ་ལའི་སྐུའམ།  མ་འབྱོར་ན་རི་མོར་བྲིས་པའང་རུང་།  ཤོག་བུ་བཟང་པོ་ལ་གསེར་དངུལ་སོགས་ཀྱིས་ཛམྦྷ་ལའི་སྔགས།  ཨོཾ་ཛམྦྷ་ལ་ཛ་ལེནྡྲ་ཡེ་ཁམས་གསུམ་སྣོད་བཅུད་ཀྱི་དཔལ་འབྱོར་ཕུན་ཚོགས་ཐམས་ཅད་རྣལ་འབྱོར་པ་བདག་གམ་སྦྱིན་པའི་བདག་པོའི་དབང་དུ་འདུ་བར་གྱུར་ཅིག་སྭཱཧཱ།  ཅེས་པ་ལྟ་བུ་བྲིས་ལ་དབུ་ནས་དྲིལ་ཞིང་དར་སེར་པོས་གཡོགས་ཏེ་མགོ་མཇུག་མ་ནོར་བར་བྱས་ལ་འབུར་སྐུའི་ཐུགས་ཀའམ།  རི་མོར་བྲིས་པ་ཡིན་ན་ཐུགས་ཀའི་ཐད་དུ་འཇོག།  སྐུ་བརྙན་གྱི་མཐའ་སྐོར་དང་སྒྲོམ་ནང་གི་འོག་གི་ཆར།  གསེར།  དངུལ།  མུ་ཏིག།  གཡུ།  བྱི་རུ།  མུ་མེན།  ཟངས་སོགས་རིན་པོ་ཆེའི་རིགས།  ཀ་ར།  བུ་རམ།  སྦྲང་རྩི།  ཁུར་བ།  ཤིང་ཐོག་སོགས་ཟས་སྣ།  ནས།  འབྲས།  གྲོ་སོགས་འབྲུ་སྣ་སྐྱོན་མེད་དགོས་ཤིང་།  སྐེ་ཚེ་ཤིང་ཚེ་བྲ་བོ་སོགས་འཇུག་མི་རུང་།  གཞན་ཡང་གོས་དར་

2B སྣམ་རས་ཀྱི་རིགས་གང་འཛོམས་བསགས།  དེ་ཐམས་ཅད་ཀྱང་བླ་མ་རྒྱལ་པོའི་མཛོད་ནས་བྱུང་བ་དང་།  གཞན་ཡང་མི་བསོད་ནམས་ཅན་དང་གཡང་ཅན་གྱི་ལག་ནས་བྱུང་བ་ལེགས་ལ།  དེ་ཐམས་ཅད་ཀྱང་སྐར་མ་རྒྱལ་སོགས་གཡང་སྐར་བཟང་པོའི་ཉིན་སྒྲོམ་དུ་འཇུག།  ཁ་དར་སེར་པོས་བཀབ་སྟེ་སྐུད་པ་མདོག་ལྔས་བཅིངས་ཏེ།  མདུད་མཚམས་སུ་རྒྱ་བཏབ་སྟེ་སྒྲོམ་གྱི་མདུན་ངོས་སུ་རྒྱབ་མདུན་མ་ནོར་བའི་ཕྱིར་དུ་ནོར་བུ་ཆ་དགུ་པ་བྲི།  བདག་མདུན་གྱི་ལྷ་ལ་འབུལ་རྒྱུའི་མཆོད་རྫས་རྣམས་དང་།  དཀར་གསུམ་མངར་གསུམ་གྱིས་སྦྲུས་པའི་དཀར་གཏོར་ཟླུམ་པོ་གཉིས་དང་བཅས་ལེགས་པར་འདུ་བགྱིས།  དེ་ལྟར་ཡོ་བྱད་ཐམས་ཅད་ཚང་བར་བྱས་ཏེ་ཉམས་སུ་ལེན་པའི་ཚུལ་ལ།  སྔོན་འགྲོ།  དངོས་གཞི།  མཇུག་གསུམ།  དང་པོ་ནི།  གནས་ཁང་བྱི་དོར་བྱས་ཤིང་།  