༸གོང་ས་ལྷ་མི་རྣམ་འདྲེན་ཆེན་པོ་མཆོག་གི་མཛད་པ་མདོ་ཙམ་བརྗོད་པ་དད་པའི་ཉིན་བྱེད་ཅེས་བྱ་བ་བཞུགས་སོ༎
༄༅། །མཁྱེན་བརྩེའི་སྤྱན་དཀྱུས་མཆོག་ཏུ་རིང་བས་ཀུན་གྱིས་བཀུར་ཀྱང་ཞི་དུལ་དམན་ས་གཟུང་བའི་མཛད་སྤྱོད་ངོ་མཚར་ཅན།།
ཆོས་ལུགས་གྲུབ་མཐའ་བསླབ་བྱ་སྣ་ཚོགས་གཅིག་ཏུ་མཐུན་པ་བྱམས་བརྩེ་བཟོད་བསྲན་གདམས་པ་འཇིག་རྟེན་ཀུན་ཏུ་སྤེལ།།
གནའ་དེང་རིག་གཞུང་གཅིག་ཏུ་སྤུངས་པའི་སྔོན་མེད་ལམ་ཆེན་གསར་དུ་ཕྱེས་པའི་རྡུལ་ཕྲན་ཁོ་ནར་ཨ་འཐས་བཅོམ།།
བློ་ལྡན་ཁྱུ་མཆོག་སྟོང་གི་མགོ་བོར་ལེགས་བཤད་གདོང་ལྔའི་སྦར་ཁྱིམ་དགོད་པས་རིགས་སྨྲའི་སེང་ཆེན་ཁྱེད་ལ་དད།།
ཅེས་སྐྱབས་གཅིག་གངས་ཅན་མགོན་པོ་ལ་དོན་གྱི་བསྟོད་པ་ཚིགས་སུ་བཅད་པའི་དབྱངས་ཀྱིས་བརྗོད་པས་ངག་ལམ་ཡངས་པར་བྱས་ནས་ལྷ་གཅིག་ཕྱག་ན་པད་མོ་༸གོང་ས་ཡིད་བཞིན་ནོར་བུའི་མཛད་སྤྱོད་རང་བློས་གང་དཔོག་ཅིག་བརྗོད་པའི་སྐལ་བཟང་འདུ་བགྱི་བ་ནི།
༡༽ འཇིག་རྟེན་གྱི་སྐྱེ་འགྲོ་མཐའ་དག་ཐུགས་བརྩེས་བདག་གིར་བཞེས་ནས་དུས་ལས་མ་ཡོལ་བར་གདུལ་བྱའི་ཁམས་བསམ་པ་མོས་པ་དང་འཚམས་པར་སྐུ་གསུང་ཐུགས་ཀྱི་མཛད་པ་ལྷུར་བཞེས་པས། མ་འོངས་ས་ཡི་གོ་ལ་འདིར་བསྐལ་མཐར་ཡང་ཞི་བདེའི་འོད་དཀར་བསིལ་པོས་ཁྱབ་པའི་རེ་བའི་དམིགས་བུ་གཏད་ཡུལ་དུ་གྱུར་པས་(རིས་མེད་འགྲོ་བའི་ས་མཁན་ཆེན་པོ།)
༢༽ དམིགས་མེད་ཐུགས་རྗེའི་དབང་གིས་རང་ཅག་ཁ་བ་ཅན་པ་འཕགས་མཆོག་ཕྱག་ན་པད་མོའི་གདུལ་ཞིང་དུ་གཏོགས་པ་རྣམས་རང་གིས་རང་ལ་བརྩེ་བ་ཡང་མོག་པོར་བྱས་ཏེ། ཐོག་མར་བལྟམས་པ་ཡང་སྔ་མ་དྲག་ཕྱིས་མ་དྲག་པར་དུས་སུ་བལྟམས་པ་ནས་མི་རིང་བར་དམར་པོའི་དཔུང་གིས་གངས་ལྗོངས་སྣོད་བཅུད་ཀུན་ཉམ་ཉེས་པར་ཉེ་བ་ན་ཐུགས་བསྐྱེད་གོ་ཆ་བཙན་པོས་སྐུ་ན་ཤིན་ཏུ་ཕྲ་ཡང་ཆོས་སྲིད་གསེར་གྱི་འཁོར་ལོ་བདག་གིར་བཞེས་མ་ཐག་ནས་མང་གཙོའི་ལམ་ཆེན་དུ་བསྐྱོད་པའི་འགོ་བརྩམས། དུས་ལོག་བྱུང་རྗེས་འཕྲལ་མར་མི་མང་གི་འཐུས་ཚོགས་གསར་བཙུགས་ཀྱིས་མ་འོངས་བོད་ཀྱི་རྩ་ཁྲིམས་ཟིན་བྲིས་མཛད་ནས་མང་གཙོར་དངོས་སུ་བཅུག