དྲི་བ། ༡ ལེགས་བཤད་འདོམས་ངག་འབྲུག་སྒྲ་སྒྲོག་པ་ཡིས༎ དྲན་དབང་རྨ་བྱའི་བློ་ལ་དགའ་སྐྱེད་ཅིང་༎ དམ་ཆོས་དགུང་ཆར་ཕབ་པའི་བཅུད་བཟང་པོས༎ ཐུབ་བསྟན་འཛིན་མ་གསོ་མཛད་བླ་མ་རྒྱལ༎ ཞེས་པའི་ཤོ་ལོ་ཀ་འདིས་མཆོད་པ་བརྗོད་ཡུལ་ངོས་བཟུང་ནས། ཚིག་འགྲེལ་བྲིས།
ལན། ཤོ་ལོ་ཀ་འདིསའི་མཆོད་བརྗོད་ཀྱི་ཡུལ་ནི། གཞུང་འདི་རྩོམ་པ་པོ་བསྟན་དར་ལྷ་རམས་པའི་རྩ་བའི་བླ་མ་ཀློང་རྡོལ་བླ་མ་རིན་པོ་ཆེ་ངག་དབང་བློ་བཟང་མཆོག་ཡིན། ཚིག་འགྲེལ་ནི། (མདོ་སྔགས་ཀྱི་)ལེགས་བཤད་འདོམས་(པའི་གསུང་)ངག་(གི་)འབྲུག་སྒྲ་སྒྲོག་པ་(དེ་)ཡིས་དྲན་དབང་(སྟེ་མཁས་པ་)རྨ་བྱའི་བློ་ལ་དགའ་(བ་)སྐྱེད་(པར་བྱེད་)ཅིང་། དམ་(པའི་)ཆོས་(ཀྱི་བློ་བསྐྱེད་ཀྱི་)དགུང་ཆར་ཕབ་པའི་བཅུད་བཟང་པོསས་ཐུབ་(པ་སངས་རྒྱས་ཀྱི་)བསྟན་(པའི་)འཛིན་མ་(ཉམས་པ་)གསོ་(ཞིང་མི་ཉམས་པ་འཕེལ་བར་)མཛད་(པའི་དྲིན་ཅན་རྩ་བའི་)བླ་མ་(ངག་དབང་བློ་བཟང་དཔལ་བཟང་པོ་)རྒྱལ་(གྱུར་ཅིག) ཅེས་པའོ༎
དྲི་བ། ༢ ས་སྟེང་འདི་ན་རིན་ཆེན་རྣམ་གསུམ་སྣང་།། ཞེས་པའི་རིན་པོ་ཆེ་གསུམ་གང་དང་གང་ཡིན་ནམ།
ལན། རིན་པོ་ཆེ་གསུམ་ནི། རྗེ་རིན་པོ་ཆེས། རིན་པོ་ཆེ་གསུམ་གྱི་གཏམ་གྱི་སྦྱོར་བ་ལས།
རིགས་ལམ་ཕྲ་མོ་འབྱེད་པའི་རྣམ་དཔྱོད་དང་༎
གཞུང་ལུགས་གདམས་པར་ཤར་བའི་ཉམས་ལེན་དང་༎
ཚིག་སྦྱོར་ཚུལ་ལ་མཁས་པའི་ངག་གི་དཔལ༎
ས་སྟེང་འདི་ན་རིན་ཆེན་རྣམ་གསུམ་སྣང་༎ ཞེས་གསུངས་པ་ལྟར།
༡༽ གཞུང་ཆེན་མོའི་་ཚིག་དོན་རིགས་ལམ་གྱི་སྒོ་ནས་ཤེས་པའི་ཤེས་རབ།
༢༽ གཞུང་དོན་ཤེས་པ་རྣམསརང་གི་ཉམས་སུ་ལེན་པའི་ཉམས་ལེན།
༣༽ གཞུང་དོན་རང་གིས་ཤེས་ཤིང་ཉམས་སུ་ལེན་པ་དེ་གཞན་ལ་སྤེལ་བའི་ཚིག་སྦྱོར་ཕུན་སུམ་ཚོགས་པའི་རྩོམ་སྟེ་གསུམ་ཡོན་ནོ༎