ཛམྦྷ་ལའི་སྐུ་བརྙན་སོགས་སྐུ་གསུང་ཐུགས་ཀྱི་རྟེན་བཀྲམ་པའི་མདུན་དུ་སྟེགས་ཀྱི་ཁར་པདྨ་འདབ་བརྒྱད་ཀྱི་སྟེང་དུ་གའུ་འམ་སྒྲོམ་བུ་བཞག།  རང་གི་མདུན་དུ་ཅོག་ཙེ་ལྟ་བུའི་སྟེང་དུ་རྡོ་དྲིལ་དང་། དེའི་ཕར་རྒྱབ་ཏུ་སྟེགས་ཀྱི་ཁར་བདག་བསྐྱེད་ཀྱི་མཆོད་པ་རང་གི་གཡས་ནས་འགོ་བརྩམས་ཏེ་བཤམས་པ་དང་།  སྒྲོམ་བུའི་མདུན་དུ་མདུན་བསྐྱེད་ཀྱི་མཆོད་པ་འབུལ་ཡུལ་གྱི་གཡས་ངོས་ནས་འགོ་བརྩམས་ཏེ་བཤམས།  དེ་ཐམས་ཅད་ཀྱང་བཀོད་པས་མཛེས་པར་མཐར་ཆགས་སུ་བསྒྲིགས།  ཇི་ལྟར་འོས་པའི་སྟེགས་ཀྱི་ཁར་བདག་མདུན་ལ་འབུལ་རྒྱུའི་དཀར་གཏོར་གཉིས་ཀྱང་བཤམས།  རང་ཉིད་ཀྱིས་གནས་ཁང་གི་ཕྱི་རོལ་དུ་ཁྲུས་བྱ་ཞིང་།  ཤ་ཆང་སྒོག་ཙོང་སོགས་ཀྱི་ཟས་ལ་ལོངས་སྤྱོད་པ་སྤངས་ཏེ།  གཙང་སྦྲ་དང་ལྡན་པས་བདེ་བའི་སྟན་ལ་འཁོད་དེ།  ལུས་རྣམ་སྣང་གི་ཆོས་བདུན་ལྡན་ནམ་བག་མེད་པའི་འདུག་ལུགས་མ་ཡིན་པའི་སྤྱོད་ལམ་གང་བདེར་

3A གནས་ནས།  བདག་གིས་སེམས་ཅན་ཐམས་ཅད་ཀྱི་དོན་དུ་རྫོགས་བྱང་ཐོབ་པར་བྱ།  དེའི་ཕྱིར་དུ་མཐུན་རྐྱེན་མཁོ་དགུའི་ལོངས་སྤྱོད་ཟད་མི་ཤེས་པ་དབང་དུ་འདུ་བའི་ལྷ་མཆོག་ཁྱད་པར་ཅན་འདི་ཉིད་ཀྱི་རྣལ་འབྱོར་ལ་གནས་ནས་གཏེར་སྒྲུབ་པའི་རིམ་པ་ཉམས་སུ་བླང་བར་བགྱིའོ་སྙམ་པའི་ངང་ནས།  མདུན་གྱི་ནམ་མཁར་སྐྱབས་ཡུལ་གསལ་བཏབ་སྟེ་སྐྱབས་འགྲོ་སེམས་བསྐྱེད་ཚད་མེད་བཞི་བསྒོམ་པ་ནན་ཏན་དུ་བྱ།     གཉིས་པ་དངོས་གཞི་ལ།  བདག་མདུན་གཉིས་ལས།  དང་པོ་ནི།)  སྭ་བྷཱ་ཝ(ས་སྟོང་པར་སྦྱངས།)  སྟོང་པའི་ངང་ལས་པཾ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་རང་གི་སེམས་ཉིད་ཡི་གེ་ཛཾ་ཡིག་གསེར་གྱི་མདོག་ཅན།  དེ་ལས་འོད་ཟེར་འཕྲོས།  འཕགས་པ་མཆོད། སེམས་ཅན་ཐམས་ཅད་ཀྱི་དབུལ་ཕོངས་ཀྱི་སྡུག་བསྔལ་བསལ།  