ལོ་རབས་དགུ་བཅུ་པར་གྲོས་ཚོགས་འཐུས་མི་གྲངས་སྤར་ཐོག་བཙལ་བྱོལ་བོད་མིའི་བཅའ་ཁྲིམས་གཏན་ལ་ཕབ། སྟོང་ལོ་གསར་པ་ནས་བཀའ་ཁྲི་མི་མང་གིས་ཐད་ཀར་བདམས་སྲོལ་གཏོད་ནས་མང་གཙོའི་རོ་མཆོག་མྱོང་བའི་སྟ་གོན་རྫོགས་པར་བསྒྲུབས། སྔ་ལོར་མི་མང་མང་མོས་ཀྱི་བོད་ཀྱི་སྲིད་སྐྱོང་གསར་པར་ཆབ་སྲིད་འགན་དབང་ཡོངས་རྫོགས་རྩིས་སྤྲོད་མཐར་ནན་གྱིས་མང་གཙོའི་འཕེལ་ཁ་ཉ་གང་ཟླ་བའི་མཆེད་ཟླར་བསྐྲུན་པ་ནས་གངས་ལྗོངས་བསྟན་འགྲོའི་བདེ་ཐབས་གཞར་ཡང་མི་དོར་བར་ཐུགས་ཀྱི་ཟེའུ་འབྲུར་འཆང་བས་(རྩམ་ཟན་གངས་ཅན་པ་ཡོངས་ཀྱི་བདེ་སྐྱིད་ཉི་མ་ཆེན་པོ།)
༣༽ སྟོན་པ་ཐུགས་རྗེ་ཅན་གྱིས་ལེགས་པར་གསུངས་པའི་ཆོས་འདུལ་བའི་བཅས་མཚམས་ཕྱག་ལེན་རུང་ཆུ་འདེབས་པ་ཡན་ཆད་དགག་སྒྲུབ་གནང་གསུམ་ཕྲ་མོ་ལས་ཀྱང་མི་འདའ་བར་མིག་འབྲས་བཞིན་སྲུང་སྟེ་ཉན་ཐོས་ཀྱི་བསླབ་ཁྲིམས་གཙང་མར་སྤྱོད་ཅིང་། ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པ་བསྙེན་པར་རྫོགས་པའི་དངོས་པོས་རྒྱུད་གཏམས་པའི་བསྟན་པའི་གཞི་མ་འཛིན་པའི་རྒྱུན་འཛིན་གྱིས་ས་སྟེང་གང་བར་མཛད་ལ། ནང་པའི་སྡེ་པ་ཀུན་ཀྱང་སྟོན་པ་གཅིག་གི་རྗེས་འཇུག་ཏུ་བསྒྲུབས་ཤིང་་སྡེ་པ་ཕན་ཚུན་དག་སྣང་ནོར་བུའི་འོད་ཀྱིས་ཁྱབ་པར་མཛད་པས་སྡེ་པ་ཀུན་གྱིས་ཞབས་རྡུལ་སྤྱི་བོས་ནོད་པའི་(མཁན་ཆེན་འདུལ་བ་འཛིན་པ་ཆེན་པོ།)
༤༽ འགྲོ་བ་སྡུག་བསྔལ་གྱི་རྒྱ་མཚོར་བྱིངས་པ་དག་འདོན་པའི་བསམ་པ་མཆོག་བདག་པས་གཞན་གཅེས་པའི་བྱང་ཆུབ་ཀྱི་སེམས་རིན་པོ་ཆེ་ཐུགས་ལ་མངའ་བའི་རྟགས་མདོ་དང་དགོངས་འགྲེལ་མཚན་ལྡན་དག་ལས་ཇི་ལྟར་གསུངས་པ་རྣམས་སྦ་བར་མི་སྤྱོད་པར་བདག་ལྟའི་ཚུར་མཐོང་ཆུ་བུར་མིག་གི་ཡང་སྤྱོད་ཡུལ་དུ་གྱུར་པས་ན་(རྩོད་མེད་ཀྱི་རྒྱལ་སྲས་སེམས་དཔའ་ཆེན་པོ།)
༥༽ གཞིའི་སྐུ་གསུམ་རྒྱལ་བའི་སྐུ་གསུམ་དུ་འགྱུར་བའི་སྨིན་བྱེད་བསྐྱེད་པའི་རིམ་པ་དང་། རིམ པ་ལྔ་ཡིས་བསྡུས་པའི་གྲོལ་བྱེད་རྫོགས་པའི་རིམ་པའི་གནད་གསང་མཐའ་དག་ཐུགས་ཉམས་སུ་བསྟར་བའི་ེརྟོགས་པ་ཚད་དུ་ཕྱིན་པས་སྦུག་སྒོ་འདག་སྦྱར་གྱིས་མི་ཚེ་འདི་ལ་བསྒྲིལ་བ་དག་ལ་ཡང་ལམ་གྱི་ཁུགས་པ་དེ་དང་དེར་གེགས་སེལ་བོགས་འདོན་བགྱི་ལུགས་ཀྱི་མན་ངག་བདུད་རྩིའི་ཀླུང་ཆེན་གངྒའི་རྒྱུན་ལ་འགྲན་པས་(རིག་པ་འཛིན་པ་ཡོངས་ཀྱི་གཙུག་གི་ནོར་བུ།)