དྲི་བ། ༣ ཡི་གེའི་ངོ་བོ་དང་། དབྱེ་བ། ངེས་ཚིག །བཅས་གསལ་བར་བྲིས།
ལན། ཡི་གེའི་ངོ་བོ་ནི། མིང་ཚིག་རྩོམ་པའི་གཞིར་གྱུར་པའི་སྐད་ཀྱི་གདངས་སོ། །
ཡི་གེ་ལ་དབྱེ་ན། དབྱངས་དང་གསལ་བྱེད་གཉིེས་ཡོད།
ངེས་ཚིག་ནི། ཡི་གེའི་སྐད་དོད་ཨ་ཀྴར་ཞེས་པ་འགྱུར་མེད་ལ་འཇུག་པས། ཡུལ་སོ་སོའི་སྐད་མི་འདྲ་ཡང་། དབྱངས་གསལ་གྱི་ཡི་གེ་རྣམས་གང་ཟག་སུས་བརྗོད་ཀྱང་སྒྲའི་གདངས་ཀྱི་རྣམ་པ་མི་འགྱུར་བར་གནས་པས་ན་ཡི་གེ་ཞེས་བྱའོ༎
དྲི་བ། ༤ ཡི་གེའི་རྒྱུ་བཞི་་གང་དང་གང་ཡིན་དྲིལ་བུ་དང་དཔེ་དོན་སྦྱར་ནས་གསལ་བར་བྲིས།
ལན། ཡི་གེའི་རྒྱུ་ལ། གནས་དང་། བྱེད་པ་དང་། རླུང་དང་། རྣམ་པར་རྟོག་པའམ་རྣམ་ཤེས་པ་བཞིའོ།། དེ་དག་གིས་རྒྱུ་ཅི་ལྟར་བྱེད་ཅེ་ན། གནས་ནི་གཞིའི་རྒྱུ་སྟེ། དྲིལ་བུའི་ཁོག་པ་ལྟ་བུའོ། །བྱེད་པ་ནི་ཡི་གེ་འབྱིན་པར་བྱེད་པའི་རྒྱུ་སྟེ། དྲིལ་བུའི་ལྕེ་ལྟ་བུ། རླུང་ནི་སྐྱོད་པར་བྱེད་པའི་རྒྱུ་སྟེ། དྲིལ་བུ་སྐྱོད་པའི་ལག་པ་ལྟ་བུའོ། །རྣམ་རྟོག་དང་རྣམ་ཤེས་ནི་སྐུལ་བར་བྱེད་པའི་རྩ་བའི་རྒྱུ་སྟེ། དྲིལ་བུ་འཁྲོལ་བར་བྱེད་པའི་སྐྱེས་བུ་ལྟ་བུའོ།།
དྲི་བ། ༥ ཡི་གེའི་རྒྱུ་བཞི་ལས་ཡི་གེ་རྣམས་ཇི་ལྟར་འབྱུང་གསལ་བར་བྲིས།
ལན། དང་པོ་རྣམ་རྟོག་གིས་རླུང་གཡོས་ཏེ་དབུགས་བྱུང་བ་དང་དེས་གནས་དང་བྱེད་པ་རྣམས་སྐྱོད་དེ་དེ་དག་མི་འདྲ་བའི་ཁྱད་པར་ལས་ཡི་གེ་སྣ་ཚོགས་འབྱུང་བ་ཡིན་ནོ།།
དྲི་བ། ༦ ཡི་གེའི་སྐྱེ་གནས་གང་དང་གང་ཡིན། སྐྱེ་གནས་དེ་དག་འདུ་ན་གང་དུ་བསྡུས་གསལ་བར་བྲིས།