འོད་ཟེར་ཚུར་འདུས།  ཡོངས་སུ་གྱུར་པ་ལས་རང་ཉིད་འཕགས་པ་ཛམྦྷ་ལ་སྐུ་མདོག་ཉིན་བྱེད་བྱེ་བའི་མདངས་དང་ལྡན་པའི་གསེར་གྱི་ལྷུན་པོ་ལྟར་སེར་ཞིང་བརྗིད་ཆགས་པ།  ཞལ་གཅིག་ཕྱག་གཉིས་པ།  རྒྱལ་བ་རིགས་ལྔས་དབུ་བརྒྱན་པ།  ཕྱག་གཡས་ཀྱིས་པི་ཛ་པུ་ར་ཀ་དང་།  གཡོན་པས་རིན་པོ་ཆེ་སྣ་ཚོགས་ཀྱི་ཆར་འབེབས་པའི་ནེའུ་ལེ་བསྣམས་ཤིང་།  རིན་པོ་ཆེའི་རྒྱན་དང་ཨུཏྤལ་སྔོན་པོའི་ཕྲེང་བས་བརྒྱན་པ།  ལྷ་རྫས་ཀྱི་དར་གྱི་སྟོད་གཡོགས་དང་སྨད་གཡོགས་གསོལ་ཞིང་།  ཞབས་

3B གཉིས་ཀྱིས་དུང་ཅན་མ་དང་པདྨ་ཅན་གྱི་མགོ་བོའི་གཏེར་བདག་མནན་པ།  རང་གི་སྤྱི་བོར་ཨོཾ་དཀར་པོ།  མགྲིན་པར་ཨཱཿདམར་པོ།  ཐུགས་ཀར་ཧཱུཾ་སྔོན་པོ་དང་ཛཾ་ཡིག་སེར་པོས་མཚན་པ།  དེ་ལས་འོད་ཟེར་འཕྲོས།  རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་པ་སྤྱན་དྲངས།  ཛཿཧཱུཾ་བཾ་ཧོཿ  གཉིས་སུ་མེད་པར་གྱུར།  (ཞེས་བརྗོད་ལ།  དབང་བསྐུར་རྒྱས་བཏབ་མ་བྱས་ཀྱང་ཆོག།  དེ་ནས་མཆོད་པ་)ཨ་མྲི་ཏ(ས་བསངས།)  སྭ་བྷཱ་ཝ(ས་སྦྱངས།)  སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་འོད་དུ་ཞུ་བ་ལས་བྱུང་བའི་མཆོད་རྫས་རྣམས་དྭངས་ཤིང་ཐོགས་པ་མེད་པ་ནམ་མཁའ་དང་མཉམ་པར་གྱུར།  ཨོཾ་ཨརྒྷཾ་ཨཱཿཧཱུཾ།  (ནས།)  ཤཔྟ་ཨཱཿཧཱུཾ་(གི་བར་གྱིས་བྱིན་གྱིས་བརླབས།)  ཨོཾ་ཨཱརྱ་ཛམྦྷ་ལ་ཨརྒྷཾ་པྲ་ཏཱིཙྪ་ཡེ་སྭཱཧཱ།  (ཞེས་པ་ནས།)  ཤཔྟ་པྲ་ཏཱིཙྪ་ཡེ་སྭཱཧཱ།  (ཞེས་པའི་བར་གྱིས་མཆོད།)  ནོར་གྱི་དབང་ཕྱུག་(སོགས་ཀྱིས་བསྟོད།  རང་ཉིད་ལྷའི་སྐུ་སྣང་ལ་རང་བཞིན་མེད་པ་ལ་དམིགས་པ་རྩེ་གཅིག་ཏུ་གཏད་དེ་གསལ་སྣང་ང་རྒྱལ་ཤུགས་ཅན་བསྐྱེད་ལ།)  ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཛཾ་ཡིག་གསེར་གྱི་མདོག་ཅན་གྱི་མཐར་སྔགས་ཕྲེང་སེར་པོའི་བསྐོར་བ་ལས་འོད་ཟེར་སེར་པོའི་ཚོགས་འཕྲོས།  ལུས་ཀྱི་ནང་ཐམས་ཅད་གང་།  ཐོག་མེད་ནས་བསགས་པའི་སྡིག་སྒྲིབ་ནད་གདོན་ཐམས་ཅད་སྦྱངས།  འོད་ཟེར་ཕྱིར་