༦༽ མདོ་རྒྱུད་དགོངས་འགྲེལ་དང་བཅས་པའི་གཞུང་ལུགས་རྒྱ་མཚོའི་དགོངས་དོན་འབྱེད་པ་ལ་མཁྱེན་རབ་ཆགས་ཐོགས་མི་མངའ་བ་འཕགས་བོད་སྐྱེས་ཆེན་ཀུན་གྱི་འདུས་ཞལ་དུ་གྱུར་པས། སོ་རིག་བཞིའི་སྒོ་ནས་མཁས་པ་དང་མཁས་པར་རློམ་པ་སོགས་བློ་རབ་འབྲིང་ཐ་གསུམ་ཀུན་ཀྱང་རང་རང་གི་སྐལ་བ་དང་འཚམས་པར་ལེགས་བཤད་ཆོས་ཀྱི་བགོ་སྐལ་ལ་སྤྱོད་པའི་ལྐལ་ལྡན་དུ་མཛད་པའི་(སྙིགས་དུས་ཀྱི་ཐུབ་པའི་རྒྱལ་ཚབ་ཉག་གཅིག་པུ།)
༧༽ བོད་བརྒྱུད་ནང་བསྟན་གྱི་གསར་རྙིང་གྲུབ་མཐའ་ཀུན་ལ་བྱང་ཞིང་ཐུགས་ཉམས་སུ་བཞེས་པས། ལུང་སྡེ་སྣོད་གསུམ་གྱི་དོན་མཐའ་དག་གང་ཟག་གཅིག་འཚང་རྒྱ་བའི་ཐབས་ལམ་དུ་འཁྱེར་བའི་གདམས་པ་སྐྱེས་བུ་གསུམ་གྱི་ལམ་རིམ་མམ་ངེས་འབྱུང་བྱང་སེམས་ཡང་དག་པའི་ལྟ་བ་སྟེ་རྒྱལ་དང་རྒྱལ་སྲས་ཀུན་གྱི་གཤེགས་ཤུལ་བདེ་ནས་བདེ་བར་གཤེགས་པའི་ལམ་པོ་ཆེ། སྣང་སྲིད་ཐམས་ཅད་གསལ་སྟོང་གི་རིག་པ་ཀུན་ཏུ་བཟང་པོར་རྫོགས་པའི་འོད་གསལ་སྙིང་པོ། སེམས་ཀྱི་མདངས་ལས་འཁོར་འདས་ཀྱི་ཆོས་ཀུན་ཤར་ཞིང་དེ་ཉིད་ངོ་བོ་བདེན་མེད་དུ་གཉུག་སེམས་བདེ་བ་ཆེན་པོས་ངེས་པའི་ཕྱག་རྒྱ་ཆེན་པོ། ལྷན་སྐྱེས་ཀྱི་གཉུག་མའི་ཡེ་ཤེས་གསལ་སྟོང་ཟུང་འཇུག་ཏུ་སྒོམ་པས་ཅི་སྣང་ཡེ་ཤེས་ཀྱི་རོལ་པར་ཤར་བའི་འཁོར་འདས་དབྱེར་མ་མཆིས་པའི་ལྟ་བ། ཟབ་མོ་དབུ་མའི་ལྟ་བ་དྲི་མ་མེད་པ་དང་འབྲེལ་བའི་སྐུ་ཐུགས་ཟུང་དུ་འཇུག་པའི་ཟབ་ལམ་རིམ་གཉིས་ཀྱི་རྣལ་འབྱོར་ཐུབ་པའི་གསུང་གི་ཉིང་བཅུད་དེ། བཞེད་སྲོལ་དེ་དག་ལ་རྟག་གུས་སྦྱོར་བས་སློབ་ཅིང་ལག་ལེན་ཏུ་བཀལ་བའི་བློ་ལྡན་སྒྱུ་སྐར་ཕྲེང་བའི་དབུས་ན་ཉ་གང་ཟླ་བ་ལྟར་གཞུང་གི་མཁྱེན་རྒྱ་དང་རྟོགས་པའི་དྲོད་ཚད་མཐའ་དག་བླ་མའི་ཡང་བླ་མར་གྱུར་པས་(ས་སྟེང་རྒྱལ་བསྟན་ཡོངས་རྫོགས་མངའ་བདག)