ལན། གནས་ནི་བརྒྱད་དེ། ཁོག་པ་དང། མགྲིན་པ་དང་། རྐན་དང་། ལྕེ་དང་། སྣ་དང་། སྤྱི་བོ་དང་། སོ་དང་། མཆུ་རྣམས་སོ། །གནས་དེ་རྣམས་ཀྱང་གཉིས་སུ་འདུ་སྟེ། ༡ དོག་པའི་གནས་དང་། ༢ ཡངས་པའི་གནས་སོ། །དེ་ལ་དོག་པའི་གནས་ནི། མགྲིན་པ་དང་། སྣ་དང་། སྤྱི་བོ་གསུམ་མོ༎ ཡངས་པའི་གནས་ནི། ཁོག་པ་དང་། རྐན་དང་། ལྕེ་དང་། སོ་དང་། མཆུ་ལྔའོ༎
དྲི་བ། ༧ ཡི་གེའི་བྱེད་པ་ལ་དབྱེ་ན་ག་ཚོད་ངོས་འཛིན་གྱིས།
ལན། བྱེད་པ་ལ་དབྱེ་ན། ཕྲད་པ་དང་། ཅུང་ཟད་ཕྲད་པ་དང་། བཙུམ་པ་དང་། ཕྱེ་བ་དང་། དོག་པ་དང་། ཡངས་པ་དང་དྲུག།
དྲི་བ། ༨ རྒྱ་གར་གྱི་ཡི་གེའི་དབྱངས་གསལ་ཇི་ཙམ་ཡོད། དེ་དག་ལ་མིང་ངམ་ཐ་སྙད་གང་བཏགས་བཅས་གསལ་བར་བྲིས།
ལན། རྒྱ་གར་གྱི་ཡི་གེ་ལ་ཨཱ་ལིི་ཀཱ་ལི་གཉིས་ཡོད་ཅིང་། ཨཱ་ལི་ནི་ཨ་ཕྲེང་སྟེ་དབྱངས་ཡིག་དང་། ཀཱ་ལི་ནི་ཀ་ཕྲེང་སྟེ་གསལ་བྱེད་ཀྱི་ཡི་གེའོ། །དབྱངས་དེ་ལ་གྲངས་བཅུ་དྲུག་དང་། གསལ་བྱེད་སོ་བཞིར་ཡོད་དོ། །དེ་དག་ལ་ཐ་སྙད་འདོགས་པའི་ཚུལ་ནི། ཨ་ཨཱ་ཨི་ཨཱི་ཨ་ཨཱུ་རྀ་རཱྀལྀ་ལཱྀ་ཨེ་ཨཻ་ཨོ་ཨཽ་སྟེ་བཅུ་བཞི་ལ་དབྱངས་ཡིག་ཅེས་བྱ་ཞིང་། ཨཾ་ལ་སྣ་ལྡན་དང་། ཨཿལ་རྣམ་བཅད་ཅེས་བཏགས་ཤིང་། ཀ་ཁ་ག་གྷ་ང་་ལྔ་ལ་ཀ་སྡེ། ཙ་ཚ་ཛ་ཛྷ་ཉ་ལྔ་ལ་ཙ་སྡེ། ཊ་ཋ་ཌ་ཌྷ་ཎ་ལྔ་ལ་ཊ་སྡེ། ཏ་ཐ་ད་དྷ་ན་ ལྔ་ལ་ཏ་སྡེ། པ་ཕ་བ་བྷ་མ་ལྔ་ལ་པ་སྡེ་ཞེས་བྱ་ཞིང་། ཡ་ར་ལ་ཝ་བཞི་ལ་མཐར་གནས་ཀྱི་ཡི་གེ །ཤ་ཥ་་ས་ཧ་བཞི་ལ་དྲོ་བའི་ཡི་གེ །ཀྵ་ལ་མཐར་ཟད་ཀྱི་ཡི་གེ་ཞེས་བྱའོ༎
དྲི་བ། ༩ འཐུག་པོ་ལྔ་དང་ལོག་པ་ལྔའི་ངོས་འཛིན་གྱིས་དང་།
ལན། འཐུག་པོ་ལྔ་ནི། གྷ་ཛྷ་ཌྷ་དྷ་བྷ་རྣམས་དང་། ལོག་པ་ལྔ་ནི། ཊ་ཋཌ་ཌྷ་ཎ་ལྔ་རྣམས་ཡིན།
དྲི་བ། ༡༠ ཡ་ར་ལ་ཝ་བཞི་ལ་མཐར་གནས་དང་། ཤཥ་ས་ཧ་བཞི་ལ་དྲོ་བ། ཀྵ་ལ་མཐར་ཟད་ཅེས་བརྗོད་པའི་རྒྱུ་མཚན་གང་ཡིན་གསལ་བར་བྲིས།