4A འཕྲོས།  སེམས་ཅན་གྱི་སྡིག་སྒྲིབ་སྦྱངས།  ཁྱད་པར་རང་གཞན་གྱི་དབུལ་ཕོངས་ཐམས་ཅད་བསལ།  ཁམས་གསུམ་སྣོད་བཅུད་ཀྱི་མཁོ་དགུའི་དཔལ་འབྱོར་ཕུན་ཚོགས་དབང་དུ་འདུ་བར་(བསམ་ལ།  སྔགས་བརྒྱ་སྟོང་ཁྲི་འབུམ་སོགས་ཅི་ནུས་བཟླ།  ཐུན་མཐར་ཡིག་བརྒྱས་ལྷག་ཆད་ཁ་བསྐངས།  ཐུན་མཚམས་སུ་གཏོར་མ་)ཨ་མྲི་ཏ(ས་བསངས།)  སྭ་བྷ་ཝ(ས་སྦྱངས།)  སྟོང་པའི་ངང་ལས་བྷྲུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་འོད་དུ་ཞུ་བ་ལས་བྱུང་བའི་གཏོར་མ་ཟག་པ་མེད་པའི་བདུད་རྩིའི་རྒྱ་མཚོ་ཆེན་པོར་གྱུར།  ཨོཾ་ཨཱཿཧཱུཾ།  (ལན་གསུམ་བརྗོད་ལ་བྱིན་གྱིས་བརླབས།)  རང་གི་ཐུགས་ཀའི་ས་བོན་ལས་འོད་ཟེར་འཕྲོས།  འཕགས་པ་ཛམྦྷ་ལ་མདུན་གྱི་ནམ་མཁར་སྤྱན་དྲངས། པདྨ་ཀ་མ་ལ་ཡེ་སྟཾ།  (ཞེས་གདན་ཕུལ།)  མདུན་བསྐྱེད་ཀྱི་ལྷའི་ལྗགས་འོད་ཟེར་གྱི་སྦུ་གུས་གཏོར་མའི་བཅུད་དྲངས་ཏེ་གསོལ་བར་བསམ་ལ།()  ཨོཾ་ཨཱརྱ་ཛམྦྷ་ལ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི།  (ལན་བདུན་གྱིས་གཏོར་མ་ཕུལ།  སྔར་ལྟར་མཆོད་བསྟོད་མདོར་བསྡུས་བྱ།  གཏོར་མགྲོན་གྱི་ལྷ་)ཨོཾ་ཨཱཿབཛྲ་མུ།  (ཞེས་བརྗོད་ལ་རང་གནས་སུ་གཤེགས་པའམ།  བྲིས་སྐུ་ཡོད་ན།)  འདིར་ནི་གཟུགས་དང་ལྷན་ཅིག་ཏུ།།  (ཞེས་པའི་མཇུག་ཏུ།)  ཨོཾ་སུ་པྲ་ཏིཥྛ་བཛྲ་ཡེ་སྭཱཧཱ།  (ཞེས་པས་བརྟན་བཞུགས་བྱ།       ༈     གཉིས་པ་མདུན་བསྐྱེད་ནི།  གའུ་འམ་སྒྲོམ་བུ་)ཨ་མྲི་ཏ(ས་བསངས།)  སྭ་བྷཱ་ཝ(ས་སྦྱངས།)  སྟོང་པའི་ངང་ལས་རིན་