༨༽ མདོར་ན་འཇིག་རྟེན་ན་ཆབ་སྲིད་ཀྱི་གོ་གནས་མཐོན་པོར་འགྱིང་བའི་དབང་བཙན་དཔོན་པོ་དང་། དེ་བཞིན་རྣམ་རྟོག་གི་ཡོ་ལང་ཙམ་མམ་དངོས་པོའི་གཤིས་ལུགས་འཚོལ་བའི་ལྟ་གྲུབ་སྨྲ་བ། སྙན་པས་ས་སྟེང་ཆོད་པའི་རིག་གསར་མཁན་པོ། འཛམ་གླིང་གི་ནོར་རྫས་ཕལ་ཆེར་རང་གི་མཛོད་སྦུག་ཏུ་བཅིངས་པའི་ཕྱུག་བདག རིས་མེད་སྐྱེ་འགྲོའི་འདྲེན་པར་བཀུར་བའི་སྐྱེས་ཆེན་དམ་པ། ཤེས་བྱའི་གནས་བྱེ་བྲག་པའི་གཏིང་དཔོག་པར་གྲགས་པའི་ཆེད་ལས་པ། སློབ་གླིང་ཆེ་ཆུང་གི་ན་གཞོན་བློ་གསར་བ་སོགས་མདོར་ན་ས་སྟེང་སྐྱེ་དགུ་ཡོངས་ཀྱིས་བཀའ་སློབ་དང་ལམ་སྟོན་ཞུ་ཡུལ་བླ་ན་མ་མཆིས་པར་གྱུར་པས་(དུས་རབས་འདིའི་མང་བཀུར་བའི་སློབ་དཔོན་ཆེན་པོའོ།།)
དེ་ལྟར་གངས་ཅན་ལྷ་གཅིག་༸རྒྱལ་དབང་ཕྱག་ན་པདྨོའི་རྣམ་ཐར་རྒྱ་མཚོ་ལས་རང་བློ་སྙིམ་པར་གང་ཆུད་མདོ་ཙམ་བརྗོད་པའི་དགེ་བས། འཕགས་མཆོག་ཐུགས་རྗེ་ཅན་གྱིས་རྒྱལ་བ་སྲས་དང་བཅས་པའི་སྤྱན་སྔར་ཐུགས་དམ་ཞལ་བཞེས་བཞིན་གངས་ལྗོངས་བསྟན་སྲིད་ཀྱི་དོན་དུ་གཅེས་པའི་ལུས་སྲོག་བཏང་བའི་རྒྱལ་གཅེས་དཔའ་བོ་ཕོ་མོ་རྣམས་ཀྱི་་ཐོག་དྲངས་བདག་ཅག་བོད་འབངས་འཕགས་མཆོག་ཕྱག་ན་པདྨོའི་གདུལ་ཞིང་དུ་གཏོགས་པ་འདས་གསོན་ཇི་སྙེད་མཆིས་པ་རྣམས་འཁོར་བའི་མཐར་ཐུག་བར་ཐུགས་རྗེའི་དོ་ར་ནས་གཞར་ཡང་མི་འདོར་བར་མགོན་དཔུང་དམ་པར་༸ཞབས་པད་རྡོ་རྗེའི་གཤིས་སུ་བརྟན་པ་དང། གངས་ཅན་བསྟན་འགྲོའི་བདེ་ཐབས་ཐུགས་བཞེད་བཞིན་ལྷུན་གྱིས་འགྲུབ་པར་གྱུར་ཅིག་གུ།
དུས་ཀྱི་རྒུད་པས་གདུང་བའི་གངས་ལྗོངས་འགྲོའི།།
མགོན་སྐྱབས་ཁྱོད་ཉིད་ལས་གཞན་མ་མཆིས་ན།།
ཞབས་ཟུང་རྟག་པའི་གཤིས་སུ་རབ་བརྟན་ཅིང་།།
ཐུགས་བཞེད་དགེ་མཚན་རིང་མིན་མངོན་འགྱུར་ཤོག།
ཅེས་ ༸ གོང་ས་ལྷ་མི་རྣམ་འདྲེན་ཆེན་པོ་མཆོག་གི་མཛད་པ་མདོ་ཙམ་བརྗོད་པ་དད་པའི་ཉིན་བྱེད་ཅེས་བྱ་བ་འདི་ནི། གང་གི་སློབ་བུའི་གྲལ་མཐའ་བར་རློམ་པ་བློ་གླིང་དབུ་མཛད་ཆེན་མོ་བའི་ལས་ཁུར་འཛིན་པ་ཕྲན་རྩེད་ཐང་བ་བསྟན་འཛིན་དཔལ་མཆིག་གིས་རང་སྤྱིལ་ཆོས་ཀྱི་གན་མཛོད་ནས་ཕྱི་ལོ་ ༢༠༡༢ ཟླ་བ་༡༠ ཚེས་༦ སྟོན་པ་ལྷ་བབས་པའི་དུས་ཆེན་ཁྱད་པར་ཅན་གྱི་ཉིན་སོར་མོའི་འདུ་བྱེད་འཁྲོལ་བའི་ལེགས་ཚོགས་སིདྡྷིརསྟུ།། །།