ལན། དེའི་རྒྱུ་མཚན་ནི། ཡ་ནི་ཀ་ཅའི་མཐའ། ར་ནི་ཊའི་མཐའ། ལ་ནི་ཏའི་མཐའ། ཝ་ནི་པའི་མཐའོ།། དེ་དག་གང་ནས་བྱུང་བའི་གནས་མཐུན་པའི་ཕྱིར་དེ་དག་གི་མཐར་གནས་སུ་བཞག་གོ། ཤ་ཥ་་ས་ཧ་བཞི་ལ་དྲོ་བའི་ཡི་གེ་ཞེས་བྱ་སྟེ། དབུགས་དྲོ་བར་བྱ་བའི་ཕྱིར་དྲོ་བ་ཞེས་བྱའོ། ཀྵ་ལ་མཐར་ཟད་ཀྱི་ཡི་གེ་ཞེས་བྱ་སྟེ། ཡི་གེ་རྣམས་ཀྱི་ཟད་མཐར་གནས་པའི་ཕྱིར་མཐར་ཟད་ཅེས་བྱའོ།།
དྲི་བ། ༡༡ བོད་ཀྱི་རྒྱལ་པོ་སུའི་དུས་སུ་ཡི་གེའི་སྲོལ་གཏོད། སྲོལ་གཏོད་པ་པོ་སུ་ཡིན། ཡི་གེ་གང་ལ་དཔེ་བྱས་ནས་བོད་ཡིག་བཟོས་པ་ཡིན་གསལ་བར་བྲིས།
ལན། ཆོས་རྒྱལ་སྲོང་བཙན་སྒམ་པོའི་དུས་སུ། ཐོན་མི་སམ་བྷོ་ཊ་མཆོག་གིས་རྒྱ་གར་གྱི་ཡི་གེ་ལ་དཔེ་བྱས་ནས་བོད་ཡིག་གི་སྲོལ་གཏོད་པ་ཡིན།
དྲི་བ། ༡༢རྒྱ་གར་གྱི་ཡི་གེ་ལ་འཕྲི་བསྣན་མཛད་ནས་བོད་ཀྱི་དབྱངས་གསལ་ཇི་ལྟར་གཏན་ལ་འབེབས་པ་རྣམས་གསལ་བར་བྲིས།
ལན། དབྱངས་ཡིག་བཅུ་དྲུག་ལས། དང་པོ་ཨ་ནི་དགོས་དབང་གིས་གསལ་བྱེད་དུ་བཞག །བོད་ཡིག་ལ་ཡི་གེ་རིང་ཐུང་སོགས་ཀྱི་ཐ་སྙད་མི་དགོས་པས། ཨི་ཨུ་ཨེ་ཨོ་བཞི་ལ་བོད་སྐད་དུ་གུག་གུ་ཞབས་ཀྱུ་འགྲེང་བུ་ན་རུ་ཞེས་ཐ་སྙད་བཏགས་ནས་དབྱངས་ཡིག་བཞིར་མཛད་ཅིང་། ལྷག་མ་བཅུ་གཅིག་འཕྲི་བར་མཛད་དོ།། གསལ་བྱེད་སོ་བཞི་ལས་ཀྱང་། འཐུག་པོ་ལྔ་དང་ལོག་པ་ལྔ་ཀྵ་ཡིག་སྟེ་བཅུ་གཅིག་བོད་སྐད་ལ་མི་མཁོ་བས་ཕྲི་ཞིང་། རྒྱ་སྐད་ལ་མེད་ཀྱང་བོད་སྐད་ལ་ཉེ་བར་མཁོབའི་ཡི་གེ་སྟོད་དུ་ཅ་ཆ་ཇ་གསུམ་དང་།སྨད་དུ་ཞ་ཟ་འ་སྟེ་ཡི་གེ་དྲུག་གསར་དུ་བསྣན་ནས་གསལ་བྱེད་ཀྱི་ཡི་གེ་སུམ་ཅུར་གཏན་ལ་ཕབ་བོ༎
དྲ་ི་བ། ༡༣ ཡི་གེ་གསར་པ་རྣམས་རྙེད་པའི་རྐྱེན་གང་ཡིན་བཅས་གསལ་བར་བྲིས།
