སྤྱི་ལོ ༡༤༡༩ ལོ་སྟེ་ས་ཕག་ལོའི་བོད་ཟླ་བཅུ་པའིོ་ཚེས་ཉེར་ལྔའི་ཉིན་ནི་རྗེ་ཙོང་ཁ་བ་བློ་བཟང་གྲགས་པ་དགོངས་པ་ཆོས་དབྱིངས་སུ་ཐིམ་པའི་དུས་ཡིན་པས། ལོ་རེ་བཞིན་དེ་ཉིན་རྗེ་བདག་ཉིད་ཆེན་པོའི་སློབ་བརྒྱུད་དུ་གཏོགས་པ་རྣམས་སུ་མ་ཟད་བོད་རིགས་དད་ལྡན་ཕལ་ཆེ་བས་བོད་བརྒྱུད་ནང་བསྟན་འཛིན་སྐྱོང་སྤེལ་གསུམ་ལ་སྐུ་དྲིན་ཤིན་ཏུ་ཆེ་བའི་རྗེ་ཙོང་ཁ་པ་ཆེན་པོར་རྗེས་དྲན་དང་དགོངས་རྫོགས་མཆོད་སྤྲིན་རྒྱ་ཆེར་སྤྲོ་བའི་དུས་ཆེན་ཁྱད་པར་ཅན་ཞིག་ཡིན།
ཕྱིས་སུ་འདི་ཉིད་རིམ་བཞིན་བོད་ཆོལ་ཁ་གསུམ་དུ་དར་ཁྱབ་ཤིན་ཏུ་ཆེ་བར་གྱུར་ཏེ་དགའ་ལྡན་ལྔ་མཆོད་ཆེན་མོའི་སྐབས་སུ་དགོན་པ་དང་གྲོང་པའི་ཁང་ཐོག་ཏུ་མཚན་མོར་མར་དང་། གཡིས་ཀྱི་མཆོད་མེ། གློག་སྒྲོན་སོགས་ཀྱི་ཕྲེང་བ་བསྒྲིགས་ནས་མཆོད་པ་འབུལ་ལ། དེ་ལ་ཡོངས་གྲགས་སུ་ ‘གླིང་མེ་’ ཟེར། དེ་ཉིན་དགེ་བ་འགྱུར་ཁྱད་ཆེ་བས་དད་ལྡན་རྒན་དར་གཞོན་གསུམ་ཀུན་གྱིས་དགོན་སྡེ་དང་རྟེན་རྩ་ཆེན་བཞུགས་སའི་ལྷ་ཁང་ལ་ཕྱག་མཆོད་དང་མཚན་བསྐོར་སོགས་དགེ་སྦྱོར་ལ་འབད་ཅིང་སྡིག་པར་འཛེམས་པའི་སྲོལ་བཟང་པོ་ད་ལྟ་ཡང་ཡོད་ལ། ཁྱད་པར་དུས་བཟང་འདིར་རབ་བྱུང་དང་ཁྱིམ་པ་ཕོ་མོ་ཁྱད་མེད་པར་ཀུན་གྱིས་རྗེ་རིན་པོ་ཆེའི་གསོལ་འདེབས་དམིགས་བརྩེ་མ་སྙན་ཞིང་འཇེབས་པའི་དབྱངས་རྟ་རུ་བཀུག་ནས་ཆོས་སྒྲས་ཡུལ་ལུང་ཁྱབ་པས་ཉན་ན་ཉམས་སྤྲོ་བ། བསམ་ན་ཡིད་ལ་དད་པའི་སྣང་བ་འགོག་མེད་དུ་སྟེར་ལ། ལྷག་པར་དུ་འདི་ལྟ་བུའི་དུས་ཆེན་དུ་བོད་མི་རིགས་ཀྱིས་བསྟན་པ་དང་འགྲོ་དོན་རྒྱ་ཆེར་སྤེལ་བའི་སྐྱེས་བུ་དམ་པ་རྣམས་ལ་སྙིང་ཁོང་ནས་དད་གུས་ཚད་མེད་དང་རྗེས་དྲན་ཞུ་བཞིན་པའི་བླ་མེད་ཀྱི་སྤྱོད་བཟང་གསལ་བར་བྱས་ཡོད།
བོད་དབུས་གཙང་གི་ཕྱོགས་སུ་ལྔ་མཆོད་ཀྱི་དགོང་མོར་རྗེ་ཙོང་ཁ་བ་ཆེན་མོར་དད་སེམས་མཚོན་བྱེད་དུ་མྱང་ཐུག་ཅེས་པའི་བག་ཐུག་ངེས་པར་དུ་འཐུང་དགོས་པ་དང༌།དགའ་ལྡན་ལྔ་མཆོད་ནས་བཟུང་དགུན་ཁ་དངོས་སུ་སླེབས་པའི་རྟགས་དང་མཚན་མར་འཛིན་པ་བཅས།
ལྔ་མཆོད་ཆེན་མོའི་སྐྱ་རེངས་འཆར་ལ་ཉེ་བའི་དུས་སུ། བཙུན་པ་ཤྲཱི་མིང་པས་ཤ་ཟིན་སྤུ་ཟིན་དུ་སྤེལ་བ་དགེ་བར་གྱུར་ཅིག
No comments:
Post a Comment