༄༅། །མཁྱེན་བརྩེའི་སྤྱན་དཀྱུས་མཆོག་ཏུ་རིང་བས་ཀུན་གྱིས་བཀུར་ཀྱང་ཞི་དུལ་དམན་ས་གཟུང་བའི་མཛད་སྤྱོད་ངོ་མཚར་ཅན།།
ཆོས་ལུགས་གྲུབ་མཐའ་བསླབ་བྱ་སྣ་ཚོགས་གཅིག་ཏུ་མཐུན་པ་བྱམས་བརྩེ་བཟོད་བསྲན་གདམས་པ་འཇིག་རྟེན་ཀུན་ཏུ་སྤེལ།།
གནའ་དེང་རིག་གཞུང་གཅིག་ཏུ་སྤུངས་པའི་སྔོན་མེད་ལམ་ཆེན་གསར་དུ་ཕྱེས་པའི་རྡུལ་ཕྲན་ཁོ་ནར་ཨ་འཐས་བཅོམ།།
བློ་ལྡན་ཁྱུ་མཆོག་སྟོང་གི་མགོ་བོར་ལེགས་བཤད་གདོང་ལྔའི་སྦར་ཁྱིམ་དགོད་པས་རིགས་སྨྲའི་སེང་ཆེན་ཁྱེད་ལ་དད།།
ཅེས་སྐྱབས་གཅིག་གངས་ཅན་མགོན་པོ་ལ་དོན་གྱི་བསྟོད་པ་ཚིགས་སུ་བཅད་པའི་དབྱངས་ཀྱིས་བརྗོད་པས་ངག་ལམ་ཡངས་པར་བྱས་ནས་ལྷ་གཅིག་ཕྱག་ན་པད་མོ་༸གོང་ས་ཡིད་བཞིན་ནོར་བུའི་མཛད་སྤྱོད་རང་བློས་གང་དཔོག་ཅིག་བརྗོད་པའི་སྐལ་བཟང་འདུ་བགྱི་བ་ནི།
༡༽ འཇིག་རྟེན་གྱི་སྐྱེ་འགྲོ་མཐའ་དག་ཐུགས་བརྩེས་བདག་གིར་བཞེས་ནས་དུས་ལས་མ་ཡོལ་བར་གདུལ་བྱའི་ཁམས་བསམ་པ་མོས་པ་དང་འཚམས་པར་སྐུ་གསུང་ཐུགས་ཀྱི་མཛད་པ་ལྷུར་བཞེས་པས། མ་འོངས་ས་ཡི་གོ་ལ་འདིར་བསྐལ་མཐར་ཡང་ཞི་བདེའི་འོད་དཀར་བསིལ་པོས་ཁྱབ་པའི་རེ་བའི་དམིགས་བུ་གཏད་ཡུལ་དུ་གྱུར་པས་(རིས་མེད་འགྲོ་བའི་ས་མཁན་ཆེན་པོ།)
༢༽ དམིགས་མེད་ཐུགས་རྗེའི་དབང་གིས་རང་ཅག་ཁ་བ་ཅན་པ་འཕགས་མཆོག་ཕྱག་ན་པད་མོའི་གདུལ་ཞིང་དུ་གཏོགས་པ་རྣམས་རང་གིས་རང་ལ་བརྩེ་བ་ཡང་མོག་པོར་བྱས་ཏེ། ཐོག་མར་བལྟམས་པ་ཡང་སྔ་མ་དྲག་ཕྱིས་མ་དྲག་པར་དུས་སུ་བལྟམས་པ་ནས་མི་རིང་བར་དམར་པོའི་དཔུང་གིས་གངས་ལྗོངས་སྣོད་བཅུད་ཀུན་ཉམ་ཉེས་པར་ཉེ་བ་ན་ཐུགས་བསྐྱེད་གོ་ཆ་བཙན་པོས་སྐུ་ན་ཤིན་ཏུ་ཕྲ་ཡང་ཆོས་སྲིད་གསེར་གྱི་འཁོར་ལོ་བདག་གིར་བཞེས་མ་ཐག་ནས་མང་གཙོའི་ལམ་ཆེན་དུ་བསྐྱོད་པའི་འགོ་བརྩམས། དུས་ལོག་བྱུང་རྗེས་འཕྲལ་མར་མི་མང་གི་འཐུས་ཚོགས་གསར་བཙུགས་ཀྱིས་མ་འོངས་བོད་ཀྱི་རྩ་ཁྲིམས་ཟིན་བྲིས་མཛད་ནས་མང་གཙོར་དངོས་སུ་བཅུག