སྒྲོ་སྐུར་གྱི་མཐའ་དང་དེ་འཛིན་པའི་ཚད།

 ༄༅།   །ནམོགུརུ། སྒྲོ་སྐུར་གྱི་མཐའ་དང་དེ་འཛིན་པའི་ཚད་ལ། ཆོས་གང་དོན་དེར་ཡོད་པའམ་དོན་དེ་ཡིན་པ་ལ། དེ་གཉིས་ལས་ལོག་པ་ནི། སྐུར་འདེབས་ཀྱི་མེད་མཐའི་དོན་དང་།  དེ་ལྟར་འཛིན་པ་ནི།  དེའི་མཐར་འཛིན་ནོ།།  དཔེརན། ལས་འབྲས་མེད་པ་དང་།  དེར་འཛིན་པ་ལྟ་བུའོ།།

ཆོས་གང་དོན་དེར་མེད་པའམ་དོན་དེ་མ་ཡིན་པ་ལ། དེ་གཉིས་ལས་ལོག་པ་ནི། སྒྲོ་འདོགས་ཀྱི་ཡོད་མཐའི་དོན་དང་།  དེ་ལྟར་འཛིན་པ་ནི།  དེའི་མཐར་འཛིན་ཏེ།  དཔེར་ན།  གང་ཟག་རང་སྐྱ་ཐུབ་པའི་རྫས་སུ་ཡོད་པ་དང་།  དེར་འཛིན་པ་ལྟ་བུའམ།  ཆོས་རྣམས་བདན་པར་གྲུབ་པ་དང་། དེར་འཛིན་པ་ལྟ་བུའོ།།

སྟོང་ཉིད་ཀྱི་དགག་བྱ་ཉི་ཚེ་བཀག་པའི་ཤུལ་གྱི་སྒྲོ་འདོགས་གང་ཞིག  ཁྱོད་ཀྱིས་ཞེན་པ་ལྟར་གྲུབ་ནའང་ཐ་སྙད་དུ་ཡོད་པའི་བྱ་བྱེད་རྣམས་མི་འཐད་པ་དེ།  སྒྲོ་འདོགས་མེད་མཐར་འཛིན་པའི་དོན་ཏེ།  དཔེར་ན། སེམས་ཙམ་པས་ཡོངས་གྲུབ་དོན་དམ་པར་ཡོད་པར་འཛིན་པ་དང་།  རང་རྒྱད་པས་བདེན་མེད་རང་གི་སྡོད་ལུགས་ཀྱི་ངོས་ནས་ཡོད་པར་འཛིན་པ་ལྟ་བུའོ།།  དེ་ཡང་རང་རྒྱུད་པས། རང་གི་བསམ་ངོའི་སྟོང་ཉིད་ཀྱི་དགག་བྱ་བཀག་པའི་ཤུལ་དུ་ལྷག་མར་ལུས་པའི་ཡོད་པ་འཇོག་ལོ་བྱས་ཀྱང་།  དགག་བྱ་རྫོགས་པར་མ་ཁེགས་པས།  ཀུན་རྫོབ་ཏུ་ཡོད་ཚུལ་འཇོག་པ་ན།  བློའི་དབང་གིས་བཞག་པ་དང་ཡུལ་གྱི་ངོས་ནས་ཡོད་པ་གཉིས་ཚོགས་ཤིག་ཁས་བླངས་ལ།  དེའི་སྟེང་ནས་ཆོས་གང་ཡང་ཡོད་པར་འཇོག་མི་ནུས་པའི་ཕྱིར།  མེད་མཐའ་ལས་མ་གྲོལ་ལོ།།  

སྐུར་འདེབས་དང་། སྐུར་འདེབས་ཀྱི་མཐར་འཛིན།  སྐུར་འདེབས་ཀྱི་མེད་པའི་མཐར་འཛིན་གསུམ་དོན་གཅིག་པ་དང་།  སྒྲོ་འདོགས་དང་། སྒྲོ་འདོགས་ཀྱི་མཐར་འཛིན།  སྒྲོ་འདོགས་ཀྱི་ཡོད་པའི་མཐར་འཛིན་གསུམ་དོན་གཅིག   དེས་ན་སྒྲོ་འདོགས་ཀྱི་མེད་པའི་མཐར་འཛིན་ནི་དེའི་བྱེ་བྲག་ཞིག་གོ།  

(འདི་དག་ནི་རྩ་ 14/15/246/247 འཇུག་353གི་རྣམ་བཤད་གཉིས་ལ་བརྟེན་ནས་བཤད་ཁུལ་ཡིན་ནོ།།)