ལན། ཡི་གེ་དེ་དག་རྙེད་པའི་རྐྱེན་ནི། རྒྱ་བོད་གཉིས་ཀྱི་སྐད་རིགས་མི་མཐུན་པའི་དབང་གིས་སྒྲ་འགའ་ཞིག་བསྒྱུར་དཀའ་བ་བྱུང་ནས་ཐོན་མི་སམྦྷོ་ཊ་རེ་ཞིག་ཐུགས་མུག་སྟེ་བཞུགས་པ་ན། མི་དཀར་པོ་ཞིག་བྱུང་བར། སློབ་དཔོན་གྱིས། ཁྱེད་གང་ནས་བྱོན་དྲིས་པར། དེ་ན་རེ། ‘ཞང་ཞུང་’ ནས་འོངས་ཟེར། གང་དུ་འགྲོ་སྲིས་པས། ‘ཟ་འོར་’ དུ་འགྲོ་ཟེར། གང་བྱེད་དུ་འགྲོ་དྲིས་པས། ‘ཇ་’ ཉོ་རུ་འགྲོ་ཟེར། ནམ་སླེབ་དྲིས་པས། ‘ཅི་ཆ་’ ཟེར་བའི་མུ་ནས་མི་དེ་གར་སོང་ཆ་མེད་དུ་སོང་། དེ་ནས་སློབ་དཔོན་གྱིས་མི་དེའི་སྐད་ལ་དཔྱད་པས། ཞང་ཞུང་ཞེས་པའི་ཚིག་ཟུར་ལས་ ‘ཞ་’རྙེད། ཟ་འོར་ཞེས་པའི་ཚིག་ཟུར་ལས་ ‘ཟ་འ་’ གཉིས་རྙེད། ཇ་ཉོ་རུ་འགྲོ་ཞེས་པའི་ཚིག་ཟུར་ ’ཇ་’ རྙེད། ཅི་ཆ་ཞེས་པའི་ཚིག་ཟུར་ལས་ ‘ཅ་ཆ་’ གཉིས་རྙེད་ནས་རྒྱ་གར་ན་མེད་པའི་ཡི་གེ་དྲུག་བསྣན་པར་མཛད་དོ།།
དྲི་བ། ༡༤ སྲོག་དང་རྐྱེན་གྱི་ཡི་གེ་གང་དང་གང་ཡིན་གསལ་བར་བྲིས།
ལན། སྲོག་གི་ཡི་གེ་ནི། དབྱངས་བཞི་དང་ཚེག་ཡིན་ནོ༎
དྲི་བ། ༡༥ ཕ་མ་བུ་ཚའི་ཡི་གེ་གང་དང་གང་ཡིན་རྒྱུ་མཚན་བཅས་བྲིས།
ལན། ཡི་གེའི་མ་ནི་ཨ་ཡིན་ཏེ༎
ཡི་གེ་རྣམས་ཀྱི་འབྱུང་གནས་ཡིན༎
ཕ་ནི་གསལ་བྱེད་ཉི་ཤུ་དགུ༎
བརྗོད་བྱ་སྟོན་པའི་གཙོ་བོ་ཡིན༎
བུ་ཡིག་ཕ་མའི་ཡི་གེར་ལྟོས༎
ངག་ཏུ་ཐོན་དགོས་དེ་ལ་གཉིས༎
སྟེང་ན་ཞྭ་ལྟར་མཛེས་པ་ནི༎
གུག་གུ་འགྲེང་བུ་རྣ་རུ་གསུམ༎
འོག་ན་གདན་ལྟར་མཛེས་པ་ནི༎
ཞབས་ཀྱུ་ཡ་བཏགས་ར་བཏགས་གསུམ༎
དྲི་བ། ༡༦ ཕོ་མོ་མ་ནིང་གི་ཡི་གེ་གང་དང་གང་ཡིན་གསལ་བར་བྲིས༎
ལན།
སྤྱིར་ན་དབྱངས་མོ་གསལ་བྱེད་ཕོ༎
གསལ་བྱེད་ནང་གསེས་དབྱེ་བ་ནི༎
ཀ་ཅ་ཏ་པ་ཙ་རྣམས་ཕོ༎
ཁ་ཆ་ཐ་ཕ་ཚ་མ་ནིང་༎
ག་ཇ་ད་བ་ཛ་ཝ་ཞ༎
ཟ་འ་ཡ་ཤ་ས་རྣམས་མོ༎
ང་ཉ་ན་མ་ཤིན་ཏུ་མོ༎
ར་ལ་ཧ་ནི་མོ་གཤམ་སྟེ༎
