ཨོཾ་བདེ་ལེགས་སུ་གྱུར་ཅིག། ངག་གི་དབང་ཕྱུག་ཡབ་ཡུམ་ལ་ཕྱག་འཚལ་ལོ།།
ངག་གི་དབང་ཕྱུག་གངས་ཅན་ལྷ་གཅིག་༸སྐྱབས་མགོན་ཕྱག་ན་པདྨོ་ཡི།།
འཕྲིན་ལས་རྣམ་བཞི་ལྔ་ལྡན་ཡུལ་དུ་ཐུགས་རྗེའི་སྟོབས་ཀྱིས་དྲངས་མཛད་ཅིང་།།
འགྲོ་ལ་བྱམས་པའི་ཐུགས་རྒྱུད་དག་པས་མཛད་པའི་ཁུར་གྱིས་མི་ངལ་བ།།
གྲུབ་པའི་དབང་ཕྱུག་དཔལ་ལྡན་བླ་མ་སྲིད་ཞི་ཡོངས་ཀྱི་གཙུག་ན་རྒྱལ།།༡
ཁམས་གསུམ་དགྲ་བགེགས་ཟ་བར་ནུས་པ་ཁྲོ་རྒྱལ་རྟ་མཆོག་རོལ་པ་ཆེའི།།
སྒྲུབ་པའི་གོ་འཕང་མཐོན་པོར་གཤེགས་ཀྱང་སྦས་པའི་བརྟུལ་ཞུགས་མཆོག་གནས་པ།།
སྐུ་སྐྱེ་སྔ་མའི་སྐྱེས་བུ་མཆོག་དེ་དད་པ་ཅན་གྱིས་བསྙེན་པ་ན།།
མ་འོངས་སྨན་གྱི་ལྗོན་ཤིང་ཆེན་པོའི་སྐྱེད་བྱེད་འགྱུར་བའི་དབུགས་དབྱུང་བསྩལ།།༢
ཇི་ལྟར་པདྨོ་འདམ་ལས་སྐྱེས་ཀྱང་དྲི་མས་མ་བསླད་ཡིད་འོང་བཞིན།།
མངལ་ལས་བལྟམས་ཀྱང་སྐྱོན་གྱིས་མ་གོས་དམ་པའི་རང་བཞིན་ལྷན་ཅིག་འགྲོགས།།
ཚེ་རབས་ཕྲེང་བར་དམ་ཚིག་འབྲེལ་བས་སྐྱབས་མཆོག་བླ་མས་ཡོངས་བཟུང་སྟེ།།
སྲིད་འདིར་མཛད་པ་རྒྱ་ཆེར་སྐྱོང་བའི་བདེན་པའི་གླུ་དབྱངས་ཐོག་མར་གྱེར།།
སྐུ་བགེགས་མཚན་མས་ལྷ་ལྡན་ཞིང་དུ་མི་སྤོའི་དབང་མེད་ཆོ་འཕྲུལ་གྱེས།།
བཟང་པོའི་མཛད་པས་འགྲོ་བ་གདུལ་ཕྱིར་ཁྱིམ་གྱི་གནས་ནས་མངོན་བྱུང་སྟེ།།
ཕྱོགས་ལས་རྣམ་རྒྱལ་དཔལ་ལྡན་འབྲས་སྤུངས་མཁས་མང་བློ་གསལ་འདུས་སྡེ་ཆེར།།
པད་མོའི་མཚོ་ལ་ངང་མོ་བཞིན་དུ་དྲན་དབང་རྒྱ་མཚོའི་རྗེས་སུ་ཞུགས།།༤
ཕལ་པའི་ཚུལ་ལས་རིང་དུ་འདས་པའི་བརྟུལ་ཞུགས་མཆོག་གིས་ལེགས་བསྡམས་ཤིང་།།
བཤེས་གཉེན་མཆོག་དམན་གང་ལྟར་གྲགས་ཀྱང་སངས་རྒྱས་དངོས་སུ་གུས་པས་བསྟེན།།
གཞན་གྱི་དུ་ཁར་གཡོལ་བར་མི་སྤྱོད་དེ་བས་སྙིང་རྗེས་དམ་དུ་འཁྱུད།།
གཞོན་ནུ་ཉིད་ནས་རྒྱལ་སྲས་ཐུ་བོའི་མ་སྨད་མཛད་པ་འདི་རྨད་བྱུང་།།༥
སྐུ་ཡི་མཛད་པ་མཐོང་བ་དོན་ལྡན་བསོད་ནམས་བྱེ་བའི་འབྱུང་གནས་ཉིད།།