4B པོ་ཆེ་སྣ་ལྔ་ལས་གྲུབ་པའི་གཞལ་ཡས་ཁང་དགོས་འདོད་ཐམས་ཅད་ཡིད་བཞིན་དུ་འབྱུང་བའི་གཏེར་གྱིས་གང་བའི་ནང་དུ་པཾ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཛཾ་ཡིག་སེར་པོ།  དེ་ལས་འོད་ཟེར་འཕྲོས།  འཕགས་པ་མཆོད། སེམས་ཅན་ཐམས་ཅད་ཀྱི་དབུལ་ཕོངས་ཀྱི་སྡུག་བསྔལ་བསལ།  འོད་ཟེར་ཚུར་འདུས།  ཡོངས་སུ་གྱུར་པ་ལས་འཕགས་པ་ཛམྦྷ་ལ།  (ཞེས་པ་ནས།)  དེའི་སྤྱི་བོར་ཨོཾ་དཀར་པོ།  མགྲིན་པར་ཨཱཿདམར་པོ།  ཐུགས་ཀར་ཧཱུཾ་སྔོན་པོ་དང་ཛཾ་ཡིག་སེར་པོས་མཚན་པར་གྱུར།  (ཞེས་པའི་བར་བརྗོད།  མཆོད་པ་བདག་བསྐྱེད་ཀྱི་སྐབས་ལྟར་བྱིན་གྱིས་བརླབས་ལ།)  འཇིག་རྟེན་ཁམས་ནི་དཔག་མེད་ན།། མཆོད་ཡོན་ཇི་སྙེད་ཡོད་པ་རྣམས།། འཕགས་མཆོག་ཛམྦྷ་ལ་ལ་འབུལ།། ནོར་གྱི་དངོས་གྲུབ་སྩལ་དུ་གསོལ།། ཨོཾ་ཨཱརྱ་ཛམྦྷ་ལ་ཨརྒྷཾ་པྲ་ཏཱིཙྪ་ཡེ་སྭཱཧཱ།  (དེ་བཞིན་དུ་ཞབས་བསིལ་སོགས་ལ་ཚིགས་བཅད་དང་སྔགས་འདོན་པ་བསྒྱུར་ཏེ་ཕུལ།)  ཉིན་བྱེད་མདངས་ཆགས་གསེར་ཞུན་ལྷུན་པོ་ལ།། འགྲན་བཟོད་རབ་བརྗིད་འཕགས་མཆོག་ནོར་གྱི་ལྷ།། འདོད་དགུའི་དངོས་གྲུབ་ཆར་དུ་འབེབས་མཛད་པའི།། གནོད་སྦྱིན་ནོར་གྱི་དབང་ཕྱུག་ཁྱོད་ལ་བསྟོད།།  (ཅེས་པས་བསྟོད།)   མདུན་བསྐྱེད་ཀྱི་ལྷའི་ཐུགས་ཀར་ཟླ་བའི་སྟེང་དུ་ཛཾ་ཡིག་གསེར་གྱི་མདོག་ཅན་གྱི་མཐར་སྔགས་འཕྲེང་སེར་པོའ་བསྐོར་བ་ལས་འོད་ཟེར་སེར་པོའི་ཚོགས་འཕྲོས།  ཕྱོགས་བཅུའི་རྒྱལ་བ་སྲས་བཅས་ཀྱི་སྐུ་གསུང་ཐུགས་ཡོན་ཏན་འཕྲིན་ལས་དང་བཅས་པའི་བྱིན་རླབས།  གཞན་ཡང་བླ་མ་

