གཏམ་དཔེ་ཕྱོགས་བསྒྲིགས།

གཞུས་པར་གཞུས་ལན་མ་སློག་ན།།
གཞུ་མཁན་མང་དུ་མང་དུ།།
སྤྲད་པར་སྤྲད་ལན་མ་སློག་ན།།
སྤྲད་མཁན་ཉུང་དུ་ཉུང་དུ།།

ཡང་ན་རིག་པ་ནོར་དང་བརྗེ།།
ཡང་ན་རིག་པ་རིག་པར་བརྗེ།།

གཞན་ལ་ལྟ་བའི་མིག་ཡོད་ཀྱང་།།
རང་ལ་ལྟ་བའི་མེ་ལོང་དགོས།།

བླ་མའི་སྙན་གྲགས་སློབ་མས་གྲགས་འགུལ་རེད།།
སློབ་མ་ངན་པས་བླ་མ་ཟོག་པོར་གཏོང་།།

ཆུ་འགོ་ནས་རྙོག་ན་ཆུ་རྔ་ཉོག

ཕྱི་རུ་ཞབས་བྲོ་རྒྱབ་པར།།
ནང་དུ་རྡོག་གྲྭ་འགྲིག་དགོས།།

ཁྱི་སྨྱོན་པ་བདག་པོར་ཟུག།
མི་སྨྱོན་པ་རང་མིར་སྡང་།།

སྒོམ་ཆེན་རླུང་གིས་ཟིན་ན་ཅི་ཡང་ཟེར།།
མི་ནག་ཆང་གིས་ན་སྐྱུར་འགོངས་འཆོར།།

འབྲུག་འུར་སྒྲ་ཆེ་ཡང་སྟོང་སྒྲ་རེད།།
འཇའ་ཁ་མདོག་བཀྲ་ཡང་སྣང་བ་རེད།།

མགོ་རུལ་བ་སྣ་ཡིས་མ་ཚོར།

བསོད་ཆེན་མི་ལ་ཁ་གཏོང་ན།།
བསོད་ཆུང་མུ་གེས་ཤི།

ཕྱི་སྣ་ནང་ཁྲིད། ཆར་སྣ་རླུང་ཁྲིད།

རྡུང་རྒྱུ་རྔ་རྡུང་རུང་། དམིགས་རྒྱུ་འདྲེ་ལ་དམིགས།

ཕ་ཡིས་མི་བསྟོད། དགྲ་བོས་བསྟོད།

རང་གིས་རང་བཀྱག
སྣང་བས་རིག་པ་བཀྱག
སྐྱག་པས་རྐུབ་བཀྱག

ཁ་ཏྭ་ནག་པོའི་མིག་ལམ་ན།།
སྐྱག་པ་སེར་པོ་གསེར་གྱི་མཆོད་རྟེན་རེད།།

དྲང་པོ་བཤད་ན་མི་མི་དགའ།།
དབྱུག་པ་ཕྱར་ན་ཁྱི་མི་དགའ།།

ཡར་ལངས་ན་མགོ་རྡབ། མར་བསྡད་ན་རྐུབ་རྡབ།

མི་ངན་ནང་དུ་བསྡད། ཇུས་ངན་ཕྱི་ལ་འདིངས།

གཏམ་དྲིས་ན་མི་ཤོད། སྒུགས་ནས་ཤོད།

འཚིག་པ་ཕ་ལ་ཟ། འགྲམ་ལྕགས་བུ་ལ་བཞུས།

མི་ལ་སྨོད་མི་དགོས། རང་གིས་མ་བྱས་པས་ཆོག
མི་ལ་བསྟོད་མི་དགོས། རང་གིས་བྱས་པས་ཆོག

ཁྱི་སྤྱང་རྐུབ་འབྲེལ།

གྲྭ་པ་དགོན་པར་བསྡད་ཀྱང་།།
བསོད་སྙོམས་གྲོང་ནས་ལེན།།

བསྟོད་མི་ཤེས་མཁན་གྱིས་བསྟོད་པ་ལས།།
སྨད་མི་ཤེས་མཁན་གྱིས་སྨད་པ་དགའ།།

ཨ་མའི་བུ་ལ་ཡོན་ཏན་ཡོད་ན།།
དགའ་ལྡན་ཁྲི་ལ་བདག་པོ་མེད།།

མེད་པ་ལ་འཁྱེར་ཤོག། ཤི་བ་ལ་ལོངས་ཤོག།

རིག་གནས་འབྲི་ནས་ཤེས།
ཚད་མ་རྩོད་ནས་ཤེས།
ལྟ་བ་སྒོམ་ནས་ཤེས།
མཛོད་འདུལ་རྩིས་ནས་ཤེས།