ཨ་ནི་ཀུན་གྱི་སྲོག་ཏུ་ཞུགས༎
སྒྲ་གདངས་དྲག་ཞན་བར་མ་ཡིས༎
ཕོ་དང་མོ་དང་མ་ནིང་ངོ་༎
དྲི་བ། ༡༧ སྒྲའི་ང་རོའི་དབྱེ་བ་ཇི་ལྟར་ཡོད་དེ་དག་གི་མཚན་གཞི་བཅས་གསལ་བར་བྲིས༎
ལན། སྤྱིར་བོད་ཡིག་ལ་དབྱངས་ཀྱི་ང་རོ་ལྔ་ཡོད་དེ། དྲང་པོ་དང་། བཀུག་པ་དང་། སྨད་པ་དང། བསྒྲེང་བ་དང་། བསྟོད་པའོ༎ ༡ དྲང་པོ་ནི། ཀ་ནས་ཨ་ཡི་བར་གྱི་ཡི་གེ་སོ་ན་གནས་པ་རྣམས་དང་། ༢ བཀུག་པ་ནི། ཀི་སོགས་གུག་གུ་ཅན་རྣམས་དང་། ༣ སྨད་པ་ནི། ཀུ་སོགས་ཞབས་ཀྱུ་ཅན་རྣམས་དང་། ༤ བསྒྲེང་བ་ནི། ཀེ་སོགས་འགྲེང་བུ་ཅན་རྣམས་དང་། ༥ བསྟོད་པ་ནི། ཀོ་སོགས་རྣ་རུ་ཅན་ རྣམས་སོ༎
དྲི་བ། ༡༨ དབྱངས་ཀྱི་ང་རོའི་རྩ་བ་ཇི་ཡོད་དང་། དབྱངས་ཀྱི་ཤུགས་འབྱུང་བའི་གནས་ཀྱི་རྩ་བ་ཇི་ཡོད་ངོས་བཟུང་ནས། རྩ་བ་ཡིན་ཚུལ་བྲིས།
ལན། བོད་ཡིག་གི་ང་རོའི་རྩ་བ་གསུམ་ཡོད་དེ། ཧ་དང་ཨ་དང་འ་གསུམ་མོ༎ དབྱངས་ཀྱི་ཤུགས་འབྱུང་བའི་གནས་ཀྱི་རྩ་བ་ནི་གཉིས་སྟེ། ཁོག་པ། མགྲིན་པའོ༎ རྒྱུ་མཚན་ནི།
གསལ་བྱེད་རྣམས་གདོན་པའི་ཚེ་ཁོག་པ་ནས་ཤུགས་སྐྱེད་ཚུལ་དང་། བགྲིན་པ་འབྱེད་བཙུམ་གྱི་སྒོ་ནས་ཕོ་ཡིག་ཧ་སྒྲའི་ཆ་དང་། མ་ནིང་རྣམས་ཨ་སྒྲའི་ཆ། མོ་ཡིག་རྣམས་འ་སྒྲའི་ཆ་དང་ལྡན་པར་གདོན་དགོས་པས་སོ༎
དྲི་བ། ༡༩ ཡི་གེ་སོ་སོའི་གནས་གྱི་ཁྱད་པར་མ་ནོར་བར་བྲིས།
ལན། ཀ་ཁ་ག་ང་ཧ་ཨ་འ་བདུན་ནི་མགྲིན་པ་ལས་བྱུང་། ཅ་ཆ་ཇ་ཉ་ཞ་ཤ་ཡ་བདུན་རྐན་ལས་བྱུང་། ཏ་ཐ་ད་ན་ལ་ལྔ་ནི་སོ་ལས་བྱུང་། པ་ཕ་བ་མ་ཝ་ལྔ་ནི་མཆུ་ལས་བྱུང་། ཙ་ཚ་ཛ་ཟ་ས་ལྔ་ནི་སོ་དང་རྐན་ལས་བྱུང་། ར་ནི་སྤྱི་བོ་ལས་བྱུང་བའོ༎
དབྱངས་ཀྱི་ཨི་དང་ཨེ་ནི་མགྲིན་པ་ལས༎
ཨུ་དང་ཨོ་ནི་མགྲིན་དང་མཆུ་ལས་བྱུང་༎