ལོ་རབས་དགུ་བཅུ་པར་གྲོས་ཚོགས་འཐུས་མི་གྲངས་སྤར་ཐོག་བཙལ་བྱོལ་བོད་མིའི་བཅའ་ཁྲིམས་གཏན་ལ་ཕབ། སྟོང་ལོ་གསར་པ་ནས་བཀའ་ཁྲི་མི་མང་གིས་ཐད་ཀར་བདམས་སྲོལ་གཏོད་ནས་མང་གཙོའི་རོ་མཆོག་མྱོང་བའི་སྟ་གོན་རྫོགས་པར་བསྒྲུབས། སྔ་ལོར་མི་མང་མང་མོས་ཀྱི་བོད་ཀྱི་སྲིད་སྐྱོང་གསར་པར་ཆབ་སྲིད་འགན་དབང་ཡོངས་རྫོགས་རྩིས་སྤྲོད་མཐར་ནན་གྱིས་མང་གཙོའི་འཕེལ་ཁ་ཉ་གང་ཟླ་བའི་མཆེད་ཟླར་བསྐྲུན་པ་ནས་གངས་ལྗོངས་བསྟན་འགྲོའི་བདེ་ཐབས་གཞར་ཡང་མི་དོར་བར་ཐུགས་ཀྱི་ཟེའུ་འབྲུར་འཆང་བས་(རྩམ་ཟན་གངས་ཅན་པ་ཡོངས་ཀྱི་བདེ་སྐྱིད་ཉི་མ་ཆེན་པོ།)
༣༽ སྟོན་པ་ཐུགས་རྗེ་ཅན་གྱིས་ལེགས་པར་གསུངས་པའི་ཆོས་འདུལ་བའི་བཅས་མཚམས་ཕྱག་ལེན་རུང་ཆུ་འདེབས་པ་ཡན་ཆད་དགག་སྒྲུབ་གནང་གསུམ་ཕྲ་མོ་ལས་ཀྱང་མི་འདའ་བར་མིག་འབྲས་བཞིན་སྲུང་སྟེ་ཉན་ཐོས་ཀྱི་བསླབ་ཁྲིམས་གཙང་མར་སྤྱོད་ཅིང་། ཚུལ་ཁྲིམས་ཀྱི་ཕུང་པོ་ཡོངས་སུ་རྫོགས་པ་བསྙེན་པར་རྫོགས་པའི་དངོས་པོས་རྒྱུད་གཏམས་པའི་བསྟན་པའི་གཞི་མ་འཛིན་པའི་རྒྱུན་འཛིན་གྱིས་ས་སྟེང་གང་བར་མཛད་ལ། ནང་པའི་སྡེ་པ་ཀུན་ཀྱང་སྟོན་པ་གཅིག་གི་རྗེས་འཇུག་ཏུ་བསྒྲུབས་ཤིང་་སྡེ་པ་ཕན་ཚུན་དག་སྣང་ནོར་བུའི་འོད་ཀྱིས་ཁྱབ་པར་མཛད་པས་སྡེ་པ་ཀུན་གྱིས་ཞབས་རྡུལ་སྤྱི་བོས་ནོད་པའི་(མཁན་ཆེན་འདུལ་བ་འཛིན་པ་ཆེན་པོ།)
༤༽ འགྲོ་བ་སྡུག་བསྔལ་གྱི་རྒྱ་མཚོར་བྱིངས་པ་དག་འདོན་པའི་བསམ་པ་མཆོག་བདག་པས་གཞན་གཅེས་པའི་བྱང་ཆུབ་ཀྱི་སེམས་རིན་པོ་ཆེ་ཐུགས་ལ་མངའ་བའི་རྟགས་མདོ་དང་དགོངས་འགྲེལ་མཚན་ལྡན་དག་ལས་ཇི་ལྟར་གསུངས་པ་རྣམས་སྦ་བར་མི་སྤྱོད་པར་བདག་ལྟའི་ཚུར་མཐོང་ཆུ་བུར་མིག་གི་ཡང་སྤྱོད་ཡུལ་དུ་གྱུར་པས་ན་(རྩོད་མེད་ཀྱི་རྒྱལ་སྲས་སེམས་དཔའ་ཆེན་པོ།)
༥༽ གཞིའི་སྐུ་གསུམ་རྒྱལ་བའི་སྐུ་གསུམ་དུ་འགྱུར་བའི་སྨིན་བྱེད་བསྐྱེད་པའི་རིམ་པ་དང་། རིམ པ་ལྔ་ཡིས་བསྡུས་པའི་གྲོལ་བྱེད་རྫོགས་པའི་རིམ་པའི་གནད་གསང་མཐའ་དག་ཐུགས་ཉམས་སུ་བསྟར་བའི་ེརྟོགས་པ་ཚད་དུ་ཕྱིན་པས་སྦུག་སྒོ་འདག་སྦྱར་གྱིས་མི་ཚེ་འདི་ལ་བསྒྲིལ་བ་དག་ལ་ཡང་ལམ་གྱི་ཁུགས་པ་དེ་དང་དེར་གེགས་སེལ་བོགས་འདོན་བགྱི་ལུགས་ཀྱི་མན་ངག་བདུད་རྩིའི་ཀླུང་ཆེན་གངྒའི་རྒྱུན་ལ་འགྲན་པས་(རིག་པ་འཛིན་པ་ཡོངས་ཀྱི་གཙུག་གི་ནོར་བུ།)
