མཛོད་ཀྱི་མུ་བཞི་དགེའོ།།

དེ་ཡང་ཇི་སྐད་དུ།  དམ་པའི་ཆོས་མངོན་པ་མཛོད་ལས། ཤེས་པ་ཟག་བཅས་ཟག་པ་མེད༎ ཞེས་སོགས་ཀྱི་སྐབས་ནས་བསྟན་པའི་ཤེས་པ་བཅུ་པོ་དེ་དག  ཆོས་བཅུ་དག་ནི་སྦྱར་བར་བྱ༎  ཞེས་པའི་ཆོས་བཅུ་པོ་དེ་དག་གི་ཡུལ་ཅན་དུ་བརྩི་རུང་གི་ཚན་པ་བརྐྱང་ན་ ༥༨ ཡོད། དེ་ལ་མིང་འདྲ་བསྡོམས་པའི་ཚན་པ་ ༨ དང་། སླར་བསྡུ་ཚན་པ་ ༢ ཡོད། ཆོས་བཅུ་ལས་འདོད་པ་དང་ཟག་མེད་ཀྱི་མཚུངས་ལྡན་ཡིན་མིན་བཞི་དང་འདུས་མ་བྱས་ལུང་མ་བསྟན་རྣམས་ཚན་པ་སྔ་མ་དང་། དེ་དག་ལས་གཞན་པ་རྣམས་ཚན་པ་ཕྱི་མར་བྱས་ནས། ཤེས་པ་བཅུ་པོ་རེ་རེ་ནས་ཚན་པ་སྔ་མའི་ཡུལ་ཅན་དུ་བརྩི་རུང་གྲངས་མང་ལ་ཕྱི་མའི་ཡུལ་ཅན་དུ་བརྩི་རུང་གྲངས་ཉུང་བ། དེ་ལས་ལྡོག་པ། གྲངས་མཉམ། གང་མིན་དང་བཅས་པ་ལ་མུ་བཞི། མུ་བཞི་པོ་རེ་རེ་ལ་ཡང་བཟོད་ཤེས་ལྟ་གསུམ་བརྩི་རུང་གྲངས་མཉམ་པ་མ་ཡིན་མི་མཉམ་པ་མ་ཡིན་པའི་ཕྱིར།

1. ཀུན་རྫོབ་ཤེས་པའི་ཡུལ་དུ། བཅུ་པོ་ཐམས་ཅད་དང༌། 

2. ཆོས་ཤེས་ཀྱི་ཡུལ་དུ། འདོད་པ། ཟག་མེད་འདུས་བྱས་དང་གཉིས་ཀྱི་མཚུངས་ལྡན་ཡིན་མིན་གཉིས་གཉིས་ཏེ་བཞི་དང་། འདུས་མ་བྱས་དགེ་བ་བཅས་ལྔ།

3. རྗེས་ཤེས་ཀྱི་ཡུལ་དུ། ཁམས་གོང་མ་གཉིས། ཟག་མེད་འདུས་བྱས་དང་གསུམ་གྱི་མཚུངས་ལྡན་ཡིན་མིན་གཉིས་གཉིས་ཏེ་དྲུག་དང་། འདུས་མ་བྱས་དགེ་བ་བཅས་བདུན། 

4. སྡུག་བསྔལ་ཤེས་པའི་ཡུལ་དུ། ཁམས་གསུམ་གྱི་མཚུངས་ལྡན་ཡིན་མིན་གཉིས་གཉིས་ཏེ་དྲུག

5. ཀུན་འབྱུང་ཤེས་པའི་ཡུལ་དུའང་། ཁམས་གསུམ་གྱི་མཚུངས་ལྡན་ཡིན་མིན་གཉིས་གཉིས་ཏེ་དྲུག

6. འགོག་པ་ཤེས་པའི་ཡུལ་དུ། འདུས་མ་བྱས་དགེ་བ་གཅིག་པུ། 

7. ལམ་ཤེས་པའི་ཡུལ་དུ། ཟག་མེད་འདུས་བྱས་ཀྱི་མཚུངས་ལྡན་ཡིན་མིན་གཉིས།

8. ཕ་རོལ་སེམས་ཤེས་ཀྱི་ཡུལ་དུ། འདོད་གཟུགས་གཉིས་དང་ཟག་མེད་བཅས་གསུམ་གྱི་མཚུངས་ལྡན་གསུམ།

9. ཟད་པ་ཤེས་པའི་ཡུལ་དུ། འདུས་མ་བྱས་ལུང་མ་བསྟན་མ་གཏོགས་པ་དགུ།

10. མི་སྐྱེ་བ་ཤེས་པའི་ཡུལ་དུ། འདུས་མ་བྱས་ལུང་མ་བསྟན་མ་གཏོགས་པ་དགུ།

ཀུན་རྫོབ་ཤེས་པའི་ཡུལ་དུ་བཅུ༎

ཆོས་ལྔ་རྗེས་དྲུག་སྡུག་ཀུན་དྲུག།

འགོག་ལམ་སེམས་ཤེས་གཅིག་གཉིསགསུམ༎

ཟད་དང་མི་སྐྱེའི་ཡུལ་དུ་དགུ༎

སྔ་མ་གྲངས་མང་། 

1. ཆོས་ཤེས། ༤-༡

2. ཕ་རོལ་སེམས་ཤེས། ༢-༡

ཕྱི་མ་གྲངས་མང་། 

1. རྗེས་ཤེས། ༢-༥ 

2. སྡུག་བསྔལ་ཤེས་པ། ༢-༤

3. ཀུན་འབྱུང་ཤེས་པ། ༢-༤ 

4. ཟད་པ་ཤེས་པ། ༤-༥ 

5. མི་སྐྱེ་བ་ཤེས་པ། ༤-༥ 

གྲངས་མཉམ། 

1. ཀུན་རྫོབ་ཤེས་པ། ༥-༥

གང་མིན། 

1. འགོག་པ་ཤེས་པ། ༠-༡ 

2. ལམ་ཤེས་པ། ༢-༠