དྲི་བ། ༢༠ རྐྱང་པའི་ཡི་གེ་ཞེས་པའི་གོ་དོན་གང་ཡིན་དང་། སྔོན་འཇུག་གི་དོན་དང་དབྱེབ། སྔོན་འཇུག་ལྔ་མིང་གཞི་གང་དང་གང་ལ་འཇུག འཕུལ་མེད་ཀྱི་ཡི་གེ་ཇི་ཙམ་ཡོད་བཅས་མ་ནོར་བར་བྲིས།
ལན། མགོ་འདོགས་མ་སྦྱར་བའི་ཡི་གེ་ལ་རྐྱང་པའི་ཡི་གེ་ཞེས་བྱའོ༎ མིང་གཞི་སྔོན་དུ་འཇུག་པས་ན་སྔོན་འཇུག་ཅེས་བྱ་ཞིང་། དབྱེ་བ་ནི། ག་ད་བ་མ་འ་རྣམས་སོ༎ དེ་དག་མིང་གཞི་གང་དང་གང་ལ་འཇུག་པ་ནི།
ཕོ་ཡིག་བ་ནི་ཀ་ཅ་ཏ། །
ཙ་ག་ང་ཇ་ཉ་ད་ན། །
ཛ་ཞ་ཟ་ར་ཤ་སར་འཇུག །
མ་ནིང་ག་ནི་ཅ་ཏ་ཙ། །
ཉ་ད་ན་ཞ་ཟ་ཡ་ཤ །
སར་འཇུག་མ་ནིང་ད་ཡིག་ནི། །
ཀ་པ་ག་བ་ང་མར་འཇུག །
མོ་ཡིག་འ་ནི་ག་ཇ་ད། །
བ་ཛ་ཁ་ཆ་ཐ་ཕ་ཚར། །
ཤིན་ཏུ་མོ་ཡི་མ་ཡིག་ནི། །
ཁ་ཆ་ཐ་ཚ་ག་ཇ་ད། །
ཛ་ང་ཉ་ན་རྣམས་ལ་འཇུག །
འཕུལ་མེད་ཀྱི་ཡི་གེ་ནི། ཝ་འ་ར་ལ་ཧ་ཨ་རྣམས་ཡིན། དེའི་ནང་ནས་ར་ལ་གཉིས་རྐྱང་པ་ལ་འཕུལ་མི་འཐོབ་ཀྱང་། བརྩེགས་འདོགས་ཅན་ལ་ཐོབ་པ་ཡོད་པས། ཕྱེད་འཕུལ་ཞེས་ཀྱང་བྱའོ༎
དྲི་བ། ༢༡ འདོགས་ཅན་གྱི་ཡི་གེེ་བཞི་འི་དབྱེ་བ་རེ་རེ་ནས་བྲིས།
ལན། ཡ་ར་ལ་ཝའི་འདོགས་ཅན་བཞི་ལས། ཡ་བཏགས་བདུན་ནི། ཀྱ་ཁྱ་གྱ་པྱ་ཕྱ་བྱ་མྱ་རྣམས་སོ༎ ར་བཏགས་བཅུ་གཅིག་ནི། ཀྲ་ཁྲ་གྲ་ཏྲ་ཐྲ་དྲ་པྲ་ཕྲ་བྲ་སྲ་ཧྲ་རྣམས་སོ༎ ལ་བཏགས་བཞི་སྟེ། ཀླ་གླ་བླ་ཟླ་རྣམས་སོ༎ ཝ་བཏགས་བཅུ་གཉིས་ཏེ། ཀྭ་ཁྭ་གྭ་ཉྭ་དྭ་ཚྭ་ཞྭ་ཟྭ་རྭ་ལྭ་ཤྭ་ཧྭ་རྣམས་སོ༎ དེ་ལྟར་ན་འདོགས་ཅན་གྱི་ཡི་གེ་སུམ་ཅུ་སོ་བཞི་ཡོད་དོ།།
དྲི་བ། ༢༢ མགོ་ཅན་གྱི་ཡི་གེ་གསུམ་གྱི་དབྱེ་བ་རེ་རེ་ནས་བྲིས།
ལན། ཁ་རྒྱན་ལྟར་ན། ར་མགོ་ཅན་བཅུ་གསུམ་སྟེ། རྐ་རྒ་རྔ་རྗ་རྙ་རྟ་རྡ་རྣ་རྦ་རྨ་རྩ་རྫ་རླ་ལྟ་བུའོ༎ ལ་མགོ་ཅན་བཅུ་སྟེ། ལྐ་ལྒ་ལྔ་ལྕ་ལྗ་ལྟ་ལྡ་ལྤ་ལྦ་ལྷ་ལྟ་བུའོ༎ ས་མགོ་ཅན་བཅུ་གཉིས་ཏེ། སྐ་སྒ་སྔ་སྙ་སྟ་སྡ་སྣ་སྤ་སྦ་སྨ་སྩ་སླ་ལྟ་བུའོ༎ དེ་ལྟར་ན་མགོ་ཅན་གྱི་ཡི་གེ་སུམ་ཅུ་སོ་ལྔ་ཡོད་དོ༎