༦༽ མདོ་རྒྱུད་དགོངས་འགྲེལ་དང་བཅས་པའི་གཞུང་ལུགས་རྒྱ་མཚོའི་དགོངས་དོན་འབྱེད་པ་ལ་མཁྱེན་རབ་ཆགས་ཐོགས་མི་མངའ་བ་འཕགས་བོད་སྐྱེས་ཆེན་ཀུན་གྱི་འདུས་ཞལ་དུ་གྱུར་པས། སོ་རིག་བཞིའི་སྒོ་ནས་མཁས་པ་དང་མཁས་པར་རློམ་པ་སོགས་བློ་རབ་འབྲིང་ཐ་གསུམ་ཀུན་ཀྱང་རང་རང་གི་སྐལ་བ་དང་འཚམས་པར་ལེགས་བཤད་ཆོས་ཀྱི་བགོ་སྐལ་ལ་སྤྱོད་པའི་ལྐལ་ལྡན་དུ་མཛད་པའི་(སྙིགས་དུས་ཀྱི་ཐུབ་པའི་རྒྱལ་ཚབ་ཉག་གཅིག་པུ།)
༧༽ བོད་བརྒྱུད་ནང་བསྟན་གྱི་གསར་རྙིང་གྲུབ་མཐའ་ཀུན་ལ་བྱང་ཞིང་ཐུགས་ཉམས་སུ་བཞེས་པས། ལུང་སྡེ་སྣོད་གསུམ་གྱི་དོན་མཐའ་དག་གང་ཟག་གཅིག་འཚང་རྒྱ་བའི་ཐབས་ལམ་དུ་འཁྱེར་བའི་གདམས་པ་སྐྱེས་བུ་གསུམ་གྱི་ལམ་རིམ་མམ་ངེས་འབྱུང་བྱང་སེམས་ཡང་དག་པའི་ལྟ་བ་སྟེ་རྒྱལ་དང་རྒྱལ་སྲས་ཀུན་གྱི་གཤེགས་ཤུལ་བདེ་ནས་བདེ་བར་གཤེགས་པའི་ལམ་པོ་ཆེ། སྣང་སྲིད་ཐམས་ཅད་གསལ་སྟོང་གི་རིག་པ་ཀུན་ཏུ་བཟང་པོར་རྫོགས་པའི་འོད་གསལ་སྙིང་པོ། སེམས་ཀྱི་མདངས་ལས་འཁོར་འདས་ཀྱི་ཆོས་ཀུན་ཤར་ཞིང་དེ་ཉིད་ངོ་བོ་བདེན་མེད་དུ་གཉུག་སེམས་བདེ་བ་ཆེན་པོས་ངེས་པའི་ཕྱག་རྒྱ་ཆེན་པོ། ལྷན་སྐྱེས་ཀྱི་གཉུག་མའི་ཡེ་ཤེས་གསལ་སྟོང་ཟུང་འཇུག་ཏུ་སྒོམ་པས་ཅི་སྣང་ཡེ་ཤེས་ཀྱི་རོལ་པར་ཤར་བའི་འཁོར་འདས་དབྱེར་མ་མཆིས་པའི་ལྟ་བ། ཟབ་མོ་དབུ་མའི་ལྟ་བ་དྲི་མ་མེད་པ་དང་འབྲེལ་བའི་སྐུ་ཐུགས་ཟུང་དུ་འཇུག་པའི་ཟབ་ལམ་རིམ་གཉིས་ཀྱི་རྣལ་འབྱོར་ཐུབ་པའི་གསུང་གི་ཉིང་བཅུད་དེ། བཞེད་སྲོལ་དེ་དག་ལ་རྟག་གུས་སྦྱོར་བས་སློབ་ཅིང་ལག་ལེན་ཏུ་བཀལ་བའི་བློ་ལྡན་སྒྱུ་སྐར་ཕྲེང་བའི་དབུས་ན་ཉ་གང་ཟླ་བ་ལྟར་གཞུང་གི་མཁྱེན་རྒྱ་དང་རྟོགས་པའི་དྲོད་ཚད་མཐའ་དག་བླ་མའི་ཡང་བླ་མར་གྱུར་པས་(ས་སྟེང་རྒྱལ་བསྟན་ཡོངས་རྫོགས་མངའ་བདག)