5A དགེ་བའི་བཤེས་གཉེན།  པཎྜིཏ།  གྲུབ་པ་ཐོབ་པ་རྣམས་ཀྱི་མཁས་བཙུན་བཟང་གསུམ།  ནུས་མཐུ།  འཇིག་རྟེན་ཁམས་ཀྱི་རྒྱལ་བློན་དྲེགས་ལྡན་ཡོངས་ཀྱི་ཚེ་དང་།  བསོད་ནམས།  གཟི་བརྗིད།  དཔལ་གཡང་།  མདོར་ན་སྲིད་པ་དང་ཞི་བའི་ཕུན་ཚོགས་ཐམས་ཅད་དང་།  ཁྱད་པར་དུ་ཡང་མཁོ་དགུའི་ལོངས་སྤྱོད་ཟས་ནོར་ལོངས་སྤྱོད་རྟ་ཕྱུགས་འཕེལ་བ་ལ་སོགས་པའི་དཔལ་འབྱོར་ཟད་མི་ཤེས་པས་རང་གི་གནས་ཁང་བང་མཛོད་ཕྱུག་ལྷས་ཐམས་ཅད་དུ་ནམ་མཁའ་མཛོད་བཞིན་དུ་ཕྱུར་བུར་ཁེངས་པར་(བསམ་ལ།)  ཨོཾ་ཛམྦྷ་ལ་ཛ་ལེནྡྲ་ཡེ་ཁམས་གསུམ་སྣོད་བཅུད་ཀྱི་དཔལ་འབྱོར་ལེགས་ཚོགས་ཐམས་ཅད་(བདག་གམ་སྦྱིན་པའི་བདག་པོའི་)དབང་དུ་འདུ་བར་གྱུར་ཅིག་སྭཱཧཱ།  (ཅེས་པ་ལྟ་བུ་གང་རུང་རྟགས་མ་བྱུང་གི་བར་དུ་བཟླ།  ཐུན་མཐར་ཡིག་བརྒྱས་ལྷག་ཆད་ཁ་བསྐངས།  མཆོད་བསྟོད་མདོར་བསྡུས་བྱས་ལ།       གསུམ་པ་མཇུག་ཏུ་ཇི་ལྟར་བྱ་བའི་ཚུལ་ནི།  གཏོར་མ་བདག་བསྐྱེད་ཀྱི་སྐབས་ལྟར་བྱིན་གྱིས་བརླབས།)  མདུན་བསྐྱེད་ཀྱི་ལྷའི་ལྗགས་འོད་ཀྱི་སྦུ་གུས་གཏོར་མའི་བཅུད་དྲངས་ཏེ་གསོལ་བར་གྱུར།  (ཞེས་སོགས་ཀྱིས་གཏོར་འབུལ། མཆོད་བསྟོད་སྔར་ལྟར་བྱ།  དེ་ནས་གཡང་འབོད་བྱ་བའི་ཚུལ་ནི།  འདི་ལྟར།)   ཧཱུཾ༑ བསམ་པའི་རེ་བ་མ་ལུས་ཡིད་བཞིན་ནོར།། དབང་གི་རྒྱལ་པོ་ལྟ་བུར་ལྷུན་གྲུབ་ཏུ།། སྩོལ་མཛད་ནོར་གྱི་དབང་ཕྱུག་ལྷག་པའི་ལྷ།། བརྩེ་ཆེན་ཐུགས་རྗེའི་ཤུགས་ཀྱིས་བདག་ལ་དགོངས།། སྣང་སྟོང་ལྷ་སྐུའི་རྣལ་འབྱོར་བརྟན་པའི་ངང་།། བཟླས་བརྗོད་

5B མཐར་ཕྱིན་གཉིས་མེད་ཡེ་ཤེས་ཀྱིས།། སྲིད་ཞིའི་འདོད་དགུ་ཡོངས་ལ་དབང་བསྒྱུར་བའི།། དགེ་ལེགས་ཕུན་ཚོགས་དཔལ་དང་གཡང་དུ་སྩོལ།། ཞིང་མཆོག་བདེ་ལྡན་མགོན་པོ་འོད་མཐའ་ཡས།། རིག་འཛིན་ཚེ་ལ་དབང་བའི་ལྷ་ཚོགས་ཀྱི།། བྱིན་ཆེན་མི་ཤིགས་ཐིག་ལེར་ཉེར་སིམ་པའི།། དགེ་ལེགས་ཕུན་ཚོགས་x།། སྐབས་གསུམ་བདག་པོ་གདེངས་ཅན་འཁོར་ལོས་བསྒྱུར།། དྲེགས་ལྡན་ཡོངས་ཀྱི་དཔལ་འབྱོར་གཟི་བརྗིད་དང་།། སྙན་པའི་གྲགས་པས་ཕྱོགས་ཀྱི་མཐར་ཁྱབ་པའི།། དགེ་ལེགས་ཕུན་ཚོགས་x།། སྟོབས་བཅུའི་དབང་ཕྱུག་ཟས་གཙང་སྲས་པོ་ཡིས།། རྒུད་པ་ཀུན་སེལ་ཤིས་པའི་རྫས་མཆོག་གི། དངོས་པོར་བྱིན་བརླབས་བཀྲ་ཤིས་རྫས་བརྒྱད་ཀྱི།། དགེ་ལེགས་ཕུན་ཚོགས་x།། ཕྱི་ནང་འགལ་རྐྱེན་ཉེར་འཚེ་མ་ལུས་པ།། རྟ་བདུན་འོད་ཀྱིས་མུན་ཚོགས་ཕྱོགས་ཀྱི་མཐར།། སྐྱོད་པ་ཇི་བཞིན་ཞི་བའི་ལས་འགྲུབ་པའི།། དགེ་ལེགས་ཕུན་ཚོགས་x།། ཚེ་བསོད་དཔལ་འབྱོར་མཁོ་དགུའི་ཡོན་ཏན་ཀུན།། དབྱར་གྱི་དཔལ་མོ་དང་འགྲོགས་ཆུ་གཏེར་བཞིན།། གོང་དུ་འཕེལ་བ་རྒྱས་པའི་ལས་འགྲུབ་པའི།། དགེ་ལེགས་ཕུན་ཚོགས་x།། རྒྱལ་བློན་འབངས་གསུམ་མི་ནོར་ཟས་གསུམ་ཀུན།། པདྨའི་དཔལ་ལ་བུང་བའི་ཚོགས་འདུ་བཞིན།། མྱུར་དུ་འགུགས་པ་དབང་གི་ལས་འགྲུབ་

6A པའི།། དགེ་ལེགས་ཕུན་ཚོགས་དཔལ་དང་གཡང་དུ་སྩོལ།། བསམ་སྦྱོར་ལོག་ལྟའི་ནག་ཕྱོགས་དགྲ་ཡི་སྡེ།། འཐོར་རླུང་དྲག་པོའི་ཤུགས་ཀྱིས་སྤྲིན་ཚོགས་བཞིན།། མྱུར་དུ་ཚར་གཅོད་དྲག་པོའི་ལས་འགྲུབ་པའི།། དགེ་ལེགས་ཕུན་ཚོགས་དཔལ་དང་གཡང་དུ་སྩོལ།། མདོར་ན་ཇི་ལྟར་བསམ་པའི་རེ་བ་ཀུན།། དཔག་བསམ་ཡོངས་འདུའི་ལྗོན་པའི་དཔེ་ལྟ་བུར།། ལྷུན་གྱིས་འགྲུབ་པའི་དཔལ་གཡང་ཕུན་ཚོགས་ཀུན།། རབ་རྒྱས་ཤིས་པ་རྒྱ་མཚོས་ས་ཁྱབ་ཤོག།  (ཅེས་གཡང་འབོད་ཀྱི་ཚིགས་བཅད་འདི་རྣམས་བརྗོད།  ཐུན་བཞིར་གཅོད་པའི་དབང་དུ་བྱས་ན།  ཕྱི་མ་གསུམ་གྱི་སྐབས་སུ་སྔོན་དུ་བདག་བསྐྱེད་གོང་ལྟར་ལ།  མདུན་བསྐྱེད་ཀྱི་སྐབས་ས་བོན་དོར་ཏེ་སྔར་ཡོད་གསལ་འདེབས་ཀྱི་ཚུལ་དུ་མཆོད་བསྟོད་ཀྱི་བར་གོང་བཞིན་བྱ་ཞིང་།  གཏོར་འབུལ་དང་གཡང་འབོད་ཐུན་ཐ་མའི་མཐར་བྱ།  