དྲི་བ། ༢༣ རྗེས་འཇུག་དང་ཡང་འཇུག་གི་གོ་དོན་དང་དབྱེ་བ་བཅས་མ་ནོར་བར་བྲིས།
ལན། མིང་གཞིའི་རྗེས་སུ་འཇུག་པས་ན་རྗེས་འཇུག རྗེས་འཇུག་གི་རྗེས་སུ་ཡང་བསྐྱར་འཇུག་པས་ན་ཡང་འཇུག་ཅེས་བྱའོ༎ རྗེས་འཇུག་གི་དབྱེ་བ་ནི། ག་ང་ད་ན་བ་མ་འ་ར་ལ་ས་རྣམས་སོ༎ ཡང་འཇུག་གི་དབྱེ་བ་ནི། ད་དང་ས་གཉིས་སོ༎
དྲི་བ། ༢༤ མིང་གི་ངོ་བོ་དང་དབྱེ་བ། ཚིག་གི་ངོ་བོ་དང་དབྱེ་བ་བཅས་ཁ་རྒྱན་ལྟར་བྲིས།
ལན། ཡི་གེ་གཉིས་སོགས་འདུས་ནས་དོན་གྱི་ངོ་བོ་ཙམ་སྟོན་པའི་སྒྲ། མིང་གི་མཚན་ཉིད། མཚན་གཞི་ནི། བུམ་པ་ཞེས་བརྗོད་པའི་སྒྲ་ལྟ་བུའོ། །དེ་ལ་དབྱེ་ན། དངོས་མིང་དང་། བཏགས་མིང་གཉིས། ཁྱད་གཞི་ཁྱད་ཆོས་སྦྱར་བའམ་རྣམ་དབྱེ་དང་ཚིག་ཕྲད་ལ་སོགས་པའི་རྐྱེན་ཀྱིས་དོན་གྱི་ཁྱད་པར་སྟོན་པའི་སྒྲ། ཚིག་གི་མཚན་ཉིད། མཚན་གཞི་ནི། བུམ་པ་མི་རྟག་གོ་ཞེས་བརྗོད་པའི་སྒྲ་ལྟ་བུའོ།།
དྲི་བ། ༢༥ རྣམ་དབྱེའི་ངོ་བོ་དང་དབྱེ་བ་མཚན་གཞི་བཅས་མ་ནོར་བྲིས།
ལན། ངག་གཞན་རྣམ་དབྱེ་བརྒྱད་པོ་གང་རུང་གི་གནས་སྟོན་བྱེད་དུ་རྣམ་པར་དབྱེ་བར་བྱ་བའི་སྒྲ་དེ། རྣམ་དབྱེའི་མཚན་ཉིན་ཡིིན། དེ་ལ་དབྱེ་ན། དང་པོ་དངོས་པོ་བརྗོད་པ། བླ་མ་ཞེས་པ་ལྟ་བུ། གཉིས་པ་ལས་སུ་བྱ་བ། བླ་མ་ལ་མཇལ་ལྟ་བུ། གསུམ་པ་བྱེད་པ། བླ་མས་གསུངས་ལྟ་བུ། བཞི་པ་དགོས་ཆེད། བླ་མ་ལ་འབུལ་ལྟ་བུ། ལྔ་པ་འབྱུང་ཁུངས། བླ་མ་ལས་ཐོས་ལྟ་བུ། དྲུག་པ་འབྲེལ་བ། བླ་མའི་བཀའ་ལྟ་བུ། བདུན་པ་གནས་གཞི། བླ་མ་ལ་ཡོད་ལྟ་བུ། བརྒྱད་པ་འབོད་པ། ཀྱེ་ཀྱེ་བླ་མ་ལྟ་བུའོ།།
No comments:
Post a Comment