༨༽ མདོར་ན་འཇིག་རྟེན་ན་ཆབ་སྲིད་ཀྱི་གོ་གནས་མཐོན་པོར་འགྱིང་བའི་དབང་བཙན་དཔོན་པོ་དང་། དེ་བཞིན་རྣམ་རྟོག་གི་ཡོ་ལང་ཙམ་མམ་དངོས་པོའི་གཤིས་ལུགས་འཚོལ་བའི་ལྟ་གྲུབ་སྨྲ་བ། སྙན་པས་ས་སྟེང་ཆོད་པའི་རིག་གསར་མཁན་པོ། འཛམ་གླིང་གི་ནོར་རྫས་ཕལ་ཆེར་རང་གི་མཛོད་སྦུག་ཏུ་བཅིངས་པའི་ཕྱུག་བདག རིས་མེད་སྐྱེ་འགྲོའི་འདྲེན་པར་བཀུར་བའི་སྐྱེས་ཆེན་དམ་པ། ཤེས་བྱའི་གནས་བྱེ་བྲག་པའི་གཏིང་དཔོག་པར་གྲགས་པའི་ཆེད་ལས་པ། སློབ་གླིང་ཆེ་ཆུང་གི་ན་གཞོན་བློ་གསར་བ་སོགས་མདོར་ན་ས་སྟེང་སྐྱེ་དགུ་ཡོངས་ཀྱིས་བཀའ་སློབ་དང་ལམ་སྟོན་ཞུ་ཡུལ་བླ་ན་མ་མཆིས་པར་གྱུར་པས་(དུས་རབས་འདིའི་མང་བཀུར་བའི་སློབ་དཔོན་ཆེན་པོའོ།།)
དེ་ལྟར་གངས་ཅན་ལྷ་གཅིག་༸རྒྱལ་དབང་ཕྱག་ན་པདྨོའི་རྣམ་ཐར་རྒྱ་མཚོ་ལས་རང་བློ་སྙིམ་པར་གང་ཆུད་མདོ་ཙམ་བརྗོད་པའི་དགེ་བས། འཕགས་མཆོག་ཐུགས་རྗེ་ཅན་གྱིས་རྒྱལ་བ་སྲས་དང་བཅས་པའི་སྤྱན་སྔར་ཐུགས་དམ་ཞལ་བཞེས་བཞིན་གངས་ལྗོངས་བསྟན་སྲིད་ཀྱི་དོན་དུ་གཅེས་པའི་ལུས་སྲོག་བཏང་བའི་རྒྱལ་གཅེས་དཔའ་བོ་ཕོ་མོ་རྣམས་ཀྱི་་ཐོག་དྲངས་བདག་ཅག་བོད་འབངས་འཕགས་མཆོག་ཕྱག་ན་པདྨོའི་གདུལ་ཞིང་དུ་གཏོགས་པ་འདས་གསོན་ཇི་སྙེད་མཆིས་པ་རྣམས་འཁོར་བའི་མཐར་ཐུག་བར་ཐུགས་རྗེའི་དོ་ར་ནས་གཞར་ཡང་མི་འདོར་བར་མགོན་དཔུང་དམ་པར་༸ཞབས་པད་རྡོ་རྗེའི་གཤིས་སུ་བརྟན་པ་དང། གངས་ཅན་བསྟན་འགྲོའི་བདེ་ཐབས་ཐུགས་བཞེད་བཞིན་ལྷུན་གྱིས་འགྲུབ་པར་གྱུར་ཅིག་གུ།
དུས་ཀྱི་རྒུད་པས་གདུང་བའི་གངས་ལྗོངས་འགྲོའི།།
མགོན་སྐྱབས་ཁྱོད་ཉིད་ལས་གཞན་མ་མཆིས་ན།།
ཞབས་ཟུང་རྟག་པའི་གཤིས་སུ་རབ་བརྟན་ཅིང་།།
ཐུགས་བཞེད་དགེ་མཚན་རིང་མིན་མངོན་འགྱུར་ཤོག།
ཅེས་ ༸ གོང་ས་ལྷ་མི་རྣམ་འདྲེན་ཆེན་པོ་མཆོག་གི་མཛད་པ་མདོ་ཙམ་བརྗོད་པ་དད་པའི་ཉིན་བྱེད་ཅེས་བྱ་བ་འདི་ནི། གང་གི་སློབ་བུའི་གྲལ་མཐའ་བར་རློམ་པ་བློ་གླིང་དབུ་མཛད་ཆེན་མོ་བའི་ལས་ཁུར་འཛིན་པ་ཕྲན་རྩེད་ཐང་བ་བསྟན་འཛིན་དཔལ་མཆིག་གིས་རང་སྤྱིལ་ཆོས་ཀྱི་གན་མཛོད་ནས་ཕྱི་ལོ་ ༢༠༡༢ ཟླ་བ་༡༠ ཚེས་༦ སྟོན་པ་ལྷ་བབས་པའི་དུས་ཆེན་ཁྱད་པར་ཅན་གྱི་ཉིན་སོར་མོའི་འདུ་བྱེད་འཁྲོལ་བའི་ལེགས་ཚོགས་སིདྡྷིརསྟུ།། །།
No comments:
Post a Comment