གཞོན་པའི་ཤུགས་ལས་རྒན་པོའི་བྱུས་ཟབ།

ཐོས་རྟགས་ཞི་ཞིང་དུལ་བ།།
བསྒོམས་རྟགས་ཉོན་མོངས་ཆུང་བ།།

གུ་རྭ་གོག་ལས་དོག་པ།
སེམས་ལག་མཐིལ་ལས་ཆུང་བ།
དོགས་པ་རྒྱལ་གཙན་ལས་ཚ་བ།

བཤད་ས་བུ་མོར་བཤད་ཀྱང་།།
གོ་རྒྱུ་མནའ་མས་གོ་དགོས།།

མི་སུམ་ཅུ་བསམ་བློ་སུམ་ཅུ།།
བསམ་ལུགས་མི་འདྲ་ཁ་ཁ།།
མཛོ་སུམ་ཅུ་རྭ་ཅོ་དྲུག་ཅུ།།
སྐྱེ་ལུགས་མི་འདྲ་སོ་སོ།།


བླ་མས་ཅི་གསུངས་མ་ཤེས་གོང་།།
གྲྭ་པས་འདོན་ཚོད་རྡོ་རོ་རོ།།

ཉི་མ་རིང་དུ་རིང་དུ།།
རྩམ་པ་ཞིམ་དུ་ཞིམ་དུ།།

མིས་དྲིས་ནས་ཤེས།
ཁྱིས་བསྣུམས་ནས་ཤེས།

རྟ་ཆུང་ལ་བཞོན་བདེ།
མི་ཆུང་ལ་སྐུལ་བདེ།

བདེན་ཅིང་འཐད་ན་བྱིས་པའི་ངག་ཀྱང་ཉོན།།
མི་བདེན་དོན་དང་འགལ་ན་རྒྱལ་བའི་བཀའ་ཡང་ཞོག།

ཤ་ཚ་བའི་གཏམ་ལ་སྙན་པོ་མེད།།
ནད་ཕན་པའི་སྨན་ལ་ཞིམ་པོ་མེད།།

རང་ངོས་སུ་གཡག་འགྲོ་བཞིན་པ་མི་ཤེས་པར།།
གཞན་ངོས་ཀྱི་ཤིག་འཚོལ་མཁན་ཚོ།།

འབེན་ཤར་ལ་བཞགས།།
མདའ་ནུབ་ལ་འཕེན།།

ཕོ་རྒོད་པོའི་རྒྱབ་ལ་དཔུང་གཅིག་དགོས།།
དཔུང་མེད་ན་སྡར་མ་ཆུ་ཀློད་རེད།།

ཝ་རྔ་མ་ཤ་ལེར་བྲོས་པ་ལས།།
སྟག་འཛུམ་དྲུག་ཉིལ་ལེར་ཤི་ན་དགའ།།

ལུང་པ་ཆུས་འཁྱེར་ན་རྡོ་ལེབ་སྐམ་པོར་མི་ལུས།

ཁ་ལག་པ་ལ་དྲིན་ཆེ།
ལག་པ་ཁ་ལ་དྲིན་ཆེ།

ཤིང་སྐྱོན་མེད་རྒྱ་རྫོང་ནགས་ན་མེད།།
མི་སྐྱོན་མེད་འཛམ་བུའི་གླིང་ན་མེད།།

སྐལ་མེད་སར་སྐེ་མ་སྲིངས།

མགོ་གསེར་སྐུས་བཅག་ན་བྱིན་རླབས་མེད།།
གཉེན་ཉེ་བས་བསད་ན་དགའ་རྒྱུ་མེད།།

དགྲ་ཡི་ངོ་མ་ལོན།།
གཉེན་གྱི་སེམས་བསད།།

མི་སྙན་པའི་གཏམ་དེ་བདེན།

ཕྱི་དགྲ་ལྕགས་ཀྱི་མཛེར་མས་མིག་བཅར་བ་ལས།།
ནང་དགྲ་ཁང་རྒན་ཐིག་པས་ཡིད་དཀྲུག་ན་སྡུག།

མི་ངན་ཕུ་ནུའི་ནང་དུ་བཙན།།
གྲི་ངན་ལག་པའི་སྟེང་དུ་རྣོ།།

སྐད་ཆ་ཉན་ལ་ཤོད།།
རྩམ་པ་ལྡད་ལ་མིད།།

དཀར་ཡོལ་ཆགས་ཀྱང་རི་མོ་བློ་ལ་ངེས།།

མི་ཆེན་པོ་རི་རྒྱལ་ལྷུན་པོ་རེད།།
གསུང་ཆུང་ཆུང་ཨབ་རའི་ཨབ་ཁུང་རེད།།

དཔོན་ལ་མི་སྐྲག དབང་ལ་སྐྲག

ཁམ་བུ་ཟ་འདོད་མ་རེད།
ཁམ་སྡོང་དཀྲུག་འདོད་རེད།