གསུང་ནི་ཚངས་དབྱངས་དཔལ་ལ་ཅོ་འདྲི་མཉན་པས་མི་ངོམས་བརྟན་པ་འཕྲོག།
ཐུགས་ནི་གཉིས་མེད་ཡེ་ཤེས་དབྱིངས་ལས་དག་པའི་སྣང་བ་འགོག་མེད་ཤར།།
བྱམས་བརྩེའི་སྒོམ་པ་ཀློང་དུ་བརྡོལ་བས་གསང་གསུམ་མཛད་པ་བརྗོད་ལས་འགོངས།།༦
ཉི་གཞོན་དབང་ཕྱོགས་ས་འཛིན་བརྒལ་ཚེ་སྨག་རུམ་མིང་ཙམ་ལུས་པ་ལྟར།།
སྐུ་ཡི་ན་ཚོད་ཕྲ་བར་མི་ལྟོས་རིག་འཛིན་སྐྱབས་མགོན་བླ་མ་ཡིས།།
ཧ་ཡ་གྲི་བའི་དཀྱིལ་འཁོར་ཆེན་པོར་དབང་གི་ཆུ་བོས་ལེགས་སྨིན་པས།།
ས་བདག་ཀླུ་དང་མི་མིན་བཙན་སོགས་དེ་ཡི་མོད་ལ་བྲན་དུ་བཀོལ།།༧
གསང་གསུམ་ཡོན་ཏན་ཀློང་དུ་རྡོལ་ཚེ་ཉི་ཤར་སྦར་མོས་ཁེབས་མིན་ལྟར།།
སྦས་པར་མི་སྤྱོད་མགོན་མེད་སྐྱེ་བོའི་གཉེན་དང་སྐྱབས་སུ་བཞེངས་པ་ན།།
སྙན་པའི་བ་དན་ལྷ་ཉིན་དཀར་པོ་སྲིད་པའི་ཁོང་ལས་ཡོངས་བརྒལ་ཏེ།།
རབ་འབྱམས་ཞིང་གི་རྒྱལ་དང་དེ་སྲས་བསྔགས་པའི་ལྗགས་ཡངས་ཅིར་ཡང་གྲོལ།།༨
༧རྒྱལ་བའི་ཡུམ་མཆོག་གདུག་ཅན་ཀླུ་དང་ས་བདག་གདོན་གྱིས་ཉེན་པ་ན།།
ཉིན་བྱེད་དབང་པོས་མུན་ནག་སྨག་དང་འཐོར་རླུང་དྲག་པོས་སྤྲིན་ལ་བཞིན།།
ཁྱེད་ཞབས་བསྙེན་པས་ཉིད་ཀྱི་བྱིན་མཐུས་དེ་ཡི་མོད་ལ་གྲོལ་མཛད་པས།།
བཀའ་དྲིན་བསབ་སླད་མཆོད་སྦྱིན་ཡངས་པོས་ཆོས་མཛད་གོ་སར་མངའ་གསོལ་ལོ།།༩
གངས་ཅན་བསྟན་སྲིད་མི་རིགས་བཅས་པ་ཉམ་ངའི་གནས་སུ་གྱར་བ་ན།།
དམར་པོའི་དམག་གིས་སྐུ་ལ་བདོ་བའི་སྦྱོར་བ་ལན་བརྒྱར་བརྩམས་མོད་ཀྱང་།།
གླགས་རྙེད་མ་གྱུར་བལ་པོའི་མི་ཞེས་ཁྱེད་ལས་གཡོལ་བའི་བརྫུ་བསྟེན་པས།།
གངས་ཅན་མགོན་པོའི་ཞབས་རྗེས་བསྙེགས་ཏེ་འཕགས་ཡུལ་ཉེ་ཞོ་མེད་པར་བགྲོད།།༡༠
དྲིན་ཅན་བླ་མ་རྡོ་རྗེ་འཆང་དབང་སླར་ཡང་མཇལ་བའི་སྐབས་རྙེད་དེ།།
དམ་ཆོས་བདུད་རྩི་ངོམ་མེད་འཐུངས་ཤིང་སྤྲུལ་པའི་ཆོས་རྒྱལ་ཆེན་པོར་ཡང་།།
སྔོན་གྱི་དམ་ཚིག་གཉེན་པོ་སྒྲོག་བཞིན་ཐུགས་དམ་གནད་ནས་བསྐུལ་བའི་ཚེ།།
དངོས་སུ་ཞལ་བསྟན་རྣམ་བཞིའི་འཕྲིན་ལས་སྒྲུབ་པའི་གཡར་དམ་ཁྱེད་ལ་ཕུལ།།྄༡
No comments:
Post a Comment