སྤྲད་ཐུབ་ན་བདེ་སྐྱིད་སྤྲོད་དང་། (སྙན་ངག)

ཤྲཱིས་ཧིན་སྐད་ནས་སྒྱུར་སྒྲིག་བྱས། ༢༠༡༨.༧.༢༥

ཉིན་རེ་བཞིན་དུས་ཚོད་ཀྱི་ཚོན་མདོག་འགྱུར་བ་ངས་མཐོང་སོང་།
ཉིན་རེ་བཞིན་དུས་ཚོད་ཀྱི་ཚོན་མདོག་འགྱུར་བ་ངས་མཐོང་སོང་།
ན་ཚོད་དང་མཉམ་དུ་བྱེད་སྟངས་འགྱུར་བ་ངས་མཐོང་སོང་།

འགྲོ་བའི་ཚེ་སེང་གེའི་ཁེངས་དྲེགས་འཆང་བ་ཁོང་ཡང་།
འགྲོ་བའི་ཚེ་སེང་གེའི་ཁེངས་དྲེགས་འཆང་བ་ཁོང་ཡང་།
ནམ་ཞིག་ན་རྐང་པའི་འདེགས་འཇོག་ཙམ་ལའང་། རོགས་པར་རེ་འདོད་འཆའ་བ་ངས་མཐོང་སོང་།

མིག་གི་ལྟ་སྟངས་ཙམ་གྱིས། གཞན་དཔའ་ཁུམ་པར་བྱེད་པ་ཁོང་ཡང་།
མིག་གི་ལྟ་སྟངས་ཙམ་གྱིས། གཞན་དཔའ་ཁུམ་པར་བྱེད་པ་ཁོང་ཡང་།
ནམ་ཞིག་ན་མིག་དེ་ནས་ཆར་གྱི་རྒྱུནབཞིན། མཆི་མ་ལྷུང་ལྷུང་བབས་པ་ངས་མཐོང་སོང་།

སྲ་ཞིང་འཁྲེགས་པའི་རྡོ་ཡང་ལག་བརྡ་ཙམ་གྱིས་སྟོར་བར་བྱེད་པ་ཁོང་ཡང་།
སྲ་ཞིང་འཁྲེགས་པའི་རྡོ་ཡང་ལག་བརྡ་ཙམ་གྱིས་སྟོར་བར་བྱེད་པ་ཁོང་ཡང་།
ནམ་ཞིག་ན་ལག་པ་དེ་ཉིད་ཤིང་གི་ལོ་མ་བཞིན་དུ། ཁྲུག་ཁྲུག་སྡར་གསིག་རྒྱག་པ་ངས་མཐོང་སོང་།

སྐད་གདངས་ལ་འབྲུག་སྟོང་སྡིར་བའི་ངར་ཤུགས་ཡོད་པ་ཁོང་ཡང་།
སྐད་གདངས་ལ་འབྲུག་སྟོང་སྡིར་བའི་ངར་ཤུགས་ཡོད་པ་ཁོང་ཡང་།
ནམ་ཞིག་ན་དབང་མེད་དུ་ཁ་ལ་སྒོ་ལྕགས་ཐེབས་ཏེ། གྲག་འགུལ་ཅི་ཡང་མེད་པ་ངས་མཐོང་སོང་།

ལང་ཚོ་དང་། སྟོབས་ཤུགས། རྒྱུ་ནོར།
འདི་མཐའ་དག་དཀོན་མཆོག་གི་ཐུགས་རྗེ་རེད།
དེ་དག་ཤོར་བ་དང་། སྲོག་མེད་པའི་མི་ཞིག་ཏུ་གྱུར་པ་ངས་མཐོང་སོང་།

ཁྱེད་ཀྱིས་དེ་རིང་དེ་འཕྲོ་བརླག་མ་གཏོང་། འཕྲོ་བརླག་མ་གཏོང་། ངའི་གྲོགས་པོ།
དུས་ཀྱི་ཆུ་རྒྱུན་ནང་ཞེ་པོ་ཡིན་ཟེར་མཁན་མང་པོ།
ཅི་བྱ་གཏོལ་མེད་དུ་གྱུར་པ་ངས་མཐོང་སོང་།

སྤྲོད་ཐུབ་ན་རང་གིས་རང་ཉིད་ལ་བདེ་སྐྱིད་སྤྲོད་དང་།
སྡུག་བསྔལ་སྤྲད་མཁན་ནི་སྟོང་ཕྲག་མང་པོ་མཐོང་སོང་།
སྡུག་བསྔལ་སྤྲད་མཁན་ནི་སྟོང་ཕྲག་མང་པོ་མཐོང་སོང་།