དེ་ལྟར་ཞག་ལྔའམ་བདུན་ནམ་ཉེར་གཅིག་གི་བར་སྒྲུབ་པའི་གྲོལ་རྒྱུའི་ཐུན་སྔ་མའི་སྔ་དྲའི་ཐུན་གྱི་མཐར།)  གང་ཡང་བདག་བློ་(སོགས་དང་།)  མ་རྙེད་ཡོངས་སུ་(སོགས་ཀྱིས་ནོངས་པ་བཟོད་པར་གསོལ།  མདུན་བསྐྱེད་ཀྱི་ལྷ།)  འདིར་ནི་གཟུགས་དང་ལྷན་ཅིག་ཏུ།།  (ཞེས་པ་ནས།)  ཨོཾ་སུ་པྲ་ཏིཥྛ་བཛྲ་ཡེ་སྭཱཧཱ།  (ཞེས་པའི་བར་བརྗོད་དེ་རྟེན་ལ་བརྟན་བཞུགས་བྱ།)  བདག་བསྐྱེད་ཀྱི་ཡེ་ཤེས་པ་རང་བཞིན་གྱི་གནས་སུ་གཤེགས།  དམ་ཚིག་པ་སྐུའི་སྟོད་སྨད་ནས་རིམ་གྱི་འོད་དུ་ཞུ་སྟེ་མི་དམིགས་པ་སྟོང་པར་གྱུར།  སྟོང་པའི་ངང་ལས་

6B འཕགས་པ་ཛམྦྷ་ལའི་སྐུར་བཞེངས་པའི་སྤྱི་བོར་ཨོཾ།  མགྲིན་པར་ཨཱཿ  ཐུགས་ཀར་ཧཱུཾ་གིས་མཚན་པར་གྱུར།  (ཞེས་བརྗོད།  གའུ་འམ་སྒྲོམ་རྟེན་དང་བརྟེན་པར་བཅས་པ་མཛོད་ཕུགས་སོགས་སུ་སྤྱན་འདྲེན་པའི་ཚེ།  སྤོས་དུད་དང་རོལ་མོའི་སྒྲས་མདུན་བསུས་ཏེ་སྤྱན་དྲངས་ལ།  སྐར་མ་རྒྱལ་སོགས་གཟའ་སྐར་འཕྲོད་སྦྱོར་ལེགས་པའི་ཉིན་མཆོད་བསྟོད་བཟླས་པ་མདོར་བསྡུས་གཡང་འབོད་དང་བཅས་པ་དུས་དུས་སུ་བྱ་ཞིང་།  བཀྲ་ཤིས་ཀྱི་ཚིགས་སུ་བཅད་པས་མཐའ་བརྒྱན་པར་བྱའོ།།  ཞེས་ནོར་བདག་འཕགས་པ་ཛམྦྷ་ལ་སེར་པོའི་གཏེར་སྒྲུབ་བྱེད་ཚུལ་འདོད་འཇོའི་བུམ་བཟང་ཞེས་བྱ་བ་འདི་ནི་ཁྲོམ་ཐོག་དགོན་གྱི་མཁན་ཟུར་བློ་བཟང་འཇམ་དབྱངས་ཀྱིས་ལྷ་དར་དང་བཅས་ཏེ་བསྐུལ་བ་ལྟར། ༧ཤཱཀྱའི་བཙུན་པ་བློ་བཟང་རྒྱལ་མཚན་སེངྒེས་སྦྱར་བའི་ཡི་གེ་བ་ནི་མཛོད་པ་ཆོས་རྗེའི་ཚ་བོ་བསྟན་པ་རྒྱལ་མཚན་གྱིས་བགྱིས་པ་ཛ་ཡནྟུ།།      །།)       ༈  པར་འདི་ས་དམར་གུ་རུས་ལྷག་བསམ་གྱིས།། བསྐྲུན་པའི་དགེ་བས་བདག་སོགས་འགྲོ་བ་ཀུན།། འཕགས་མཆོག་ཛམྦྷ་ལ་ཡིས་རྗེས་བཟུང་སྟེ།། ཆོས་འབྱོར་བདེ་སྐྱིད་དཔལ་ལ་རོལ་གྱུར་ཅིག།       །།