འཕགས་པ་ཐུགས་རྗེ་ཆེན་པོ་ལ་ཕྱག་འཚལ་ལོ།།
ཚེ་མི་བརྟན་རླུང་དམར་ནང་གི་མར་མེ་ལྟ་བུ་ལ།།
བློ་མ་འདྲིས་རྟག་པར་སེམས་པ་འཁྲུལ་བའི་ཕུལ།།
ཉིང་འཁྲུལ་་དེ་རུ་ལྷུང་ཡང་ཟོག་པོ་ཆོས་པར་རློམ།།
ཆོས་བྲེད་ལ་ཤོར་བའི་ཐ་ཤལ་གྱི་མི་བུ་ང་།།
རང་རྒྱུད་ཆོས་ཀྱིས་མ་དུལ་གང་གིས་ཐུལ།།
སྐྱབས་རྒྱལ་ཀུན་འདུས་ཞལ་དྲིན་ཅན་བླ་མ་ཡང་།།
ཕལ་རང་གི་སྣང་ངོར་ཐ་མལ་རང་དུ་ལུས།།
དམ་ཆོས་ཐོས་ལོ་དང་བྱེད་ལོས་མི་ཚེ་ཐལ་ཡང་།།
བློ་ཁེལ་བའི་ཕྱི་མའི་ལམ་རྒྱགས་འདི་ཡིན་མེད་པར།།
ཆ་མེད་པར་གདུག་ཅན་ནད་ཀྱིས་ཟིན་ཏེ།།
བཟློག་ཏུ་མེད་པར་འཆི་བདག་ཁོ་སླེབས་པ་ན།།
ཅི་བྱ་གཏོལ་བྲལ་དུ་འགྱུར་ཏེ་ངུ་ངག་དང་ལྷན་ཅིག།།།
དབུགས་ཀྱི་རྒྱུ་བ་ཇེ་བྲེལ་དུ་བརྩེགས་ཀྱང་།།
བློས་ད་དུང་འཚོ་བའི་རེ་ཐག་མ་ཆད་པར།།
མལ་དང་གདན་ལ་ལག་གིས་དམ་དུ་འཇུས་ནས།།
དངངས་སྐྲག་གིས་བཤང་གཅི་མལ་དུ་འཆོར།།
མིག་ཟུང་ནས་མཆི་མ་ལྷུབ་ལྷུབ་དུ་བཞུར་བཞིན།།
ཤུལ་ཐག་རིང་བའི་ཕྱི་མའི་ལམ་བུ་འགྲིམ་པའི།།
ཆེས་མཐའ་མཇུག་གི་དུས་དེར་བདག་ནི་ཅི་རང་དྲག།
དུས་དེ་ཙ་ན་རེ་ས་དཀོན་མཆོག་ལས་མེད་པས།།
ཚེ་སྔ་ཕྱི་ལས་འབྲས་བསླུ་བ་མེད་པ།།
གཞི་བདེན་གཉིས་ཀུན་བྱང་བདེན་བཞིའི་གནས་ལུགས།།
ལྕེ་རྩེ་རུ་མ་ལུས་ཞེ་ནས་ངེས་པ་རྙེད་པར།།
ཕྱི་བཤོལ་སྤངས་ཤིང་བློ་རྩེ་གཅིག་ཏུ་བསྒྲིམས་ཏེ།།
རྩོལ་བ་བསྟེན་པ་བྱ་བའི་དོན་པོར་གཟུང་ལ།།
འཆི་དུས་མ་འགྱོད་ཙམ་ཞིག་བྱ་རན་འཕྱིས་གྲབས་འདུག་གོ།
ཤྲཱིས།
༢༠༡༦.༣.༡༣ ཉིན།
No comments:
Post a Comment